Gen 30 | EkySCThai | STEP | เออโต๊โพะ เร๊อ เบ๊อะ โหมะ ราเชล ซิเง เกอเร๊อ เฮ๊อ อาเหน่ เน๊อ อา พู๊โอ่หนิ เป่เกอ เพยาโคบ เตเพร่ว โต่ เบ๊อะเนอ, อา ซิเคว๊ เกอเร๊อเกอ อาแหม่เพรเหมาะ. ฮู๊เนออาขว่าอาคยา, อา เฮ๊ เพยาโคบ เน๊อ, “นอ พู๊โอ่แล เกอมอ แว, เก่ หม่าโต่ หม่า แว เซอ แก๋ หม่า อาโมเล๊อเจ๊อ.”

Genesis 30

1 เออโต๊โพะ เร๊อ เบ๊อะ โหมะ ราเชล ซิเง เกอเร๊อ เฮ๊อ อาเหน่ เน๊อ อา พู๊โอ่หนิ เป่เกอ เพยาโคบ เตเพร่ว โต่ เบ๊อะเนอ, อา ซิเคว๊ เกอเร๊อเกอ อาแหม่เพรเหมาะ. ฮู๊เนออาขว่าอาคยา, อา เฮ๊ เพยาโคบ เน๊อ, “นอ พู๊โอ่แล เกอมอ แว, เก่ หม่าโต่ หม่า แว เซอ แก๋ หม่า อาโมเล๊อเจ๊อ.”

2 เพยาโคบ ซิปล่อดุ ลู เร๊อ อา เฮ๊ เน๊อ, “แว หม่า จอแปแหร่ดุ แหน่ แอ? เพร เด๊อ อา นอ พู๊โอ่แล เน โต่ เนอหม่า ตื๋อ จอแปแหร่ดุ แพ๊.”

3 โหมะ ราเชล เฮ๊ฉื่อคยา ลู เน๊อ, “เออเล๊ แวหลู่โหมะ เหมาะบิลฮาห์ โอ่ เบ๊อะเออ. แซ่ฮู๊ อา เก่ พู๊โอ่แลหนิ เป่เกอ แวเงเนอ, โนโอ่เมอเต่อ มอ เน๊อ ลู เนอ, เร๊อ แว เก่ โอ่เบ๊เกอ เน๊อ แวหี่พู๊แพพู๊ เร๊อดื่อ เน๊อ อาขว่าอาคยา ปา.”

4 ฮู๊เนอเร๊อ โหมะ ราเชล นอพย๊า อาเว เน๊อ อาหลู่โหมะ เหมาะบิลฮาห์ เร๊อ อา นอ ทวา ลู เน๊อ อาเม เร๊อ เพยาโคบ โนโอ่เมอเต่อ เน๊อ เหมาะบิลฮาห์. 5 ฮู๊เนออาขว่าอาคยา, โหมะบิลฮาห์ โหมะดอแถ่ เร๊อ อา พู๊โอ่แล หนิเป่ เพยาโคบ อาพู๊เพรคู เตเพร. 6 เออโต๊โพ๊ เร๊อ โหมะ ราเชล เฮ๊ เน๊อ, “จอแปแหร่ดุ ข่าเด๊อะโลเฮ๊อ เน๊อ แวเต่ เออ อาโต เฮ๊อ, อา หนิโฮ เฮ๊อ แว เตกุยซิยอแถ่ ลู เร๊อ อา เด๊อะตา เป่ เฮ๊อ แว พู๊เพรคู เตเพร เฮ๊อ.” ฮู๊เนออาขว่าอาคยา, อา เอ๊ เกอเร๊อ ลูมุย เน๊อ คูดาน. (อาโหง่แลช๊า หม่า จอแปแหร่ดุ เมจา กาคยา เป่เฮ๊อ เด๊อ แวตากยา เฮ๊อ.)

7 โหมะ ราเชล อาหลู่โหมะ โหมะบิลฮาห์ โหมะดอแถ่ คยาแซ๊ เร๊อ อา พู๊โอ่แลหนิ เป่โป่ เพยาโคบ อาพู๊เพรคู เนอเพร เตเพร. 8 โทเร๊อ โหมะ ราเชล เฮ๊ เน๊อ, “แว ดี๊เจ แหน่เจ๊อ เน๊อ แวแหม่เพรเหมาะ เร๊อ แว เมเป่ เฮ๊อ ลู เฮ๊อ,” ฮู๊เนออาขว่าอาคยา, อา เอ๊ เกอเร๊อ ลูมุย เน๊อ คูนัฟทาลี. (นัฟทาลี อาโหง่แลช๊า หม่า จ่าเพรอจ่าหร่อ ดี๊เจ.)

9 เบ๊อะ โหมะเลอาห์ ซิเง เกอเร๊อ อาเหน่ เน๊อ อา พู๊โอ่ ตื๊อดื่อแก เฮ๊อ เบ๊อะเนอ, อา นอพย๊า อาหลู่โหมะ เหมาะศิลปาห์ เน๊อ อาเว เร๊อ อา นอ ทวา ลู เน๊อ อาเม. 10 เร๊อ โหมะเลอาห์ อาหลู่โหมะ โหมะศิลปาห์ พู๊โอ่แลหนิเป่ เพยาโคบ อาพู๊เพรคู เตเพร. 11 โหมะเลอาห์ เร๊อ, “เก๋อ แว บุ๊ยแร๊ แหน่เจ๊อ,” อา เฮ๊ เร๊อ อา เอ๊ เกอเร๊อ ลูมุย เน๊อ คูกาด. (กาด อาโหง่แลช๊า หม่า บุ๊ยแร๊.)

12 เร๊อ โหมะเลอาห์ อาหลู่โหมะ โหมะศิลปาห์ พู๊โอ่แลหนิ เป่โป่ เพยาโคบ อาพู๊เพรคู เนอเพร เตเพร. 13 โทเร๊อ โหมะเลอาห์ เฮ๊ เน๊อ, “แว ซิครือ โกโน๊ โต่, เพรเหมาะ เต๊เห่ เก่ เอ๊ แลแค เฮ๊อ แว เน๊อ แกแย เด๊อ อา ซิครือซิลอ เตเพร ปา,” เร๊อ อา เอ๊ เกอ เร๊อ ลูมุย เน๊อ คูอาเชอร์. (อาเชอร์ อาโหง่แลช๊า หม่า ซิครือซิลอ.)

จอแปแหร่ดุ เด๊อะบุ๊ยเด๊อะเตอเรอ โหมะ เลอาห์ อาพู๊เพรคู ซิเนอ เน๊อ อาพู๊เพรเหมาะ เตเพร.

14 เตอเนอเค เบ๊อะ อู เก๊ เฮ๊อ โบ๊กู่ลา เบ๊อะเนอ, คูรูเบน แฮ เด๊อ เพร๊ขุ เร๊อ อา แฮ แม๊เถอะ เตขุเหมาะ ^{▼▼เตขุเหมาะ เออเต๊เห่เนอ เพรเหมาะโชพู๊ เต๊เห่ เก่นอเกอเร๊อ เฮ๊เร๊อ อา พู๊โอ่ แจ่ คยาแซ๊} เต๊เห่. เร๊อ อา พย๊ากาหนิ ลู เด๊อ อาโหมะ โหมะเลอาห์ อาโอ่. เร๊อ โหมะ ราเชล เฮ๊ โหมะเลอาห์ เน๊อ, “แด่ทูซิปล่อ เร๊อ เด๊อะ เป่เกอ แว เตขุเหมาะ เด๊อ เนพู๊ จว๊าพย๊ากาหนิ เนอเต๊เห่ แต๋?”

15 หม่าแน๊เรอ โหมะ เลอาห์ เฮ๊ฉื่อ ลู เน๊อ, “เน พย๊าเผ่โท เฮ๊อ แวเว เร๊อ หม่า อา เล๊อบา แหน่ล๋าย เด๊อ เนเง โต่ แอ? กู๊แหน่เร๊อ เน ซิหยื่อ กุยเผ่ โป่โป่ เตขุเหมาะ เด๊อ แวพู๊ จว๊าพย๊ากาหนิ เออ แอ?”

เร๊อ โหมะ ราเชล เฮ๊กาคยาฉื่อ ลู เน๊อ, “เก่ เฮ๊ ฮู๊เนอเร๊อ, เน เก่ เด๊อะ แว เตขุเหมาะ เด๊อ เนพู๊ จว๊าพย๊ากาหนิ เออเนอ เฮ๊เร๊อ, เออเตเซ ปา แว นอโอ่เมอ เต่อดื่อ แวเว เน๊อ เน ปา.”

16 เบ๊อะ เหมาะเฮ๊เหมาะตา เพยาโคบ โอ่ เด๊อ เพร๊ขุ กา เบ๊อะเนอ, โหมะเลอาห์ เถ่จว๊าแม๊ฉื่อ ลู เร๊อ อา เฮ๊ ลู เน๊อ, “เออ เตเซ เร๊อ เน เบ่ โอ่เมอเต่อ ติเน๊อ แว, เมเตเฮ๊เร๊อ แว เด๊อะ โทเฮ๊อ อาเก่ เน๊อ แวพู๊ อาเตขุเหมาะ เนอเฮ๊อ.” ฮู๊เนอเร๊อ เบ๊อะเนอ เตเซ เพยาโคบ จว๊าโอ่เมอเต่อ เน๊อ ลู.

17 จอแปแหร่ดุ หนิดา โหมะเลอาห์ อาเตกุยจ๊อเบ เร๊อ อา โหมะดอแถ่ คยาแซ๊, เร๊อ อา พู๊โอ่แล หนิเป่ เพยาโคบ อาพู๊เพรคู แงเพร เตเพร. 18 เร๊อ โหมะเลอาห์ เฮ๊ เน๊อ, “แวเด๊อะหนิ แวหลู่โหมะ เน๊อ แวเว อาขว่าอาคยา, จอแปแหร่ดุ เด๊อะ เฮ๊อ แว อาคว๊าอาเก่ เฮ๊อ.” ฮู๊เนอเร๊อ อา เอ๊ เกอเร๊อ ลูมุย เน๊อ คูอิสสาคาร์. (อิสสาคาร์ อาโหง่แลช๊า หม่า คว๊าเก่.)

19 โหมะเลอาห์ โหมะดอแถ่ คยาแซ๊ เร๊อ อา พู๊โอ่แลหนิ เป่โป่ เพยาโคบ อาพู๊เพรคู บาแถ่ เฮ๊อ อาเพรโซซว๊า. 20 เร๊อ โหมะเลอาห์ เฮ๊ เน๊อ, “จอแปแหร่ดุ เด๊อะเฮ๊อ แว เชหยู่ เด๊อ อางูดุงูชอ เฮ๊อ, เออโตโพ๊ เร๊อ แวเว เก่ แด่ดุหยื่อแหน่ เกอแหน่ เฮ๊อ แว ปาเฮ๊อ, เมเตเฮ๊เร๊อ แว พู๊โอ่ บาเป่ เฮ๊อ ลู พู๊เพรคู อาเพร โซซว๊า เฮ๊อ.” ฮู๊เนออาขว่าอาคยา, อา เอ๊ เกอเร๊อ ลูมุย เน๊อ คูเศบูลุน. (เศบูลุน อาโหง่แลช๊า หม่า แด่ดุหยื่อแหน่.)

21 อาโหน่เนอ, อา พู๊โอ่แล หนิคยาแซ๊ พู๊เพรเหมาะ เตเพร เร๊อ อา เอ๊ เกอเร๊อ ลูมุย เน๊อ เหมาะดีนาห์.

22 โทเร๊อ จอแปแหร่ดุ ซิเหน่แถ่โต่ โหมะ ราเชล. เร๊อ จอแปแหร่ดุ หนิดา ลูเตกุยจ๊อเบ เร๊อ อา นอพู๊โอ่ ลู. 23 อา โหมะดอแถ่ เร๊อ อา พู๊โอ่แกหนิ พู๊เพรคู เตเพร เร๊อ อา เฮ๊ เน๊อ, “จอแปแหร่ดุ พย๊าตาพาแก ลอ เป่ เฮ๊อ แว เตซิเตเร เต๊เห่ เฮ๊อ.” 24 เร๊อ อา เอ๊ เกอเร๊อ ลูมุย เน๊อ คูโยเซฟ, เร๊อ อา เฮ๊ เน๊อ, “จอแปแหร่ ตูจูเพร เก่ เด๊อะ เป่โป่ดื่อ แว พู๊เพรคู เตเพร ปา นี๋.” (โยเซฟ อาโหง่แลช๊า หม่า เด๊อะโป่.)

เพยาโคบ อาเตมีเตดอ โอ่โหร่โอ่เอ๊แถ่

25 เบ๊อะ โหมะ ราเชล พู๊โอ่แลหนิ โทเฮ๊อ คูโยเซฟ เบ๊อะเนอ, เพยาโคบ เฮ๊ เพลาบัน เน๊อ, “แซ่ฮู๊ แว เก่ กาโต่น๊อ เกอ เด๊อ แวหี่แวแพ แวเทอแวเก่ อาเงเนอเร๊อ, ฮู๊ เป อ๊อแลโอ่ โทเฮ๊อ ลูโหง่เนอ, ปลวากามอ แว นี๋. 26 เด๊อะ เอ๊กาหนิ เกอ แวพู๊แวเม เต๊เห่, เมเตเฮ๊เร๊อ แว เอ่แร โทเป๊ เฮ๊อ เด๊อ เหย่ซีเง เฮ๊อ. แว แอ๊จื๊อเอ่แอ๊จื๊อแร แร๊ เป่เจ๊อ เน บ๋า เต เนอ เน ซิเงลอ ดื่อ เฮ๊อ.”

27 หม่าแน๊เรอ เพลาบัน เฮ๊ ลู เน๊อ, “อา เก่ โต เน๊อ เนซิปล่อ เฮ๊เร๊อ, แด่ทูซิปล่อ เร๊อโอ่เกอโป่ เหร่อ แว เบ๊อะเออ. เด๊อ เนขุเนคยาเร๊อ จอแปแหร่ ตูจูเพร เด๊อะบุ๊ยเด๊อะเตอเรอ เฮ๊อ แว. เร๊อ แว ดุแหย่แถ่เซ เฮ๊อ.” 28 โทเร๊อ อา เฮ๊โป่ ลู เน๊อ, “เฮ๊มอ แว, แว โหล่เด๊อะ เนคว๊านเก่ บ๊าเต? อา ตา บ๊าเต๋ เร๊อ แว เด๊อะดื่อ เน.”

29 เพยาโคบ เฮ๊ฉื่อ คยาแซ๊ ลู เน๊อ, “แว เอ่แร แร๊ เป่เจ๊อ เด๊อ เนเง บ๋า เต, โท๊โต่ แว แม๊ตู่ หนิแร๊ เป่ เนเตมีเตดอ เต๊เห่ เร๊อ อา โอ่โหร่โอ่เอ๊แถ่ เจ๊อเฮ๊อ บ๋า เตเนอ เน ซิเงดื่อ เฮ๊อ. 30 เฮ๊ตาต๋า หม่า, เบ๊อะ แว แฮ แต่ล๋ายโต่ เบ๊อะเนอ, เนเตมีเตดอ โอ่ปีตี๋ ลู แพ๊, หม่าแน๊เรอ กู๊แหน่เออ เนเตมีเตดอ โอ่โหร่โอ่เอ๊ โอ่ปลูโอ่เผ่ เจ๊อ เฮ๊อ. แว เม อิเตเต๋ เบ่เบ่, จอแปแหร่ ตูจูเพรเด๊อะบุ๊ยเด๊อะเตอเรอ เน. หม่าแน๊เรอ กู๊แหน่ เออ แว เอ่แร เป่ โชชื๋อ แพ๊ เนเง แพ๊ เร๊อ แว เก่ ตี๊หรี่ แจ่ หนิเป่เกอ แวหี่พู๊แพพู๊ อาเง ช๋า บ๊อเคเตปาเต๋?”

31 “แว โตเบ่ เด๊อะแคร๋ เน อิเต?” เพลาบัน แด๊เฮอ ลู ฮู๊เนอ,

เร๊อ เพยาโคบ เฮ๊ฉื่อ คยาแซ๊ ลู เน๊อ, “เน โหล่เด๊อะ เน๊อ แว เต เตอเจ๋อ โต่, หม่าแน๊เรอ เน เก่ เม เป่ แวเง เตเออ เต๊อเจ่อ เก่ เฮ๊หม่า, แว เก่ เก่ หนิ เป่โป่ดื่อ เนเตมีเตดอ เต๊เห่ เร๊อ แว เก่ แม๊ตู่ ตอกอเตเกแร๊หนิ เป่โป่ดื่อ เนเตมีเตดอ เต๊เห่ ปา. 32 เออ เตอเนอ เร๊อ ปลวาจว๊าแม๊ เหร่อ แว เด๊อ ล๋อ เนเตมีเตดอ เต๊เห่ อาเกล เร๊อ ปลวา เบโค๊แก แว เน๊อ ล๋อ ซิหมิ เด๊อ อาเก่อแลพู๊ หม่าโต่เร๊อ อาเก่อแลดุ เต๊เห่, เน๊อ ซิหมิพู๊ เด๊อ อาลอ เต๊เห่ เน๊อ ล๋อ เป่ เด๊อ อาเก่อแลดุ หม่าโต่เร๊อ อาเก่อแลปล่อพู๊ เต๊เห่. เร๊อ ล๋อ เตมีเตดอ เนอเต๊เห่ หม่า แวคว๊าแวเก่ อาเง เฮ๊อ. 33 ช๋า อาโหน่ปา เบ๊อะ เน แฮทื๊อเจแม๊ แวคว๊าแวเก่ เบ๊อะเนอ ปา เนอ, แวจ๊อแวเต เน๊อ แวโหง่ แอ หม่า โต่ แอ เนอ เน เก่ แม๊เถอะซิเงโล ดื่อ ปา. เน เก่ แม๊เถอะ เน๊อ เป่ เด๊อ อาเก่อ แลปล่อพู๊ หม่าโต่ เบ่เบ่, อาเก่อแลดุ หม่าโต่ เบ่เบ่, ซิหมิพู๊ เด๊อ อาลอ หม่าโต่ เนอเต๊เห่ เฮ๊เนอหม่า, เน ซิเงดื่อ เน๊อ แว เอ่โห่ เฮ๊อ เนเต เฮ๊อ.”

34 เพลาบัน เฮ๊ฉื่อ ลู เน๊อ, “อ่อ, แว จู ดื่อ แพ๊, เป เก่ เม โหร่ลู ฮู๊ เน เฮ๊ เนอ โป๋.” 35 หม่าแน๊เรอ เบ๊อะเนอ เตอเนอเจ๊อ เฮ๊อ, เพลาบัน เบเถ่ โค๊แก ล๋อ เป่เพ เด๊อ อาเก่อ หม่าโต่เร๊อ อาเก่อแลดุ เน๊อ เป่โหมะ เด๊อ อาเก่อแลปล่อพู๊ เน๊อ อาเก่อแลดุ, ล๋อ อาบูวอลอ ลู เหน่ชีโด เนอเต๊เห่, เน๊อ ล๋อ ซิหมิพู๊ เด๊อ อาลอกี เนอเต๊เห่ ลอปลี. เร๊อ อา นอเกนอแม๊ เกอเร๊อ เน๊อ อาพู๊เพรคู เต๊เห่. 36 โทเร๊อ อา แด่โอ่ ตาพายา โค๊แก เตมีเตดอ เนอเต๊เห่ เน๊อ เพยาโคบ เหล่โอ่, เร๊อ อา โอ่ยาเจ๊อ โซเนอ กู๊เหล่ เหล่จว๊า เจ๊อ. เพยาโคบ เก่ เป่แฮ หนิเป่โป่ เพลาบัน อาเตมีเตดอ เด๊อ อา โอ่แก เนอเต๊เห่.

37 หม่าแน๊เรอ เพยาโคบ จว๊าพย๊ากาหนิ ลีบ่าเหน่เหมาะ, อูชาเคดิเหมาะ, เน๊อ อาหร่าโหมะเหมาะ อาแพซิโซ ซีเต๊เห่ เร๊อ อา ท๊ออ๊าเถ่ เก่อลีเก่อแลแก ส่อแพ เต๊เห่ อาพ๊า โต่ เด๊อ อากิกูบู โอ่โล เนอ เจ๊อ. 38 โทเร๊อ เบ๊อะ เตมีเตดอ แฮตาโอ เทอ เบ๊อะเนอ แซ่ฮู๊อา เก่ แม๊เถอะ ส่อแพ เนอเต๊เห่ อาเงเนอ, อา แด่โน โอ่เหน่ ส่อแพ เนอเต๊เห่ เบ๊อะ ล๋อ ซิหมิ เหล่โอเทอ อาโกล๊ เนอเต๊เห่ อากู. เมเตเฮ๊เร๊อ เพยาโคบ ซิเง เน๊อ เตมีเตดอ เต๊เห่ หม่า อา ขรุ แลแค อาโหมะ เบ๊อะ อา แฮตาโอ เทอ เบ๊อะเนอ. 39 ฮู๊เนอเร๊อ เหย่ซี ขรุ อาโหมะ เบ๊อะ ส่อแพ เด๊อ อา แด่โน หนื่ออื่อ เนอเต๊เห่ อาเป๊เส่เง เนอ อาขว่าอาคยา, อา พู๊โอ่แล หนิ ลอ แลแค เตมีเตดอ เด๊อ อาเก่อ เน๊อ อาเก่อแลปล่อพู๊ เน๊อ อาเก่อแลดุ เต๊เห่. 40 เพยาโคบ แด่โอ่ โค๊แก ซิหมิเพพู๊ เต๊เห่ เด๊อ เพลาบัน อาซิหมิหมู่ เอออากู. เบ๊อะ ซิหมิ เต๊เห่ ขรุอาโหมะ เบ๊อะเนอ, อา นอ ตีรี๊จว๊าโต เด๊อ เพลาบัน อาซิหมิ เด๊อ อาเก่อ เน๊อ อาลอ เต๊เห่ อาโอ่. เมฮู๊เนอเร๊อ อา เบโค๊แก อาเตมีเตดอ เต๊เห่ เร๊อ อา แด่โอ่ เต่อเกอ เน๊อ เพลาบัน อาเต เนอเต๊เห่ โต่. 41 เตมีเตดอ อาโหมะ เด๊อ อาเหร่ฉว่าเหร่ชอ เต๊เห่ ดา ขรุเฮ๊อ อาโหมะ บ๊อเคเต๋ เบ่เบ่, แซ่ฮู๊ อา เก่ ขรุ แลแค อาโหมะ เบ๊อะ ส่อแพ เต๊เห่ อาช๊า อาเง เนอเร๊อ, เพยาโคบ จว๊าแด่โนโอ่ ส่อแพ เนอเต๊เห่ เด๊อ โกล๊ เต๊เห่ อากู เบ๊อะ เหย่ซี เป๊เส่เงเนอ. 42 หม่าแน๊เรอ เตมีเตดอ เต๊เห่ เก่ อ๊าเจ่เหร่เจ่ เฮ๊เนอหม่า, เพยาโคบ จว๊าแด่โอ่ เน๊อ ส่อแพ เนอเต๊เห่ เด๊อ เหย่ซีเป๊เส่เง โต่. ฮู๊เนอเร๊อ เตมีเตดอ เด๊อ อา อ๊าเจ่เหร่เจ่ เต๊เห่เนอ อา ทวาแก เพลาบัน อาเต่ เร๊อ อาอ๊าฉว่าเหร่ชอ เต๊เห่เนอ อา ทวาแถ่แก เพยาโคบ อาเต่. 43 อาเมฮู๊เนอเร๊อ เพยาโคบ ทวาแถ่เฮ๊อ แกแย เด๊อ อา ดุแหย่แถ่เซ แหน่เจ๊อ เตเพร เร๊อ อาซิหมิ เน๊อ อาเปะ เต๊เห่ เบ่เบ่, อาหลู่เล๊ เพรคู เต๊เห่ เบ่เบ่, อาหลู่เล๊ เพรเหมาะ เต๊เห่ เบ่เบ่, ตีซิโบดุ เน๊อ แมอ๊อแล เต๊เห่ เบ่เบ่, อา โอ่โหร่โอ่เอ๊แถ่ แหน่เจ๊อ.