Genesis 34

อู เมมู๊แหม่ เหมาะดีนาห์

1เร๊อ เตอเนอเค, เพยาโคบ เน๊อ โหมะเลอาห์ อาพู๊เพรเหมาะ เหมาะดีนาห์ เถ่จว๊า โอ่เลแบ๊ซว๊า เร๊อเกอ เพรเหมาะ เต๊เห่ เบ๊อะ เก่กู เนอ. ^a 2เบ๊อะ เพรเป๊อเทอเป๊อเก่ ฮีไวต์ เมวเจ่อพู๊ เพฮาโมร์ อาพู๊ คูเชเคม แม๊เถอะ ลู เบ๊อะเนอ, อา เอ๊จว๊า แก ลู เร๊อ อา จว๊าเมมู๊แหม่โอ่เมอเต่อ แก ลู. 3เร๊อ อา ซิหยื่อหนิ เพยาโคบ อาพู๊ เหมาะดีนาห์, เร๊อ อา เฮ๊เบ่ อิลออี๊โหล่ หนิ เหมาะดีนาห์ เด๊อ อา เก่ ซิหยื่อ ลู. 4เร๊อ คูเชเคม เฮ๊ อาเพ เพฮาโมร์ เน๊อ, “แซ่ฮู๊ เพรเหมาะ เออเตเพร เก่ ทวา แวเม อาเงเนอ, ตี๊หรี่ เป่ มอ แว.”

5เบ๊อะ เพยาโคบ หนิโฮเฮ๊อ เน๊อ คูเชเคม เมมู๊แหม่โอ่เมอเต่อ อาพู๊ เหมาะดีนาห์ เบ๊อะเนอ, อาพู๊เพรคู เต๊เห่ เร๊อ อา ย๊อ แฮเก ปา แลแค อาเตมีเตดอ เต๊เห่ เด๊อ มีเกล อาขว่าอาคยา, อา เฮ๊ เตอเจ๋อ โต่, โส่โส๋ อา โอ่ โต่ เด๊อ อาพู๊ เต๊เห่ กาโต่ เด๊อ หี่.

6เมฮู๊เนอเร๊อ คูเชเคม อาเพ เพฮาโมร์ เถ่จว๊า เฮ๊เบ่ เน๊อ เพยาโคบ. 7เบ๊อ เพยาโคบ อาพู๊ เต๊เห่ หนิโฮ เฮ๊อ เน๊อ คูเชม เมมู๊แหม่ เหย่ ซี อาโป่ เพรเหมาะ เบ๊อะเนอ, เหย่ซี หนิโฮ โฮ เฮ๊อ เน๊ออาโอ่ เด๊อ มีเกล เร๊อ อา กา ลอ เด๊อ หี่. เร๊อ เต ทวาแถ่ ฮู๊เออเนอหม่า เตซิเตเร ดู๋ แหน่เจ๊อ เต๊อเจ่อ เด๊อ อิสราเอล เออโต๊โหมะ เต๊อเจ่อ อาเง, เร๊อ เตเม ฮู๊เออ เต๊เห่เนอ อา โตเม หนิ โต่ อาขว่าอาคยา, เหย่ซี ซิปล่อเชแหน่เจ๊อ เร๊อ อา ซิปล่อดุ แลแค โกโน๋ โต่.

8หม่าแน๊เรอ เพฮาโมร์ เฮ๊ เหย่ซี เน๊อ, “แวพู๊ คูเชเคม ย๊อซิปล่อโอ่ หนิ เนพู๊เพรเหมาะ เออ, เร๊อ แด่ทูซิปล่อ เร๊อ เด๊อะม๊า เป่เหร่อ ลู เน๊อ อาเม กอ. 9เด๊อะม๊าเลอเด๊อะม๊าเก่ ลู กอ, เด๊อะม๊า เป่ เนพู๊เพรเหมาะ เน๊อ เป, เร๊อ ซี พย๊า เกอติดื่อ เปพู๊เพรเหมาะ เกอเกอ. 10ซี จว๊าโอ่ เกอ เด๊อ เปเกล หม่า อาหนิหนิ, ซี ซิหยื่อ โอ่โต เบ๊อะเต โต๊โผะ เต๋ เบ่เบ่ อาหนิ แพ๊. โอ่ เกอ แลแค เบ๊อะเออ เร๊อ เมกื่อเมค๊า อิพรีอิเช แลแคดื่อ, อิพรีโอ่หนิ แลแค เห่ขุ เบ๊อะเออ.” เพฮาโมร์ เฮ๊ ฮู๊เนอ.

11โทเร๊อ คูเชเคม เฮ๊ เหมาะดีนาห์ อาเพ เน๊อ อาแหม่เพรคู เต๊เห่ เน๊อ, “แด่ทูซิปล่อ เร๊อ ซิยอ หนิ แว เร๊อ เด๊อะ จอกู๊ขุ แวเน๊อ เหมาะดีนาห์ นิ. ซี เก่ เด๊อะ จอกู๊ขุ แว เน๊อ เหมาะดีนาห์ เฮ๊หม่า, ซี กุย แว อิเตเต๋ เบ่เบ่, แว เก่ เด๊อะ ดื่อ ซี ปา. 12เพรจอกู๊ขุ เพรเหมาะ เออโต๊โก่ อาเงเบ่เบ่, อาเชหยู่ อาเง เบ่เบ่, ซี ซิหยื่อ กุย งูดุ เจ๊อ บ๊าเต เบ่เบ่ กุย มอ, แว เก่ เด๊อะดื่อ บ๊า ซี กุย เนอปา. เด๊อะม๊าหนิ แพ๊ แว เน๊อ เหมาะดีนาห์ เออหม่า โป่เฮ๊อ.”

13คูเชเคม เมมู๊แหม่ โทเฮ๊อ เหย่ซี อาโป่ เหมาะดีนาห์ อาขว่าอาคยา, เพยาโคบ อาพู๊เพรคู เต๊เห่ เฮ๊แลโฮ กาคยาฉื่อ คูเชเคม เน๊อ อาเพ เพฮาโมร์ ฮู๊เออ. 14เร๊อ เหย่ซี เฮ๊ เน๊อ, “เป เด๊อะม๊าหนิ แจ่ เป่โป่เพรเหมาะ เน๊อ เพร เด๊อ อา ดื๊อตีลี๊ เกออู โต่ เนอเต๊เห่ โต่. เป เก่ เด๊อะม๊าหนิ เฮ๊หม่า, อา ทวาแถ่ เตซิเตเรดุ เด๊อ เปเง ปา. ^b 15อา โอ่ แพ๊ เต๊อเจ่อ แพ๊, ล๋อ เพรคู เด๊อ ซีกลุยซีแล อาเกล เนอเต๊เห่ เก่ ดื๊อตีลี๊ เกอลอ เหย่ซีพ๊า ฮู๊ เปเออ ตื๋อ หม่า, เป จูเกอ แพ๊. 16ฮู๊เนอเร๊อ เป เมวเจ่อะพู๊ เต๊เห่ เก่ เด๊อะม๊า เหย่ซี พู๊เพรเหมาะ เต๊เห่ เน๊อ ซี ปา เร๊อ เป เมวเจอะพู๊ เต๊เห่ เก่ พย๊า เกอติ เน๊อ ซีพู๊เพรเหมาะ เต๊เห่ ปาปา. เร๊อ เป เก่ โอ่ปล๊อโอ่จือ เต่อเกอ เน๊อ ซี เร๊อ เป เก่ ทวาแถ่ เกอดื่อ เมวเจ่อ เต๊อเจ่อเจ้อ เน๊อ ซี ปา. 17หม่าแน๊เรอ ซี เก่ จูเบ๊ เกอ เด๊อ ซี เก่ ดื๊อตีลี๊พ๊า เออ โต่ เฮ๊หม่า, เป เอ๊กาคยา คยาแซ๊ เปโป่เพรเหมาะ ปา.”

18เหย่ซี อาเตแด๊โฉ่โด่แน เออ อาโตอาเบ่ ช๊าเหล่ เพฮาโมร์ เน๊อ อาพู๊ คูเชเคม อาซิปล่อ. 19คูเชเคม ซิหยื่อตาลว๋า ซิลือ เพยาโคบ อาพู๊เพรเหมาะ อาขว่าอาคยา, ฮู๊ เหย่ซี เฮ๊ ลู เนอ อา เมยอเมคอ ปา เจ๊อ โต่. เด๊อ อา โอ่ เกอเร๊อ วีกู ล๋อ ปลี เนอหม่า อู แด่ดุหยื่อแหน่ หนิ แหน่เจ๊อ ลู. 20โทฮู๊เนอเร๊อ เพฮาโมร์ เน๊อ อาพู๊ คูเชเคม จว๊าโต เด๊อ เหย่ซี วีกู่ดาดุ เหล่โอ่กู๊ แม๊เถอะฉื่อ ลู อาเหล่โอ่ เร๊อ อา จว๊าเฮ๊เบ่ เน๊อ เพรคู เบ๊อะเนอ เต๊เห่. 21เร๊อ เหย่ซี เฮ๊ เน๊อ, “เพยาโคบ เน๊อ อาพู๊ ซีเต๊เห่ หม่า อา แบ๊ซว๊าเค๊โค เน๊อ เป แพ๊. เป เด๊อะโอ่ เหย่ซี เด๊อ เปเทอเปเก่กู เร๊อ นอจว๊านอกา เมกื่อเมค๊า ปาลาดื่อ เหย่ซี โป๋, เมเตเฮ๊เร๊อ เห่ขุเหล่โอ่ เด๊อ เปเก่กู เออ อา โอ่ดาแหล่ลา ปาเจ๊อ เด๊อ เหย่ซีเหล่โอ่ เง เจ๊อ. เป พย๊า เกอ เน๊อ เหย่ซีพู๊เพรเหมาะ เต๊เห่ เร๊อ เหย่ซี พย๊า เกอ เน๊อ เปพู๊เพรเหมาะ เต๊เห่ หม่า อาหนิหนิ. 22ตื๋อ เต๊อเจ่อแพ๊ เด๊อ เป โหล่ เม หม่า หม่าเฮ๊อ ล๋อ เปเพรคู เออเต๊เห่ เก่ ดื๊อตีลี๊ เกอ พ๊า ฮู๊ เหย่ซี เนอ เฮ๊หม่า, เหย่ซีซิปล่อ โต เกอเน๊อ อา เก่ ทวาแถ่ เกอดื่อ เมวเจ่อ เตอเจอเจ๋อ เน๊อ เป ปา. 23เป เก่ เมฮู๊เนอ เฮ๊หม่า, เหย่ซีเตมีเตดอ เน๊อ เหย่ซีตาหมื่อตาเต เต๊เห่ เก่ ทวาแถ่ เปเต่ ปา, หม่า โต่แอ? เมฮู๊เนอเร๊อ เป จู เกอ ฮู๊เหย่ซี เฮ๊ เปเนอ โป๋, เร๊อ เหย่ซี เก่ โอ่เต่อ เกอดื่อ เน๊อ เป ปา.”

24ล๋อ เพรคู เด๊อ อา เถ่จว๊าโอ่ แลแค เด๊อ วีกู่ดาดุทือ เนอเต๊เห่ ซิปล่อโต เกอลอ เพฮาโมร์ เน๊อ อาพู๊ คูเชเคม เฮ๊ เป่ เหย่ซี เต๊เห่, เร๊อ ล๋อ เพรคู เด๊อ อา โอ่ เบ๊อะ วีกู เนอเต๊เห่ อา ดื๊อตีลี๊ ลอ แลแค อาพ๊า.

25เด๊อคยา โซเนอ เตอเนอเนอ, เหย่ซี ดื๊อตีลี๊พ๊า เร๊อ อาเช ลา ปา เหย่ซี เบ๊อะเนอ, เพยาโคบ อาพู๊เพรคู, คูสิเมโอน เน๊อ คูเลวี, หม่าเฮ๊อ เหมาะดีนาห์ อาแหม่เพรคู ซิเนอเออ พย๊าหนิ แลแค เน๊ เตเพร เต๊เบ่ เร๊อ เด๊อ อู เตเนโต่ เตอเจ๋อ โต่ อากู อา จว๊าโน คย๊า แลแค เด๊อ วี เนอตีวี อากู, เร๊อ อา จว๊าโน ปาเซอ ลอหล่า ตี๊กลิ เจ๊อ เพรคู โอ่ เบ๊อะ วีกู เนอเต๊เห่ ปว๋า เตเพร เจ๊อ. ^c 26เหย่ซี ปาเซอ หนิ เพฮาโมร์ เน๊อ อาพู๊ คูเชเคม เน๊อ เน๊ เร๊อ อา จว๊า เอ๊กาหนิ คยาแซ๊ เหมาะดีนาห์ เด๊อ คูเชเคม อาหี่ เร๊อ อา เถ่กาแก แลแค. 27เพยาโคบ อาพู๊เพรคู เด๊อ อาโร เต๊เห่ แฮโน แม๊เถอะ เน๊อ เพรคู เต๊เห่ เซอ ลอเฮ๊อ เบ๊อะ วี เนอ ตีวี อากู. เด๊อ วี เนอตีวี เมมู๊แหม่ เหย่ซี อาโป่เพรเหมาะ อาขว่าอาคยา, เหย่ซี พย๊ากาเผ่ลอ อูเตดุแหย่แถ่เซ. 28ล๋อ อูซิหมิ เน๊อ เป่ เต๊เห่ เน๊อ อูปู่อูเป๊เหน่ เน๊อ อูแมอ๊อแหล่ เต๊เห่, เน๊อ ล๋อ เต เด๊อ อา โอ่ เบ๊อะ วีกู เนอเต๊เห่ เบ่เบ่, เด๊อ วีกลอ เห่ขุเพร๊ขุ เนอเต๊เห่ เบ่เบ่, อา พย๊ากาหนิ ลอปลี เจ๊อ. 29เหย่ซี พย๊ากาหนิ ลอ โป่เจ๊อ อูเตดุแหย่แถ่เซ เต๊เห่ เน๊อ อูพู๊อูเม อูพู๊อูเลอ เต๊เห่ ล๋อ ปลี เจ๊อ. โทโต่ อา พย๊ากาเผ่ ลอปลี เจ๊อ ล๋อ อา โอ่ เบ๊อะ หี่ด๊อกู เนอเต๊เห่ เจ๊อ.

30เร๊อ เพยาโคบ เฮ๊ คูสิเมโอน เน๊อ คูเลวี เน๊อ, “ซี เมแป่เมเช แหน่เจ๊อ แว. คานาอันเมวเจ่อพู๊ เน๊อ เปริสซี เมวเจ่อพู๊ เด๊อ อา โอ่ เบ๊อะ เก่กู เออ เต๊เห่ เก่ ซิเถ่ซิฮา แหน่เฮ๊อ แว ปา เฮ๊อ. เปแกแย โอ่ ปีตี๊ แพ๊. เหย่ซี เก่ เพร ลู เร๊อ อา เก่ แฮช๊า แลแค แว เฮ๊หม่า, อา เก่ เมปย๊าเมแก เมเซอเมเหม่ ลอปลี แว เน๊อ แวหี่พู๊แพพู๊ เต๊เห่ ปา เฮ๊อ.”

31หม่าแน๊เรอ เหย่ซี เฮ๊ฉื่อ แลแค เน๊อ, “อา จว๊าเม เปโป่เพรเหมาะ ฮู๊ แม๊เผ่โหมะ เตเพร เนอหม่า อาโต แหน่ แอ?”