Gen 35 | EkySCThai | STEP | งยาแต๋โต่เร๊อ จอแปแหร่ดุ เฮ๊ เพยาโคบ เน๊อ, “เถ่จว๊ามอ เด๊อ วีเบธเอล เร๊อ จว๊าโอ่ แลแค เบ๊อะเนอ. เร๊อ จว๊าต่าแถ่ เตหลู่แตเหร่ เด๊อ เหล่จ๊อเบแถ่ เน๊อ แว เง เตเม เมเตเฮ๊เร๊อ แว หม่า จอแปแหร่ดุ เด๊อ อา โอ่โลแถ่ เป่ เน เบ๊อะ เน เถ่แกล่จว๊า โอ่ว๊า เนแหม่ เพเอซาว อาเหล่ เบ๊อะเนอ เนอเตเพร เฮ๊อ.”

Genesis 35

เพยาโคบ กาคยา คยาแซ๊ เด๊อ วีเบธเอล

1 งยาแต๋โต่เร๊อ จอแปแหร่ดุ เฮ๊ เพยาโคบ เน๊อ, “เถ่จว๊ามอ เด๊อ วีเบธเอล เร๊อ จว๊าโอ่ แลแค เบ๊อะเนอ. เร๊อ จว๊าต่าแถ่ เตหลู่แตเหร่ เด๊อ เหล่จ๊อเบแถ่ เน๊อ แว เง เตเม เมเตเฮ๊เร๊อ แว หม่า จอแปแหร่ดุ เด๊อ อา โอ่โลแถ่ เป่ เน เบ๊อะ เน เถ่แกล่จว๊า โอ่ว๊า เนแหม่ เพเอซาว อาเหล่ เบ๊อะเนอ เนอเตเพร เฮ๊อ.” ^a

2 ฮู๊เนอเร๊อ เพยาโคบ เฮ๊ อาตี๊หี่แตแพ เน๊อ แกแย เด๊อ อา โอ่เต่อ เกอ เน๊อ ลู เนอ เต๊เห่ เน๊อ, “วีแก แกลอ แลแค จอแปแหร่ เด๊อ อาโร อาแหย่โย เด๊อ ซี พย๊าหนิ เนอเต๊เห่, เมโพ๊เมแปล่หนิ ซีเหน่ เร๊อ กือแซ๊แถ่ แต๊แกล่ แลแค ซีเห่อจา เด๊อ อาโพ๊อาแปละ เนอ เต๊เห่ นี๋. 3 โทปาเร๊อ เป จว๊า เด๊อ วีเบธเอล โป๋, เร๊อ แว เก่ จว๊า ต่าแถ่หนิ เตหลู่แตเหร่ เด๊อ เหล่จ๊อเบแถ่ เน๊อ จอแปแหร่ดุ อาเง เบ๊อะเนอ เตเม ปา. อา หม่า เบ๊อะ แว ป่อเต่อเบ่ เน๊อ เตกู่เตแก เบ๊อะเนอ, อา เฮ๊เบ่ฉื่อ แว เร๊อ แว จว๊าโต เบ๊อะเตเต๋ เบ่เบ่ อา จว๊าเต่อเคเต่อ เกอเน๊อ แว.” 4 ฮู๊เนอเร๊อ ล๊อ จอแปแหร่ เด๊อ อาโร อาแหย่โย เด๊อ เหย่ซี พย๊าโอ่ เกอเร๊อ เนอเต๊เห่ เน๊อ เหย่ซี กู่แซ ล๋อ ปลี เต๊เห่เนอ, อา เด๊อะ ลอ เน๊อ เพยาโคบ, เร๊อ เพยาโคบ ปลือตา แกลอ เบ๊อะ วีเชเคม ส่อเหมาะดุ เนอต๊อเหมาะ อาเล. 5 อา เมโท ฮู๊เนอเร๊อ เหย่ซี เถ่จว๊าแก. เร๊อ เหย่ซี เถ่จว๊า เบ๊อะเนอ, จอแปแหร่ดุ เม ต๊อหร่อเซ๊ ซิอิเช ลอ แกแย โอ่ แลแค เบ๊อะ วี โอ่ ตีวี๊ตาวา เบ๊อะเนอ อากู เต๊เห่ อาขว่าอาคยา, อู ครวาลือ บื่อ เกอ เหย่ซี คยา เตเพร่ว โต่.

6 เพยาโคบ เน๊อ ล๋อ อาแกแย เด๊อ อา โอ่ เกอเน๊อ ลู เนอเต๊เห่ จว๊าโต่ แลแค เด๊อ วีลูส, เบ๊อะ คานาอันเก่กูเนอ. วีลูส เออ อู เอ๊ โป่ อามุย เน๊อ วีเบธเอล. 7 เร๊อ อา จว๊าต่าแถ่ ม๊าแก เน๊อ เตหลู่แตเหร่ เบ๊อะเนอ เร๊อ อา เอ๊ เหล่โอ่ เออโต๊โผะ อามุย เน๊อ เบธเอล อาจอแปแหร่ดุ, เมเตเฮ๊เร๊อ เบ๊อะ เพยาโคบ เถ่แกล่ แก อาแหม่ เพเอซาว เหล่ เบ๊อะเนอ, จอแปแหร่ดุ เด๊อะโล ลู เน๊อ อาเหน่ เบ๊อะเนอ โต๊โผะ. ^b

8 งยาแต๋โต่เร๊อ, เหมาะเดโบราห์ หม่าดื่อ โหมะเรเบคาห์ อาหลู่เล๊ เออ อา เซอแก เร๊อ อู โล๊ตาแก ลู เบ๊อะ วีเบธเอล แบ๊แล, เก่ตอกู ส่อเหมาะดุเล เนอโต๊โผะ. ฮู๊เนอเร๊อ อู เอ๊ แก เหล่โอ่ เนอโต๊โผะ อามุย เน๊อ อัลโลนบาคูท. อัลโลนบาคูท อาโหง่แลช๊า หม่า เตโหง่เตเห่ อาส่อเหมาะดุ.

9 เพยาโคบ โอ่ เด๊อ ปัดดานอารัมเก่กู เร๊อ อา กาโต่ โทงยาลาเฮ๊อ เบ๊อะเนอ, จอแปแหร่ดุ เด๊อะโล คยาแซ๊ โป่ อาเหน่ เน๊อ ลู เนอโพ๊ โตโพ๊ เฮ๊อ, เร๊อ อา เด๊อะบุ๊ยเด๊อเตอเรอ ลู. ^c 10 เร๊อ จอแปแหร่ดุ เฮ๊ ลู เน๊อ, “กู๊แหน่เออ, เนมุย เน๊อ ยาโคบ ว๊า, หม่าแน๊เรอ ฮู๊ แว เฮ๊ โทเฮ๊อ เน เนอ, อู เก่ เอ๊ ปา เนมุย เน๊อ ยาโคบ โต่ เฮ๊อ. อู เก่ เอ๊ เนมุย เน๊อ อิสราเอล ปา.” เร๊อ อา โป๊แก ลูมุย เน๊อ เพอิสราเอล. ^d

11 เร๊อ จอแปแหร่ดุ เฮ๊ โป่ ลู เน๊อ, “แว หม่า จอแปแหร่ เด๊อ อาโพรเตอเรอฉว่าชอ เตเพร, พู๊โอ่โหร่เลอโอ่เอ๊ แลแค เร๊อ โอ่โหร่โอ่เอ๊แถ่ เกอ แลแค นี๊. แว เก่ นอทวาแถ่ เนกลุยเนแล เต๊เห่ เน๊อ เมวเจ่อดุ เต๊อเจ่อ เน๊อ เมวเจ่อ เอ๊ อาเมวเจ่อ เต๊เห่ ปา. ^e เด๊อ เนกลุยเนแล อาเกล เต๊เห่ เนอ, อา เก่ ทวาแถ่ หนิดื่อ คุ๊ยจ๊อแผ่ เต๊เห่ ปา. 12 เห่ขุ เด๊อ แว เด๊อะ เน๊อ เพอับราฮัม เน๊อ เพอิสอัค เออเนอ แว เด๊อะ เกอ เน๊อ เน เฮ๊อ. เร๊อ เห่ขุเออ แว เก่ เด๊อะตา แฮเง เกอโป่ เน๊อ เนกลุยเนลุ๊ย ตากาแล เด๊อ เนคยา เนอเต๊เห่ ปาปา.” 13 จอแปแหร่ดุ เฮ๊เบ่ โทเฮ๊อ เน๊อ เพยาโคบ เร๊อ อาโอ่ เบ๊อะเนอเรอ อา กาแถ่ คยาแซ๊.

14 เพยาโคบ โดก๊อถ่อโอ่ หล่อดุทู เบ๊อะ จอแปแหร่ เหล่เฮ๊เบ่ เกอเร๊อ ลู เนอโต๊โผะ, โทเร๊อ อา แล๊ตา แท๊ทือเทอแย เน๊อ ถ่าเทอ เด๊อ หล่อ เออ อาขุ เด๊อ เตแด่บูโพ๊แถ่ หล่อ เออเตเม อาเง เฮ๊อ. ^f 15 เพยาโคบ เอ๊ คยาแซ๊ เหล่โอ่ เด๊อ จอแปแหร่ดุ เฮ๊เบ่ตาฉื่อ เน๊อ ลู เนอโต๊โผะ อามุย เน๊อ วีเบธเอล. (เบธเอล อาโหง่แลช๊า หม่า จอแปแหร่ดุ อาหี่.)

เพอิสอัค เน๊อ โหมะราเชล อาเตเซอ อาหรี่อาแก

16 โทเร๊อ เหย่ซี เถ่จว๊าแก เน๊อ วีเบธเอล เบ๊อะเนอ. เร๊อ อา จว๊าโต่ ผื่อ เฮ๊อ เน๊อ วีเอฟราธาห์ เบ๊อะเนอ, โหมะราเชล เป๊อะแถ่ พู๋โอ่ ฮ๊อเช เร๊อ อา เชจาฉว่า แหน่เจ๊อ ลู. 17 เบ๊อะ อา พู๊โอ่แล เร๊อ อา เชจาฉว่า แหน่เจ๊อ ลูฮ๊อ เบ๊อะเนอ, เพรแม๊ตู่พู๊โอ่ เนอเตเพร เฮ๊ ลู เน๊อ, “ซิอิเช แต่เหม่, เมเตเฮ๊เร๊อ เน พู๊โอ่ หนิโป่ เฮ๊อ พู๊เพรคู เตเพร เฮ๊อ.” 18 โหมะราเชล เกเร เซ๊ตา ผื่อเซอ เฮ๊อ เบ๊อะเนอ, อา เอ๊แก อาพู๊มุย เน๊อ คูเบนโอนี, หม่าแน๊เรอ อาเพ เอ๊ ลูมุย เน๊อ คูเบนยามิน. (เบนยามิน อาโหง่แลช๊า หม่า พู๊คู เด๊อ แว เบ่ ซิเปลซิหย่อ, หม่าแน๊เรอ เบนยามิน อาโหง่แลช๊า หม่า พู๊คู เด๊อ อาทวา แวกู๊ขู่จ๊อทว๊า.)

19 โทเร๊อ โหมะราเชล เซอแก เร๊อ อู โล๊ตา แก ลู เบ๊อะ แกล๊ เหล่จว๊า เด๊อ วีเอฟราธาห์ หม่า เฮ๊อ วีเบธเลเฮม เนอโต๊โผะ. 20 เร๊อ เพยาโคบ โด ก๊อถ่อ โอ่หนิ เตซิเหน่แถ่ หล่อดุทูเตเม เบ๊อะ โหมะราเชล โลวี๊ขู่ เนอ, เร๊อ หล่อดุทู เนอ เตเม หม่า อา ทวา โหมะราเชล อาโลขุ อาเตม๊าเตแด โต่กู๊แหน่ เจ๊อ.

21 เพยาโคบ ^{▼▼เบ๊อะเออ ตามา หม่า เด๊อ ฮีบรู ลีเทส่อพ๊ากู เนอหม่า อู เอ๊ ลู เน๊อ เพอิสราเอล. เพยาโคบ เน๊อ เพอิสราเอลหม่า เตเพรเพร่ว แพ๊.} จว๊าเป่แฮ โป่ แกล๊ เร๊อ อา จว๊าช๊อ โอ่เกอเร๊อ อาเหล่สื่อ เต๊เห่ เด๊อ มีกาด๊า เอเดอร์ อาหี่แถ่โล เหล่โอ่ป่อ แม๊ อา ซิแล ตากยา.

เพยาโคบ เน๊อ อาพู๊เพรคู เต๊เห่

22 เพยาโคบ ^{▼▼ยาโคบ เน๊อ อิสราเอล หม่า เตเพรเพร่ว แพ๊.} โอ่ เบ๊อะเหล่โอ่ เนอ โต๊โผะ เบ๊อะเนอ, คูรูเบน โนโอ่เมอเต่อ เน๊อ อาเพ อาเมโหน่โป่, โหมะบิลฮาห์ เร๊อ เตหรี่เตแก เออเนอ เด๊อคยาเร๊อ เพยาโคบ หนิโฮแก. เพยาโคบเนอ อาพู๊เพรคู โอ่ เช๊อซิเนอ. ⁱ 23 เพยาโคบ เน๊อ โหมะเลอาห์ อาพู๊แหว่เพร่ว หม่า คูรูเบน, โทเร๊อ คูสิเมโอน, คูเลวี, คูยูดาห์, คูอิสสาคาร์ เน๊อ คูเศบูลุน ซี เต๊เห่ เฮ๊อ. ^j 24 โหมะราเชล อาพู๊เพรคู เต๊เห่ หม่า คูโยเซฟ เน๊อ คูเบนยามิน. 25 โหมะราเชล อาหลู่โหมะ โหมะบิลฮาห์ อาพู๊เพรคู เต๊เห่ หม่า คูดาน เน๊อ คูนัฟทาลี. 26 โหมะเลอาห์ อาหลู่โหมะ โหมะศิลปาห์ อาพู๊เพรคู เต๊เห่ หม่า คูกาด เน๊อ คูอาเชอร์.

ล๋อ เหย่ซี เออเต๊เห่ เนอ หม่า เพยาโคบ อาพู๊เพรคู เต๊เห่เฮ๊อ, เร๊อ อา โอ่เป๊เจ่แล ลอ แลแค เด๊อ ปัดดานอารัมเก่กู.

เพอิสอัค เซอแก

27 เพยาโคบ กาโตคยา เด๊อ อาเพ เพอิสอัค เหล่โอ่ เกอเร๊อ คูเมหม่าเร เหล่โอ่ แก่ช๊า, เด๊อ อา โอ่ผื่อ เน๊อ วีคีริยาทอารบา เด๊อ อู เอ๊ โป่ ลู เน๊อ วีเฮโบรน เออเนอ เออตีวี. วีเออ ตีวีหม่า เพอับราฮัม เน๊อ เพอิสอัค เหล่โกลจว๊าโอ่ เกอเร๊อ วี เนอเฮ๊อ. ^k 28 เพอิสอัค โอ่เซอเพร หนิ อาหน่า เตเย เน๊อ เชอลุยซว๊า. 29 อา โอ่เซอเพร โหมะเผระ แหน่เจ๊อ เร๊อ อา เซอแก. เร๊อ อาพู๊ เพเอซาว เน๊อ เพยาโคบ โล๊โน แก เร๊อ ลู.