Genesis 36

เพเอซาว อากลุยอาลุ๊ย ตากาแล เต๊เห่

1เออ หม่า เต ราม๊า รา แดหนิ เพเอซาว อากลุยอาลุ๊ย ตากาแล เต๊เห่ อาหรี่อาแก เฮ๊อ, เร๊อ อู เอ๊ โป่ ลู เน๊อ คูเอโดม. ^a 2เพเอซาว พย๊า อาเม เน๊อ คานาอันเมวเจ่อโหมะ เต๊เห่, เร๊อ อา พย๊า เน๊อ ฮิตไทต์ เมวเจ่อ คูเอโลน อาพู๊เพรเหมาะ เหมาะอานาห์ เน๊อ ฮิตไทต์ เมวเจ่อโหมะ เหมาะโอโฮลีบามาห์. อา หม่า คูอานาห์ อาพู๊เพรเหมาะ, คูศิเบโอน อาเลอเพรเหมาะ. ^b 3เร๊อ อา พย๊า โป่ เน๊อ เหมาะบาเสมัท. อา หม่า คูอิชมาเอล อาพู๊เพรเหมาะ, คูเนบาโยท อาโป่. ^c 4เพเอซาว อาเม โหมะอาดาห์ พู๊โอ่แล หนิ คูเอลีฟัส. เหมาะบาเสมัท ติเร๊อ อา พู๊โอ่แล หนิ คูเรอูเอล. 5เร๊อ เหมาะโอโฮลีบามาห์ พู๊โอ่แล หนิ คูเยอูช เน๊อ คูยาลาม เน๊อ คูโคราห์. เหย่ซี หม่า เพเอซาว อาพู๊เพรคู เด๊อ อา โอ่เป๊เจ่แล แลแค เบ๊อะ คานาอันเก่กู เนอเต๊เห่ เฮ๊อ. 6เพเอซาว เอ๊หนิ อาเมเต๊เห่ เน๊อ อาพู๊เพรคู เน๊อ อาพู๊เพรเหมาะ เต๊เห่ เน๊อ ล๋อ แกแย โอ่ เด๊อ อาหี่ด๊อกู เนอ เต๊เห่, โทโต่ อา โตหนิ ล๋อ อาเตมีเตดอ เต๊เห่ เน๊อ ล๋อ ตาหมื่อตาเต เด๊อ อา พย๊าหนิ เบ๊อะ คานาอันเก่กู เนอ เต๊เห่, โทเร๊อ อา เถ่จว๊า โอ่โค๊ยาแก เน๊อ อาโป่ เพยาโคบ. 7เมเตเฮ๊เร๊อ เหย่ซี ตาหมื่อตาเต เต๊เห่ เนอ อา โอ่เอ๊ ตาลว๋า ซิลือ เจ๊อ เฮ๊อ เร๊อ อา โอ่โด่ ปา ลู โต่ เฮ๊อ. เหย่ซีเตมีเตดอ เต๊เห่ หม่า อา โอ่โหร่โอ่เอ๊ แหน่เจ๊อ อาขว่าอาคยา, เหย่ซี ซิเนอลอ เหล่เก เตมีเตดอ เหล่โอ่ อาเงเนอ, อา โด่ ปา เจ๊อ โต่ เจ๊อ. ^d 8ฮู๊เนอเร๊อ เพเอซาว เด๊อ อู เอ๊ ลู เน๊อ เพเอโดมเออเตเพร จว๊าโอ่แก เด๊อ เสอีร์โฉ่เกลเนอโต๊โผะ. ^e

9เออ หม่า เตราม๊า ราแด หนิ เอโดม เมวเจ่อพู๊ เต๊เห่ โอ่ เด๊อะ เสอีร์โฉ่เกล เนอเต๊เห่ อาเพ, เพเอซาว อากลุย อาลุ๊ย ตากาแล ซี เต๊เห่ อาหรี่อาแก. 10เพเอซาว อาพู๊เพรคู เต๊เห่ หม่า แคร๋ อูเป เฮ๊เร๊อ, คูเอลีฟัส หม่าเฮ๊อ อาเม โหมะอาดาห์ อาพู๊เพรคู เออ, เน๊อ คูเรอูเอล หม่าเฮ๊อ อาเม โหมะบาเสมัท อาพู๊เพรคู เออเนอ เฮ๊อ. 11คูเอลีฟัส อาพู๊เพรคู เต๊เห่หม่า แคร๋ อูเป เฮ๊เร๊อ, คูเทมาน, คูโอมาร์, คูเศโฟ, คูกาทาม เน๊อ คูเคนัส ซี เออเต๊เห่ เฮ๊อ. 12เพเอซาว อาพู๊ คูเอลีฟัส อาเมโหน่โป่ เตเพร หม่า อามุย เน๊อ เหมาะทิมนา เร๊อ อา พู๊โอ่แลหนิ คูอามาเลข. ล๋อ เออ เต๊เห่ หม่า เพเอซาว อาเม เพออาดาห์ อาเลอเพรคู เต๊เห่ เฮ๊อ. 13คูเรอูเอล อาพู๊เพรคู เต๊เห่ หม่า หม่าเฮ๊อ คูนาหาท, คูเศ-ราห์, คูชัมมาห์, เน๊อ คูมิสซาห์ ซีเต๊เห่ เฮ๊อ. เร๊อ ล๋อ เหย่ซี เต๊เห่ เนอ หม่า เพเอซาว อาเม เหมาะบาเสมัท อาเลอเพรคู เต๊เห่ เฮ๊อ. 14เหมาะโอโฮลีบามาห์ หม่า เพเอซาว อาเม. อา หม่า เพอานาห์ อาพู๊, เพศิเบโอน อาเลอเพรเหมาะ เตเพร. เหมาะโอโฮลีบามาห์ อาพู๊เพรคู เต๊เห่ หม่า หม่าเฮ๊อ คูเยอูช, คูยาลาม เน๊อ คูโคราห์ เนอเต๊เห่ เฮ๊อ.

เพเอซาว อากลุยอาลุ๊ย เต๊เห่

15เด๊อ เพเอซาว อากลุยอาลุ๊ย ตากาแล เต๊เห่ อาเกล, เพร เด๊อ อา ทวา อาเมวเจ่อ เต๊อเจ่อ เน๊อ เต๊อเจ่อ ทวาดุทวาเต เต๊เห่ เนอ หม่า หม่าเฮ๊อ เพเอซาว อาพู๊แหว่เพร่ว คูเอลีฟัส อาพู๊ คูเทมาน, คูโอมาร์, คูเศโฟ, คูเคนัส, 16คูโคราห์, คูกาทาม เน๊อ คูอามาเลข ซี เต๊เห่ เฮ๊อ. เพร ทวาดุทวาเต เออเต๊เห่ หม่า หม่าเฮ๊อ คูเอลีฟัส อาพู๊เพรคู โอ่ เด๊อ เอโดมเก่กู เนอเต๊เห่ เฮ๊อ, เร๊อ เหย่ซี หม่า เพออาดาห์ อาเลอเพรคู เต๊เห่ เฮ๊อ. 17โพเอซาว อาพู๊เพรคู คูเรอูเอล อาพู๊เพรคู เด๊อ อาทวาดุทวาเต เต๊เห่ หม่า หม่าเฮ๊อ คูนาหาท, คูเศ-ราห์, คูชัมมาห์ เน๊อ คูมิสซาห์ ซี เต๊เห่ เฮ๊อ. เร๊อ เพร ทวาดุทวาเต เออเต๊เห่ หม่า อากลุยอาลุ๊ย ตากาแล เด๊อ เพเรอูเอล เด๊อ อา โอ่ เด๊อ เอโดมเก่กู เนอเตเพร เฮ๊อ, เร๊อ เหย่ซี หม่า โพเอซาว อาเม เพอบาเสมัท อาเลอ เพรคู ซี เต๊เห่ เฮ๊อ. 18เพเอซาว อาเม เหมาะโอโฮลีบามาห์ อาพู๊เพรคู เด๊อ อา ทวาดุทวาเต เต๊เห่ เนอ หม่า คูเยอูช, คูยาลาม เน๊อ คูโคราห์ ซี เต๊เห่ เฮ๊อ. เพรทวาดุทวาเต เออ เต๊เห่ หม่า โหมะอานาห์ อาพู๊เพรเหมาะ หม่าเฮ๊อ เพเอซาว อาเม เหมาะโอโฮลีบามาห์ อาเลอ เพรคู ซี เต๊เห่ แพ๊.

19แกแย เออ เต๊เห่ หม่า เพเอซาว เด๊อ อามุย โอ่โค๊โป่ เน๊อ เพเอโดม เออ อาพู๊เพรคู เต๊เห่ เฮ๊อ. เหย่ซี เออเต๊เห่ หม่า อา ทวา เฮ๊อ เอโดมเมวเจ่อพู๊ อาทวาดุทวาเต เต๊เห่ เฮ๊อ.

เพเสอีร์ อากลุยอาลุ๊ย เต๊เห่

20โฮรี เมวเจ่อ เพเสอีร์ อาพู๊เพรคู เด๊อ อา โอ่ แลแค เบ๊อะ เก่กู เนอ เต๊เห่ หม่า คูโลทาน, คูโชบาล, คูศิเบโอน, คูอานาห์, 21คูดีโชน, คูเอเชอร์ เน๊อ คูดีชาน เนอ เต๊เห่ เฮ๊อ. คูเสอีร์ อาพู๊ เด๊อ อา โอ่ เด๊อ เอโดมเก่กู เออเต๊เห่เนอ หม่า โฮรี เมวเจ่อ อา ทวาดุทวาเต เต๊เห่ เฮ๊อ. 22เพโลทาน อาพู๊เพรคู เต๊เห่ หม่า คูโฮรี เน๊อ คูเฮมาน. เหมาะทิมนา เนอหม่า คูโลทาน อาโป่เพรเหมาะ. 23เพโชบาล อาพู๊เพรคู เต๊เห่ หม่า คูอัลวาน, คูมานาฮาท, คูเอบาล, คูเชโฟ, เน๊อ คูโอนัม ซี เต๊เห่ เฮ๊อ. 24เพศิเบโอน อาพู๊เพรคู เต๊เห่ หม่า คูอัยยาห์ เน๊อ คูอานาห์ เฮ๊อ. คูอานาห์ หม่า เพร เด๊อ อา เกหนิ เป่ อาเพ เพศิเบโอน อาแมอ๊อแหล่ เร๊อ เบ๊อะ อา จว๊าเกเร๊อ เบ๊อะเนอ, อา จว๊าปู แม๊เถอะหนิ เทอกู่กู เต๊เห่ เด๊อ เก่เชเทอแก่ขุ เตเพร. 25เพอานาห์ อาพู๊ เต๊เห่ หม่า คูดีโชน เน๊อ เหมาะโอโฮลีบามาห์ เออเนอ เฮ๊อ. 26เพดีโชน อาพู๊เพรคู เต๊เห่ หม่า คูเฮมดาน, คูเอชบาน, คูอิธราน เน๊อ คูเคราน ซีเต๊เห่ เฮ๊อ. 27เพเอเชอร์ อาพู๊เพรคู เต๊เห่ หม่า คูบิลฮาน, คูศาวาน, เน๊อ คูอาขาน เออเต๊เห่ เฮ๊อ. 28เพดีชาน อาพู๊ หม่า คูอูศ เน๊อ คูอารัน. 29เพร เด๊อ อา ทวา โฮรี เมวเจ่อ ทวาดุทวาเต เต๊เห่ หม่า คูโลทาน, คูโชบาล, คูศิเบโอน, คูอานาห์, 30คูดีโชน, คูเอเชอร์ เน๊อ คูดีชาน ซีเต๊เห่ เฮ๊อ. แกแย เออ เต๊เห่ หม่า เพรทวา โฮรี เมวเจ่อ ทวาดุทวาเต เบ๊อะ เสอีร์เก่กู เนอ เต๊เห่ เฮ๊อ.

คุ๊ย เด๊อ เอโดมเก่กู เต๊เห่ ^f

31เบ๊อะ อิสราเอลพู๊ เต๊เห่ อาคุ๊ย โอ่หนิ เร๊อดื่อ ล๋ายโต่ เบ๊อะเนอ, คุ๊ย เด๊อ อา เป๊อหนิ เบ๊อะ เอโดมเก่ เต๊เห่ เนอหม่า แคร๊ อูเป เฮ๊เนอหม่า, 32เพเบโอร์ อาพู๊ คูเบลา ทวาแถ่ คุ๊ย เบ๊อะ เอโดมเก่กู เนอ. อาวี หม่า อามุย เน๊อ วีดินฮาบาห์. 33เบ๊อะ คุ๊ยเบลา เซอโท เบ๊อะเนอ, โบสราห์เก่พู๊ คูเพเศ-ราห์ อาพู๊ คูโยบับ แถ่ทวา ติ คุ๊ย. 34เบ๊อะ คุ๊ยโยบับ เซอ โท เบ๊อะเนอ, เตหม่านี๊เก่พู๊ คูเทมาน แถ่ทวา ติ คุ๊ย. 35เบ๊อะ คุ๊ยหุชาม เซอ โท เบ๊อะเนอ, เพเบดัด อาพู๊ คูฮาดัด เด๊อ อา ช๊าเป่ แก มีเดียนเมวเจ่อพู๊ เต๊เห่ เบ๊อะ โมอับเก่กู เนอ เตเพร แถ่ทวา ติ คุ๊ย. อาวี มุย เน๊อ วีอาวีท. 36เบ๊อะ คุ๊ยฮาดัด เซอ โท เบ๊อะเนอ, มัสเรคาห์เก่พู๊ คูสัมลา แถ่ทวา ติ คุ๊ย. 37เบ๊อะ คุ๊ยสัมลาห์ เซอ โท เบ๊อะเนอ, คูชาอูล แถ่ทวา ลูเหล่โกล. อา หม่า เรโหโบท วีพู๊ เด๊อ อา โอ่ เด๊อ ยูเฟรติส เทอแลโหมะดุทือ เนอตีวี. 38เบ๊อะ คุ๊ยชาอูล เซอ โท เบ๊อะเนอ, เพอัคโบร์ อาพู๊ คูบาอัลฮานัน แถ่ทวา ติคุ๊ย. 39เบ๊อะ เพอัคโบร์ อาพู๊ คุ๊ยบาอัลฮานัน เซอ โท เฮ๊อ เบ๊อะเนอ, คูฮาดาร์ แถ่ทวา ติคุ๊ย. อาวี หม่า วีปาอู เร๊อ อาเม หม่า อา มุย เน๊อ เหมาะเมเหทาเบล, เร๊อ อา หม่า โหมะเมซาหับ อาเลอเพรเหมาะ, โหมะมัทเรด อาพู๊เพรเหมาะ.

40เพเอซาว อากลุยอาลุ๊ย ตากาแล เด๊อ อาทวาดุทวาเต เด๊อ อาเมวเจ่อ เน๊อ อาเมวเจ่อ เร๊อดื่อ, อาเหล่โอ่ เน๊อ อาเหล่โอ่ เร๊อดื่อ เนอเต๊เห่ หม่า คูทิมนา, คูอัลวาห์ เน๊อ คูเยเธท, ^g 41คูโอโฮลีบามาห์, คูเอลาห์, คูปิโนน. 42คูเคนัส, คูเทมาน, คูมิบซาร์, 43คูมักดีเอล เน๊อ คูอิราม ซีเต๊เห่ เฮ๊อ. เหย่ซี เออเต๊เห่ หม่า อา ทวา เป่ เฮ๊อ. เอโดมเก่พู๊ อาทวาดุทวาเต เต๊เห่เฮ๊อ. ฮู๊เหย่ซี พย๊าโอ่ เกอเร๊อ อาเหล่โอ่ โต๊โผะ เน๊อ โต๊โผะ เนอ อา เอ๊ เกอเร๊อ แลแค เน๊อ อามุย เร๊อดื่อ. เพเอซาว หม่า หม่า เฮ๊อ เอโดมเมวเจ่อพู๊ เต๊เห่ อาเพ เฮ๊อ.