Genesis 38
เพยูดาห์ เน๊อ เหมาะทามาร์
1เบ๊อะเนอเค, คูยูดาห์ แด่แก อาโป่อาแหม่ซี เต๊เห่ เร๊อ อา ตาจว๊าโอ่โค๊แก เด๊อ วีอดุลลาม เบ๊อะ คูฮีราห์ โอ่ เกอเร๊อ เนอตีวี. 2เร๊อ เบ๊อะ คูยูดาห์ โอ่ เบ๊อะเนอ อาเค อา แม๊เถอะ คานาอันเมวเจ่อเพ เพชูวา อาพู๊เพรเหมาะ เตเพร. เร๊อ คูยูดาห์ พย๊า ลู เน๊อ อาเม เร๊อ อา โอ่เมอเต่อ เร๊อ ลู. 3โทเร๊อ อา โหมะดอแถ่ เร๊อ อา พู๊โอ่ หนิ อาพู๊เพรคู เตเพร, เร๊อ คูยูดาห์ เอ๊เร๊อ ลูมุย เน๊อ คูว่าเอร์. 4อา โหมะดอ โป่ ตอฮ๊อ เร๊อ อา พู๊โอ่ หนิ โป่ อาพู๊เพรคู เตเพร, เร๊อ อา เอ๊ ติ ลูมุย เน๊อ คูโอนัน. 5อา พู๊โอ่ โป่ เตเพร เร๊อ อาเอ๊เร๊อโป่ ลูมุย เน๊อ คูเช-ลาห์ เบ๊อะ อา พู๊โอ่ หนิ คูเช-ลาห์ เบ๊อะเนอ, เหย่ซี โอ่ แลแค เบ๊อะ วีเคซิบ. 6เพยูดาห์ จอกู๊ขู่ เป่ อาพู๊แหว่เพร่ว คูว่าเอร์ อาเม เตเพร, เร๊อ อามุย เน๊อ เหมาะทามาร์. 7หม่าแน๊เรอ เพยูดาห์ อาพู๊แหว่เพร่ว คูว่าเอร์ เออ อาซิปล่อ มู๊แหม่รีแจ่ แหน่เจ๊อ เด๊อ จอแปแหร่ ตูจูเพร อาเป๊เส่เง อาขว่าอาคยา, จอแปแหร่ เมเซอแก ลู. 8เออโต๊โพ๊ เร๊อ เพยูดาห์ เฮ๊ เกอเร๊อ อาพู๊เพรคู คูโอนัน เน๊อ, “เปเหล่โกล โอ่ เน๊อ, แซ่ฮู๊ เนคี เก่ พู๊โอ่ เป่ เด๊อ เนแหม่ อาเงเนอ, เตเม ตาเบ่ เฮ๊อ เด๊อ เนขุ เฮ๊อ. ฮู๊เนอ อาขว่าอาคยา, โนมอ, โนโอ่เมอเต่อมอ เร๊อ เนคี เร๊อ เมเล๊อเมบา เกอเร๊อ มอ เตแลเบ่ เนขุ เออเนอ.” 9หม่าแน๊เรอ คูโอนัน ซิเง เน๊อ พู๊ เต๊เห่ เก่ โอ่ ปา เฮ๊หม่า, อา ทวา อาพู๊ หม่า โต่ อาขว่าอาคยา, แซ่ฮู๊ อา เก่ พู๊โอ่ เป่ เด๊อ อาแหม่ อาเง โต่ เนอ, ปว๊าโพ๊โพ๋ เบ๊อะ อา โนโอเมอเต่อ เฮ๊อ เน๊อ อาคี เบ๊อะเนอ, อา ปลวาเถ่แก อาเตกลุยเทอ เด๊อ อากลอ. 10อา เม เต เออเต๊เห่ เนอ, อา มู๊แหม่รีแจ่ เด๊อ จอแปแหร่ ตูจูเพร อาเป๊เส่เง อาขว่าอาคยา, จอแปแหร่ ตูจูเพร เมเซอ แก โป่ ลูลู. 11เออโต๊โพ๊เร๊อ เพยูดาห์ ซิอิเช เน๊อ อาพู๊ คูเช-ลาห์ เซอเกอโป่ ฮู๊ อาแหม่ซี เนอเต๊เห่ เห่ อา เตเน เร๊อ อา เฮ๊ เกอเร๊อ อาแด่ เหมาะทามาร์ เน๊อ, “กาโอ่ โก๊เหร่อ ฮู๊ เพรเหมาะโอ่แคร๊ เตเพร เด๊อ เนเพ อาหี่เนอ โต่เด๊อ แวพู๊ คูเช-ลาห์ โตตาหี่ตาเพร๊ เฮ๊อ ปา เนอ นี๋.” ฮู๊เนออาขว่าอาคยา, เหมาะทามาร์กาโอ่ เกอโก๊ คยาแซ๊ เน๊อ อาเพ ซี. 12เด๊อ คยา อางยา เฮ๊อ ตี๊กิ เบ๊อะเนอ, เพชูวา อาพู๊เพรเหมาะ, เพยูดาห์ อาเม เซอ แก เกอ เฮ๊อเฮ๊อ. เบ๊อะ เพยูดาห์ ซิเปลซิหย่อ เป่เฮ๊อ เบ๊อะเนอ, อา เอ๊หนิ อาโค อดุลลามวีพู๊ คูฮีราห์ เร๊อ อา จว๊า โอ่เล แลแค เด๊อ วีทิมนาท เด๊อ เพรจี่ เป่ ลูซิหมิฉื่อ เนอเตเพร อาโอ่. 13เบ๊อะ อู เฮ๊โฉ่ เป่ เหมาะทามาร์ เน๊อ, “เนเพร จว๊าจี่ อาซิหมิฉื่อ เด๊อ วีทิมนาท เร๊อ อาจว๊า เฮ๊อ เด๊อ แกล๊โหล่ เฮ๊อ,” ฮู๊เนอ อาเค, 14อา ถู่แหล่ แก อาเพรเหมาะโอ่แคร๊ เห่อจา โทเร๊อ อา โฮ๊บี๊ เกอเร๊อ อาเหน่ เน๊อ อิเก เหล่โฮ๊บี๊ เน๊อ เป๊เส่, อา จ่ากลว่าโค๊ เกอเร๊อ อาเหน่ ฮู๊เนอ เร๊อ อา จว๊า โอ่แนโอ่ เด๊อ วีเอนาอิม กู่ดาดุทือ, แกล๊เหล่จว๊า เด๊อ วีทิมนาท เนอโตโบ. เมเตเฮ๊เร๊อ อา ซิเง เฮ๊อ เน๊อ คูเช-ลาห์ ดุแถ่ โตพย๊า เฮ๊อ เม ตื๊อดื่อเร๊อ อาเพร่ เด๊อะม๊า เป่ ลู เน๊อ คูเช-ลาห์ โต่โต่. 15เบ๊อะ เพยูดาห์ แม๊เถอะ เฮ๊อ ลู เบ๊อะเนอ, อา ย๊อ โฮ๊บี๊ เกอเร๊อ อาเป๊เส่ อาขว่าอาคยา, อา เตเน ลู เน๊อ แม๊เพ่โหมะ. 16เพรเหมาะ เออเตเพร หม่า, อาแด่ แพ๊เนอ อา ซิเง โต่ อาขว่าอาคยา, อา จว๊าโต เด๊อ ลูโอ่ เร๊อ อา เฮ๊ ลู เน๊อ, “แว ซิ โอ่เมอเต่อ เน๊อ เน,” เร๊อ เหมาะทามาร์ แด๊เฮอฉื่อ ลู เน๊อ, “เน เก่ โอ่เมอเต่อ เน๊อ แว เฮ๊เร๊อ เน เกเร เด๊อะ แว อิเต ปา?” 17“แว ซูแฮ เป่ดื่อ เน เป่พู๊ โตโล๊ เด๊อ แวซิหมิ เน๊อ เป่หมู่ กู เนอ โตโด ปา,” อา เฮ๊ฉื่อ ลู ฮู๊เนอ. เร๊อ เหมาะทามาร์ แด๊เฮอ โป่ ลู เน๊อ, “เบ๊อะ เน ซูแฮ แต่ล๋าย แว เป่ โต่ เบ๊อะเนอ, เน เก่ เด๊อะโอ่ม๊าแก เร๊อ แว เตงูดุงูชอ เต๊อเจ่อเจ่อ แอ?” 18เพยูดาห์ เฮ๊ฉื่อ ลู เน๊อ, “แว โตเบ่ เด๊อะโอ่ม๊าแก เหร่อ เน อิเต?” เร๊อ อา เฮ๊ฉื่อ ลู เน๊อ, “เด๊อะโอ่ม๊าแก แว เน๊อ เนเตม๊าแด โอ่เต่อ เน๊อ เนมุย เด๊อ เน กู๊ลา โอ่ เกอเร๊อ ลู เออเนอ เน๊อ เน อิแท๊โบ เด๊อ เนกู๊ยากู เออเนอ.” ฮู๊เนออาขว่าอาคยา, อา เด๊อะแก ลอ ลู เร๊อ อา โอ่เมอเต่อ แก เน๊อ ลู. 19โทเร๊อ เหมาะทามาร์ ก๊อถ่อกา คยาแซ๊ เด๊อ อาหี่ เร๊อ อา โปล๊ตาแก อิเก เด๊อ เหล่โฮ๊บี๊ เน๊อ อาเป๊เส่ เนอ เร๊อ อา กือแซ๊แถ่ คยาแซ๊ เพรเหมาะโอ่แคร๊ เห่อจา. โทเร๊อ อาโหมะดอ แฮแก. 20เบ๊อะ เพยูดาห์ กาโต่ เด๊อ อาหี่ เบ๊อะเนอ, อา นอจว๊าเด๊อะ อาโคแบ๊ซว๊า อดุลลามวีพู๊ คูฮีราห์ เป่พู๊ โตโล๊ โตโด เน๊อ เพรเหมาะ เนอเตเพร, เร๊อ อา นอ จว๊า พย๊ากาคยา คยาแซ๊ ลู เน๊อ อา ตาเต เด๊อ อา เด๊อะโอ่ม๊าแก เน๊อ เหมาะทามาร์ เนอเต๊เห่, หม่าแน๊เรอ คูฮีราห์ จว๊าแม๊เถอะ เหมาะทามาร์ โต่. 21เร๊อ อา แด๊เฮอ แกแย โอ่ เบ๊อะเนอ เต๊เห่ เน๊อ, “แม๊เพ่โหมะ เด๊อ อา โอ่แนโอ่ เบ๊อะ วีเอนาอิม แกล๊ดุทือ เออ เตเพร เล๊?” เร๊อ เหย่ซี เฮ๊ฉื่อ ลู เน๊อ, “แม๊เพ่โหมะ โอ่น๊อ เน๊อ เบ๊อะเออ เตเพร่ว โต่.” 22ฮู๊เนออาขว่าอาคยา, อา กาคยา คยาแซ๊ เด๊อ เพยูดาห์ โอ่ เร๊อ อา กาคยา เฮ๊ ลู เน๊อ, “แว แม๊เถอะ อา โต๊โพ๋ โต่, โทโต่ แกแย เด๊อ อา โอ่ เบ๊อะเนอ เต๊เห่ เฮ๊ แลแค แว เน๊อ, ‘แม๊เผ่โหมะ โอ่น๊อ เน๊อ เบ๊อะเออ เตเพร่ว โต่.’” 23เพยูดาห์ เฮ๊ฉื่อ ลู เน๊อ, “ตาเต เด๊อ แว เด๊อะโอ่ม๊าแก เน๊อ ลู เนอเต๊เห่เนอ, อา พย๊าโอ่หม่าแก ดื่อ เบ่เบ่ เฮ๊อ, ปาหม่า อู งยาโคร ลอ เป เห่. แว นอ จว๊าซู เฮ๊อ เน เน๊อ เป่พู๊ โตโล๊ เออ เด๊อ ลูโอ่ เฮ๊อ ตื๊อดื่อเร๊อ เน ย๋อ แม๊เถอะ อา โต่โต่ เนอ.” 24อา โอ่ เฮ๊อ โซเล เบ๊อะเนอ, อู แฮ แด๊โฉ่ เพยูดาห์ เน๊อ, “เนแด่ เหมาะทามาร์ จว๊าทวา แม๊เพ่โหมะ เร๊อ อา จว๊า เมซื๊อเมปล๊า แต่ อาขว่าอาคยา, อา โหมะดอ เฮ๊อ.” เร๊อ เพยูดาห์ ซิปล่อดุ เร๊อ อา เฮ๊ตา อาโหง่ เน๊อ, “เอ๊เถ่ อา เด๊อ อูเป๊เส่เง เร๊อ ชื๊อ เซอแก อา เน๊อ หมิ เนอ!” 25เบ๊อะ อู เอ๊เถ่ เฮ๊อ เหมาะทามาร์ เบ๊อะเนอ, เหมาะทามาร์ นอจว๊าซู ตาเต เออเนอเจ่อ เด๊อ อาเพร่ เพรคู อาโอ่, เร๊อ อา นอ จว๊าเฮ๊ อู เน๊อ, “แว โหมะดอ เฮ๊อ เน๊อ ตาเต เออเต๊เห่ อาเหน่แบ่เจ่ เฮ๊อ, แม๊มอ, เหล่กู๊ลา เตม๊าแด เด๊อ อา โอ่เต่อ เน๊อ อามุย เออ เน๊อ อิแท๊โบ เออ หม่า อูเปเต เป?” 26เออโตโพ๊เรอ เพยูดาห์ โตม๊า คยาแซ๊ อาตาเต เออเต๊เห่ เร๊อ อา เฮ๊ เน๊อ, “แว โต เด๊อะหนิ อา เน๊อ แวพู๊ คูเช-ลาห์ เร๊อ แว เด๊อะหนิ เป่ อา โต่ เน๋อ. อาเมเตเออเนอหม่า, อาโตเล๊อเน๊อแวแพ๊.” เร๊อ เด๊อโหน่เด๊อคยาเนอ, อาโอ่เมอเต่อ ปา เน๊อ เหมาะทามาร์ โต่ เฮ๊อ. 27เบ๊อะ อา โต พู๊โอ่ เฮ๊อ เบ๊อะเนอ, เด๊อ อาฮ๊อกู เนอ อา พู๊โอ่ดีคยา ลู. 28เบ๊อะ อา พู๊โอ่ เฮ๊อ เบ๊อะเนอ, เตเพร เร๊อ อาบ๊อเถ่เหร่อ อากู๊ขู่ โตโค๊, เร๊อ เพรแม๊พู๊โอ่ เนอเตเพร พย๊า โหล่ลีกาซุ๊ย โตโบ เร๊อ อา จอหม่า แก เด๊อ ลูจู๊แกกู เร๊อ อา เฮ๊ เน๊อ, “เออหม่า อาดุเล๊อ เตเพร.” 29หม่าแน๊เรอ เบ๊อะ อา ยื๊อโน คยาแซ๊ อากู๊ขู่ เบ๊อะเนอ, เด๊อ อาโร เตเพร โอ่เถ่ เหร่อ คยาแซ๊ เน๊อ ลู, เร๊อ เพรแม๊พู๊โอ่ เนอเตเพร เฮ๊ เป๊เจ่ เด๊อ อา โอ่เถ่เหร่อ เนอเตเพร เน๊อ, “เน จว๊า โอ่เถ่แพรเหร่อ คยาแซ๊ เมเต?” อา เฮ๊ เร๊อ, อู เอ๊ เป๊เจ่ เนอเตเพร อามุย เน๊อ คูเปเรศ. (เปเรศ อาโหง่แลช๊า หม่า โอ่เถ่แพร.) 30โทเร๊อ เป๊เจ่ เด๊อ อู จอกลอหม่า ลู เน๊อ โหล่ลี เนอเตเพร โอ่เถ่ โหน่ เด๊อ คยา, เร๊อ อู เอ๊ ลูมุย เน๊อ คูเศราห์. (เศราห์ อาโหง่แลช๊า หม่า ลีกาซุ๊ย.)
Copyright information for
EkySCThai