Gen 41 | EkySCThai | STEP | เบ๊อะ เพร เด๊อ คุ๊ย หยื่อเอ่ หนิ ลู เร๊อ อา โอแม๊ เป่ คุ๊ย อาแท๊ทือเส่เทอแย อาทวาดุทวาเต เนอเตเพร พย๊าหนิ คยาแซ๊ เฮ๊อ อาเตแร อา ตาลว๊าแฮ เฮ๊อ เนอหน่า เนอ, คุ๊ย โอ่เมอแหม่ เน๊อ อา จว๊า ก๊อถ่อ โอ่ เด๊อ เทอ แลโหมะ ไนล์ดุ ทือ เด๊อ อียิปต์เก่ กู เนอ.

Genesis 41

คูโยเซฟ เฮ๊โฉ่โล เป่ คุ๊ย อาเตโอ่เมอแหม่ อาโหง่แลช๊า

1 เบ๊อะ เพร เด๊อ คุ๊ย หยื่อเอ่ หนิ ลู เร๊อ อา โอแม๊ เป่ คุ๊ย อาแท๊ทือเส่เทอแย อาทวาดุทวาเต เนอเตเพร พย๊าหนิ คยาแซ๊ เฮ๊อ อาเตแร อา ตาลว๊าแฮ เฮ๊อ เนอหน่า เนอ, คุ๊ย โอ่เมอแหม่ เน๊อ อา จว๊า ก๊อถ่อ โอ่ เด๊อ เทอ แลโหมะ ไนล์ดุ ทือ เด๊อ อียิปต์เก่ กู เนอ. 2 เร๊อ อา แม๊เถอะ ปู่โหมะบื่อซือลื๊อ โซซว๊าโตโด โอ่ เด๊อ เทอแลโหมะดุไนล์กู เร๊อ อา แก๊แถ่ เป่ ลู, เร๊อ อา แถ่เอ่ แลแค มีออ เบ๊อะ ปูเหมาะเกล เนอ. 3 โทเร๊อ อา แม๊เถอะ โป่ ปู่โหมะ โซซว๊าโตโด โอ่ เด๊อ เทอแลโหมะดุไนล์กู แถ่ เร๊อ อา แถ่ ก๊อถ่อโอ่ เด๊อ ปู่โหมะ กาแถ่เหร่อ เนอ โซซว๊าโตโด อาช๊า, เร๊อ ปู่โหมะ เออ โซซว๊าโตโด หม่า อาแครอาโคร, อามู๊แหม่ แหน่เจ๊อ. 4 เร๊อ ปู่โหมะ เด๊อ อาแครอาโคร, อามู๊แหม่ เนอ โซซว๊าโตโด เอ่ แก ปู่โหมะ เด๊อ อาบื่อซื๊อลื๊อเนอ โซซว๊าโตโด. เร๊อ ฟาโรห์ ซิเหน่ คย๊าแก. 5 โทเร๊อ อา โอ่เมอหนิ คยาแซ๊ เร๊อ อา โอ่เมอแหม่ เต๊เปล่ โป่ เตโอ่เมอแหม่ เต๊อเจ่อ, เร๊อ อา แม๊เถอะ โบ๊กู่ลาเหมาะ ต๊อเหมาะ แปลเถ่ โซซว๊าแตแปล, เร๊อ อาแปลดุ แปลจว่า เร๊อ อาเส่ เช๊ตว่าลา. 6 โทเร๊อ อาแม๊เถอะ โป่ โบ๊กู่ลาเหมาะ ต๊อเหมาะ อาแปล เถ่โซซว๊า เร๊อ เก่แลเซ๊ กู่ เด๊อ เก่ซิเถ่ เก่เซเทอแก่ขุ พอแฮเบ่ ลู เร๊อ อาแปล เถ่ อาโน๊ครา, อาเส่สู่เส่พี ลอ. 7 เร๊อ โบ๊กู่ลาแปล เด๊อ อาโน๊อาครา, อาเส่สู่เส่พี เนอ โซซว๊าแตแปล สู่กลูโนแก โบ๊กู่ลาแปล เด๊อ อาแปลดุแปลจวา เร๊อ อาเส่เช๊แร๊ เนอ โซซว๊าแตแปล. โทเร๊อ แม๊! คุ๊ย เกล๊ดา อา โอ่เมอแหม่ แพ๊. 8 เบ๊อะ เหมาะลี เฮ๊อ เบ๊อะเนอ, คุ๊ย เตเนต๊อหร่อเซ๊ ซิอิเช เกอเร๊อ แหน่เจ๊อ อาเต อาขว่าอาคยา, อา นอจว๊า เอ๊แฮ ลอปลี เพร เด๊อ อา เฮ๊โฉ่โลโปลแจ่ เตโอ่เมอแหม่ อาโหง่แลช๊า เน๊อ เพรลีแมพู๊ เด๊อ อียิปต์เก่กู เนอเต๊เห่ เร๊อ อา เฮ๊โฉ่โล เป่ เหย่ซี เน๊อ อาเตโอ่เมอแหม่ เนอเต๊เห่. หม่าแน๊เรอ เตเพร่ว อู เฮ๊โฉ่ เถ่โล แจ่ เป่ ลู เตโอ่เมอแหม่ อาโหง่แลช๊า โต่. ^a 9 เออโต๊โพ๊ เร๊อ เพร เด๊อ คุ๊ย หยื่อเอ่ หนิ ลู เร๊อ อา โอแม๊ เป่ คุ๊ย อาแท๊ทือเส่เทอแย อาทวาดุทวาเต เนอเตเพร เฮ๊ คุ๊ย เน๊อ, “เอ๋อ เออเตอเนอ แว เตเนโต่ตื๊อปา แวเตซื๊อ แพ๊. 10 เบ๊อะ คุ๊ยดุ เด๊อ อา หม่า แวแบ่เจ่ดุ ซิปล่อดุ แว เน๊อ เพรเม เป่ เนค๊อมู ทวาดุทวาเต เนอเตเพร เร๊อ แบ่เจ่ ด๊อตา เป เด๊อ ทอกู เบ๊อะ เพรโอ่ป่อเตเกหนิ คุ๊ย อากู่กล๊อดุ เนอเตเพร อาหี่ เบ๊อะเนอ, 11 เป โอ่เมอแหม่ ผรว่า ลู เตโอ่เมอแหม่ เตเพร เต๊อเจ่อ เด๊อ เตเซเซ๋ อากู, เร๊อ เป เตเพร่ว เน๊อ เตเพร อาเตโอ่เมอแหม่ เนอ อา โอ่ดื่อ เน๊อ อาโหง่แลช๊า. 12 เบ๊อะเนอเค, เพรโอ่ป่อเตเกหนิ คุ๊ย อากู่กล๊อดุ เนอเตเพร อาหลู่ หม่าเฮ๊อ ฮีบรู เมวเจ่อ เพรหน่าเจ่ฮู๊ เตเพร โอ่เต่อ เกอ เน๊อ เป เบ๊อะ เนอ. เร๊อ เป เฮ๊โฉ่โล เป่ ลู เปเตโอ่เมอแหม่ เร๊อ อา เฮ๊โฉ่โล เป่ เป เตเพร เน๊อ เตเพร เตโอ่เมอแหม่ อาโหง่แลช๊า เต๊เห่. 13 ฮู๊ อา เฮ๊โฉ่ เป่ เป เนอ อา ทวาแถ่ หม่าแหน่ เจ๊อ, แบ่เจ่ เด๊อะ คยาแซ๊ แวเตแร, โทเร๊อ แบ่เจ่ เมเซอ จอแถ่แก เพรเม เป่ แบ่เจ่ ค๊อมู เนอเตเพร เด๊อ ส่อลู.” 14 เมฮู๊เนอเร๊อ คุ๊ย นอจว๊าเอ๊แฮ คูโยเซฟ เด๊อ อาโอ่ เร๊อ อู จว๊าเอ๊เถ่ โต๊โปล่ตาปยาเจ๊อ ลู เด๊อทอกู. เร๊อ เบ๊อะ อา จิ โท อากู่กล๊อ, อา กลือ โท อากู๊อู่ฉื่อ, อา ถู่แหล่ เต๊เปล่ โทเฮ๊อ อาเห่อจา เบ๊อะเนอ, อา แฮโน เด๊อ คุ๊ย อาเป๊เส่เง. 15 เร๊อ คุ๊ย เฮ๊ ลู เน๊อ, “แว โอ่เมอแหม่ เตโอ่เมอแหม่ เต๊อเจ่อ, เร๊อ เตเพร่ว อู เฮ๊โฉ่โลโปล แจ่ เป่แว อาโหง่แลช๊า โต่. หม่าแน๊เรอ อู เฮ๊โฉ่โล เป่ แว เน๊อ เน เฮ๊โฉ่โลโปลแจ่ เตโอ่เมอแหม่ เต๊เห่ อาโหง่แลช๊า, แว หนิโฮ ฮู๊เนอ.” 16 คูโยเซฟ เฮ๊ฉื่อ ลู เน๊อ, “แว เฮ๊โฉ่แจ่ เน๊อ เพคุ๊ย เตโอ่เมอแหม่ อาโหง่แลช๊า โต่, หม่าแน๊เรอ จอแปแหร่ดุ เก่ เด๊อะโลดื่อ เพคุ๊ย เตโอ่เมอแหม่ อาโหง่แลช๊า เด๊อ อาแร๊ ปา.” 17 ฮู๊เนอเรอ คุ๊ย แด๊โล เป่ คูโยเซฟ เน๊อ, “แว โอ่เมอแหม่ เน๊อ แว จว๊า ก๊อถ่อ โอ่ เด๊อ เทอแลโหมะดุไนล์ทือ, 18 เร๊อ แว แม๊เถอะ ปู่โหมะอาบื่อซื๊อลื๊อ โซซว๊าโตโด โอ่ เด๊อ เทอแลโหมะดุกู เร๊อ อา แก๊แถ่, เร๊อ อา แถ่เอ่ แลแค มีออ เบ๊อะ ปูเหมาะ ^{▼▼ปูเหมาะ หม่า อา เกเร แซ่เน๊อ ดีกู่เหมาะ เนอ, หม่าแน๊เรอ ปูเหมาะหม่า อาแด๊ เด๊อเทอโกลทือ, เทอแลโหมะทือ, เทออ่อดุทือ.}เกล เนอ. 19 โทเร๊อ แว แม๊เถอะ โป่ ปู่โหมะ โซซว๊าโตโด โอ่ เด๊อ เทอแลโหมะกู แถ่ เร๊อ ปู่โหมะ เออ โซซว๊าโตโด หม่า อาแครอาโคร, อามู๊แหม่รีแจ่ แหน่เจ๊อ. เบ๊อะ อียิปต์เก่กู เออ ปู่โหมะ เด๊อ อามู๊แหม่รีแจ่ ฮู๊เนอ, แว แม๊เถอะ น๊อ แตแค๋ โต่. 20 โทเร๊อ ปู่โหมะ เด๊อ อาแครอาโคร, อามู๊แหม่ เนอ โซซว๊าโตโด เอ่แก ปู่โหมะ เด๊อ อาบื่อซื๊อลื๊อ เด๊อ อาแถ่เหร่อ เนอ โซซว๊าโตโด. 21 เหย่ซี เอ่โท เจ๊อเฮ๊อ ปู่โหมะ เด๊อ อาบื่อซื๊อลื๊อ เนอโซซว๊าโตโด เจ๊อ ตื๊อดื่อเร๊อ อู ซิเง เน๊อ อา เอ่โทเฮ๊อ เนอ เตเพร่ว โต่, เหล่โกลโกล๋ อาแครอาโคร เหล่โกล ฮู๊ เด๊อ อาเหร่อ เนอ แพ๊. โทเร๊อ แว ซิเหน่ แก. 22 โทเร๊อ แว จว๊าโอ่เมอแหม่ แม๊เถอะ ติโบ๊กู่ลาเหมาะ ต๊อเหมาะ แปลเถ่ โซซว๊าแตแปล, อาแปลดุแปลจวา เร๊อ อาเส่ เช๊ แร๋ แหน่เจ๊อ. 23 โทเร๊อ โบ๊เหมาะ เด๊อ อาโร ต๊อเหมาะ แด๊แถ่ ติ เร๊อ อา แปลเถ่ โซซว๊าแตแปล, เร๊อ เก่แลเซ๊ กู่ เด๊อ เก่ซิเถ่ เก่เชเทอแกขุ พอแฮเบ่ ลู เร๊อ อาแปล เถ่โน๊เถ่ครา เร๊อ อาเส่สู่เส่พีลอ. 24 เร๊อ โบ๊กู่ลาแปล เด๊อ อาโน๊อาครา, อาเส่สู่เส่พี เนอ โซซว๊าแตแปล ฉู่กลูโนแก โบ๊กู่ลาแปล เด๊อ อาแปลดุแปลจวา เร๊อ อาเส่ เช๊ แร๊ เนอ โซซว๊าแตแปล. เตโอ่เมอแหม่ เออ แว เฮ๊โฉ่โล เป่ เน๊อ เพร เด๊อ อา เฮ๊เถ่โลโปลแจ่ เตโอ่เมอแหม่ อาโหง่แลช๊า เนอเต๊เห่ ตื๊อดื่อเร๊อ เหย่ซี เฮ๊โฉ่โล แจ่ เป่ แว อาโหง่แลช๊า เตเพร่ว โต่.” 25 โทเร๊อ คูโยเซฟ เฮ๊ฉื่อ ลู เน๊อ, “เตโอ่เมอแหม่ เออ เนอเจ่อ หม่า เตอเจ๋อ แพ๊ เร๊อ อาโหง่แลช๊า แซ๊ ลู แพ๊. จอแปแหร่ดุ เกเร เม เฮ๊อ เต เร๊อ อา เด๊อะโล หนื่ออื่อเหร่อเฮ๊อ เพคุ๊ย เฮ๊อ. 26 ปู่โหมะ บื่อซื๊อลื๊อ โซซว๊าโตโด เออเนอ หม่า อา ตาช๊า เร๊อ หน่า โซซว๊าต๊าหน่า, โบ๊กู่ลา แปลดุแปลจวา เนอ โซซว๊าแตแปล๋ หม่า อา ตาช๊า เร๊อ หน่า โซซว๊าต๊าหน่า เฮ๊อเฮ๊อ. เออ เนอเจ่อ หม่า เตอเจอเจ๋อ แพ๊ เร๊อ อาโหง่แลช๊า แซ๊ ลู แพ๊. 27 ปู่โหมะแคร เด๊อ อา แถ่โหน่ เนอ โซซว๊าโตโด หม่า อา ตาช๊า เร๊อ หน่า เด๊อ อา แฮ โหน่ โป่ โซซว๊าต๊าหน่า เนอ ปา. เก่แลเซ๊ พอ เด๊อ เก่เชเทอแก่ขุ พอแฮเบ่ ลู เร๊อ อาแปล เถ่ โบ๊กู่ลาแปล เด๊อ อาโน๊อาครา, อาเส่สู่เส่พี เออเนอหม่า อา ตาช๊า เร๊อ หน่า เกเร กล่า ปา โซซว๊าต๊าหน่า เออเนอ เฮ๊อ. 28 จอแปแหร่ดุ เกเร เมเฮ๊อ เต เออเนอ อา เด๊อะโล หนื่ออื่อเหร่อ เฮ๊อ เพคุ๊ย เฮ๊อ อาขว่าอาคยา, อา เก่ทวาแถ่ ฮู๊ แว เฮ๊โฉ่โล เป่ เฮ๊อ เพคุ๊ย เออเนอ ปา. 29 เบ๊อะ อียิปต์เก่กู เออ โบ๊กู่ลา เหล่เอ่เหล่โอ โอ่เล๊อโอ่บาเจ๊อ โซซว๊าต๊าหน่า ปา. 30 หม่าแน๊เรอ เนอโซซว๊าต๊าหน่า โทปา เร๊อ เก่วีเก่กอ เก่ โอ่แถ่ เกอติ โซซว๊าต๊าหน่า ปา. เร๊อ อู เก่ โชตาปาแก ลอเจ๊อ หน่า เด๊อ โบ๊โฮดี เหล่เอ่เหล่โอ่ โอ่เล๊อโอ่บาเจ๊อ เนอโซซว๊าต๊าหน่า ปา. เมเตเฮ๊เร๊อ เก่วีเก่กอ จา แหน่เจ๊อ เร๊อ อา เก่ เมปย๊าแก อียิปต์เก่ เจ๊อปา. 31 อู เก่ โซตาปา แก ลอ เจ๊อ เหล่เอ่เหล่โอ โอ่เล๊อโอ่บา เด๊อ อาเหร่อ เนอ โซซว๊าต๊าหน่า เจ๊อปา, เมเตเฮ๊เร๊อ เก่วีเก่กอ ทวาแถ่ เด๊อคยา โซซว๊าต๊าหน่า เออ ปาเนอ อาจาอาจือ แหน่เจ๊อ ปาเจ๊อ. 32 เมฮู๊เนอเร๊อ เพคุ๊ย โอ่เมอแหม่ เออ เนอเจ่อลอ หม่า อาแซ๊ ลูแพ๊. เออหม่า จอแปแหร่ดุ เด๊อะโล ตาเต หม่าแหน่ เฮ๊อ เพคุ๊ย เด๊อ อา เก่ ทวาแถ่ ปา, เร๊อ งยาแต่โต่เนอ อา เก่ นอ ทวาแถ่ หม่าแหน่ เจ๊อ ปา. 33 ฮู๊เนออาขว่าอาคยา, กู๊แหน่เออ เพคุ๊ย โตเบ่ นว๊าแถ่ เฮ๊อ แกแย เด๊อ อาเตลีแมแจ่แหน่ โอ่, แกแย เด๊อ อา ซิเงล๊อปลู๊ เต เตเพรเพร เร๊อ นอเป๊อ หนิ อา เน๊อ อียิปต์เก่ เออเนอ. 34 เบ๊อะ โบ๊โฮดี เหล่เอ่เหล่โอ โอ่เล๊อโอ่บา โซซว๊าต๊าหน่า อากู ปา เบ๊อะเนอ, เพคุ๊ย โตเบ่ นว๊าแถ่ ทวาดุทวาเต เต๊เห่ เด๊อ อา เบ่ จว๊า พย๊าปล๊อ โบ๊กู่ลา เหล่เอ่เหล่โอ แงปลู ตูปลู เด๊อ เทอพู๊เก่พู๊ เต๊เห่ อาโอ่. 35 เบ๊อะ โบ๊กู่ลา เหล่เอ่เหล่โอ โอ่เล๊อโอ่บา โซซว๊าต๊าหน่า เด๊อ อา เกเร แฮโต่เฮ๊อ ปา เออเนอ, เหย่ซี โตเบ่ จว๊า พย๊าปล๊อ ลอ เฉ่เอ่เฉ่โอ ปว๋า เต๊อเจ่อ, เร๊อ เหย่ซี แด่ กา แด่ปล๊อ ลอ โบ๊กู่ลา เหล่เอ่เหล่โอ เออ เด๊อ คุ๊ย อาเตอเรอฉว่าชอ อาเตเป๊อ อาเล แพ๊, เร๊อ นอ แด่โอ่ปล๊อ หนิลอ เหย่ซี เด๊อ วี เต๊เห่ อากู เร๊อ นอ โอ่ป่อแม๊หม่า หนิ เหย่ซี เนอ. 36 ฮู๊เนออาขว่าอาคยา, ช๋า เก่วีเก่กอดุ โอ่แถ่เฮ๊อ เบ๊อะ อียิปต์เก่กู โซซว๊าต๊าหน่า อาเค ปาเนอ, แซ่ฮู๊ เทอพู๊เก่พู๊ เต๊เห่ เก่ เอ่น๊อโอน๊อ อาเงเนอ, เหย่ซี โตเบ่ พย๊าปล๊อแด่ปล๊อ หนื่ออื่อลอ เฉ่เอ่เฉ่โอ ฮู๊เนอ. ตื๋อ เร๊อ เบ๊อะ เก่วีเก่กอ อาเค เทอเก่ เก่ ปย๊าแก โต่ ปา,” คูโยเซฟ เฮ๊โฉ่ คุ๊ย ฮู๊เนอ. 37 เร๊อ คุ๊ย เน๊อ ล๋อ อาเพรแรเตพู๊ เต๊เห่ จู เกอลอ แลแค คูโยเซฟ อาเต เตเนหนื่ออื่อ เออเต๊เห่. 38 เร๊อ คุ๊ย เฮ๊ เกอเร๊อ อาแกแย เต๊เห่ เน๊อ, “แกแย เด๊อ จอแปแหร่ดุ อาแหย่โยบูโพ๊ โอ่ เด๊อ ลูกู แซ่เน๊อ คูโยเซฟ เออเนอ เป จว๊าแม๊เถอะ แจ่ ปา แหน่แอ?” 39 โทเร๊อ อา เฮ๊ คูโยเซฟ เน๊อ, “จอแปแหร่ดุ เด๊อะซิเง ลอ เฮ๊อ เน เต เออเต๊เห่ อาขว่าอาคยา, แกแย เด๊อ อา ซิเงโปลเพ๊ แจ่ เต เร๊อ อาเตลีแมแจ่แหน่ โอ่ แซ่เน๊อ เน เนอ อา โอ่ปา เตเพร่ว โต่ เฮ๊อ. 40 เน เบ่ แถ่เป๊อ หนิ แวโฮเท เออ ปา, เร๊อ แวแกแย ล๋อ ปลี เก่ หนิดา ลอ เนเตเฮ๊เบ่ ปา. แกแย เด๊อ อาดุเล๊อ เน๊อ เน เนอหม่า ตื๊อแพ๊แว เด๊อ อา ทวา คุ๊ย เออ เตเพร แพ๊.” ^c

คูโยเซฟ แถ่เป๊อ หนิ อียิปต์เก่

41 โตโพ๊เร๊อ คุ๊ย เฮ๊ คูโยเซฟ เน๊อ, “กู๊แหน่เร๊อ แว นว๊าแถ่ เฮ๊อ เน เน๊อ เพรเป๊อ หนิลอ อียิปต์เก่ เต๊เก่เล เฮ๊อ.” 42 โทเร๊อ คุ๊ยโปล๊เถ่ อาก๊อนอโตโปล๊ เด๊อ อา โอ่เต่อ เน๊อ คุ๊ยอาเตม๊าเตแด เนอเตเม เด๊อ อากู๊นอลู เร๊อ อา โปล๊โน เป่ เน๊อ คูโยเซฟ. อา แซ๊แถ่ เป่ ลู จาจวาทูแปล๊ เด๊อ อาแร๊, เร๊อ อา กู๊ลาแถ่ เป่ ลู เทเปลอดุ เตอเปลอ เด๊อ อาแกโบลู. ^d 43 โทเร๊อ คุ๊ย นอ แถ่สี่แด๊ คูโยเซฟ ตีซิโหล่ เด๊อ อาสี่แด๊ เกอเร๊อ เด๊อคยาเนอ เนอขู่ตู๊ขู่ เร๊อ อู เอ๊โทจว๊า เด๊อ ลูเป๊เส่เง เน๊อ, “แด๊งือแล แลแค!” คุ๊ย นอ แถ่เป๊อหนิ ลอเฮ๊อ ลู เน๊อ อียิปต์เก่ เต๊เก่เล เฮ๊อ. 44 โทเร๊อ คุ๊ย เฮ๊ ลู เน๊อ, “แว หม่า อียิปต์คุ๊ยเตเพร, หม่าแน๊เรอ เน เก่ ปลวาเมอู เตเพร่ว โต่ เฮ๊หม่า, แกแย เด๊อ อาโอ่ เบ๊อะ อียิปต์เก่กู เออเต๊เห่เนอ อา เบ่ เมหนิ เตอเจ๋อ โต่.” 45 คุ๊ย เอ๊ เป่ ลูมุย เน๊อ อียิปต์เมวเจ่อ มุย, คูศาเฟนาทปาเนอาห์, โทเร๊อ อา พย๊าเปลูเม เน๊อ วีโอน อาเพรหลู่แตเต เพโปทิเฟรา อาพู๊เพรเหมาะ เหมาะอาเสนัท. ฮู๊เนออาขว่าอาคยา, คูโยเซฟ จว๊าเล ตาวา แม๊ลอ อียิปต์เก่ เต๊เก่เล. 46 เบ๊อะ คูโยเซฟ เป๊อแถ่ ทวาเฮ๊อ อียิปต์เก่คุ๊ย เร๊อ เม เป่เฮ๊อ คุ๊ย อาเตเม เบ๊อะเนอ, อาหน่า โอ่ เฮ๊อ โซเชอ เฮ๊อ. อา โอ่ เด๊อ คุ๊ย อาโฮกู เร๊อ อา เถ่จว๊าโอ่เล ตาวาแม๊ลอ อียิปต์เก่ เต๊เก่เล. 47 เบ๊อะ โบ๊โฮดี เหล่เอ่เหล่โอ โอ่เล๊อโอ่บาเจ๊อ โซซว๊าต๊าหน่า เออ อากูเนอ, ส่อเส่เหว่โพ หนิแร๊ แหน่เจ๊อ. 48 เร๊อ คูโยเซฟ นอ พย๊าปล๊อแด่ปล๊อลอ อู ล๋อ ส่อเส่เหว่โพ เด๊อ อา เถ่เล๊อเถ่บา เบ๊อะเนอ โซซว๊าต๊าหน่า เบ๊อะ อียิปต์เก่กู เนอเต๊เห่, เร๊อ อา กา แด่โอ่ปล๊อ ลอ เด๊อ วี เนอเต๊เห่ อากู. คูโยเซฟ แด่โอ่ปล๊อ หนิ ส่อเส่เหว่โพ เหล่เอ่เหล่โอ เด๊อ ตีวี เน๊อ ตีวี อิช๊ออิปลือ เกอเร๊อดื่อ เด๊อ อาวีช๊า อาเพร๊ขู่ แหล่ขู่ เนอเต๊เห่. 49 คูโยเซฟ นอ พย๊าปล๊อ หนิเอ๋ แหน่เจ๊อ อู ส่อเส่เหว่โพ เร๊อ อา แซ่เจ๊อเน๊อ หล่อตาม๊า เด๊อ เทอดุซาวาทือ เนอ เจ๊อ. อา โอ่เอ๊ ตาลว๋า ซิลือ เร๊อ อา ต่อเบ่ ลอเป่ ปาเจ๊อ โต่ อาขว่าอาคยา, อา ต่อเบ่ ปา โต่. 50 เบ๊อะ เก่วีเก่กอดุ แฮโต่ แต่ล๋ายโต่ เบ๊อะเนอ, คูโยเซฟ อาเม หม่าเฮ๊อ วีโอน อาเพรหลู่แตเต เพโปทิเฟรา อาพู๊เพร เหมาะ เหมาะอาเสนัทเน๊อ เออเนอ อาพู๊โอ่ หนิเป่ คูโยเซฟ พู๊เพรคู ซิเนอ เฮ๊อ. 51 เร๊อ เพโยเซฟ เฮ๊ เน๊อ, “จอแปแหร่ดุ นอ โชตาปา แกลอ เฮ๊อ แว เน๊อ แว เตข่าจาข่าจือ เน๊อ แวเพ อาหี่พู๊แพพู๊ เฮ๊อ.” อาเฮ๊ฮู๊เนอเร๊อ อา เอ๊ เกอเร๊อ อาพู๊แหว่เพร่ว เพรคู เออเตเพร อามุย เน๊อ คูมนัสเสห์. (มนัสเสห์ อาโหง่แลช๊า หม่า โชตาปา.) 52 เร๊อ อา เอ๊ เกอเร๊อ อาพู๊เพรคู เด๊อ อาโหน่ เออเตเพร อามุย เน๊อ คูเอฟราอิม, เร๊อ อา เฮ๊โป่ เน๊อ, “จอแปแหร่ดุ เด๊อะเฮ๊อ แว พู๊เต๊เห่ เบ๊อะ เทอเก่ เด๊อ แว ข่าเบ่ เตจาเตจื่อ เออเต๊เก่ อากู เออเฮ๊อ.” (เอฟราอิม อาโหง่แลช๊า หม่า เส่แถ่โพแถ่ เอ๊ แลแค.) 53 เฉ่เอ่เฉ่โอ โอ่เล๊อโอ่บา เด๊อ อียิปต์เก่กู โซซว๊าต๊าหน่า เออเนอ อาตื๊อดื่อแก เฮ๊อ. 54 เร๊อ เก่วีเก่กอดุ โซซว๊าต๊าหน่า เป๊อทวาแถ่ แหน่ เฮ๊อ ฮู๊ เพโยเซฟ เฮ๊ หนื่ออื่อโท เฮ๊อ เนอ. ล๋อ เทอเก่ เด๊อ อาโร เต๊เห๋ หม่า เก่วีเก่กอดุ โอ่แถ่ ลอลอ. หม่าแน๊เรอ เบ๊อะ อียิปต์เก่ เต๊เก่ เลลอ เนอ เฉ่เอ่เฉ่โอ โอ่ แพ๊. ^e 55 เบ๊อะ อียิปต์เมวเจ่อพู๊ ลอ ปลี เป๊อแถ่ ซิเต่อเบ่ เฮ๊อ เก่วีเก่กอดุ เบ๊อะเนอ, เหย่ซี แฮกุยแถ่ แลแค เฉ่เอ่เฉ่โอ เด๊อ คุ๊ย อาโอ่ เร๊อ คุ๊ย เฮ๊ฉื่อ เหย่ซี เน๊อ, “จว๊า แลแค เด๊อ เพโยเซฟ โอ่ เนอ, เร๊อ เม แลแค ฮู๊ อา เฮ๊โฉ่ ซี เนอ.” ^f 56 เก่วีเก่กอดุ โอ่แถ่ ปีชีจว๊า ลอ เฮ๊อ เต๊เก่เล. เร๊อ อาจาอาจือ หม่าแหน่ เฮ๊อ อียิปต์เก่ เต๊เก่เล ลอเจ๊อ อาขว่าอาคยา, เพโยเซฟ โบ๊โม ลอ โบ๊กู่ลา แจ เต๊เห่ เร๊อ อา อิเชตา เป่ อียิปต์เมวเจ่อพู๊ เต๊เห่ โบ๊กู่ลา. 57 เก่วีเก่กอดุ โอ่แถ่ ลอปลี เจ๊อ เด๊อ เห่ขุ ต๊าบ่า ลอ อาขว่าอาคยา, แกแย โอ่ เด๊อ เห่ขุต๊าบ่า ลอ เต๊เห่ แฮ แลแค เด๊อ อียิปต์เก่ เด๊อ อา เก่ แฮพรี แลแค โบ๊กู่ลา เด๊อ เพโยเซฟ โอ่.