Genesis 47

เพโยเซฟ อาตี๊หี่แตแพ แฮโอ่ เด๊อ โกเชนเก่

1โทเร๊อ เพโยเซฟ แฮแด๊โฉ่ คุ๊ยเน๊อ, “แวเพ เน๊อ แวโป่แหม่ซี โอ่ เด๊อ คานาอันเก่ เร๊อ อา โตจว๊าเกอเร๊อ ลอ เหย่ซีซิหมิ เบ๊หมู่ เต๊เห่, เตมีเตดอโหมะหมู่ เต๊เห่ เน๊อ ล๋อ เต เด๊อ อาโอ่ เน๊อ เหย่ซี เต๊เห่ เร๊อ อา แฮโต่ เฮ๊อ. กู๊แหน่เร๊อ เหย่ซี เกเร แฮ โอ่แลแค เด๊อ โกเชนเก่ เนอ.” 2โทเร๊อ เด๊อ อาแหม่ซีเต๊เห่ อาเกลเนอ, อานว๊าแถ่อาแหม่ซิแง เร๊อ อาเอ๊แฮ เหย่ซีเด๊อคุ๊ย อาเป๊เส่เง.

3เร๊อ คุ๊ย แด๊เฮอ เหย่ซี เน๊อ, “ซี แรเตแคร๊ อิเต?”

เร๊อ เหย่ซี เฮ๊ฉื่อ เน๊อ, “แบ่เจ่ดุ, เนหลู่ เออเต๊เห่ หม่า เพรเกซิหมิ เน๊อ เป่ แซ่เน๊อ เปเพอเปโพ เต๊เห่ เนอแพ๊. 4เด๊อ คานาอันเก่กูเนอ เก่วีเก่กอดุ แหน่เจ๊อ เร๊อ เนหลู่ เต๊เห่ อาซิหมิ เน๊อ เป่ โหมะหมู่ เต๊เห่ เหล่เอ่เส่ กู๊เหล่ โอ่ ปาโต่ เฮ๊อ อาขว่าอาคยา, เนหลู่เต๊เห่ แฮโอ่ โก๊เล๊ เบ๊อะ เก่กูเออแพ๊. ฮู๊เนอเร๊อ แบเจ๋, กู๊แหน่เออ แด่ทูซิปล่อเร๊อ เด๊อะโอ่ เป่เกอเหร่อ เป เบ๊อะ โกเชนเก่กู เออเนอ นี๊.”

5โทเร๊อ คุ๊ย เฮ๊ เพโยเซฟ เน๊อ, “กู๊แหน่ เนเพ เน๊อ เนโป่แหม่ซี แฮโต่เกอ เฮ๊อ เน เฮ๊อ, 6อียิปต์เก่ เต๊เก่เลลอ อาโอ่ เฮ๊อ เด๊อ เนเตเป๊อ อาเล เฮ๊อเนอ, นอโอ่เมอ เนเพ เน๊อ เนโป่แหม่ ซีเต๊เห่ เด๊อ เหล่โอ่ แร๊เล๊อ เบ๊อะ เก่กู เออโต๊โพ่โพ่ นี๊. เร๊อ เด๊อะโอ่ เหย่ซี เด๊อ โกเชนเก่กู เนอ. เด๊อ เหย่ซีเกล เนอ เน เก่ แม๊เถอะ แกแย เต๊เห่เห่ เด๊อ อา แจ่เล๊อลอ เน๊อ อาโค เก่เฮ๊เร๊อ, นอเกแม๊ตู่หนิ เหย่ซี เน๊อ เพรเกเป่ แว ซิหมิ เน๊อ ปู่เป๊เหน่ นี๋.”

7โทเร๊อ เพโยเซฟ เอ๊แฮโน อาเพ เพยาโคบ เร๊อ อา แฮเด๊อะโล ลู เน๊อ คุ๊ย, เร๊อ เพยาโคบ แฮโน เฮ๊โมเฮ๊แร๊ คุ๊ย. 8เร๊อ คุ๊ย แด๊เฮอ เพยาโคบ เน๊อ, “เน โอ่ เฮ๊อ บ๊าหน่า เต?” 9เพยาโคบ เฮ๊ฉื่อ ลู เน๊อ, “แว ทวาซิเผระ เร๊อ จว๊าโอ่ โต๊โผะ โท โต๊โผะ เบ๊อะ เห่ขุเออ เด๊อ อาหน่าหน่า อาเลเลกู เจ๊อ, แว โอ่ เฮ๊อ อาหน่า เตเย เน๊อ โซเซอ เฮ๊อ. แวหน่า ทู เกอ น๊อ อู โต่, โทเร๊อ อาแป่อาเช ลา. โท๊โต่ แวหน่า ทู ครื่อแนเล๊ เกอ เน๊อ แวเพอแวโพ ซี เด๊อ อา ทวาซิเผระ เร๊อ จว๊าโอ่ โต๊โผะ โท โต๊โผะ เบ๊อะ เห่ขุเออ เนอเต๊เห่ อาหน่า โต่.” 10โทเร๊อ เพยาโคบ เฮ๊โมเฮ๊แร๊ แก คยาแซ๊ คุ๊ย เร๊อ อา เถ่จว๊า แก. 11ฮู๊ คุ๊ย นอตา เนอ, เพโยเซฟ นอโอ่ อาเพ เน๊อ อาโป่อาแหม่ซี เบ๊อะ อียิปต์เก่กู, เหล่โอ่ แร๊เล๊อ เนอโต๊โผะ. เร๊อ เหล่โอ่ เบ๊อะเนอโต๊โผะ หม่า อาผื่อ เน๊อ ราเมเสส เหล่โอ่. 12โทเร๊อ เพโยเซฟ เมจว่าหนิเป่โป่ อาเพ เน๊อ อาโป่อาแหม่ เน๊อ ล๋อ อาเพ อาตี๊หี่แตแพ เต๊เห่ เหล่เอ่เหล่โอ อาเง, เป๊เจ่ปีตี๊ฮู๊ โอ่ บ๊าเพรเต๋ เนอ อา เมจว่า หนิลอ เจ๊อ.

เก่วีเก่กอ เด๊อ อียิปต์เก่กู

13กู๊แหน่เออ เก่วีเก่กอ จา แหน่เจ๊อ อาขว่าอาคยา, เหล่โอ่ เบ๊อะเต โต๊โผะ เต๋ เบ่เบ่ เฉ่เอ่เฉ่โอ โอ่ปา โต๊โพ๋ โต่ เฮ๊อ. อียิปต์เก่พู๊ เต๊เห่ เบ่เบ่, คานาอันเก่พู๊ เต๊เห่ เบ่เบ่, เด๊อ เก่วีเก่กอ จา อาขว่าอาคยา, เหย่ซี ข่าเบ่ลอเฮ๊อ เตโอ่วีโอ่กอ เฮ๊อ. 14รือ เด๊อ อียิปต์เก่พู๊ เน๊อ คานาอันเก่พู๊ เต๊เห่ แฮ พรี แลแค โบ๊กู่ลา เร๊อ อา เด๊อ อางู เต๊เห่เนอ เพโยเซฟ พย๊าปล๊อ ลอปลี เร๊อ อา แฮแด่ดว๊า ลอปลี เด๊อ คุ๊ย เหล่แด่ปล๊อ รือ เหล่โอ่. 15เบ๊อะ อียิปต์เก่พู๊ เน๊อ คานาอันเก่พู๊ เต๊เห่ นอเอ่ ลอ แก เฮ๊อ เหย่ซี รือ เบ๊อะเนอ, อียิปต์พู๊ เต๊เห่ แฮ ลอปลี เด๊อ เพโยเซฟ อาโอ่ เร๊อ อา แฮเฮ๊ ลู เน๊อ, “เป รือ โอ่ ปาโต่ เฮ๊อ, หม่าแน๊เรอ แด่ทูซิปล่อ เร๊อ เด๊อะ เป่ เป เฉ่เอ่เฉ่โอ นี๊, เก่หม่าโต่ เฮ๊ หม่า เป เก่ เซอ ลอ หม่าแหน่ เจ๊อเฮ๊อ เบ๊อะ เนเป๊เส่เง เออ เฮ๊อ ปา.” 16ฮู๊เนอเร๊อ เพโยเซฟ เฮ๊ฉื่อ เหย่ซี เน๊อ, “ซีรือ เก่ ลอเฮ๊อ เฮ๊เร๊อ ปื่อแฮ แลแค ซี เตมีเตดอ เนอ, แว ถู่แหล่ เป่ติ ซี เน๊อ เฉ่เอ่เฉ่โอ ปา.” 17ฮู๊เนอ อาขว่าอาคยา, เหย่ซี ปื่อแฮ แลแค เหย่ซีเตมีเตดอ เต๊เห่ เด๊อ เพโยเซฟ โอ่, เร๊อ เพโยเซฟ ถู่แหล่ เป่ เหย่ซี ตีซิ, ซิหมิ, เป่, ปู่เป๊เหน่, แมอ๊อแหล่ เนอเต๊เห่ เน๊อ เฉ่เอ่เฉ่โอ. เบ๊อะเนอ ต๊าหน๋า แฮ อากู เร๊อ อา ถู่แหล่ เอ่ เป่ เหย่ซี เฉ่เอ่เฉ่โอ เน๊อ เหย่ซี เตมีเตดอ เต๊เห่.

18หน่า เนอต๊าหน่า ลอแฮ เฮ๊อ เร๊อ เด๊อ อาโหน่ ต๊าหน่า เนอ, แกแยเต๊เห่ แฮ เด๊อ เพโยเซฟ อาโอ่ เร๊อ อา แฮเฮ๊ แลแค ลู เน๊อ, “แบ่เจ่, เด๊อ เน เป๊เส่เง เนอ, เป แด่โอ๊แด่บี๊ แจ่ เตอเจ๋อ โต่, เป รือ ลอหลา ตี๊กลิ เจ๊อ เฮ๊อ, เปเตมีเตด๋อ หม่า อา ทวา ลอ เนเต่ เฮ๊อเฮ๊อ. เป เหล่เด๊อะ เน เนอ อาโอ่แก ปา เตอเจ๋อ โต่ เฮ๊อ. อา โอ่แก แพ๊ ตื๋อ เปเหน่กล่อ เน๊อ เปเห่ขุ แพ๊. 19หม่าเมเตเรอ เป่ เกเร จว๊าเซอ แหน่ ลอเจ๊อ เด๊อ เนเป๊เส่เง ฮู๊เต? โทโต่ เป เกเร จว๊า แด่ โอ่แหร่แก ลอ เปเห่ขุ ซีเต๊เห่ ฮู๊เต? พรี มอ เป เน๊อ เปเห่ขุ เออ เร๊อ ถู่แหล่เอ่ เป่มอ เป เน๊อ เฉ่เอ่เฉ่โอ นี๋. เร๊อ เป่ เด๊อะลอ ดื่อ เปเห่ขุ, เป ทวา ลอดื่อ คุ๊ย อาหลู่ ปา. แซ่ฮู๊ เป เก่ โอ่เซอเพร เต๊เปล่แฮ เบ๊ โป่ เร๊อ เป เก่ เซอ โต่, โท๊โต่ แซ่ฮู๊ เปเห่ขุ เต๊เห่ เก่ โอ่แหร่ชีคูแก โต่ อาเงเนอ, เด๊อะ เป่ เป โบ๊กู่ลากลุย เด๊อ เป เก่ โหล่อา อาเง เนอ แพ๊.”

20เมฮู๊เนอเร๊อ เพโยเซฟ พรี เป่ลอ เห่ขุ เต๊เห่ เด๊อ คุ๊ย อาเง เบ๊อะ อียิปต์เก่กู เนอ. เด๊อ เก่วีเก่กอ จ๋า แหน่เจ๊อ อาขว่าอาคยา, อียิปต์เก่พู๊ เต๊เห่ อิเช เกอเร๊อ ลอปลี อาเห่ขุ เร๊อ ล๋อ เห่ขุ เนอเต๊เห่ อา ทวาลอ คุ๊ย อาเต. 21ล๋อ แกแย โอ่ เบ๊อะ อียิปต์เก่กือทือ โต่เด๊อ เก่กือตื๊อดื่อ เต๊เห่เนอ เพโยเซฟ นอ แฮทวาลอ เหย่ซี เน๊อ หลู่. 22หม่าแน๊เรอ อา พรี โต่ ตื๋อ เพรหลู่แตเต เต๊เห่ อาเห่ขุ แพ๊. เมเตเฮ๊เร๊อ คุ๊ย เด๊อะ เป่ เหย่ซี รือ เหล่นอเอ่ เร๊อ เหย่ซี เหล่พรีเอ่พรีโอ อาเง อารือ โอ่ แลแค แพ๊ อาขว่าอาคยา, อา โหล่ อิเช เกอ เหย่ซีเห่ขุ โต่. 23โทเร๊อ เพโยเซฟ เฮ๊ แกแย เต๊เห่ เน๊อ, “กู๊แหน่เออ แว พรี เฮ๊อ ซี เน๊อ ซีเห่ขุ เต๊เห่ เด๊อ คุ๊ยอาเง เฮ๊อ. เออเล๊ เตกลุยเตลุ๊ย เด๊อ ซีเง. แฮ โหล่ปลือ มอ แลแค เด๊อ ซีเพร๊ขุ เนอ. 24หม่าแน๊เรอ เบ๊อะ ซี เก๊กาป่อกา เฮ๊อ ซีเตเส่เตโพ ปา เบ๊อะเนอ, แฮเด๊อะ กาคยา เป่ คยาแซ๊ คุ๊ย แงปุ๊ย เร๊อ ตีปุ๊ย ปานี๊. เด๊อ อา โอ่แก เนอลุยปุ๊ย เร๊อ แด่แก เน๊อ อากลุยอาลุ๊ย โทเร๊อ นอเอ่ เน๊อ ซีเง เร๊อดื่อ เน๊อ ซีตี๊หี่แตแพพู๊ เน๊อ ซีพู๊ซีเหลอ เต๊เห่ อาเหล่เอ่เหล่โอ อาเงเนอ.” 25เหย่ซี เฮ๊กาคยาฉื่อ เน๊อ, “แบ่เจ่ดุ, เน เมแลเปล๊ เฮ๊อ เนหลู่ เออเต๊เห่ อาเตโอ่เซอเพร เฮ๊อ. แบ่เจ่ดุ ย๊อ เมโมเมแร๊ แหน่เจ๊อ เด๊อ เป่ขุอาขว่าอาคยา, เป ซิทวา คุ๊ย อาหลู่ แพ๊.” 26ฮู๊เนอเร๊อ เห่ขุ เด๊อ อียิปต์เก่กู เออเนอ, เพโยเซฟ เมโอ่แถ่แก เตซว๊าเตแส่ เต๊อเจ่อ เน๊อ เตเส่เตโพ แงปุ๊ยตีปุ๊ย เนอ อา โตเบ่ ทวา คุ๊ย อาเต. หม่าแน๊เรอ ตื๋อ แพ๊ เพรหลู่แตเต เต๊เห่ อาเห่ขุ เต๊เห่เนอ, อา ทวา คุ๊ย อาเต โต่. เตซว๊าเตแส่ เออเต๊อเจ่อเนอ อา โอ่ป่า โต่ กู๊แหน่ เจ๊อ.

เพยาโคบ อาม๊อเนอมู๊เซ เด๊อ อาโหน่ เล๊อ เนอเต๊เห่

27ฮู๊เนอเร๊อ อิสราเอลพู๊ เต๊เห่ โอ่ แลแค เบ๊อะ อียิปต์เก่กู โกเชนเหล่โอ่ เนอโต๊โผะ. เร๊อ เหย่ซี ดุแหย่แถ่ เน๊อ ดุแหย่แถ่, พู๊โอ่โหร่ เหลอโอ่เอ๊แถ่ เน๊อ โอ่เอ๊แถ่ แลแค เบ๊อะเนอ. 28เพยาโคบ โอ่ เบ๊อะ อียิปต์เก่กู เนอ เช๊อโซซว๊าต๊าหน่า, เร๊อ ล๋อ ปลี หม่า อาหน่า โอ่ เฮ๊อ เตเย เน๊อ ลุยเชอ เน๊อ โซซว๊าต๊าหน่า เฮ๊อ. 29เบ๊อะ เพยาโคบ ซิเง เน๊อ อา เก่ โอ่เซอเพร หน่างยาเลงยา ปา โต่ เฮ๊อ เบ๊อะเนอ, อา เอ๊แฮ อาพู๊ เพโยเซฟ เร๊อ อา เฮ๊ ลู เน๊อ, “เน เก่ โมเร๊อ แว เฮ๊เร๊อ, แด่ทูซิปล่อ เร๊อ แด่โน เนกู๊ขู่ เบ๊อะ แวแข่เล เออ, เร๊ออ๊อแลมอ เน๊อ เน เก่ โล๊แก แว เบ๊อะ อียิปต์เก่กูเออ แต่เหม่ เนอ นี๋. เนเก่เมฮู๊เนอเฮ๊หม่า เนเด๊อะโล เนเตโม เร๊อแว เด๊อเตโม อาลอเป่แจ่ โต่เนอเฮ๊อ. ^a 30เร๊อ ช๊า แว เซอ เฮ๊อ ปา เบ๊อะเนอ, จอกาแก แว เด๊อ อียิปต์เก่กู เออ เร๊อ กาโล๊ เต่อเกอ แว เบ๊อะ อู โล๊เร๊อ แวโหมะเพเพอโพ ซี เนอโต๊โผะ นี๊.”

เร๊อ เพโยเซฟ เฮ๊ฉื่อ ลู เน๊อ, “แว เมดื่อ ฮู๊ เน เฮ๊ เนอ ปา.” 31โทเร๊อ เพยาโคบ เฮ๊ เน๊อ, “เน เก่ เมแหน่ ฮู๊เออ ปา เนอ, แบมอ เนโหง่,” ฮู๊เนอเร๊อ เพโยเซฟ แบแก อาโหง่ เน๊อ อาเพ โทเร๊อ เพยาโคบ ▼

▼ยาโคบ เน๊อ อิสราเอล หม่า เตเพรเพร่ว แพ๊.

งอแล จ๊อเบแถ่ เบ๊อะ อาเหล่เมอ กู่กล๊อเท๊ เนอ.