Gen 48 | EkySCThai | STEP | เด๊อ อาโหน่เนอ อู แฮเฮ๊โฉ่ เพโยเซฟ เน๊อ อาเพ โอ่โม โต่. ฮู๊เนอเร๊อ เพโยเซฟ เอ๊หนิ อาพู๊เพรคู คูมนัสเสห์ เน๊อ คูเอฟราอิม เนอซิเนอ เร๊อ อา จว๊าแม๊ แลแค อาเพ.

Genesis 48

เพยาโคบ เด๊อะบุ๊ยเด๊อะเตอเรอ คูเอฟราอิม เน๊อ คูมนัสเสห์

1 เด๊อ อาโหน่เนอ อู แฮเฮ๊โฉ่ เพโยเซฟ เน๊อ อาเพ โอ่โม โต่. ฮู๊เนอเร๊อ เพโยเซฟ เอ๊หนิ อาพู๊เพรคู คูมนัสเสห์ เน๊อ คูเอฟราอิม เนอซิเนอ เร๊อ อา จว๊าแม๊ แลแค อาเพ. 2 เบ๊อะ อู เฮ๊โฉ่ เป่ เพยาโคบ เน๊อ, “เนพู๊ เพโยเซฟ แฮแม๊โต่ เน เฮ๊อ,” เบ๊อะเนอ, อา แอ๊จื๊อแอ๊เหร่ แถ่โอ่แนโอ่ เด๊อ อาเหล่เมอขุ. 3 โทเร๊อ เพยาโคบ เฮ๊ เพโยเซฟ เน๊อ, “จอแปแหร่ เด๊อ อาโพรเตอเรอฉว่าชอ เนอเตเพร โอ่โลแถ่ เป่ แว เด๊อ คานาอันเก่ วีลูส เนอโต๊โผะ เร๊อ อา เด๊อะบุ๊ยเด๊อะเตอเรอแว. ^a 4 เร๊อ อา เฮ๊ แว เน๊อ, ‘แว เก่ นอ พู๊โอ่โหร่เหลอโอ่เอ๊ เน ปา, เร๊อ เนกลุยเนลุ๊ย ตากาแล เต๊เห่ เก่ โอ่โหร่โอ่เอ๊ โอ่ปลู่โอ่เผ่ เจ๊อปา, เร๊อ แว เก่ นอ ทวาแถ่ เน เน๊อ เมวเจ่อ เอ๊ลาปา. โทเร๊อ คานาอันเก่เออเนอ แว เก่ เด๊อะลาเฮ๊อ เน๊อ เนกลุยเนลุ๊ย ตากาแล เต๊เห่ เร๊อ นอ ทวา เหย่ซีเต ตูจูเพร ตาแลเคร๊ ปา.’” 5 เร๊อ เพยาโคบ เฮ๊ เป่แฮ โป่ เน๊อ, “เบ๊อะ แว แฮ แต่ล๋าย เบ๊อะ อียิปต์เก่ เออ โต่ เบ๊อะเนอ, เนพู๊เพรคู เด๊อ อา โอ่เป๊เจ่แล เบ๊อะ อียิปต์เก่ เออซิเนอ เนอ, แว แด่เฮ๊อ เหย่ซี ฮู๊ แวพู๊ เนอเฮ๊อ. คูเอฟราอิม เน๊อ คูมนัสเสห์ เออซิเนอ เนอ, อา เก่ ทวาเฮ๊อ แวพู๊เพรคู แซ่เน๊อ คูรูเบน เน๊อ คูสิเมโอน เนอ เฮ๊อ. 6 เนพู๊ เด๊อ อา โอ่เป๊เจ่แล โหน่ เด๊อ เหย่ซี คยา เบ๊อะเต เตเพร่ว เบ่เบ่เนอ, เนพู๊เร๊อดื่อ เฮ๊อ. เร๊อ อู่เจเต๊เหย่ เด๊อ เหย่ซี เก่ พย๊าหนิ เต๊เห่เนอ อู เก่ ราม๊าราแด โอ่ เร๊อดื่อ เด๊อ คูเอฟราอิม เน๊อ คูมนัสเสห์ อามุย อาเตราม๊าราแด อากู ปา. 7 เด๊อเนอเค, เบ๊อะ แว โอ่ เด๊อ ปัดดานมาเก่ เร๊อ แว กาคยา คยาแซ๊ เบ๊อะเนอ, เร๊อ เป กาผื่อเฮ๊อ เน๊อ วีเอฟราธาห์ เร๊อ เป โอ่ ปาแพ๊ เด๊อ แกล๊ลูเบ๊อะเนอ, เนโหมะ โหมะราเชล เซอแก เบ๊อะ คานาอันเก่กู เนอ. เร๊อ แว เบ่ โล๊แก อา เบ๊อะ แกล๊ เหล่จว๊า เด๊อ วีเอฟราธาห์ลู เนอโต๊โผะ.” วีเอฟราธาห์ หม่า วีเบธเลเฮม เออเนอ เฮ๊อ. ^b 8 เบ๊อะ เพยาโคบ แม๊เถ่ เพโยเซฟ อาพู๊เพรคู เต๊เห่ เบ๊อะเนอ, “เหย่ซี หม่า อูเป?” อา แด๊เฮอ ฮู๊เนอ. 9 เร๊อ เพโยเซฟ เฮ๊ฉื่อ ลู เน๊อ, “เหย่ซี หม่า แวพู๊เพรคู เด๊อ จอแปแหร่ดุ เด๊อะ แว เบ๊อะ แว โอ่ เบ๊อะ อียิปต์เก่กู เออเต๊เห่ เฮ๊อ.” เร๊อ เพยาโคบ เฮ๊ เน๊อ, “เอ๊แฮ แม๊ แวเหลอ ซี เด๊อ แวโอ่ เออ, เร๊อ แว เก่ เด๊อะบุ๊ยเด๊อะเตอเรอ เหย่ซี ปา.” 10 เบ๊อะเนอเคเร๊อ เพยาโคบ ^{▼▼เบ๊อะเออ ตามา หม่า เด๊อ ฮีบรู ลีเทส่อพ๊ากู เนอหม่า อู เอ๊ ลู เน๊อ เพอิสราเอล. เพยาโคบ เน๊อ เพอิสราเอลหม่า เตเพรเพร่ว แพ๊} โหมะเผระ ลา เฮ๊อ อาขว่าอาคยา, อาเป๊เส่ โป๊โหล่แก เฮ๊อ, เร๊อ อา แม๊เถอะ แร๊ ปา โต่ เฮ๊อ. ฮู๊เนออาขว่าอาคยา, เพโยเซฟ เอ๊แฮผื่อ อาพู๊ซี เด๊อ อาเพ โอ่ เร๊อ อาเพ แพ๊เร๊อ อาเลอ เร๊อ อา โนมื๊อ เหย่ซี. 11 เร๊อ เพยาโคบ เฮ๊ เพโยเซฟ เน๊อ, “แว เตเนโต่ ปาเจ๊อเน เน๊อ แว แม๊เถอะเบ๊ คยาแซ๊ เนเป๊เส่ โต่เฮ๊อ, หม่าแน๊เรอ กู๊แหน่เออ จอแปแหร่ดุ เด๊อะ แม๊เถอะ โต่โป่ เจ๊อเฮ๊อ แว เน๊อ เนพู๊ เต๊เห่ เฮ๊อ.” 12 โทเร๊อ เพโยเซฟ เอ๊เถ่แก อาพู๊ซี เด๊อ อาเพแข่ดา, ^{▼▼เพยาโคบ แด่โอ่ เหย่ซี เด๊อ อาแข่ดา อาโหง่แลช๊า หม่า อา อี๊พู๊ แก เฮ๊อ เหย่ซี เฮ๊อ, เออ หม่า อิสราเอลเมวเจ่อ อาเหล่โกล เต๊อเจ่อ เฮ๊อ} เร๊อ อา แด๊งือ แลแค เด๊อ ตวาขุ เด๊อ อาเพ เป๊เส่เงเนอ. 13 เพยาโคบ เอ๊แฮ ลอ อาพู๊เนอ ซิเนอ เร๊อ คูเอฟราอิม เด๊อ อาเพ ยาโคบ ^{▼▼เออ ตามา หม่า เด๊อ ฮีบรู ลีเทส่อพ๊ากู เนอหม่า อู เอ๊ ลู เน๊อ เพ อิสราเอล. เพยาโคบ เน๊อ เพ อิสราเอล หม่า เตเพรเพร่ว แพ๊.} จ๊าทว๊า ตากยา เร๊อ อาโอ่โตเด เน๊อ เพยาโคบ อากู๊ขุ จ๊าจิโตโค๊, เร๊อ เด๊อ คูมนัสเสห์ ติเร๊อ อา แด่โอ่ ลู เด๊อ เพยาโคบจ๊าจิตากยา เร๊อ อาโอ่ โตเด ติ เร๊อ เพยาโคบ อา กู๊ขุ จ๊าทว๊า โตโค๊, โทเร๊อ คูโยเซฟ นอ แฮโอ่ผื่อ เหย่ซี เน๊อ เพยาโคบ. 14 หม่าแน๊เรอ เพยาโคบ แด่ อากู๊ขู่, เร๊อ คูเอฟราอิม ปีตี๊เล๊อ ตื๊อดื่อเร๊อ อา แด่แถ่ อากู๊ขู่จ๊อทว๊า เด๊อ ลูกู่กล๊อลู. เร๊อ คูมนัสเสห์ ทวา พู๊แหว่เพร่ว ตื๊อดื่อเร๊อ อา แด่แถ่ อากู๊ขู่จ๊อจิ เด๊อ ลูกู่กล๊อลู. 15 โทเร๊อ อา เด๊อะบุ๊ยเด๊อะเตอเรอ เพโยเซฟ เร๊อ อา เฮ๊ เน๊อ, “จอแปแหร่ดุ เด๊อ แวโพ โพอับราฮัม เน๊อ แวเพ เพอิสอัค โอ่เซอเพร เมโต ลูซิปล่อ เนอเตเพร เก่ เด๊อะบุ๊ยเด๊อะเตอเรอ ดื่อ เป๊เจ่ เออเต๊เห่ นี๋. จอแปแหร่ดุ เด๊อ อา แม๊ตู่ แว โต่กู๊แหน่ เออเตเพร เก่ เด๊อะบุ๊ยเด๊อะเตอเรอดื่อ เป๊เจ่ เออเต๊เห่ นี๋. 16 เตเน่วม๊อขุพู๊ เด๊อ อา เมแลเปล๊ แว เน๊อ ล๋อ เตแป่เตเช เนอเตเพร เก่ เด๊อะบุ๊ยเด๊อะเตอเรอ ดื่อ เหย่ซี นี๋. เด๊อเหย่ซีอาขว่าอาคยา เร๊อ อู เก่โต เร๊อ ดื่อแวมุย, แวโพ โพอับราฮัม อามุย เน๊อ แวเพ เพอิสอัค อามุยปานี๊. เหย่ซี เก่ พู๊โอ่โหร่เหลอโอ่เอ๊ ดื่อ เบ๊อะ เห่ขุ เออ ปา นี๋.” 17 เบ๊อะ เพโยเซฟ แม๊เถอะ เน๊อ อาเพ แด่แถ่ อากู๊ขู่จ๊อทว๊า เด๊อ อาพู๊ คูเอฟราอิม อากู่กล๊อลู เบ๊อะเนอ, อาโตลูซิปล่อโต่. ฮู๊เนออาขว่าอาคยา, อา ปื่อ อาเพกู๊ขู่ จ๊อทว๊า เด๊อ อาแด่แถ่ เด๊อ คูเอฟราอิม อากู่กล๊อลู เออ เร๊อ อา เกเร แด่จว๊า เด๊อ คูมนัสเสห์ อากู่กล๊อลู. 18 เร๊อ เพโยเซฟ เฮ๊ อาเพ เน๊อ, “เพ, อาหม่า โต่, พู๊แหว่เพร่ว หม่า เด๊อ เออเตเพร ดื่อ, แด่แถ่ เนกู๊ขู่จ๊อทว๊า เด๊อ อากู่กล๊อลู เนอ.” 19 หม่าแน๊เรอ อาเพ จูเกอลูโต่ เร๊อ อา เฮ๊ เน๊อ, “แว ซิเง แพ๊, พู๊คู, แว ซิเง แพ๊, คูมนัสเสห์ อากลุยอาลุ๋ย หม่า อา เก่ ทวาแถ่ เมวเจ่อดุ เต๊อเจ่อ ปาปา. อากลุยอาลุ๊ย ตากาแล เต๊เห่ เก่ โอ่โหร่โอ่เอ๊แถ่ ปาปา. ฮู๊เตเต๋ เบ่เบ่, อาโป่ อากลุยอาลุ๊ย เออเนอ อา เก่ ดุ เล๊อเล๊อ เน๊อ ลู ปา. เร๊อ อากลุยอาลุ๊ย เนอ อา เก่ ทวาแถ่ เอ๊แหน่เจ๊อ เมวเจ่อดุ เต๊เห่ ปา.” 20 เบ๊อะเนอ เตอเนอ อา เด๊อะบุ๊ยเด๊อะเตอเรอ เหย่ซี เร๊อ อา เฮ๊ เน๊อ, “เบ๊อะ อิสราเอล พู๊ เด๊อะบุ๊ยเด๊อะเตอเรอ อู เตเพรเพร เบ๊อะเนอ, อา เก่ นอเอ่ ซีมุย ปา, เร๊อ อา เก่ เฮ๊ เน๊อ, ‘จอแปแหร่ดุ เก่ นอทวาแถ่ ดื่อ เน ฮู๊ คูเอฟราอิม เน๊อ คูมนัสเสห์ เนอ ปา นี๋.’” ฮู๊เนอเร๊อ เพยาโคบ เอ๊เหร่อเล๊อ คูเอฟราอิม อามุย เร๊อ อา เอ๊โหน่ คูมนัสเสห์ อามุย. ^f 21 โทเร๊อ เพยาโคบ เฮ๊ เพโยเซฟ เน๊อ, “ฮู๊ เน แม๊เถอะ ดื่อ เฮ๊อ เออ, แวม๊อเนอ ผื่อโต เฮ๊อ, หม่าแน๊เรอ จอแปแหร่ดุ เก่ โอ่เกอดื่อ เน๊อ เน ปา เร๊อ อา เก่ เอ๊กา คยาแซ๊ดื่อ เน เด๊อ เนเพอเนโพซี เต๊เห่ อาเก่เนอ ปา. 22 แว เด๊อะ เล๊อเฮ๊อเน โฉ่หร่า เด๊อแวช๊าเป่ เร๊อ แวเน๊ เน๊อแวเกล่อ เด๊อ อาโมไรต์ อาเมวเจ่อ เต๊เห่ อากู๊ยากู เออโต๊โผะ เนอเฮ๊อ. เนโป่เนแหม่ ซีเต๊เห่หม่า แวเด๊อะโต่เกอ เหย่ซีโต่.”