Gen 50 | EkySCThai | STEP | เบ๊อะ เพยาโคบ เซ๊ปลื๊อ เฮ๊อ เบ๊อะเนอ, คูโยเซฟ โอ่เมอตา แพ๊ เกอเร๊อ อาเพ เร๊อ อา โหง่เอ๊โทเอ๊โม เร๊อ อา โนมื๊อ เกอเร๊อ อาเพ.

Genesis 50

อูโหง่อูเห่ เกอ เร๊อ เพยาโคบ

1 เบ๊อะ เพยาโคบ เซ๊ปลื๊อ เฮ๊อ เบ๊อะเนอ, คูโยเซฟ โอ่เมอตา แพ๊ เกอเร๊อ อาเพ เร๊อ อา โหง่เอ๊โทเอ๊โม เร๊อ อา โนมื๊อ เกอเร๊อ อาเพ. 2 โทเร๊อ แซ่ฮู๊ เพโยเซฟ อาเพโล เก่ซอเก่หล่อ โต่ อาเงเนอ, เพโยเซฟ นอ แด่โน เตขุเตเต่อ เด๊อ อาโนมื๊อ เนอเต๊เห่ เน๊อ อาหลู่เล๊ เตขุซ๊าร๊าดุ เนอเต๊เห่ เด๊อ อาเพโลกู. ^{▼▼เบ๊อะ อู แด่โน แต่ล๋าย เตขุโต่ เบ๊อะเนอ, อู พราเพ๊ ลูฮ๊อ เร๊อ อู พย๊าเถ่แกลอ ฮ๊อกู อาครืออาขรว่า ล๋อ ปลี.} ฮู๊เนอเร๊อ เตขุซ๊าร๊าดุ เต๊เห่ แด่โน แลแค เตขุเด๊อ เพยาโคบ ^{▼▼เพยาโคบ เน๊อ เพอิสราเอล หม่า เตเพรเพร่ว แพ๊.} อาโลฮ๊อกู. 3 อู เมฮู๊เนอหม่า อางยา เจ๊อ ม๊อเนอลุยเชอ เจ๊อ. เร๊อ อียิปต์พู๊ เต๊เห่ ซิเปลซิหย่อ โหง่เห่ เกอเร๊อ ลู อาเนอ โซซว๊าเตอเชอ เจ๊อ. 4 เบ๊อะ เหย่ซี ซิเปลซิหย่อ โหง่เห่ โทเฮ๊อ ม๊อเนอ โซซว๊าเตอเชอ เบ๊อะเนอ, เพโยเซฟ เฮ๊ คุ๊ย อาหลู่เล๊ เด๊อ อาโอ่ เบ๊อะ คุ๊ยโฮกู เนอเต๊เห่ เน๊อ, “ซี เก่ โมเร๊อ แว เฮ๊เร๊อ, แด่ทูซิปล่อ เร๊อ จว๊าเฮ๊โฉ่ ตาเต เป่เหร่อ แว คุ๊ย เน๊อ, 5 ‘เบ๊อะ แวเพ เกเร เซอ เฮ๊อ เบ๊อะเนอ, อา นอ แบ เฮ๊อ แว โหง่ เร๊อ อา เฮ๊ เน๊อ, “แว เกเร ผื่อ เซอ เฮ๊อ. โล๊โน แวเด๊อ หล่อกู เด๊อ แว ขื่อหนื่ออื่อ เกอ เร๊อ เน๊อ แวเหน่ เด๊อ คานาอันเก่กู เนอ ตูกู นี๋,” ฮู๊เนอเร๊อ แด่ทูซิปล่อ เร๊อ เด๊อะกา กี๊แถ่ โล๊ เกอเหร่อ แวเพ นี๋. โทปาเร๊อ แว กาคยา คยาแซ๊ ดื่อ ปา.’” ^c 6 เร๊อ คุ๊ย เฮ๊ฉื่อ ลู เน๊อ, “ฮู๊ เน แบ โทเฮ๊อ เนเพ เน๊อ เน เก่เม เป่ ลู เนอ, กากี๊แถ่ โล๊ มอ ลู.”

อู โล๊ เพยาโคบ

7 ฮู๊เนอเร๊อ เพโยเซฟ กากี๊แถ่ โล๊ เกอเร๊อ เฮ๊อ อาเพ. ลอ เพรทวาดุทวาเต เด๊อ คุ๊ย อาโฮเทกู เต๊เห่, อาหลู่เล๊ เต๊เห่ เน๊อ ล๋อ เพรทวาดุทวาเต เบ๊อะ อียิปต์เก่กู เนอเต๊เห่ ครวากา เกอ ลอ แลแค เน๊อ เพโยเซฟ. 8 โท๊โต่ เพโยเซฟ อาตี๊หี่แตแพ, อาโป่อาแหม่, อาเพ อาตี๊หี่แตแพ ล๋อ ปลี ครวากา เกอ ลอ เน๊อ เพโยเซฟ. เด๊อ โกเชนเก่ เนอหม่า อา โอ่แก ตื๊อแพ๊ เหย่ซี เป๊เจ่พู๊เต๊เห่, เหย่ซี ซิหมิ เน๊อ เป่ เน๊อ ปู่เป๊เหน่ เต๊เห่ แพ๊. 9 เร๊อ ตีซิโหล่ เหล่แถ่ช๊า เตช๊า เน๊อ เกลอฮู๊ เพรแถ่แด๊ ตีซิ เต๊เห่ ครวากา เกอ ลอ เน๊อ อาอา. เร๊อ ล๋อ แกแย เบ๊หมู่ดุ เนอเต๊เห่ ครวากา เกอลอ เจ๊อ เน๊อ ลู เจ๊อ. 10 เบ๊อะ เหย่ซี กาโต่ เฮ๊อ คูอาทาดโบ๊กู่ลา โกล่เหล่ กู, จอร์แดน แลโหมะ แบ๊เถ่ เนอโต๊โผะ เบ๊อะเนอ, เหย่ซี โหง่เห่ เอ๊โทเอ๊โม ซิเปลซิหย่อ แลแค เบ๊อะ เนอ. เร๊อ เพโยเซฟ โหง่เห่ ซิเปลซิหย่อ เกอเร๊อ อาเพ เบ๊อะเนอ โซซว๊าเตอเนอ. 11 เบ๊อะ คานาอันเก่พู๊ โอ่ เบ๊อะเนอ เต๊เห่ แม๊เถอะ แกแย เนอเต๊เห่ โหง่เห่ แลแค เบ๊อะ คูอาทาด โบ๊กู่ลา โกล่เหล่ กู เบ๊อะเนอ, เหย่ซี เฮ๊ แลแค เน๊อ, “อียิปต์เมวเจ่อพู๊ เต๊เห่ โหง่เซอโหง่โอ่ ซิเปลซิหย่อจา แหน่เจ๊อ ว๊า,” ฮู๊เนอเร๊อ อู เอ๊ แก เหล่โอ่ เนอโต๊โผะ อามุย เน๊อ อาเบลมิสราอิม. เร๊อ เหล่โอ่ เนอโต๊โผะ หม่า อา โอ่ เด๊อ จอร์แดน แลโหมะ ซิเถ่ ตากยา. (อาเบลมิสราอิม อาโหง่แลช๊า หม่า อียิปต์เก่ อาโหง่เซอ โหง่โอ่) 12 ฮู๊เนออาขว่าอาคยา, เพยาโคบ อาพู๊เต๊เห่ เม แลแค เฮ๊อ ฮู๊ อาเพ เฮ๊แก เหย่ซี โหง่ เนอ. 13 เร๊อ เหย่ซี แย๊กา ลูโล เด๊อ คานาอันเก่ เร๊อ อา กาโล๊โนแก ลู เบ๊อะ หล่อกู โอ่ เด๊อ มัคเป-ลาห์ เพร๊ขุ เนอ ตูกู, เร๊อ อา โอ่ผื่อ เน๊อ คูมัมเร เห่ขุ กู๊เหล่, เบ๊อะ คานาอันเก่กู เนอ. เร๊อ กู๊เหล่ เนอโต๊โผะ หม่า เพอับราฮัม พรี อา เด๊อ ฮิตไทต์ เมวเจ่อพู๊ คูเอโฟรน อากู๊ยากู เร๊อ อา เฮ๊แก เน๊อ อาเหล่โล๊โน อากลุยอาแล เหล่โอ่. ^d 14 เบ๊อะ เพโยเซฟ โล๊โน โทเฮ๊อ อาเพ เบ๊อะเนอ, อา เน๊อ อาโป่แหม่ เต๊เห่ เน๊อ แกแย เด๊อ อา แฮซู เกอ โล เนอเต๊เห่ กาแกแล โหร่ เกอคยาแซ๊ แลแค เน๊อ ลู เด๊อ อียิปต์เก่.

เพโยเซฟ เด๊อะอ๊าเด๊อะเหร่ หนิ อาโป่อาแหม่ซี

15 เบ๊อะ อู โล๊โน แก โทเฮ๊อ เพยาโคบ เร๊อ เหย่ซี กาโต่คยาแซ๊ เฮ๊อ เด๊อ อียิปต์เก่ เบ๊อะเนอ, เพโยเซฟ อาโป่แหม่ เต๊เห่ เฮ๊ แลแค เน๊อ, “เพโยเซฟ เก่ ซิปล่อ โก๊โด่ โอ่แต่ ปา เป เร๊อ อา เก่ เมเลอ กาคยาฉื่อ หม่าแหน่ เป ฮู๊ เป เมหน่าเมจา โทเฮ๊อ ลู เนอเต๊เห่ เฮ๊หม่า, อา เก่ ทวาแถ่ แคร๋ ฮู๊เตปา?” 16 ฮู๊เนออาขว่าอาคยา, เหย่ซี นอจว๊าเฮ๊โฉ่ อู เตหรี่เตแก เด๊อ เพโยเซฟ อาโอ่ เร๊อ เหย่ซี เฮ๊ เน๊อ, “เบ๊อะ เนเพ เซอ แต่ล๋ายโต่ เบ๊อะเนอ, อา เฮ๊แก เป โหง่. 17 เร๊อ เพ นอเฮ๊ เป เน๊อ, ‘ซี โตเบ่ เฮ๊ โยเซฟ ฮู๊เต เฮ๊เนอเร๊อ, แด่ทูซิปล่อ เร๊อ ปลวาแก เป่เหร่อ เนโป่เนแหม่ เต๊เห่ อาเตเมซื๊อเมปล๊า เด๊อ อาเมซื๊อเมปล๊า, อา เมหน่าเมจา เนเนอเต๊เห่ นี๋,’ ฮู๊เนออาขว่าอาคยา, กู๊แหน่เร๊อ แด่ทูซิปล่อ เร๊อ ปลวาแก เป่เหร่อ เนเพ อาจอแปแหร่ดุ อาหลู่เล๊ เต๊เห่ อาเตเมซื๊อเมปล๊า เนอเต๊เห่ นี๋.” เบ๊อะ คูโยเซฟ หนิโฮ เฮ๊อ โหง่ ฮู๊เออ เบ๊อะเนอ, อา เป๊เส่เทอตา เจ๊อ. 18 โทเร๊อ อาโป่แหม่ เต๊เห่ แฮโน แด๊งืองอแล แลแค เด๊อ ลูเป๊เส่เง เร๊อ เหย่ซี เฮ๊ ลู เน๊อ, “กู๊แหน่เออ เป ทวา หม่าแหน่ เฮ๊อ เนหลู่ เฮ๊อ.” 19 หม่าแน๊เรอ เพโยเซฟ เฮ๊ฉื่อ เหย่ซี เน๊อ, “ซิอิเช ต๊อหร่อเซ๊ แต่ แลแค เหม่, แว หม่า จอแปแหร่ดุ แหน่ แอ? แว เมจากาคยา ซีหม่า อาหนิ โต่. 20 ซี เตเน เน๊อ ซี เมหน่าเมจา แว ตื๊อดื่อเร๊อ ฮู๊ซี แม๊เถอะดื่อ กู๊แหน่เออ เนอเฮ๊อ, แซ่ฮู๊ แกแย อาซิปล่อเซอเพร เก่ แลเปล๊ โอ่โหร่ โอ่เอ๊ อาเงเนอเร๊อ, จอแปแหร่ดุ เมเต๊เปล่แก เด๊อ เตแร๊ ตากยา เฮ๊อ. 21 ฮู๊เนออาขว่าอาคยา, ซิอิเช แต่ แลแค เหม่ นี๋. แว เก่ เด๊อะเอ่เด๊อะโอ ดื่อ ซี เน๊อ ซีพู๊ซีเลอ เต๊เห่ ปา.” โทเร๊อ อา เด๊อะอ๊าเด๊อะเหร่หนิ เหย่ซี เร๊อ อา เฮ๊เบ่โมเฮ๊เบ่แร๊ หนิ เหย่ซี.

เพโยเซฟ เซอ

22 เพโยเซฟ เน๊อ อาเพ อาตี๊หี่แตแพ เต๊เห่ โอ่เป่แฮ แลแค เบ๊อะ อียิปต์เก่ เนอ. เร๊อ เบ๊อะ เพโยเซฟ เซอ เบ๊อะอาหน่า โอ่ เฮ๊อ เตเย เน๊อ เช๊อ. 23 เร๊อ เบ๊อ อาเซอ แต่ล๋ายโต่ อาเคเนอ เพโยเซฟ แม๊เถอะ หนิเล๊ ปา อาพู๊ เพเอฟราอิม อาพู๊อาเลอ โต่เด๊อ อาลูอายา เต๊เห่ เจ๊อ. โท๋ โต่ อา โบ่ หนิเล๊ ปา อาลู เต๊เห่ หม่าเฮ๊อ เพมนัสเสห์ อาพู๊ เพมาร์คี อาพู๊ เนอเต๊เห่ แซ่เน๊อ อาพู๊ เร๊อ อาเหน่เร๊อดื่อ เนอเจ๊อ. (มาร์คี อาโหง่แลช๊า หม่า อู อิเชเอ่ ลู.) 24 โทเร๊อ อา เฮ๊ อาโป่แหม่ เต๊เห่ เน๊อ, “แว โอ่เซอเพร งยา ปาโต่ เฮ๊อ. จอแปแหร่ดุ เก่ แฮแล เมจว่า หม่าแหน่ เจ๊อ ซี ปา, เร๊อ อา เก่ เอ๊เถ่แก ซี เน๊อ เก่ เบ๊อะเออ เต๊เก่ ปา, เร๊อ อา เก่ ซูกา ซี เก่ เด๊อ อา แบแลโทเฮ๊อ อาโหง่ เน๊อ โพอับราฮัม, โพอิสอัค, เพยาโคบ เนอเต๊เก่ ปา.” 25 เพโยเซฟ นอแบแล อิสราเอล อาพู๊เต๊เห่ ^{▼▼เพยาโคบ เน๊อ เพอิสราเอล หม่า เตเพร่ว โต แพ๊.} เตแบแล เต๊อเจ่อ, เร๊อ อา เฮ๊ เน๊อ, “จอแปแหร่ดุ เก่ แฮแลเมจว่า หม่าแหน่ เจ๊อ ซี ปา, เร๊อ ซี เบ่ พย๊ากา แก๊แถ่ หนิ ลอ แวครุ๊ย เต๊เห่ เน๊อ ซี ปา นี๋.” ^f 26 เพโยเซฟ หน่า โอ่ เฮ๊อ เตเย เน๊อ เช๊อ เร๊อ อา เซอแก. โทเร๊อ แซ่ฮู๊ คูโยเซฟ อาโล เก่ซอเก่หล่อ โต่ อาเงเนอ, อู แด่โน เตขุเตเต่อ เด๊อ อาโนมื๊อ เนอเต๊เห่ เด๊อ ลูฮ๊ฮกู, โทเร๊อ อูแด่โนแก ลู เด๊อ โลกู เบ๊อะ อียิปต์เก่กู เนอ.