Gen 7:6-24 | EkySCThai | STEP | เบ๊อะ เทอ ดุแถ่ เด๊อ เห่ขุเออ เบ๊อะเนอ, เพโนอาห์ หน่า โอ่ เฮ๊อ อาเยโซซว๊า เฮ๊อ.

Genesis 7:6-24

6 เบ๊อะ เทอ ดุแถ่ เด๊อ เห่ขุเออ เบ๊อะเนอ, เพโนอาห์ หน่า โอ่ เฮ๊อ อาเยโซซว๊า เฮ๊อ. ^a 7 แซ่ฮู๊ เพโนอาห์ เน๊อ อาเม เน๊อ อาพู๊เพรคู เน๊อ อาแด่ ซีเต๊เห่ เก่ แลเปล๊ เน๊อ เทอดุ เออเนอเร๊อ, เหย่ซี โน แลแค เด๊อ ส่อเกลอดุ กู. ^b 8 ล๋อ เตมีเตดอ เด๊อ อาดุดุ อาปีตี๊ตี๊ เน๊อ ถู่พู๊โหย่พู๊ เด๊อ อาโอ่แลแค เด๊อเห่ขุเออต๊าบ่า ล๊อปลีเต๊เห่เนอ, อา โพ๊แปละ เบ่เบ่, อา โพ๊แปละ โต่ เบ่เบ่, 9 อาโหมะ เต๊เบ่ อาเพ เต๊เบ่ เหย่ซี โน แบ๊ซว๊า ลอ แลแค เด๊อ ส่อเกลอดุกู ฮู๊ จอแปแหร่ดุ เฮ๊แลแก เพโนอาห์ เนอ. 10 โทเรอโซซว๊าเตอเนอ บาแถ่ เฮ๊อ เร๊อ เทอ ดุแถ่ บี๊แก เห่ขุ เฮ๊อ. 11 เบ๊อะ เพโนอาห์ หน่า บาแถ่ เฮ๊อ เยโซซว๊า, เนอเล เตเล, เช๊อโซซว๊า เตอเนอ เบ๊อะเนอ, ล๋อ เทอเถ่ขุ เด๊อ เห่เล เนอเต๊เห่ อา ช๊าเถ่ ลอ. เทอกู่ดา เด๊อ ม๊อขุ เนอเต๊เห่ เบ่เบ่, อา โมแอ แซ่เจ๊อเน๊อ กู่ดา ลูโม เนอ เจ๊อ. ^c 12 โทเร๊อ เก่จือตา เหมาะคี๊คี๊ เหมาะเกลเกล เร๊อ อา จือเจ๊อ อาเนอ ลุยเชอ เจ๊อ. 13 เร๊อ เพโนอาห์ เน๊อ อาพู๊เพรคู ซิโซ คูเซม, คูฮาม, คูยาเฟท เน๊อ เพโนอาห์ อาเม เน๊อ อาแด่ ซีเต๊เห่ โน แลแค เด๊อ ส่อเกลอดุกู เบ๊อะ เก่จือตา เนอเตอเนอ เจ๊อ เฮ๊อ. 14 เร๊อ ล๋อ เตมีเตดอ เด๊อ หมิเกล เนอเต๊เห่ เน๊อ เตมีเตดอ เด๊อ อูโบ่ อา เด๊อะหี่เด๊อะแพ เนอเต๊เห่ เน๊อ ล๋อ เตมีเตดอ เด๊อ อาดุดุ อาปีตี๊ตี๊ เนอเต๊เห่ เน๊อ เตมีเตดอ เด๊อ อา โย เด๊อ ม๊อเล เนอเต๊เห่เนอ, อา โนโอ่ เต่อเกอลอ เน๊อ เหย่ซี. 15 เร๊อ ล๋อ เตเบ่แบ๊ เด๊อ อาซิปล่อ เซอเพร โอ่ เต๊เห่ เนอ, อาโหมะ โตโด อาเพ โตโด, ตาซว๊า โท ตาซว๊า อา โน โหร่เกอ แลแค เน๊อ เพโนอาห์ เด๊อ ส่อเกลอดุกู. ^d 16 ฮู๊เนอเรอ เตมีเตดอ เต๊อเจ๋อ เน๊อ เต๊อเจ่อ, อาโหมะ เน๊อ อาเพ โน แบ๊ซว๊า แลแค เด๊อ ส่อเกลอดุกู ฮู๊ จอแปแหร่ดุ เฮ๊แก เพโนอาห์เนอ, โทเร๊อ จอแปแหร่ ตูจูเพร เมบี๊แก กู่ดา. 17 เก่จือ แฮงยาเฮ๊อ อาเนอลุยเชอ เร๊อ เทอ ดุแถ่ เน๊อ ดุแถ่ เด๊อ เห่ขุเออ เร๊อ อา จอโตโจ แถ่แก ส่อเกลอดุเออ เด๊อ เทอขุ เร๊อ ส่อเกลอดุ โอ่โตโจ แถ่โลเล๊อ แก เน๊อ เห่ขุ. ^e 18 เร๊อ เทอ ดุแถ่ เน๊อ ดุแถ่ เด๊อ เห่ขุเออ เร๊อ ส่อเกลอดุ โลจว๊า เด๊อ เทอขุ. 19 เร๊อ เทอ ดุแถ่ ยา แหน่เจ๊อ อาขว่าอาคยา, อา ปลื่อบี๊ ลอปลี เจ๊อ โฉ่ดุโฉ่ทู โต่เด๊อ ม๊อเล เนอเต๊เห่ เจ๊อ. 20 โทเรอ เทอ ดุแถ่ เน๊อ ดุแถ่ เร๊อ อา ดุ ปลื่อลอ โฉ่เนอ เต๊เห่, เร๊อ อา แย เจ๊อ เช๊อแง เปล่ เจ๊อ. 21 ฮู๊เนอเรอ ถู่พู๊โหย่พู๊ เต๊เห่ เบ่เบ่, เตมีเตดอ อา แน เด๊อ อู โบ่ ลู เด๊อ หี่ เนอเต๊เห่ เบ่เบ่, เตมีเตแหม่ เด๊อ อาแปล เนอเต๊เห่ เบ่เบ่, แกแยเห่ขุพู๊ เบ่เบ่, ล๋อ เต เด๊อ อา ซิปล่อเซอเพร กู๊ก่าหรู่แร เด๊อ เห่ขุ เออ เต๊เห่เนอ, อา เซอแก ลอปลี เจ๊อ. 22 ล๋อ เตเบ่แบ๊ เด๊อ อาซิปล่อ เซอเพร โอ่ลอ เด๊อ โคขู่ เออเต๊เห่เนอ, อา เซอแก ลอเจ๊อ. 23 ล๋อ เต เด๊อ อา โอ่ เซอเพร กู๊ก่าหรู่แร เด๊อ เห่ขุ เออเต๊เห่เนอ, อา เซอแก ลอปลี เฮ๊อ. แกแยเห่ขุพู๊ เบ่เบ่, ล๋อ เตมีเตดอ เด๊อ อา โอ่ เด๊อ มีเกล เนอเต๊เห่ เบ่เบ่, ล๋อ เตมีเตดอ เด๊อ อู โบ่ เด๊อ หี่ เนอเต๊เห่ เบ่เบ่, ถู่พู๊โหย่พู๊ โย เด๊อ ม๊อเล ซีเต๊เห่ เบ่เบ่, จอแปแหร่ ตูจูเพร เมเซอแก ลอปลี เฮ๊อ. เร๊อ อา โอ่ เซอเพรแก ตื๊อแพ๊ เพโนอาห์ เน๊อ แกแย เด๊อ อา โอ่ เกอ เน๊อ ลู เนอเต๊เห่ แพ๊. ^f 24 เทอดุ เบ๊อะ เห่ขุ เออเนอ อา งยา ม๊อเนอ เตเย เน๊อ แงเชอ.