Hebrews 11

เตหยื่อ

1เตหยื่อ อาโหง่แลช๊า หม่า เต เด๊อ เป แม๊ชือ ลู เต๊เห่เนอ, เป หยื่อเอ่ อาหม่าอากลอ เร๊อดื่อเฮ๊อ เน๊อ เป เก่ พย๊าหนิ เฮ๊อ. โท๊โต่ เตหยื่อ อาโหง่แลช๊า หม่า เตเด๊อ เป แม๊เถอะแจ่ ล๋ายโต่ เต๊เห่เนอ, เป หยื่อเอ่ อาหม่าอากลอ ตื๊อดื่อ หนิปา เร๊อ เป เก่ พย๊าหนิ ปาเนอเฮ๊อ. 2จอแปแหร่ ถู่เซ๊หนิ แกแย มู๋ หนู่เค เต๊เห่ หม่า หม่าเด๊อ อา โอ่ แลแค เร๊อ เตหยื่อเตแหน่ ฮู๊เออเนอ เฮ๊อ.

3เด๊อ เตหยื่อ อาขว่าอาคยา เป ซิเง เร๊อ จอแปแหร่ แบ๊ตา ม๊อเล อาครืออาขรว่า เน๊อ อาโหง่ แพ๊. ฮู๊เนอเรอ เต เด๊อ เป แม๊เถอะแจ่ กู๊แหน่เค เออเต๊เห่ เนอหม่า อา โอ่ เด๊อ เตเด๊อ เป แม๊เถอะ แจ่โต่ เต๊เห่ อา โอ่ แฮ แพ๊. ^a

4เด๊อ เตหยื่อ อาขว่าอาคยา, คูอาแบล หลู่แถ่ จอแปแหร่ เนอ อาแร๊เล๊อ เร๊อ คูคาอิน อาเตหลู่. จอแปแหร่ พย๊าฉื่อ คูอาแบล อา เตหลู่แตแถ่ ฮู๊เนอเรอ, เด๊อ คูอาแบล อาเตหยื่อ อาขว่าอาคยาเร๊อ, จอแปแหร่ แด่เฮ๊อ ลู ฮู๊ แกแยจ๊อแกแยเต เตเพร เนอเฮ๊อ, เด๊อ อาแบล อาเตหยื่อ ขว่าคยา, อา เซอ โทเฮ๊อ หม่าแน๊เรอ อา เฮ๊เบ่ปา เป เร๊อ อาเตหยื่อ อาหรี่อาแก. ^b

5คูเอโนค เออเนอ เบ่เบ่, เด๊อ อาเตหยื่อ อาขว่าอาคยา, อา ป่อซิเต่อเบ่น๊อ เกออู เน๊อ เตเซอ โต่. จอแปแหร่ เอ๊กา แก๊แถ่ เซอเพร ลู เด๊อ ม๊อขุ. จอแปแหร่ เอ๊กา โอ่เหม่แก ลู อาขว่าอาคยา, อู แม๊เถอะแจ่ ปา ลู โต่. เมเตเฮ๊เรอ เบ๊อะจอแปแหร่ เอ๊กา กาแถ่ แต่ล๋าย คูเอโนค โต่ เบ๊อะเนอ, อา หม่า แกแย เด๊อ อา เมโต จอแปแหร่ อาซิปล่อ เตเพร, ลีเทส่อพ๊ากู เฮ๊ฮู๊เนอ. ^c 6เตหยื่อ เก่ โอ่โต่ เนอ, เตเพร่ว หม่า อู เมโตเบ๊ จอแปแหร่ อาซิปล่อ โต่, เมเตเฮ๊เรอ, ล๋อ แกแย เด๊อ อา แฮ เด๊อ จอแปแหร่ อา โอ่ เต๊เห่เนอ, อา เบ่ หยื่อเอ่ เน๊อ จอแปแหร่ เนอ อา โอ่เซอเพร. เร๊อ แกแย เด๊อ อา ซิปล่อฉว่า แม๊ปู ลู เต๊เห่เนอ, อา เบ่ หยื่อเอ่ เร๊อ จอแปแหร่ เก่ เด๊อ เหย่ซี เตเมหนิคว๊าเก่ ปา ฮู๊เนอ.

7เด๊อ เพโนอาห์ อาเตหยื่อ อาขว่าอาคยา, จอแปแหร่ เด๊อะรอ หนื่ออื่อ ลู เตเด๊อ อา แม๊เถอะ ซิเง ล๋ายโต่ เด๊อ อา เก่ ทวาแถ่ ช๋า เนอปา เนอเต๊เห่. อา เบ่หยื่อเบ่แหน่ จอแปแหร่, อา หนิดา ลูโหง่ เร๊อ อา เมแถ่ ส่อเกลอดุ เด๊อ อา เก่ เมแลเปล๊กา เน๊อ อา หี่ด๊อหี่แพพู๊ อาเง เต๊เบ่. เด๊อ เพโนอาห์ เตหยื่อ อาขว่าอาคยา, อา เด๊อะโล เน๊อ จอแปแหร่ เก่ เมจากาคยา แกแย เห่ขุพู๊ เต๊เห่ ปา. เร๊อ เด๊อ อาเตหยื่อ ขว่าคยา, จอแปแหร่ แด่เฮ๊อ อา ฮู๊ แกแยจ๊อแกแยเต เตเพร เฮ๊อ. ^d

8เบ๊อะจอแปแหร่ เอ๊ เพอับราฮัม เร๊อ อา นอเถ่จว๊า ลู เด๊อ เก่เต๊เก่ เด๊อ อา เก่ เด๊อะ เร๊อ ลู ปา เบ๊อะเนอ, อา โต เถ่จว๊า โต เบ๊อะโต๊โผ่เนอ อา ซิเง โต่ หม่าแน๊เรอ เด๊อ อาเตหยื่อ อาขว่าอาคยา, อา หนิดา เร๊อ อา เถ่จว๊า. ^e 9เด๊อ เตหยื่อ อาขว่าอาคยา, อา จว๊าโอ่ เด๊อ อูโรเทอ อูโรเก่ เด๊อ จอแปแหร่ อ๊อแล เฮ๊อ เน๊อ อา เก่ เด๊อะ ลู เนอเต๊เก่. อา จว๊าโอ่ แซ่เน๊อ เมวเจอะโรพู๊ เตเพร เร๊อ อา จว๊า อิช๊อโอ่หนิ อาเหล่สื่อ เด๊อ อา เด๊อะเก๊โอ่ เกอ เร๊อ อิเก เต๊เห่ เร๊อ อา จว๊าโอ่ แพ๊ เด๊อ เหล่สื่อกู. เร๊อ อา พู๊เพรคู คูอิสอัค เร๊อ อาเลอ ยาโคบ เด๊อ อา พย๊าหนิ แซ๊เกอ เตอ๊อแล เด๊อ จอแปแหร่ อา โอ่ เออ ซิเนอเนอ, อา ช๊อโอ่ แซ่เกอ ดื่อ อาเหล่สื่อ เบ๊อะเนอเนอ. ^f 10เพอับราฮัม เม ฮู๊ จอแปแหร่ เฮ๊ ลู เนอ, เมเตเฮ๊เรอ อา โอ่ป่อ แม๊ชือหนิ วี เด๊อ อาแก่ช๊า อาหม่าอากลอ ตูจูเพร เออเนอ เตอวี. วี เออตีวีเนอ, จอแปแหร่ ตี๊หรี่แตแร หนื่ออื่อ โทเฮ๊อ เร๊อ อา ช๊อแถ่ หนิโทดื่อ เฮ๊อ เร๊อ อาเหน่.

11เพอับราฮัม โหมะเผระ ลาเฮ๊อ, โท๊โต่ อาเม โหมะซาราห์ หม่า อา โชพู๊พู๊ หม่าแน๊เรอ เด๊อ อาเตหยื่อ อาขว่าอาคยา, อาพู๊ โอ่เบ๊ปา เร๊อ อา ทวาแถ่เบ๊ปา เพ เตเพร. อา หยื่อเอ่ เร๊อ จอแปแหร่ เนอ อาจ๊อ เร๊อ อา เตอ๊อแล. ^g 12เพอับราฮัม โหมะเผระ เตเร เซอเจ๊อเฮ๊อ หม่าแน๊เรอ เด๊อ อา เตเพรแพ๊ เร๊อ อาพู๊อาเลอ เต๊เห่เนอ อา โอ่โหร่โอ่เอ๊ แซ่เจ๊อเร๊อ เฉ่ เด๊อ ม๊อเล, อา โอ่ปลูโอ่เผ่ แซ่เจ๊อเร๊อ เห่โซ เด๊อ เทอดุซาวา ทือ เด๊อ อู แด๊ลอ เป่ แจ่ปา เจ๊อ โต่ เนอเต๊เห่เจ๊อ. ^h

13ล๋อ แกแย เด๊อ จอแปแหร่ อ๊อแล เด๊อ อา เก่ เด๊อะ ลู เออเต๊เห่เนอ อา หยื่อเอ่ ตื๊อดื่อหนิ จอแปแหร่ โต่ เจ๊อ เบ๊อะอา เซอ แลแค เนอเตอเนอ เจ๊อ. เต เด๊อ จอแปแหร่ อ๊อแลแก ลู เด๊อ อา เก่ เด๊อะ เหย่ซี เออเต๊เห่เนอ, อา พย๊าหนิ ล๋ายโต่, หม่าแน๊เรอ เหย่ซี แม๊เถอะ หนื่ออื่อ เหร่อ งย๋า ลาเฮ๊อ เร๊อ อา ซิครือ พย๊าฉื่อ หนื่ออื่อ เหร่อเฮ๊อ เตอ๊อแล เออเต๊เห่ เฮ๊อ. เหย่ซี อ๊อแล แลแค เร๊อ เหย่ซี หม่า อา จว๊า ทวา ซิเผระ เด๊อ อูเทออูเก่ แพ๊, เร๊อ เหย่ซี แฮ โอ่โก๊ล๊าเกอ เบ๊อะเห่ขุเออ แตแปล๊เตอเปลอฮู๊ แพ๊, อา เฮ๊ แลแค ฮู๊เนอ. ⁱ 14แกแย เด๊อ อา เฮ๊ แลแค ฮู๊เออ เต๊เห่เนอ อา เด๊อะโล โล๊ลีเจ๊อเฮ๊อ เร๊อ เหย่ซี แม๊ปู เกอเร๊อ แลแค ดื่อเฮ๊อ อาเทออาเก่ เร๊อดื่อ เฮ๊อ. 15วีเด๊อ เพอับราฮัม เร๊อ แกแย เออเต๊เห่ เถ่จว๊าแก เออเนอ, เหย่ซี เตเน เน๊อ วี หม่าแหน่ เด๊อ เหย่ซีเง หม่าโต่. เมเตเฮ๊เนอ, เก่ อา หม่าแหน่ เฮ๊เนอ, เหย่ซี กาโนคยา เนอหม่า อาหนิ แหน่ แพ๊. 16หม่าแน๊เรอ เหย่ซี แม๊ชือ ซิหนิโส่ แหน่เจ๊อ ม๊อขุ เทอเก่ เด๊อ อา โมเล๊อ เออเนอ ต๊าบ่า. ฮู๊เนอเรอ เหย่ซี เอ๊ จอแปแหร่ เร๊อ เหย่ซี จอแปแหร่ เนอ, จอแปแหร่ ซิเตเรโต่. เด๊อ จอแปแหร่ ตี๊หรี่แตแร หนื่ออื่อ เป่เฮ๊อ เหย่ซี วีเออ อาขว่าอาคยา, อา เด๊อะโล เฮ๊อ เน๊อ เหย่ซี เต๊เห่ เก่ เอ๊ จอแปแหร่ เน๊อ เหย่ซี จอแปแหร่ เนอ อา ซิเตเร แลแค โต่.

17เบ๊อะจอแปแหร่ เมแม๊ เพอับราฮัม เบ๊อะเนอ, เด๊อ อาเตหยื่อ อาขว่าอาคยา, อา หลู่แถ่ อาพู๊คู คูอิสอัค. อา พย๊าหนิ จอแปแหร่ อา เตอ๊อแล หม่าแน๊เรอ อา โอ่ ตี๊หรี่แตแร หนื่ออื่อ เด๊อ อา เก่ หลู่แตแถ่ อาพู๊คู เด๊อ อา โอ่ตื๊อ เตเพรเพร่ว เออเนอ เตเพร. ^j 18จอแปแหร่ เฮ๊เจ๊อ ลู เน๊อ, “แว อ๊อแล เร๊อ เนกลุยเนแล เต๊เห่เนอ อา เก่ แฮตา แฮเง เด๊อ คูอิสอัค อา โอ่ ปา.” ^k หม่าแน๊เรอ เพอับราฮัม โอ่ ตี๊หรี่แตแร เด๊อ อา เก่ หลู่แถ่ อาพู๊คู เด๊อ อา โอ่ แพ๊ เตเพรเพร่ว เออเนอ เตเพร. 19เพอับราฮัม เตเน โทเฮ๊อ เร๊อ จอแปแหร่ เก่ เมเซอเพร กาคยา เบ๊แหน่ แพ๊ คูอิสอัค ฮู๊เนอ. เก่ เฮ๊ ตาต๋า หม่า อา แซ่เฮ๊อ เร๊อ อา พย๊าหนิ กาคยา อาพู๊คูเออ เด๊อ เตเซอ อากู เฮ๊อ, เมเตเฮ๊เรอ จอแปแหร่ เก่ เฮ๊ ตาตือ ลู โต่ เฮ๊เนอ, อา เก่ เมเซอ หม่าแหน่ แพ๊ อาพู๊คู แพ๊.

20เด๊อ เตหยื่อ อาขว่าอาคยาเร๊อ, เพอิสอัด เด๊อะบุ๊ยเด๊อะเตอเรอ หนื่ออื่อ อาพู๊ คูยาโคบ เร๊อ คูเอซาว เร๊อ เตเด๊อะบุ๊ยเด๊อะเตอเรอ เด๊อ อา เก่ พย๊าหนิ เด๊อคยา ปา เต๊เห่. ^l

21เด๊อ เตหยื่อ อาขว่าอาคยาเร๊อ, เบ๊อะเพยาโคบ เตเร ผื่อเซอ เฮ๊อ เบ๊อะเนอ, อา เด๊อะบุ๊ยเด๊อะเตอเรอ หนื่ออื่อแกเหร่อ อาเลอ หม่าเฮ๊อ เพโยเซฟ อาพู๊ ซิเนอ. ^m อา ปื่อหม่า เต๊เต่เรแพ๊ อา อิแท๊โบเคอ แพ๊ เร๊อ อา จ๊อเบแถ่ จอแปแหร่. ⁿ

22เด๊อ เตหยื่อ อาขว่าอาคยาเร๊อ, เบ๊อะเพโยเซฟ เตเร เซอ เบ๊อะเนอ, อา เฮ๊แก เน๊อ ช๋า เนอปา เนอ, อิสราเอลพู๊ เต๊เห่ เก่ เถ่กาแก เบ๊อะอียิปต์เก่กู เออเนอปา. เร๊อ อา หม่าแก อาโหง่ เน๊อ ช๋า ซี เถ่กาเฮ๊อ ปาเนอ, พย๊ากาหนิ แลแค แวครุ๊ย ปานี๋, อา เฮ๊แก ฮู๊เนอ. ^o

23เด๊อ เตหยื่อ อาขว่าอาคยาเร๊อ, เบ๊อะคูโมเสส โอ่เป๊เจ่แลโท เบ๊อะเนอ, อาโหมะอาเพ แม๊เถอะ เน๊อ เป๊เจ่พู๊ เออเตเพรเนอ, อาตว่า ซิตาจ๊า โค๊ดื่อ อาขว่าอาคยา, เหย่ซี แด่โอ้ เกอเร๊อ ลู โซเล. ^p คุ๊ย เฮ๊ตา เจ๊อ อาโหง่ เน๊อ อา เก่ เมเซอ ลอ แกแยยิวพู๊ อา พู๊เพรคู เป๊เจ่พู๊ เต๊เห่ ปา. หม่าแน๊เรอ เหย่ซี ซิอิเช ปา เจ๊อ คุ๊ย อา เตเฮ๊เบ่ ตาโหง่ เออเนอ โต่. ^q

24เด๊อ เตหยื่อ อาขว่าอาคยาเร๊อ, เบ๊อะคูโมเสส พู๊เส่ ดุแถ่ เบ๊อะเนอ, อู เอ๊ เจ๊อ ลู เน๊อ คุ๊ยฟาโรห์ อาพู๊เพรเหมาะ อาพู๊คู เจ๊อเร๊อ, อา นอ เอ๊ อู ฮู๊เนอ เตเพร่ว โต่. ^r 25คูโมเสส แด่แล อาซิปล่อ เน๊อ, พื๋อ เน๊อ อา เตเร ลือ เตโม แตแปล๊เตอเปลอฮู๊ เด๊อ อา เก่ เด๊อะ ทวาแถ่ เตซื๊อ เออเนอ, อา เก่ ข่าเต่อเกอ เตจาเตจือ เน๊อ จอแปแหร่ อาแกแย เต๊เห่เนอหม่า, อา โมเล๊อ ปา เจ๊อ อา ซิหยื่อ ฮู๊เนอ. 26คูโมเสส แด่แล เฮ๊อ อาซิปล่อ เน๊อ, ข่าเบ่ เตเป๊อเจ่ออิแซ๊ เด๊อ ครี๊ อาเงเนอ, อางูดุงูชอ เล๊อปา เจ๊อ เร๊อ อียิปต์เก่ อา เตดุแหย่แถ่เซ เต๊เห่ เจ๊อ, เมเตเฮ๊เรอ อา โอ่ป่อแม๊ชือ เน๊อ จอแปแหร่ เก่ เด๊อะ ลู อา เตเมหนิคว๊าเก่ ช๋า เนอปา. 27เด๊อ เตหยื่อ อาขว่าอาคยาเร๊อ, อา เถ่จว๊า เด๊อ อียิปต์เก่กู. คุ๊ย ซิปล่อดุ เจ๊อ ลู หม่าแน๊เรอ อา ซิอิเช โต่. เมเตเฮ๊เรอ อา แม๊เถอะเฮ๊อ จอแปแหร่ เด๊อ อู แม๊เถอะแจ่ ลู โต่ เออเตเพร อาขว่าอาคยา, อา แด่ทูซิปล่อ แฮเง ลาโป่ เจ๊อ. 28เด๊อ เตหยื่อ อาขว่าอาคยาเร๊อ, อา เมโอ่แถ่ เป่ อู ป่วย เด๊อ อู เอ๊ เร๊อ ป่วยเตจว๊า ตา ลว๊า. แซ่ฮู๊ เตเน่วพู๊ เด๊อ อา เมเซอ พู๊แหว่เพร่วเออ เก่ แฮ เมเซอ แต่ อิสราเอลพู๊ แหว่เพร่ว เต๊เห่ แต่เหม่ เนอ, อา นอ โปล่ลอ อู ซิหมิสุ่ย เด๊อ กู่ดาโคลู. ^s

29เด๊อ เตหยื่อ อาขว่าอาคยาเร๊อ, อิสราเอลพู๊ เต๊เห่ กาโกโน จว๊าตาลว๊าเบ๊แก เทอลีดุซาวา เออต๊ออ่อ เด๊อ อา แซ่เจ๊อเร๊อ แกล๊ จว๊า เด๊อ โกโลขุครา เออเนอ เจ๊อ. หม่าแน๊เรอ เบ๊อะอียิปต์พู๊ เต๊เห่ ครวาโน เกอ เบ๊อะเนอ, เหย่ซี แลจื๊อ เซอ แก ลอปลี เจ๊อ. ^t

30เด๊อ เตหยื่อ อาขว่าอาคยาเร๊อ, เบ๊อะอิสราเอลพู๊ เต๊เห่ จว๊า ตาวา โทเฮ๊อ วีเยรีโค โซซว๊าเตอเนอ เบ๊อะเนอ, วีเกเร๊อู๊บึ แถ่โล แลตาพรอแก. ^u

31เด๊อ วีเยรีโค อากูเนอ, แม๊เผ่โหมะ เด๊อ อามุย เร๊อ โหมะราหับ โอ่เตเพร. อา ย๋อ หยื่อเอ่ จอแปแหร่ อาขว่าอาคยา, เบ๊อะอู เมเซอ แกแย เด๊อ อา หยื่อเอ่ จอแปแหร่ โต่ เต๊เห่ เบ๊อะเนอ, อู เมเซอ เต่อเกอ ลู โต่. ^v เมเตเฮ๊เร๊อ อา ย๋อ เอ๊โมฉื่อ อิสราเอลพู๊ เด๊อ อา โน ทื๊อแม๊ เก่เบ๊อะเนอ เต๊เก่ อากู เนอเต๊เห่ เด๊อ อาหี่กู อาขว่าอาคยา, อู เมเซอ โต่ ลู โต่. ^w

32แว โหล่ เฮ๊โล เป่ โป่ ซี หม่าเต? แว เก่ เฮ๊โล เป่ โป่ ซี เร๊อ คูกิเดโอน, ^x คูบาราค, ^y คูแซมสัน, ^zคูเยฟธาห์, ^aaคูดาวิด, คูซามูเอล ^ab เร๊อ เพรโพร เต๊เห่ อาหรี่อาแก เฮ๊เรอ อาม๊อเนอม๊อเซ โอ่ ปา โต่. 33เด๊อ เตหยื่อ อาขว่าอาคยาเร๊อ, เหย่ซี เออเต๊เห่เนอ, อา ช๊าเป่ เทอเก่ เต๊เห่. เหย่ซี เป๊อเต จ๊อจ๊อเตเต เร๊อ อา พย๊าหนิ เต เด๊อ จอแปแหร่ อ๊อแล เหย่ซี เนอเต๊เห่. อา เมเป่ แลแค แอ๊ซี เร๊อ แอ๊ซี เต๊เห่เนอ อา อ่า เหย่ซี โต่. ^ac 34เหย่ซี เมปีเบ๊ แลแค หมิแก โรโซดุ เต๊เห่. เหย่ซี แลเปล๊เบ๊ แลแค เร๊อ อู ชือเซอ เหย่ซี เร๊อ อิโท๊เน๊โก๊ เต๊เห่. เหย่ซี อ๊าเจ่เหร่เจ่ แพ๊ หม่าแน๊เรอ เหย่ซี ทวาแถ่ แกแย เด๊อ อาฉว่าอาชอ แหน่เจ๊อ เต๊เห่. เหย่ซี พย๊าหนิ เตเตอเรอฉว่าชอ เด๊อ เตช๊าเตปา อาเง เร๊อ อา เมเป่แก เทอโร เก่กลอพู๊ เด๊อ อา ซิเถ่ซิฮา เหย่ซี เต๊เห่. ^ad 35เด๊อ เตหยื่อ อาขว่าอาคยา, เพรเหมาะ เต๊เห่เห่เนอ, อากลุยอาแล เต๊เห่ เซอ โทเฮ๊อ หม่าแน๊เรอ อา พย๊าหนิ กาคยา คยาแซ๊ เหย่ซี เด๊อ เตเซอ อากู. เพรหยื่อเอ่ เออ เต๊เห่เห่เนอ, อู เมจาเมจือ เหย่ซี. อู เฮ๊ เหย่ซี เน๊อ เหย่ซี เก่ วีแก แลแค อาเตหยื่อ เฮ๊เรอ, อู เก่ ปลวาเถ่ ปาลา จว๊าแก เหย่ซี หม่าแน๊เรอ อา จูฉื่อ อู โต่. เด๊อ เหย่ซี เมฮู๊เนอ อาขว่าอาคยา, อู เมจาเมจือเซอ เหย่ซี. หม่าแน๊เรอ, ช๋า เหย่ซี เซอ ก๊อถ่อกาคยา เฮ๊อ ปา เตอเนอเนอ, แซ่ฮู๊ เหย่ซี เก่ พย๊าหนิ แลแค เตโอ่เซอ เพร เด๊อ อา โมเล๊อ เร๊อ เออตือทือ อาเงเนอเรอ, เหย่ซี เม แลแค ฮู๊เนอ แพ๊. ^ae 36เต๊เห่เห่เนอ, อู เม ซิเตเร ลอปลี เหย่ซี, อู เป๊อเจ่ออิแช๊ ลอปลี เหย่ ซี, เร๊อ อู มือ เหย่ซี เร๊อ สู่เปลออิปลี๊, เต๊เห่เห่เนอ อู จอ เหย่ซี เร๊อ สู่เปลอต่อเท๊, เร๊อ อู ด๊อโน เหย่ซี เด๊อ ทอกู. ^af 37เต๊เห่เห่ เนอ อู ต่าเซอ เหย่ซี เร๊อ หล่อ, อู บื๊อตือ แก๊กว่า เหย่ซี เร๊อ ลว๊า, อู ชือเซอ เหย่ซี เร๊อ อิโท๊ เน๊โก๊. เหย่ซี เลจว๊า แลแค เร๊อ อา กือแซ๊ แลแค แพ๊ ซิหมิพ๊า, เปะพ๊า เต๊เห่, เหย่ซี โซพ๊าโซแร แหน่เจ๊อ, อู เมจาเมจือ เหย่ซี. อู เป่เอ่เป่โอ ลอ เหย่ซี เต๊เห่. ^ag 38แกแย เออเต๊เห่เนอ อาแร๊ ตาลว๊าซิลือ เจ๊อ เน๊อ อา ต่า ปา เจ๊อ เร๊อ เห่ขุเออ โต่. เหย่ซี โอ่เซอเพร เบ๊อะเห่ขุ เออเนอ, อา เบ่ จว๊าเล ตาวา แซ่เน๊อ แกแย เด๊อ อา โชโดหี่ โชโดเพร๊ เต๊เห่, เหย่ซี เบ่ จว๊าโอ่ แพ๊ เหล่โอ่ เด๊อ แกแย จว๊าโต่ เตเพร่ว โต่ เต๊เห่ อาเหล่โอ่ แพ๊.

39เด๊อ เหย่ซี เตหยื่อ อาขว่าอาคยาเร๊อ, ล๋อ แกแย เออเต๊เห่เนอ, จอแปแหร่ แม๊โม เกอเร๊อ แหน่เจ๊อ เหย่ซี. หม่าแน๊เรอ ล๋อ จอแปแหร่ อ๊อแลแก เต๊เห่เนอ, เหย่ซี พย๊าหนิ เกออู โต่. 40เมเตเฮ๊เร๊อ เต เด๊อ อาแร๊เล๊อ เน๊อ เออเต๊เห่เนอ, จอแปแหร่ เซเรหนื่ออื่อ เป่ โทเฮ๊อ เด๊อ เปเง เร๊อ อา เก่ เด๊อ เน๊อ เป ปา. จอแปแหร่ แด่แล โทเฮ๊อ อาซิปล่อ เน๊อ เป โตเบ่ โน โอ่ป่า เต่อเกอ เน๊อ แกแย มู๋ หนู่เค เต๊เห่. อา เตเตเนหนื่ออื่อ เนอหม่า หม่าเฮ๊อ เป เก่ เมเล๊อเมบา เต่อโหร่เกอ เน๊อ เหย่ซี เออเนอเฮ๊อ.