Hebrews 12
เปเพ จอแปแหร่
1ฮู๊เนอเรอ, แกแย เด๊อ อา ข่าเฮ๊โล เร๊อ เป่ เป เน๊อ อา เตหยื่อเตแหน่ เออเต๊เห่เนอ, อา โอ่ ตาวาปลูตาวาเผ่ เจ๊อ เน๊อ เป. ฮู๊เนอ อาขว่าอาคยา, เป เก่ วีแก แก เตปว๋า เต๊อเจ่อ เด๊อ อา เม ดู๊แด ตาตือ เป เต๊เห่ เน๊อ เตซื๊อ เด๊อ อา เม โต๊โผ่ แลคื๊อแก เป เออเต๊เห่ โป๋! เร๊อ เป แม๊โหร่ลู อู เด๊อะ เป่ เป ม๊าโบ เด๊อ เปเป๊เส่เง เออ เร๊อ เป เก่ แด่ทูซิปล่อ แกล่แฮเต่อ เด๊อ อา โอ่ เนอ โป๋. 2อาแซ่เน๊อ แกแย แกล่ เต๊เห่ แม๊จ๊อจ๊อ แฮโต ตื๊อแพ๊ เตเมเป่ม๊าโบ เออเนอเฮ๊อ, ฮู๊เนอเรอ เป เก่ แม๊จ๊อจ๊อ แฮ แพ๊ตื๊อ เหย่ซู่ โป๋. เมเตเฮ๊เร๊อ อา หม่า เป เตหยื่อเตแหน่ อา แก่ช๊าแก่แร เตเพร. โท๊โต่, อา หม่า เพร เด๊อ อา เมเล๊อเมบา เป่ เฮ๊อ เป เตหยื่อเตแหน่ เตเพร. อา ข่าเซอ โทปาหม่า, อา ซิเง หนื่ออื่อ โทเฮ๊อ เน๊อ อา เก่ พย๊าหนิ เตซิหยื่อซิลอ ปา อาขว่าอาคยา, อา โตเบ่ ข่าเซอ เจ๊อ เด๊อ อี๊ถื่อดีเต่ลู เจ๊อ หม่าแน๊เรอ อา ซิเตเร เตอเจ๋อ โต่. กู๊แหน่เรอ อา โอ่แนโอ่ เฮ๊อ เด๊อ จอแปแหร่ อา เหล่โอ่แน แถ่โล เด๊อ จ๊อทว๊า เนอตากยา เฮ๊อ. 3แซ่ฮู๊ ซี เม เตแร๊ เร๊อ ซี เก่ ซิพร๊าแลแด๊ แต่เหม่, เร๊อ ซี เก่ ซิปล่อปย๊าแก แต่เหม่ อาเงเนอ, เตเนแม๊ แลแคเมอ แบ่เจ่ เหย่ซู่ อาหรี่อาแก เออเนอ, เพรเมเตซื๊อ เต๊เห่ ซิเถ่ซิโตโค ลู เมโตโมเต๊แก่ แหน่เจ๊อ ลู หม่าแน๊เรอ อา แด่ทูซิปล่อ แหน่เจ๊อ เด๊อ เหย่ซีขุ. 4ซี ช๊าฉื่อ เน๊อ เตซื๊อเตปล๊า เออเต๊เห่ หม่าแน๊เรอ ซี ข่าเบ่ เตจาเตจือ โต่ เจ๊อ เด๊อ อู เบ่เมเซอ ซีเนอ, อา โอ่ แต่ล๋าย เตเพร่ว โต่. 5จอแปแหร่ เด๊อะอ๊าเด๊อะเหร่ ซี ฮู๊ อาพู๊ เน๊อ อาเหน่ เนอหม่า ซี โชตาปา เฮ๊อ แอ? อา เฮ๊ ซี เน๊อ,“เก๋อ แวพู๊ ซี๋, เบ๊อะแบ่เจ่ ซิพรวา อิซว๊าอี๊แส่ แร๊กา ซี เบ๊อะเนอ, แด่หยื่อ อา เตซิพรวา อิซว๊าแร๊ ซี เออเนอ นี๋. เบ๊อะอา ซิพรวา ซี เบ๊อะเนอ, ซิปล่อปย๊า แต่ แลแค แต่เหม่ นี๋. a 6เมเตเฮ๊เนอ, จอแปแหร่ ซิพรวา อิซว๊าแร๊กา แกแย เด๊อ อา โม เกอเร๊อ เนอเต๊เห่. เร๊อ ล๋อ แกแย เด๊อ จอแปแหร่ แด่ เฮ๊อ เหย่ซี เน๊อ อาพู๊ เนอเต๊เห่เนอ, อา ปลี๊ เกอเร๊อ ลู.” b 7ซี ข่าเบ่ เตเต๊เห่เนอ, แด่ทูซิปล่อ เร๊อ แด่ อา ฮู๊ เพ จอแปแหร่ อิซว๊าแร๊กา เกอเร๊อ ซี แพ๊ เนอ นี๋. จอแปแหร่ ซิพรวา อิซว๊าแร๊กา เกอเร๊อ อาพู๊ เน๊อ อาเหน่ เนอเต๊เห่ แพ๊. เพ เด๊อ อา ซิพรวา อิซว๊า แร๊กาหนิ เด๊อะเกอ อาพู๊ เต๊เห่ โต่ เนอหม่า อา โอ่ แหน่ เตเพรเพร แอ? 8จอแปแหร่ อิซว๊าอี๊แส่ แร๊กา เกอเร๊อ ลอ อาพู๊ ปว๋า เตเพร. เก่ อา ซิพรวา อิซว๊าแร๊กา เกอเร๊อ เกอ ซี โต่ เฮ๊เนอ, ซี ทวา หม่าแหน่ แล๋ อาพู๊ หม่าโต่. ซี หม่าแพ๊ พู๊ เด๊อ อา โชโด เอ๊เพ เนอเต๊เห่ แพ๊. 9เป โอ่ เน๊อ เปโหมะเปเพ เด๊อ เห่ขุเออ เต๊เห่ เร๊อ อา ซิพรวา อิซว๊าอี๊แส่ แร๊กา เกอเร๊อ เป เร๊อ เป แด่หยื่อ เกอเร๊อ เหย่ซี. อา แซ่ ฮู๊เนอเฮ๊อ เป โอ่ เน๊อ เปเพ เด๊อ ม๊อขุ เออเตเพร อาขว่าอาคยา, เป โต แด่แลหนิ เล๊อปา เจ๊อ เป ซิปล่อ เด๊อ อาเล เออเนอ เจ๊อ. เร๊อ เป เก่ พย๊าหนิ เตเซอเพร ปา. 10เปเพ เด๊อ เห่ขุ เออเต๊เห่ ซิพรวา อิซว๊าอี๊แส่ แร๊กา เป อาหน่าอาเล อาม๊อเนอม๊อเซ ซี เต๊เห่เนอ, อา งยาโต่, เตอ เปลอฮู๊แพ๊ เร๊อ อา แด่ แลแค เน๊อ อา เม เต เออเนอหมา อาแร๊ แพ๊ อา เตเน เร๊อ อา อิซว๊า เป แพ๊. แซ่ฮู๊ เป เก่ บูโพ๊ แซ่เกอ ฮู๊ เปเพ จอแปแหร่ เออเนอเร๊อ, อา ซิพรวา อิซว๊าอี๊แส่ แร๊กา เกอเร๊อ เป เต เด๊อ อา เก่ ทวาบุ๊ยทวาเตอเรอ เกอ เร๊อดื่อ เด๊อ เปเง เออเนอเต๊เห่ แพ๊. 11เบ๊อะจอแปแหร่ ซิพรวา อิซว๊า แร๊กา เกอเร๊อ เป เบ๊อะเนอ, อา แซ่ เร๊อ ซิเปลซิหย่อ ลา เนอ, อา แซ่ เน๊อ เตซิครือซิลอ โอ่ เตอเจ๋อ โต่. หม่าแน๊เรอ แกแย เด๊อ อา ข่าเบ่น๊อ อู ซิพรวา อิซว๊าอี๊แส่ แร๊กา เกอเร๊อ เฮ๊อ ลู เออเต๊เห่เนอ ช๊าเนอปา เร๊อ อา เก่ พย๊าหนิ ลาติ คว๊าเก่ ปาเนอหม่า หม่าเฮ๊อ เตโอ่เซอเพร เด๊อ อาจ๊ออาเต เร๊อ อา เก่ พย๊าหนิ ซิปล่อ ตู๊จู่เตอเจ๊อ ปา.
เตอิซว๊าอี๊แส่ เต๊เห่ เร๊อ เตเด๊อะรอเด๊อะเร เต๊เห่
12ฮู๊เนอเรอ, เมชอแถ่ คยา ซี กู๊ขุ เด๊อ อา เต๊เหย่ แลลา เออเนอ เต๊เห่, เร๊อ เมฉว่าแถ่ คยาแซ๊ ซีกู่มา เด๊อ อา แตแนตากยา เออเนอเต๊เห่. c 13ตูรู๊ ครวาแฮเง ตื๊อดื่อเกอ เตหมะเตจ๊อ อาแกล๊ เออเนอ นี๋. แกแย เด๊อ อาเตหยื่อ ปีตี๊ เต๊เห่เนอ, อาแซ่เน๊อ แกแย กู๊โด่ด๊า เนอเต๊เห่ เฮ๊อ. แซ่ฮู๊ แกแย เด๊อ อา กู๊โด่ด๊า เออเต๊เห่ เก่ ตอพอ แต่เหม่, โทเรอ แซ่ฮู๊ เหย่ซี กู๊โด่ เก่ แร๊กาคยา อาเงเนอ, ตูรู๊ ครวา แฮเง ตื๊อดื่อลา เกอโป่ แลแค นี๋. dเตเด๊อะรอเด๊อะเร เป่ อู เน๊อ เตตีรี๊ จว๊าโค๊แก จอแปแหร่ อาหรี่อาแก
14แอ๊จื๊อ โอ่โครโอ่เกล เกอ เน๊อ อู ปว๋า เตเพร นี๋. แอ๊จื๊อ โอ่เซอเพร บูโพ๊ แลแค นี๋. เมเตเฮ๊เรอ เตโอ่เซอเพร บูโพ๊ เก่ โอ่โต่ เฮ๊เนอ, อู แม๊เถอะแจ่ แบ่เจ่ เตเพร่ว โต่. 15แซ่ฮู๊ ซี ปว๋า เตเพร เก่ พย๊าหนิ เกอ แลแค จอแปแหร่ อาบุ๊ยอาเตออเรอ เออเนอเร๊อ, รอเร๊อ แลแค ซีเหน่ นี๋. นอทวาแถ่ แต่ แลแค ซีเหน่ ฮู๊ ส่อเหมาะ เด๊อ อู เอ่ อา เร๊อ อา มือเซอแจ่ อู เนอเต๊เห่ เตเพร่ว แต่เหม่ นี๋. แกแย เด๊อ อาแซ่เน๊อ ส่อเหมาะ เด๊อ อา เม มือเซอแจ่ อู เออเต๊เห่เนอ, อา เก่ แด๊แถ่ เด๊อ ซีเกล เร๊อ อา เก่ เมแป่เมเช โหร่เอ๊ อู เน๊อ อา เตมือเซอ เออเนอ ปา. e 16นอทวาแถ่ แต่ แลแค ซี เหน่กล่อ เออเนอ เน๊อ แกแย เด๊อ อา จว๊าซื๊อ เพรเหมาะเพรคู เนอเต๊เห่ แต่เหม่ นี๋. ทวาแถ่ แซ่ แลแค แต่ ฮู๊ คูเอซาว เด๊อ อา เบ่ หยื่อ เกออู จอแปแหร่ อาโหง่ โต่ เร๊อ อา อิเชเอ่ เกอเร๊อแก อาแหม่แหว่เพร่ว อู่เจเต๊เหย่ เน๊อ อิซุ๊ย เตเบ เนอเตเพร๋ แต่เหม่ นี๋. f 17ฮู๊ ซี ซิเง โทดื่อ เนอเฮ๊อ, เด๊อคยา เร๊อ เบ๊อะอา ซิหยื่อ แฮ พย๊าเกอ เตเด๊อะบุ๊ยเด๊อะเตอเรอ เด๊อ อาเพ โอ่ เบ๊อะเนอ, อาเพ เด๊อะ ปา ลู โต่. อา แม๊ปู เจ๊อ เตเด๊อะบุ๊ยเด๊อะเตอเรอ เน๊อ อาเป๊เส่เทอ เจ๊อ ตื๊อดื่อเรอ, เด๊อ อิเชเอ่โทเฮ๊อ พู๊แหว่เพร่ว อา อู่เจเต๊เหย่ เออ อาขว่าอาคยา, อา ถู่แหล่ เต๊เปล่ โค๊แจ่ ปาโต่. g 18– 19ซี แฮผื่อ เฮ๊อ เด๊อ จอแปแหร่ อา โอ่ เออเนอหม่า, อาแซ่ เน๊อ อิสราเอลพู๊ เด๊อ เนอเค เต๊เห่ แฮ เด๊อ ซีนายโฉ่ อา โอ่ เนอ หม่าโต่. เหย่ซี แฮโต เด๊อ ซีนายโฉ่ เด๊อ อู แม๊เถอะแจ่ ลู, อู พือเบ่ แจ่ ลู เออเนอเตเม อา โอ่, หมิแกแถ่ เด๊อ โฉ่เออเตเม อาลู, อ๊อโหล่ คี๊ตือรือ ตาบี๊เจ๊อ, เก่แลเซ๊ แลแลดุแฮ, กวา พราแถ่ เร๊อ จอแปแหร่ อา โหง่พราแถ่ เด๊อ โฉ่ออ เนอเตเม อากู. อิสราเอลพู๊ เต๊เห่ หนิโฮ โหง่พราแถ่ เร๊อ อา ซิอิเช ตาลว๊าซิลือ อาขว่าอาคยา, เหย่ซี กุย ซิยอ จอแปแหร่ เน๊อ อา เก่ เฮ๊เบ่ โป่เฮ๊อ. h 20เมเตเฮ๊เรอ, โหง่พราแถ่ เร๊อ อา เฮ๊ เน๊อ, “เตมีเตดอ เจ๊อ เบ่เบ่ อา เก่ แฮ เมเบ่ โฉ่เออเตเม เฮ๊เนอ, เบ่ ต่าเซอ แก อา เน๊อ หล่อ,” i โหง่ พราตา เออตือมือเนอ เหย่ซี ข่าเป่ ปาเจ๊อโต่ เจ๊อ. 21เหย่ซี แม๊เถอะ แลแค เต ทวาแถ่ ฮู๊เออ เด๊อ เหย่ซี เป๊เส่เง เร๊อ, เหย่ซี ซิอิเช แหน่เจ๊อ อาขว่าอาคยา, “แว ซิอิเชแตแนตากยา เจ๊อ” j คูโมเสส เฮ๊ ฮู๊เนอ. 22หม่าแน๊เรอ, ซี เกอลาติ เร๊อ ซี แฮโต่เฮ๊อ เด๊อ ศิโยนโฉ่ เฮ๊อ. โฉ่เออเตเมเนอ หม่า หม่าเฮ๊อ จอแปแหร่ เด๊อ อา เซอ เพร เออเตเพร อาวี ตีวี เด๊อ อูเอ๊ เน๊อ วีเยรูซาเล็ม เด๊อ ม๊อขุเออเนอ ตีวี เฮ๊อ. จอแปแหร่ อาม๊อขุ เตเน่วพู๊ เด๊อ อา โอ่เจ๊อ เด๊อ อาซี เน๊อ อาซีกู เต๊เห่ แฮโอ่ ป่อ ซิครือซิลอ โหร่เกอ ลอ ลู เบ๊อะเนอ. เน๊อ ซี แฮ โอเต่อเกอ เน๊อ อา ม๊อขุ เตเน่วพู๊ เออเต๊เห่ เฮ๊อ. 23ซี แฮโต่เฮ๊อ เด๊อ จอแปแหร่ อา พู๊แหว่เพร่ว ▼▼แกแยยิวพู๊ อาเหล่โกล โอ่ เน๊อ พู๊แหว่เพร่ว หม่า อา พย๊าหนิ โค๊ดื่อ เตแด่ดุหยื่อแหน่ ลู เชน๊อ อู่เจเต๊เหย่ เต๊เห่.
เต๊เห่ เหล่แฮโอป่อ เต่อลู อา เหล่โอ่ เฮ๊อ. อู ราโนม๊า โอ่เฮ๊อ เหย่ซีมุย เด๊อ ม๊อขุ เฮ๊อ. ซี แฮโต่ แลแค เฮ๊อ เด๊อ จอแปแหร่ เด๊อ อา เก่ เมจากาคยา เร๊อดื่อ อู ปว๋า เตเพร เน๊อ อาเหน่แหน่แบ่เจ่ เออเตเพร อาเป๊เส่เง เฮ๊อ. ซี แฮโต่เฮ๊อ เด๊อ แกแยจ๊อ แกแยเต เด๊อ เนอเค เต๊เห่ อา ซิปล่อเซอเพร เด๊อจอแปแหร่ เมเล๊อบา โทเฮ๊อ ลูเออเต๊เห่ อา โอ่ เฮ๊อ. 24ซี แฮโต่เฮ๊อ เด๊อ เหย่ซู่ อาโอ่ เฮ๊อ เตอ๊อแล. อาเซ เด๊อ แกแยเห่ขุพู๊ เน๊อ จอแปแหร่ อาเปล่กู เออเนอ อา ทวา เป่ เฮ๊อ เพรแรเต เด๊อ อาเปล่กู เตเพร เฮ๊อ. โท๊โต่ ซี แฮโต่เฮ๊อ เด๊อ แบ่เจ่ เหย่ซู่ อาสุ่ย เหล่ทุ๊ยตา อาเหล่โอ่ เด๊อ อาแร๊ เล๊อเล๊อ ปา เจ๊อ เน๊อ คูอาแบล อาสุ่ย เนอ อา โอ่ เฮ๊อ. l 25ฮู๊เนอเร๊อ, แซ่ฮู๊ ซี เก่ ทวา แต่ แกแย เด๊อ อา หนิโฮ จอแปแหร่ อาโหง่พราแถ่ เร๊อ อา เท๊ฉื่อแก จอแปแหร่ เนอเต๊เห่ อาเตเมเนอ, รอหนิ แลแค ซีเหน่ นี๋. เบ๊อะอิสราเอลพู๊ เต๊เห่ หนิโฮ เตเด๊อะรอ เหย่ซี เด๊อ เห่ขุเออ เบ๊อะเนอ, เหย่ซี หนิดา แลแค ลูโหง่ โต่. ฮู๊เนอเร๊อ อา เกล๊ แลเปล๊เบ๊ แลแค เน๊อ เตเมจากาคยาโต่ เก่ เมฮู๊เนอเร๊อ เปเก่ เท๊ฉื่อแก เด๊อ ม๊อขุ เออเตเพร เด๊อะรอเปเออ เก่เฮ๊เรอ, เตเนแม๊มอ, ซี เกล๊ แลเปล๊ เบ๊แจ่ ปา เจ๊อแหน่ เน๊อ จอแปแหร่ อา เตจามือกาคยา ตีกี๋ เจ๊อแหน่โต่เฮ๊อ. m 26เบ๊อะเนออาเค จอแปแหร่ อาโหง่ เออเนอ อาพรา โกโย ลอ เจ๊อ เห่ขุ ต๊าบ่า เจ๊อ. หม่าแน๊เรอ กู๊แหน่เรอ อา อ๊อแล เน๊อ, “แว เก่ เมโกโย โป่ คยาแซ๊ ปา โตโพ๊, เร๊อ แว เม โกโย ตื๊อ เห่ขุ เออเนอ โต่, แว เมโกโยโต่ เกอโป่ ลอเจ๊อ ม๊อเล เต๊เห่ ปา,” n อา เฮ๊ ฮู๊เนอ. 27อา เฮ๊ เน๊อ, “โป่คยาแซ๊ ปา,” อาโหง่แลช๊า หม่า, อาเฮ๊โลโปล เจ๊อเฮ๊อ เน๊อ จอแปแหร่ เก่ เม โกโยแถ่ ลอ ล๋อ เตเบ่แบ๊ เนอเต๊เห่ ปา. เร๊อ อา เก่ โอ่เหม่แกลา ลอ ปา. อา โกโย แจ่โต่ เต๊เห่ เก่ โอ่แก ตื๊อดื่อแพ๊ อาเงเนอ, จอแปแหร่ เมโกโย ฮู๊เออเนอแพ๊. 28ฮู๊เนอเรอ, เป เฮ๊บุ๊ยเฮ๊เตอเรอ โหร่ลู จอแปแหร่ โป๋, เมเตเฮ๊เรอ เป พย๊าหนิเฮ๊อ เทอเก่ เด๊อ อา โกโย แจ่โต่ เออเต๊เก่เฮ๊อ. เป เก่ จ๊อเบแถ่ จอแปแหร่ เน๊อ เตจ๊อเบ เด๊อ อาโต เน๊อ ลูซิปล่อ เน๊อ เตซิอิเช แดดุแด่ทู อากู เออเนอโป๋. 29เมเตเฮ๊เรอ เป จอแปแหร่ หม่า แซ่เน๊อ หมิแกโลโซ เด๊อ อาอือ เซอ แก อู เออเนอเฮ๊อ. o
Copyright information for
EkySCThai