Hebrews 2
เตเมแลเปล๊กา เด๊อ อาดุ
1เด๊อ เป ซิเงเฮ๊อ เร๊อ จอแปแหร่ อาพู๊คู หม่า อาดุอาแย ฮู๊เนอ อาขว่าอาคยา, แซ่ฮู๊ เป เก่ จว๊าโค๊แก เตหมะเตจ๊อ เด๊อ เป หนิโฮ โทเฮ๊อ เออเนอ แต่เหม่ อาเงเนอ, เป เบ่ แด่หยื่อเล๊อ อา. 2จอแปแหร่ เด๊อะตา เปเพอเปโพ เด๊อ เหร่อเคเนอ เต๊เห่ เตหรี่เตแก เต๊อเจ่อ. ▼▼เตหรี่เตแก เออเต๊อเจ่อ เนอหม่า เตซว๊าเตแส่ เด๊อ จอแปแหร่ เด๊อะตา คูโมเสส เนอเฮ๊อ.
เร๊อ อา เฮ๊เบ่ตา แฮเง เร๊อ ม๊อขุ เตเน่วพู๊ เต๊เห่. เร๊อ แกแย เด๊อ อา หนิโฮ เตหรี่เตแก เออเต๊เห่เนอ, อาเบ่ หนิดา ครวาเม อา. แกแย เด๊อ อา หนิดา ครวาเม เกออู โต่ เต๊เห่เนอ, จอแปแหร่ เมจากาคยาแก โทเฮ๊อ เหย่ซี ฮู๊ อา โต เร๊อ เหย่ซี เนอเฮ๊อ. 3ฮู๊เนอเรอ, กู๊แหน่เออ เป เก่ แด่หยื่อ เกออู เตเมแลเปล๊กา อาดุอาแย เออ โต่ เฮ๊เรอ จอแปแหร่ เก่ เมจากาคยา หม่าแหน่ เจ๊อ เป ปา. จอแปแหร่ อา เตเมแลเปล๊กา อาแกล๊อาโกล เออเนอ, แบ่เจ่ อาเหน่กล่อ เร๊อดื่อ แด๊โฉ่โด่แน โล เหร่อเล๊อ เป่ อู เฮ๊อ. เร๊อ แกแย เด๊อ อา หนิโฮ ลู เฮ๊เออ เต๊เห่เนอ อา เฮ๊โฉ่โปล เป่ แฮเง เป่ เน๊อ เตเมแลเปล๊กา เตหรี่เตแก เออเต๊เห่ เนอหม่า อา หม่าแหน่ เจ๊อ ฮู๊เนอ. 4จอแปแหร่ เฮ๊โฉ่โปล เป่เกอโป่ อู เน๊อ เด๊อ เตเมแลเปล๊กา เตหรี่เตแก เออเนอหมา อาโต หม่าแหน่ เจ๊อ. เด๊อ เตเมม๊าเมแด, อาเตเม โค๊ตีกลี๊ เต๊เห่ เร๊อ อาเตเม ตาปาคย๊ายื๊อ เต๊เห่ อาขว่าอาคยา, อา เด๊อะโลโปล เป่เฮ๊อ อู เร๊อ เตเมแลเปล๊กา เตหรี่เตแก เออเนอหมา อา โตเฮ๊อ. โท๊โต่, จู๋ ดื่อ อาโต จอแปแหร่ อาซิปล่อ เร๊อ อา เด๊อะตา ครา เป่ อู เตแจ่เตลีแม เชหยู่ เต๊เห่. เร๊อ อา เด๊อะตา แฮเง เร๊อ แหย่โยบูโพ๊ แบ่เจ่. เด๊อ แหย่โยบูโพ๊ แบ่เจ่ เชหยู่เออ เต๊เห่ อาขว่าอาคยา, จอแปแหร่ เด๊อะโลโปล เป่เฮ๊ออู เร๊อ เตหรี่เตแก เออเนอหมา อา โตเฮ๊อ. แกแย เด๊อ อา ซูจว๊า เป เด๊อ เตเมแลเปล๊กา เตเพร
5เป เฮ๊ เป่ ซี เร๊อ เห่ขุเซ เก่ โอ่แถ่ ช๋า โหน่ปา อาหรี่อาแกเออ เนอหม่า, จอแปแหร่ นว๊าแถ่ เต่อเกอ ม๊อขุ เตเน่วพู๊ เต๊เห่ เด๊อ อา เก่ เบ่ เป๊อตี๊หรี่ เกอ เตอาเง เนอโต่. 6อา นว๊าแถ่ เต๊เปล่ โค๊ลาติ เด๊อ แกแยเห่ขุพู๊ ตากยาเฮ๊อ, เมเตเฮ๊เรอ เตเฮ๊เบ่ โอ่เด๊อ ลีเทส่อพ๊ากู โต๊โต่ เร๊อ อา เฮ๊ เน๊อ, b “เก๋อ จอแปแหร่, เน จว๊า โชตาปา เป่ปา เจ๊อ แกแยเห่ขุพู๊ เต๊เห่ โต่ เร๊อหม่า, เหย่ซี เร๊อ แกแยเจ๊อ ฮู๊เต เต๊เห่ เจ๊อเตเต? เหย่ซี หม่า แกแย เด๊อ อางูอาพรี โอ่เกออู โต่ เต๊เห่แพ๊ เร๊อ เน จว๊า แม๊ตู่ เกอเร๊อ เจ๊อ เหย่ซี บ๋า เออเจ๊อ เร๊อหม่าเมเต? 7เน เด๊อะ แกแยพู๊คู เต๊เห่ อา เตอเรอฉว่าชอ เด๊อ อา อ๊าเจ่เล๊อ เร๊อ ม๊อขุ เตเน่วพู๊ เต๊เห่ เตอเปลอฮู๊ หม่าแน๊เรอ เด๊อคยา เนอ, เน เด๊อะ คยาแซ๊ เหย่ซี เตอเรอดุเตอเรอทู, เร๊อ เน เมลีเมเตเค คยาแซ๊ เหย่ซี เออเต๊เห่, เร๊อ 8เน นอเป๊อตี๊หรี่หนิ เหย่ซี ล๋อ ปลี,” c อา เฮ๊ ฮู๊เนอ. เบ๊อะจอแปแหร่ นอเป๊อเฮ๊อ เตล๋อ ปลี เน๊อ เหย่ซี อาเคปาเนอ, เตเด๊อ อา เป๊อเต่อโต่ เนอ อาโอ่ แก ปา เตอเจ๋อ โต่ เฮ๊อ. หม่าแน๊เรอ กู๊แหน่เค เออเนอ เป แม๊เถอะแต่ลา แกแย เห่ขุพู๊ เป๊อลอแต่ลา เตล๋อ ปลี โต่. 9หม่าแน๊เรอ, เตหรี่เตแก เด๊อ เป ซิเง หม่าแหน่ เนอหม่า หม่าเฮ๊อ เหย่ซู่ เออเนอเฮ๊อ. เบ๊อะอา แฮแล เด๊อ เห่ขุเออ เบ๊อะเนอ, อา พย๊าหนิ เตเตอเรอฉว่าชอ เด๊อ อาอ๊าเจ๊เล๊อ เน๊อ ม๊อขุ เตเน่วพู๊ เต๊เห่ เตอเปลอฮู๊, เมเตเฮ๊เรอ, เด๊อ จอแปแหร่ อาบุ๊ยอาเตอเรอ อาขว่าอาคยา, เหย่ซู่ เบ่ ข่าเซอ เป่ เด๊อ เป ล๋อ ปลี อาเง. เด๊อ เหย่ซู่ ข่าเซอ อาขว่าอาคยา, กู๊แหน่เออ เป ซิเง เน๊อ จอแปแหร่ นอ เมลีเมเตเค, แด่ดุแด่ทู อู เร๊อ เหย่ซู่ เฮ๊อ. 10ล๋อ เตเต๊เห่ เนอหม่า จอแปแหร่ อาเง ล๋อ ปลี แพ๊, เร๊อ อา แบ๊ตา เกอเร๊อ ลอเฮ๊อ เต ปว๋า เต๊อเจ่อ เฮ๊อ. แซ่ฮู๊ จอแปแหร่ เก่ เด๊อะโหร่เด๊อะเอ๊ เป่เกอ แกแยเห่ขุพู๊ เน๊อ อา เตเตอเรอดุ เตอเรอทู เต๊เห่ อาเงเนอเรอ, อา เมเล๊อเมบาแถ่ เฮ๊อ แบ่เจ่ เหย่ซู่ เน๊อ อา นอ ข่าจาข่าจือ ลู เออเนอ เฮ๊อ. จอแปแหร่ เม เต ฮู๊เออ เนอหม่า อาโต แพ๊. เร๊อ แบ่เจ่ เหย่ซู่ เก่ ทวา เป่ เป เพรซู แกล๊ เด๊อ อา เก่ เมแลเปล๊กา เป เตเพร ปา. 11เหย่ซู่ เม อาโพ๊อาแปละ กา แกแยเห่ขุพู๊ เต๊เห่ อา เตเมซื๊อ เต๊เห่. แกแยเห่ขุพู๊ เด๊อ เหย่ซู่ เม โพ๊แปละกา เหย่ซีเตซื๊อ เนอเต๊เห่ เน๊อ เหย่ซู่ เออเนอหมา, อาเพ จือลู เตเพรเพร่ว แพ๊ อาขว่าอาคยา, เหย่ซู่ เอ๊ เหย่ซี เน๊อ โป่แหว่ เนอ อา ซิเตเร โต่. 12เร๊อ เหย่ซู่ เฮ๊ จอแปแหร่ เน๊อ, “แว เก่ เฮ๊โล เป่ แว โป่แหว่ เต๊เห่ เน๊อ เนมุย ปา. เด๊อ อู จ๊อบู่จ๊อเบ ปล๊อ ลู อากล๊าเมกู เนอ, แว เก่ ถู่เซ๊แถ่ เน ปา.” d 13อา เฮ๊ เกอโป่ เน๊อ,“แว เก่ ซิเล หยื่อเอ่แถ่หนิ จอแปแหร่.” e เร๊อ อา เฮ๊ เกอโป่ เน๊อ,
“แว โอ่เต่อเกอ เร๊อ พู๊เหมาะพู๊คู เด๊อ จอแปแหร่ เด๊อะตา แว เต๊เห่ เบ๊อะเออ.” f 14พู๊เหมาะพู๊คู อา เอ๊ ลู เออเต๊เห่เนอ, อา เน๊อ อาเหน่กล่อ สุ่ยเทอ เด๊อ อา เซอแจ่เออ อาขว่าอาคยา, แบ่เจ่ เหย่ซู่ แฮแล พย๊าหนิ เกอดื่อ แกแย เห่ขุพู๊ อาเหน่กล่อ เด๊อ อา แซ่เกอ ดื่อ เน๊อ เหย่ซีเนอ. อา ทวาแถ่ แซ่เน๊อ แกแยเห่ขุพู๊ อาขว่าอาคยา, อา เซอ แจ่. แซ่ฮู๊ เหย่ซู่ เก่ เมปย๊าแก โลเน๊มู๊แหม่รีแจ่ กู่กล๊อ เด๊อ อู เอ๊ เร๊อ ซาตาน เด๊อ อา โอ่ เร๊อ อา เตโพรเตเตอเรอ ฉว่าชอ เด๊อ อา เก่ เป๊อตี๊หรี่หนิ เตเซอ เออโตโด อาเงเนอ, อา ข่าเซอแก อาซิปล่อ. 15โท๊โต่ เด๊อ อา ข่าเซอ เฮ๊อ อาขว่าอาคยา อา ปลวาเถ่ ปาลาแก ลอเฮ๊อ แกแย เด๊อ อา ซิอิเช เตเซอ อาเหล่ เนอเต๊เห่ เฮ๊อ. เหย่ซี เออเต๊เห่เนอ อา แซ่เฮ๊อ เน๊อ อา ทวา เตเซอ อาหลู่เล๊ เต๊เห่ เฮ๊อ, เร๊อ เป๊อแถ่ เด๊อ อา โอ่เป๊เจ่แลลู่ อาเคปา อา ซิอิเช แลแค เตเซอ อาเหล่. 16เป ซิเงโปลปลื๊อ เจ๊อ เฮ๊อ เร๊อ แบ่เจ่ เหย่ซู่ เมจว่าเกอ ม๊อขุ เตเน่วพู๊ เต๊เห่ โต่. อา เมจว่า เต๊เปล่ เป่ เด๊อ เพอับราฮัม อากลุยอาแล เต๊เห่. g 17ฮู๊เนอ อาขว่าอาคยา แซ่ฮู๊ แบ่เจ่ เหย่ซู่ เก่ ทวาดื่อ เพร เด๊อ อา เม จอแปแหร่ อา เตเอ่เตแร ฮู๊ เพรหลู่แต กู่กล๊อดุเล๊อ เด๊อ อาจ๊อ เร๊อ อาโหง่ เร๊อ อา ซิยอแจ่ อู เตเพร. โท๊โต่ แซ่ฮู๊ อา เก่ ข่าเซอเป่ เด๊อ แกแย เต๊เห่ อา เตเมซื๊อ เต๊เห่ เก่ ปลวาแก อาเงเนอ, อา แฮแล พย๊า แกแยเห่ขุพู๊ อาเหล่โกล แซ่เน๊อ อาโป่อาแหม่ เออเนอเต๊เห่ เฮ๊อ. 18เร๊อ กู๊แหน่เออ, อาเหน่ แบ่เจ่ เร๊อดื่อ ย๋อ แม๊เถอะป่อเต่อ แฮ เบ่น๊อ โทเฮ๊อ เตข่าจาข่าจือ เต๊เห่, เตอิลออี๊โหล่ เต๊เห่ อาขว่าอาคยา แกแย เด๊อ อา แม๊เถอะ ป่อชิเต่อเบ่ เน๊อ เตอิลออี๊โหล่ เต๊เห่เนอ อา เมจว่าเบ๊ อู แพ๊.
Copyright information for
EkySCThai