Hebrews 3
เหย่ซู่ ทวา เป เพรหลู่แต กู่กล๊อ
1ฮู๊เนอ อาขว่าอาคยา, โป่แหว่ ครี๊พู๊ เด๊อ จอแปแหร่ เอ๊ ซี เออเต๊เห๋ เตเน แม๊มอ แลแค เหย่ซู่ เด๊อ จอแปแหร่ นอแฮ ทวา ลู เน๊อ เพรเฮ๊โฉ่โด่แหน่ จอแปแหร่ อาลาอาโหง่ เน๊อ เพรหลู่แต กู่กล๊อดุเล๊อ เออเตเพรเนอ. 2ฮู๊ คูโมเสส จ๊อ เน๊อ อาเตเม เด๊อ จอแปแหร่ อา หี่พู๊แพพู๊ เต๊เห่ อาเงเนอ, แบ่เจ่ เหย่ซู่ เออ, อาจ๊อ เร๊อ จอแปแหร่ เด๊อ อา แด่แถ่ ลู เร๊อ อา นอเม ลู เร๊อ อาเตเม เออเนอ เตเพร. a 3แกแย เด๊อ อา ช๊อ หี่ เออเตเม เตเพรเนอ, อู แด่ดุแด่ทูเล๊อ อา เร๊อ หี่เออ เตเม. ฮู๊เนอเฮ๊อ เหย่ซู่ เนอ อู โต แด่ดุแด่ทูเล๊อ อา เน๊อ คูโมเสส. 4หี่ ปว๊าเตเม เนอ อู เพรอิช๊อแถ่ อา อาโอ่แหน่ เตเพรเพร เนอ หม่าแหน่ว๊า. หม่าแน๊เรอ เพร เด๊อ อา ช๊อแถ่ เตปว๋า เต๊อเจ่อ เนอหม่า จอแปแหร่ แพ๊. 5คูโมเสส เออเนอ อาจ๊อ เร๊อ อาเตเม เด๊อ จอแปแหร่ อา หี่พู๊แพพู๊ เต๊เห่ อาเง ฮู๊ เพรแรเต เตเพร เนอเฮ๊อ. เร๊อ อาเตเม เต๊เห่เนอ, อา เด๊อะโล แบ๊บือ หนื่ออื่อ เหร่อ เตหมะเตจ๊อ เต๊เห่ เด๊อ จอแปแหร่ เก่ เด๊อะโล อู ช๋า เนอปา เต๊เห่ อาเง ปา. 6หม่าแน๊เรอ, ครี๊ เออเนอหมา อาแซ่เน๊อ คูโมเสส เด๊อ อา ทวา เพรแรเต เด๊อ จอแปแหร่ อาหี่ เนอเตเพร หม่าโต่. อา หม่า จอแปแหร่ อาพู๊คู เตเพร. อา หม่า อาจ๊อ เร๊อ อาเตเม เร๊อ อา แม๊ตู่หนิ อาเพ จอแปแหร่ อาหี่พู๊แพพู๊ เต๊เห่. เป เก่ ครวา คือคือฮาฮา แฮเงลา ครี๊ โต่เด๊อ อาตื๊อดื่อ โท๊โต่ เต เด๊อ จอแปแหร่ เก่ เด๊อะ เป เออเนอ, เป เก่ แม๊ชือ แฮเงลา โต่เด๊อ อาตื๊อดื่อ เฮ๊เนอหม่า, เป หม่า จอแปแหร่ อาหี่พู๊แพพู๊ เฮ๊อ.เตโอ่โก๊ เตเบ๊ซิพร๊า เด๊อ จอแปแหร่ อาแกแย เต๊เห่ อาเง
7ฮู๊เนอเรอ แหย่โยบูโพ๊ แบ่เจ่ เฮ๊ เน๊อ, “เออเตอเนอ, ซี เก่ หนิโฮ จอแปแหร่ อาโหง่พราแถ่ เฮ๊เรอ, 8กู่กล๊อเพรอ แลแค แต่ ฮู๊ ซีเพอซีโพ เนอเต๊เห่ แต่เหม่ นี๋. เบ๊อะซีเพอซีโพ เต๊เห่ โอ่ เด๊อ เก่เชเทอแก หล่อตาม๊าขุ เบ๊อะเนอ, อา เท๊ฉื่อ จอแปแหร่ เร๊อ อา หนิดา แลแค ลูโหง่ โต่. อา ทื๊อแม๊ แลแค จอแปแหร่. b 9หน่า ลุยเชอ อากู, แว เม เป่ แคร๋ เหย่ซี อิเต เนอ, เหย่ซี แม๊เถอะ โทเฮ๊อ หม่าแน๊เรอ อา แม๊ปู ทื๊อแม๊ แลแค ปา แว แพ๊. 10ฮู๊เนอเรอ แว ซิปล่อดุ เหย่ซี เร๊อ แว เฮ๊ เหย่ซี เน๊อ, ‘เหย่ซี หม่า แกแย เด๊อ อาซิปล่อ จ๊อ เกอ แลแค เน๊อ แว โต่ เต๊เห่. เหย่ซี ซิเงโปล แลแค เต เด๊อ แว นอเม เหย่ซี เนอเต๊เห่ โต่,’ แว เฮ๊ เหย่ซี ฮู๊เนอ. 11ฮู๊เนอเรอ แว ซิปล่อดุ เหย่ซี เร๊อ แว เฮ๊ตาแก เหย่ซี โหง่ ตือมือ เน๊อ, ‘เทอเก่ เด๊อ แว อ๊อแล เร๊อ แว เก่ เด๊อะเป่ เร๊อ เหย่ซี เหล่โอ่โก๊ เตเบ๊ซิพร๊า เออเนอโตโผ่ เนอ, เหย่ซี โนน๊อ ปาโต่ เฮ๊อ,’ แว อิชอ ตาแก เหย่ซี ฮู๊เนอ.” c 12แว โป่แหว่ ซี๋, รอ เกอ เร๊อ ดื่อ แลแค ซีเหน่ นี๋. แด่ มู๊แหม่รีแจ่ แลแค แต่ ซี ซิปล่อ แต่เหม่, ซี แด่ ซี ซิปล่อ เน๊อ ซี หยื่อเอ่ เกออู จอแปแหร่ เด๊อ อา เซอเพร เออเตเพร โต่, ซี จว๊า ตาพาแก ดื่อ ซีเง ฮู๊เนอ เต๊เห่เนอ เม แต่ แลแค แต่ เตเพร่ว แต่เหม่ นี๋. 13โทโต่, กู๊แหน่เออ เตเมแลเปล๊กา เด๊อ จอแปแหร่ เด๊อะ เป เออ แซ่ฮู๊ เตซื๊อ เก่ อิลอแลโฮ แต่ ซี เตเพร๊ แต่เหม่, แซ่ฮู๊ ซี เก่ กู่กล๊อเพรอ แต่ แลแค เตเพร๊ แต่เหม่ อาเงเนอ, ปวาเนอเน๋อ เด๊อะอ๊าเด๊อะเหร่ เมจว่า คยาลู เตเพร เร๊อ เตเพร นี๋. 14เมเตเฮ๊เรอ, เป เตหยื่อเอ่ จอแปแหร่ เด๊อ กูลู่เค เนอ, เป เก่ ปื่อหม่าแร๊หนิ อา โต่เด๊อ อาตื๊อดื่อ เฮ๊เรอ, เป ทวาเฮ๊อ เพรเมเต่อเต เร๊อ ครี๊ เฮ๊อ. 15ตื๊อเรอ ลีเทส่อพ๊ากู เฮ๊ เน๊อ, “ซี เก่ หนิโฮ จอแปแหร่ อาโหง่พราแถ่ เออเตอเนอ เฮ๊เนอ กู่กล๊อเพรอ แต่ แลแค ฮู๊ ซีเพอซีโพ กู่กล๊อเพรอ เร๊อ เท๊ฉื่อ จอแปแหร่ เร๊อ หนิดา ลูโหง่ โต่ เนอเต๊เห่ เมเนอ แต่เหม่ นี๋,” dอา เฮ๊ ฮู๊เนอ. 16แกแย เด๊อ อา หนิโฮ โทเฮ๊อ แลแค จอแปแหร่ อาโหง่พราแถ่ หม่าแน๊เรอ อา เท๊ฉื่อ จอแปแหร่, อา หนิดา ลูโหง่ โต่ เต๊เห่ เนอหม่า อูเป? แกแย เนอเต๊เห่ หม่า หม่าเฮ๊อ คูโมเสส เอ๊เถ่กา เหย่ซี เด๊อ อียิปต์เก่กู เนอ เต๊เห่เฮ๊อ. e 17จอแปแหร่ ซิปล่อดุ เจ๊อ เหย่ซี อาหน่าลุยเชอ เนอเต๊เห่ หม่า อูเป? แกแย เด๊อ อา เมซื๊อ จอแปแหร่ เร๊อ อา นอเซอแก เหย่ซี เด๊อ เก่เชเทอแก หล่อตาม๊าขุ เนอเต๊เห่ หม่าโต่ แอ? 18เบ๊อะจอแปแหร่ เฮ๊ตาแก เหย่ซี เน๊อ, เทอเก่ เด๊อ แว เด๊อะ เหย่ซี เร๊อ อา เหล่โอ่โก๊ เตเบ๊ซิพร๊า อาเง เนอโต๊โผะ หม่า อา โน หนิน๊อ ปาโต่ อา เฮ๊ ลู เนอเต๊เห่ หม่า อูเป? อา เฮ๊ตาแก โหง่เออ เนอหม่า, อา เฮ๊เฮ๊อ แกแย เด๊อ อา หนิดา ลูโหง่ โต่ เนอเต๊เห่ เฮ๊อ. 19ฮู๊เนอเรอ เด๊อ เหย่ซี หยื่อเอ่โต่ อาขว่าอาคยา, เหย่ซี โนหนิ ปา เก่ เนอต๊าบ่า โต่ เนอหม่า เป ซิเงโปล ลอ ดื่อเฮ๊อ.
Copyright information for
EkySCThai