Heb 6 | EkySCThai | STEP | ฮู๊เนอเรอ เป แด่โอ่แก ลอ เป เตอิซว๊าอี๊แส่ เป่ อู ครี๊ อาหรี่อาแก เด๊อ อา แก่ช๊าแก่แร เนอเต๊เห่ เร๊อ เป จว๊า แฮเง เกอโป่ อู เด๊อ เง เร๊อ แม๊ปู อิซว๊า ซิเง เกอโป่ อู เด๊อ แกแย ดุเผระเง อา เตอิซว๊า เออเต๊เห่ โป๋. กาคยา แฮ งยา งย๋า อู อิซว๊า เป่ เป เตอิซว๊าอี๊แส่ อา แก่ช๊าแก่แร เด๊อ อา เฮ๊ เน๊อ, ซี เบ่ วีแก เตเม เด๊อ อาบุ๊ย โอ่โต่ เนอเต๊เห่, เร๊อ ซี เบ่ หยื่อเอ่ จอแปแหร่, เตอิซว๊า ฮู๊เออ เต๊เห่เนอ, เป เก่ แม๊ปูซิเง แฮเงกาคยา ปาโต่, เป เก่ จว๊า แฮเง เกอโป่ อู เด๊อ เง โป๋.

Hebrews 6

1 ฮู๊เนอเรอ เป แด่โอ่แก ลอ เป เตอิซว๊าอี๊แส่ เป่ อู ครี๊ อาหรี่อาแก เด๊อ อา แก่ช๊าแก่แร เนอเต๊เห่ เร๊อ เป จว๊า แฮเง เกอโป่ อู เด๊อ เง เร๊อ แม๊ปู อิซว๊า ซิเง เกอโป่ อู เด๊อ แกแย ดุเผระเง อา เตอิซว๊า เออเต๊เห่ โป๋. กาคยา แฮ งยา งย๋า อู อิซว๊า เป่ เป เตอิซว๊าอี๊แส่ อา แก่ช๊าแก่แร เด๊อ อา เฮ๊ เน๊อ, ซี เบ่ วีแก เตเม เด๊อ อาบุ๊ย โอ่โต่ เนอเต๊เห่, เร๊อ ซี เบ่ หยื่อเอ่ จอแปแหร่, เตอิซว๊า ฮู๊เออ เต๊เห่เนอ, เป เก่ แม๊ปูซิเง แฮเงกาคยา ปาโต่, เป เก่ จว๊า แฮเง เกอโป่ อู เด๊อ เง โป๋. 2 เตเจเทอ อาหรี่อาแก, แด่แถ่ กู๊ขุ เด๊อ อูลู เต๊เห่, เตเซอ ก๊อถ่อกาคยา, เตเมจากาคยา ตูจูเพร อาหรี่อาแก เออเต๊เห่เนอ, เป โหล่ อิซว๊า ซิเง ตื๊อดื่อ ปา เปเหน่ โต่. 3 เก่ จอแปแหร่ ปลวาจว๊าแก แฮเง เป เฮ๊เรอ เป เก่ แม๊ปู ซิเงแฮ โหร่ โป่ ลู เตอิซว๊าอี๊แส่ เด๊อ อาจ่ออาแย เต๊เห่ เด๊อ เง ตากยา ปา.

4 แกแย เด๊อ อา วีแก อาเตหยื่อ เต๊เห่เนอ เหย่ซี ถู่แหล่เต๊เปล่ กาคยา แจ่ ปา อาซิปล่อ แตแค๋ โต่. เด๊อ เนอเค, เหย่ซี ซิเง โทเฮ๊อ จอแปแหร่ อา เตหมะเตจ๊อ เต๊เห่ เฮ๊อ. เหย่ซี แม๊เถอะ ซิเงแฮเบ่น๊อ โทเฮ๊อ จอแปแหร่ อาเชหยู่ เร๊อ อา พย๊าหนิโหร่ เกอโทเฮ๊อ แหย่โยบูโพ๊ แบ่เจ่ เร๊อ แกแย เด๊อ อาโรเต๊เห่ เฮ๊อ. 5 จอแปแหร่ อาลาอาโหง่ เนอ, อาแร๊ แหน่เจ๊อ เนอหม่า เหย่ซี ซิเงแฮ โทเฮ๊อ. เหย่ซี แม๊เถอะแฮเบ่ น๊อเกอ โทเฮ๊อ จอแปแหร่ อา เตโพรเตเตอเรอ ฉว่าชอ เด๊อ อา เก่ โอ่โลแถ่ เป่ อู ช๋า เนอปา ตือทือ เนอเต๊เห่ เฮ๊อ. 6 เหย่ซี เก่ แม๊เถอะแฮ เบ่น๊อ โทเฮ๊อ เตเออเต๊เห่ เร๊อ อา เก่ ตีรี๊ จว๊าโค๊แก เร๊อ จอแปแหร่ เฮ๊เนอ, ถู่แหล่เต๊เปล่ กาคยา แจ่ ปา อาซิปล่อ แตแค๋ โต่. เออเนอหมา อา แซ่เฮ๊อ เน๊อ เหย่ซี มือเซอแถ่ คยาแซ๊ จอแปแหร่ อาพู๊คู เด๊อ อี๊ถื่อดีเต่ลู เร๊อ อา เม ซิเตเรแก แบ่เจ่ เหย่ซู่ เด๊อ อู ตูปลูเต๊เผ่ อาเป๊เส่เง เฮ๊อ.

7 เพรหยื่อเอ่ เออ เด๊อ อาแซ่เน๊อ เห่ขุ เด๊อ อา จุ๊ยโอ โตโมโม เก่จือเทอ เร๊อ อา นอเส่แถ่ตว่า เส่แถ่แร๊ เป่ เพรเมเอ่เพร๊ เมเอ่แหล่พู๊ อาเง เต๊เห่เนอ, จอแปแหร่ เก่ เด๊อะบุ๊ยเด๊อะเตอเรอ เหย่ซี ปา. 8 หม่าแน๊เรอ เห่ขุเออ อา เก่ นอแด๊แถ่ แพ๊ ส่อแช๊เหมาะ เร๊อ แจ๊โจ่แจ๊แปเหมาะ เต๊เห่แพ๊ เฮ๊เนอหม่า, อาบุ๊ย โอ่ เตอเจ๋อ โต่. งยาแต๋โต่ เนอ จอแปแหร่ เก่ เมจากาคยา เหย่ซี เร๊อ อา เก่ ชื๊ออือแก เหย่ซี เร๊อ หมิ ปา. ^{▼▼ฮู๊เนอเฮ๊อ, จอแปแหร่ เก่ เมจากาคยา แกแย เด๊อ อาแซ่เน๊อ เห่ขุเออ เนอเต๊เห่ ปา.} ^b

9 หม่าแน๊เรอ โคแบ๊ซว๊า ซี๋, เป เฮ๊เจ๊อ ฮู๊เออ หม่าแน๊เรอ เป หยื่อเอ่เร๊อ ซี แพ๊. เป หยื่อเอ่เร๊อ หม่าแหน่ เจ๊อ เร๊อ ซี เก่ เม แพ๊ เตแร๊ เต๊เห่ ปา. เตแร๊ เออเต๊เห่เนอ, อา แฮ เด๊อ ซี พย๊าหนิเฮ๊อ เตเมแลเปล๊กา เออเนอ อา โอ่ แพ๊. 10 จอแปแหร่ หม่า อา เม เตจ๊อ แพ๊. เตเมแร๊ เด๊อ ซี เมโทเฮ๊อ เต๊เห่เนอ อา โชตาปา โต่. เตโม เด๊อ ซี เด๊อะโล โทเฮ๊อ เด๊อ ลูเง เร๊อ ซี เมจว่า อาแกแย เต๊เห่ เร๊อ ซี เมจว่า แฮเง ตื๊อดื่อปา เหย่ซี เออเนอ อา โชตาปา เป่โต่. 11 เป เตซิหยื่อ หม่า ฮู๊เออ แซ่ฮู๊ เตแร๊ เด๊อ ซี ซิปล่อทู โอ่ป่อแม๊ชือ เต๊เห่ เก่ เล๊อแถ่บาแถ่ เป่ ซี อาเงเนอ, เป ซิหยื่อ เด๊อ ซี ปว๋า เตเพร เก่ ซิปล่อฉว่า เมโต่ แลแค เด๊อ อาตื๊อดื่อ ฮู๊ ซี เมโทเฮ๊อ เออเนอปา. 12 เป ซิหยื่อ นอทวา ซี แกแย เตเกล โต่. โท๊โต่ เนอ เป ซิหยื่อ นอ แซ่เกอ ซี ฮู๊ แกแย เด๊อ อา หยื่อเอ่ เร๊อ อา แด่ทูซิปล่อ กู๊แหน่ เออเนอเต๊เห่ แพ๊. เร๊อ เด๊อ แกแย เออเต๊เห่ เมฮู๊เนอ อาขว่าอาคยา, เหย่ซี เก่ พย๊าหนิ แลแค จอแปแหร่ อา เตอ๊อแล เนอเต๊เห่ ปา.

จอแปแหร่ อา เตอ๊อแล หม่า อา ตาเต

13 เบ๊อะจอแปแหร่ อ๊อแล อาโหง่ ตือมือ เร๊อ เพอับราฮัม เบ๊อะเนอ, อา แบ โทเฮ๊อ อาโหง่ เร๊อ อา เก่ เม ฮู๊ อา อ๊อแล เนอ. แกแย เด๊อ อาดุเล๊อ เร๊อ ลู เนอ อา โอ่ เตเพร่ว โต่ อาขว่าอาคยา, เบ๊อะอา แบแล อาโหง่ เบ๊อะเนอ, อา โป๊ เกอ เร๊อ ดื่อ อามุย แพ๊. 14 จอแปแหร่ เฮ๊ ลู เน๊อ, “แว อ๊อแล เน เร๊อ แว เก่ เด๊อะบุ๊ยเด๊อะเตอเรอเน, แว เก่ นอ โอ่โหร่โอ่เอ๊ เนกลุยเนแล เต๊เห่ ปา,” ^c อา เฮ๊ ลู ฮู๊เนอ. 15 เพอับราฮัม โอ่ป่อ ซิปล่อทูหนิ, เร๊อ เด๊อคยาเนอ อา พย๊าหนิ จอแปแหร่ อ๊อแล ลูโหง่ เนอตือมือ.

16 เบ๊อะแกแย เตเพรเพร ซิหยื่อ เด๊อซิเง เป่ อู เร๊อ อา เตเฮ๊เบ่ เออเนอหมา อา โตแพ๊ เบ๊อะเนอ, อา แบ โนหนิ อา เตเฮ๊เบ่ โหง่ เออเนอ เร๊อ แกแย เด๊อ อา โอ่ เร๊อ อาโพรอาเตอเรอ ฉว่าชอ เตเพรเพร อามุย. เมเตเฮ๊เรอ, อา เก่ แบ ฮู๊เนอ เฮ๊เรอ, อา เม โอ่โก๊แก เตกย๊าเตงา ลู. 17 แกแย เด๊อ อา พย๊าหนิเฮ๊อ จอแปแหร่ อา เตอ๊อแล เต๊เห่เนอ, จอแปแหร่ ซิหยื่อ นอซิเง ตาเต เหย่ซี เน๊อ ฮู๊ จอแปแหร่ อ๊อแล โทเฮ๊อ เหย่ซีเนอ, อา เก่ เม เล๊อบา ฮู๊เนอ ปา, อา ถู่แหล่ เต๊เปล่โค๊ ปาโต่ อาขว่าอาคยา, เด๊อ อา เตอ๊อแล อากูเนอ, อา แบ โนป่าหนิ อาโหง่ เบ๊อะเนอ. 18 ฮู๊เนอเรอ จอแปแหร่ เด๊อะ ลอเฮ๊อ เป อา เตอ๊อแล เน๊อ อา เตแบแลหนิ อาโหง่เออ เนอเจ่อลอ เฮ๊อ. จอแปแหร่ แลโฮแจ่โต่ อาขว่าอาคยา, เออเนอเจ่อ เนอ อา ถู่แหล่ เต๊เปล่ โค๊แจ่ โต่โต่. เป เด๊อ อา แกล่ ตาดวา โอ่ว่าวโอ่โอ๊บี๊ เฮ๊อ เด๊อ จอแปแหร่ อา โอ่ เต๊เห่เนอ, เด๊อ จอแปแหร่ ถู่แหล่ เต๊เปล่ โค๊แจ่ ปา อา เตอ๊อแล โต่ อาขว่าอาคยา, เป ซิปล่อโม ซิปล่อชอแถ่ แหน่เจ๊อ. เด๊อ เป ซิปล่อโม ซิปล่อชอ อาขว่าอาคยา, เตแม๊ชือ เด๊อ จอแปแหร่ เด๊อ เปเออ เนอ, เป ปื่อหม่า แฮเง ตื๊อดื่อ เต่อเบ๊เฮ๊อ เด๊อ อาตื๊อดื่อ เฮ๊อ. 19 เป เตแม๊ชือ เออเนอ อาแซ่เน๊อ หล่อดุ เด๊อ อา จุ่ย โอ่โก๊หม่า ส่อเกลอดุ เด๊อ เป ซิปล่อเซอเพร อาเง เออเตเม เนอเฮ๊อ. ฮู๊ เพรหลู่แต กู่กล๊อดุเล๊อ เนอเตเพร โนจว๊า ตาลว๊าเบ๊ เร๊อ อิเก บ่าดุ เด๊อ อู จอตาตือบี๊ อา เด๊อ เตหลู่แต โฮกู เนอต๊าบ่า, เร๊อ ฮู๊ อา โน โต่เฮ๊อ เด๊อ เตเหล่โอ่ บูโพ๊ อากู เออเนอ, เป เตแม๊ชือ เออ อาหม่ากลอ, อา ตาเต, เร๊อ อา ซูโน เต่อเกอดื่อเฮ๊อ เป เด๊อ จอแปแหร่ อาเป๊เส่เง ฮู๊เนอเฮ๊อ. ^d 20 เหย่ซู่ จว๊าโนเหร่อ เป่เฮ๊อ เปเหล่โอ่ เด๊อ เง เฮ๊อ. อา ทวา เป่เฮ๊อ เป เพรหลู่แต กู่กล๊อดุเล๊อ เด๊อ อา โอ่ ข่างยา ตูจูเพร เออเนอเฮ๊อ. อา เออเนอ อา แซ่เฮ๊อ เร๊อ เพรหลู่แตเต เมลคีเซเดค เด๊อ เหร่อเนอเค เตเพรเฮ๊อ. ^e