Hebrews 7

เพรหลู่แต กู่กล๊อ เมลคีเซเดค

1เมลคีเซเดค หม่า วีซาเลม อาคุ๊ย เตเพร, เร๊อ อา ทวา จอแปแหร่ เด๊อ อาดุเล๊อ เออเตเพร อา เพรหลู่แตเต เตเพร. เบ๊อะเพอับราฮัม จว๊าช๊าเป่ โทเฮ๊อ คุ๊ย ซิลุย เร๊อ อา กา เด๊อ แกล๊ลู เบ๊อะเนอ, เมลคีเซเดค จว๊า แม๊ฉื่อ ลู เร๊อ อาเด๊อะบุ๊ยเด๊อะเตอเรอ ลู. ^a 2เร๊อ เพอับราฮัม เด๊อะเป่ ลู ล๋อ ตาเต เด๊อ อา หนิกา เนอเต๊เห่ ปุ๊ยเฉ๊อตีปุ๊ย. เมลคีเซเดค อามุย อาโหง่แลช๊า อาเหร่อเล๊อ ตือมือ หม่า หม่าดื่อ “เตจ๊อเตเต อาคุ๊ย.” โทเรอ ซาเลม อาโหง่แลช๊า หม่า ซิปล่อ ตู๊จู่เตอเจ๊อ อาขว่าอาคยา, อามุย โอ่ โป่เกอ ดื่อ เน๊อ, “ซิปล่อ เตตู๊จุเตอเจ๊อ อาคุ๊ย.” ^b 3เมลคีเซเดค อาเพ เบ่เบ่, อาโหมะ เบ่เบ่, อาเพอโพ กลุยแล เต๊เห่ เบ่เบ่, อู ราม๊าราแด โอ่แก เกอ อา เตอเจ๋อ โต่. อา เตโอ่เป๊เจ่แล เน๊อ อาเตเซอ อาหรี่อาแก เต๊เห่เนอ เบ่เบ่, อู ราม๊าราแด โอ่แก เกอ ลู โต่โต่. อา หม่า อาแซ่เน๊อ จอแปแหร่ อาพู๊คู เตเพร. อา ทวา เพรหลู่แตเต ตูจูเพร.

4อา เออ, อา ทวา ดุเจ๊อ บ๋า เตเนอ เตเนแม๊ แลแค มอ. เปเพ เพอับราฮัม เด๊อ อามุย โลเทอโลเก่ เจ๊อ เออเตเพรเน๋อ อา เด๊อะเป่ เจ๊อ ลู ปุ๊ยเฉ๊อตีปุ๊ย เร๊อ เต เด๊อ อา จว๊า ช๊าเป่ เร๊อ อา พย๊ากาหนิ เนอเต๊เห่ เจ๊อ. 5กู๊แหน่เรอ เตซว๊าเตแส่ เฮ๊ คูเลวี อากลุยอาแล เด๊อ อา ทวา เพรหลู่แตเต เออเต๊เห่ เน๊อ, เหย่ซี เก่ กุย ปุ๊ยเฉ๊อตีปุ๊ย เด๊อ อาโป่แหว่ อิสราเอลพู๊ เร๊อดื่อ เต๊เห่ อา โอ่. อิสราเอลพู๊ เออเต๊เห่ เนอหม่า, เพอับราฮัม อากลุยอาแล ตากาแล แฮเง เร๊อดื่อ เจ๊อ หม่าแน๊เรอ คูเลวี อากลุยอาแล เออเต๊เห่ เบ่ กุย เหย่ซี แพ๊. ^c 6เมลคีเซเดค หม่า อากลุยอาแล ตา เด๊อ คูเลวี หม่าโต่ หม่าแน๊เรอ อา พย๊า ปุ๊ยเฉ๊อตีปุ๊ย เด๊อ เพอับราฮัม อา โอ่. เร๊อ อา เด๊อะบุ๊ยเด๊อะเตอเรอ เพอับราฮัม. เพอับราฮัม หม่า เพร เด๊อ อา พย๊าหนิเฮ๊อ จอแปแหร่ อา เตอ๊อแล เตเพร เฮ๊อ. 7แกแย เด๊อ อา เด๊อะบุ๊ยเด๊อะเตอเรอ อู เออเตเพรเนอ อาดุเล๊อ เร๊อ แกแย เด๊อ อา พย๊าหนิ เตเด๊อะบุ๊ยเด๊อะเตอเรอ เออเตเพร เนอหม่า เหล่ซิปล่อ หร่าเหร่โอ่โต่. 8แกแยยิวพู๊ เพรหลู่เตพู๊ เด๊อ อากลุยอาแล ตากาแล เด๊อ เลวีพู๊ โอ่ เออเต๊เห่เนอ, อา พย๊าฉื่อ ปุ๊ยเฉ๊อตีปุ๊ย เออเนอ เด๊อ แกแย เด๊อ อา เก่ เซอ ปา เออเต๊เห่ อา โอ่ แพ๊. หม่าแน๊เรอ เมลคีเซเดค เออเนอ, เป ซิเงดื่อ จอแปแหร่ อาลาอาโหง่ เฮ๊ เน๊อ อาแซ่เน๊อ อา โอ่เซอเพร ปาแพ๊. 9โท๊โต่ เป เฮ๊เบ๊ เน๊อ, คูเลวี อากลุยอาแล เด๊อ อา กุย ปุ๊ยเฉ๊อตีปุ๊ย เออเต๊เห่เนอ อา เด๊อะ เน๊อ เพอับราฮัม เร๊อ เพอับราฮัม เด๊อะ แฮเง เน๊อ เมลคีเซเดค เฮ๊อ. 10เมเตเฮ๊เรอ, เบ๊อะเพอับราฮัม แม๊เถอะฉื่อ เร๊อ เมลคีเซเดค เบ๊อะเนอ, คูเลวี เฮ๊ เออเตเพรเนอ, อา โอ่เป๊เจ่แล ล๋ายโต่. อา โอ่ปาแพ๊ เด๊อ อาเพอโพ อับราฮัม อาเหน่กล่อ พ๊าหย่า อากู แพ๊.

11เบ๊อะจอแปแหร่ เด๊อะ แกแยยิวพู๊ เต๊เห่ เตซว๊าเตแส่ เบ๊อะเนอ, อา แด่แถ่ เพรหลู่เต เด๊อ อากลุยอาแล ตา เด๊อ เลวีพู๊ เนอเต๊เห่ อา โอ่. เหย่ซี เบ่ หลู่แตแถ่ เป่ อู ฮู๊ เตซว๊าเตแส่ เต๊เห่ โอ่ เนอ. เลวีพู๊ เพรหลู่แตพู๊ เออเต๊เห่ เม อาเตเม เออเต๊เห่ หม่าแน๊เรอ แซ่ฮู๊ อู เก่ ทวาแถ่ แกแยจ๊อแกแยเต อาเงเนอ, เหย่ซี เมแจ่โต่. ฮู๊เนอเรอ จอแปแหร่ เบ่ นอแฮข่อ เต๊เปล่ดื่อ เพรหลู่แต เด๊อ อาโร เตเพร. เพรหลู่แต เออเตเพรเนอ อากลุยอาแล ตา เด๊อ เลวีพู๊ เด๊อ อากลุยอาแล ตา แฮเง เด๊อ เพอาโรน อา โอ่ เออเนอ หม่าโต่. เพรหลู่แตเต เออเตเพรเนอ, อาแซ่เน๊อ เมลคีเซเดค เนอเฮ๊อ. 12เมเตเฮ๊เรอ เบ๊อะอู ถู่แหล่ เต๊เปล่ เฮ๊อ เพรหลู่แต อากลุยอาแล เบ๊อะเนอ, อู เบ่ ถู่แหล่ เต๊เปล่ เต่อเกอ เตซว๊าเตแส่ เต๊เห่. 13แบ่เจ่ เหย่ซู่ครี๊ เด๊อ เป เฮ๊ เกอเร๊อ ลูหรี่ลูแก เออเตเพร เนอหม่า, อา แฮโนแก เฮ๊อ เพรหลู่แตเต เด๊อ อาเหร่อเค เนอเต๊เห่ อาเหล่โอ่ เฮ๊อ. อา หม่า เลวี อากลุยอาแล หม่าโต่. อากลุยอาแล ตา โค๊ดื่อ เด๊อ อาโร โต๊โหมะ เด๊อ อู เอ๊ เร๊อ ยูดาห์อากลุยอาแล ฮู๊ เพรหลู่แตเนอ เตเพร เม เต เด๊อ เตหลู่เหร่ อาแก่ช๊า เนอ, อากลุยอาแล เออเนอ, อา เมน๊อ เกออู เพรหลู่แต เตเม เตเพร่ว โต่. 14อู ซิเง ตาเตเจ๊อ เร๊อ เป แบ่เจ่ เหย่ซู่ครี๊ เออเนอ, อากลุยแล กาแล เด๊อ ยูดาห์ โต๊โหมะเต๊อเจ่อ อา โอ่. เด๊อ เนอเค หม่า, ยูดาห์อากลุยอาแล เก่ ทวาแถ่ เพรหลู่แต เต๊เห่ ปา เนอ, คูโมเสส เฮ๊น๊อ โตโพ๋ โต่.

แบ่เจ่ เหย่ซู่ หม่า อาแซ่เน๊อ เมลคีเซเดค

15เบ๊อะเพรหลู่แต เด๊อ อาโรเตเพร เด๊อ อาแซ่เน๊อ เมลคีเซเดค เด๊อ เหร่อเนอเค เตเพร แฮโต่เฮ๊อ เบ๊อะเนอ, อู ซิเงโปล แฮโต่เล๊อเฮ๊อ เต เด๊อ เป เฮ๊ เออเนอเต๊เห่ เฮ๊อ. 16เตซว๊าเตแส่ เฮ๊ โอ่ เร๊อ แกแย เด๊อ อา ทวาแถ่ เพรหลู่แตเต เนอ, อา เบ่ กลุยแล ตากาแล เด๊อ โต๊โหมะโหมะ เต๊อเจ่อเจ่อ อากู อา เฮ๊ ฮู๊เนอ, หม่าแน๊เรอ เหย่ซู่ แฮ ทวาเฮ๊อ เพรหลู่แตเต เออเนอ, อาโต ฮู๊ เตซว๊าเตแส่ เฮ๊โอ่เนอ หม่าโต่. โท๊โต่, อา ทวาแถ่ เพรหลู่แตเต เออเนอ เน๊อ อา เตโอ่เซอเพร โพรเตอเรอ ฉว่าชอ เด๊อ อา เซอเพร ตูจูเพร แตแลเคร๊ เออเนอเฮ๊อ. 17เมเตเฮ๊เรอ ลีเทส่อพ๊ากู เฮ๊ เน๊อ,
“เน เก่ ทวา เพรหลู่แตเต ตูจูเพร เด๊อ อาแซ่เน๊อ เมลคีเซเดค เนอ ปา” ^d อา เฮ๊ ฮู๊เนอ.

18ฮู๊เนอ อาขว่าอาคยา, เตซว๊าเตแส่ อาเลอ เออเนอ, อู แด่ตาพาแก อา เมเตเฮ๊เรอ อา อ๊าเจ่เหร่เจ่ เร๊อ อา เมจว่าเบ๊ เป โต่. 19คูโมเสส อา เตซว๊าเตแส่ เนอ อา เมจ๊อเมเต แจ่ อู เตเพร่ว โต่. หม่าแน๊เรอ กู๊แหน่เออ เป เตแม๊ชือ แกล๊ อาเซ โตโบ เด๊อ อาแร๊เล๊อ ปา เจ๊อ เร๊อ เตซว๊าเตแส่ เออเนอ อา โอ่ เฮ๊อ. เร๊อ เป แฮโนผื่อเฮ๊อ เด๊อ จอแปแหร่ อา โอ่ เน๊อ แกล๊ อาเซ เออโตโบ หม่า อาหนิ เฮ๊อ.

20จอแปแหร่ แบตา โทเฮ๊อ อาโหง่ เร๊อ เหย่ซู่ เก่ ทวา เพรหลู่แตเต ตูจูเพร ปา. หม่าแน๊เรอ เบ๊อะเลวี กลุยแลพู๊ เต๊เห่ ทวา เพรหลู่แตเต เบ๊อะเนอ, อา แบ ตาเกอ อาโหง่ เร๊อ เหย่ซี ฮู๊เนอ ตือมื๋อ โต่. 21หม่าเรอ, จอแปแหร่ เฮ๊ เหยซู่ เน๊อ,

“แบ่เจ่ แบตาโท อาโหง่ เร๊อ อา เฮ๊โค๊ปาโต่, เร๊อ อา เฮ๊ เน๊อ, ‘เนเก่ ทวาแถ่ เพรหลู่แตเตฮู๊ ตูจูเพร ปา,’” ^e

เบ๊อะเหย่ซู่ แถ่ ทวา เพรหลู่แตเต อาเค, จอแปแหร่ เฮ๊ ลู ฮู๊เนอ. 22เตอ๊อแลโหง่ อาเซ เด๊อ จอแปแหร่ เมทวาแถ่ เป่เฮ๊อ เป เด๊อ เป เก่ พย๊าหนิ เตปาลา อาเง เออตือมือ เนอ, อาแร๊ เล๊อปา เจ๊อ เร๊อ เตอ๊อแลโหง่ เด๊อ อาเลอ เนอตือมือ เจ๊อ. เมเตเฮ๊เรอ, จอแปแหร่ แบแล โทเฮ๊อ อาโหง่ ฮู๊เนอ อาขว่าอาคยา, เหย่ซู่ หม่า หม่าเฮ๊อ เพร เด๊อ อา เก่ เมเล๊อบา ตาเต เป่ เป เตอ๊อแล อาเซเออ ตือมือ เตเพร เฮ๊อ.

23เต เด๊อ อา โค๊ ปา ลู เด๊อ อาโร เต๊อเจ่อ หม่า หม่าเฮ๊อ เพรหลู่แตเต เด๊อ เนอเค เต๊เห่เนอ, อา เซอ แลแค อาขว่าอาคยา, อู เพร แถ่ แฮเง เหย่ซี อาเหล่โอ่ เนอ อา โอ่ เอ๊ลู. 24หม่าแน๊เรอ เหย่ซู่ เออเนอ, อา โอ่เซอเพร ตูจูเพร อาขว่าอาคยา, อา เด๊อะตา แฮเง ปา เพรหลู่แต อาเตเม เออเนอ เด๊อ อู กู๊ยากู เตเพร่ว โต่. 25ฮู๊เนอเรอ แกแย เด๊อ อา แฮ เด๊อ จอแปแหร่ อา โอ่ เร๊อ อา แฮโน แฮเง เด๊อ เหย่ซู่ อา โอ่ เต๊เห่เนอ, เหย่ซู่ เก่ เมแลเปล๊กาเบ๊ เหย่ซี กู๊แหน่เออ ตาแฮเง ตูจูเพร เจ๊อ ปา, เมเตเฮ๊เรอ แซ่ฮู๊ อา เก่ โน กุยซิยอเบ๊ เป่ แกแย ฮู๊เนอ เต๊เห่ อาเง เด๊อ จอแปแหร่ อา โอ่ เนอ, อา เบ่ เซอเพร ตูจูเพร.

26ฮู๊เนอเรอ, เหย่ซู่ หม่า เพรหลู่แต กู่กล๊อดุเล๊อ เตเพร เด๊อ อา เมเล๊อบา เป่ ลอ ล๋อ เป เตโหล่ เต๊เห่. อา หม่า อา บูโพ๊, อาเตซื๊อ โอ่โต่, อาซิปล่อ อาโพ๊อาแปละ. จอแปแหร่ แด่โอ่ข่อ ตาพา โค๊ดื่อ ลู เร๊อ เพรเมเตซื๊อ เต๊เห่, เร๊อ อา เด๊อะโอ่เฮ๊อ ลู เด๊อ เหล่โอ่ แถ่โลเล๊ออู โต๊โผ่ เฮ๊อ. 27อา หม่า อาแซ่เน๊อ เพรหลู่แต กู่กล๊อดุเล๊อ เด๊อ อาโร เนอเต๊เห่ หม่าโต่. ปวาเนอเน๋อ อา โหล่ หลู่แถ่ เหร่อเล๊อ เกอเร๊อดื่อ อาเตซื๊อ เต๊เห่ โทเรอ อา หลู่แถ่ เนอ เป่ แกแย เด๊อ อาโร เต๊เห่ อาเตซื๊อ เต๊เห่ ฮู๊เนอ หม่าโต่. เบ๊อะอา หลู่แถ่ อาเหน่ เด๊อ อี๊ถื่อดีเต่ลู เบ๊อะเนอ, อา หลู่แถ่ แพ๊ โตโพ๊ เร๊อ อา โทปลื๊อ ลา ตูจูเพร เฮ๊อ. ^f 28เพรหลู่แตเต เต๊เห่เนอ, อา เตซื๊อเตปล๊า โอ่ แพ๊ แลแค หม่าแน๊เรอ เตซว๊าเตแส่ ย๋อ โอ่ อาขว่าอาคยา, อู เบ่ แด่แถ่ เหย่ซี แพ๊. หม่าแน๊เรอ เบ๊อะจอแปแหร่ เด๊อะตาโท เฮ๊อ เตซว๊าเตแส่ เออ เด๊อคยา อางยาลาเฮ๊อ เนอ, อา อ๊อแล ข่อคยาโป่ ตือมือ เร๊อ อา แบโน เต่อหนิ อาโหง่ เบ๊อะเนอ. อา แบตา เฮ๊อ อาโหง่ เน๊อ อา แด่แถ่ เฮ๊อ อา พู๊เพรคู เด๊อ อาเตซื๊อ โอ่โต่, อา เล๊อบา เออเตเพร เน๊อ อา เก่ ทวาแถ่ เพรหลู่แต กู่กล๊อดุเล๊อ ตูจูเพร เฮ๊อ.