Heb 8 | EkySCThai | STEP | กู๊แหน่เออ, เต เด๊อ อา โหล่ดุเล๊อ อู เต๊อเจ่อ เด๊อ แว ซิหยื่อ นอซิเงโปล ซี เนอหม่า หม่าเฮ๊อ เป เพรหลู่แต กู่กล๊อดุเล๊อ เออเตเพร เฮ๊อ. อา หม่า เหย่ซู่ เฮ๊อ. กู๊แหน่เออ อา โอ่แนโอ่ เด๊อ ม๊อขุ เร๊อ อา โอ่แนโอ่ เด๊อ จอแปแหร่ เด๊อะ อาลีอาเตเค, อาโพรอาเตอเรอ เออเตเพร เหล่โอ่แนโอ่ อาจ๊อทว๊า เนอตากยา เฮ๊อ.

Hebrews 8

เหย่ซู่ หม่า เป เพรหลู่แต กู่กล๊อดุเล๊อ เตเพร

1 กู๊แหน่เออ, เต เด๊อ อา โหล่ดุเล๊อ อู เต๊อเจ่อ เด๊อ แว ซิหยื่อ นอซิเงโปล ซี เนอหม่า หม่าเฮ๊อ เป เพรหลู่แต กู่กล๊อดุเล๊อ เออเตเพร เฮ๊อ. อา หม่า เหย่ซู่ เฮ๊อ. กู๊แหน่เออ อา โอ่แนโอ่ เด๊อ ม๊อขุ เร๊อ อา โอ่แนโอ่ เด๊อ จอแปแหร่ เด๊อะ อาลีอาเตเค, อาโพรอาเตอเรอ เออเตเพร เหล่โอ่แนโอ่ อาจ๊อทว๊า เนอตากยา เฮ๊อ. ^a 2 กู๊แหน่เออ อา เมเฮ๊อ เพรหลู่แต กู่กล๊อดุเล๊อเออ อาเตเม, เร๊อ อา เม เฮ๊อ เด๊อ เตเหล่โอ่ บูโพ๊ โต๊โผ่ อากู เฮ๊อ. เหล่สื่อดุ บูโพ๊ หม่าแหน่ เออเนอ อู เม เร๊อ แกแยเห่ขุพู๊ อากู๊ขุ หม่าโต่. แบ่เจ่ ช๊อแถ่หนิ เน๊อ อาเหน่ เร๊อดื่อเจ๊อ.

3 เพรหลู่แต กู่กล๊อดุเล๊อ ปว๋า เตเพร เนอ, อู แด่แถ่ อา เร๊อ อา เบ่ หลู่แตเต โทเรอ อา เบ่ หลู่แตแถ่ เร๊อ เตมีเตดอ เต๊เห่ เด๊อ จอแปแหร่ อา โอ่. ฮู๊เนอเรอ, เป เพรหลู่แตเต เด๊อ อาดุเล๊อ เออเตเพรเนอ, อา เบ่ หลู่แตแถ่ เกอ เต เต๊อเจ่อเจ่อ. 4 หม่าแน๊เรอ เหย่ซู่ เด๊อ อา ทวา เพรหลู่แต กู่กล๊อดุเล๊อ เออเตเพรเนอ, เบ๊อะอา โอ่ปา เบ๊อะเห่ขุเออ เบ๊อะเนอ, เพรหลู่แตเต เด๊อ อา เบ่หลู่เบ่แตแถ่ ฮู๊ เตซว๊าเตแส่ โอ่เนอ, อา ย๋อ โอ่ดื่อเฮ๊อ อาขว่าอาคยา, อา ทวาหนิ เกออู เพรหลู่แตเต โต่. 5 เหล่สื่อดุ บูโพ๊ เด๊อ เพรหลู่แตเนอ เต๊เห่ โนเม เกอเร๊อ ลู เด๊อ เห่ขุ เออเตเม เนอหม่า, อา แม๊ แบ๊บือเกอ จอแปแหร่ อา เตหลู่เเตโฮ หม่าแหน่ เด๊อ ม๊อขุ เนอเตเม แพ๊. เหล่สื่อดุ เออเตเม เนอ อา หม่าแหน่ หม่าโต่, หม่าแพ๊ เด๊อ ม๊อขุ อา หม่าแหน่ เนอเตเม อา แหย่โย แพ๊. เมเตเฮ๊เรอ, เบ๊อะจอแปแหร่ นออิ ช๊อแถ่ คูโมเสส เหล่สื่อดุ เด๊อ เห่ขุเออ เบ๊อะเนอ, อา เฮ๊ ลู เน๊อ, “ครวาเม แบ๊บือ ตาเตแร๊ แซ่เกอลอ ฮู๊ อู เด๊อะโล โทเฮ๊อ เน ม๊อขุ เตหลู่เเตโฮ อาแหย่โย เด๊อ โฉ่ขุเค เนอนี๋,” ^bจอแปแหร่ เฮ๊ ลู ฮู๊เนอ. 6 เหย่ซู่ เมเต ฮู๊ เพรหลู่แตเต เตเพรเนอ, อาแร๊ เล๊อปา เจ๊อ เน๊อ เพรหลู่แต เด๊อ เห่ขุ เออเต๊เห่ เมเนอ เจ๊อ. ฮู๊เนอเฮ๊อ, จอแปแหร่ อา เตอ๊อแล อาเซ เด๊อ เหย่ซู่ พย๊าแฮหนิ เออเนอหมา อาแร๊เล๊อ ปา เจ๊อ เร๊อ เตอ๊อแล อาเลอ เออเนอ เจ๊อ. เตอ๊อแล อาเซ เออเนอ, อา ตาเต ซิเลเกอเร๊อ เตอ๊อแล เด๊อ อาแร๊เล๊อ เต๊เห่ อาลู.

7 เตอ๊อแล เหร่อ เนอตือมือเนอ, อา เก่ เล๊อบาเฮ๊อ เฮ๊เรอ เป โหล่ ปา เตอ๊อแล อาเนอ เออตือมือ เก่ แฮโน เต๊เปล่ ปา ลู เหล่โอ่โต่ เฮ๊อ. 8 หม่าแน๊เรอ จอแปแหร่ แด่ เตซื๊อ เด๊อ อาแกแย เต๊เห่ อาลู เร๊อ อา เฮ๊ เน๊อ,
“ค๊าขิ เด๊อ แว เก่ เม เตอ๊อแล อาเซ เร๊อ อิสราเอลพู๊ เต๊เห่ เบ่เบ่, แกแยยิวพู๊ เต๊เห่ เบ่เบ่ อา เก่ แฮโต่ปา,” ^cอา เฮ๊ ฮู๊เนอ.
9 “เบ๊อะแว จุ่ยเถ่ เหย่ซี เน๊อ แว กู๊ขุ เร๊อ แว เอ๊เถ่กา เหย่ซี เพอโพ เด๊อ อียิปต์เก่ เบ๊อะเนอ, แว อ๊อแล โทเฮ๊อ แวโหง่ เน๊อ เหย่ซีเนอ อา โอ่ หม่าแน๊เรอ เตอ๊อแล กู๊แหน่เออเนอ, อา โค๊ดื่อ เร๊อ เนอ. เหย่ซี จ๊อเน๊อ แว เตอ๊อแล เออเนอ โต่ อาขว่าอาคยา, แว ตีรี๊ จว๊าโค๊แก แวเป๊เส่ เน๊อ เหย่ซี เฮ๊อ, แบ่เจ่ เฮ๊ฮู๊เนอ.
10 ฮู๊เนอเรอ, แบ่เจ่ เฮ๊ เน๊อ เตอ๊อแล อาเซ เด๊อ แว เก่ อ๊อแล เน๊อ อิสราเอลพู๊ ซี เต๊เห่เนอ, แว เก่ เฮ๊ เหย่ซี ฮู๊เออ ปา, แว เก่ ฉู่โน แว เตซว๊าเตแส่ เต๊เห่ เด๊อ เหย่ซี อาซิปล่อ เตเตเน อากู ปา. แว เก่ ราม๊าราแดโอ่ แว เตซว๊าเตแส่ เต๊เห่ เด๊อ เหย่ซี ซิปล่อกู ปา. แว เก่ ทวา เหย่ซี อาจอแปแหร่ ปา เร๊อ เหย่ซี เก่ ทวา แวแกแย ปา.
11 เบ๊อะเนออาเค ปาเนอ, เหย่ซี อาเมวเจอะพู๊ แซ๊ลู เต๊เห่ เบ่เบ่, อาโป่อาแหว่เกล เต๊เห่ เบ่เบ่, อา โหล่ปา อู อิซว๊าอี๊แส่ เหย่ซี เน๊อ, ‘ซิเง แลแค แบ่เจ่ นี๋’ ฮู๊เนอ ปาโต่เฮ๊อ. เมเตเฮ๊เรอ เป๊อแถ่ เด๊อ อู เตเน ปีตี๊เล๊อ ลู เตเพร โต่เด๊อ อู เตเนดุเล๊อ ลู เตเพรเนอ, อา เก่ ซิเง ลอเฮ๊อ แว ปา.
12 แว เก่ ซิยอเร๊อ เหย่ซี ปา เร๊อ แว เก่ ปลวาแก ลอ เหย่ซี อาเตมู๊แหม่รีแจ่ เต๊เห่ ปา เร๊อ แว เก่ โชตาปาแก ลอ เหย่ซี เตซื๊อ เต๊เห่ ปา.” ^d

13 จอแปแหร่ เฮ๊ เน๊อ เออ หม่า เตอ๊อแล อาเซ เต๊อเจ่อเฮ๊อ อาขว่าอาคยา, อา นอทวาแถ่แก เตอ๊อแล อาเลอ เออเนอ เน๊อ อา โหล่ ปาโต่เฮ๊อ. อาเลออาหลว่า เฮ๊อ, อู โหล่ปา ลู โต่เฮ๊อ, เร๊อ งยาแต๋โต่ ปาหม่า, อา เก่ โอ่เหม่แก เฮ๊อ.