Hebrews 9

เตอ๊อแล อาเลอ

1กู๊แหน่เรอ เตอ๊อแล อาเหร่อ ตือมือ เด๊อ จอแปแหร่ อ๊อแลแก อาแกแย เต๊เห่เนอ, อา โอ่ เน๊อ อา เตจ๊อบู่จ๊อเบ อา เตซว๊าเตแส่ เหล่โกลเหล่แบ่ เต๊เห่ เน๊อ เหล่จ๊อเบ เหล่สื่อดุ บูโพ๊ เด๊อ แกแยเห่ขุพู๊ ช๊อแถ่ อาเนอ เตเม. 2เหล่สื่อดุ เออเนอ อา โอ่ เนอดา. ^a อาเหร่อ ตาดาเนอ อู แด่โอ่ เร๊อ หมิเคว๊กอเหร่ ตู๊ขุ, ดีเหร่ แถ่โล ตู๊ขุ เร๊อ ค๊อมู บูโพ๊ เด๊อ อู แด่แถ่ โอ่ ลู เด๊อ ดีเหร่ แถ่โลอาขุ เต๊เห่. ^b เออตาดา เนอหม่า อู เอ๊ เร๊อ เตบูโพ๊ เหล่โอ่ ^c. 3เหล่สื่อดุ อา กู่ดากู เหล่โน เออเนอ อู จ่อ ตาตือบี๊ เร๊อ อิเก ต๊าบ่า. อิเก โอ่ปา ต๊าบ่า เด๊อ อู จ่อบี๊ ตาตือแก เด๊อ เง ตาดา เด๊อ อู เอ๊ เร๊อ เตเหล่โอ่ บูโพ๊เล๊อ เออเนอ ตาดา. ^d 4เหล่โอ่ เออตาดา อากูเนอ, เตหลู่เหร่เท เด๊อ อู เหล่ชื๊ออือแถ่ เน๊อ เตโนมื๊อโนชือ เต๊เห่เนอ อา โอ่ เต๊เหร่, ^e โทเรอ เตอ๊อแล เต๊อบูโพ๊ เด๊อ อู โลบี๊ ลู เร๊อ เท เนอ อาโอ่ เตเม. เด๊อ เต๊อบูโพ๊ อากูเนอ, อู แด่โนโอ่ เร๊อ โซแบ๊ฮู๊ เตเม เร๊อ อู ฉู่โนโอ่ เร๊อ ค๊อมูมานา, ^f เร๊อ เพอาโรน อิแท๊โบ เด๊อ อาโพ เถ่ เนอโตโบ, ^g เร๊อ โหง่เฮ๊แก อามือเช๊อ อา เตอ๊อแล หล่อบ่า เนอ เนอบ่า. ^h 5เด๊อ เต๊อบูโพ๊เออ อาขุเนอ, อู แบ๊โอ่ ม๊อขุ เตเน่วพู๊ เด๊อ อู เอ๊ เน๊อ เครูบ อาแปล๊ เตเคเออ เนอเพร โอ่ เร๊อ อา โฮ๊บี๊ตา อาด๊า เด๊อ เต๊อบูโพ๊ อากู่ด๊อ เด๊อ จอแปแหร่ เหล่ปลวาแก อู เตซื๊อ เออ อาลูเนอ. เหล่โด่แนโปล เป่ ซี เนอ อา โอ่ เอ๋ ลาปา อาขว่าอาคยา, กู๊แหน่เรอ เฮ๊ปวาเฮ๊ดวา ลอ เป่ ซี โต่. ⁱ

6เบ๊อะอู ตี๊หรี่แตแร แด่ ตาโตตาเบ่ โทลอเฮ๊อ เตเออเต๊เห่ เด๊อ อาเหล่โอ่ เร๊อ อาเหล่โอ่ เบ๊อะเนอ, ปวาเนอเน๋อ เพรหลู่แตเต เต๊เห่ โน เด๊อ เหล่สื่อดุกู อาเหร่อเล๊อ ตาดา เร๊อ อา โนเม แลแค อา เตเอ่เตแร. ^j 7หม่าแน๊เรอ เด๊อ เตบูโพ๊ เล๊ออูเออ ตาดา อากูเนอ, อา โนหนิ แพ๊ตื๊อ เพรหลู่แต กู่กล๊อดุเล๊อ เนอเตเพร แพ๊. ต๊าหน่าเนอ อา โนแพ๊ โตโพ๊ เร๊อ อา เบ่ พย๊าโนหนิ สุ่ย เด๊อ อา เก่ หลู่แถ่ เกอเร๊อดื่อ อาเตซื๊อ อาเง เออเนอ, เน๊อ แกแย เด๊อ อา เตเน เต่อโต่ เร๊อ อา เมซื๊อ ตาแต่ เต๊เห่ อาเตซื๊อ อาเง. ^k 8เด๊อ เตเออ อาขว่าอาคยา, แหย่โยบูโพ๊ แบ่เจ่ เด๊อะโล เป่ เป เน๊อ, เก่ อู นอเอ่ ตื๊อดื่อปา เหล่สื่อดุ อาเลอ เออเตเม เฮ๊เรอ แกล๊เหล่โน เด๊อ เหล่สื่อ หม่าแหน่ เออเตเม อากูเนอ, อา ลูโมล๋ายโต่. 9เตเออเต๊เห่ หม่า อา ซิหยื่อ เด๊อะโลโข่เฮ๊อ เป เตม๊าเตแด เด๊อ เป ทือเค กู๊แหน่เค เออเต๊เห่ เฮ๊อ. อา ซิหยื่อ ยูโลเฮ๊อ เป เร๊อ เตหลู่แตเต เออเต๊เห่ เร๊อ เตมีเตดอ เด๊อ อู หลู่แถ่ อา เออเต๊เห่เนอ, อา เม เมโพ๊เมแปละแจ่ เป่ เพร แฮ จ๊อบู่จ๊อเบแถ่ เตเออ เต๊เห่ อาซิปล่อ โต่. 10เตหลู่เตแต เออเต๊เห่เนอ, อา ตาเต ซิเลเกอเร๊อ แพ๊ เตจ๊อบู่จ๊อเบ อา เหล่โกลเหล่แบ่ เต๊เห่ เด๊อ อา เฮ๊ เน๊อ เออ หม่า เอ่หนิ, เออ หม่า โอหนิ โต่, โตเบ่ ซู๊ปลีซู๊แปละ อาเหน่ ฮู๊เออ ฮู๊เนอ, อา เฮ๊ เออเนอเต๊เห่ เฮ๊อ. เตซว๊าเตแส่ เออเนอหมา ลือครวา เมเต เด๊อ อากลอ ตากยา แพ๊, อา เม แต๊แกละแจ่ ซิปล่อ โต่. เหน่กล่อ พ๊าหย่า ตากยา, แกแยเห่ขุพู๊ เบ่ ครวาเม โต่เด๊อ จอแปแหร่ เมเต๊เปละ เป่ เหย่ซี แกล๊ อาเซ โตโบ.

เตอ๊อแล อาเซ

11หม่าแน๊เรอ กู๊แหน่เออ ครี๊ แฮ ทวาเฮ๊อ ฮู๊ เพรหลู่แต กู่กล๊อ เด๊อ อาดุเล๊อ อู เตเพร เนอเฮ๊อ. อา พย๊าแฮหนิ เป่ เป เตตว่าเตแร๊ เด๊อ อา โอ่ เร๊อ เป กู๊แหน่เออ เต๊เห่ เฮ๊อ. อา จว๊าโน โทเฮ๊อ เด๊อ เหล่สื่อดุ เด๊อ อาดุเล๊อ, อา เล๊อบา เน๊อ แกแย เมเนอ เตเม อากูเฮ๊อ. เหล่สื่อดุ เออเนอ, แกแย ช๊อ เน๊อ อากู๊ขุ เตเพร่ว หม่าโต่, อู แบ๊แล ลู หม่าโต่โต่, อา โอ่ เด๊อ เห่ขุ เออเนอ หม่าโต่โต่. 12เบ๊อะอา จว๊าโน หลู่แตแถ่เต เด๊อ เหล่โอ่ บูโพ๊ เล๊ออู เออตาดา เบ๊อะเนอ, อา พย๊าโนหนิ เปะ เต๊เห่ อาสุ่ย, ปู่เพ เต๊เห่ อาสุ่ย เนอหม่าโต่. อา เก่ โน หลู่แตแถ่เต อาเงเนอ, อา พย๊าโน เกอ เร๊อ ดื่อ เน๊อ อาสุ่ย อาขว่าอาคยา, อา แฮโน แพ๊ โตโพ๊ เร๊อ อาโทอาปลื๊อ ลาเฮ๊อ, เร๊อ อา เมแลเปล๊กา เป ตูจูเพร เฮ๊อ. 13เด๊อ เป เตซว๊าเตแส่ อาเลอเออ อากูเนอ, เปะ เต๊เห่ เร๊อ ปู่เพดุ เต๊เห่ อาสุ่ย เออ เร๊อ ปู่โหมะโตโล่ เด๊อ อู ชื๊ออือ ทวาลอ ลู เร๊อ กู๊เผ่ เออเต๊เห่เนอ, อู เบ่ เว๊อ เน๊อ แกแย เด๊อ อา โตโพร๊มู๊แเหมะอี๊แอ่ เร๊อ เตจ๊อบู่จ๊อเบ อาเหล่โกล เออเนอ เตเพร อาลู, ^l เมเตเฮ๊เรอ แซ่ฮู๊ อาเหน่กล่อ เก่ อาโพ๊อาแปละ เด๊อ อากลอ ตากยา อาเงเนอเรอ, เหย่ซี เมโพ๊เมปลี ลู ฮู๊เนอ. ^m 14ฮู๊เนอเรอ, เตเน แม๊มอ แลแค ครี๊ อาสุ่ย เออเนอ, อา เก่ เม โพ๊เมแปล่ บูโพ๊เล๊อ เจ๊อ เป เร๊อ เตเออเต๊เห่ ปา เจ๊อ. เด๊อ จอแปแหร่ อา แหย่โยบูโพ๊ โอ่เซอเพร ตูจูเพร อาขว่าอาคยา, ครี๊ หลู่แถ่เฮ๊อ อาเหน่กล่อ เด๊อ อาเตซื๊อ โอ่ เตอเจ๋อ โต่ เออ เด๊อ จอแปแหร่ อา โอ่ เฮ๊อ. แซ่ฮู๊ เป เก่ เม เป่ จอแปแหร่ เด๊อ อา เซอ เพร เออเตเพร อาเตเม อาเงเนอ, ครี๊ เก่ ซู๊ปลีแก เป ซิปล่อ เออเต๊เห่ เร๊อ เป เตเม เด๊อ อาบุ๊ยอาเตอเรอ โอ่เกออู โต่ เออเต๊เห่ เน๊อ อาสุ่ย ปา.

15เด๊อ เตหรี่เตแก เออ อาขว่าอาคยา, เตเด๊อะบุ๊ยเด๊อะเตอเรอ ตูจูเพร เด๊อ จอแปแหร่ อ๊อแลแก เป่ โทเฮ๊อ แกแย เด๊อ อา เอ๊ ลู เต๊เห่ เก่ หนิเบ่ปา อาเงเนอ, ครี๊ พย๊าแฮหนิ เป่ เฮ๊อ จอแปแหร่ อาแกแย เต๊เห่ เตอ๊อแล อาเซ. เออเต๊อเจ่อ เด๊อ จอแปแหร่ อา โอ่ เฮ๊อ. แซ่ฮู๊ ครี๊ เก่ อี๊ถ่ากา เร๊อ ปลวาเถ่ ปาลา จว๊าแก แกแย โอ่ เด๊อ เตอ๊อแล อาเลอ อาเล เนอเต๊เห่ อาเงเนอ, อา เบ่ ข่าเซอแก อาซิปล่อ. เด๊อ อา ข่าเซอ อาซิปล่อ อาขว่าอาคยา, เหย่ซี พย๊าหนิ เบ๊เกอเฮ๊อ อู่เจเต๊เหย่, อา เตเด๊อะบุ๊ยเด๊อะเตอเรอ ตูจูเพร เด๊อ จอแปแหร่ อ๊อแล โทเฮ๊อ เออเต๊เห่เนอ เฮ๊อ.

16เฮ๊โก๊หลื่อ ลี ต๊าบ่า เด๊อ แกแย เตเพรเพร เก่ ราโอ่แก เน๊อ แกแย เออเตเพร เก่ โตเบ่ พย๊าหนิ แกแยเซอ เนอเตเพร อา อู่เจเต๊เหย่ เฮ๊เนอหม่า, แซ่ฮู๊ อา เก่ พย๊าหนิ อู่เจเต๊เหย่ เออเนอ, อา เบ่ แด๊โล เร๊อ แกแย ราแก ลีเออ เตเพร หม่า อา เบ่ เซอ โทเฮ๊อ, ฮู๊เนอ. 17แกแย เด๊อ อา ราแก ลีเซอ เออต๊าบ่า เตเพรเนอ, อา เก่ โอ่เซอเพร ปาแพ๊ เฮ๊เรอ, ลีเออต๊าบ่า เมแจ่ เตอเจ๋อ โต่. หม่าแน๊เรอ ช๋า อา เซอ โทเฮ๊อ ปาหม่า ตื๊อเรอ แกแย เนอเตเพร พย๊าหนิ เนอ แกแยเซอ เนอเตเพร อา อู่เจเต๊เหย่ แพ๊. 18ฮู๊เนอ อาขว่าอาคยา, แซ่ฮู๊ เตอ๊อแล อาเหร่อ เนอตือมือ เก่ เป๊อแถ่ เมเต อาเงเนอ, อา โหล่ เตมีเตดอ เด๊อ อู หลู่แถ่ ลู เออเนอ อาสุ่ย. 19เบ๊อะคูโมเสส เฮ๊โล เป่ โทลอเฮ๊อ แกแย ปว๋า เตเพร เร๊อ ล๋อ จอแปแหร่ เฮ๊แก อา เตซว๊าเตแส่ เต๊เห่ เบ๊อะเนอ, อา พย๊า ปู่พู๊ เต๊เห่ อาสุ่ย เร๊อ เปะ เต๊เห่ อาสุ่ย เร๊อ อา โกล ซีแล๊เต่อ เร๊อ เทอ, โทเรอ อา พย๊า ซิหมิฉื่อลี เร๊อ อา โบ่หม่า เร๊อ ส่อแพ เด๊อ อู เอ๊ เร๊อ ฮี๊โซ๊แพพู๊ เออแตแพ อาเคอ เร๊อ อา ตีชิ เร๊อ ลี เด๊อ อู ราโอ่ เร๊อ จอแปแหร่ อา เตซว๊าเตแส่ อาโหง่เฮ๊แกเออ ต๊าบ่า, โท๊โต่ อา ตีชิหนิ ลอ เร๊อ แกแย ปว๋า เตเพร. ⁿ 20คูโมเสส เฮ๊ แกแย เต๊เห่ เน๊อ, “สุ่ย เออเนอหมา อา เมหม่าเมกลอ เฮ๊อ จอแปแหร่ เตอ๊อแล เด๊อ จอแปแหร่ หม่าแก โหง่ เด๊อ ซี เก่ ครวาเมเกอ อาเง เนอเฮ๊อ” ^o อา เฮ๊ เหย่ซี ฮู๊เนอ. 21โทเรอ เหล่สื่อดุ บูโพ๊ เออเตเม เร๊อ ล๊อ ตาหมื่อตาเต เด๊อ อู นอเอ่ อา เร๊อ เตจ๊อบู่จ๊อเบ อาเง เต๊เห่เนอ, อา ตีชิ เกอ ลอ เร๊อ สุ่ย ฮู๊เนอเนอ. ^p 22เก่ เฮ๊ ตาต๋า หม่า, เตซว๊าเตแส่ เฮ๊ เน๊อ, ตาเต เด๊อ อู นอเอ่ อา เร๊อ เตจ๊อบู่จ๊อเบ อาเง เต๊เห่เนอ, อู เบ่ เมโพ๊เมปลี ลู เร๊อ สุ่ย เนอ อา ผื่อ เตเร ลอ เจ๊อ ปว๊าเต๊อเจ่อ. สุ่ย เก่ ทุ๊ยตา โต่ เนอ, จอแปแหร่ ปลวาแกเบ๊ เตซื๊อ เตอเจ๋อ โต่. ^q

ครี๊ หลู่แถ่ อาเหน่ ขว่าคยา จอแปแหร่ ปลวาแก เตซื๊อ

23เหล่สื่อดุ บูโพ๊เออ เร๊อ ตาหมื่อตาเต เด๊อ อู นอเอ่ อา เร๊อ เตจ๊อบู่จ๊อเบ อาเง เต๊เห่เนอ, อู เม แบ๊บือเกอ ม๊อขุเออ อา ตาหมื่อตาเต เต๊เห่ แพ๊. ตาหมื่อตาเต โอ่เด๊อ อากู ปว๋า เต๊อเจ่อ เนอ อู เบ่ เม โพ๊เมแปล่ ลอ อา เร๊อ เตมีเตดอ อาสุ่ย ฮู๊เนอ. หม่าแน๊เรอ ม๊อขุ อาตาเต หม่าแหน่ เต๊เห่เนอ, อู เก่ เม โพ๊อาแปละ อา เร๊อ เตหลู่แถ่ เด๊อ อาแร๊เล๊อ เล๊อปา เจ๊อ เร๊อ เตมีเตดอ อาสุ่ยเออ เนอ เจ๊อ. 24เมเตเฮ๊เรอ เหล่สื่อดุ บูโพ๊ เด๊อ อู เม เร๊อ แกแย กู๊ขุ เร๊อ อู แม๊บือ เมเกอ แพ๊ อาโหมะกล่อ หม่าแหน่ เออเตเม อากู เนอ, ครี๊ จว๊าโน เบ๊อะเนอ หม่าโต่. อา จว๊าโน เร๊อดื่อ เด๊อ ม๊อขุ เร๊อ กู๊แหน่เออ อา กุยซิยอ เป่ เป เด๊อ จอแปแหร่ อาเป๊เส่เง. 25เพรหลู่แต กู่กล๊อดุเล๊อ เออเตเพรเนอ, อา เบ่ พย๊าหนิ เตมีเตดอ อาสุ่ย เร๊อ อา โน เด๊อ เตเหล่โอ่ บูโพ๊เล๊อ เนอโต๊โต่ ปวาหน่าหน๋า เจ๊อ หม่าแน๊เรอ ครี๊ เออเนอ อา โน หลู่แถ่ อาเหน่ โตโพ๊ โท โตโพ๊ ฮู๊เนอ หม่าโต่. 26เก่ ครี๊ โหล่โน โตโมโม เกอ ฮู๊เนอ เก่เฮ๊เรอ, อา โตเบ่ ข่าเซอ โตโมโม เกอ อาซิปล่อ เด๊อ เห่ขุ ทวาแถ่ลู่ เบ๊อะเนอ ปา เจ๊อ กอกอ. อา โหล่ ข่าเซอ ฮู๊เนอโต่. กู๊แหน่เออ เบ๊อะเห่ขุ เตเร พื๋อ ตื๊อดื่อเฮ๊อ เบ๊อะเนอ, อา แฮ ข่าเซอ แพ๊ โตโพ๊ เร๊อ อา โทปลื๊อ ลาเฮ๊อ. เด๊อ อา หลู่แตแถ่ อาเหน่กล่อ เร๊อ อาเหน่เออ อาขว่าอาคยา, อา พย๊าจว๊า ตาพาแก ลอ แกแย เต๊เห่ อาเตซื๊อ เต๊เห่ เฮ๊อ. 27แกแย ปว๋า เตเพร เบ่ เซอ แพ๊ โตโพ๊แพ๊. เร๊อ อา เซอโท ปาเนอ, จอแปแหร่ เก่ เมจากาคยา เหย่ซี ปา. 28ฮู๊เนอเฮ๊อ แซ่ฮู๊ ครี๊ เก่ พย๊าจว๊า ตาพาแก ลอ แกแย โอ่โร๊ เต๊เห่ อาเตซื๊อ เต๊เห่เนอ เร๊อ อา ข่าเซอ แพ๊ โตโพ๊ แพ๊. อา แฮ คยาแซ๊ ปา หม่าแน๊เรอ อา เก่ แฮ พย๊าจว๊า ตาพาแก เป่ เป เตซื๊อ ปาเนอ หม่าโต่. อา เก่ แฮ เมแลเปล๊กา แกแย เด๊อ อา โอ่ป่อแม๊ชือ ลู เนอเต๊เห่ ปา แพ๊. ^r