James 1

1แว หม่า คูยากอบ, แว ทวา จอแปแหร่ เร๊อ แบ่เจ่ เหย่ซู่ครี๊ อาหลู่ เตเพร. แว เฮ๊โมเฮ๊แร๊ จว๊า เป่ จอแปแหร่ อาแกแย กลุยแล เช๊อเนอโหมะ เด๊อ อา จว๊าโอ่ปีชี แลแค เด๊อ เหล่โอ่ ปว๋า โต๊โผ่ เต๊เห่ อาโอ่. ^a

เตหยื่อเตแหน่ เร๊อ เตลีแมลีเพ๊

2แว โป่แหว่ ซี๋, เบ๊อะซี๋ แม๊เถอะ ป่อชิเต่อเบ่ เร๊อ เตแป่เตเช เตอิลออี๊โหล่ ปว๋า เต๊อเจ่อ กาเบ่ ซี เบ๊อะเนอ, แด่ อา ฮู๊ เตซิครือ อาดุ เต๊อเจ่อ เด๊อ ซิเง เนอ นี๋. 3เมเตเฮ๊เรอ, เบ๊อะซี แม๊เถอะ ป่อชิเต่อเบ่ เน๊อ เตแป่เตเช เตอิลออี๊โหล่ ทื๊อแม๊ ซี เตหยื่อเตแหน่ เออเบ๊อะเนอ, อา เด๊อะโอ่แถ่ เอ๊เล๊อโป่ ซี แด่ทูซิปล่อ เต๊เห่ แพ๊เนอ ซี ซิเงดื่อ เฮ๊อ. 4แซ่ฮู๊ ซี เตก๊อถ่อโอ่แน เออเต๊เห่ เก่ หยว่าแกแล ตีกี๋ แต่เหม่, แซ่ฮู๊ อา เก่โตเก่เบ่ เร๊อ จอแปแหร่ อาซิปล่อ, โท๊โต่ ซี เก่ ดุแถ่ เล๊อบาเกอดื่อ เน๊อ เตปว๋า เต๊อเจ่อ อาเงเนอ, ซี โตเบ่ แด่ทูซิปล่อโต่ แลแค เด๊อ อา ตื๊อดื่อ นี๋. 5หม่าแน๊เรอ เด๊อ ซีเกล เนอ, แกแย เตเพรเพร เก่ โหล่เบ่ เตลีแมแจ่ เก่เฮ๊เรอ, อา โตเบ่ กุยแถ่ เด๊อ จอแปแหร่ อา โอ่ เร๊อ จอแปแหร่ เก่ เด๊อะตา ดื่อ อา ปา เมเตเฮ๊เรอ, จอแปแหร่ ซิพรวาฉื่อ แกแย เด๊อ อา กุยแถ่ ลู เนอ อา โอ่เตเพร๋ โต่. อา ซิยอเกอเร๊อ อู ปว๋า เตเพร, เร๊อ อา ซิหยื่อ เด๊อะ เป่ อู ปว๋า เตเพร เจ๊อ. 6หม่าแน๊เรอ, เบ๊อะซี กุยจ๊อเบ เบ๊อะเนอ, ซี เบ่ โอ่ เน๊อ เตหยื่อ, เร๊อ ซี โต ซิปล่อหร่าเหร่หนิ ตีกี๋ โต่. แกแย เด๊อ อา ซิปล่อหร่าเหร่ เต๊เห่เนอ, อาแซ่เน๊อ เก่แลเซ๊ แฮ เร๊อ เทอฮ๊าโฮ๊ เด๊อ เทอดุซาวา อากู เนอเต๊เห่ แพ๊. 7– 8แกแย เด๊อ อาแซ่เน๊อ เทอฮ๊าโฮ๊ เออเต๊เห่เนอ, อา เก่ พย๊าหนิ เต เต๊อเจ่อเจ่อ เด๊อ แบ่เจ่ อา โอ่ ปา เนอ, อา โต เตเน หนิ โต่, เมเตเฮ๊เรอ อา เมเต อิเตเต๋ เนอ, อาซิปล่อ โอ่เอ๊ เร๊อ อาซิปล่อ ลูโทลูแล อาขว่าอาคยา, อา พย๊าหนิ เต เตอเจ๋อโต่.

แกแย โซพ๊าโซแร เน๊อ แกแย ดุแหย่แถ่เซ

9ครี๊พู๊ เด๊อ อา โซพ๊าโซแร เตเพรเนอ, จอแปแหร่ เก่ แด่แถ่โล อา ปา, ฮู๊เนอเรอ อา เบ่ ซิครือซิลอ. 10แกแย ดุแหย่แถ่เซ เด๊อ จอแปแหร่ แฉ่ตา อา เตเพรเนอ, อา โตเบ่ ซิครือซิลอ แพ๊, เมเตเฮ๊เรอ แกแย ดุแหย่แถ่เซ เต๊เห่เนอ, อา เก่ ลูโก แลโซแก แซ่เน๊อ มีออเส่โพ เนอเต๊เห่ ปา. ^b 11ต๊อเหมาะแถ่ เร๊อ อากู่ลว๊าครา เซอแก มีออ เต๊เห่ อาขว่าอาคยา, อาโพ เต๊เห่ ตาโซแกลอ, เร๊อ อา เตตว่าเตแร๊ เต๊เห่ โอ่เหม่แก ลอ แพ๊. ฮู๊เนอเฮ๊อ เบ๊อะแกแย ดุแหย่แถ่เซ เต๊เห่ จว๊า เมเก่เมค๊า เต เบ๊อะเนอปาเนอ, อา เก่ เซอแก เกอดื่อ ฮู๊เนอ ปา.

เตเจแม๊ เร๊อ เตอิลออี๊โหล่

12แกแย เด๊อ อา แด่ทูซิปล่อ เต๊เห่เนอ, ช๋า อา แม๊เถอะ ป่อชิเต่อเบ่ เน๊อ เตแป่เตเช เตอิลออี๊โหล่ เบ๊อะเนอปาเนอ, อา เก่ พย๊าหนิ เตเด๊อะบุ๊ยเด๊อะเตอเรอ ปา, เมเตเฮ๊เรอ เบ๊อะเหย่ซี เมเป่แก โทเฮ๊อ เตแป่เตเช เตอิลออี๊โหล่ ฮู๊เออ เบ๊อะเนอ, จอแปแหร่ เก่ เด๊อ เหย่ซี เตเซอเพร ตูจูเพร. อาเชหยู่ เด๊อ อา อ๊อแล เน๊อ อา เก่ เด๊อ แกแย เด๊อ อา โมเร๊อ ลู เนอเต๊เห่ ปา.

13แกแย เด๊อ อา แม๊เถอะ ป่อชิเต่อเบ่ เตอิลออี๊โหล่ ฮู๊เออ เต๊เห่เนอ, อา โตเบ่ เฮ๊หนิ เน๊อ, “เตเออหม่า อา โอ่ เด๊อ จอแปแหร่ อา โอ่ แฮ แพ๊,” อา เบ่ เฮ๊หนิ ฮู๊เนอ โต่. เตอิลออี๊โหล่ มู๊แหม่รีแจ่ เนอ อา อี๊ลอท๊อจุ่ยเบ๊ เป่ เน๊อ จอแปแหร่ โต่. โท๊โต่ จอแปแหร่ อาเหน่แบ่เจ่ เร๊อดื่อเนอ, อา อิลออี๊โหล่ เน๊อ อู เตเพร่ว โต่. 14หม่าแน๊เรอ เบ๊อะแกแย ปว๋า เตเพร แม๊เถอะ ป่อชิเต่อเบ่ เน๊อ เตอิลออี๊โหล่ เบ๊อะเนอ, อาเหน่กล่อ อา เตซิหยื่อ มู๊แหม่ เร๊อดื่อ เนอเต๊เห่ จุ่ยหนิท๊อหนิ เร๊อดื่อ ลู แพ๊. 15เด๊อคยาเร๊อ เบ๊อะแกแย เออเตเพร เมเฮ๊อ อา เตซิหยื่อ มู๊แหม่ เออเบ๊อะเนอ, อา เด๊อะทวาแถ่ ลู เตซื๊อ, เออโตโพ๊เรอ เตซื๊อ เออ เป๊อตี๊หรี่หนิ ล๊อปลี เฮ๊อ ลูซิปล่อ เร๊อ อาพู๊โอ่แล เร๊อดื่อเฮ๊อ เตเซอ ตูจูเพร เฮ๊อ.

16แว โป่แหว่ เด๊อ แว โมเร๊อ ซี๋, เต เด๊อ อา โตโต่ เต๊เห่เนอ, จว๊าหยื่อเอ่ แต่ แลแค แต่เหม่ นี๋. 17ล๋อ เชหยู่ เด๊อ อาแร๊ เน๊อ อา เล๊อบา เนอหม่า จอแปแหร่ เด๊อ อา แบ๊แล ต๊อเหมาะ น๊อ เฉ่ เน๊อ เล เออเต๊เห่ เตเพร เด๊อะตา แพ๊. จอแปแหร่ อาเหล่โกล ถู่แหล่ เต๊เปล่โค๊แก เกอ ฮู๊ เตลี เก๊โอ่ ถู่แหล่ โค๊แก เนอโต่. 18เด๊อ เป หนิโฮ เตซิครือมีลา เตหมะเตจ๊อ อาขว่าอาคยาเร๊อ, จอแปแหร่ เด๊อะทวาแถ่ เฮ๊อ เป เน๊อ อาพู๊ จู๋ ดื่อ ฮู๊ อาซิปล่อ เร๊อดื่อ เนอเฮ๊อ. แซ่ฮู๊ เป เก่ ทวาแถ่ ส่อเส่ เด๊อ อาเส่เหร่อเล๊อ อู เต๊เห่ เด๊อะ เตแบ๊แล ล๋อ ปลี เออเต๊เห่ อาเกล เนอเรอ, อา เด๊อะทวาแถ่ เฮ๊อ เป เน๊อ อาพู๊ แพ๊.

เตหนิดา เน๊อ เตจูเอ่

19แว โป่แหว่ เด๊อ แว โมเร๊อ ซี๋, โต หนิ แลแค โหง่ เออตือมือ นี๋. แกแย ปว๋า เตเพร โตเบ่ หนิดา ตาเต, อา โตเบ่ เตเนเฮ๊เบ่ แลแค เร๊อ อา โตเบ่ ซิปล่อดุแถ่ แพร หนิ โต่. 20เมเตเฮ๊เรอ, แกแย เด๊อ ซิปล่อดุ สู่เทอทู เต๊เห่เนอ, อา เด๊อะทวาแถ่ แจ่ เตโอ่เซอเพร อาจ๊ออาเต เด๊อ จอแปแหร่ ซิหยื่อ นอโอ่เซอเพร เออเนอ แตแค๋ โต่. 21ฮู๊เนอเร๊อ วีแก ลอปลี เตซิหย่อซิบี เด๊อ ซี เม โตโมโม อาเนอเต๊เห่ เร๊อ ล๋อ ซี เหล่โกล เด๊อ อา มู๊แหม่รีแจ่ เนอเต๊เห่. เร๊อ ถู่แหล่ เต๊เปล่ แลแค ซี ซิปล่อ เน๊อ หนิดา หยื่อเอ่ เกอ แลแค จอแปแหร่ อาลาอาโหง่ เด๊อ อา อิช๊ออิปลือตา เด๊อ ซี ซิปล่อกู เออเนอเต๊เห่. อาลาอาโหง่ เออเนอหมา อา เมแลเปล๊กา เบ๊แจ่ ซี.

22ซี หนิดา แพ๊ตื๊อ จอแปแหร่ อาลาอาโหง่ เร๊อ ซี เก่ จูเอ่ ครวาเมเกอ ฮู๊ อา เฮ๊เนอ โต่. เฮ๊เนอหม่า, ซี แลโฮ แล เกอ เร๊อ ดื่อ เฮ๊อ ซีเหน่ เฮ๊อ. ซี โตเบ่ หนิดา ครวาเม เกอ ฮู๊ จอแปแหร่ อาลาอาโหง่ เฮ๊เนอ. 23แกแย เด๊อ อา หนิดา จ๊อจื้อ แพ๊ จอแปแหร่ อาโหง่ เร๊อ อา ครวาเม เกออู โต่ เต๊เห่ เนอหม่า อาแซ่ เน๊อ แกแย เด๊อ อา โด่แม๊ เกอเร๊อ อาเป๊เส่ เร๊อ มาโด่ เต๊เห่ เนอแพ๊. 24อา แม๊ เกอเร๊อ โท อาเหน่ เร๊อ มาโด่ เร๊อ อา เถ่จว๊า ตาพาแก เบ๊อะเนอ, ล๋อ อา แม๊เถอะ เด๊อ มาโด่กู เนอเต๊เห่, อา โชตาปาแก โตโพ๊ โชตาปา แพ๊. 25เตซิครือมีลา หม่า จอแปแหร่ อา เตซว๊าเตแส่ เด๊อ อาเล๊ออาบา เร๊อ อา เมแลเปล๊กา แกแย เด๊อ เตซื๊อเตปล๊า อากู. แกแย เตเพรเพร เด๊อ อา แม๊ปูซิเง ตาเตแร๊ เตซว๊าเตแส่ เออ เร๊อ อา โชตาปาแก เตอิซว๊าอี๊แส่ เออ โต่ เต๊เห่, โท๊โต่ อา หนิดา ครวาเม เตอิซว๊าอี๊แส่ เออเตเพรเนอ, จอแปแหร่ เก่ เด๊อะบุ๊ยเด๊อะเตอเรอ อาเตแร เออเนอ ปา.

26แกแย เตเพรเพร เด๊อ อา เตเนโต่ เกอเร๊อ อาเหน่ เร๊อ อา หม่า แกแย จ๊อบู่จ๊อเบ แร๊ แหน่เจ๊อ เต เตเพร หม่าแน๊เรอ อา เก่ รอ เกอเร๊อ อา เตเฮ๊เบ่ โต่ เฮ๊เนอ, อา จ๊อบู่จ๊อเบ แร๊ เต เออเนอ, อาหนิบุ๊ยหนิเตอเรอ ปา เตอเจ๋อ โต่. เร๊อ อา ทวา แพ๊ แกแย เด๊อ อา แลโฮแลแห่ แล เกอเร๊อ อาเหน่ เตเพรแพ๊. 27เตจ๊อบู่จ๊อเบ เด๊อ เพ จอแปแหร่ แด่ เฮ๊อ เน๊อ เต เด๊อ อา อาโพ๊อาแปละ เล๊อเล๊อบาบา เต๊เห่ เนอหม่า หม่าเฮ๊อ เตแม๊ตู่หนิ ฮู๊โอ่แคร๊โอ่แต่ เต๊เห่ เร๊อ เพรเหมาะโอ่แคร๊ เด๊อ อา โต่เบ่ เร๊อ เตแป่เตเช เต๊เห่, โท๊โต่ แกแย เด๊อ อา ค๊อเป่ เกอเร๊อ อาเหน่ เร๊อ อา โอ่ตาพายาเบ๊ เร๊อ เห่ขุ อา เตมู๊แหม่รีแจ่ ซี เนอเต๊เห่ เฮ๊อ.