Joh 10 | EkySCThai | STEP | แบ่เจ่ เหย่ซู่ เฮ๊โข่โหง่ เน๊อ, “แว เฮ๊จ๊อจ๊อ ซี, แกแย เด๊อ อา แฮโนโต เด๊อ ซิหมิโป อา กู่ดากู โต่ เตเพรเพร, เร๊อ อา เก่ แฮแถ่ โนเบ๊ เด๊อ อาโร โต๊โผ่โผ่ เฮ๊เนอหม่า, เพรเอ่โห่เอ่ฮี๊, เพร ปื่อเผ่ แหย่เปล๊เอ่ อู แพ๊.

John 10

เตเฮ๊เบ่โข่โหง่ เพรเกซิหมิ อาหรี่อาแก

1 แบ่เจ่ เหย่ซู่ เฮ๊โข่โหง่ เน๊อ, “แว เฮ๊จ๊อจ๊อ ซี, แกแย เด๊อ อา แฮโนโต เด๊อ ซิหมิโป อา กู่ดากู โต่ เตเพรเพร, เร๊อ อา เก่ แฮแถ่ โนเบ๊ เด๊อ อาโร โต๊โผ่โผ่ เฮ๊เนอหม่า, เพรเอ่โห่เอ่ฮี๊, เพร ปื่อเผ่ แหย่เปล๊เอ่ อู แพ๊. 2 หม่าแน๊เรอ แกแย เด๊อ อา แฮ โนโต เด๊อ กู่ดากูเออ เตเพรเพร เนอหม่า เพรเกซิหมิ หม่า เฮ๊อ. 3 เพรโอ่ป่อ กู่ดากู เออเตเพรเนอ, อา เก่ บ๊าโมฉื่อ เป่ เพรเกซิหมิ เออเตเพร กู่ดากู ปา. ซิหมิ เต๊เห่ หนิดา ซิเง ลูโหง่. เร๊อ อา เอ๊เถ่ เกอเร๊อ อาซิหมิ เต๊เห่ โตโด เร๊อ อามุย เต๊อเจ่อ, โตโด เร๊อ อามุย เต๊อเจ่อ เด๊อ อาโปกลอ เร๊อ อาซิหมิ เต๊เห่ ครวาเกอ ลอ ลูคยา. 4 อาซิหมิ เต๊เห่ ย๋อ โตเตเนหม่า เด๊อ ลูโหง่ อาขว่าอาคยา, เบ๊อะอา เอ๊เถ่ โทลอ เฮ๊อ อาซิหมิ เต๊เห่ เด๊อ อาโปกลอ เบ๊อะเนอ, อา เร๊อ อา จว๊า เหร่อ เด๊อ เง, อาซิหมิ เต๊เห่ เร๊อ อา ครวาเกอ ลอ ลูคยา. 5 ซิหมิ เออเต๊เห่เนอ, อา ครวาเกอ แกแย เด๊อ อาโรเต๊เห่ อาคยาโต่, เมเตเฮ๊เรอ เหย่ซี หนิโฮน๊อ ลูโหง่ โต่, อา ซิเงน๊อ ลู โต่ อาขว่าอาคยา, อา แกล่ ตาพาแก ล๋อ แกแย เด๊อ อาโร เต๊เห่ อาเหล่ แพ๊.” 6 แบ่เจ่ เหย่ซู่ โด่แน เป่ เหย่ซี โหง่ค๊าโข่ เออโต๊โต่ ตื๊อดื่อเรอ เหย่ซี ซิเงโปล แลแค อาโหง่แลช๊า โต่.

7 ฮู๊เนอ อาขว่าอาคยา, เหย่ซู่ เฮ๊ คยาแซ๊ เน๊อ, “แว เฮ๊จ๊อจ๊อ ซี, แว หม่า ซิหมิโป อา กู่ดากู เฮ๊อ. 8 ล๋อ แกแย เด๊อ อา แฮ เหร่อ เด๊อ แวเป๊เส่เง เนอเต๊เห่ หม่า, เพรเอ่โห่เอ่ฮี๊, เพร ปื่อเผ่ แหย่เปล๊เอ่อู เต๊เห่ แพ๊. เร๊อ ซิหมิ เต๊เห่ หนิดา เหย่ซีโหง่ โต่. 9 แว หม่า กู่ดากู เฮ๊อ. ล๋อ แกแย เด๊อ อา แฮโน โตตื้อ เด๊อ แวโอ่ เด๊อ อา หม่าดื่อ กู่ดากู เออเต๊เห่ เนอ, อา เก่ พย๊าหนิ เตเมแลเปล๊แก ปา. อา เก่ เฮ๊เถ่ แฮโน เร๊อ อา เก่ แม๊เถอะ อา เหล่เอ่ เฉ่ขุปา ปา. 10 เพรเอ่โห่เนอ อา แฮเมเต เฮ๊เนอหม่า, แซ่ฮู๊ อา เก่ แฮ เอ่โห่เอ่ฮี๊ หนิ, อา เก่ แฮ เมเซอหนิ อู, อา เก่ แฮ เมปย๊าเมหลู่แก อู อาเงแพ๊. แว เน๊อ แซ่ฮู๊ อู เก่ หนิ เตเซอเพร โท๊โต่ แซ่ฮู๊ อู เตโอ่เซอเพร เก่ เล๊อบา ตาปอตาเป อาเง เนอเรอ แว แฮ แพ๊.

11 “แว หม่า เพรเกซิหมิ เด๊อ อาแร๊ เตเพร. เพรเกซิหมิ เด๊อ อาแร๊ เตเพรเนอ อา เด๊อะแลแก อาซิปล่อ เซอเพร เด๊อ ซิหมิ เต๊เห่ อาเง. 12 เก่ แด่เก่เกเอ่ ซิหมิ เร๊อ อู เฮ๊เนอหม่า, ซิหมิ เออเต๊เห่เนอ อาเต หม่าโต่. อาขว่าอาคยา, เบ๊อะอา แม๊เถอะ ถุ่ยมี แฮ เบ๊อะเนอ, อา แด่แก ซิหมิ เร๊อ อา เถ่แกล่แก แพ๊. เร๊อ ถุ่ยมีเออ เก่ แฮ อ่าเซอ ปื่อเอ่แก ซิหมิ ปา, เร๊อ อา แฮ เม แกล่โพร๊ แกล่แพรแก ลอ ซิหมิ ปา. 13 เพร แด่เก่เกเอ่ ซิหมิ เออเตเพรเนอ, อา เถ่แกล่ ตาพาแก, เมเตเฮ๊เรอ อา โม เกอเร๊อ ซิหมิ เออเต๊เห่ โต่.

14 “แว หม่า เพรเกซิหมิ เด๊อ อาแร๊ เตเพร. แว ซิเง แว ซิหมิ เร๊อ แว ซิหมิ ซิเง แว. ^a 15 อาแซ่เน๊อ เนอเฮ๊อ, แวเพ ซิเง แว เร๊อ แว ซิเง แวเพ, เร๊อ แว เด๊อะแลแก แว ซิปล่อ เด๊อ แว ซิหมิ เต๊เห่ อาเง. 16 แว ซิหมิ เด๊อ อาโร เด๊อ อา โอ่ เบ๊อะอาโปกู เออโต่เนอ อา โอ่ปา เต๊เห่. แว เบ่ เอ๊กา เกอ เหย่ซี ปา. เหย่ซี เก่ หนิดา เกอ แวโหง่ ปา, เร๊อ เหย่ซี เก่ กา ทวา เต่อ ลอ ลู ซิหมิ ตู๊หมู่จือแพ๊, เพรเกซิหมิ อา แบ่เจ่ เตเพรเพร่ว แพ๊ปา. 17 แวเพ โมหนิเร๊อ แว เมเตเฮ๊เรอ แซ่ฮู๊ แว เก่ เซอเพร กาคยา คยาแซ๊ เนอ, แว เด๊อะแลแก แว ซิปล่อ เซอเพร. 18 แว เก่ นอเมเซอ อู เร๊อ แวเหน่ โต่ เฮ๊เนอ, อู เมเซอ แจ่ แว เตเพร่ว โต่. แว เด๊อะแลแก แว ซิปล่อ เออเนอหม่า, อู นอตื๊อดื่อ แว เตเพร่ว โต่, แว ซิปล่อ เร๊อ แว ซิปล่อ เด๊อะแล เกอเร๊อดื่อ แพ๊. แว โอ่ เร๊อ แว โพร เตอเรอฉว่าชอ เด๊อ แว ซิหยื่อ เด๊อะแลแก แวซิปล่อ หม่า อา หนิหนิ, แว ซิหยื่อ พย๊าดว้าคยา อา หม่า อา หนิหนิ แพ๊. แวเพ เมแฮหนิ แวโหง่ เร๊อ แว เบ่เม ฮู๊เออ,” อา เฮ๊ เป่ เหย่ซี ฮู๊เนอ.

19 เด๊อ อา เฮ๊เบ่ ฮู๊เนอ อาขว่าอาคยา, แกแยยิวพู๊ เต๊เห่ ลูโค๊แก แคลู เนอหมู่. 20 แกแย โอ่โร๊ลู เฮ๊ เน๊อ, “อา หม่า โลเน๊ เมเบ่ ลู เร๊อ อา ตีมุย แพ๊. จว๊า หนิดา โต่ ลูโหง่ เมเต?”

21 หม่าแน๊เรอ เด๊อ อาโร เต๊เห่เนอ อา เฮ๊ เกอลาติ เน๊อ, “โลเน๊ เมเบ่ แกแยเนอ อา เฮ๊เบ่ เมฮู๊เออ โต่. โลเน๊ เมลีแม๊เถอะ แจ่ แหน่ อูเป๊เส่ แอ?” อา เฮ๊ แลแค ฮู๊เนอ เต๊เห่.

แกแยยิวพู๊ เต๊เห่ หยื่อเอ่ เหย่ซู่ โต่

22 เบ๊อะเนอเค เด๊อ วีเยรูซาเล็ม อากูเนอ, อา โตเร๊อ แกแยยิวพู๊ เต๊เห่ เม ป่วย โต๊ป่วย เด๊อ อู เอ๊ เร๊อ เตเนแถ่โต่ กาคยา เต แด่ โพ๊แปละ เตหลู่แตโฮ มู๋ หนู่เค เนอ, อา โอ่ โตป่วย. ^{▼▼เบ๊อะครี๊ แฮแล ล๋ายโต่ อาหน่า ๑๖๔ เบ๊อะเนอ, ซีเรียเก่พู๊ เต๊เห่ แฮโน เมโตโพร๊ มู๊แหม่ดื่อเง เตหลู่แตโฮ เออ โซหน่า โทเร๊อ แกแยยิวพู๊ เต๊เห่ เมปลีเมโพ๊ คยาแซ๊ เร๊อ อา เบ่ แหย่โยบูโพ๊ เต๊เปล่ กาคยา เตหลู่แตโฮ เออ เร๊อ อาป่วย เกอเร๊อ แลเค.} 23 เบ๊อะเนอเค อา โตเร๊อ เก๊โหร่เค เร๊อ เหย่ซู่ โอ่ เบ๊อะเตหลู่แต โฮกูเนอ เร๊อ อา จว๊ารว๊า เบ๊อะเหล่โอ่ โต๊โผะ เด๊อ อู เอ๊ เร๊อ คุ๊ยซาโลมอน หี่แด๊โก๊ เนอโต๊โผะ อาเล. 24 แกแยยิวพู๊ เต๊เห่ แฮ โอ่ปลู ตาวาลอ ลู เร๊อ อา เฮ๊ ลู เน๊อ, “เน หม่า อูเป เนอ เน เฮ๊โฉ่โลเป่ เป่ เป โตโพ๊ โต่, เน นอโอ่ป่อ แม๊ชือ งยาโป่ ปา เจ๊อ เป บ๋า เต ปา เจ๊อ? เน เก่ หม่าแหน่ ครี๊ เฮ๊เรอ แด๊โฉ่โล เป่ เป,” อา เฮ๊ ลู ฮู๊เนอ.

25 “แว เฮ๊โท เป่ เฮ๊อ ซี เร๊อ ซี หยื่อเอ่โต่. เตโค๊ตีกลี๊คยา เด๊อ แว เม เร๊อ แวเพ อามุย เต๊เห่เนอ, อา เฮ๊เบ่ เป่เฮ๊อ เด๊อ แวเง เฮ๊อ. 26 หม่าแน๊เรอ ซี ย๋อ ทวา แว ซิหมิ หม่าโต่ อาขว่าอาคยา, ซี หยื่อเอ่ แว โต่. 27 แว ซิหมิ เต๊เห่ เนอหม่า อา หนิดา แวโหง่. แว ซิเง เหย่ซี, เร๊อ เหย่ซี ครวา แวคยา. 28 แว เด๊อะ เหย่ซี ซิปล่อเซอเพร ตูจูเพร. อา เก่ เซอ ปา โตโพ๋ โต่. อู แฮ จุ่ยเถ่ แจ่ ปา เหย่ซี เด๊อ แว กู๊ยากู เตเพร่ว โต่. 29 แวเพ เออเนอ อาดุเล๊อ เจ๊อ เร๊อ อู ปว๋า เตเพร. ซิหมิ เออเต๊เห่ เนอหม่า อา เด๊อะ แว เร๊อ อู แฮ จุ่ยเถ่แก แจ่ ปา เหย่ซี เด๊อ แวเพ อา กู๊ยากู เตเพร่ว โต่. 30 แว เร๊อ แวเพ หม่า เตเพรเพร่ว แพ๊.”

31 แกแยยิวพู๊ เต๊เห่ อาโถ่ แลแค หล่อ เร๊อ เตเร ต่าเซอ ลู. 32 หม่าแน๊เรอ แบ่เจ่ เหย่ซู่ เฮ๊ เหย่ซี เน๊อ, “เตเมแร๊ เด๊อ แวเพ นอเม แว เต๊เห่เนอ, แว เด๊อะโล เอ๊ เป่ลาเฮ๊อ ซี เฮ๊อ. หม่าแน๊เรอ ซี เตเร ต่าโต่ แว เร๊อ แว เม เตแร๊ เออเต๊เห่ เบ๊อะเต๊อเจ่อเต?” อา เฮ๊ เหย่ซี ฮู๊เนอ.

33 “เด๊อ เน เตเมแร๊ เออเต๊เห่ อาขว่าอาคยาเร๊อ, เป เตเร ต่า เน เร๊อ หล่อ หม่าโต่. เน ย๋อ เฮ๊เบ่ซื๊อ จอแปแหร่ เออเนอ แพ๊, เมเตเฮ๊เรอ เน ทวา แพ๊ แกแย เห่ขุพู๊ เตเพรแพ๊ เร๊อ เน จว๊า แด๊กว๊า แล เกอเร๊อ เจ๊อ เนเหน่ เร๊อ จอแปแหร่ เหย่ซี เฮ๊ ลู ฮู๊เนอ.” ^c

34 เร๊อ แบ่เจ่ เหย่ซู่ เฮ๊ฉื่อ เหย่ซี เน๊อ, “เด๊อ ซี เตซว๊าเตแส่ อากู เนอ, อา ราโอ่ ตามา เน๊อ, ‘แว เฮ๊ เร๊อ ซี หม่า จอแปแหร่ เต๊เห่,’ ^d อา เฮ๊ ฮู๊เนอ แวเฮ๊โต่? 35 จอแปแหร่ อาลาอาโหง่ เนอหม่า อาโตอาเบ่ ตูจูเพร เจ๊อ. อู ถู่แหล่ เต๊เปล่ แจ่ ลู เตเพร่ว โต่. 36 ฮู๊เนอเรอ เพ นว๊าแถ่ แว เร๊อ อา นอแฮแล แว เด๊อ เห่ขุเออ. เร๊อ เบ๊อะแว เฮ๊ เน๊อ, ‘แว หม่า จอแปแหร่ อาพู๊คู เตเพร’ เบ๊อะเนอ, ซี จว๊า เฮ๊โต่ แว เร๊อ แว เฮ๊ซื๊อ จอแปแหร่ ฮู๊เต? 37 แว เก่ เมโต ฮู๊ แวเพ เมเนอ โต่ เฮ๊เรอ หยื่อเอ่ แต่ แว แต่เหม่. 38 หม่าแน๊เรอ เก่ แว เมเฮ๊อ ฮู๊ แวเพ เมเนอ เฮ๊เรอ ซี เก่ หยื่อเอ่ แลแค เจ๊อ ตีกี๋ โต่ เฮ๊เนอ, ปีตี๊ตื๊อดื่อ เร๊อ ซี โตเบ่ หยื่อเอ่ ช๊าเหล่ แลแค เต เด๊อ แว เม อาโค๊ตีกลี๊ เนอเต๊เห่. ซี เก่ หยื่อเอ่ แว เตเม เต๊เห่ เฮ๊เรอ ซี เก่ ซิเงแฮ เร๊อ เพโอ่ เด๊อ แวกู เร๊อ แว โอ่เด๊อ อากู ปา, อา เฮ๊ เหย่ซี ฮู๊เนอ.” 39 เหย่ซี ซิหยื่อ ปื่อ ลู ตื๊อดื่อเรอ อา เถ่จว๊า ตาพาแก เหย่ซีเหล่.

40 แบ่เจ่ เหย่ซู่ กาคยา คยาแซ๊ เด๊อ จอร์แดน เทอแลโหมะ แบ๊เร ตากยา, เบ๊อะคูยอห์น เหล่เจ เหร่อเล๊อ เป่ อู เทอ กู๊เหล่ เนอโต๊โผะ, เร๊อ อา กาโอ่ เบ๊อะเนอ. ^e 41 แกแย แฮโหร่แฮเอ๊ แหน่เจ๊อ เด๊อ ลูโอ่. เร๊อ เหย่ซี เฮ๊ เกอเร๊อ แคลู เตเพร โท เตเพร เน๊อ, “คูยอห์น เมโล เตโค๊ตีกลี๊คยา เตอเจ๋อ โต่ ตื๊อดื่อเรอ ล๋อ อา เฮ๊ แกแย เออเตเพร อาหรี่อาแก คยา เนอ, อาโต ลอปลีเจ๊อ,” อา เฮ๊ แลแค ฮู๊เนอ. 42 แกแย เบ๊อะเนอเต๊เห่ หยื่อเอ่แหน่ โร๊ ลู เหย่ซู่.