John 12
เหย่ซู่ โอ่ เด๊อ ดอเบธานี
(มัทธิว ๒๖:๖-๑๓, มาระโก ๑๔:๓-๙)
1เบ๊อะป่วยเตจว๊า ตา ลว๊า เบ่แต่ ล๋ายโต่ อาเนอ โซซว๊า เบ๊อะเนอ, เหย่ซู่ จว๊า เด๊อ คูลาซารัส โอ่ เกอเร๊อ ดอเบธานี เนอ. คูลาซารัส เออเตเพร เนอหม่า หม่าเฮ๊อ เหย่ซู่ เม ก๊อถ่อเซอเพร กาคยา ลู เนอเตเพร เฮ๊อ. 2อู ตี๊หรี่แตแร เล๊เอ่เล๊โอฉื่อ แบ่เจ่ เหย่ซู่ เร๊อ ดีเหมาะเฮ๊ เร๊อ เหมาะมารธา เล๊เอ่เล๊โอ เกออู เบ๊อะเนอ. คูลาซารัส โอ่แน โอ่เต่อเกอ เร๊อ แกแย โอ่แน เอ่ แลแค ดี เบ๊อะดีเหร่ แก่ช๊า อาเกล เนอเต๊เห่. 3เบ๊อะเนอเค เหมาะมารีย์ พย๊าแฮหนิ เทอโนมื๊อ เด๊อ อู เอ๊ เร๊อ น่าดู๊เออแตแป. เทอโนมื๊อ เออเนอหมา อางูดุ แหน่เจ๊อ เร๊อ อา ผื๋อ แลโถ่ ตากลาเม กี๊โล๊เจ๊อ. อา แฮ แล๊ตา เด๊อ แบ่เจ่ เหย่ซู่ กู๊โด่ลู เร๊อ อา ทื๊อซูแก เร๊อ อากู่โล. เทอโนมื๊อ เออเนอ, อา โนมื๊อ จว๊าเป่ ลอ เจ๊อ หี่ เตเมลอ เจ๊อ. a 4– 5หม่าแน๊เรอ, เด๊อ อา โคเจ่ อาเกลเนอ, อามุย เร๊อ คูยูดาส อิสคาริโอท เฮ๊เออเนอ อา โอ่เตเพร. เด๊อ คยา เร๊อ อา อิเชแก แบ่เจ่ เนอเตเพร เฮ๊อ, เร๊อ อา เฮ๊ เน๊อ, “อิเชแก เทอโนมื๊อ เร๊อ อา หนิ รือ เออเนอ จว๊าเด๊อ เร๊อ แกแย โซพ๊าโซแรพู๊ เนอเต๊เห่ โต่ เมเต? เน เก่ อิเชแก หม่า อา หนิ เจ๊อ รือหย่า เดนาริอัน โซโจ่ย เจ๊อ เม!” 6อา ซิยอเร๊อ หม่าแหน่ แกแย โซพ๊าโซแรพู๊ เร๊อ อา เฮ๊ ฮู๊เออเนอ หม่าโต่, เมเตเฮ๊เรอ อา หม่า อาทวา เพรเอ่โห่. อา เบ่ กู๊กลอ เป่ อู รือ, ชาเป่ อู รือปยา เร๊อ อา บ๊อพย๊าโห่ โตโมโม รือ เร๊อ อา นอเอ่ เกอเร๊อดื่อ เร๊อ อาเงแพ๊. 7“อา โอ่ ดื่อ, เมดู๊แด แต่ อา แต่เหม่” แบ่เจ่ เหย่ซู่ เฮ๊กาคยาฉื่อ ฮู๊เนอ “อา พย๊า โอ่ดว้า เป่เฮ๊อ แว เทอโนมื๊อ เด๊อ อู เหล่โล๊ แว ปา เตอเนอ อาเงเฮ๊อ. 8แกแย โชพ๊าโชแรพู๊ เต๊เห่ โอ่เต่อเกอ เร๊อ ซี ปว๋า โตโพ๊ เจ๊อ, หม่าแน๊เรอ แวเออเนอ แว โอ่เต่อตี๊ตี๊ เกอ เร๊อ ซี โต่.” bอู เตเน เครเมเซอ คูลาซารัส
9แกแยยิวพู๊ เบ๊หมู่โอ่โร๊ลู เต๊เห่ หนิโฮ เร๊อ แบ่เจ่ เหย่ซู่ โอ่เบ๊อะดอเบธานี เนอ เร๊อ อา จว๊า แลแค เบ๊อะเนอ เหย่ซี ซิหยื่อ แฮแม๊เถอะ แลแค ตื้อ แบ่เจ่ เหย่ซู่ เนอ หม่าโต่, เหย่ซี ซิหยื่อ แฮ แม๊เถอะ เต่อเกอ คูลาซารัส เด๊อ แบ่เจ่ เหย่ซู่ เมเซอเพร กาคยา ลู เนอเตเพรเพร. 10ฮู๊เนอ อาขว่าอาคยา, เพรหลู่แต กู่กล๊อ เต๊เห่ เตเน เครเมเซอ เต่อเกอ คูลาซารัส. 11เมเตเฮ๊เรอ เด๊อ คูลาซารัส อาขว่าอาคยา, แกแยยิวพู๊ โอ่โร๊ลู วี๊แก เพรหลู่แต ทวาดุทวาเต เต๊เห่ เร๊อ เถ่จว๊าโค๊ แลแค เด๊อ เหย่ซู่ โอ่ เร๊อ หยื่อเอ่ แลแค แบ่เจ่ เหย่ซู่ อาขว่าอาคยา, อา เตเน เครเมเซอ เต่อเกอ ลู แพ๊.เหย่ซู่ จว๊าโน เด๊อ วีเยรูซาเล็ม อากู
(มัทธิว ๒๑:๑-๑๑, มาระโก ๑๑:๑-๑๑, ลูกา ๑๙:๒๘-๔๐)
12เด๊อคยา เตอเนอเนอ, แกแย เบ๊หมู่ เด๊อ อา แฮ เตจว๊าตาลว๊าป่วย เออเต๊เห่ หนิโฮ แลแค เร๊อ เหย่ซู่ แฮ เด๊อ วีเยรูซาเล็ม เออ เด๊อ แกล๊ลู เฮ๊อ ฮู๊เนอ. 13ฮู๊เนอเรอ อา ปื่อหนิ แลแค กะน๊อดุเหล่ เต๊เห่ เร๊อ อา เถ่จว๊า แม๊ฉื่อ ลู, เร๊อ อา เอ๊โท แลแค เนอ, “ถู่เซ๊แถ่ แลแค จอแปแหร่!” “จอแปแหร่ เก่ เด๊อะบุ๊ยเด๊อะเตอเรอ อา เด๊อ อา แฮ เร๊อ แบ่เจ่ อามุย เออเตเพร!” c “จอแปแหร่ เก่ เด๊อะบุ๊ยเด๊อะเตอเรอ อิสราเอล อาคุ๊ยจ๊อแผ่ เออเตเพร นี๋” 14แบ่เจ่ เหย่ซู่ พย๊าหนิ แมอ๊อแล โตโล๊พู๊ โตโด เร๊อ อา แถ่ แถ่แด๊หนิ ลู. เร๊อ เออ หม่า อา เม เล๊อบาเฮ๊อ ลีเทส่อพ๊า เฮ๊ เนอ, 15“เก๋อ เยรูซาเล็ม ▼▼เด๊อ กรีกโหง่ หม่า อา เฮ๊ เน๊อ, “สิโยน อา พู๊เพร เหมาะ”
วีพู๊ ซี๋! ซิอิเช แต่ แลแค แต่เหม่ นี๋! แม๊มอ แลแค, ซี คุ๊ยจ๊อแผ่ แด๊หนิ แมอ๊อแล โตโล๊ เร๊อ อา แฮโตเกอ เด๊อ ซีโอ่ เฮ๊อ.” e 16เบ๊อะเนออาเค อา โคเจ่ เต๊เห่ ซิเงโปลแล เตเมทวาแถ่ อาโหง่แลช๊า เออเต๊เห่ ล๋ายโต่. เต เออเต๊เห่ เนอหม่า อา เม เล๊อบาแถ่เฮ๊อ เพรโพร อา เตเฮ๊หนื่ออื่อ มู๋ หนู่เค เต๊เห่เฮ๊อ. หม่าแน๊เรอ, เบ๊อะแบ่เจ่ เหย่ซู่ กากี๊แถ่ โทเฮ๊อ เด๊อ ม๊อขุ เบ๊อะเนอ, เหย่ซี ซิเงแถ่เบ่ โหน่แพ๊ เร๊อ อา เม เตเออเต๊เห่เนอ อา โตลอ เร๊อ เพรโพร อา เตเฮ๊หนื่ออื่อ มู๋หนู่เค เต๊เห่ เร๊อ อา โคเจ่ เต๊เห่ ซิเงแถ่ โต่เบ่ เร๊อ อา เมโต เป่ลอ ลู ฮู๊ เพรโพร เฮ๊หนื่ออื่อ เนอเต๊เห่. 17แกแย เบ๊หมู่ เด๊อ อา แม๊เถอะ เหย่ซู่ เอ๊เถ่ คูลาซารัส เด๊อ โลกู เร๊อ เมเซอเพร กาคยา ลู เต๊เห่เนอ, เหย่ซี แด๊โฉ่โล เป่แฮ เป่ โป่ อู ฮู๊ เหย่ซี แม๊เถอะ เนอ. 18เหย่ซี หนิโฮ แลแค เน๊อ แบ่เจ่ เหย่ซู่ เม อาโค๊ตีกลี๊ เป่ อู เตเออ อาขว่าอาคยา, เหย่ซี เถ่จว๊า แม๊ปลูแม๊เผ่ ลู เร๊อ เตหรี่เตแก เออ อาขว่าอาคยา เฮ๊อ. 19ฮู๊เนอเรอ ฟาริสี เต๊เห่ เฮ๊ เกอเร๊อ ลู เตเพร เร๊อ เตเพร ฮู๊เต เฮ๊เรอ, “แม๊มอเล๊! เป เฮ๊เป่ ปา เหย่ซี โต่เฮ๊อ. เห่ขุ ต๊าบ่าลอ ครวาเกอ ลอ ลูคยา เฮ๊อ!” เหย่ซู่ เฮ๊โพร หนื่ออื่อ เหร่อ เกอเร๊อ อาเตเซอ อาหรี่อาแก
20แกแย จว๊า แลแค เตจว๊าตาลว๊า ป่วยดุ เด๊อ อา เก่ จว๊า จ๊อเบ จอแปแหร่ เด๊อ วีเยรูซาเล็ม เออเต๊เห่ อาเกลเนอ, กรีกพู๊ โอ่เกอ เต๊เห่. 21กรีกพู๊ เออเต๊เห่เนอ, อา จว๊าโต เด๊อ คูฟีลิป อา โอ่, เร๊อ อา เฮ๊ ลู เน๊อ, “ซ๊าร๊า, เป ซิ แม๊เถอะ เกอลา แบ่เจ่ เหย่ซู่” คูฟีลิป หม่า วีเบธไซดา, กาลิลี เก่พู๊ เตเพร. 22คูฟีลิป จว๊า แด๊โฉ่ เป่ คูอันดรูว์ เร๊อ อา เร๊อ คูอันดรูว์ จว๊า แด๊โฉ่โล เป่ เหย่ซู่. 23เร๊อ แบ่เจ่ เหย่ซู่ เฮ๊ เน๊อ, “เบ๊อะแฮโต่เฮ๊อ เด๊อ แกแยพู๊คูเออ เก่ พย๊าหนิเฮ๊อ เตเตอเรอดุ เตอเรอทู เฮ๊อ. 24แว เฮ๊จ๊อจ๊อ ซี, โบ๊กู่ลาปล่อ ต๊อปล่อเนอ, อู เก่ โหล่ตา ลู เด๊อ เห่ขุ โต่ เฮ๊เนอ, อา เพ๊แถ่ อา เส่แถ่ แจ่โต่. หม่าแน๊เรอ อู เก่ โหล่ตา ลู เฮ๊เนอ, อา เก่ เพ๊แถ่ เส่แถ่ เอ๊แหน่เจ๊อ ปา. ▼▼แบ่เจ่ เหย่ซู่ หม่า อาแซ่เน๊อ โบ๊กู่ลาปล่อ ตอปล๊อ เนอเฮ๊อ แซ่ฮู๊ อู เก่ พย๊าหนิ ซิปล่อเซอเพร อาเซ อาเงเนอ, อา ข่าเซอ เฮ๊อ ซิปล่อ เด๊อ อี๊ถื่อดีเต่ลู เฮ๊อ
25แกแย เด๊อ อา โม เกอเร๊อ อา ซิปล่อเซอเพร เด๊อ เห่ขุเออ เตเพรเพร เนอ, อา เก่ แลจู่ แก อาซิปล่อ เซอเพร ปา. หม่าแน๊เรอ แกแย เด๊อ อา เก่ ซิโล เกอเร๊อ อา ซิปล่อเซอเพร เด๊อ เห่ขุเออ โต่ เตเพรเพร เนอ, อา เก่ พย๊าหนิ ซิปล่อเซอเพร ตูจูเพรเง ปา. g 26อูเปเป๋ เบ่เบ่, เด๊อ อา ทวา แว หลู่เล๊ เนอ, อา เบ่ครวา เกอ แว. ตื๊อหม่า, แว โอ่เบ๊อะเต๋ โต๊โผ่ เบ่เบ่, อา เก่ โอ่เกอ เบ๊อะเนอ ปา. แวเพ เก่ แด่ดุแด่ทู แกแย เด๊อ อา ทวา แว หลู่เล๊ เนอเตเพร ปา. เหย่ซู่ เฮ๊โล เป่ อู เร๊อ อาเตเซอ อาหรี่อาแก
27“อา จา แหน่เจ๊อ แว ซิปล่อ. แว โตเบ่ เฮ๊ ฮู๊เต? ‘เก๋อ เพ๋, นอข่าเบ่ แต่ แว เร๊อ เตจาเตจือ เออ แต่เหม่ นี๋.’ แว โตเบ่ เฮ๊ ฮู๊เนอ แอ? แว โตเบ่ เฮ๊ ฮู๊เนอ โต่. แว แฮแล แหน่ เฮ๊อ เด๊อ เตเออเนอ อาเงเฮ๊อ. 28เก๋อ เพ๋, เน เตอเรอดุทู เจ๊อ บ๋า เต เนอ, เด๊อะโล เป่ อู นี๋.” เออโตโพ๊เรอ โหง่ โอ่ เด๊อ ม๊อขุ เฮ๊ตา เน๊อ, “แว เด๊อะโล โทเฮ๊อ แว เตเตอเรอดุ เตอเรอทู เฮ๊อ, แว เก่ เด๊อะโล คยาแซ๊ ปา.” 29แกแย เบ๊หมู่ โอ่ แลแค เบ๊อะเนอ เต๊เห่ หนิโฮ แลแค อาพราเออ เร๊อ เต๊เห่เห่ เนอ อา เฮ๊ แลแค เนอ, ม๊อครอ พรารื๊อพราเต๊, เต๊เห่เห่ เนอ อา เฮ๊ เนอ, ม๊อขุ เตเน่ว เฮ๊เบ่ตา ลู. 30“โหง่พราเถ่ เออเนอหมา ซี เหล่หนิบุ๊ย หนิเตอเรอ อาเงแพ๊, แวเง หม่าโต่,” อา เฮ๊ เหย่ซี ฮู๊เนอ. 31“กู๊แหน่เรอ เบ๊อะแฮโต่เฮ๊อ เด๊อ อู เก่ เมจากาคยา แกแย เห่ขุพู๊ เฮ๊อ. กู๊แหน่เรอ เบ๊อะแฮโต่เฮ๊อ เด๊อ อู เก่ เหว่เถ่แก โลเน๊มู๊แหม่รีแจ่ กู่กล๊อ ซาตาน เด๊อ อา เป๊อ แกแย เด๊อ อา หยื่อเอ่โต่ เต๊เห่ เออเนอ โตโด เฮ๊อ. 32หม่าแน๊เรอ ช๋า อู มือเซอแถ่ แว เด๊อ อี๊ถื่อดีเต่ลู เบ๊อะเนอปาเนอ, แว เก่ เอ๊แฮ ลอ แกแย ปว๋า เตเพร เด๊อ แวโอ่ ปา.” 33อา เฮ๊ ฮู๊เออ เนอหม่า อา ซิหยื่อ เด๊อะโล ซิเง เป่ อู เร๊อ อา เก่ เซอ ฮู๊เต ปา เนอแพ๊. 34แกแย เบ๊หมู่ เฮ๊ฉื่อ เน๊อ, “เป หนิโฮน๊อ เตซว๊าเตแส่ เฮ๊ เร๊อ ครี๊เนอ อา เบ่ โอ่เซอเพร ตูจูเพร ว๊า, เร๊อ เน จว๊า เฮ๊โต่ เน๊อ, ‘อู เบ่ มือเซอแถ่ แกแยพู๊คูเออ เด๊อ อี๊ถื่อดีเต่ลู’ ฮู๊เต? ‘แกแยพู๊คู’ หม่า อูเป?” อา เฮ๊ แลแค ฮู๊เนอ. h 35เออโตโพ๊เรอ แบ่เจ่ เหย่ซู่ เฮ๊แก เกอเร๊อ อาเหน่ เน๊อ, “เตลี เออเนอ อา โอ่โก๊โป่ เร๊อ ซี เตอเปลอฮู๊ ปาแพ๊. เบ๊อะเตลี โอ่เกอปา เร๊อ ซี เบ๊อะเนอ, ตูรู๊ จว๊าเป่แฮ แลแค. เตคี๊ เก่ แฮโต่ คยา ซี ปา. แกแย จว๊า เด๊อ เตคี๊เกล เตเพรเนอ, อา จว๊าโต เบ๊อะเตเนอ, อา ซิเง เกอเร๊อ อาเหน่ โต่. 36แซ่ฮู๊ ซี เก่ ทวาแถ่ เตลีพู๊ เต๊เห่เนอ, เบ๊อะเตลี โอ่เกอปา เร๊อ ซี อาเคเออ, หยื่อเอ่ แลแค อา นี๋.” อา เฮ๊เบ่ โท ฮู๊เนอ เร๊อ อา เถ่จว๊า ตาพา โอ่โค๊แก เร๊อ เหย่ซี.แกแย โชโด เตหยื่อเตแหน่
37แบ่เจ่ เหย่ซู่ เด๊อะโล เป่ เจ๊อ เหย่ซี ล๊อ เตเม อาโค๊ตีกลี๊ เออเต๊เห่ เด๊อ เหย่ซี เป๊เส่เง เจ๊อ ตื๊อดื่อเรอ อา หยื่อเอ่ ปาแหน่แล ลู โต่โต่. 38เด๊อ อา หยื่อเอ่ ฮู๊เออ โต่ อาขว่าอาคยา, อาโต ลอเฮ๊อ เพรโพร อิสยาห์ เหล่เฮ๊หนื่ออื่อ อาโหง่เออ เนอ, เก๋อ เพ๋, อูเป หยื่อเอ่เฮ๊อ เป แด๊โฉ่โด่แน เป่ อู เออเนอ เต๊เห่ เป? เน เด๊อะโล เป่เฮ๊อ เน เตโพรเตเตอเรออาฉว่าชอ เออ เร๊อ อูเปเฮ๊อ? i เพรโพร อิสยาห์ เฮ๊ฮู๊เนอ. 39เมเตเฮ๊เรอ เหย่ซี หยื่อเอ่เบ๊ โต่ เฮ๊เนอ, เพรโพร อิสยาห์ เฮ๊เกอปา เนอ,40“แซ่ฮู๊ เหย่ซี เก่ กาคยาโต แต่ แลแค แบ่เจ่ แต่เหม่, โท๊โต่ แซ่ฮู๊ เหย่ซี นอแหย่โอ่เหม่ แต่ แลแค อาเหน่ เร๊อ แบ่เจ่ แต่เหม่ เนอเรอ, แบ่เจ่ เมคี๊เฮ๊อ เหย่ซี เป๊เส่, แบ่เจ่ เมเพรอเฮ๊อ เหย่ซี ซิปล่อ ขว่าคยา, เหย่ซี แม๊เถอะ แจ่ เร๊อ อาเป๊เส่ โต่, เหย่ซี เตเนโปลเบ๊ แลแค เร๊อ อาซิปล่อ โต่.” j อา เฮ๊ ฮู๊เนอ. 41เพรโพร อิสยาห์ เฮ๊ฮู๊เออ เมเตเฮ๊เรอ อา แม๊เถอะน๊อ แบ่เจ่ เหย่ซู่ อา เตอเรอดุเตอเรอทู ตื๊อเรอ อา เฮ๊ ลูหรี่ลูแก ฮู๊เออ แพ๊. 42หม่าแน๊เรอ เบ๊อะเนอเค แกแย หยื่อเอ่ โอ่โหร่โอเอ๊ แบ่เจ่ เหย่ซู่. แกแยยิวพู๊ กู่กล๊อดุ กู๊ฉู่ทู อาเกล เต๊เห่เนอ อา หยื่อเอ่เกอ เจ๊อ ลู เจ๊อ. หม่าแน๊เรอ ซิอิเช เร๊อ ฟาริสี เต๊เห่ เหว่เถ่แก เหย่ซี เด๊อ เตจ๊อเบ โฮกลอ เนอ, เหย่ซี เฮ๊โฉ่เถ่ โลบื่อ เป่ อู เร๊อ อาเตหยื่อ โต่. 43เมเตเฮ๊เรอ, เหย่ซี ซิหยื่อ นอถู่เซ๊หนิ แลแค อาเหน่ เร๊อ แกแยเห่ขุพู๊ เนอ อาดุ เล๊อ เจ๊อ เร๊อ อา ซิหยื่อ นอถู่เซ๊หนิ อาเหน่ เร๊อ จอแปแหร่ เจ๊อ.
แบ่เจ่ เหย่ซู่ อาลาอาโหง่ เก่ เมจากาคยา อู ปา
44เออโตโพ๊เรอ แบ่เจ่ เหย่ซู่ เอ๊โทแถ่ เน๊อ, “เบ๊อะแกแย เตเพรเพร หยื่อเอ่ แว เบ๊อะเนอ, อา หยื่อเอ่ ตื๊อ แว หม่าโต่, อา หยื่อเอ่ โต่เกอเฮ๊อ เพร เด๊อ อา นอแฮแล แวเออ เตเพร เฮ๊อ. 45แกแย เด๊อ อา แม๊เถอะ แว เนอ, อา แม๊เถอะ เกอเฮ๊อ เพร เด๊อ อา นอแล แวเออ เตเพร เฮ๊อ. 46แซ่ฮู๊ ล๋อ แกแย เด๊อ อา หยื่อเอ่ แว เต๊เห่ เก่ โอ่ปา แต่ เด๊อ เตคี๊เกล แต่เหม่ เนอ แว แฮ ลีเตเคแถ่ ฮู๊ เตลี เตเม เด๊อ เห่ขุ เออเนอเฮ๊อ. 47“แกแย เตเพรเพร เก่ หนิโฮ แวลาแวโหง่ เร๊อ อา เก่ หยื่อเอ่โต่ เฮ๊เนอ, แว เมจากาคยา ลู โต่. เมเตเฮ๊เนอ, แว แฮแล เด๊อ เห่ขุ เออเนอหมา, แว เก่ แฮ เมจากาคยา อู อาเงเนอ หม่าโต่, แว เก่ แฮ เมแลเปล๊กา อู อาเงแพ๊. 48แกแย เด๊อ อา เคร๊ฉื่อ แว เร๊อ อา พย๊าฉื่อ เกอ แวลาแวโหง่ โต่ เต๊เห่เนอ, เพร เมจากาคยา เหย่ซี อา โอ่ เตเพร. ม๊อเนอม๊อเซ เด๊ออาโน่เล๊อ เบ๊อะเนอปา เนอ, โหง่ เด๊อ แว เฮ๊เบ่ เออเต๊เห่ เก่ ทวา เหย่ซี เพรเมจากาคยา เต ปา. 49เมเตเฮ๊เนอ, แว เฮ๊เบ่ เออเนอ, แว เฮ๊เบ่ เร๊อ แว เตอเรอฉว่าชอ เร๊อดื่อ เนอ หม่าโต่. ตากยา เนอ แว เฮ๊เบ่ ฮู๊ แวเพ เด๊อ อา นอแฮ แวเออ เตเพร นอเฮ๊เบ่ แว เนอแพ๊. 50แว ซิเง เร๊อ แวเพ อาโหง่เฮ๊แก เออเนอ อา ซูจว๊า อู เด๊อ เตเซอเพร ตูจูเพร. ฮู๊เนอเรอ แว เฮ๊ ฮู๊ แวเพ นอเฮ๊ แว เนอเต๊เห่ แพ๊.”
Copyright information for
EkySCThai