John 16

1“แซ่ฮู๊ ซี เก่ วี๊แก แต่ ซี เตหยื่อ เตแหน่ แต่เหม่ เนอ, แว แด๊โฉ่โล ลอเป่ โทเฮ๊อ ซี เตเออเต๊เห่ เฮ๊อ. 2อู เก่ เหว่เถ่ แก ซี เด๊อ เตจ๊อเบโฮ เต๊เห่ อากลอ ปา. แกแย เด๊อ อา เมเซอ ซี เต๊เห่เนอ อา เตเน เกอเร๊อ อาเหน่ เน๊อ, ‘เป เม เฮ๊อ จอแปแหร่ อาเตเม เฮ๊อ,’ เบ๊อะฮู๊เออเนอ, อา เก่ แฮโต่ ปา. 3อา จว๊า เมโต่ แลแค ฮู๊เออ เมเตเฮ๊เรอ เหย่ซี ซิเงน๊อ เพ โตโพ๋ โต่, โทเรอ อา ซิเงน๊อ แว โตโพ๋ โต่. 4ช๋า เบ๊อะแฮโต่เฮ๊อ ปา เบ๊อะเนอ, ซี เก่ ข่าเบ่ เตจาเตจือ เต๊เห่ ปา. แซ่ฮู๊ ซี เก่ ซิเงแถ่เบ่ โต่ เต เด๊อ แว เด๊อะ รอ หนื่ออื่อ ซี เตเออเต๊เห่ อาเงเนอเนอ, แว แด๊โฉ่หนื่ออื่อ เป่ เฮ๊อ ซี กู๊แหน่เออ เฮ๊อ. เด๊อ กูลู่ เค เนอหม่า แว ย๋อ โอ่เกอ เร๊อ ซี อาขว่าอาคยา, แว เฮ๊โฉ่โลน๊อ เป่แล ซี โต่.”

แหย่โยบูโพ๊แบ่เจ่ อาเตเม

5“กู๊แหน่เนอ, แว เก่ กาเฮ๊อ เด๊อ เพร เด๊อะ อา นอแฮ แว เออเตเพร อา โอ่ เฮ๊อ. ‘เน เตเร จว๊าเบ๊อะโต๊โผ่เต ปาเนอ,’ ซี แด๊เฮอ แว เตเพร่ว โต่. 6แว เฮ๊โล เป่ ซี ฮู๊เออ เร๊อ ซี ซิเปลซิหย่อ ล๋อปลี เจ๊อ. 7เก่ เฮ๊ ลอล๋อ โหง่ หม่า, แว จว๊าแก ซีเหล่ หม่า อาแร๊ เล๊อ เจ๊อ เด๊อ ซีเงเจ๊อ, เมเตเฮ๊เรอ แว เก่ จว๊า โต่ เฮ๊เนอ, เพรเมจว่า หม่าเฮ๊อ แหย่โยบูโพ๊แบ่เจ่ เออเตเพร แฮ เด๊อ ซีโอ่ โต่. หม่าแน๊เรอ แว เก่ จว๊า เฮ๊เนอ, แว เก่ นอแฮแล ลาติ ลู เด๊อ ซีโอ่ ปา. 8เบ๊อะแหย่โยบูโพ๊แบ่เจ่ แฮโต่เฮ๊อ ปา เบ๊อะเนอ, อา เก่ เด๊อซิเง เป่ แกแย เห่ขุพู๊ เต๊เห่ เร๊อ เหย่ซี เม เตซื๊อ ปา, โทเรอ อา เก่ เด๊อซิเง เป่ โป่ เหย่ซี เร๊อ เตจ๊อเตเต อาแกล๊ ปา. โท๊โต่, อา เก่ เด๊อซิเง เป่เกอโป่ เหย่ซี เร๊อ จอแปแหร่ เก่ เมจากาคยา เหย่ซี ปา. 9เด๊อ เหย่ซี หยื่อเอ่ แว โต่ อาขว่าอาคยา, อา เด๊อซิเงเฮ๊อ เหย่ซี เร๊อ เหย่ซี เตซื๊อ โอ่ เฮ๊อ. 10เมเตเฮ๊เรอ, แว เก่ กา เด๊อ เพ อา โอ่ ปา เร๊อ ซี แม๊เถอะ ปา แว โต่ อาขว่าอาคยา, แหย่โยบูโพ๊แบ่เจ่ เก่ เด๊อซิเงโปล เป่ เหย่ซี เร๊อ เตจ๊อเตเต อาแกล๊อาโกล ปา. 11จอแปแหร่ เมจากกาคยาเฮ๊อ โลเน๊มู๊แหม่รีแจ่ กู่กล๊อ ซาตาน เด๊อ อา เป๊อ เห่ขุ เออโตโด เฮ๊อ อาขว่าอาคยา, อา เด๊อ ซิเงโปล เป่เฮ๊อ แกแย เห่ขุพู๊ เต๊เห่ เร๊อ จอแปแหร่ เก่ เมจากาคยา เหย่ซี ปา เฮ๊อ.

12“เต เด๊อ แว ซิหยื่อ เฮ๊ เป่ โป่ ซี เต๊เห่เนอ อา โอ่ เอ๊ลูปา, หม่าแน๊เรอ ซี ซิเงโปลเบ๊ ลอโต่. 13เบ๊อะแหย่โยบูโพ๊แบ่เจ่ เด๊อ อา เด๊อะโล เตหมะเตจ๊อเออ แฮปา เบ๊อะเนอ, อา เก่ ยูแกล๊ยูโกล เป่ ซี เน๊อ ล๋อ เตหมะเตจ๊อ เนอเต๊เห่ ปา. อา เก่ แด๊โฉ่โล เป่ ซี เร๊อ อา เต เตเน เร๊อดื่อเนอ หม่าโต่. อา เก่ แด๊โฉ่โล เป่ ซี ฮู๊ อา หนิโฮ แฮหนิ เด๊อ จอแปแหร่ อา โอ่ เนอเต๊เห่ ปา. อา เก่ เด๊อะโล เป่ ซี เร๊อ เต เด๊อ อา ทวาแถ่ ล๋ายโต่ เนอเต๊เห่ ปา. 14เด๊อ อา แฮ แด๊โฉ่โล เป่ ซี เร๊อ ล๋อ อา หนิโฮ เต เด๊อ แวโอ่ เนอเต๊เห่ อาขว่าอาคยา, อา เก่ เด๊อะ โล แว เตอเรอดุ เตอเรอทู ปา. 15ล๋อ เต เด๊อ อา โอ่ เร๊อ เพ เต๊เห่ เนอหม่า แวเต ล๋อ ปลี เฮ๊อ. ตื๊อเรอ แว เฮ๊ เป่ ซี เน๊อ แหย่โยบูโพ๊แบ่เจ่ เก่ แฮ แด๊โฉ่โล เป่ ซี ล๋อ อา หนิโฮ เต เด๊อ แวโอ่ เนอเต๊เห่ ปา, ฮู๊เนอ เฮ๊อเนอ.”

เตซิเปล ทวาแถ่ เตซิครือ

16“งยาแต๋โต่ ปาหม่า ซี แม๊เถอะน๊อ ปา แว โต่ เฮ๊อ, หม่าแน๊เรอ งยาแต๋โต่ คยาแซ๊ ปาหม่า ซี แม๊เถอะ คยาแซ๊ แว ปา.”

17อา โคเจ่ เต๊เห่เห่ เนอ, อา แด๊เฮอ เกอเร๊อ ลู เตเพร เร๊อ เตเพร เร๊อ อา เฮ๊ แลแค เน๊อ, “อา จว๊า เฮ๊ โต่ เน๊อ, ‘งยาแต๋โต่ ปาหม่า ซี แม๊เถอะน๊อ ปา แว โต่ เฮ๊อ, หม่าแน๊เรอ งยาแต๋โต่ คยาแซ๊ ปาหม่า ซี แม๊เถอะ คยาแซ๊ แว ปา’ อา เฮ๊ ฮู๊เออเนอหม่า อา ซิเฮ๊ อาโหง่แลช๊า ฮู๊เต?” โทเรอ เหย่ซี เฮ๊ แลแค เน๊อ, “‘เมเตเฮ๊เรอ แว เตเร จว๊า เด๊อ เพ อา โอ่ เฮ๊อ,’ อา เฮ๊ ฮู๊เนอหม่า อา ซิหยื่อ เฮ๊ อาโหง่แลช๊า ฮู๊เตเต๋?” 18เร๊อ เหย่ซี เร๊อ เหย่ซี แด๊เฮอ ตื๊อดื่อ เกอเร๊อ ปาลู เน๊อ, “‘งยาแต๋โต่ ปาหม่า,’ อา เฮ๊ เออตือมือ เนอหม่า อา ซิเฮ๊ อิเต? อา ซิหยื่อ เฮ๊ หม่าเตเนอ, เป ซิเงโปล ทว๊าปาโต่ เฮ๊อ.”

19แบ่เจ่ เหย่ซู่ ซิเง เด๊อ เหย่ซี ซิหยื่อ แด๊เฮอ ลู เตหรี่เตแก เออ อาขว่าอาคยา, เร๊อ อา เฮ๊ เหย่ซี เน๊อ, “แว เฮ๊ เป่ ซี เน๊อ, ‘งยาแต๋โต่ ปาหม่า ซี แม๊เถอะน๊อ ปา แว โต่ เฮ๊อ, หม่าแน๊เรอ งยาแต๋โต่ คยาแซ๊ ปาหม่า ซี แม๊เถอะ คยาแซ๊ แว ปา,’ เออเนอ แว ซิ เฮ๊ อาโหง่แลช๊า อิเตเนอ ซี แด๊เฮอ เกอเร๊อ แคลู เตเพร เร๊อ เตเพร แวเฮ๊โต่? 20แว เฮ๊จ๊อจ๊อ ซี, เบ๊อะแกแย เห่ขุพู๊ เต๊เห่ เก่ ซิครือซิลอ ตือปือลือชือ เจ๊อ ปา เบ๊อะเนอ, ซี เก๊โหง่เก๊เห่ แลแค ปา. เด๊อ แว ข่าเบ่ เตจาเตจือ อาขว่าอาคยา, ซี เก่ ซิเปลซิหย่อ แหน่เจ๊อ ปา, หม่าแน๊เรอ ซี เต ซิเปล ซิหย่อ เออเนอ อา เก่ ทวาแถ่ เต๊เปล่โค๊ เป่ลาติ ซี เร๊อ ซี เต ซิกอ ล๊อ แกแน ปา. 21อาแซ่เน๊อ เพรเหมาะ พู๊โอ่ ฮ๊อเช เนอ ปา. เบ๊อะอา ฮ๊อเช เบ๊อะเนอ, อา ข่าเบ่ เตโซพ๊าโซแร ตื๊อดื่อเรอ เบ๊อะอาพู๊โอ่เฮ๊อ เบ๊อะเนอ, อา โชตาปาแก อา เตโซพ๊าโซแร เต๊เห่, เมเตเฮ๊เรอ อาพู๊โอ่หนิเฮ๊อ เป๊เจ่พู๊ เตเพร เด๊อ เห่ขุเออ อาขว่าอาคยา, อา ซิครือซิลอ แฮ ปา. 22เต เก่ ทวาแถ่ แซ่เกอดื่อ เน๊อ ซี ฮู๊เออเนอ ปา. กู๊แหน่เร๊อ ซี เก่ ซิเปลซิหย่อ ปา, หม่าแน๊เรอ แว เก่ แม๊เถอะ คยาแซ๊ ซี ปา เร๊อ ซี เก่ ซิครือซิลอ แหน่เจ๊อ ปา. โท๊โต่ อู พย๊าแก แจ่ ปา เจ๊อ ซี เตซิครือซิลอ เตเพร่ว เจ๊อโต่ ปา. 23เบ๊อะเนอเตอเนอ ปาเนอ, ซี แด๊เฮอ ปา เจ๊อ แว เตอเจ๋อ โต่ เฮ๊อ. แว เฮ๊จ๊อจ๊อ ซี, ซี เก่ กุย แวเพ อิเตเต๋ เบ่เบ่, ซี เก่ กุย เร๊อ แวมุย เฮ๊เนอ, แวเพ เก่ เด๊อ ซี ปา. 24โต่กู๊แหน่ เออเนอ, ซี กุย เร๊อ แวมุย เตอเจ๋อ โต่. กุย แลแค, ซี เก่ พย๊าหนิ ปา. เร๊อ ซี เก่ พย๊าหนิ เล๊อบา เจ๊อ เตซิกอล๊อ แกแนปา.

เตเมเป่ เห่ขุ

25“แว เฮ๊เบ่ เป่ ซี เตเออเต๊เห่ เร๊อ โหง่ค๊าโข่ เต๊เห่. หม่าแน๊เรอ เบ๊อะเด๊อ แว โหล่ เฮ๊เบ่ ปา เร๊อ โหง่ค๊าโข่ โต่ เนอ, อา เก่ แฮโต่ ปา. แว เก่ เฮ๊โล๊ลี เป่ลอ ซี เร๊อ แวเพ อาหรี่อาแก ปา. 26เบ๊อะเนอเตอเนอ ปาเนอ, ซี กุยจ๊อเบแถ่ แลแค เร๊อ แวมุย ปา เร๊อ แว โหล่กุย เป่ ปา เด๊อ ซิเง โต่. 27เมเตเฮ๊เรอ แวเพ โมหนิเร๊อ ซี เร๊อ อาเหน่ เร๊อดื่อเจ๊อ. เด๊อ ซี โมหนิเร๊อ เฮ๊อ แว, ซี หยื่อเอ่หนิ เฮ๊อ แว เร๊อ แว โอ่ เด๊อ เพ อา โอ่ แฮ อาขว่าอาคยา, อา โมหนิเร๊อ เฮ๊อ ซี เฮ๊อ. 28แว โอ่ เด๊อ เพโอ่ แฮ เร๊อ แว แฮแล เด๊อ เห่ขุเออ. กู๊แหน่เร๊อ แว เก่ เถ่กาแก เด๊อ เห่ขุเออ เร๊อ แว เก่ กาคยา คยาแซ๊ เด๊อ แวเพ อา โอ่.”

29เออโตโพ๊เรอ อา โคเจ่ เต๊เห่ เฮ๊ ลู เน๊อ, “กู๊แหน่ เร๊อ เน เฮ๊เบ่ ปา เร๊อ โหง่ค๊าโข่ โต่ เร๊อ อา โปลแร๊ลา. 30เป แด๊เฮอ แต่ล๋าย เน เตอเจ๋อ โต่ ตื๊อดื่อเรอ เน ซิเง ลอเหร่อดื่อเฮ๊อ เต เด๊อ เป เตเร แด๊เฮอ เน เนอเต๊เห่ เฮ๊อ. ฮู๊เนอเรอ กู๊แหน่เออ เป ซิเง เร๊อ เน ซิเง ลอ เตปว๋าเต๊อเจ่อ. เด๊อ เน ซิเง ฮู๊เออ อาขว่าอาคยา, เป หยื่อเอ่ เร๊อ เน โอ่ เด๊อ จอแปแหร่ อา โอ่ แฮแล หม่าแหน่ เฮ๊อ.”

31เร๊อ แบ่เจ่ เหย่ซู่ แด๊เฮอ เหย่ซี เน๊อ, “กู๊แหน่เร๊อ ซี หยื่อเอ่ หม่าแหน่ เฮ๊อ เน๋อ? 32หม่าแน๊เรอ เบ๊อะเด๊อ ซี เก่ แกล่โพร๊ แกล่แพร ลอ ปา, เร๊อ ซี เก่ กาเถ่ แลแค เด๊อ ซีหี่ เตเพร เร๊อ เตเพร เนอ, อา เก่ แฮโต่ ปา. เฮ๊ตาเต้า หม่า อา แฮโต่ เจ๊อเฮ๊อ. ซี ปว๋า เตเพร เก่ แด่โอ่แก ตื๊อดื่อ แว ปา. หม่าแน๊เรอ แว โอ่ตื๊อดื่อ หม่าโต่, เมเตเฮ๊เรอ แวเพ โอ่เกอ เร๊อ แว.

33“แซ่ฮู๊ ซี เก่ พย๊าหนิ เตซิปล่อ ตู๊จู่เตอเจ๊อ อาเงเนอ, แว เฮ๊ เป่ โท ลอ เฮ๊อ ซี ล๋อ เออเต๊เห่ เฮ๊อ. เด๊อ ซี ทวาแถ่เฮ๊อ เตเตอเจ๊ออู แพ๊ เร๊อ แว อาขว่าอาคยา, ซี พย๊าหนิเฮ๊อ ซิปล่อ อา เตตู๊จุเตอเจ๊อ เฮ๊อ. เด๊อ เห่ขุ เออเนอ, ซี เก่ แม๊เถอะเบ่ เร๊อ เตแป่เตเช เตจาเตจือ ปา, หม่าแน๊เรอ แด่ฉว่าแด่ชอ แลแค ซี ซิปล่อ นี๋. แว เมเป่ โทเฮ๊อ เห่ขุ อา เตอเรอฉว่าชอ เออเต๊เห่ เฮ๊อ.”