John 19

1ฮู๊เนอเรอ คุ๊ยปีลาต เอ๊ แบ่เจ่ เหย่ซู่ เร๊อ อา นอมือ อู เร๊อ สู่เปลอ อิปลี๊. 2เกลอฮู๊ เต๊เห่ อี๊ขุ ตาวา ส่อแช๊เหมาะ แซ่เน๊อ กู๊โก่ เนอเรอ อา โก่แถ่ เป่ เร๊อ เหย่ซู่. เร๊อ อา แซ๊แถ่ เป่ ลู จาจวา เต๊เผ่ล๊อซอ เด๊อ อาแซ่เน๊อ คุ๊ย เหล่แซ๊ เออตือปือ โทเรอ, 3อา แฮโต ลู เร๊อ อา แฮเฮ๊ กาคยาคยา แฮเงเง ลู เน๊อ, “เก๋อ ยิวอาคุ๊ยดุ, โอ่เซอเพร ม๊อเนอ ทูดื่อ นี๋!” อา เฮ๊ แลหวี่แลวอ กู๊นีกู๊โหน่ โท ลู ฮู๊เนอ เร๊อ เหย่ซี แปล่ ลู กู๊หลิเล

4คุ๊ยปีลาต แฮเถ่ คยาแซ๊ เร๊อ อา เฮ๊ แกแยยิวพู๊ เต๊เห่ เน๊อ, “แซ่ฮู๊ ซี เก่ ซิเง แลแค เร๊อ แว เจแม๊ อา เร๊อ แว แม๊เถอะ อา เม เตซื๊อ เตอเจ๋อ โต่ อาเงเนอ, แว เก่ เอ๊เถ่โล เป่ คยาแซ๊ ซี เบ๊อะเออ.” 5แบ่เจ่ เหย่ซู่ โก่เถ่หนิ กู๊โก่ ส่อแซ๊ เร๊อ แซ๊เถ่หนิ จาจวา เต๊เผ่ล๊อซอ ตือปือ เร๊อ เถ่โต เหย่ซี. เร๊อ คุ๊ยปีลาต เฮ๊ เหย่ซี เน๊อ, “เออเล๊, อา หม่า แกแย เนอเตเพร เฮ๊อ.” อา เฮ๊ เหย่ซี ฮู๊เนอ.

6เพรหลู่แต ทวาดุทวาเต เต๊เห่ เร๊อ เกลอฮู๊ เด๊อ อา โอ่ป่อ เตหลู่เเตโฮ เต๊เห่ แม๊เถอะ ลูลู เน๊อ, “มือเซอแถ่แก อา เด๊อ อี๊ถื่อดีเต่ลู เนอ, มือเซอแถ่แก อา เด๊อ อี๊ถื่อดีเต่ลู เนอ,” อา เอ๊โทแถ่ แลแค ฮู๊เนอ.

หม่าแน๊เรอ คุ๊ยปีลาต เฮ๊ เหย่ซี เน๊อ, “เอ๊จว๊า เกอเร๊อดื่อ แลแค เร๊อ มือเซอแถ่ เกอเร๊อดื่อ แลแค เด๊อ อี๊ถื่อดีเต่ลู เนอ. เด๊อ แวเง เร๊อ, เตซื๊อ เด๊อ แว เก่ เมจากาคยา อา เนอ, แว เจแม๊ อา เร๊อ แว แม๊เถอะ เตอเจ๋อ โต่,” อา เฮ๊ เหย่ซี ฮู๊เนอ.

7แกแยยิวพู๊ เต๊เห่ เฮ๊ ตื๊อดื่อ แลแค เน๊อ, “เป เตซว๊าเตแส่โอ่ เร๊อ อา เบ่เซอ แพ๊, เมเตเฮ๊เรอ อา ดี๊กว๊า แล เกอเร๊อ อาเหน่ เร๊อ แว หม่า จอแปแหร่ อาพู๊คู, อา เฮ๊ เกอเร๊อ อาเหน่ ฮู๊เนอ.” อา เฮ๊แถ่ ตื้อดื่อ แลแค ฮู๊เนอ.

8คุ๊ยปีลาต หนิโฮ โป่ โหง่ฮู๊เออ เร๊อ อา ลื๋อ ซิอิเช แฮฉว่าฉว่า 9อา กา โกโน คยาแซ๊ เด๊อ อาโฮกู เร๊อ อา โน แด๊เฮอ เหย่ซู่ เน๊อ, “เน โอ่เบ๊อะแฮ?” หม่าแน๊เรอ เหย่ซู่ เฮ๊กาคยาฉื่อ ลู เตอเจ๋อ โต่. 10เร๊อ อา เฮ๊ เหย่ซู่ เน๊อ, “เน เฮ๊กาคยาฉื่อ แว เตอเจ๋อ โต่ เมเต? แว พย๊าหนิ เตเตอเรอฉว่าชอ เด๊อ แว เก่ ปลวาแก เน หม่า อา หนิหนิ, หม่าโต่เรอ แว เก่ มือเซอแถ่แก เน เด๊อ อี๊ถื่อดีเต่ลู เนอหม่า อา หนิหนิ แพ๊. เนอหม่า เน ซิเง โต่ แอ? อา เฮ๊ ลู ฮู๊เนอ.”

11เร๊อ แบ่เจ่ เหย่ซู่ เฮ๊ฉื่อ ลู เน๊อ, “จอแปแหร่ เก่ เด๊อะตา เน เตอเรอฉว่าชอ เออ โต่เนอ, เน พย๊าหนิ แจ่ โต่. ฮู๊เนอเรอ แกแย เด๊อ อา เด๊อะตาแก แว เด๊อ เน กู๊ยากู เออเต๊เห่เนอ, อาเตซื๊อ ดุเล๊อ ปา เจ๊อ เร๊อ เน.”

12เป๊อแถ่ เบ๊อะอา เฮ๊โท ฮู๊เนอ เนอ, คุ๊ยปีลาต แอ๊จื๊อ แม๊ปู แกล๊ เด๊อ อา เก่ ปลวาเถ่แก เหย่ซู่. หม่าแน๊เรอ แกแยยิวพู๊ เต๊เห่ เอ๊โท เป่แฮ ตือดื๊อโป่ เน๊อ, “เน เก่ ปลวาเถ่แก แกแย เนอเตเพร เฮ๊หม่า, เน หม่า จ๊อแผ่ ซีซาร์ อาโคแบ๊ซว๊า หม่าโต่. แกแย เตเพรเพร เด๊อ อา ดี๊กว๊า แล เกอเร๊อ อาเหน่ เร๊อ จ๊อแผ่ เนอ, หม่าเฮ๊อ แกแย เด๊อ อา เท๊ฉื่อ คุ๊ยซีซาร์ เฮ๊อ.”

13เบ๊อะคุ๊ยปีลาต หนิโฮ เหย่ซี เฮ๊ฮู๊เออ เบ๊อะเนอ, อา เอ๊เถ่ เหย่ซู่ เร๊อ อา โอ่แนตา เด๊อ เตเมจากาคยา เหล่โอ่แน เหล่โอ่ เด๊อ อู เอ๊ เน๊อ, อูแบ๊ส่า แกแย เหล่จว๊า เร๊อ หล่อ ฮีบรูโหง่ หม่า อา เฮ๊ เน๊อ, กับบาธา. 14เบ๊อะเนอ เตอ เนอ หม่า อาโต เบ๊อะเหมาะโถ่เค อู ตี๊หรี่ หนื่ออื่อ ป่วยเตจว๊า ตา ลว๊า อาเง เนอเตอเนอ.

เร๊อ คุ๊ยปีลาต เฮ๊ แกแยยิวพู๊ เต๊เห่ เน๊อ, “เออเล๊ ซีคุ๊ย,” อา เฮ๊ เหย่ซี ฮู๊เนอ.

15หม่าแน๊เรอ เหย่ซี เอ๊โทแถ่ แลแค เน๊อ, “เมเซอแก อา, มือเซอแถ่แก ลู เด๊อ อี๊ถื่อดีเต่ลู เนอ.”

เร๊อ คุ๊ยปีลาต แด๊เฮอ เหย่ซี เน๊อ, “ซี ซิหยื่อ นอ มือเซอแถ่แก แว เร๊อ ซีคุ๊ยเออ เด๊อ อี๊ถื่อดีเต่ลู แอ?”

เร๊อ เพรหลู่แต ทวาดุทวาเต เต๊เห่ เฮ๊ เน๊อ, “เป คุ๊ย โอ่แพ๊ตื๊อ คุ๊ยซีซาร์ เต เพร่ว แพ๊. เปคุ๊ย เด๊อ อาโร หม่า อา โอ่ เตเพร่ว โต่,” เหย่ซี เฮ๊ แลแค ฮู๊เนอ.

16เด๊อคยาตื๊อดื่อ เร๊อ คุ๊ยปีลาต เด๊อะตาแก เหย่ซู่ เด๊อ เหย่ซี อากู๊ยากู เด๊อ เหย่ซี เก่ มือเซอแถ่แก ลู เด๊อ อี๊ถื่อดีเต่ลู.

อู มือเซอแถ่ แบ่เจ่ เหย่ซู่ เด๊อ อี๊ถื่อดีเต่ลู

(มัทธิว ๒๗:๓๒-๔๔, มาระโก ๑๕:๒๑-๓๒, ลูกา ๒๓:๒๖-๔๓)

ฮู๊เนอเรอ เกลอฮู๊ เต๊เห่ ปื่อจว๊าแก เหย่ซู่. 17เร๊อ อา แย๊จว๊า เกอเร๊อดื่อ อา อี๊ถื่อดีเต่ เร๊อ อา เถ่จว๊า เด๊อ กู่กล๊อครุ๊ย อาเหล่โอ่. เหล่โอ่ เออโต๊โผ่ หม่า ฮีบรูโหง่ เฮ๊ เน๊อ, “กลโกธา.” 18อู มือเซอแถ่แก ลู เด๊อ อี๊ถื่อดีเต่ลู เบ๊อะเนอ. อู มือเซอแถ่ เต่อ ลู เร๊อ แกแย ซิเนอ, ตากยา เร๊อ เตเพรเพร เหย่ซู่ เร๊อ อา โอ่ เด๊อ อากล๊าเมกู.

19คุ๊ยปีลาต นอรา อู เตม๊าเตแด อาลีปล่อ เร๊อ อา นอมือเซอแถ่ อู เด๊อ อี๊ถื่อดีเต่ลู. เหย่ซี รา ราลีปล่อเออ เน๊อ, “แกแยยิวพู๊ เต๊เห่ อาคุ๊ย, วีนาซาเร็ธพู๊ เหย่ซู่,” ฮู๊เนอ. 20อู มือเซอแถ่ เหย่ซู่ เออเนอ, อา โอ่ผื่อ แพ๊ เร๊อ วี อาขว่าอาคยา, แกแยยิวพู๊ เต๊เห่ แด๊แม๊ โร๊ลู ลีเออ. เร๊อ ลีเออเนอ อู ราโอ่ ลอปลี เร๊อ ฮีบรูโหง่ เด๊อ แกแยยิวพู๊ เฮ๊เบ่ เกอเร๊อ เออเนอ, เร๊อ ลาตินโหง่ เร๊อ กรีกพู๊ อาโหง่. 21เพรหลู่แต กู่กล๊อ เต๊เห่ เฮ๊ คุ๊ยปีลาต เน๊อ, “‘แกแยยิวพู๊ เต๊เห่ อาคุ๊ย,’ ราฮู๊เนอ แต่เหม่. ราเต๊เปล่ คยาแซ๊ เร๊อ แกแย เออเตเพร หม่า อา แด๊กว๊าแล เกอเร๊อ อาเหน่ เร๊อ แกแยยิวพู๊ เต๊เห่ อาคุ๊ย,” รา เต๊เปล่ คยา ฮู๊เนอ.

22หม่าแน๊เรอ คุ๊ยปีลาต เฮ๊ ลู เน๊อ, “เต เด๊อ แว ราโทเฮ๊อ เนอหม่า, อา โทเฮ๊อ.”

23เบ๊อะเกลอฮู๊ เต๊เห่ มือเซอ แถ่ โทเฮ๊อ ลู เด๊อ อี๊ถื่อลู เบ๊อะเนอ, เกลอฮู๊ ซิลุย เออเนอ อา พย๊า แบ่เจ่ เหย่ซู่ เห่อจ่า เต๊เห่ เนอ, อา เบ เกอเร๊อ ลู เตเพร ตือปือ. เร๊อ เหย่ซี พย๊า โป่ ลู จาจวาทู เด๊อ อู บ๊อจิจือ ตาทูปลื๊อ แพ๊ ลู เร๊อ อู เหล่อิเช๊ทือ ลู โอ่โต่ เออตือปือ.

24เหย่ซี เตเพร เร๊อ เตเพร เฮ๊ เกอเร๊อลู เน๊อ, “เป ท๊อเย อา โต่ แฮ๋, อูเป โต พย๊าหนิเป ปาเนอ, เปบ๊อเตแบบุ๊ยโป๊!” อา เฮ๊ เกอเร๊อ ลู ฮู๊เนอ. ^a

แซ่ฮู๊ ลีเทส่อพ๊า เก่ อาเล๊อบาแถ่ เร๊อ เตทวา อาเหน่ ฮู๊เออ แพ๊. ลีเทส่อพ๊า เฮ๊ เนอ,
“เหย่ซี เบ พย๊า เกอเร๊อ แลแค แวจา เต๊เห่ เฮ๊อ. แซ่ฮู๊ เหย่ซี เก่ พย๊าหนิ แวจา เร๊อ อา บ๊อแลแค เตแบบุ๊ย เฮ๊อ.” ^b

เร๊อ เกลอฮู๊ เออเต๊เห่เนอ, อา เม แลแค ฮู๊เนอ เฮ๊อ.

25เบ๊อะแบ่เจ่ เหย่ซู่ อา อี๊ถื่อดีเต่ อาแก่ช๊าเนอ, แบ่เจ่ อาโหมะ อาโป่เพรเหมาะ, เร๊อ โคลปัส อาเม โหมะมารีย์ เร๊อ แกแย มักดาลา ดอกูโหมะ เหมาะมารีย์ ก๊อถ่อ โอ่ แลแค เบ๊อะเนอ. 26เบ๊อะแบ่เจ่ เหย่ซู่ แม๊เถอะ อาโหมะ เร๊อ อา โคเจ่ เด๊อ อา โม เกอเร๊อ ลู เออเตเพร ก๊อถ่อ โอ่ผื่อ เร๊อ ลู เนอ, อา เฮ๊เบ่ จว๊า อาโหมะ เน๊อ, “โหมะ กู๊แหน่เออ แกแย เออเตเพร หม่า อา ทวาเฮ๊อ เนพู๊ เฮ๊อ,” อา เฮ๊ จว๊า อาโหมะ ฮู๊เนอ. 27โทเรอ อา เฮ๊ เกอลาติ อา โคเจ่ เนอเตเพร เน๊อ, “กู๊แหน่เออ แวโหมะเน๊อ อา ทวาเฮ๊อ. เนโหมะ เฮ๊อ” เป๊อแถ่ เบ๊อะเนอ เร๊อ อา โคเจ่ เออเตเพร เอ๊กาโอ่ แบ่เจ่ อาโหมะเออ เด๊อ อาหี่.

แบ่เจ่ เหย่ซู่ เซอ

(มัทธิว ๒๗:๔๕-๕๖, มาระโก ๑๕:๓๓-๔๑, ลูกา ๒๓:๔๔-๔๙)

28อา เฮ๊โท ฮู๊เนอ เร๊อ แบ่เจ่ เหย่ซู่ ซิเง เร๊อ อา เมโทลอเฮ๊อ เตปว๋า เต๊อ เจ่อ เฮ๊อ. เร๊อ แซ่ฮู๊ ลีเทส่อพ๊า เก่ เล๊อบาแถ่ อาเงเนอ, แบ่เจ่ เหย่ซู่ เฮ๊ เน๊อ, “แว ซิโอเทอ” อา เฮ๊ ฮู๊เนอ. ^c 29เบ๊อะเนอ โต๊โผ่เนอ, เทอแยฉ่า โอ่ โตโซ. เร๊อ เหย่ซี แกล่จว๊าพย๊า เตเต๊อเจ่อ เด๊อ อาแซ่เน๊อ แตแพ๊ เร๊อ อา จว๊าเจโน เด๊อ เทอแยฉ่า โซกู เร๊อ อา จอกลอหม่า เด๊อ ส่อแพ เด๊อ อู เอ๊ เร๊อ หุสบ แพ เออ อาลู เร๊อ อา โต๊โหล่แถ่โต เด๊อ แบ่เจ่ อา กู๊อู่ลู. 30เบ๊อะแบ่เจ่ เหย่ซู่ โปแม๊ เออ เบ๊อะเนอ, อา เฮ๊ เน๊อ, “อา โทเฮ๊อ” เร๊อ อา กู่กล๊อ ตางอแก, โทเรอ อา เด๊อะแลแก อาซิปล่อ เซอเพร เด๊อ จอแปแหร่ อา กู๊ยากู.

อู ชือ ลูรอ เร๊อ แตแบ

31เบ๊อะเนอ เตอเนอเนอ อาโต เร๊อ ม๊อเนอ เด๊อ อู ตี๊หรี่แตแร หนื่ออื่อ ช๊าป่าโร แกแยยิวพู๊ อา ม๊อเนอโด่ เนอเตอเนอ อาเง. ม๊อเนอโด่ เออเนอหมา หม่าดื่อ ม๊อเนอโด่ เด๊อ อา ตาโต โค๊ดื่อ เบ๊อะป่วย เด๊อ อู เอ๊ เร๊อ เตจว๊าตาลว๊าป่วย เบ๊อะเนอ. ฮู๊เนอเรอ แกแยยิวพู๊ กู่กล๊อดุ กู๊ฉู่ทู เต๊เห่เนอ, เบ๊อะม๊อเนอโด่ อาเคเออ, เหย่ซี ซิหยื่อ แด่โอ่ โล เออเต๊เห่เนอ เด๊อ อี๊ถื่อดีเต่ลู โต่. แซ่ฮู๊ เหย่ซี เก่ เซอแพรเนอ เนอ, เหย่ซี จว๊า กุย คุ๊ยปีลาต เด๊อ อา เก่ นอด่อแลเก่ อู เร๊อ เหย่ซี เนอเต๊เห่ อาก่าขี่ เร๊อ เก่ พย๊าตาแก เหย่ซี เด๊อ อี๊ถื่อดีเต่ลู. 32ฮู๊เนอเรอ เกลอฮู๊ เต๊เห่ แฮด่อแลเก่ เหร่อเล๊อ อู มือเซอแถ่ เต่อเร๊อ เหย่ซู่ เออซิเนอ อาเกล เตเพร. โทเรอ อา จว๊า ด่อแลเก่ เกอโป่ อา โอ่แก เนอเตเพร. 33หม่าแน๊เรอ เบ๊อะเหย่ซี จว๊าโต่ เด๊อ เหย่ซู่ โอ่ เบ๊อะเนอ, เหย่ซี แม๊เถอะ เร๊อ อา เซอ โทเฮ๊อ. อาขว่าอาคยา, อา ด่อแลเก่ ลู ข่าขี่ โตโค๋ โต่. 34หม่าแน๊เรอ เกลอฮู๊ เออเต๊เห่ อาเกล เตเพรเนอ, อา ชือ เหย่ซู่ รอเกล เร๊อ แตแบ เร๊อ โตโพ๊โต สุ่ย เร๊อ เทอ ช๊าตาเถ่. 35แกแย เด๊อ อา แม๊เถอะ อา ทวาแถ่ ฮู๊เออ เตเพรเนอ อา แด๊โฉ่โล เป่ อู. เร๊อ อา แด๊โฉ่ โลโตตื้อ เป่ อู แพ๊. อา ซิเง ตาเต เกอเร๊อ เนอ อา เฮ๊ เออเนอหม่า อาจ๊ออาเต แพ๊. แซ่ฮู๊ ซี เก่ หยื่อเอ่ เกออู เนอ, อา แด๊โฉ่โล เป่ ซี แพ๊. 36แซ่ฮู๊ ลีเทส่อพ๊า เก่ เล๊อบาแถ่ อาเงเนอ, เตเออเต๊เห่ ทวาแถ่ เฮ๊อ. ลีเทส่อพ๊า เฮ๊ เน๊อ, “อาครุ๊ย เก่ แลเก่หนิ โตโบ๊ โต่,” ^d อา เฮ๊ ฮู๊เนอ. 37ลีเทส่อพ๊า เด๊อ อาโรโต๊โผ่ เฮ๊ โป่ เน๊อ, “เหย่ซี ชือ เกอเร๊อลู เร๊อ แตแบ เออเตเพรเนอ, เหย่ซี เก่ แม๊ ลู ปา.” ^e

อู โล๊ เหย่ซู่

(มัทธิว ๒๗:๕๗-๖๑, มาระโก ๑๕:๔๒-๔๗, ลูกา ๒๓:๕๐-๕๖)

38โทเรอ แกแยอาริมาเธีย หม่าคูโยเซฟ จว๊ากูย เหย่ซู่ อาโล เออ เด๊อ คุ๊ยปีลาต อา โอ่. คูโยเซฟ หม่า แบ่เจ่ เหย่ซู่ อา โคเจ่ เตเพร, หม่าแน๊เรอ อา ย๋อ ซิอิเช แกแยยิวพู๊ เต๊เห่ อาเหล่ อาขว่าอาคยา, อา ทวาโห่ทวาเซ๊ แพ๊ ลู โคเจ่ แพ๊. อา จว๊ากูย คุ๊ยปีลาต เออเนอ, อา จู ลู เร๊อ อา แฮ พย๊าดว้า จว๊าแก แบ่เจ่ อาโล เออ. 39คูนิโคเดมัส ครวาจว๊าเกอ เร๊อ อา. แกแย เด๊อ อา แฮ โอ่เล เกอ แบ่เจ่ เหย่ซู่ เด๊อ เหมาะคี๊เค เด๊อ อาเหร่อเค เนอเตเพร หม่า คูนิโคเดมัส เฮ๊อ. อา พย๊าแฮหนิ เหล่โปล่ โนมื๊อ เนอเจ่อ เด๊อ อู เอ๊ เนอ, มู๊หร่า เร๊อ อาลูเส่อ. อา แลโถ่เนอ, อา ผือ โอ่ เจ๊อ กิโล โซเชอ. ^f 40เหย่ซี เออซิเนอ พย๊า เหย่ซู่ อา โลเออ เร๊อ อา โบ่ ตูลู เร๊อ อิเก แบ๊ปลี ตือปือ เร๊อ อา โบ่บี๊ ตูลู เต่อ ลู เร๊อ เตโนมื๊อ เนอเนอเจ่อ แกแยยิวพู๊. อาเหล่โกล โล๊ โล เนอหม่า อา เม แลแค ฮู๊เนอ. 41เบ๊อะอู เหล่มือเซอแถ่ เหย่ซู่ เด๊อ อี๊ถื่อดีเต่ลู อาแก่ช๊าเนอ, เตเร๊ โอ่ ตารา เด๊อ เตเร๊ เนอตารา อากูเนอ, อู ขื่อกูโน โอ่เซ โลกู ตูกู เด๊อ หล่อกู, เร๊อ อู โล๊น๊อ แล๋ เร๊อ โลโตโพ๊โต่. 42เบ๊อะเนอ เตอเนอเนอ อาโต เร๊อ ม๊อเนอ เด๊อ อู ตี๊หรี่แตแร หนื่ออื่อ ช๊าป่าโร แกแยยิวพู๊ อา ม๊อเนอโด่ เนอเตอเนอ, โท๊โต่ โลกู ลอ โอ่ผื่อ เบ๊อะเนอ ตูกู อาขว่าอาคยา, เหย่ซี จว๊า โล๊โนแก ลู เบ๊อะเนอ.