John 20

โลกู โอ่กอคูแก

(มัทธิว ๒๘:๑-๑๐, มาระโก ๑๖:๑-๘, ลูกา ๒๔:๑-๑๒)

1แกแยยิวพู๊ อา ม๊อเนอโด่ โท อาเนอโตโร เหมาะลี โรมื่อ เหมาะคี๊โป๊โหล่ปา เบ๊อะเนอ, แกแย มักดาลา ดอกูโหมะ เหมาะมารีย์ แฮ เด๊อ โลขุ เร๊อ อา แม๊เถอะ เร๊อ หล่อดุ เด๊อ อู ถู่ลอบี๊ ลู เร๊อ โลกู เนอเตเมเนอ, อู ถู่ลอตาพา จว๊าแก ลู. 2เร๊อ อา แกล่กา เด๊อ คูซีโมน เปโตร เร๊อ เหย่ซู่ อา โคเจ่ เด๊อ อา โม เกอเร๊อ ลู เด๊อ อาโรเตเพร อา โอ่ เร๊อ อา แด๊โฉ่ เป่ เหย่ซี เน๊อ, “เหย่ซี พย๊าจว๊าแกเหม่ เฮ๊อ แบ่เจ่ เนอ เด๊อ โลกู เฮ๊อ. เหย่ซี จว๊าแด่โอ่โต ลู เบ๊อะเต๋ เนอ, เป ซิเง โต่.”

3เออโตโพ๊เรอ คูเปโตร เร๊อ แบ่เจ่ อา โคเจ่ เด๊อ อาโร เตเพร แกล่แฮ แลแค เด๊อ โลขุ. 4เหย่ซี แกล่แฮ ผรว่า ลู แพ๊ ตื๊อดื่อเรอ แบ่เจ่ อา โคเจ่ เด๊อ อาโร เออเตเพร แกล่แพรเล๊อ เร๊อ คูเปโตร อาขว่าอาคยา, อา แกล่แฮ โต่เหร่อเล๊อ ลู เด๊อ โลขุ. 5อา แฮ งอแม๊โจโน เด๊อ โลกู. เร๊อ อา แม๊เถอะ อิเก แบ๊ปลือทู เออ โอ่แก เบ๊อะเนอ, หม่าแน๊เรอ อา แฮโน เด๊อ อากู โต่. 6เออโตโพ๊เรอ คูซีโมน เปโตร เด๊อ อา แกล่แฮ ตาเนอ เด๊อ ลูคยา เออเตเพร แฮโต่ เร๊อ อา แฮโน เด๊อ โลกู. เร๊อ อา แม๊เถอะ อิเก แบ๊ปลือทู เนอต๊าบ่า โอ่แก เบ๊อะเนอ. 7โทเรอ อา แม๊เถอะ เต่อเกอ กู๊โท เด๊อ อู โบ่บี๊ เป่ เร๊อ แบ่เจ่ เหย่ซู่ อากู่กล๊อ เนอต๊าบ่าบ่า. อา กู่โทพู๊ เออต๊าบ่าเนอ, อา โอ่เต่อเกอ เร๊อ อิเก แบ๊ปลือทู เนอต๊าบ่า โต่. อา โบ่ตูลู โอ่แก โค๊ดื่อ โต๊โผ่. 8เด๊อคยา เร๊อ อา โคเจ่ เด๊อ อา แกล่แฮ โต่เหร่อ เด๊อ โลขุ เออเตเพร แฮโน เด๊อ อากู. อา แฮ แม๊เถอะ เร๊อ อา หยื่อเอ่ เร๊อ เหย่ซู่ เซอเพร กาคยา เฮ๊อ. 9ลีเทส่อพ๊า เฮ๊หนื่ออื่อ เจ๊อเฮ๊อ เนอ, แบ่เจ่ เหย่ซู่ เก่ เซอ ก๊อถ่อกาคยา ปา ตื๊อดื่อเรอ, โต่ เจ๊อเฮ๊อ เบ๊อะเนอเคเนอ, ฮู๊ ลีเทส่อพ๊า เฮ๊หนื่ออื่อ เออเนอ, อา โคเจ่ เต๊เห่ ซิเงโปล ล๋ายโต่.

10โทเรอ เหย่ซี เออซิเนอ กาคยา แลแค เด๊อ อาหี่

แบ่เจ่ เหย่ซู่ เด๊อะโลแม๊เถอะ เป่ แกแยมักดาลา ดอกูโหมะ เหมาะมารีย์

(มาระโก ๑๖:๙-๑๑)

11หม่าแน๊เรอ เหมาะมารีย์ เร๊อ อา ก๊อถ่อ โอ่แก เบ๊อะโลกูทือเนอ เร๊อ อา โหง่. เบ๊อะอา โหง่ เค, อา งอ ตอคอ แม๊โจโน เด๊อ โลกู. 12เร๊อ อา แม๊เถอะ ม๊อขุ เตเน่ว แซ๊หนิ เห่อจาบู ซิเนอ โอ่แนโอ่ เด๊อ เหย่ซู่ โล เหล่โอ่ เนอ. เตเพร เร๊อ อา โอ่ เด๊อ อา กู่กล๊อเท๊ ตากยา, เตเพร เร๊อ อา โอ่ เด๊อ อา แข่โหย่แก ตากยา

13เร๊อ เหย่ซี แด๊เฮอ เหมาะมารีย์ เน๊อ, “เพรเหมาะ, เน โหง่ เมเต?”

เร๊อ เหมาะมารีย์ เฮ๊ กาคยาฉื่อ เหย่ซี เน๊อ, “เหย่ซี พย๊าจว๊าแกโอ่เหม่ เฮ๊อ แว แบ่เจ่ เฮ๊อ, เหย่ซี จว๊าแด่โอ่ โต ลู เบ๊อะเตเนอ แว ซิเงโต่,” อา เฮ๊ฉื่อ ฮู๊เนอ. 14เบ๊อะอา ตีรี๊ กาคยา เบ๊อะเนอ, อา แม๊เถอะ แบ่เจ่ เหย่ซู่ ก๊อถ่อโอ่ เด๊อ ลูคยา ตื๊อดื่อเรอ อา ซิเง เร๊อ แบ่เจ่ เหย่ซู่ หม่าโต่.

15“เพรหมอ, เน โหง่ เมเต? เน แม๊ปู อูเป?” อา แด๊เฮอ ลู ฮู๊เนอ.

เหมาะมารีย์ เตเนแต่ แบ่เจ่ เหย่ซู่ เร๊อ เพรโอ่ป่อ แม๊ตู่ เตเร๊รากู เร๊อ อา เฮ๊ ลู เน๊อ, “แหม่, เน เก่ พย๊าจว๊า ลู เฮ๊เรอ เน จว๊าแด่โอ่ โต ลู เบ๊อะโต๊โผ่เนอ, แด๊โฉ่โล เป่ แว เร๊อ แว เก่ จว๊าพย๊าคยา อา,” อา เฮ๊ ลู ฮู๊เนอ.

16“เหมาะมารีย์,” แบ่เจ่ เหย่ซู่ เฮ๊ ลู ฮู๊เนอ.

เร๊อ อา ตีรี๊ จว๊าโต ลู เร๊อ อา เฮ๊ฉื่อ ลู เน๊อ ฮีบรูโหง่ เร๊อ อา เฮ๊ เน๊อ, “หร่าบ่านี๋.” (อาโหง่แลช๊า หม่า ซ๊าร๊า)

17เร๊อ แบ่เจ่ เหย่ซู่ เฮ๊ ลู เน๊อ, “ปื่อ แต่ แว เหม่, เมเตเฮ๊เรอ แว กา เด๊อ แวเพ โอ่ ล๋ายโต่. จว๊า เด๊อ แว โป่แหว่ เนอเต๊เห่ อา โอ่ เร๊อ จว๊าเฮ๊ เป่ เหย่ซี เน๊อ, ‘แว เก่ กากี๊แถ่ เด๊อ แวเพ หม่า อาหม่าหม่า, เหย่ซี อาเพ หม่า อาหม่าหม่า, แว จอแปแหร่ หม่า อาหม่าหม่า, เหย่ซี จอแปแหร่ หม่า อาหม่าหม่า เออเตเพร อา โอ่ปา,’” อา เฮ๊ ลู ฮู๊เนอ.

18มักดาลา ดอกูโหมะ เหมาะมารีย์เออ จว๊า แด๊โฉ่เป่ อา โคเจ่ เต๊เห่ เน๊อ เตหรี่เตแก เออ เร๊อ อา เฮ๊ เป่ เหย่ซี เน๊อ, “แว แม๊เถอะเฮ๊อ แบ่เจ่ เฮ๊อ!” เร๊อ อา เฮ๊โล เป่ เหย่ซี เร๊อ แบ่เจ่ เฮ๊ เป่ ลู เนอเต๊เห่.

แบ่เจ่ เหย่ซู่ โอ่โลแม๊เถอะ เป่ อา โคเจ่ เต๊เห่

(มัทธิว ๒๘:๑๖-๒๐, มาระโก ๑๖:๑๔-๑๘, ลูกา ๒๔:๓๖-๔๙)

19เบ๊อะแกแยยิวพู๊ อา ม๊อเนอโด่ ม๊อก่อต่อ เนอเตอเนอ โท ช๊าป่าโร เตอเนอ เหมาะคี๊โป๊โหล่ เบ๊อะเนอ, อา โคเจ่ เต๊เห่ ซิอิเช แลแค แกแยยิวพู๊ อา กู่กล๊อดุ เต๊เห่ อาเหล่ เร๊อ อา เมหม่า แลแค กู่ดา. เร๊อ เบ๊อะเหย่ซี โอ่ปล๊อ เต่อลู เด๊อ หี่ด๊อกู เบ๊อะเนอ, แบ่เจ่ เหย่ซู่ แฮก๊อถ่อ โอ่โลคย๊า เป่ เด๊อ เหย่ซี กล๊าเมกู เร๊อ อา เฮ๊ เหย่ซี เน๊อ, “เตซิปล่อ ตู๊จู่เตอเจ๊อ เก่ โอ่เกอดื่อ เร๊อ ซี นี๋,” อา เฮ๊ เหย่ซี ฮู๊เนอ. 20อา เฮ๊โท เป่ เหย่ซี ฮู๊เนอเร๊อ อา เด๊อะโล เป่ เหย่ซี เร๊อ อากู๊ขุ เร๊อ อารอเกล. เบ๊อะอา โคเจ่ เต๊เห่ แม๊เถอะ ลู เบ๊อะเนอ, อา ซิครือซิลอ ตาปา แลแค เจ๊อ.

21แบ่เจ่ เหย่ซู่ เฮ๊ คยาแซ๊ เหย่ซี เน๊อ, “ซิปล่อ ตู๊จู่เตอเจ๊อ เก่ โอ่ดื่อ เร๊อ ซี นี๋! เร๊อ ฮู๊ แวเพ นอแฮ แว เนอ, แว นอจว๊าเกอ ซี.” 22อา เฮ๊โท ฮู๊เนอเร๊อ อา โอ๊จว๊า เด๊อ เหย่ซีขุ เร๊อ อา เฮ๊ เหย่ซี เน๊อ, “พย๊าฉื่อ แลแค แหย่โยบูโพ๊แบ่เจ่ เออ. 23ซี เก่ ปลวาแก อูเตซื๊อ เต๊เห่ เฮ๊เรอ อูเตซื๊อ เก่ ปลวาแก ปา. ซี เก่ ปลวาแก อูเตซื๊อ โต่ เฮ๊เรอ, อูเตซื๊อ เก่ ปลวาแก โต่.” ^a

แบ่เจ่ เหย่ซู่ โอ่โลแม๊เถอะ เป่ คูโธมัส

24เบ๊อะเหย่ซู่ จว๊าโนโอ่ โอ่โล เป่ อา โคเจ่ เด๊อ อาหี่กู เบ๊อะเนอ, คูโธมัส เด๊อ อู เอ๊โป่ อามุย เร๊อ คูดิดุโมส เออเตเพร โอ่เกอ เร๊อ เหย่ซี เบ๊อะเนอ โต่. 25อา โคเจ่ เออเต๊เห่ เฮ๊ คูโธมัส เน๊อ, “เป แม๊เถอะเฮ๊อ แบ่เจ่ เฮ๊อ,” อา เฮ๊ เป่ ลู ฮู๊เนอ.

หม่าแน๊เรอ อา เฮ๊ฉื่อ เหย่ซี เน๊อ, “แว เก่ แม๊เถอะ ลีป๊าหน่า อาเหล่โกล โจยโอ่แก เด๊อ อา กู๊ยากู โต่, โทเรอ แว เก่ ก๊ออูเบ่หนิ ลีป๊าหน่า โจยเหล่โกล เร๊อ แว กู๊นอ โต่, แว เก่ พือเบ่หนิ อารอเกล อาโจย เร๊อ แว กู๊ขุ โต่ เฮ๊เนอ, แว หยื่อเอ่โต่.”

26เด๊อคยา โซซว๊าเตอเนอเนอ, แบ่เจ่ เหย่ซู่ อา โคเจ่ เต๊เห่ โอ่ปล๊อ เต่อคยาลู เด๊อ หี่เนอ เตเม อากู. เบ๊อะเนอ อาเค คูโธมัส โอ่เต่อเกอ เร๊อ เหย่ซี เบ๊อะเนอ. เหย่ซี เมหม่า กู่ดา ตื๊อดื่อเรอ แบ่เจ่ เหย่ซู่ แฮโน ก๊อถ่อโอ่ เด๊อ เหย่ซี กล๊าเมกู เร๊อ อา เฮ๊ เหย่ซี “ซิปล่อ ตู๊จู่เตอเจ๊อ เก่ โอ่เกอดื่อ เร๊อ ซี นี๋” ฮู๊เนอ. 27เออโตโพ๊เรอ อา เฮ๊ คูโธมัส เน๊อ, “แฮแม๊มอ แว กู๊ขุกูเออ, แฮ เร๊อ ก๊ออูแม๊ดื่อ เร๊อ เน กู๊นอ. เนอ. บ๊อแฮ เน กู๊ขุเนอ เร๊อ พือแม๊ดื่อ แว รอเกล อาโจยเออ. ซิปล่อ หร่าเหร่ แต่เหม่. ตูรู๊ หยื่อเอ่เนอ.” อา เฮ๊ ลู ฮู๊เนอ.

28“แว แบ่เจ่, แว จอแปแหร่,” คูโธมัส เฮ๊ฉื่อ ลู ฮู๊เนอ.

29โทเรอ แบ่เจ่ เหย่ซู่ เฮ๊ ลู เน๊อ, “เน ย๋อ แม๊เถอะ แว ขว่าคยา, เร๊อ เน หยื่อเอ่ แพ๊. แกแย เด๊อ อา แม๊เถอะ แว โต่ เร๊อ อา หยื่อเอ่ เต๊เห่เนอ, อา เก่ พย๊าหนิ เตเด๊อะบุ๊ยเด๊อะเตอเรอ,” อา เฮ๊ ลู ฮู๊เนอ.

อู รา ลี เออต๊าบ่า อาเต เตเนแม๊ชือ เต๊เห่

30แบ่เจ่ เหย่ซู่ เด๊อะโล เป่ เตเม อาโค๊ตีกลี๊ เด๊อ อา โคเจ่ เต๊เห่ อาเป๊เส่เง เด๊อ อู ราม๊าโน เต่อ เบ๊อะลี เออต๊าบ่า อากู โต่ เต๊เห่เนอ, อา โอ่เอ๊ลา ปา เจ๊อ. 31หม่าแน๊เรอ อู ราโอ่ ลี เออต๊าบ่า หม่า แซ่ฮู๊ ซี เก่ หยื่อเอ่ เร๊อ เหย่ซู่ หม่า เพรเมแลเปล๊กา เมสิยาห์, อา หม่า จอแปแหร่ อาพู๊คู เตเพร, เร๊อ เด๊อ ซี หยื่อเอ่ ลู อาขว่าอาคยา, เร๊อ ซี เก่ พย๊าหนิ ซิปล่อเซอเพร อาเงเนอ, อู รา เป่ ซี แพ๊.