Joh 5 | EkySCThai | STEP | ฮู๊เนอโทเรอ, เหย่ซู่ จว๊าเกอ แกแยยิวพู๊ เต๊เห่ อาป่วย เด๊อ วีเยรูซาเล็ม.

John 5

แบ่เจ่ เหย่ซู่ แหย่โอ่เหม่ แกแย กู๊โด่ด๊า เตเพร

1 ฮู๊เนอโทเรอ, เหย่ซู่ จว๊าเกอ แกแยยิวพู๊ เต๊เห่ อาป่วย เด๊อ วีเยรูซาเล็ม. 2 เด๊อ วีเยรูซาเล็ม อากูเนอ เทออ่อ โอ่ ต๊ออ่อ. เทออ่อ เนอต๊ออ่อเนอ อา โอ่ผื่อ เร๊อ ซิหมิ เกเร๊ กู่ดากู ^{▼▼ซิหมิ}โอ่ กู่ดากู เร๊อ ฮีบรูโหง่ เนอหม่า อู เอ๊ เร๊อ เบธซาธา. ^{▼▼ลีพ๊ามู๋ หนู่เค เต๊เห่เห่เนอ, อูเอ๊เร๊อ เบ่เต่อ ย๊าเต่อ, เต๊เห่เห่ เร๊อ อา เอ๊ เร๊อ เบธซาธา} เด๊อ เทออ่อ ตีพรี อาลูเนอ, อู ช๊อ ตาวา เร๊อ เหล่สื่อ แงเม. 3 เบ๊อะเหล่สื่อ เนอเต๊เห่ อากูเนอ แกแย เป๊เส่เล, แกแย กู๊โด่ด๊า, เร๊อ แกแย เซอชี๊กยา เต๊เห่ แฮโอ่เมอ โหร่ ลู แลแค เบ๊อะเนอ. 4 (เหย่ซี โอ่ป่อ แลแค เทอโกโย เมเตเฮ๊เรอ จอแปแหร่ อา เตเน่ว แฮแล เมโกลโกโย โตโมโม เทอเออ เร๊อ เบ๊อะเทอ โกโย เบ๊อะเนอ, แกแย เด๊อ อา จว๊าโน เหร่อเล๊อ เด๊อ เทอกู เตเพรเพร เนอ, อาเตชุ๊ย โอ่เหม่แก.) ^{▼▼ลีพ๊า เด๊อ อู ราโอ่ มู๋ หนู่เค เต๊เห่ อากูเนอ, เต๊เห่เห่ เร๊อ อา ราโนโอ่เต่อ ลีเทส่อพ๊า อามา (๔) เออตามา เร๊อ อา ราโน โอ่เต่อ โต่.} 5 แกแย ชุ๊ย งยาเฮ๊อ โซเชอ เร๊อ หน่าลุยซว๊า โอ่เบ๊อะเนอ เตเพร. 6 เหย่ซู่ แม๊เถอะ อา โอ่เมอโอ่แต่ เบ๊อะเนอ เร๊อ อา ซิเง เร๊อ อาชุ๊ย งยาเฮ๊อ อาขว่าอาคยา, อา แด๊เฮอ ลู เน๊อ, “เน ซิหยื่อ นอโอ่เหม่ เน เตชุ๊ย แอ?”

7 เร๊อ อา เฮ๊ฉื่อ แบ่เจ่ เน๊อ, “แบ่เจ่, เบ๊อะอู เม โกโย เทอ เบ๊อะเนอ, แกแย เด๊อ อา เก่ จอโน แว เด๊อ เทออ่อ อากูเนอ, อา โอ่ เตเพร่ว โต่. เร๊อ เบ๊อะแว แอ๊จื๊อ จว๊าโน เบ๊อะเนอ, แกแย เด๊อ อาโรเตเพร จว๊าโนเผ่ เหร่อแก เฮ๊อ แว.”

8 แบ่เจ่ เฮ๊ อา เน๊อ, “ก๊อถ่อ ถู่ลูหนิ เน เหล่เมอ เร๊อ จว๊ามอ.” 9 อาเตชุ๊ย อาโอ่เหม่แก เจ๊อ โตโพ๊โต เร๊อ อา ถู่ลูหนิ อาเหล่เมอ เร๊อ อา จว๊า.

เตเมอาเหน่ เออเนอ อาโต เร๊อ แกแยยิวพู๊ อา ม๊อเนอโด่ อาขว่าอาคยา, 10 แกแยยิวพู๊ ทวาดุทวาเต เต๊เห่ เฮ๊ แกแย เด๊อ อาเตชุ๊ย โอ่เหม่ เนอเตเพร เน๊อ, “เออเตอเนอ หม่า ม๊อเนอโด่. เตซว๊าเตแส่โอ่ เร๊อ เน แพ๊จว๊าหนิ เนเหล่เมอ ฮู๊เนอ หม่า อาหนิ โต่.” ^d

11 หม่าแน๊เรอ อา เฮ๊ฉื่อ เหย่ซี เน๊อ, “แกแย เด๊อ อา แหย่โอ่เหม่ แว เนอเตเพร เฮ๊ แว เนอ, ถู่ลูหนิ เน เหล่เมอ เนอ เร๊อ จว๊ามอ, อา เฮ๊ แว เน๋อ.”

12 เหย่ซี แด๊เฮอ ลู เน๊อ, “แกแย เด๊อ อา นอเม เน ฮู๊เออ เตเพรเนอ หม่า อูเป?”

13 หม่าแน๊เรอ เหย่ซู่ หม่า อูเป เนอ แกแย เออเตเพร ซิเงโต่, เมเตเฮ๊เรอ แบ่เจ่ เหย่ซู่ เถ่จว๊า โอ่เหม่แก เด๊อ แกแย โอ่โหร่โอ่เอ๊ อาเกล.

14 อาเนอเนอ, เหย่ซู่ แม๊เถอะ คยาแซ๊ อา เด๊อ เตหลู่แตโฮกู เร๊อ อา เฮ๊ ลู เน๊อ, “หนิดา, แว เฮ๊ เน, กู๊แหน่เออ เน เตชุ๊ย โอ่เหม่เฮ๊อ. แซ่ฮู๊ เน เก่ แม๊เถอะเบ่ ปา แต่ เน๊อ เต เด๊อ อาจา เล๊อ เจ๊อ เร๊อ เออ ปา แต่เหม่เนอ เมปา แต่ เตซื๊อ แต่เหม่ นี๋.” 15 โทเรอ อา เถ่จว๊า แด๊โฉ่ เป่ แกแยยิวพู๊ ทวาดุทวาเต เต๊เห่ เร๊อ แกแย เด๊อ อา แหย่โอ่เหม่ แว เตชุ๊ย เนอหม่า อามุย เร๊อ เหย่ซู่ เฮ๊เน๋อ.

16 ฮู๊เนอ อาขว่าอาคยา, เหย่ซู่ ย๋อ เม เตเออเต๊เห่ เด๊อ ม๊อเนอโด่ ขว่าคยา, แกแยยิวพู๊ ทวาดุทวาเต เต๊เห่ เป๊อแถ่ เมซู๊ช๊าแฮ ลู. 17 เหย่ซู่ เฮ๊ฉื่อ เหย่ซี เน๊อ, “แวเพ เม แรเต ปว๋า โพ๊, อา โอ่โก๊ โตโพ๋ โต่ เร๊อ แว โตเบ่ เมเกอ ฮู๊เนอ.” 18 เด๊อ เหย่ซู่ เฮ๊เบ่ โหง่ ฮู๊เออ อาขว่าอาคยา, แกแยยิวพู๊ ทวาดุทวาเต เต๊เห่ เหล่ แอ๊จื๊อ แม๊ปูเมเซอ ฉว่าเล๊อ โป่ เร๊อ เด๊อ อาเหร่อเค เนอ. หม่า แพ๊ดื่อ อา เม ตาลว๊าตาแก โต โอ่โก๊ ม๊อเนอโด่ อา เตซว๊าเตแส่ ตื๊อดื่อ เออเนอ หม่าโต่, อา ย๋อ เฮ๊ โป่ เร๊อ จอแปแหร่ หม่าอาเพ เร๊อดื่อ เร๊อ อา เบ่ ครือแนหนิ อาเหน่ เร๊อ จอแปแหร่ อาขว่าอาคยา, เหย่ซี แม๊ปู เมเซอ ลู แพ๊.

เหย่ซู่ เตอเรอฉว่าชอ

19 ฮู๊เนอเรอ, เหย่ซู่ เฮ๊ฉื่อ เหย่ซี เน๊อ, “แว เฮ๊จ๊อจ๊อ ซี, พู๊คูเออ อา เม จู๋ ดื่อ ฮู๊ อา ซิหยื่อเม เนอหม่า อาหนิ โต่. อา เมแพ๊ ฮู๊ อา แม๊เถอะ อาเพ จอแปแหร่ เมเนอ เต๊เห่ แพ๊. เพ เมเต อิเต๊ เบ่เบ่, อา พู๊คู เม เกอดื่อ ฮู๊เนอ. 20 เมเตเฮ๊เรอ, เพ โมหนิเกอเร๊อ อาพู๊คู เร๊อ อา เด๊อะโล ลู ล๋อ เต เด๊อ อา เม เร๊อ อาเหน่ เนอเต๊เห่. อาเพ เก่ เด๊อะโล ลู แรเต เด๊อ อาดุเล๊อ ปา เจ๊อ เร๊อ เออเต๊เห่ ปา เร๊อ ซี เก่ คย๊าอายื๊อ แหน่เจ๊อ ปา. 21 ฮู๊ แวเพ เมเซอเพร กาคยา แกแย เด๊อ อา เซอ เร๊อ อา เด๊อ อู ซิปล่อเซอเพร เนอ, อาพู๊คูเออ อา เก่ เด๊อะเป่ เกออู ซิปล่อเซอเพร เด๊อ อา ซิปล่อโอ่ ซิหยื่อ เด๊อะ เป่ อู เนอเต๊เห่ ปา. 22 เพ อาเหน่แบ่เจ่ เร๊อดื่อ อา เมจากาคยา อู เตเพร่ว โต่. อา เด๊อะตา เล๊อบา ล๋อเต เมจากาคยา เต๊เห่ เด๊อ อาพู๊คู กู๊ยากู เฮ๊อ. 23 เมเตเฮ๊เรอ, แซ่ฮู๊ แกแย ล๋อ ปลี เก่ เบ่หยื่อเบ่แหน่ อาพู๊คู ฮู๊ อู เบ่หยื่อเบ่แหน่ เพเนอ เร๊อ อา เด๊อะตา ลอ เต เมจากาคยา เด๊อ ลู กู๊ยากู. แกแย เด๊อ อา เบ่หยื่อเบ่แหน่ พู๊คู โต่ เต๊เห่เนอ, หม่าเฮ๊อ อา เบ่หยื่อเบ่แหน่ เพ เด๊อ อา นอแฮแล ลู เนอเตเพร โต่ เฮ๊อ.

24 “แว เฮ๊จ๊อจ๊อ ซี, แกแย เด๊อ อา หนิโฮ แว ลาโหง่ เออเรอ อา หยื่อเอ่แหน่ เพร เด๊อ อา นอแฮแล แว เออเตเพร เต๊เห่เนอ, อา พย๊าหนิ ซิปล่อเซอเพร ตูจูเพร เฮ๊อ. เร๊อ อา แม๊เถอะ เบ่น๊อปา เด๊อ เตเมจากาคยาโต่. อา จว๊า ตาลว๊าเบ๊ เฮ๊อ เร๊อ เตเซอ เร๊อ อา จว๊าโน เฮ๊อ เด๊อ เตเซอเพร อากูเฮ๊อ. 25 แว เฮ๊โฉ่จ๊อจ๊อ ซี, เบ๊อะเด๊อ แกแยเซอ เต๊เห่ เก่ หนิโฮ จอแปแหร่ อาพู๊คู โหง่, เร๊อ แกแย เด๊อ อา หนิโฮ เออเต๊เห่ เก่ เซอเพร ปา เนอ, อา เก่ แฮโต่ ปา. อา แฮโต่ เจ๊อเฮ๊อ กู๊แหน่ เฮ๊อ. 26 ฮู๊ แวเพ โอ่ดื่อ เร๊อ อา เตอเรอฉว่าชอ เด๊อ อา เด๊อะ แจ่ อู ซิปล่อเซอเพร เน๊อ, เพเออ อา เด๊อะ เกอเฮ๊อ อาพู๊คูเออ อา เตอเรอฉว่าชอ เด๊อ อา เด๊อะ อู ซิปล่อเซอเพร เฮ๊อ. 27 เร๊อ อา หม่า แกแยเห่ขุ พู๊คู อาขว่าอาคยา, จอแปแหร่ เด๊อะตาเกอ เฮ๊อ อา เตอเรอฉว่าชอ เด๊อ อา เก่ เมจากาคยา เกออู เฮ๊อ.

28 “คย๊าอายื๊อ แลแค แต่เหม่, เมเตเฮ๊เรอ เบ๊อะเด๊อ แกแย โอ่เด๊อ โลกู ล๋อ ปลี เต๊เห่ เก่ หนิโฮ จอแปแหร่ อาพู๊คูเออ อาโหง่เนอ, อา เก่ แฮโต่ ปา. 29 เบ๊อะเนออาเค ปา, แกแย โอ่ เด๊อ โลกู เต๊เห่ ก๊อถ่อเถ่กา แลแค ปา. แกแย เด๊อ อา เมแร๊ เต เต๊เห่เนอ อา เก่ เซอ ก๊อถ่อกาคยา เร๊อ เซอเพร ตูจูเพร ตาแลเคร๊ ปา. แกแย เด๊อ อา เม เตมู๊แหม่ เต๊เห่เนอ, อา เก่ เซอ ก๊อถ่อกาคยา โทปา เร๊อ อู เก่ เมจากาคยา เหย่ซี ปา.” ^e

เพร เด๊อ อา ข่าเฮ๊โล เร๊อ เหย่ซู่ อาหรี่อาแก เต๊เห่

30 แบ่เจ่ เหย่ซู่ เฮ๊เป่แฮ โป่ เน๊อ, “แว เม จู๋ ดื่อ ฮู๊ แว ซิหยื่อ เม เนอหม่า อาหนิ โต่. แว เมจากาคยา ฮู๊ เพ จอแปแหร่ แด๊โฉ่ แว เนอ แพ๊. แว เต เมจากาคยา เนอหม่า อาโต แพ๊ เมเตเฮ๊เรอ แว เม จู๋ดื่อ แว ซิปล่อเนอ หม่าโต่. แว เมแพ๊ ฮู๊ เพร เด๊อ อา นอแฮแล แว เออเตเพร อา เตซิหยื่อ โอ่ เนอแพ๊.

31 “เฮ๊โก๊หลื่อ, แว เก่ ข่าเฮ๊โล เกอเร๊อดื่อ แวหรี่แวแก เก่เฮ๊เรอ เหล่หยื่อเอ่หนิ อาเหล่โกล โอ่ เตอเจ๋อ โต่. 32 หม่าแน๊เรอ แกแย เด๊อ อา เก่ ข่าเฮ๊โล เป่ ซี เร๊อ แวหรี่แวแก เนอ, อา โอ่ เตเพร. เร๊อ แว ซิเง เน๊อ อาข่าเฮ๊โล เร๊อ แวหรี่แวแก เออเนอหม่า อา หม่าแหน่ เจ๊อ.

33 “ซี นอจว๊า ซีแกแย เด๊อ คูยอห์น อา โอ่ เร๊อ อาข่า เฮ๊โล เร๊อ แวหรี่แวแก เนอหม่า อาหม่า แพ๊. ^f 34 แว โหล่ เร๊อ แกแย เห่ขุพู๊ข่าเฮ๊โล แวหรี่แวแก เตเพร่ว โต่. หม่าแน๊เรอ แซ่ฮู๊ ซี เก่ หยื่อเอ่ เต เด๊อ อา เฮ๊ เนอเต๊เห่ เร๊อ ซี เก่ หนิ เกออู เด๊อ เตเมแลเปล๊กา อาเงเนอเนอ, แว เด๊อ ซีเหน่ กาคยา คยาแซ๊ ซี เร๊อ คูยอห์น อา เฮ๊ แวหรี่แวแก เออเนอเต๊เห่ แพ๊. 35 คูยอห์น เนอ อา ลีเตเคแถ่ แซ่เร๊อ หมิเคว๊กอ เตเม เด๊อ อา แกแถ่ เนอ. ซี ซิหยื่อ อาเตลี แตแปล๊เตอเปลอ แพ๊, อาโหง่แลช๊า เนอหม่า, อา ซิเฮ๊ เร๊อ ซี ซิหยื่อ แฮ หนิดา อา เตอิซว๊า แตแปล๊เตอเปลอ แพ๊ อา ซิเฮ๊ ฮู๊เนอ.

36 “หม่าแน๊เรอ แว เตข่าเฮ๊โล เด๊อ อาดุเล๊อ ปา เจ๊อ เร๊อ คูยอห์น อา เตข่าเฮ๊โล เออเนอ อาโอ่ เต๊เห่. แวเพ เด๊อะ แว เตเอ่เตแร เด๊อ แว เบ่ เมโทแก, เร๊อ กู๊แหน่เออ แว เม เฮ๊อ แรเต เออเต๊เห่ เฮ๊อ. แรเต เออเต๊เห่ เนอหม่า, อาข่าเฮ๊โล เฮ๊อ ซิปล่อ เร๊อ แวเพ นอแฮ หม่าแหน่ เฮ๊อ แว เนอ เฮ๊อ. 37 เร๊อ เพ เด๊อ อา นอแฮ แว เออเตเพรเนอ, อา ข่าเฮ๊โล เด๊อ แวเง. ซี หนิโฮน๊อ เร๊อ อาตาลา โต่, โทเรอ ซี แม๊เถอะน๊อ เร๊อ อาเป๊เส่ โตโพ๋ โต่. ^g 38 จอแปแหร่ นอแฮ เจ๊อ แว ตื๊อดื่อเรอ ซี หยื่อเอ่หนิ เกอ แว โต่ อาขว่าอาคยา, จอแปแหร่ อาลาอาโหง่ โอ่เซอเพร เกอ เด๊อ ซี ซิปล่อกู โต่. 39 ซี แม๊ปูซิเง แลแค ลีเทส่อพ๊า เต๊เห่ เมเตเฮ๊เรอ ซี เตเน เร๊อ ซี เก่ แม๊เถอะ ซิปล่อเซอเพร ตูจูเพร เบ๊อะลี เออเนอเต๊เห่ อากู ปา. ลีเทส่อพ๊า เออเต๊เห่ เนอหม่า อา ข่าเฮ๊โล เป่เฮ๊อ ซิปล่อ เร๊อ แวหรี่แวแก เฮ๊อ. 40 หม่าแน๊เรอ แซ่ฮู๊ ซี เก่ พย๊าหนิ เกออู ซิปล่อเซอเพร ตูจูเพร อาเงเนอ, ซี ซิหยื่อ แฮ เกอ แลแค เด๊อ แว โอ่ โต่.

41 “แว แม๊ปู เด๊อ อู เก่ ถู่เซ๊แถ่หนิ แว อาเงเนอ หม่าโต่. 42 หม่าแน๊เรอ ซี หม่า แกแย ฮู๊เต เต๊เห่ เนอหม่า แว ซิเง ลอเฮ๊อ เร๊อ แว ซิเง เนอ, เด๊อ ซี ซิปล่อกูเนอ, ซี เตโม จอแปแหร่ โอ่โต่. 43 แว แฮเฮ๊อ เร๊อ แวเพ อามุย ตื๊อดื่อเรอ ซี เอ๊ฉื่อ แว โต่. แกแย เด๊อ อาโรเตเพร เก่ แฮ เด๊อ ซีโอ่ เร๊อ อามุย เร๊อดื่อ เก่เฮ๊เรอ, ซี เอ๊ฉื่อ โมหนิเกอเร๊อ อา. 44 ซี ซิหยื่อ ถู่เซ๊ หนิเร๊อ ลู เตเพร เร๊อ เตเพร ตื๊อดื่อเรอ ตือแพ๊ จอแปแหร่ เตเพร เก่ ถู่เซ๊หนิ ซี อาเงเนอ, ซี แม๊ปู เกอ แลแค อู โต่. ซี เก่ ถู่เซ๊ เกอเร๊อ คยาดื่อ ลู ฮู๊เออ เก่เฮ๊เรอ ซี จว๊า หยื่อเอ่ แจ่ แว ฮู๊เต?

45 “เตเน แต่ แว เร๊อ แกแย เตเพร เด๊อ อา เก่ แด่ ซี เตซื๊อ เด๊อ เพ อา เป๊เส่เง เนอปา แต่เหม่. คูโมเสส เด๊อ ซี แม๊ชือ ซิเล เกอเร๊อ ลู เนอเตเพร, เก่ แด่ ซี เตซื๊อ ปา. 46 ซี เก่ หยื่อเอ่ ตาเต หม่าแหน่ คูโมเสส เก่เฮ๊เรอ, ซี เก่ หยื่อเอ่เกอ แหน่ แว แพ๊, เมเตเฮ๊เรอ เพร เด๊อ อา รา แวหรี่แวแก หม่า อา เฮ๊อ. 47 หม่าแน๊เรอ, หม่า เด๊อ ซี หยื่อเอ่ อา เตราแก เออเนอเต๊เห่ โต่ อาขว่าอาคยา, ซี จว๊า หยื่อเอ่ แจ่ แว เตเฮ๊เบ่ เออเต๊เห่ ฮู๊เต?”