Joh 12:1-8 | EkySCThai | STEP | เบ๊อะป่วยเตจว๊า ตา ลว๊า เบ่แต่ ล๋ายโต่ อาเนอ โซซว๊า เบ๊อะเนอ, เหย่ซู่ จว๊า เด๊อ คูลาซารัส โอ่ เกอเร๊อ ดอเบธานี เนอ. คูลาซารัส เออเตเพร เนอหม่า หม่าเฮ๊อ เหย่ซู่ เม ก๊อถ่อเซอเพร กาคยา ลู เนอเตเพร เฮ๊อ.

‏ John 12:1-8

เหย่ซู่ โอ่ เด๊อ ดอเบธานี

(มัทธิว ๒๖:๖-๑๓, มาระโก ๑๔:๓-๙)

1 เบ๊อะป่วยเตจว๊า ตา ลว๊า เบ่แต่ ล๋ายโต่ อาเนอ โซซว๊า เบ๊อะเนอ, เหย่ซู่ จว๊า เด๊อ คูลาซารัส โอ่ เกอเร๊อ ดอเบธานี เนอ. คูลาซารัส เออเตเพร เนอหม่า หม่าเฮ๊อ เหย่ซู่ เม ก๊อถ่อเซอเพร กาคยา ลู เนอเตเพร เฮ๊อ. 2 อู ตี๊หรี่แตแร เล๊เอ่เล๊โอฉื่อ แบ่เจ่ เหย่ซู่ เร๊อ ดีเหมาะเฮ๊ เร๊อ เหมาะมารธา เล๊เอ่เล๊โอ เกออู เบ๊อะเนอ. คูลาซารัส โอ่แน โอ่เต่อเกอ เร๊อ แกแย โอ่แน เอ่ แลแค ดี เบ๊อะดีเหร่ แก่ช๊า อาเกล เนอเต๊เห่. 3 เบ๊อะเนอเค เหมาะมารีย์ พย๊าแฮหนิ เทอโนมื๊อ เด๊อ อู เอ๊ เร๊อ น่าดู๊เออแตแป. เทอโนมื๊อ เออเนอหมา อางูดุ แหน่เจ๊อ เร๊อ อา ผื๋อ แลโถ่ ตากลาเม กี๊โล๊เจ๊อ. อา แฮ แล๊ตา เด๊อ แบ่เจ่ เหย่ซู่ กู๊โด่ลู เร๊อ อา ทื๊อซูแก เร๊อ อากู่โล. เทอโนมื๊อ เออเนอ, อา โนมื๊อ จว๊าเป่ ลอ เจ๊อ หี่ เตเมลอ เจ๊อ. ^a

4 – 5 หม่าแน๊เรอ, เด๊อ อา โคเจ่ อาเกลเนอ, อามุย เร๊อ คูยูดาส อิสคาริโอท เฮ๊เออเนอ อา โอ่เตเพร. เด๊อ คยา เร๊อ อา อิเชแก แบ่เจ่ เนอเตเพร เฮ๊อ, เร๊อ อา เฮ๊ เน๊อ, “อิเชแก เทอโนมื๊อ เร๊อ อา หนิ รือ เออเนอ จว๊าเด๊อ เร๊อ แกแย โซพ๊าโซแรพู๊ เนอเต๊เห่ โต่ เมเต? เน เก่ อิเชแก หม่า อา หนิ เจ๊อ รือหย่า เดนาริอัน โซโจ่ย เจ๊อ เม!” 6 อา ซิยอเร๊อ หม่าแหน่ แกแย โซพ๊าโซแรพู๊ เร๊อ อา เฮ๊ ฮู๊เออเนอ หม่าโต่, เมเตเฮ๊เรอ อา หม่า อาทวา เพรเอ่โห่. อา เบ่ กู๊กลอ เป่ อู รือ, ชาเป่ อู รือปยา เร๊อ อา บ๊อพย๊าโห่ โตโมโม รือ เร๊อ อา นอเอ่ เกอเร๊อดื่อ เร๊อ อาเงแพ๊.

7 “อา โอ่ ดื่อ, เมดู๊แด แต่ อา แต่เหม่” แบ่เจ่ เหย่ซู่ เฮ๊กาคยาฉื่อ ฮู๊เนอ “อา พย๊า โอ่ดว้า เป่เฮ๊อ แว เทอโนมื๊อ เด๊อ อู เหล่โล๊ แว ปา เตอเนอ อาเงเฮ๊อ. 8 แกแย โชพ๊าโชแรพู๊ เต๊เห่ โอ่เต่อเกอ เร๊อ ซี ปว๋า โตโพ๊ เจ๊อ, หม่าแน๊เรอ แวเออเนอ แว โอ่เต่อตี๊ตี๊ เกอ เร๊อ ซี โต่.” ^b