John 2:13-22
เหย่ซู่ จว๊า เด๊อ เตหลู่แตโฮกู
(มัทธิว ๒๑:๑๒-๑๓, มาระโก ๑๑:๑๕-๑๗, ลูกา ๑๙:๔๕-๔๖)
13หม่า เด๊อ แกแยยิวพู๊ ป่วยเตจว๊า ตา ลว๊า ผื่อแฮเฮ๊อ อาขว่าอาคยา, เหย่ซู่ จว๊า เด๊อ วีเยรูซาเล็ม. ▼▼ป่วยเตจว๊า ตา ลว๊าหม่า ป่วย เต๊อป่วย เด๊อ อู เมเต เตเนแถ่ คยาแซ๊ เบ๊อะจอแปแหร่ เมแลเปล๊แก แกแยยิวพู๊ เต๊เห่ เด๊อ เตเน่ว แฮแล เมเซอ อู พู๊แหว่เพร่ว เบ๊อะเนอ.
b 14เบ๊อะอา แฮโต่ เด๊อ เตหลู่แตโฮกู เบ๊อะเนอ, อา แม๊เถอะ แกแย อิเช ปู่, ซิหมิ, ถู่หลุ่ย เต๊เห่ เร๊อ แกแย โอ่แน ถู่แหล่ รือ เด๊อ ดีเหร่ ช๊า เต๊เห่. 15ฮู๊เนอเร๊อ อา เม สู่เปลอ อิปลี๊ เร๊อ อา เหว่เถ่แก ลอ ซิหมิ เร๊อ ปู่ เต๊เห่ เด๊อ เตหลู่แต โฮกู. โทเรอ อา ถู่แลกลอแก ลอ อู เหล่ถู่แหล่ รือ อา ดีเหร่ เนอเต๊เห่ เร๊อ อา เม ลูโพร๊แก ลอปลี เหย่ซี รือหย่า เต๊เห่. 16โทเรอ อา เฮ๊ แกแย อิเช ถู่หลุ่ย เนอเต๊เห่ เน๊อ, “จอเถ่ ตาพาแก ลอ เออเต๊เห่. นอทวาแถ่ แต่ แวเพ อาหี่ เออเนอ เร๊อ เกล๊กู แต่เหม่.” 17อา โคเจ่ เต๊เห่ เตเนแถ่ โต่ ลีเทส่อพ๊า เฮ๊ เน๊อ, “แว ซิปล่อฉว่า โมเร๊อ แหน่เจ๊อ เนหี่. แว เตซิปล่อฉว่า โมเร๊อ เออเนอหมา อา เก่ อือ ลอแก เจ๊อ แว แซ่เน๊อ หมิเนอ เจ๊อ ปา.” c 18เด๊อ อา เม ฮู๊เออ อาขว่าอาคยา, แกแยยิวพู๊ กู่กล๊อ เต๊เห่ แด๊เฮอ ลู เน๊อ, “แซ่ฮู๊ เป เก่ ซิเง เร๊อ เน พย๊าหนิ เตเตอเรอฉว่าชอ เด๊อ เน เก่ แฮเม ลูโพร๊ลูแพร ฮู๊เออ หม่า อาหนิ แพ๊ อาเงเนอ, เน เก่ เด๊อะโล เป่ เป เตโค๊ตีกลี๊ โอ่ เด๊อจอแปแหร่ แฮ อิเต?” 19เหย่ซู่ เฮ๊ฉื่อ เน๊อ, “เม ตาพรอแก มอ เตหลู่แตโฮกู เออเนอ. โซเนอ อากู, แว เก่ ช๊อแถ่ คยาแซ๊ ปา” d 20โทเรอ แกแยยิวพู๊ แด๊เฮอ ลู เน๊อ, “โซเนอ อากู, เน เตเร ช๊อแถ่ โทเบ๊ คยาแซ๊ แหน่ ปา แอ? เตหลู่แตโฮกู เออเนอหมา อู ช๊อแถ่ หนิ อา หม่า อางยา เจ๊อ อาหน่าลุยเชอ เร๊อ โซซว๊า เจ๊อ เม.” 21หม่าแน๊เรอ เบ๊อะเหย่ซู่ เฮ๊ เร๊อ เตหลู่แตโฮกู อาหรี่อาแก คยา เบ๊อะเนอ, หม่า อา เฮ๊ตาช๊า เกอเร๊อดื่อ อาเหน่กล่อ แพ๊. 22ฮู๊เนอ อาขว่าอาคยา, เบ๊อะเหย่ซู่ เซอเพร กาคยา คยาแซ๊ เด๊อ เตเซอ เบ๊อะเนอ, อา โคเจ่ เต๊เห่ เตเนแถ่ โต่เบ่ คยาแซ๊ เด๊อ อา เฮ๊เบ่แก อาโหง่ เออเนอ เร๊อ เหย่ซี หยื่อเอ่ ลีเทส่อพ๊า เร๊อ อา เฮ๊หนื่ออื่อแก อาโหง่ เนอเต๊เห่.
Copyright information for
EkySCThai