อู รา ลียูดา เออต๊าบ่า เมเตเฮ๊เรอ อู ซิหยื่อ เด๊อะรอเด๊อะเร ซ๊าร๊า กลว่าแลโฮ อาเหน่ เด๊อ อา เฮ๊แล เกอเร๊อ แลแค อาเหน่ เร๊อ เพรหยื่อเอ่ เต เต๊เห่. เตหรี่เตแก เด๊อ อู รา เบ๊อะลี เออต๊าบ่า อากู เต๊เห่เนอ, อาแซ่เน๊อ อู ราโอ่ เด๊อ ลีเปโตร เนอบ่า ต๊าบ่า อากูเนอ แพ๊. แซ่ฮู๊ จอแปแหร่ อาแกแย เต๊เห่ เก่ ช๊าแตแน ฉื่อแร๊ เตหยื่อเตแหน่ เด๊อ จอแปแหร่ เด๊อ เหย่ซี เออเนอ เร๊อ เพร ราลี เออเตเพร รา เป่ ลีเออต๊าบ่า แพ๊.

เตเฮ๊เบ่ โต๊โต่ เร๊อ โต๊โต่

เตเฮ๊เบ่ เหร่อ เด๊อ เง ๑:๑-๒

ซ๊าร๊า กลว่าแลโฮ อาเหน่ เต๊เห่

อา เตโอ่เซอเพร เร๊อ อา เตอิซว๊า เต๊เห่ ๑:๓-๑๖

ปื่อหม่าหนิ แลแค ซี เตหยื่อ ๑:๑๗-๒๓

เตเด๊อะบุ๊ยเด๊อะเตอเรอ แก อู ๑:๒๔-๒๕

Jude

1แว หม่า คูยากอบ อาโป่ คูยูดาส, โท๊โต่ แว หม่า เหย่ซู่ครี๊ อาหลู่ เตเพร.

แว ซิหยื่อ ราจว๊าเป่ แกแย เด๊อ เพ จอแปแหร่ เอ๊ เหย่ซี เร๊อ อา โม เกอเร๊อ เหย่ซี. โท๊โต่ เหย่ซู่ครี๊ โอ่ป่อ โฮ๊บี๊เตเก เกอเร๊อ เหย่ซี เนอเต๊เห่ อา โอ่. ^a

2จอแปแหร่ อา เตซิยอกล่าเบ่, อา เตเพรอาดือ เร๊อ อาเตโม เก่ โอ่เล๊อโอ่บา เกอดื่อ เร๊อ ซี นี๋.

ซ๊าร๊า ก่าแปล เต๊เห่

3แว โคแบ๊ซว๊าโม ซี๋, เมแลเปล๊กา เด๊อ เป ล๋อ ปลี พย๊าหนิ โหร่ลอ ลู เออ อาหรี่อาแก เออเนอ, แว ซิหยื่อ ราจว๊า เป่ แหน่เจ๊อ ซี หม่าแน๊เรอ กู๊แหน่เออ แว แม๊เถอะ เร๊อ แว เบ่ ราจว๊าโค๊ เต๊เปล่ เป่เกอ ซี เด๊อ อาโร เต๊อเจ่อ. เร๊อ แว ซิหยื่อ เด๊อะอ๊าเด๊อะเหร่ หนิ ซี เร๊อ เตซิครือมีลา เด๊อ จอแปแหร่ เด๊อะตา เจ๊อ ตื๊อหื่อโต เป่เฮ๊อ เร๊อ ล๋อ อาแกแย เด๊อ อา หยื่อเอ่ เกอเร๊อ เออเต๊เห่เนอ, ซี เก่ ช๊าแตแน ฉื่อแร๊ อา นี๋. 4เมเตเฮ๊เรอ, แกแย เด๊อ อา แด่ดุหยื่อแหน่ จอแปแหร่ โต่ เต๊เห่เนอ, อา แฮโนโห่ เฮ๊อ เด๊อ ซีเกล เฮ๊อ. แซ่ฮู๊ เหย่ซี เก่ เฮ๊เบ่ แลเปล๊ อาเหน่ เร๊อ อา เตโอ่เซอเพร แลโพร๊แลแพร เต๊เห่ อาเงเนอเรอ, อา ถู่แหล่ เต๊เปล่ ปย๊าแก เป แบ่เจ่ จอแปแหร่ อาบุ๊ยอาเตอเรอ เออเนอเต๊เห่ อาหรี่อาแก เฮ๊อ. โท๊โต่ เหย่ซี เออเต๊เห่เนอ อา หยื่อเอ่ เกออู เป ทวาดุทวาเต แบ่เจ่ เหย่ซู่ครี๊ เออเนอ โต่. ฮู๊ ลีเทส่อพ๊า แด๊โฉ่ หนื่ออื่อ เฮ๊อ เตเมจากาคยา เต๊เห่เนอ เหย่ซี เก่ พย๊าหนิ ลอปลี เจ๊อ ปา.

5ซี ซิเง โทลอเฮ๊อ เตเออ ล๋อ ปลี หม่าแน๊เรอ แว ซิหยื่อ เด๊อ ซิเหน่แถ่ คยาแซ๊ เกอโป่ ซี เร๊อ เร๊อ โตโพ๊เค เนอ แบ่เจ่ เมแลเปล๊ เถ่กาโทเฮ๊อ อิสราเอล พู๊ เด๊อ อียิปต์เก่. ^bหม่าแน๊เรอ เด๊อ คยา เนอ อา เมเซอแก ลอคยาแซ๊ ล๋อ แกแย เด๊อ อา หยื่อเอ่เกอ ลู โต่ เนอ เต๊เห่. ^c 6ซิเงแถ่เบ่ หนิคยาแซ๊ แลแค ดื่อ เตเน่วพู๊ เด๊อ อา วีแก แก จอแปแหร่ เด๊อ เหย่ซี อาเตเป๊อตี๊หรี่ เออเนอ, เร๊อ เถ่จว๊า โค๊แกลา เร๊อ อา เหล่โอ่เหล่แบ่ เออเนอ เต๊เห่. จอแปแหร่ จอหม่า ลอเฮ๊อ เหย่ซี เร๊อ สู่เปลอต่อเท๊ เร๊อ อา แด่โน เฮ๊อ เหย่ซี เด๊อ เตคี๊เตลอ อากู เฮ๊อ. เร๊อ อา เก่ แด่โอ่ โต่ เหย่ซี เด๊อ เตเมจากาคยาอา ม๊อเนอดุ เนอเตอเนอ ปา. 7ฮู๊เนอเฮ๊อ, เตเนแถ่ หนิคยาดื่อ แลแค วีโสโดม เร๊อ วีโกโมราห์ เร๊อ วี โอ่ เด๊อ อา โอ่ผื่อโอ่ว๊า เนอเต๊เห่. แกแยวีกู เบ๊อะเนอ เต๊เห่ หม่า อา เมซื๊อ แซ่เกอ ดื่อ เต ฮู๊เนอ เนอ เฮ๊อ. เหย่ซี ลือครวาเม แลแค สุ่ยหย่าเทอ เหล่โกล ซิหยื่อ มู๊แหม่ เต๊เห่. เร๊อ เมโมหนิ แลแค อาเหน่ เร๊อ เพรเหมาะเพรคู เหล่โกล มู๊แหม่รีแจ่ เต๊เห่. เหย่ซี ข่าเบ่ เตโซพ๊าโซแร เด๊อ หมิเผ่กู ตูจูเพร เออเนอหมา อา ทวาแถ่ ดื่อ เฮ๊อ อู เหล่แม๊บือ เด๊อ แกแย ล๋อ ปลี อาเง เฮ๊อ. ^d

8แกแย เด๊อ อา แฮโนโห่ เด๊อ ซีเกล เต๊เห่ เนอหม่า อาแซ่เน๊อ เนอเฮ๊อ. เด๊อ เหย่ซี แม๊เถอะลว๊า หนื่ออื่อ เต เต๊เห่ อาขว่าอาคยา, เหย่ซี เมมู๊แหม่ แล เกอ เร๊อ คยาแซ๊ ดื่อ อาเหน่กล่อ เต๊เห่ แพ๊. เหย่ซี เท๊ฉื่อ เตเตอเรอฉว่าชอ เออ เร๊อ อา เป๊อเจ่ออิแช๊ ม๊อขุ เตเน่วพู๊ เด๊อ อาโอ่ เร๊อ อา เตเตอเรอดุเตอเรอทู เนอเต๊เห่. 9มีคาเอล หม่า ม๊อขุ เตเน่วพู๊ เด๊อ อาดุ เล๊อลอ เจ๊อ อู เจ๊อ หม่าแน๊เรอ เบ๊อะอา เร๊อ โลเน๊มู๊แหม่รีแจ่ กู่กล๊อ กย๊าตางา ลู ^e เร๊อ คูโมเสส อาโล ^f เบ๊อะเนอ, มีคาเอล อิชอ แด่ซื๊อบื่อ เร๊อ โลเน๊มู๊แหม่รีแจ่ กู่กล๊อ โต่. อา เฮ๊ แพ๊ ลู เน๊อ, “จอแปแหร่ เก่ อิชอดื่อ เน ปา,” ^g ฮู๊เนอ แพ๊. 10หม่าแน๊เรอ แกแย เออเต๊เห่เนอ อา เป๊อะเจ่ออิแช๊เต เด๊อ อา ซิเง ตาปลู๊โต่ เนอเต๊เห่. เหย่ซี ซิปล่อ แซ่ แลแค เร๊อ เตมีเตดอ อาขว่าอาคยา, อา ลือครวา เมเกอ แลแค ฮู๊ อาซิปล่อ นอเม ลู เนอ แพ๊. เด๊อ เหย่ซี เมฮู๊เนอ อาขว่าอาคยา, อา เมปย๊าเมหลู่ เกอเร๊อ แลแค อาเหน่ เฮ๊อ.

11จอแปแหร่ เก่ เมจากาคยา หม่าแหน่ เจ๊อ เหย่ซี ปา, เมเตเฮ๊เรอ เหย่ซี ครวาเมเกอ ฮู๊ คูคาอิน เมเนอ เฮ๊อ. ^h เด๊อ เหย่ซี แม๊ดุ รือเท อาขว่าอาคยาเร๊อ, อา ซิปล่อฉว่า ครวาเมเกอ ฮู๊ คูบาลาอัม เมซื๊อ โทเฮ๊อ เนอเฮ๊อ. ⁱ เหย่ซี ช๊าฉื่อ อู ทวา ทวาดุทวาเต เต๊เห่ แซ่เน๊อ คูโคราห์ เมโทเฮ๊อ เนอ เฮ๊อ. อู เก่ เมปย๊าแก เหย่ซี ฮู๊ อู เมปย๊าแก คูโคราห์ เนอ ปา. ^j

12เบ๊อะซี แบ๊ซว๊าแบ๊โค โอ่ปล๊อโอ่ปลูโร๊ลู เหล่เอ่ เบ๊อะเนอ, แกแย เออเต๊เห่ แฮโนเม โตโพร๊ตาผร่า เกอ เร๊อ ซี. เหย่ซี เออเต๊เห่ เนอหม่า อาแซ่แพ๊ เร๊อ เพรเกซิหมิ เต๊เห่ เด๊อ อา แม๊ดุ แพ๊ตื๊อ อา เหล่เอ่น๊อ โอแด๊ อาเงแพ๊, เร๊อ อา เหล่ซิเตเร เนอ อา โอ่ เกอ แลแค อู เตอเจ๋อ โต่. เหย่ซี เนอหม่า อาแซ่เน๊อ อ๊อโหล่ เต๊เห่ เด๊อ อา โก จว๊าแก เร๊อ อา จือตา เป่ อู โต่ เนอเต๊เห่ แพ๊. เหย่ซี เออเต๊เห่เนอ อาแซ่เน๊อ ส่อเหมาะ เด๊อ อาเส่อาโพ เถ่ เกออู เร๊อ อาโตอาเบ่ โต่ เต๊เห่, เร๊อ อู ท๊อเถ่ เตเทหรุ่ยแก เฮ๊อ เหย่ซี เร๊อ อา เซอแก ลอ เฮ๊อ. 13เหย่ซี เต๊เห่เนอ, อาแซ่เน๊อ เทอฮ๊าโฮ๊ ชอ เด๊อ เทอดุซาวา อากูเนอ เต๊เห่ แพ๊. โท๊โต่ เหย่ซี เตเม เด๊อ อา ทวาแถ่ เตซิเตเร เต๊เห่เนอ อา เก่ โอ่โลแถ่ แซ่เน๊อ เทอบ๊อเบ๊ เนอ ปา. เหย่ซี เออเต๊เห่เนอ, อาแซ่เน๊อ เฉ่ เด๊อ อา จว๊าโค๊แก เร๊อ อาแกล๊ เร๊อ อา โอ่ตอ เกอ อา เหล่โอ่โต่ เนอเต๊เห่ เฮ๊อ. จอแปแหร่ ตี๊หรี่แตแร หนื่ออื่อ เป่ เหย่ซี เหล่โอ่ เด๊อ เตคี๊ตือรือ เล๊ออู โต๊โผ่ เร๊อ อา เก่ นอโอ่ เหย่ซี เบ๊อะเนอ ตูจูเพร แตแลเคร๊ ปา.

14คูเอโนค เด๊อ อากลุยอาแล ตา เด๊อ เพอาดัม อาทือ โซซว๊าตือทือ เนอเตเพร แด๊โฉ่ หนื่ออื่อ งยา แหน่เจ๊อ เฮ๊อ เร๊อ เหย่ซี เออเต๊เห่ อาหรี่อาแก เร๊อ อา เฮ๊ เน๊อ, “แบ่เจ่ เก่ แฮเต่อ เร๊อ อาม๊อขุ เตเน่วพู๊ บูโพ๊ เต๊เห่ เด๊อ อารี๊ เร๊อ อารี๊กู เจ๊อ ปา. ^k 15เมเตเฮ๊เรอ อา เก่ แฮ เมจากาคยา ลอ แกแย ปว๋า เตเพร ปา. อา เก่ เมจากาคยา ลอ แกแย เด๊อ อา แด่ดุหยื่อแหน่ เกออู จอแปแหร่ โต่ เนอเต๊เห่ ปา. อา เก่ เมจากาคยา เหย่ซี อาเตซื๊อเตปล๊า เด๊อ เหย่ซี เม โต เร๊อ จอแปแหร่ อาแกล๊อาโกล โต่ เนอเต๊เห่ ปา. เหย่ซี ย๋อ เท๊ตาแอ ฉื่อ จอแปแหร่ อาขว่าอาคยา, อา เก่ เมจากาคยา เหย่ซี ปา.” 16แกแย เออเต๊เห่ เนอหม่า แกแย เด๊อ อา ตามวาเตเล ฉว่า เร๊อ อา แด่ ดื่อเง เตซื๊อ เด๊อ อูโร อาโอ่ ปว๋า โตโพ๊ เจ๊อ. เหย่ซี ครวาลือเม หนิเกอดื่อ อาเหน่กล่อ อา เตซิหยื่อซิลอ มู๊แหม่รีแจ่ เนอเต๊เห่ อาคยา แพ๊. เหย่ซี เฮ๊เบ่ ถู่เซ๊ เกอเร๊อ แลแค อาเหน่, โท๊โต่ แซ่ฮู๊ เหย่ซี เก่ พย๊าหนิ เต เด๊อ อา ซิหยื่อ เนอเต๊เห่ เนอ, อา เฮ๊เบ่ ถู่เซ๊หนิ แลแค อู.

เตเด๊อะรอ เร๊อ เตอิซว๊าอี๊แส่ เต๊เห่

17หม่าแน๊เรอ แว โคแบ๊ซว๊า ซี๋, ซิเหน่แถ่ โต่เบ่ คยาแซ๊ แลแค เป แบ่เจ่ เหย่ซู่ครี๊ อา เพรโด่แน เต๊เห่ แด๊โฉ่โด่แน หนื่ออื่อ โทเป่เฮ๊อ ซี เนอเต๊เห่ นี๋. 18เหย่ซี เฮ๊ เป่ ซี เน๊อ, “ช๋า ม๊อเนอม๊อเซ เด๊อ คยา ตื๊อดื่อ ปา เต๊เห่เนอ, แกแย เด๊อ อา เก่ เป๊อเจ่ออิแช๊ งยาโคร ซี เต๊เห่ เก่ โอ่แถ่ ปา. เหย่ซี เนอเต๊เห่ หม่า อา ครวาเม โชชื่อ แพ๊ ฮู๊ อา เตซิหยื่อ มู๊แหม่ เด๊อ อา โตเกอ เร๊อ จอแปแหร่ อาซิปล่อ โต่ เนอเต๊เห่ แพ๊.” ^l 19แกแย เออเต๊เห่ เนอหม่า หม่าเฮ๊อ แกแย เด๊อ อา เม ลูโพร๊ลูแพร ลอ อู, แกแย เด๊อ อา ครวาเมเกอ ฮู๊ อาเหน่กล่อ พ๊าหย่า อา เตซิหยื่อซิลอ โอ่ เนอ เต๊เห่, โท๊โต่ เหย่ซี เออเต๊เห่ เนอหม่า อา พย๊าหนิ เกออู จอแปแหร่ อา แหย่โยบูโพ๊ โต่.

20หม่าแน๊เรอ แว โคแบ๊ซว๊า ซี๋, ซี เบ่ ช๊อแถ่ แฮเงโป่ แลแค ซี เตโอ่เซอเพร เออเนอ เด๊อ ซี เตหยื่อเตแหน่ บูโพ๊ เด๊อ อาชออาแตแนแร๊ เออเนอ อาลู. เร๊อ เบ๊อะซี กุยจ๊อเบ เบ๊อะเนอ, ซิเลเกอเร๊อ แลแค แหย่โยบูโพ๊ แบ่เจ่ ยูแกล๊ยูโกล หนิ ซี เนอเต๊เห่ นี๋. 21เบ๊อะซี โอ่ป่อแม๊ชือ แบ่เจ่ เหย่ซู่ครี๊ อา เตซิยอ เด๊อ อา เก่ เด๊อะ เป ซิปล่อเซอเพร ตูจูเพร เออเตเพร เก่ แฮ เบ๊อะเนอปาเนอ, โอ่หม่าโอ่กลอ แลแค เด๊อ จอแปแหร่ อาเตโม อากู นี๋.

22ซิยอ เร๊อดื่อ แกแย เด๊อ อา หยื่อเอ่ ครี๊ เฮ๊อ หม่าแน๊เรอ อาซิปล่อ หร่าเหร่ ปา ดื่อเง เนอเต๊เห่ นี๋. 23แอ๊จื๊อ เมจว่า เป่เกอ แกแย เด๊อ อา โหล่ เมแลเปล๊กา ฮู๊ เน เมแลเปล๊กา แกแย เด๊อ หมิกู เนอเต๊เห่ นี๋. โทเร๊อ ซิยอเกอ เร๊อ เป่ เกอโป่ แกแย เด๊อ อาโร เนอเต๊เห่ นี๋. หม่าแน๊เรอ เตเน ตาตาเตเต ตี๊กิ นี๋, เมเตเฮ๊เรอ เน โต ซิโตโคแก อาเห่ออาจา เด๊อ อา วี๊หม่า เร๊อ เหย่ซี เตซื๊อเตปล๊า เนอเต๊เห่ นี๋.

เตถู่เซ๊แถ่ อา เตกุยจ๊อเบ

24เป เก่ ถู่เซ๊แถ่ โหร่ลู จอแปแหร่ โป๊! แซ่ฮู๊ ซี เก่ แลคื๊อ แต่เหม่ อาเงเนอ, จอแปแหร่ เก่ แม๊ตู่ เมจว่า เร๊อดื่อ ซี นี๋. โท๊โต่ อา เก่ เอ๊กา เบ๊ดื่อ ซี เด๊อ อา เป๊เส่เง ปา เร๊อ ซี เตซื๊อ เก่ โอ่ ปา โต่, เร๊อ ซี เก่ ซิครือซิลอ หม่าแหน่ ดื่อ ปา นี๋. 25เป เก่ แด่ดุแด่ทู โหร่ลู จอแปแหร่ โป๊! จอแปแหร่ หม่า อา โอ่ ตื๊อ อา เตเพร แพ๊. เพร เด๊อ อา เมแลเปล๊กา เป หม่า ตื๊อ อา เตเพร แพ๊. เด๊อ เหย่ซู่ครี๊ อาขว่าอาคยาเร๊อ, เตเตอเรอดุเตอเรอทู, เตลี เตเตเค อาตว่า อาแร๊, เตโพรเตเตอเรอ เร๊อ เตเตอเรอฉว่าชอ เออเต๊เห่เนอ, อา เก่ โอ่เกอดื่อ เร๊อ จอแปแหร่ เป๊อแถ่ เด๊อ เตเต๊อเจ๋อ โอ่ ทวาแถ่ ล๋ายโต่ เบ๊อะเนอ, โต่กู๊แหน่, เร๊อ ตาแฮเง ตูจูเพรเง แตแลเคร๊ นี๋, อาเมน.