Luke 11

เหย่ซู่ อิซว๊า เป่ เตกุยจ๊อเบ อาหรี่อาแก

(มัทธิว ๖:๙-๑๓, ๗:๗-๑๑)

1เตอเนอเค เหย่ซู่ กุยจ๊อเบ เด๊อ เหล่โอ่ โต๊โผ่. เบ๊อะอา กุยจ๊อเบ โทเฮ๊อ อาเค, เด๊อ อา โคเจ่ เต๊เห่ อาเกล เตเพรเนอ อา เฮ๊ ลู เน๊อ, “แบ่เจ่, อิซว๊า เป่ เกอ เป เตกุยจ๊อเบ พู๊ คูยอห์น อิซว๊า เป่ อา โคเจ่ เต๊เห่เนอ.”

2เหย่ซู่ เฮ๊ เหย่ซี เน๊อ, “เบ๊อะซี กุยจ๊อเบ เบ๊อะเนอ, กุย แลแค ฮู๊เออ นี๋:
‘เก๋อ เพ อู เก่ แด่ดุแด่ทู ซิแหน่ซิเตเร เร๊อดื่อ เนมุย โพ๊แปละบูโพ๊ เออเนอ นี๋. เน เก่ แฮ ช๊อโอ่ เร๊อดื่อ เนเทอเนเก่ นี๋.
3เด๊อะเป่ เป เหล่เอ่เหล่โอ เด๊อ เป โหล่เบ่อา เตอเนอ เร๊อ เตอเนอ อาเง เออเนอ เต๊เห่ นี๋.
4ปลวาแก เหร่อเป่ เป เตซื๊อ เต๊เห่ นี๋. เมเตเฮ๊เรอ เป ปลวาแก โทเฮ๊อ อู เตเมซื๊อ เด๊อ อู เมซื๊อ เป เนอเต๊เห่ เฮ๊อ. นอจว๊าโน แต่ เป เด๊อ เตอิลออี๊โหล่ อาเกลเนอ แต่เหม่ นี๋.’”

5โทเร๊อ เหย่ซู่ เฮ๊ อา โคเจ่ เต๊เห่ เน๊อ, “เฮ๊โก๊เหร่อ เด๊อ ซีเกล เตเพร เพรเนอ อา เก่ จว๊า เด๊อ อา โคแบ๊ซว๊า เตเพร อาหี่ เบ๊อะเหมาะเนเค เร๊อ อา เก่ จว๊าเฮ๊ ลู เน๊อ, ‘โคแบ๊ซว๊า, เด๊อะโหล่เกอเหร่อ แว เนค๊อมู โซกล่อ. 6แว โคแบ๊ซว๊า เตเพร อา จว๊าแกล๊ เร๊อ อา แฮโตเกอ แว เร๊อ แว เหล่เด๊อะเอ่ฉื่อ อา เฉ่เอ่เฉ่โอ โอ่ ปา เตอเจ๋อ โต่ เฮ๊อ.’

7“เร๊อ อา โคแบ๊ซว๊า โอ่ เด๊อ หี่ด๊อกู เออเตเพร เก่ เฮ๊ฉื่อ ลู เน๊อ, ‘เมซู๊ซ๊า ปา แต่ แว แต่เหม่. แว เม หม่าเฮ๊อ แวกู่ดา เฮ๊อ, เร๊อ แว เร๊อ แวพู๊ เต๊เห่ เป จว๊าโอ่เมอ ลอ เฮ๊อ แว ก๊อถ่อ เด๊อ แจ่ ปา เน โต่.’ 8ฮู๊เนอเรอ แว เฮ๊ ซี, เด๊อคยา เร๊อ อาโค เออเตเพร ก๊อถ่อ เด๊อ เป่ ลู ค๊อมู, หม่าแน๊เรอ เด๊อ เหย่ซี ย๋อ โม หนิเร๊อ แหน่เจ๊อ ลู อาขว่าอาคยา เออเนอ หม่าโต่. อา ย๋อ กุยตื๊อดื่อ ลู อาขว่าอาคยา อา เด๊อ เป่ ลอ ลู ล๋อ เต เด๊อ อา โหล่ เนอเต๊เห่ แพ๊.

9“ฮู๊เนอ อาขว่าอาคยา แว เฮ๊ ซี, กุย มอ แลแค, ซี เก่ พย๊าหนิ ปา! แม๊ปู มอ แลแค, ซี เก่ แม๊เถอะ ปา, ด่อมอ แลแค กู่ดาเนอ, จอแปแหร่ เก่ บ๊าโม เป่ดื่อ ซี ปา. 10เมเตเฮ๊เรอ ล๋อ แกแย เด๊อ อา กุยเต เต๊เห่เนอ, อา เก่ พย๊าหนิ ปา, เร๊อ ล๋อ แกแย เด๊อ อา แม๊ปู เต เต๊เห่เนอ, อา เก่ แม๊เถอะ ปา, เร๊อ ล๊อ แกแย เด๊อ อา ด่อ กู่ดา เต๊เห่เนอ, จอแปแหร่ เก่ บ๊าโม เป่ ลู ปา.

11“ซี เด๊อ อา ทวา เพ เต๊เห่เนอ, ซีพู๊ เก่ กุยเอ่ ซี เต๊วพู๊ เฮ๊เรอ, ซี เด๊อะเอ่ อา เร๊อ หรู่ เนอหม่า อา โอ่ แหน่ เตเพร เพร แอ? 12หม่าโต่เรอ ซีพู๊ เก่ กุยเอ่ ซี ชาเดอะ เฮ๊เร๊อ ซี เด๊อะเอ่ อา เร๊อ แดเม แอ? 13ซี หม่า แกแย เด๊อ อา จามู๊แหม่ เต๊เห่แพ๊ ตื๊อดื่อเรอ ซี ซิเง เด๊อะเอ่ ซีพู๊ซีเลอ เต๊เห่ เร๊อ เตเด๊อ อาแร๊ เต๊เห่ เจ๊อ เก่เฮ๊เรอ, เตเนแม๊มอ แลแค ซีเพ เด๊อ ม๊อขุ เออเตเพรเนอ, อา เก่ เด๊อ หม่าแหน่ เป่ เจ๊อ แกแย เด๊อ อา กุยแถ่ ลู แหย่โยบูโพ๊แบ่เจ่ เออเนอ ปา.”

เหย่ซู่ เร๊อโลเน๊กู่กล๊อ เบ่เอลเซบูล

(มัทธิว ๑๒:๒๒-๓๐, มาระโก ๓:๒๐-๒๗)

14เหย่ซู่ เหว่เถ่แก โลเน๊ เด๊อ อา เมเป๊ อู เนอโตโด. เบ๊อะโลเน๊ เถ่จว๊าแก โทเฮ๊อ เบ๊อะเนอ, แกแยเป๊ เออเตเพร เฮ๊เบ่ แจ่ กาคยา คยาแซ๊ เร๊อ แกแย เบ๊หมู่ เต๊เห่ คย๊าอายื๊อ แหน่เจ๊อ. 15หม่าแน๊เรอ แกแย เต๊เห่เห่ เร๊อ อา เฮ๊ เน๊อ, “อา เหว่เถ่แก แจ่ โลเน๊ เต๊เห่ ฮู๊เออ เนอหม่า หม่าแพ๊ โลเน๊ กู่กล๊อดุ เบ่เอลเซบูล เด๊อ ลู เตโพรเตเตอเรอ แพ๊.” ^a 16แกแย เด๊อ อาโร เต๊เห่ แฮกุย ค๊าโข่แม๊บย่าแพ๊ เหย่ซู่ เน๊อ อา เก่ เด๊อะโล เป่ เหย่ซี เตโค๊ตีกลี๊เจ๊อ เด๊อ อา โอ่ เด๊อ ม๊อขุ แฮ เต๊อเจ่อเจ๊อ. ^b

17หม่าแน๊เรอ แบ่เจ่ เหย่ซู่ ซิเง เหย่ซี เตเหล่เตเน เต๊เห่ เร๊อ อา เฮ๊ เหย่ซี เน๊อ, “เก่เต๊เก่ อากูเนอ อาแกแย เต๊เห่ เก่ช๊าเก่ปา เกอเร๊อดื่อ ลู เตเพร เร๊อ เตเพร เก่เฮ๊เรอ อา ลูโพร๊ลูแพรแก ปา. หี่พู๊แพพู๊ โต๊โหมะ เด๊อ อา โครเคร เกอเร๊อ ลู โต่ เร๊อ อา เก่กย๊าเก่งา เกอเร๊อ ลู เฮ๊เนอ, อา เก่ ลูโพร๊ลูแพรแก ลอ ลู ปา. 18ฮู๊เนอ อาขว่าอาคยา, โลเน๊ กู่กล๊อดุ เก่ช๊ากาคยา เกอ เร๊อดื่อ อาเหน่ เฮ๊หม่า อาเทออาเก่ เต๊เห่เนอ อา โอกล่อโอ่หม่า แจ่โต่. หม่าเมเต แว เฮ๊ ฮู๊เออ เฮ๊เนอเรอ ซี เฮ๊ เร๊อ แว เหว่เถ่แก โลเน๊ เต๊เห่ เนอหม่า หม่าแพ๊ เบ่เอลเซบูล เด๊อ แว เตโพรเตอเรอ อาขว่าอาคยา แพ๊, ซี เฮ๊ แลแค ฮู๊เนอ. 19เก่ แว เหว่เถ่แก โลเน๊ เต๊เห่ เร๊อ เบ่เอลเซบูล อา เตโพรเตเตอเรอ แพ๊ เฮ๊เรอ, ซี โคเจ่ เต๊เห่ เหว่เถ่แก โลเน๊เต๊เห่ เร๊อ อูเป อา เตโพรเตเตอเรอ เป? ซี เฮ๊เบ่ เออ อาซื๊อ แพ๊ เนอ, ซี โคเจ่ เต๊เห่ เก่ เฮ๊ฉื่อเลอตื่อ ซี ปา. 20หม่าแน๊เรอ, แว เก่ เหว่เถ่แก โลเน๊ เออเต๊เห่ เร๊อ จอแปแหร่ อา เตโพรอาเตเตอเรอ เก่เฮ๊เรอ เออเนอหมา อา ยูโลเฮ๊อ เร๊อ จอแปแหร่ เก่ แฮเป๊อเทอ เป๊อเก่ เออเนอ อา แฮโต่เฮ๊อ เด๊อ ซี โอ่ เฮ๊อ.

21“เบ๊อะแกแย อ๊าฉว่าเหร่ชอ เตเพร โอ่ปวาโอ่ดวา เกอเร๊อ เน๊อ อา โจ๊โกโจ๊เบ เร๊อ อา โอ่ป่อ เกอเร๊อ อาหี่ เบ๊อะเนอ, อา ตาหมื่อตาเต เต๊เห่ โอ่เหม่ แจ่ โต่. 22หม่าแน๊เรอ, เบ๊อะแกแย อ๊าฉว่าเหร่ชอเล๊อ เร๊อ อา เตเพร แฮช๊าเป่แก อา เบ๊อะเนอ, อา เก่ พย๊าเผ่แก ลอ อู โจ๊โกโจ๊เบ เด๊อ อา ซิเล หนิเกอเร๊อ เออเต๊เห่ เร๊อ อา ตาหมื่อตาเต เออเต๊เห่เนอ, อา เก่ เบ เป่ ลอ เร๊อ อาโค เต๊เห่ ปา.

23“แกแย เตเพร เพร เด๊อ อา โป่ เกอเร๊อ แว โต่ เนอหม่า, หม่าเฮ๊อ แกแย เด๊อ อา ซิเถ่ เฮ๊อ แว เฮ๊อ. แกแย เตเพร เพร เด๊อ อา โอ่ปล๊อ เต่อเกอ แว โต่ เนอหม่า หม่าเฮ๊อ แกแย เด๊อ อา เม ลูโพร๊ลูแพร เต เฮ๊อ. ^c

โลเน๊ อา กา กาโน เมเบ่คยา อู

(มัทธิว ๑๒:๔๓-๔๕)

24“เบ๊อะโลเน๊ โตโด เถ่จว๊าแก โทเฮ๊อ เด๊อ แกแย เตเพร อาเหน่กู เบ๊อะเนอ, อา เถ่จว๊า เด๊อ เหล่โอ่ อาคราอาเขร่ โต๊โผ่ เร๊อ อา จว๊า แม๊ปู อาเหล่โอ่โก๊ เตเบ๊ซิพร๊า ตื๊อดื่อเรอ อา เก่ แม๊เถอะ อาเหล่โอ่ โตโพ๋ โต่ เฮ๊เรอ, อา เฮ๊แล เกอเร๊อ อาเหน่ เน๊อ, ‘แว เก่ กาคยา คยาแซ๊ เด๊อ แวหี่ เด๊อ แว เหล่เถ่จว๊าแก อา เนอเตเม เฮ๊หนิ,’ อา เฮ๊ ฮู๊เนอ. 25เร๊อ เบ๊อะอา กาโต่ คยาแซ๊ เด๊อ แกแย เนอเตเพร อา โอ่ เบ๊อะเนอ, อา กาแม๊เถอะ เด๊อ อาเหล่โอ่ เลอ เออเนอ, อาปลีอาโพ๊ แร๊ อา โอ่ ต๊าหน่าโตโช ตว่าแร๊ ลอปลี เจ๊อ ปว๊าเต๊อเจ่อ. 26เร๊อ อา เถ่จว๊า เอ๊กาหนิ โป่ อาโค เด๊อ อา จามู๊แหม่ เล๊อ เจ๊อ เนอ ลูเนอ โซซว๊าโตโด เจ๊อ, เร๊อ เหย่ซี กาโกโน โอ่ แลแค เบ๊อะเนอ. เร๊อ แกแย เนอเตเพร เก่ จา เล๊อ เจ๊อ เร๊อ อา เลอ อาเหล่โกล เนอ เจ๊อ ปา.”

เตเด๊อะบุ๊ยเด๊อะเตอเรอ หม่าแหน่เจ๊อ

27เบ๊อะเหย่ซู่ เฮ๊เบ่โท โหง่ ฮู๊เออ เบ๊อะเนอ, เพรเหมาะ เตเพร โอ่ เด๊อ แกแย โอ่โหร่โอ่เอ๊ อาเกล เร๊อ อา เอ๊โทจว๊า เหย่ซู่ เน๊อ, “เพรเหมาะ เด๊อ อา พู๊โอ่ เกอเร๊อ เน เร๊อ อา เด๊อะอินู๊ เกอ เร๊อ เน เนอเตเพร เนอหม่า หม่าเฮ๊อ เพรเหมาะ เด๊อ อา พย๊าหนิ เตเด๊อะบุ๊ยเด๊อะเตอเรอ เฮ๊อ.”

28หม่าแน๊เรอ เหย่ซู่ เฮ๊ฉื่อ ลู เน๊อ, “แกแย เด๊อ อา พย๊าหนิ หม่าแหน่เจ๊อ เตเด๊อะบุ๊ยเด๊อะเตอเรอ เนอหม่า หม่าเฮ๊อ แกแย เด๊อ อา หนิโฮ จอแปแหร่ อาลาอาโหง่ เร๊อ อา จูเอ่ เนอเต๊เห่ แพ๊.”

อู กุยแม๊ เตโคตีกลี๊ เต๊อเจ่อ

(มัทธิว ๑๒:๓๘-๔๒, มาระโก ๘:๑๒)

29เบ๊อะแกแย เบ๊หมู่ แฮโอ่ปลู เร๊อ แฮโอ่ปลู เด๊อ เหย่ซู่ โอ่ เบ๊อะเนอ, เหย่ซู่ เฮ๊ เหย่ซี เน๊อ, “แกแย เออตือทือ เต๊เห่ อาจาอาจือตื๊อดื่อ แหน่เจ๊อ. เหย่ซี จว๊ากูยแม๊ โต่ แว เตเม โค๊ตีกลี๊ เต๊อเจ่อ หม่าแน๊เรอ แว เก่ เด๊อะโล เป่ตื่อแพ๊ เหย่ซี โค๊ตีกลี๊ เต๊อเจ่อ เด๊อ อาแซ่เน๊อ เพรโพร โยนาห์ เนอ ปา แพ๊. ^d 30ฮู๊ โยนาห์ ทวาแถ่ เตม๊าเตแด เต๊อเจ่อ เด๊อ แกแยนีนะเวห์ เต๊เห่ อาเงเนอ, แกแยพู๊คู หม่าเฮ๊อ แวเออ อา เก่ หม่า เกอดื่อ เตม๊าเตแด เต๊อเจ่อ เด๊อ แกแย กู๊แหน่เออ ตือทือ เต๊เห่ อาเง ปา. ^e 31เตเมจากาคยา อาม๊อเนอ ปา เตอเนอเนอ, เก่ เด๊อ ซิแล ตากยา อาคุ๊ยโหมะ เหมาะเชบา เก่ ก๊อถ่อ เต่อเกอ เร๊อ แกแย เด๊อ อา เซอเพร กู๊แหน่เออ ตือทือ เต๊เห่ ปา, เร๊อ อา เก่ แด่เตซื๊อ เด๊อ เหย่ซี เออเต๊เห่ อาลู ปา, เมเตเฮ๊เรอ แซ่ฮู๊ อา หนิโฮน๊อ เกอ คุ๊ยซาโลมอน อา เตอิซว๊าอี๊แส่ เด๊อ อา เล๊อบา เร๊อ เตลีแม เออเต๊เห่ อาเงเนอเนอ, อา โอ่ เจ๊อ เด๊อ เก่ยา เด๊อ อาโร เต๊เก่ ตื๊อดื่อเรอ อา แฮ เจ๊อ. เร๊อ แว เฮ๊ ซี, แกแย เด๊อ อาดุเล๊อเล๊อ เจ๊อ เร๊อ คุ๊ยซาโลมอน เนอ อา โอ่ เบ๊อะเออ เตเพร. ^f 32ช๊า เตอาจา อาม๊อเนอ ปา เตอเนอเนอ, วีนีนะเวห์ เต๊เห่ เก่ ก๊อถ่อ เร๊อ แด่เตซื๊อ เด๊อ แกแย กู๊แหน่ เออตือทือ เต๊เห่ อาโอ่ ปา, เมเตเฮ๊เรอ เบ๊อะเหย่ซี หนิโฮเบ่ คูโยนาห์ แด๊โฉ่โด่แน เป่ เหย่ซี เบ๊อะเนอ, เหย่ซี ถู่แหล่แต๊แกละกาคยา แลแค อาซิปล่อ. เร๊อ แว เฮ๊ ซี, แกแย เด๊อ อาดุเล๊อเล๊อ เนอ คูโยนาห์ เนอ, อา โอ่ เบ๊อะเออ เตเพร. ^g

เหน่กล่อ อาเตลี

(มัทธิว ๕:๑๕, ๖:๒๒-๒๓)

33“อู ชีลี โท หมิ เร๊อ อู แด่โอ๊บี๊ ลู แตแค๋ โต่, เก่หม่าโต่เรอ อูโตโกล๊บี๊ เร๊อ ปู๊ แตแค๋ โต่. แซ่ฮู๊ อา เก่ ลี เป่ แกแย เด๊อ อา แฮโน เต๊เห่ อาเง เนอ, อู แด่แถ่ อา เด๊อ หมิเคว๊กออาเหร่ ขุโต. ^h 34ซี เป๊เส่ปล่อ เต๊เห่ เนอหม่า อาแซ่เน๊อ หมิเคว๊กอ เตเม เด๊อ ซี เหน่กล่อ อาเง เออเนอเฮ๊อ. ซี เป๊เส่ปล่อ เก่ ลีเช๊อแร๊ เฮ๊เรอ, ซี เหน่กล่อ เตเพรลอ โลลีโพ๊ แร๊ลอ เฮ๊อ, หม่าแน๊เรอ ซี เป๊เส่ เก่ คี๊ เฮ๊เรอ, ซี เหน่กล่อ เตเพรลอ อา คี๊ลอปลี เฮ๊อ. 35เมฮู๊เนอเรอ เตลี โอ่ เด๊อ ซีเหน่ลู เออเนอ, แซ่ฮู๊ อา เก่ ทวา ดื่อ เตคี๊เตลอ เตเมเนอ, รอหนิ แลแค ซีเหน่ นี๋. 36ฮู๊เนอเร๊อ ซี เหน่กล่อ เตเพร เก่ เล๊อบา เร๊อ เตลี, เร๊อ อา เก่ โอ่ เด๊อ เตคี๊เต่ลอ อากู โต่ เฮ๊เนอ, อา เก่ ลีเตเคโรโซ ลอ ซี เหน่ซีเตเพร แซ่เน๊อ หมิเคว๊กอ เตเม ลี เตเคโรโซแถ่ เด๊อ ซีเงเนอ ปา.”

เหย่ซู่ แด่เตซื๊อ เด๊อ ฟาริสี เร๊อ เพรอิซว๊า เตซว๊าเตแส่ อาซ๊าร๊า เต๊เห่ อาโล

(มัทธิว ๒๓:๑-๓๖, มาระโก ๑๒:๓๘-๔๐, ลูกา ๒๐:๔๕-๔๗)

37เบ๊อะเหย่ซู่ เฮ๊เบ่โท เบ๊อะเนอ, ฟาริสี เตเพร เอ๊เอ่ ลู ดี เร๊อ อา ครวาจว๊าเกอ เด๊อ ลูหี่. เหย่ซี เตเร เอ่ แลแค เฮ๊อ ดี เร๊อ อา จว๊า โอ่แนโอ่ แลแค เด๊อ ดีเหร่ ช๊า. 38เหย่ซู่ เตเร อาเอ่อาโอ เบ๊อะเนอ, อา ซู๊ปลี เกออา อากู๊ขุ โต่ เร๊อ ฟาริสี เด๊อ อา เครแม๊ ลู เออเตเพรเนอ, อา คย๊าอายื๊อ โกโน๋ โต่, เมเตเฮ๊เรอ แกแยยิวพู๊ อาเหล่โกล โอ่ เร๊อ เบ๊อะอู เอ่ แต่ล๋าย ดี โต่เนอ อู โตเบ่ ซู๊ปลีเหร่อ กู๊ขุ.

39ฮู๊เนอ อาขว่าอาคยา, แบ่เจ่ เหย่ซู่ เฮ๊ฉื่อ ลู เน๊อ, “ฟาริสี ซี, ซี ซู๊ปลี แร๊ แหน่เจ๊อ เบหล่อ เร๊อ ดีเบ เด๊อ อากลอ เนอตากยา เจ๊อ. หม่าแน๊เรอ เด๊อ ซี ซิปล่อกูเนอ, อา เล๊อบา เจ๊อ เร๊อ เตกู๊หว่ากู๊เว เอ่ หนิเร๊อดื่อเง เร๊อ เตมู๊แหม่รีแจ่ ซีเต๊เห่ เจ๊อ. 40แกแย โอ่เล๊อโอ่กลอ ซี๋, จอแปแหร่ เด๊อ อา แบ๊แล เตเด๊ออากลอ เออเตเพรเนอ, อากู เนอหม่า อา แบ๊แลแล, หม่าโต่ แอ? 41เต เด๊อ อา โอ่ เด๊อ ซี เบหล่อกู เร๊อ ซี ดีเบกู เนอเต๊เห่เนอ, เด๊อะแก เร๊อ แกแย โซพ๊าโซแรพู๋ เนอ ตื๊อหม่า เต ล๊อ ปลี เก่ โพ๊แปละอาโพ๊อาแปละ ลอ เด๊อ ซีเง แพ๊.

42“ฟาริสี ซี๋, เมจากาคยา เก่ เบ่ หม่าแหน่ เจ๊อ ซี ปา, เมเตเฮ๊เรอ ซี พย๊า หล่อแวเหล่, อี๊บ่อเข่เหล่ เร๊อ ล๋อ ส่อตอส่อเหล่ เออเต๊เห่ เนอเรอ ซี หลู่แต เร๊อ จอแปแหร่ ปุ๊ยเฉ๊อ ตีปุ๊ย. หม่าแน๊เรอ ซี แม๊ เบ๊ขุตาโผ่แกเฮ๊อ เตจ๊อเตเต เร๊อ เตโม จอแปแหร่ เต๊เห่ เฮ๊อ. ซี เด๊อ ปุ๊ยเฉ๊อ ตีปุ๊ย เนอหม่า อาหม่า เฮ๊อ. ตื๊อเนอโทโต่, ซี โตเบ่ แด่แกหนิ เตจ๊อเตเต เน๊อ เตโม จอแปแหร่ เออเนอเต๊เห่ โต่. ⁱ

43“ฟาริสี ซี๋, เมจากาคยา เก่ เบ่ หม่าแหน่ เจ๊อ ซี ปา, เมเตเฮ๊เรอ ซี ซิหยื่อ โอ่แนโอ่ แลแค เหล่โอ่ แถ่เล๊อ เด๊อ อู ซิแหน่ซิเตเร แด่ดุอา เด๊อ เตจ๊อเบโฮกู เนอเต๊เห่, โท๊โต่ เด๊อ เกล๊เบ่กู เนอเบ่เบ่ ซี ซิหยื่อ นอเฮ๊เบ่ แด่ดุ หนิ อู เร๊อ ซีเหน่.

44“เตเมจากาคยา เก่ เบ่ หม่าแหน่ เจ๊อ ซี ปา, เมเตเฮ๊เรอ ซี แซ่เร๊อ โลขุ เด๊อ อู เมม๊าเมแด ลู โต่ เต๊เห่, เร๊อ แกแย เต๊เห่ จว๊า เด๊อ ลูขุ ตื๊อดื่อเรอ อู ซิเง เร๊อ โลขุ หม่าโต่.”

45เพรอิซว๊า เตซว๊าเตแส่ อาซ๊าร๊า เตเพร เฮ๊ แบ่เจ่ เน๊อ, “ซ๊าร๋า, เน เฮ๊ โหง่ เออตือมือ เนอหม่า เน เฮ๊ โตโมเต๊เก่ เฮ๊ มู๊แหม่รีแจ่ แพ๊ เป วา.”

46เร๊อ เหย่ซู่ เฮ๊ฉื่อ อา เน๊อ, “เพรอิซว๊า เตซว๊าเตแส่ อาซ๊าร๊า ซี๋, เตเมจากาคยา เก่ เบ่ หม่าแหน่ เกอ เจ๊อ ซี ปา ปา, เมเตเฮ๊เรอ ซี แด่แถ่ เตซว๊าเตแส่ เด๊อ อูเหน่ลู อาแซ่เน๊อ เตวี๊เตแย๊ เด๊อ อูวี๊อูแย๊ อายูกย๊า โต่ เต๊เห่, ซี เนอ, ซี เก่ จอจว่า ป่าเกออู เตวี๊เตแย๊ เออเต๊เห่ อาเงเนอ, ซี เก่ จอแถ่จว่า เกอ แพ๊ เร๊อ ซี กู๊นอ เตเม แพ๊เนอ, ซี แฮโต่เบ่ โต่.

47“ซี เบ่เบ่, จอแปแหร่ เก่เม จา แหน่ เจ๊อ ซี ปา, เมเตเฮ๊เรอ ซีเพอซีโพ เมเซอ เพรโพร มู๋ หนู่เค เต๊เห่เนอ ซี แบ๊ เป่ เหย่ซี อาโลกู เร๊อ หล่อ เน๊อ. 48ฮู๊เนอเร๊อ ซี ข่าเฮ๊โล โล๊ลี เจ๊อเฮ๊อ ซีเหน่ เร๊อ ซี ซิปล่อ โอ่จิจือ เต่อเกอ, ซี ซิปล่อ แซ่เกอเฮ๊อ เร๊อ ซีเพอซีโพ เด๋อ งย๊า เค เต๊เห่ เมเตซื๊อ เนอเต๊เห่ เฮ๊อ. เมเตเฮ๊เรอ ซีเพอซีโพ เต๊เห่ อา ย๋อ เมเซอ เพรโพร เนอเต๊เห่, ซี เร๊อ ซี อา แบ๊ เป่ เพรโพร เนอเต๊เห่ อาโลกู อา ย๋อ เมเนอ. 49เด๊อ เตหรี่เตแก เออเต๊อเจ่อ อาขว่าอาคยา, จอแปแหร่ โอ่ เร๊อ อา เตลีแม เร๊อ อา เฮ๊ เน๊อ, ‘แว เก่ นอจว๊า เป่ เหย่ซี เพรโพร เต๊เห่, เร๊อ เพรโด่แนพู๊ เต๊เห่ ปา, เร๊อ เหย่ซี เก่ เมเซอแก เต๊เห่เห่ ปา, เต๊เห่เห่เรอ เหย่ซี เก่ เมจาเมจือ ลู ปา.’ 50ฮู๊เนอ อาขว่าอาคยา, เป๊อแถ่ เด๊อ เห่ขุทวาลู่ ม๊อขุทวาเซ เบ๊อะเนอ, ล๋อ แกแย เด๊อ อา เมเซอ เพรโพร เต๊เห่ อา เตซื๊อเนอ, จอแปแหร่ เก่ เมจากาคยา เด๊อ แกแย เออตือทือเต๊เห่ ปา. 51แว เฮ๊ ซี๋, เป๊อแถ่ เบ๊อะเพอาดัม อาพู๊ เมเซอ หนิเร๊อ อาโป่ คูอาแบล ^j เนอเรอ โต่แฮ เด๊อ อู เมเซอ คูเศคาริยาห์ เด๊อ เตหลู่แต อาเหล่โอ่ เร๊อ เตมวาปลีบูโพ๊ อาเปล่กูเนอ, จอแปแหร่ เก่ เมจากาคยา หม่าแหน่ เจ๊อ เด๊อ ซี เออตือทือ เต๊เห่ ปา. ^k

52“เพรอิซว๊า เตซว๊าเตแส่ อาซ๊าร๊า ซี๋, เตเมจากาคยา เก่เบ่ หม่าแหน่ เจ๊อ ซี ปา, เมเตเฮ๊เรอ ชอถิ เด๊อ อู เหล่วีโม เตลีแม อาหี่ อากู่ดา เออเนอ, ซี พย๊าจว๊าแก. ซีเหน่ เร๊อดื่อ เร๊อ ซี โน โต่โต่, แกแย เด๊อ อา ซิหยื่อ จว๊าโน เต๊เห่ เร๊อ ซี เมตาตือ เหย่ซี ซี.”

53เบ๊อะเหย่ซู่ เถ่จว๊าแก โทเฮ๊อ เหย่ซี เหล่โอ่ เบ๊อะเนอ, เพรอิซว๊า เตซว๊าเตแส่ อาซ๊าร๊า เต๊เห่ เร๊อ ฟาริสี เต๊เห่เนอ, อา เมโตโมเต๊เก่ แหน่เจ๊อ ลู เร๊อ แม๊ปู แด๊เฮอโทแด๊เฮอแล เอ๊ลา เหย่ซู่ โหง่ เต๊เห่. 54แซ่ฮู๊ เหย่ซี เก่ ปื่อหนิ ลู เตเฮ๊เบ่ซื๊อ เต๊เห่เนอเรอ, เหย่ซี โอ่ป่อ หนิดา ลู เตเฮ๊เบ่ เต๊เห่.