Luke 13

ซี เก่ แด่ เต๊เปล่คยาแซ๊ ซีซิปล่อ โต่หม่า ซี เซอ ปา

1เบ๊อะเนอเค แกแย เต๊เห่ แฮ แด๊โฉ่โล เหย่ซู่ เร๊อ เบ๊อะกาลิลีพู๊ เต๊เห่ หลู่แตแถ่ เบ๊อะเนอ, โรมัน คุ๊ยปีลาต อาเกลอฮู๊ เต๊เห่ เมเซอ เหย่ซี. 2เร๊อ เหย่ซู่ เฮ๊ฉื่อ เหย่ซี เน๊อ, “อู เมเซอ กาลิลีพู๊ เต๊เห่ ฮู๊เออ เร๊อ ซี เตเน เน๊อ เหย่ซี หม่า อา เตซื๊อเตปล๊า เต๊เห่ มู๊แหม่รีแจ่เล๊อ เร๊อ ลอ กาลิลีพู๊ เด๊อ อาโรเต๊เห่ ฮู๊เนอ แอ? 3แว เฮ๊ ซี, เหย่ซี เตซื๊อเตปล๊าโอ่เอ๊เล๊อ เร๊อ ซี หม่าโต่. ซี เบ่เบ่, ซี เก่ ถู่แหล่เต๊เปล่กาคยา เกอ แลแค ซี ซิปล่อ โต่ เฮ๊เนอหม่า, ซี เก่ อาเซอ เกอ ลอ ปว๋า เตเพร ปา. 4เบ๊อะสิโลอัม หี่แถ่โล เนอเตเม ตาพรอ เซอ แกแย เช๊อลุยซว๊า เบ๊อะเนอ, ซี เตเน เร๊อ เหย่ซี หม่า อา เตซื๊อเตเตปล๊าโอ่ เอ๊เล๊อ เร๊อ ล๋อ แกแย อาโร เด๊อ อา โอ่ แลแค เด๊อ วีเยรูซาเล็ม อากู เนอเต๊เห่ แอ? 5อาหม่าโต่, แว เฮ๊ ซี, ซี เออเต๊เห่ เบ่เบ่, ซี เก่ ถู่แหล่แต๊แกละแลแค ซีซิปล่อ โต่ เฮ๊เนอหม่า, ซี เก่ เซอเกอ ลอ ปว๋า เตเพร ปา.”

เตโด่แน ค๊าโข่ ก่อดุ๊ยเหมาะ เด๊อ อาเส่ เกออู โต่ เออต๊อเหมาะ อาหรี่อาแก

6โทเร๊อ เหย่ซู่ โด่แน เป่ เหย่ซี เร๊อ โหง่ค๊าโข่ โต๊โต่ เร๊อ อา เฮ๊ เน๊อ, “เบ๊อะเตอโพ๊, แกแย โอ่ เตเพร, เร๊อ เด๊อ อา เตโหล่เตชูเผ่ขุเนอ, อา ช๊อโอ่ เกอเร๊อ เกอ อา ก่อดุ๊ยเหมาะ เออต๊อเหมาะ. เร๊อ อา จว๊า แม๊ปูด่าเอ่ เกอเร๊อ อา ก่อดุ๊ยเส่, หม่าแน๊เรอ อา แม๊เถอะ อาเส่ โอ่ ตอปล๊อ โต๋. 7เนอ, อา เฮ๊ เพรแม๊ตู่เร๊อ เตโหล่เตชูเผ่ขุเนอ เออเนอ เน๊อ, ‘แว จว๊า แม๊ปู ด่าเอ่ ก่อดุ๊ยเหมาะ เนอ เต๊อเสาะ อาเส่เนอ อา บาเฮ๊อ โซหน่า เฮ๊อ ตื๊อดื่อเรอ แว แม๊เถอะ อาเส่ ตอปล๋อ โต่. กวา แลคื๊อแก อา เนอ, อา โอ่ ดี๊แดแกเด แพ๊ เห่ขุ แพ๊.’

8“หม่าแน๊เรอ เพรแม๊ตู่ เตโหล่เตโชเผ่ เออเตเพร เฮ๊ฉื่อ ลู เน๊อ, ‘แบ่เจ๋, แม๊ โป่ โก๊หลื่อ แพ๊ เออต๊าหน่า เนอแพ๊. แว เว ตาวา เหร่อ อาแกช๊า ปา เร๊อ แว แด่โน เร๊อ อาเหล่เอ่ ปา. 9หน่าเบ่ ปา หม่า อา เกล๊ เส่แร๊ แหน่ ดื่อ ปา. อา เก่ เส่โต่ เฮ๊ ปา เรอ แว กวาแก ดื่อ อา ปา.’”

เหย่ซู่ แหย่โอ่เหม่ เพรเหมาะแหง่ตอคอ เตเพร เบ๊อะแกแยยิวพู๊ ม๊อเนอโด่ เบ๊อะเนอ

10เบ๊อะแกแยยิวพู๊ ม๊อเนอโด่ เบ่ เตอเนอเคเนอ, เหย่ซู่ อิซว๊าอี๊แส่ตา อู เด๊อ เตจ๊อเบโฮ เตเม อากู. 11เบ๊อะเตจ๊อเบโฮกูเนอ, เพรเหมาะ เด๊อ โลเน๊ เมเบ่ ลู เร๊อ อาเตเช แหง่ตอคอ โอ่แต่ โอ่ เตเพร. อา ข่าเบ่ ฮู๊เออเนอ อา งยา เจ๊อเฮ๊อ อาหน่า เช๊อลุยซว๊า เจ๊อ เฮ๊อ. 12เบ๊อะเหย่ซู่ แม๊เถอะ ลู เบ๊อะเนอ อา เอ๊แฮ ลู เด๊อ เง เร๊อ อา เฮ๊ ลู เน๊อ, “เหมาะโหม๋, เน เตเช โอ่เหม่ เฮ๊อ.” 13เร๊อ อา แด่แถ่ อากู๊ขุ เด๊อ ลูเหน่ลู เร๊อ โตโพ๊โต อาแหง่ จ๊อแถ่คยา เร๊อ อา ถู่เซ๊แถ่ จอแปแหร่.

14หม่าแน๊เรอ เหย่ซู่ แหย่โอ่เหม่ เป่ อู เตชุ๊ยเตเช เด๊อ แกแยยิวพู๊ อา ม๊อเนอโด่ อาขว่าอาคยา, เตจ๊อเบโฮกู่กล๊อ เออเตเพร ซิปล่อดุ, เร๊อ อา เฮ๊ แกแย เบ๊หมู่ เต๊เห่ เน๊อ, “ม๊อเนอม๊อเซ เด๊อ เป เบ่ เม, เปเบ่เอ่แร เนอ, อา โอ่ เนอโซซวา เจ๊อ. แฮ แหย่โอ่เหม่ แลแค ซี เตชุ๊ยเตเช เบ๊อะม๊อเนอ โซซว๊าเออ อากูเนอ. ม๊อเนอโด่ เร๊อ แฮแหย่ แต่ แลแค ซีเหน่ แต่เหม่.” ^a

15เร๊อ แบ่เจ่ เฮ๊ฉื่อ กาคยา ลู เน๊อ, “เพร จ่าจ๊อจ่าเต บย่าแพ๊ อาเหน่ ซี๋, ซี ปว๋า เตเพร ฉิโล๊ แลแค ซี ปู่เปลอ, หม่าโต่เรอ ซี ตีซิเปลอ เด๊อ อาโปกู เร๊อ ซี จุ่ยเถ่จว๊า โบ่โอ อาเทอ เบ๊อะแกแยยิวพู๊ ม๊อเนอโด่ เบ๊อะเนอ หม่าโต่ แอ? 16กู๊แหน่เรอ เพอับราฮัม อากลุยแล เพรเหมาะ เด๊อ โลเน๊ กู่กล๊อ นอจอกลอหม่า โลเน๊ เร๊อ เพรเหมาะ เออเตเพรเนอ, อา โอ่งยา เจ๊อเฮ๊อ อาหน่า เช๊อลุยซว๊า เนอ อา โอ่เบ๊อะเออ เตเพร. เร๊อ ฉิโล๊ แลเปล๊แก เป่ อา เร๊อ โลเน๊ กู่กล๊อ จอกลอหม่า ลู เออ เบ๊อะแกแยยิวพู๊ อา ม๊อเนอโด่ เออเนอหมา, อา โต แหน่โต่ แฮ?”

17เบ๊อะเหย่ซู่ เฮ๊ฉื่อ โหง่ เออตือมือ เบ๊อะเนอ, ล๋อ แกแย เด๊อ อา แม๊ปู ลู เตซื๊อ เนอเต๊เห่ ซิเตเร แล เกอเร๊อ ลอปลี อาเหน่. หม่าแน๊เรอ เหย่ซู่ เม เตโค๊ตีกลี๊เจ๊อ ลอปลี เออ อาขว่าอาคยา, แกแย เบ๊หมู่ ซิปล่อโม ลอปลี เจ๊อ ปว๋า เตเพร.

เตโด่แน ค๊าโข่ เร๊อ เต๊เปล่ปล่อ อาหรี่อาแก

(มัทธิว ๑๓:๓๑-๓๓, มาระโก ๔:๓๐-๓๒)

18โทเร๊อ เหย่ซู่ เฮ๊ เน๊อ, “จอแปแหร่ เทอเลเก่กู เนอหม่า อาแซ่เน๊อ หม่าเต? แว เก่ โตโหล่ แบ๊บือแม๊ เป่ ซี เร๊อ หม่าอิเต? 19จอแปแหร่ เทอเลเก่กู เนอหม่า อาแซ่เน๊อ แกแย เตเพร โหล่แด๊ เต๊เปล่ปล่อ ต๊อปล๊อ เด๊อ อาเพร๊ขุ เนอเฮ๊อ. อา เพ๊แถ่ เร๊อ อา ดุแถ่ทูแถ่ แซ่เน๊อ ส่อเหมาะเนอ, เร๊อ โต่ เจ๊อ เด๊อ ถู่พู๊โหย่พู๊ เต๊เห่ แฮเม แลแค อาปุย เด๊อ อาแพ ลูเต๊เห่เจ๊อ.”

เตโด่แน ค๊าโข่ เร๊อ โฮหมื่อ อาหรี่อาแก

20เร๊อ เหย่ซู่ เฮ๊ โป่ เน๊อ, “จอแปแหร่ เทอเลเก่กู เนอหม่า แว เก่ โตโหล่ แบ๊บือแม๊ เป่ ซี เร๊อ หม่าอิเต? 21จอแปแหร่ เทอเลเก่กู เนอหม่า อาแซ่เน๊อ เพรเหมาะ เตเพร พย๊าหนิ โฮหมื่อ เร๊อ อา จี่หมื่อ ลุ๊ยเต่อ เร๊อ ดีเพ๊ ตูปลูเต๊เผ่ อาเกล เร๊อ อาเซ โต๊โผ่ แถ่ลอปลี ดีเพ๊ เออเนอเฮ๊อ.”

กู่ดา อิ

(มัทธิว ๗:๑๓, ๑๔, ๒๑-๒๓)

22เบ๊อะเหย่ซู่ จว๊า เด๊อ วีเยรูซาเล็ม เบ๊อะเนอ, อา อิซว๊าอี๊แส่ จว๊า รว๊า อู เด๊อ แกล๊ลู, ตีวี โท ตีวี, ตอดอโท ตอดอ เจ๊อ. 23โทเร๊อ แกแย เตเพร แด๊เฮอ ลู เน๊อ, “แบ่เจ๋ แกแย เด๊อ อา พย๊าหนิ เตเมแลเปล๊กา เต๊เห่เนอหม่า, แกแย โอ่ ปีตี๊ แพ๊ แอ?”

เร๊อ เหย่ซู่ เฮ๊ฉื่อ เหย่ซี เนอ, 24“แอ๊จื๊อ จว๊าแม๊ปูโน แลแค เด๊อ กู่ดา อาอิ เนอตูกู, เมเตเฮ๊เรอ, แกแย เต๊เห่ แอ๊จื๊อจว๊าแม๊ปูโน โรแหน่เจ๊อ ตื๊อดื่อเรอ อา โนเบ๊ แลแค โต่. 25หี่แบ่เจ่ อา เก่ ก๊อถ่อ เมบี๊แกเผ่ ซี กู๊ดา โตโพ๊ ปา. เบ๊อะเนอโตโพ๊ ปา ซี เก่ ก๊อถ่อ โอ่ เด๊อ อากลอ ปา เร๊อ ซี เก่ ด่อ กู๊ดา ปา. เร๊อ ซี เก่ เฮ๊ เน๊อ, ‘แบ่เจ่ บ๊อโม เป่เร๊อ เป กู่ดา.’

“เร๊อ อา เก่ เฮ๊ฉื่อ ซี เน๊อ, ‘ซี หม่า แกแย โตเบ๊อะเนอ, แว ซิเงน๊อ ซี โต่.’

26“เบ๊อะเนออาเค, ซี เก่ เฮ๊ฉื่อ อา เน๊อ, ‘เป เอ่โอเต่อ โทเฮ๊อ เกอ เร๊อ เน ว๊า, เน อิซว๊าอี๊แส่ตา โทเป่เฮ๊อเป เด๊อ เป วีกู เนอ ว๊าว๊า.’

27“หม่าแน๊เรอ อา เก่ เฮ๊ฉื่อ โป่ ซี เน๊อ, ‘ซี หม่า แกแย โตเบ๊อะเนอ แว ซิเงน๊อ ซี โต่. ล๋อ ซี เออเต๊เห่ เนอหม่า แกแย เด๊อ อา เม เตมู๊แหม่รีแจ่ เนอเต๊เห่ แพ๊. เถ่จว๊า ตาพาแก ยา แลแค เร๊อ แว เนอ.’ ^b

28“เด๊อ จอแปแหร่ เทอเลเก่กู เนอ, ซี แม๊เถอะ เร๊อ เพอับราฮัม, อิสอัค, ยาโคบ เร๊อ เพรโพร ล๋อ ปลี เนอเต๊เห่ แฮ โนลอ เบ๊อะเนอ ตื๊อดื่อเรอ ซี แหน่แบ่เจ่ เร๊อดื่อ เร๊อ อู เก่ เหว่เถ่แก ซี เด๊อ อากลอ ปา. เหล่โอ่ เบ๊อะซี เก่ จว๊า โอ่ เออโต๊โผ่ ปาเนอ, ซี เก่ จว๊า โหง่แปล่โหง่แร เร๊อ ซี เก่ ตาจ๊า เกอเร๊อ ลอ เจ๊อ ซี กู่เคอ ปา. ^c 29แกแย โอ่ เด๊อ ชี๊โน, ซิเเถ่, ซิเถ่, ซิแล เต๊เห่ อา แฮ ปา เร๊อ เหย่ซี เก่ แฮโน โอ่แนพย๊า แลแค อาเหล่โอ่ เด๊อ จอแปแหร่ อาเทออาเก่กู เนอ ปา. 30เบ๊อะเนอ อาเคปา เนอ, แกแย โอ่ เด๊อคยา เต๊เห่ อา แฮโต่ เหร่อเล๊อ เด๊อ เง ปา, เร๊อ แกแย โอ่ เด๊อ เง เต๊เห่เนอ, อา เก่ แฮ ตาเนอแก เด๊อคยา ปา.” ^d

เหย่ซู่ โมเร๊อ วีเยรูซาเล็มพู๊ เต๊เห่

(มัทธิว ๒๓:๓๗-๓๙)

31เบ๊อะเนอเค, ฟาริสี เต๊เห่ แฮ เด๊อ เหย่ซู่ โอ่ เร๊อ อา แฮ เฮ๊ ลู เน๊อ, “เน โต เถ่จว๊า ตาพาแก เด๊อ อาโร โต๊โผ่, เมเตเฮ๊เรอ คุ๊ยเฮโรด ซิหยื่อ เมเซอ เน.”

32เร๊อ เหย่ซู่ เฮ๊ฉื่อ เหย่ซี เน๊อ, “จว๊าแด๊โฉ่ เป่ ถุ่ยมีเนอ, ‘เออเตอเนอ เร๊อ ป่าโร ปาเนอ, แว เก่ เหว่เถ่แก โลเน๊ เต๊เห่ ปา, โทเรอ แว เก่ แหย่โอ่เหม่ เตชุ๊ยเตเช เต๊เห่ ปา. โซเนอ เตอเนอ ปาเนอ, แว เก่ เมโทแก แว เตเอ่เตแร ปา.’ 33หม่าแน๊เรอ เออเตอเนอ เร๊อ ป่าโร เร๊อ โชวี๊ ปาเนอ, แว โตเบ่ เถ่จว๊า แฮเง ตื๊อดื่อปา แกล๊. แว หม่าเฮ๊อ จอแปแหร่ อาเพรโพร เออ เบ่ จว๊าเซอ แหน่ เด๊อ วีเยรูซาเล็ม อากูเนอ ปา เฮ๊อ, เมเตเฮ๊เรอ เหล่โอ่ เบ๊อะเนอโต๊โผะ หม่า เหล่โอ่ เด๊อ อู เหล่เมเซอ จอแปแหร่ อาเพรโพร เต๊เห่ เฮ๊อ.

34“เก๋อ วีเยรูซาเล็ม, เมอเยรูซาเล๋ม เพรโพร เด๊อ อู นอแฮ เหย่ซี เด๊อ เนโอ่ เต๊เห่เนอ, เต๊เห่เห่เร๊อ เน เมเซอแก เหย่ซี, เต๊เห่เห่เร๊อ เน ต่า เหย่ซี เร๊อ หล่อ. ฮู๊ ชาโหมะ ตอกอเตเกบี๊ เกอเร๊อ อาพู๊ เด๊อ อาด๊าเล เนอ, แว แอ๊จื๊อตอกอเตเกบี๊ หนิ โตโมโม เจ๊อ เน ตื๊อดื่อเรอ เน ซิหยื่อ นอเตเกบี๊ หนิ แว เร๊อ เนเหน่ โต่. 35แม๊มอ แลแค๋ จอแปแหร่ เก่ แด่โอ่แหร่แก ตื้อดื่อ ซี เตหลู่เตโฮ เออเนอ ปา. เร๊อ แว เฮ๊ ซี, ซี เก่ แม๊เถอะ ตื๊อดื่อ แพ๊ แว เน๊อ ช๋า ซี เฮ๊เฮ๊อ เน๊อ, ‘แกแย เด๊อ อา แฮ เด๊อ จอแปแหร่ อามุยกู เออเตเพรเนอ, อา เก่ พย๊าหนิ ดื่อเฮ๊อ เตเด๊อะบุ๊ยเด๊อะเตอเรอ นี๋.’ ซี เฮ๊โทเฮ๊อ ฮู๊เนอปาเร๊อ ซี เก่ แม๊เถอะ คยาแซ๊ เนอ แว ปา.” ^e