Luke 15

ซิหมิ เด๊อ อา โอ่เหม่ โตโด

(มัทธิว ๑๕:๑๒-๑๔)

1เบ๊อะเตอโพ๊ เพรก่อยอาหมู่อาร๊า เต๊เห่ เร๊อ เพรเตซื๊อโอ่ เต๊เห่ แฮ โอ่ปลู ตาวา หนิดา แลแค เหย่ซู่ อา เตโด่แนเฮ๊เบ่ เต๊เห่. ^a 2ฟาริสี เต๊เห่ เร๊อ เพรอิซว๊า เตซว๊าเตแส่ อาซ๊าร๊า เต๊เห่ ตามวาเตเล เกอลอดื่อ เหย่ซู่ แหย่โย เน๊อ, “แกแย เออเตเพร เอ๊โมฉื่อ เพรเตเหล่ซื๊อโอ่ เต๊เห่, เร๊อ อา จว๊า เอ่เต่อโอเต่อเกอ เจ๊อ เร๊อ เหย่ซี ว๋า!”

3ฮู๊เนอ อาขว่าอาคยา, เหย่ซู่ แด๊ เบ่ เป่ เหย่ซี เร๊อ โหง่ค๊าโข่ โต๊โต่ เร๊อ อา เฮ๊ เนอ, 4“เฮ๊โก๊เหร่อ แกแย เตเพร เพร เด๊อ ซีเกลเนอ, อาซิหมิ ▼

▼ซิหมิ

โอ่ อาโด เตเย เร๊อ อา เก่ โอ่เหม่แก เป่ ลู โตโด เฮ๊เนอ, อา เก่ เมฮู๊เต? อา เก่ แด่แก ซิหมิ ลุยซว๊าเตอเชอ เร๊อ ลุยซว๊า โตโด เออเนอ เด๊อ อาเหล่เอ่ขุ เร๊อ อา เก่ จว๊าแม๊ปู อา โอ่เหม่ เออโตโด ทู๋ อา แม๊เถอะ กาคยา คยาแซ๊ อา ปา หม่าโต่ แอ? 5เบ๊อะอา แม๊เถอะ กาคยา คยาแซ๊ เฮ๊อ ลู เบ๊อะเนอ, อา เก่ ซิกอล๊อแกแน เร๊อ อา เก่ กว่ากา ลู เด๊อ อาแก่โบขุ ปา. 6เร๊อ อา เก่ กว่ากา เกอเร๊อ ลู เด๊อ หี่ ปา. เร๊อ อา เก่ หม่าแฮ ปล๊อหนิ อา โคแบ๊ซว๊า เร๊อ อาหี่ หี่แพหี่ช๊า เต๊เห่ เร๊อ อา เก่ เฮ๊ เหย่ซี เน๊อ, ‘แว แม๊เถอะ กาคยา คยาแซ๊ เฮ๊อ แว ซิหมิ เด๊อ อา โอ่เหม่ เออเนอ โตโด เฮ๊อ, เร๊อ แว ซิครือ แหน่เจ๊อ, เร๊อ แฮ ซิครือซิลอ เต่อเกอ แลแค เร๊อ แว.’ 7อา แซ่ เกอดื่อ ฮู๊เนอเฮ๊อ, แว เฮ๊ ซี, เพรเตซื๊อพู๊ เตเพร ถู่แหล่เต๊เปล่กา คยาแซ๊ อาซิปล่อ อาขว่าอาคยา, เด๊อ ม๊อขุเนอ อู เก่ ซิครือซิลอ เล๊อเล๊อ ปา เจ๊อ เร๊อ แกแยจ๊อ แกแยเต่ ลุยซว๊าเตอเชอ เร๊อ ลุยซว๊าเตเพร เด๊อ อา โหล่ ถู่แหล่เต๊เปล่กาเกอ อาซิปล่อ โต่ เออเนอ เต๊เห่ เจ๊อ.

รือหย่า เด๊อ อา โอ่เหม่ เต๊เบ่

8“โต่หม่าแน๊, เฮ๊โก๊เหร่อ เพรเหมาะ เตเพร เด๊อ อารือหย่าโอ่ อาเบ่เช๊อ เร๊อ เก่ อา โอ่เหม่ เป่แก ลู เต๊เบ่ เฮ๊เนอหม่า อา เก่ เมฮู๊เต? อา เก่ ชีลี หมิ, โทเร๊อ อา เก่ ดูปลีดูหล่า อาหี่, เร๊อ อา แม๊ปู ตาเต ทู๋ อา แม๊เถอะ เจ๊อ แวเฮ๊แต. 9เบ๊อะอา แม๊เถอะ กาคยา คยาแซ๊ เฮ๊อ เบ๊อะเนอ, อา เก่ หม่าแฮปล๊อ อา โคแบ๊ซว๊า เร๊อ อาหี่ หี่แพหี่ช๊า เต๊เห่ เร๊อ อา เก่ แด๊โฉ่โล เป่ เหย่ซี เน๊อ, ‘แว แม๊เถอะ กาคยา คยาแซ๊ เฮ๊อ แวรือหย่า เด๊อ อา โอ่เหม่แก เออเตอเบ่ อาขว่าอาคยา, แว ซิครือ แหน่เจ๊อ เร๊อ แฮ ซิครือซิลอ เต่อโหร่เกอ แลแค เร๊อ แว.’ 10ฮู๊เนอเฮ๊อ, แว เฮ๊ ซี๋, เพรเตเหล่ซื๊อโอ่ เตเพร ถู่แหล่แต๊แกละกาคยาแซ๊ อาซิปล่อ อาขว่าอาคยา, จอแปแหร่ อา เตเน่วม๊อขุพู๊ เต๊เห่ ซิครือซิลอ แหน่เจ๊อ.”

พู๊คู เด๊อ อา โอ่เหม่ เตเพร

11เหย่ซู่ เฮ๊ โป่ เน๊อ, “เบ๊อะโตโพ๊ แกแย โอ่เตเพร, อา พู๊เพรคู โอ่ ซิเนอ. 12อาโป่ เตเพร กา เฮ๊ อาเพ เน๊อ, ‘เพ๋ อู่เจเต๊เหย่ เด๊อ แว โตเบ่ พย๊าหนิ เกอ เต๊เห่เนอ, เด๊อะมอเฮ๊อ แว กู๊แหน่.’ ฮู๊เนอ อาขว่าอาคยา, อาเพ เบตา เป่แก อาพู๊ เออซิเนอ อู่เจเต๊เหย่ เออเต๊เห่.

13“งยาแต่โต่ เร๊อ อาโป่ เออเตเพรเนอ, อา พย๊าหนิ ลอ ล๋อ อา อูเจเต๊เหย่ เด๊อ อาเพ เด๊อะ อา เออเต๊เห่ เร๊อ อา เถ่จว๊าแก เด๊อ เก่ยา เต๊เก่. เร๊อ อา จว๊า เมลอแกเด ลอ อารือ เร๊อ อา เตเอ่มือโอแพร๊, อา ลือ แบ๊ซว๊าเพรเหมาะ มู๊แหม่ เต๊เห่. 14เบ๊อะอา เม ลอแก ลอ เฮ๊อ อารืออาเท เด๊อ อา โอ่ เร๊อ อา เต๊เห่ เบ๊อะเนอ, เตโอ่วีโอ่กอ โอ่แถ่ เด๊อ เก่ เบ๊อะเนอเต๊เก่ อากู, เร๊อ เตอเจ๋อ โอ่ปา เร๊อ ลู โต่. 15ฮู๊เนอ อาขว่าอาคยา. อา จว๊ากูย แรเกอ เต เด๊อ เทอพู๊เก่พู๊ เบ๊อะเนอ เตเพร อา โอ่ เร๊อ อา นอจว๊าเก ลู แท๊ เด๊อ อา เพร๊ขุ โต๊โผ่. 16เออโตโพ๊เรอ อา แลแด๊ ซิเอ่ซิโอ เร๊อ อา โต่ เจ๊อ เด๊อ อา ซิหยื่อ เอ่ เกอ แหน่เจ๊อ ก๊อบีเส่ เด๊อ แท๊ เออเต๊เห่ เอ่ เออเนอ ตื๊อดื่อเรอ อู เด๊อะเอ่ เป่ ลู เหล่เอ่ เตเพร่ว โต่.

17“เด๊อคยาเนอ, อา ซิเงแลคยาแซ๊ เกอเร๊อ อาเหน่ เร๊อ อา เฮ๊ เน๊อ, ‘ล๋อ เพรแรเต เออเนอ เด๊อ แวเพ อาหี่ เนอเต๊เห่หม่า, อา เอ่ก๊อโอบา ลอ แลแค, โท๊โต่ อา โอ่เล๊อแก ปลูเผ่ เจ๊อ แหน่ เฮ๊อ, แว เร๊อ แว เตเร จว๊า โอ่วีโอ่กอ เซอ เจ๊อ เบ๊อะเออ เจ๊อ เฮ๊อ. 18แว โต ก๊อถ่อ กาคยา คยาแซ๊ เด๊อ แวเพ โอ่ เร๊อ แว โตเบ่ กา เฮ๊ แวเพ เน๊อ, “เพ๋ แว เมซื๊อเฮ๊อ จอแปแหร่ เร๊อ เน เฮ๊อ. 19อู เก่ เอ๊ แว เร๊อ เน พู๊เพรคู เตเพรเนอ อา โต ปา โต่ เฮ๊อ. แด่ แว ฮู๊ เน เพรแรเต เออเนอ เด๊อ อา แฮแด่เก่เอ่ แพ๊ เด๊อ อาเนอกู เออเนอ เตเพร แพ๊.”’ 20ฮู๊เนอเรอ อา ก๊อถ่อกา คยาแซ๊ เด๊อ อาเพ โอ่.

“เบ๊อะอาเพ แม๊เถอะจว๊าจู พู๊เพรคู โอ่ เด๊อ อายา กา เบ๊อะเนอ, อา ซิยอเกอ แหน่เจ๊อ ลู เร๊อ อา แกล่จว๊า แพ๊โนมื๊อฉื่อ เกอเร๊อ อาพู๊.

21“อาพู๊เพรคู เฮ๊ฉื่อ ลู เน๊อ, ‘เพ๋, แว เมซื๊อเฮ๊อ จอแปแหร่ เร๊อ เน เฮ๊อ, อู เก่ เอ๊ แว เร๊อ เนพู๊คู เตเพร เน๋อ อา โต ปา เจ๊อ โต่ เฮ๊อ.’

22“หม่าแน๊เรอ อาเพ เฮ๊ อาหลู่เล๊ เต๊เห่ เน๊อ, ‘เมแพรแพร! พย๊าแฮ จาจวา เด๊อ อาแร๊เล๊อ เนอตือปือ, เร๊อ แซ๊แถ่ เป่ แลแค เร๊อ อา เออ, เร๊อ โตโปล๊ โน เป่ อา กู๊นอโตโปล๊ เตเม เด๊อ อา กู๊นอลูเนอ, เร๊อ เด๊อะแด๊ เป่ อา แข่แด๊พ๊า เนอ. 23โทเร๊อ จว๊าจุ่ยแฮ ปู่พู๊ เด๊อ เป โบ่บื่อ ตีปี๊เล๊อ เกอเร๊อ อา เนอโตโด เร๊อ เมเซอ อา เนอ. เป เก่ เมป่วยเมลา, เร๊อ โตโครเอ่โตโรโอ โหร่ลอ ลู โป๋. 24เมเตเฮ๊เรอ อา หม่า อาแซ่เน๊อ แวพู๊คู เด๊อ อา เซอโทเฮ๊อ เตเพร, เร๊อ อา เซอเพร กาคยา คยาแซ๊ เออเตอเนอ เฮ๊อ. อา หม่า อาแซ่เน๊อ แวพู๊คู เด๊อ อา โอ่เหม่ เร๊อ แม๊เถอะ กาคยา คยาแซ๊ เฮ๊อ อา เออเตอเนอ เตเพร เนอเฮ๊อ.’ ฮู๊เนอเรอ เหย่ซี เป๊อแถ่ เมป่วยเมลา, โตโครแต๊แขระ เอ่โอ โหร่ลอ ลู.

25“เบ๊อะเนอเค อา พู๊เพรคู เด๊อ อาดุ เตเพร โอ่ เด๊อ แหล่ขุ. เร๊อ เบ๊อะอา กาผื่อเฮ๊อ เร๊อ หี่ เบ๊อะเนอ, อา หนิโฮ อู ด่อทอด่อโม เร๊อ ลีเผร่ลีแม พรารื๊อพราเต๊ ลอ เด๊อ อาหี่. 26ฮู๊เนอเรอ อา เอ๊ หลู่เล๊ เตเพร เร๊อ อา แด๊เฮอ ลู เน๊อ, ‘หม่าเมเตเรอ อู จว๊าเม พรารื๊อพราเต๊ ลอปลี ฮู๊เนอ เมเต?’ 27เร๊อ อาหลู่เล๊ เฮ๊ฉื่อ ลู เน๊อ, ‘เน โป่เพรคู กาโต่โม กาโต่แร๊ คยา เด๊อ หี่ อาขว่าอาคยา, เนเพ เมเซอ เป่ อา ปู่พู๊ เด๊อ เป โบ่บื่อตีปี๊ เกอเร๊อ อา เนอ โตโด เน๋อ.’

28“เออโตโพ๊เรอ อา แหม่เพรคูดุ เออเตเพร ซิปล่อดุ เร๊อ อา กาโกโน ปา เด๊อ อาหี่ โต่. เร๊อ อาเพ เถ่ อิลอกาโน ลู เด๊อ หี่ด๊อกู. 29หม่าแน๊เรอ อา เฮ๊ฉื่อ อาเพ เน๊อ, ‘เพ๋, เน แม๊มอ กอกอ, แวเอ่แวแร เป่ เน ฮู๊ หลู่เล๊ เตเพรเนอ เด๊อ อาหน่าหน่า เด๊อ อาเลเลกู เจ๊อ. แวเฮ๊แวแขระ ฉื่อน๊อ เน๊อ เนโหง่ ตือมื๋อ โต่. เน เด๊อะน๊อ เป่ เฮ๊อ แว หม่าอิเต? แซ่ฮู๊ แว เก่ เมป่วย, แว เก่ เอ่โหร่โอโหร่ เกอ เร๊อ แว โคแบ๊ซว๊า เต๊เห่ อาเงเนอ, เบ๊อะเป่พู๊ โตโด แพ๋ เนอ เน เด๊อะ น๊อ เป่น๊อ แว โตโพ๋ โต่. 30หม่าแน๊เรอ เบ๊อะเนพู๊คู เออเตเพร จว๊า เมลอ แกเด เน อู่เจเต๊เหย่, อาลือ แบ๊ซว๊าเพรเหมาะ มู๊แหม่ กาโต่ คยาแซ๊ เนอ, เน เมเซอ เป่ เจ๊อ อา ปู่พู๊ เด๊อ เป โบ่บื่อตีปี๊ หนิเร๊อ ลู เนอโตโด เจ๊อ เมเต!’

31“เร๊อ อาเพ เฮ๊ฉื่อ ลู เน๊อ, ‘พู๊คู๋, เน โอ่ เด๊อ แว กู๊โด่ช๊า ปว๋า โตโพ๊ เร๊อเตเด๊อ อา โอ่ เน๊อ แว ล๋อ ปลี เต๊เห่ เนอหม่า เนเต ลอ เฮ๊อ. 32หม่าแน๊เรอ เน โป่เพรคู เออเนอ อาแซ่เน๊อ อา เซอโทเฮ๊อ เร๊อ กู๊แหน่เออ อา เซอเพร กาคยา เนอเฮ๊อ, อาแซ่เน๊อ อา โอ่เหม่ เร๊อ แม๊เถอะ กาคยา คยาแซ๊ อา เออเตอเนอ เนอเฮ๊อ อาขว่าอาคยา, เป โตเบ่ เมป่วยเมลา เกอเร๊อ อา, เร๊อ เป โตเบ่ ซิครือซิลอ โอ่ปล๊อโอ่ปลูโหร่ลู กอกอ.’”