Luke 16

เพรแม๊ตู่ ตาหมื่อตาเต เด๊อ อาลีแม เตเพร

1เหย่ซู่ เฮ๊ อา โคเจ่ เต๊เห่ เน๊อ, “เบ๊อะโตโพ๊ แกแย ดุแหย่แถ่เซ โอ่ เตเพร. เร๊อ อา โอ่ เกอเร๊อ เน๊อ เพรแม๊ตู่เร๊อ อา ตาหมื่อตาเต เตเพร. อู เฮ๊โล เป่ ลู เร๊อ อา เมลอ แกเด ลอ อาแบ่เจ่ตาหมื่อตาเต ปว๋า เต๊อเจ่อ. 2แกแย ดุแหย่ เออเตเพร เอ๊แฮ อาเพร แม๊ตู่ ตาหมื่อตาเต เออเตเพร เร๊อ อา เฮ๊ ลู เน๊อ, ‘เนหรี่เนแก เด๊อ แว หนิโฮ เออเนอหม่า ฮู๊เต เต๊อเจ่อเต? เน เบ่ แด่โอ่โล เน ราม๊าราแด, เน แม๊ตู่เกอเร๊อ แว ตาหมื่อตาเต เนอเต๊เห่ อาหรี่อาแก, เมเตเฮ๊เรอ แว นอ ทวา แจ่ ปา เน เร๊อ เพรแม๊ตู่ แว ตาหมื่อตาเต เตเพร ปาโต่ เฮ๊อ.’

3“เพรแม๊ตู่ ตาหมื่อตาเต เออเตเพร เฮ๊ เกอเร๊อดื่อ อาเหน่ เน๊อ, ‘แวแบ่เจ่ นอเถ่แกเฮ๊อ แว เด๊อ อาแรเตกู เฮ๊อ เร๊อ แว เบ่เม ฮู๊เต? แว เก่ จว๊าโพ จว๊าเว เฮ๊เรอ, แวอ๊าแวเหร่ เล๊อบา โต่โต่, แว เก่ กุยเอ่ เฮ๊เรอ, แว ซิเตเร ลาลา. 4เบ๊อะแว เหล่แรเต โอ่ ปา โต่ เออเบ๊อะเนอ, แซ่ฮู๊ แว เก่ โอ่ เกอเร๊อ แว โคแบ๊ซว๊า เด๊อ อาหี่ เก่ เอ๊โมฉื่อ เกอ แว เด๊อ เหย่ซี อาหี่ ปาเนอ เนอ, กู๊แหน่เออ แว โตเบ่ เมฮู๊เตเนอ, แว ซิเง เฮ๊อ.’

5“ฮู๊เนอ อาขว่าอาคยา, อา เอ๊แฮ ล๋อ แกแย เด๊อ อา ฉู่โอ่ อาแบ่เจ่ เนอเต๊เห่ เตเพร โท เตเพร. เร๊อ อา แด๊เฮอ อา แฮ เหร่อเล๊อ เนอเตเพร เน๊อ, ‘เนฉู่โอ่ แวแบ่เจ่ บ๋า เต?’

6“อา เฮ๊ฉื่อ ลู เน๊อ, ‘แว ฉู่โอ่ ลู โต๊โฉ่เส่เทอ ปู๊ เตเย.’

“เร๊อ เพรแม๊ตู่ ตาหมื่อตาเต เออเตเพร เฮ๊ ลู เน๊อ, ‘พย๊า เน ลีราม๊าราแด เนอต๊าบ่า เร๊อ โอ่แน ราตา มอ, เร๊อ ราโน แพ๊ ปู๊ แงเชอ เนอ.’

7“อา แด๊เฮอ โป่ เด๊อ อาโรเตเพร เน๊อ, ‘เนเล๋, เนฉู่โอ่ ลู บ๋า เต?’

“เร๊อ อา เฮ๊ฉื่อ ลู เน๊อ, ‘แวฉู่โอ่ ลู โบ๊กูลา เคอเตเย.’ เพรแม๊ตู่ ตาหมื่อตาเต เออเตเพร เฮ๊ ลู เน๊อ, ‘พย๊า เน ลีราม๊าราแด เนอต๊าบ่า เร๊อ ราโน แพ๊ เคอเชอลุยซว๊า เนอ.’

8“เพรแม๊ตู่ ตาหมื่อตาเต เด๊อ อาจ๊ออาเต โต่ เออเตเพรเนอ, อาแบ่เจ่ ถู่เซ๊ เกอเร๊อ แหน่เจ๊อ ลู, เมเตเฮ๊เรอ อา เมลีแม เต. แกแยเห่ขุพู๊ เออเต๊เห่เนอ อา ลีแม แลโฮแลแห่ เกอเร๊อ คยาดื่อ ลู, เร๊อ อา แจ่เล๊อเล๊อ ปา เจ๊อ เร๊อ แกแย โอ่ เด๊อ เตอาลีกู เนอเต๊เห่ เจ๊อ.” 9โทเร๊อ เหย่ซู่ เฮ๊ เน๊อ, “ฮู๊เนอ อาขว่าอาคยา แว แด๊โฉ่ ซี, แซ่ฮู๊ เน เก่ หนิ โหร่ เอ๊ เนซว๊าเนโค เต๊เห่ เด๊อ อา เก่ ทวา เนเต เนอ, นอจ่อ เนเห่ขุ เตดุแหย่แถ่เซ เออเต๊เห่เนอ. ฮู๊เนอเรอ ช๋า เน เตดุแหย่แถ่เซ ลอเฮ๊อ ปาเนอ, อู เก่ เอ๊ฉื่อ ดื่อ เน เด๊อ เตเซอพร ตูจูเพร เด๊อ ม๊อขุ อาเทออาเก่กู เนอ ปา.

10“แกแย เด๊อ อู หยื่อเอ่หนิ แจ่ อา เด๊อ เตปีตี๊ แพ๊ อากู เตเพรเนอ, เต เด๊อ อาดุอาแย กูเน๋อ หม่า อู เก่ หยื่อเอ่หนิ แจ่ อา ปา. หม่าแน๊เรอ แกแย เด๊อ อู หยื่อเอ่หนิ แจ่ อา เด๊อ เตปีตี๊ อากู โต่ เตเพรเนอ, เต เด๊อ อาดุอาแย กูเน๋อ หม่า อู หยื่อเอ่หนิ แจ่ ลู โต่โต่. 11เก่ เมฮู๊เนอ เฮ๊เรอ, ซี เก่ จ๊อเต เน๊อ เตแม๊ตู่ เห่ขุ อา เตดุแหย่แถ่เซ โต่ เฮ๊เรอ, ม๊อขุ เตดุแหย่แถ่เซ หม่าแหน่ เออเนอ, อู หยื่อเอ่ แจ่ ซี โต่. 12เร๊อ ซี เก่ จ๊อเต เร๊อ อูโร ตาหมื่อตาเต โต่ เก่เฮ๊เรอ อู เก่ เด๊อ ซี ตาเต เด๊อ อา เก่ ทวา เน เตเนอ อา โอ่ เตเพร่ว โต่.

13“หลู่เล๊ เตเพร เมแจ่ แรเต เด๊อ แบ่เจ่ ซิเนอ อาเตนอ อาเลเนอ อา โอ่ เตเพร่ว โต่. อา เก่ ซิโตโคแก เกอเร๊อ เตเพร ปา, เร๊อ อา เก่ โม เกอเร๊อ เตเพร ปา. หม่าโต่เร๊อ อา เก่ ซิปล่อจิจือ เกอเร๊อ เตเพร ปา, เร๊อ อา เก่ เมโตโมเต๊เก่ ฉื่อแก เกอเร๊อ เตเพร ปา. ซี เม เป่ ลอ จอแปแหร่ อาเงเง, รือ อาเงเง เนอเจ่อลอ เนอ, อาหนิ โต่.” ^a

แบ่เจ่เหย่ซู่ เฮ๊เบ่ โหง่ค๊าโข่ เต๊เห่

(มัทธิว ๑๑:๑๒-๑๓, ๕:๓๑-๓๒, มาระโก ๑๐:๑๑-๑๒)

14ฟาริสี เด๊อ อา โมแหน่เร๊อ รือเท เนอเต๊เห่ หนิโฮ โหง่เออ เบ๊อะเนอ, อา งยาโคร แลแค เหย่ซู่. 15เหย่ซู่เฮ๊ เหย่ซี เน๊อ, “ซี หม่า แกแย เด๊อ อา จ่าจ๊อจ่าเต แพ๊ อาเหน่ เด๊อ แกแย อา เป๊เส่เง เนอเต๊เห่ แพ๊, หม่าแน๊เรอ จอแปแหร่ ซิเง ลอปลี เฮ๊อ ซี ซิปล่อกู. เมเตเฮ๊เรอ, เต เด๊อ แกแย เตเน เร๊อ อางูดุงูชอเล๊อ อู เต๊เห่เนอ, เด๊อ จอแปแหร่ เป๊เส่เง เนอหม่า หม่า แพ๊ เตมู๊แหม่รีแจ่ เด๊อ อู เหล่ซิรอซิเร อา เนอเต๊เห่ แพ๊.

16“คูโมเสส เตซว๊าเตแส่ เด๊อ เพรโพร อา เตราแก เต๊เห่เนอ, อู แด๊โฉ่โด่แน โต่ ตื๊อดื่อ อา เบ๊อะเจเทอ คูยอห์น อา ทือเค เนอแพ๊. เด๊อคยาเออ แว แด๊โฉ่โด่แน เป่ อู เร๊อ จอแปแหร่ เทอเลเก่กู เตซิครือมีลา อาหรี่อาแก เร๊อ อู แอ๊จื๊อ โนเผ่ ลอ เจ๊อ ลู ปว๋า เตเพร เจ๊อ. ^b 17หม่าแน๊เรอ พื๋อ เร๊อ จอแปแหร่ อา เตซว๊าเตแส่ อา ลีปล่อ เด๊อ อา ปีตี๊เล๊อ ต๊อปล่อ เตเร ปย๊าแก อาเงเนอ, ม๊อขุ เร๊อ เห่ขุ ปย๊าแก ยูเล๊อเล๊อ ปา เจ๊อ. ^c

18“เพรคู เตเพร เพร เด๊อ อา โอ่แก อาเม เร๊อ อา เก่ จว๊าพย๊า เต๊เปล่ เร๊อ เพรเหมาะ เด๊อ อาโร เตเพร เพร เฮ๊เนอหม่า อา เมจว๊าซื๊อ เฮ๊อ เน๊อ เพร เหมาะ เนอเตเพร เฮ๊อ. เร๊อ เพรคู เตเพร เพร เด๊อ อา พย๊า เพรเหมาะ เด๊อ อา เว โอ่แก ลู เออเตเพร เนอหม่า อา เมจว๊าซื๊อ เฮ๊อ เร๊อ เพรเหมาะ เนอเตเพร เฮ๊อ. ^d

แกแย ดุแหย่แถ่เซ เตเพร เร๊อ คูลาซารัส

19“เบ๊อะเนอโตโพ๊เนอ, แกแย ดุแหย่แถ่เซ โอ่เตเพร. อากืออาแซ๊ โชชื่อ เจ๊อ เห่อจ่า เด๊อ อางู่ดุเล๊อ เต๊เห่, เร๊อ อา เอ่หวิโอชือ, เมโม เกอเร๊อ อาเหน่ ปว๋า เตอเนอ เจ๊อ. 20แกแย โซพ๊าโซแรพู๊ โอ่เตเพร. เร๊อ อามุย เด๊อ ลาซารัส อาวา เถ่ลอ เหน่เตเพร เจ๊อ, เร๊อ อู จอแฮ แด่ โอ่เมอแล ลู เบ๊อะแกแย ดุแหย่แถ่เซ เออเตเพร อา เกเร๊กู่ดาดุโม ช๊า เนอ. 21อา โอ่ป่อ แม๊ชือแม๊ตู่ เอ่ เกอ แพ๊ แกแยดุแหย่ เออเตเพร อาเหล่เอ่ ตาโก่ตาเว เด๊อ อา ดีเหร่เล เนอเต๊เห่ แพ๊. โท๊โต่ ถุ่ยเต๊เห่ แฮ หย่าเอ่ ลอปลี ลูจู่ วาเถ่ เนอเต๊เห่.

22“เบ๊อะแกแย โซพ๊าโซแรพู๊ เออเตเพร อาเซอ เบ๊อะเนอ, เตเน่ว ม๊อขุพู๊ เต๊เห่ จอแถ่ อา เด๊อ เพอับราฮัม อาช๊า. แกแย ดุแหย่แถ่เซ เออเตเพรเนอ, อา เซอเกอลาติ เร๊อ อู จว๊า โล๊แก ลู. 23เบ๊อะแกแย ดุแหย่ ข่าเบ่ แหน่เจ๊อ เตจา เด๊อ ปอรากยากู เบ๊อะเนอ, อา แม๊แถ่ เด๊อ ม๊อขุ เร๊อ อา แม๊เถอะ แถ่จว๊าโล เพอับราฮัม, เร๊อ คูลาซารัส โอ่เกอ เด๊อ ลู ช๊า. 24เร๊อ อา เอ๊โทแถ่ เน๊อ, ‘เก๋อ เพอับราฮัม! ซิยอเร๊อ แว นี๋, นอเจโนเร๊อ คูลาซารัส อา กู๊นอเคอ เด๊อ เทอกู เร๊อ นอปลวาตาเม๊ เตอเจ๊อ เร๊อเป่ แว ปลีเออ นี๋, เมเตเฮ๊เรอ แว ข่าเบ๊ เต เด๊อ หมิกู เออเนอ อาจาอาจือ แหน่เจ๊อ แว เฮ๊อ.’

25“หม่าแน๊เรอ เพอับราฮัม เฮ๊ฉื่อ ลู เน๊อ, ‘แวพู๊คู๋, เตเนแถ่เบ่ โต่คยา เบ๊อะเน โอ่เซอเพร ปา เบ๊อะเนอ, เน โอ่ เร๊อ เต เด๊อ อา โอ่โมโอ่เจ่ เน เนอเต๊เห่ เฮ๊อ, หม่าแน๊เรอ คูลาซารัส เออเนอ, อา พย๊าหนิ ลอปลี เตจาเตจือ เต๊เห่. ตื๊อดื่อเรอ กู๊แหน่เออ, อา พย๊าหนิ เกอลาติ เฮ๊อ เตโอ่โมโอ่เจ่ เหล่โอ่ เบ๊อะเออ เฮ๊อ. เร๊อ เน เร๊อ เน ข่าเบ่ เกอลาติ เตจาเตจือ เฮ๊อ 26ตื๊อเนอโท๊โต่, เป เร๊อ ซี อาจอกู เออเนอ, แล ดาแย ดู๋ แหน่เจ๊อ โอ่ โตโบ. เร๊อ แกแย เด๊อ อา โอ่ เบ๊อะเนอ เต๊เห่เนอ, อา ซิหยื่อ จว๊า เด๊อ ซี โอ่ ตื๊อดื่อเรอ อา จว๊า แจ่ โต่. โท๊โต่ แกแย เด๊อ ซี โอ่ เต๊เห่เนอ, อา ซิหยื่อ แฮ เบ๊อะเป โอ่ เออ ตื๊อดื่อเรอ อา แฮ แจ่ โต่ โต่.’

27“เร๊อ แกแย ดุแหย่แถ่เซ เออเตเพร เฮ๊ฉื่อ เน๊อ, ‘เก่ เมฮู๊เนอ เฮ๊เรอ, เพอับราฮั๋ม, แว กุยซิยอ เน, นอกาเร๊อ คูลาซารัส เด๊อ แวเพ อาหี่ เนอ. 28แว โป่แหว่ เพรคู โอ่แก ปา เจ๊อ ซิแง เจ๊อ. แซ่ฮู๊ อา เก่ แฮโตเกอ แต่ เบ๊อะเตจาเตจือ อาเหล่โอ่ เออโต๊โผ่ แต่เม เนอ, ปลวากา เหร่อเป่ แว คูลาซารัส เนอ. เร๊อ นอกา เด๊อ แด๊โฉ่ เด๊อะรอเด๊อะเร เร๊อเป่ เน๊อ เหย่ซี เนอเต๊เห่.’

29“เพอับราฮัม เฮ๊ฉื่อ ลู เน๊อ, ‘คูโมเสส เร๊อ เพรโพร เต๊เห่ ราหนื่ออื่อ ดื่อ เฮ๊อ เด๊อ อา เก่ เด๊อะรอเด๊อะเร เป่ เน โป่แหว่ เพรคู เนอเต๊เห่ เฮ๊อ. เหย่ซี โตเบ่ หนิดา ดื่อเฮ๊อ เหย่ซีโหง่ ปา.’

30“เร๊อ แกแย ดุแหย่แถ่เซ เออเตเพร เฮ๊ฉื่อ เน๊อ, ‘เพอับราฮั๋ม, ตื๊อเออเนอ เร๊อ อา เล๊อบา ล๋ายโต่. แกแยเซอ เตเพร อา ก๊อถ่อเซอเพร กาคยา, เร๊อ อา เก่ กาคยา แด๊โฉ่ เป่ เหย่ซี ตื๊อหม่า อา ถู่แหล่ เต๊เปล่ กาเนอ แพ๊ อาซิปล่อ แพ๊.’

31“หม่าแน๊เรอ เพอับราฮัม เฮ๊ฉื่อ ลู เน๊อ, ‘เหย่ซี เก่ ครวาเม เกอ ฮู๊ คูโมเสส เร๊อ เพรโพร ราแก เนอเต๊เห่ โต่ เฮ๊เรอ, แกแย เตเพร เพร อา ก๊อถ่อเซอเพร กาคยา เป่ เจ๊อ เหย่ซี เจ๊อ หม่า, อา หยื่อเอ่ เป่ เน๊อ เน โต่โต่.’”