Luk 17 | EkySCThai | STEP | เหย่ซู่ เฮ๊ อา โคเจ่ เต๊เห่ เน๊อ, “เตอิลออี๊โหล่ ซื๊ออู เต๊เห่เนอ อา เบ่ โอ่แถ่ แหน่ ปา ตื๊อดื่อเรอ แกแย เด๊อ อา เมโอ่ ทวาแถ่ เตอิลออี๊โหล่ ซื๊อ อู เออเตเพรเนอ, เตจาเตจือ อา เบ่ แหน่เจ๊อ ลู ปา.

Luke 17

เตซื๊อ

(มัทธิว ๑๘:๖-๗, ๒๑-๒๒, มาระโก ๙:๔๒)

1 เหย่ซู่ เฮ๊ อา โคเจ่ เต๊เห่ เน๊อ, “เตอิลออี๊โหล่ ซื๊ออู เต๊เห่เนอ อา เบ่ โอ่แถ่ แหน่ ปา ตื๊อดื่อเรอ แกแย เด๊อ อา เมโอ่ ทวาแถ่ เตอิลออี๊โหล่ ซื๊อ อู เออเตเพรเนอ, เตจาเตจือ อา เบ่ แหน่เจ๊อ ลู ปา. 2 แกแย ฮู๊เนอ เตเพรเนอ พื๋อ เน๊อ อา เตเร เมโอ่ทวาแถ่ เต เด๊อ เพรปีตี๊เล๊อ เด๊อ อูเกล เตเพร เพร เก่ เมเตซื๊อ ฮู๊เออ เนอเรอ, จอ หล่อดุ เด๊อ อา แกโบลูเนอ เร๊อ ต่าตาแก อา เด๊อ เทอดุซาวากู เนอหม่า อาแร๊เล๊อ ปา เจ๊อ เด๊อ ลูเง เจ๊อ. 3 รอหนิ แลแค ซีเหน่ นี๋.

“ซี โป่แหว่ เด๊อ อา หยื่อเอ่ เหย่ซู่ เตเพร เก่ เมเตซื๊อ เฮ๊เรอ, เบ่ อิซว๊าอี๊แส่ อา. อา ถู่แหล่เต๊เปล่ กาคยา คยาแซ๊ อาซิปล่อ เฮ๊เรอ ปลวาแก ลู เตซื๊อ นี๋. ^a 4 เตอเนอ อากู, อา เก่ เมซื๊อ เน โซซว๊าโตโพ๊ เฮ๊เรอ, อา เก่ แฮโต คยาแซ๊ เน โซซว๊าโตโพ๊ เร๊อ อา เก่ แฮ เฮ๊ เน๊อ, ‘แว ถู่แหล่แต๊แกละกาเฮ๊อ แวซิปล่อ เฮ๊อ’ เฮ๊เนอ, เน เบ่ ปลวาแก ลู เตซื๊อ.”

เตหยื่อเอ่

5 เพรโด่แนพู๊ เต๊เห่ แด๊โฉ่ แบ่เจ่ เน๊อ, “เมชอแถ่ เป่ เป เตหยื่อ.”

6 เร๊อ แบ่เจ่ เฮ๊ฉื่อ เหย่ซี เน๊อ, “ซี เตหยื่อ อา โอ่ปีตี๊ ตี๋ เต๊เปล่ปล่อ ตอปล่อ เนอแพ๊ ตื๊อดื่อเรอ ซี เก่ เฮ๊ ส่อเหมาะดุ เออต๊อเหมาะ เน๊อ, ‘จุ่ยเถ่ เนหรุ่ยเนอ, เร๊อ จว๊าช๊อโอ่ เนเหน่ เด๊อ เทอดุซาวา อากูเนอ,’ ซี เก่ เฮ๊ อา เนอ, อา เก่ จูเอ่ ซีโหง่ แพ๊.

เตแรเต ตาแลเบ่ หลู่เล๊ เตเพร

7 “เฮ๊โก๊เหร่อ, แกแย เด๊อ ซีเกล เตเพร เพรเนอ, อา เก่ โอ่ เกอเร๊อ เน๊อ อาหลู่เล๊ เด๊อ อา แฮท๊า แหล่ เตเพร, หม่าโต่เรอ เพรเกซิหมิ ^{▼▼ซิหมิ}พู๊ เตเพร เฮ๊บย่าเนอ. เบ๊อะอาหลู่เล๊ โอ่ เด๊อ เพร๊ขุ กาเบ๊อะเนอ, โตโพ๊โต่ ซี เอ๊น๊อ ช๊าเหล่ เน๊อ, ‘แฮ โอ่แน เอ่แพร มอ ดีเออ,’ อา เฮ๊ ฮู๊เออ เนอหม่า อา โอ่ แหน่ เตเพรเพร แอ? 8 ซี เก่ เฮ๊ อา เน๊อ, ‘โพเอ่ มอ ดี, ถู่แหล่ เต๊เปล่ มอ เน เห่อจาเนอ, เร๊อ คว๊าเอ่ เป่ แว ดี. เร๊อ โอ่ป่อแม๊ตู่ เล๊เอ่เล๊โอ่หนิ แว เบ๊อะเออ, แว เอ่โทปา เร๊อ เนเอ่เนอ เด๊อคยา ปา.’ 9 หลู่เล๊ เตเพร เมฮู๊ อาแบ่เจ่ เฮ๊ ลู เนอ ตื๊อดื่อเรอ อาแบ่เจ่ โหล่ เฮ๊บุ๊ยเฮ๊เตอเรอ ลู โต่. 10 ซี เบ่เบ แซ่ฮู๊เนอ เฮ๊อ. เบ๊อะซี เมโทลอเฮ๊อ. ล๋อ เต เด๊อ อู นอ ซี เนอเต๊เห่ เบ๊อะเนอ, ซี โต เฮ๊ เน๊อ, ‘เป หม่า หลู่ เด๊อ อาโตอาเบ่ โต่ เต๊เห่ เร๊อ อา เมโทแก จ๊อจื้อ แพ๊ เตเม เด๊อ อา โตแลเบ่ เป เออเนอเต๊เห่ แพ๊.’”

เหย่ซู่ แหย่โอ่เหม่ แกแย เพรเช๊อ เด๊อ อา เตชุ๊ยมู๊แหม่ เด๊อ อาพ๊าลู เต๊เห่

11 เบ๊อะเหย่ซู่ จว๊า เด๊อ วีเยรูซาเล็ม เบ๊อะเนอ, อา จว๊ารว๊า เบ๊อะเห่ขุ สะมาเรีย เร๊อ กาลิลีเก่ เก่กือเปล่ ลู เนอ. 12 อา จว๊าโน เด๊อ ดอตอดอ อากู เร๊อ อา แม๊เถอะ ตาฉื่อ เร๊อ แกแยเพ เพรเช๊อ เด๊อ อา พย๊าหนิ แลแค เตชุ๊ยมู๊แหม่ เด๊อ อาพ๊าลู เต๊เห่. เหย่ซี ก๊อถ่อโอ่ ตาพายา เนอ, 13 อา เอ๊โทจว๊าจู เน๊อ, “เก๋อ, แบ่เจ่ เหย่ซู่! ซิยอ เกอเร๊อดื่อ เป นี๋!”

14 เหย่ซู่ แม๊เถอะ เหย่ซี เร๊อ อา เฮ๊ เหย่ซี เน๊อ, “จว๊า เด๊อะโล แม๊ แลแค ซีเหน่ เด๊อ เพรหลู่แตเต เต๊เห่ อา โอ่ เนอ.” เบ๊อะเหย่ซี จว๊า เด๊อ แกล๊ลู เบ๊อะเนอ, เหย่ซี เตเช อาโอ่เหม่แก ลอปลี เจ๊อ. ^c

15 เด๊อ เหย่ซี อาเกล เตเพรเนอ, อา แม๊เถอะซิเง เร๊อ เหย่ซู่ แหย่โอ่เหม่แก่ เฮ๊อ อา อาขว่าอาคยา, อา กาคยา เร๊อ อา เอ๊โทถู่เซ๊แถ่ จอแปแหร่. 16 โทเร๊อ อา แด๊งือจ๊อเบแล เด๊อ เหย่ซู่ อา กู๊โด่ช๊า เร๊อ อา เฮ๊บุ๊ยเฮ๊เตอเรอแถ่ ลู. อา หม่า สะมาเรียพู๊ เตเพร.

17 เร๊อ เหย่ซู่ เฮ๊ ลู เน๊อ, “แกแย เด๊อ แว แหย่โอ่เหม่ เป่ ลู เต๊เห่ เนอหม่า อา โอ่ เพรเช๊อ แวเฮ๊แต๋! ลุยซว๊าเตเพร ปา เล๋, อา โอ่โต เบ๊อะเต? 18 หม่าเมเตเรอ อา กาคยา เฮ๊บุ๊ยเฮ๊เตอเรอ ถู่เซ๊แถ่ คยาแซ๊ จอแปแหร่ ตื๊อแพ๊ เมวเจอะเหร่อพู๊ เออเตเพรแพ๊ เร๊อหม่า ฮู๊เต?” 19 โทเร๊อ เหย่ซู่ เฮ๊ อา เน๊อ, “ก๊อถ่อจว๊ามอ, เน เตหยื่อ แหย่โอ่เหม่แก เป่ เฮ๊อ เน เตเช เฮ๊อ.”

จอแปแหร่ อาเทอ เก่ แฮช๊อโอ่ ปา

(มัทธิว ๒๔:๒๓-๒๘, ๒๔:๓๗-๔๑)

20 ฟาริสี เต๊เห่ แด๊เฮอ เหย่ซู่ เน๊อ จอแปแหร่ อาเทออาเก่ เก่ แฮโต่ เบ๊อะเกเต ปา. เร๊อ อา เฮ๊ฉื่อ เหย่ซี เน๊อ, “จอแปแหร่ อาเทออาเก่ แฮช๊อโอ่ เนอ, อู แม๊เถอะ แจ่ ฮู๊เนอ หม่าโต่. 21 เตเพร่ว หม่า อู เฮ๊ เน๊อ, ‘แม๊มอ เบ๊อะเออ,’ ‘แม๊มอ เด๊อเนอ,’ ฮู๊เนอ เตเพร่ว โต่, เมเตเฮ๊เรอ จอแปแหร่ อาเทออาเก่ เออเนอ อา แฮช๊อโอ่ เฮ๊อ เด๊อ ซี ซิปล่อกู เนอเฮ๊อ.”

22 โทเร๊อ เหย่ซู่ เฮ๊ อา โคเจ่ เต๊เห่ เน๊อ, “แกแย อาพู๊ หม่าเฮ๊อ แวเออ อาม๊อเนอม๊อเซ เด๊อ ซี ซิหยื่อ แม๊เถอะ แหน่เจ๊อ เออเนอ, อา เก่ แฮโต่ เตอ เนอ เนอปา, หม่าแน๊เรอ ซี แม๊เถอะ แจ่ อา โต่. 23 อู เก่ แด๊โฉ่ เป่ ซี เน๊อ, ‘แม๊มอ เด๊อ เนอ’ หม่าโต่เรอ ‘แม๊มอ เบ๊อะเออ’ ฮู๊เนอ ปา! ตื๊อดื่อเรอ จว๊าครวา หยื่อเอ่ เกอ แต่ เหย่ซี แต่เหม่ นี๋. 24 แว จว๊าเฮ๊โต่ ซี ฮู๊เออ เมเตเฮ๊เรอ, เบ๊อะแกแย อาพู๊ หม่าเฮ๊อ แวเออ เก่ แฮ คยาแซ๊ ปา เบ๊อะเนอ, อู ปว๋า เตเพร เก่ แม๊เถอะ อา ปา. อา เก่ แซ่เน๊อ ฉ่าลีบ๊อ เด๊อ ม๊อเล เร๊อ อา เก่ ช๊าเตเค โรโซ จว๊า ลอ ม๊อเลชีบ่า ปา. 25 หม่าแน๊เรอ แว เก๋ ข่าเบ่ เอ๊เล๊อ เหร่อ เจ๊อ เตจาเตจือ ปา, เร๊อ แกแย เออเตอทือ หยื่อเอ่ แว โต่.

26 “แกแยพู๊คู หม่าเฮ๊อ แวเออ เก่ แฮปา เบ๊อะเนอ, อา เก่ ทวาแถ่ แซ่เกอดื่อ ฮู๊ เพโนอาห์ ทือเค เนอ ปา. ^d 27 เบ๊อะเนอเค แกแย เต๊เห่ โอเอ่แลแค, หนิพู๊พย๊าเม เต่อ แลแค เจ๊อเบ๊อะเพโนอาห์ โน เด๊อ ส่อเกลอดุกู เนอเตอเนอ เจ๊อ. เร๊อ เทอดุแถ่ เซอแก ลอปลี แกแย โอ่แก เด๊อ อากลอ เนอเต๊เห่. ^e

28 “เบ๊อะแว แฮ คยาแซ๊ อาเบ๊อะเนอ ปาเนอ, อา เก่ แซ่เน๊อ แกแย เด๊อ เพอับราฮัม อาพู๊ดุ คูโลท ทือเค เนอปา. แกแย เบ๊อะเนอ ตือทือ เต๊เห่เนอ, อาเอ่อาโอ แลแค, พรีเอ่อิเช, อิช๊อ อิปลือ เร๊อ ช๊อแถ่ แลแค อาหี่อาแพ. ^f 29 หม่าแน๊เรอ เบ๊อะคูโลท เถ่จว๊า ตาพาแก เร๊อ วีโสโดม เนอเตอเนอ เบ๊อะเนอ, จอแปแหร่ นอตา เร๊อ หมิ เร๊อ หล่อหมิอือ เด๊อ ม๊อขุ. เร๊อ หมิอือ เซอแก ลอ เหย่ซี ปว๋า เตเพร.

30 “ช๋า แกแยพู๊คู หม่าเฮ๊อ แวเออ เตเร แฮเฮ๊อ ปา เบ๊อะเนอ, อา เก่ ทวาแถ่ แซ่เกอดื่อ ฮู๊เออเนอ ปา. 31 ม๊อเนอ เบ๊อะเนอ เตอเนอ ปา หม่า, แกแย โอ่ เด๊อ อา หี่กู๊โก่ รือดือขุ เต๊เห่เนอ เบ่ กี๊ตา โน พย๊าหนิ อา ตาหมื่อตาเต เต๊เห่ เด๊อ หี่ด๊อกู เตอเจ๋อ โต่! แกแย โอ่ เด๊อ เพร๊ขุ เตเพรเพร เนอ. อา เบ่ แกล่ กาคยา พย๊าหนิ อาตาเต เด๊อ อาหี่ โต่. ^g 32 เตเนแถ่โต เบ่คยา แลแค ดื่อ เพโลท อาเม เนอ. ^h ^{▼▼เบ๊อะจอแปแหร่ เฮ๊เบ่เด๊อจา เมอโสโดม เบ๊อะเนอ, เพโลท อาเม แม๊กาคยา เด๊อ วีกู เร๊อ อา ทวาแถ่แก อี๊ถื่ออี๊เส่.} 33 เมเตเฮ๊เรอ แกแย เด๊อ อา ซิหยื่อ เตเมแลเปล๊แก เกอเร๊อ อา ซิปล่อเซอเพร เตเพรเพรเนอ, อา เก่ แลจู่ แก อาซิปล่อ เซอเพร ปา. หม่าแน๊เรอ แกแย เด๊อ อา เด๊อะแลแก อา ซิปล่อเซอเพร เด๊อ แวขว่าแวคยา เตเพรเพรเนอ, อา เก่ พย๊าหนิ ซิปล่อเซอเพร ตูจูเพรเง ปา. ^j 34 แว เฮ๊ ซี, เบ๊อะเนอเตเซ ปาหม่า, แกแย ซิเนอ เก่โอเมอเต่อลู เด๊อ อาเหล่เมอ โต๊โผ่โต ปา. เร๊อ จอแปแหร่ เก่ เอ๊กาแก ปา เตเพร, เตเพรเร๊อ อา เก่ แด่โอ่แก ลู ปา. 35 เพรเหมาะ ซิเนอ อา อิช๊าตือฉื่อ ลู โบ๊เอ่ ปา. เร๊อ จอแปแหร่ อา เอ๊กาแถ่ ลู ปา เตเพร, เร๊อ อา เก่ แด่โอ่แก ลู เตเพร ปา. 36 เพรคู โอ่ เด๊อ เพร๊ขุ ซิเนอเนอ, เตเพรเร๊อ จอแปแหร่ อา เอ๊กาแถ่ ลู ปา, เตเพรเนอ จอแปแหร่ อา แด่แก ลู ปา.” ^{▼▼อู รา ลีเทส่อพ๊า มู๋ หนู่เค เต๊เห่เห่เนอ, อู แม๊เถอะ ลีแหย่โยบูโพ๊แบ่เจ่ เออตามา โอ่ป่าเต่อเกอ โต่.}

37 เหย่ซู่ อา โคเจ่ เต๊เห่ แด๊เฮอ ลู เน๊อ, “แบ่เจ๋, อา เก่ ทวาแถ่ โต เบ๊อะโต๊โผ่เต ปา?”

เร๊อ เหย่ซู่ เฮ๊กาคยาฉื่อ เป่ เหย่ซี โหง่ ตือมือ เน๊อ, “เตซอ เตหล่อโอ่โต เบ๊อะเต๋ เนอ, ลาแต่ เก่โอ่ปล๊อลู เบ๊อะเนอ ปา.”