Luke 2
เหย่ซู่โอ่เป๊เจ่แล
(มัทธิว ๑:๑๘-๒๕)
1เบ๊อะเนออาเค จ๊อแผ่ซีซาร์ออกัสตัส นอพย๊าตารา ราม๊า ปล๊อลอ แกแย มุย เด๊อ โรมันเก่ เต๊เก่เล เจ๊อ. 2เออ หม่า เตราม๊า ปล๊อมุย อาเหร่อกูลู่เล๊อ ตื๊อหื่อ เบ๊อะคูคีรินิอัส ทวา คุ๊ยดุ เด๊อ วีซีเรีย เบ๊อะเนอ เฮ๊อ. 3เร๊อ แกแย ปว๋า เตเพร กา แลแค เด๊อ อาดอ, อาวี เร๊อ การาโน แลแค อามุย. 4เพโยเซฟ โอ่ เบ๊อะวีนาซาเร็ธ, กาลิลีเก่ เนอ เร๊อ อา เถ่จว๊าเกอ เด๊อ วีเบธเลเฮม, ยูเดียเก่, เบ๊อะคุ๊ย ดาวิด เหล่โอ่เป๊เจ่แล เหล่โอ่เนอ. เพโยเซฟ หม่า เพดาวิด อากลุยอาแล ตากาแล เร๊อดื่อ เตเพร อาขว่าอาคยา, อา กาโอ่โก๊ เบ๊อะเนอ. 5อา เร๊อ โหมะมารีย์ เด๊อ อา เด๊อะม๊า ▼▼แกแยยิวพู๊ อาเหล่โกล โอ่ เร๊อ “เด๊อะม๊า โทเฮ๊อ ลู” หม่า อา ปื่อ โทเฮ๊อ กู๊ขุ, หม่าแน๊เรอ อา โอ่เมอเต่อแตแล๋ ลู โต่
โทเฮ๊อลู เด๊อ อา เร พย๊า ลู เนอเตเพร จว๊า ราโนเกอ อามุย. เบ๊อะเนออาเค หม่า โหมะมารีย์ โอ่ เร๊อ อาฮ๊ออาเซ๊ เร๊อ อาบาเลเฮ๊อ. 6เร๊อ เบ๊อะเหย่ซี โอ่ ปา เบ๊อะวีเบธเลเฮม เบ๊อะเนอ, โหมะ มารีย์ อาฮ๊อ อาบาเล เฮ๊อ เด๊อ อา เก่พู๊โอ่ เฮ๊อ. 7อา พู๊โอ่หนิ พู๊แหว่เพร่ว เพรคู เตเพร เร๊อ อา แพ๊ปลือ ลู เร๊อ อิเก เร๊อ อา แด่ โอ่เมอตา ลู เด๊อ ปู่โกล๊กู, เมเตเฮ๊เรอ หี่ด๊อกู โอ่กอคูปาตาด๊าโต่. เตเน่วม๊อขุพู๊ เร๊อ เพรเกซิหมิพู๊ เต๊เห่
8เหล่โอ่ ตีวี๊ตาวา เบ๊อะเนอ โต๊โผ่เนอ, เพรเกซิหมิพู๊ โอ่ เต๊เห่. เหย่ซี แฮ โอ่เมอป่อ เกอ เร๊อ อาซิหมิพู๊ เต๊เห่ เด๊อ หมิเกล, ตอกู โต๊โผ่. 9เบ๊อะเนออาเค แบ่เจ่ อา เตเน่วม๊อขุ เตเพร แฮ เด๊อะโลแม๊เถอะ เป่ เหย่ซี, เร๊อ แบ่เจ่ จอแปแหร่ อา เตลีเตตาเค เต๊เห่ ลี ตาวา ลอปลี เหย่ซี เร๊อ เหย่ซี ซิอิเช ต๊อหร่อเซ๊ ลอปลี เจ๊อ. 10หม่าแน๊เรอ เตเน่วม๊อขุ เฮ๊ เหย่ซี เน๊อ, “ซิอิเช แต่เหม่! แว แฮเฮ๊โล เป่เฮ๊อ ซี เตซิครือมีลา เด๊อ อา เก่ เม ซิครือ หม่าแหน่ เจ๊อ อูปว๊า เพร ปา เออเนอเฮ๊อ. 11เออเตเซ เด๊อ คูดาวิด อาวีกู เนอ, เพรเมแลเปล๊กา อา แบ่เจ่ หม่าเฮ๊อ ครี๊ เออ แฮ โอ่ เป๊เจ่แล เฮ๊อ. 12ซี เก่ แม๊เถอะ เป๊เจ่ เตเพร ปา, เร๊อ อู แพ๊ปลือ ลู เร๊อ อิเก เร๊อ อู แด่โอ่เมอตา อา เด๊อ ปู่โกล๊กู เนอ ปา. ซี เก่ แม๊เถอะ ฮู๊เนอหม่า หม่าเฮ๊อ เป๊เจ่พู๊ เด๊อ แว แด๊โฉ่โล เป่ ซี เออเนอ เตเพร เฮ๊อ.” 13เบ๊อะเนออาเค เตเน่วม๊อขุ ตอกล๊อ ตู๊หมู่ แฮโอ่โลแถ่ คย๊า เต่อเกอ เร๊อ เตเน่วม๊อขุ เออเตเพร เร๊อ เหย่ซี อิโร ถู่เซ๊แถ่ จอแปแหร่ เร๊อ อา อิโร แลแค เนอ,14“อาลีอาเตเค ถู่เซ๊แถ่ แลแค จอแปแหร่ เด๊อ อา โอ่ เด๊อ อาเหล่โอ่แถ่โล ตื๊อดื่อเล๊อ อู เด๊อ ม๊อขุ เออเนอ เตเพร โป๋. เตเปเตดวา เร๊อ เตเตอเจ๊อตู๊จู่ เก่ โอ่แถ่ เกอดื่อ เด๊อ เห่ขุเออ เร๊อ อา เก่ โอ่เต่อเกอดื่อ เร๊อ แกแย เด๊อ จอแปแหร่ ซิปล่อ โอ่เร๊อ เกอ ลู เนอเต๊เห่ นี๋.” 15เบ๊อะเตเน่วม๊อขุ กา แก๊แถ่ โทเฮ๊อ เด๊อ ม๊อขุ เบ๊อะเนอ, เพรเกซิหมิ เต๊เห่ เฮ๊ เกอเร๊อ เป่ลู เน๊อ, “จว๋า, เป จว๊า เด๊อวีเบธเลเฮม เร๊อ เป จว๊าแม๊ เกอ เตโอ่ ทว่าแถ่ เร๊อดื่อ เด๊อ แบ่เจ่ แฮ เด๊อะซิเงแก เป เตหรี่เตแก เออเนอ โป๋.” 16เร๊อ เหย่ซี เถ่จว๊า โต๊โปล่ตาปยา แลแค เร๊อ จว๊าแม๊เถอะ โหมะมารีย์ เร๊อ เพโยเซฟ, โทเร๊อ เหย่ซี จว๊าแม๊เถอะ อู แด่ โอ่เมอตา เป๊เจ่พู๊ เตเพร เด๊อ ปู่โกล๊กู. 17เบ๊อะเพรเกซิหมิพู๊ เออเต๊เห่ แม๊เถอะ เป๊เจ่พู๊ เออ เร๊อ อาโหมะอาเพ เบ๊อะเนอ, อา จว๊า แด๊โฉ่โล เป่ อู ฮู๊เตเน่วม๊อขุ เฮ๊โฉ่โลแก เป่ เหย่ซี เร๊อ เป๊เจ่พู๊ เออเตเพร อาหรี่อาแก เนอเต๊เห่. 18ล๋อ แกแย เด๊อ อา หนิโฮ เพรเกซิหมิพู๊ เออเต๊เห่ แด๊โฉ่โล เป่ ลู เตหรี่เตแก เออเต๊เห่เนอ อา คย๊าอายื๊อ ลอ แลแค เจ๊อ. 19โหมะมารีย์ โต่หม๊าหนิ ลอ เตหรี่เตแก เออเต๊เห่ เร๊อ อา เตเน เกอเร๊อ อาหรี่อาแก. 20เพรเกซิหมิพู๊ เออเต๊เห่ กาคยา คยาแซ๊ เด๊อ เหย่ซี ซิหมิ เต๊เห่ อา โอ่. เร๊อ ฮู๊ เตเน่วม๊อขุ แด๊โฉ่โล เป่ เหย่ซี เร๊อ เหย่ซี หนิโฮน๊อ, เหย่ซี จว๊า แม๊เถอะเบ่น๊อ อาขว่าอาคยา, เหย่ซี ถู่เซ๊แถ่ จอแปแหร่, โท๊โต่ เหย่ซี แด่ดุแด่ทูหนิจอแปแหร่. 21เบ๊อะเป๊เจ่ เออเตเพร อาบาแถ่ เฮ๊อ อาเซ ลุยซว๊า เฮ๊อเร๊อ อา โตเบ่ ดื๊อตีลี๊ เฮ๊อ พ๊า b เบ๊อะเนอ เหย่ซี เอ๊ เกอเร๊อ อามุย เร๊อ เหย่ซู่ ฮู๊ เตเน่วม๊อขุ โป๊หนื่ออื่อแก เป่เฮ๊อ อามุย เบ๊อะอาโหมะ โหมะดอ แต่ล๋าย ลู โต่ เบ๊อะเนอ. c
เพโยเซฟ เร๊อ โหมะมารีย์ เมโพ๊แปละบูโพ๊ แบ่เจ่เหย่ซู่ เด๊อ เตหลู่แตโฮกู
22ฮู๊ คูโมเสส เฮ๊แก อา เตซว๊าเตแส่ เร๊อ เหย่ซี โตเบ่ เมโพ๊แปละบูโพ๊ แลแค อาเหน่เนอ, เบ๊อะแฮโต่เฮ๊อ. เร๊อ แซ่ฮู๊ เพโยเซฟ เร๊อ โหมะมารีย์ เก่ เมโพ๊แปละบูโพ๊ เป๊เจ่พู๊เออ เด๊อ แบ่เจ่ เป๊เส่เง เนอเรอ, เหย่ซี พย๊าแฮหนิ เป๊เจ่พู๊เออ เร๊อ อา จว๊า แลแค เด๊อ วีเยรูซาเล็ม. 23(ฮู๊ แบ่เจ่ เตซว๊าเตแส่ อาเตราม๊าราแด โอ่ เน๊อ, “ล๋อ พู๊แหว่เพร่ว เพรคู เต๊เห่เนอ โตเบ่ เมโพ๊แปละบูโพ๊ อา เด๊อ แบ่เจ่ อา เป๊เส่เง.”) d 24ฮู๊ แบ่เจ่ เฮ๊แก อา เตซว๊าเตแส่ เนอ, เหย่ซี โตเบ่ จว๊า หลู่แตแถ่ เกอ “ถู่หลุ่ยครา เนอเบ่ หม่าโต่เร๊อ ถู่หลุ่ย โซ เนอเบ่.” e 25เบ๊อะเนอเค, เด๊อ วีเยรูซาเล็ม อากูเนอ แกแย โอ่เตเพร, อามุย เร๊อ เพสิเมโอน. อา หม่า แกแย จูเอ่ เบ่หยื่อเบ่แหน่ จอแปแหร่ เตเพร, โท๊โต่ แหย่โยบูโพ๊แบ่เจ่ โอ่เกอ เร๊อ อา. อา หม่า แกแย เด๊อ อา โอ่ป่อแม๊ชือ จอแปแหร่ เก่ เมแลเปล๊กา อิสราเอล เด๊อ เตจาเตจือ อากู เตเพร. 26โทเร๊อ แหย่โยบูโพ๊แบ่เจ่ เด๊อะแม๊เถอะลว๊า ตาเต หนื่ออื่อ เฮ๊อ อา เนอ, อา เก่ แม๊เถอะ แต่ล๋าย ครี๊ เด๊อ แบ่เจ่ จอแปแหร่ นว๊าแถ่ ลู เออเตเพร ล๋ายโต่ เฮ๊เนอ, อา เบ่เซอหนิ ล๋ายโต่. 27แหย่โยบูโพ๊แบ่เจ่ ซู เพสิเมโอน เร๊อ อา จว๊าโน เด๊อ เตหลู่แตโฮกู. เบ๊อะแบ่เจ่เหย่ซู่ อาโหมะอาเพ แพ๊แฮหนิ ลู, เร๊อ อา เก่ แฮเม เป่ ลู ฮู๊ จอแปแหร่ อา เตซว๊าเตแส่ เฮ๊หนื่ออื่อแก เบ๊อะเนอ, 28เพสิเมโอน อาแพ๊แถ่ เป๊เจ่พู๊ เด๊อ อา กู๊ขุลู เร๊อ อา ถู่เซ๊แถ่ จอแปแหร่ เร๊อ อา เฮ๊ เน๊อ,29“เก๋อ แบ่เจ่, ฮู๊ เน เฮ๊หนื่ออื่อแก โทเฮ๊อ เนโหง่ เนอ, กู๊แหน่เรอ อา เล๊อแถ่บาแถ่ เฮ๊อ, นอเซอตู๊จู่เตอเจ๊อ โมดื่อ มอเฮ๊อ เนหลู่เล๊ หม่า แวเออ. 30– 31เน เตเมแลเปล๊กา เด๊อ เน ตี๊หรี่แตแร หนื่ออื่อ เป่ เน แกแย ปวาเพร อาเง เออเนอ, แว แม๊เถอะ เหน่กล่อ เจ๊อเฮ๊อ เด๊อ แวเป๊เส่ เฮ๊อ. 32อา หม่า เตลีเต๊อเจ่อ เด๊อ อา เก่ เด๊อะโลแถ่ เป่ แกแยยิวพู๊ หม่าโต่ เต๊เห่, โท๊โต่ อา พย๊าแฮหนิ เป่เตเด๊อะบุ๊ยเด๊อะเตอเรอ เด๊อ เน แกแย อิสราเอลพู๊ เต๊เห่ อา โอ่.” f 33เด๊อ เพสิเมโอน เฮ๊เบ่ เตหรี่เตแก เออ อาขว่าอาคยา, เป๊เจ่พู๊ เออเตเพร อาโหมะอาเพ คย๊าอายื๊อ แหน่เจ๊อ. 34เพสิเมโอน เด๊อะบุ๊ยเด๊อะเตอเรอโท เหย่ซี เร๊อ อา เฮ๊แกหนิ เป๊เจ่พู๊ อาโหมะ โหมะมารีย์ เออเนอ เน๊อ, “เป๊เจ่เออ จอแปแหร่ นว๊าแถ่เฮ๊อ ลู เด๊อ อา เก่ เมแลเปล๊กา อิสราเอล เต๊เห่ ปา, เร๊อ อา เก่ แด่ดุแด่แถ่โล เกอลาติ แกแย เด๊อ อาโร เต๊เห่ ปา. อา หม่า จอแปแหร่ อา เตม๊าเตแด เต๊อเจ่อ, เร๊อ แกแย เก่เฮ๊เบ่จู๊แกฉื่อลูปาเนอ, โอ่โร๊เอ๊ลาปา. 35ฮู๊เนอเรอ แกแย เตเน ด๊อโอ๊ด๊อบี๊ เต เด๊อ เหย่ซี อาซิปล่อกู เต๊เห่เนอ, โอ่เอ๊ลา, เร๊อจอแปแหร่ เก่ โบ๊โมเถ่โล ปา.” โทเร๊อ อา เฮ๊ โหมะมารีย์ เน๊อ, “เตซิเปลซิหย่อ เด๊อ อา แท แซ่เจ๊อเร๊อ เน๊ เนอ อา เก่ โพรโน เน ซิปล่อ ปา.” 36เพรโพรโหมะ โอ่แคร๊ เด๊อ อา โหมะเผระ แหน่เจ๊อ เฮ๊อ โอ่ เตเพร, อามุย เร๊อ โหมะอันนา. อา หม่า คูฟานูเอล อาพู๊เพร เหมาะ, อา หม่า อาเชอร์ อากลุย เตเพร อา พย๊าโท อาเว เร๊อ อา โอ่เต่อหนิ ลู โซซว๊าต๊าหน่า แพ๊. 37อาเว เซอแก ลูเหล่ เร๊อ อา โอ่แคร๊แก เร๊อดื่อ แพ๊. กู๊แหน่เรอ อาหน่า โอ่ เฮ๊อ เชอลุยซว๊า เร๊อ ลุยหน่า เฮ๊อ. อา เถ่จว๊า โตโพ๋ โต่, อา โอ่แพ๊ เบ๊อะเตหลู่แตโฮกูเนอ แพ๊. อา จ๊อบู่จ๊อเบแถ่ จอแปแหร่ เด๊อ เตเตหลู่แตโฮกู เหมาะคี๊คี๊ เหมาะเชเกลเกล เจ๊อ, โท๊โต่ อา โด่เอ่ เหล่เอ่เหล่โอ เร๊อ อา กุยจ๊อเบ ปวาเนอปวาเซ เจ๊อ. 38เบ๊อะเนอเค, อา แฮโต่ โตตื๊อ เด๊อ เหย่ซี โอ่ เร๊อ อา ถู่เซ๊แถ่ จอแปแหร่. โทเรอ อา แด๊โฉ่โล เป่ เป๊เจ่พู๊ เออเตเพร อาหรี่อาแก. เร๊ออาเฮ๊โฉ่โล ล๋อ เป่แกแย เด๊อ อา โอ่ป่อแม๊ชือ จอแปแหร่ เก่ เมแลเปล๊กา วีเยรูซาเล็มพู๊ ปา เนอเต๊เห่.
เพโยเซฟ เร๊อ โหมะมารีย์ กาคยา คยาแซ๊ เด๊อ วีนาซาเร็ธ
39เบ๊อะเพโยเซฟ เร๊อ โหมะมารีย์ เมโทลอเฮ๊อ ฮู๊ ล๊อ แบ่เจ่ เฮ๊แก เตซว๊าเตแส่ เต๊เห่ เบ๊อะเนอ, เหย่ซี กาคยา คยาแซ๊ เด๊อ อาเหล่โอ่ เกอเร๊อ วีนาซาเร็ธ เนอ. วีเออเนอ อา โอ่ เบ๊อะกาลิลีเก่กู เนอ. g 40เป๊เจ่เออ อา ดุแถ่ เร๊อ อา เหร่ฉว่าเหร่ชอ แฮ, เร๊อ อา เล๊อบา เจ๊อ เร๊อ เตลีแมลีเพ๊ เร๊อ จอแปแหร่ เด๊อะบุ๊ยเด๊อะเตอเรอ หนิ ลู.เป๊เจ่ เหย่ซู่ เด๊อ เตหลู่แตโฮกู
41ปว๊าหน่าหน๋า เบ๊อะอู เมป่วยเมป๊อย เกอเร๊อ ป่วย เด๊อ อู เอ๊ เร๊อ ป่วยเตจว๊า ตา ลว๊า เบ๊อะเนอ, เหย่ซู่ อาโหมะอาเพ จว๊าเกอ เด๊อ วีเยรูซาเล็ม. h 42เบ๊อะเหย่ซู่ หน่าโอ่เฮ๊อ เช๊อเนอหน่า เบ๊อะเนอ, อาโหมะอาเพ เออเนอ, อาเหล่โกล จว๊า แลแค เตป่วยจว๊าตาลว๊า, เร๊อ อา เอ๊ จว๊าหนิ เป๊เจ่พู๊ เหย่ซู่. 43เบ๊อะเตป่วยจว๊าตาลว๊า โทเฮ๊อ อาเบ๊อะเนอ, เหย่ซี กาคยา เด๊อ อาดออาโฉ่. เบ๊อะเนออาเค, เป๊เจ่ เหย่ซู่ เออ อา โอ่แก เด๊อ วีเยรูซาเล็ม อากู, หม่าแน๊เรอ อาโหมะอาเพ ซิเง โต่. 44เหย่ซี เตเน เร๊อ อา กา เต่อเกอ เฮ๊อ เร๊อ แกแย เด๊อ อา จว๊าป่วยกา เนอเต๊เห่ อาเกล เฮ๊อ. เบ๊อะเหย่ซี กา โทเฮ๊อ เตอเน๋อ เหมาะเฮ๊ เบ๊อะเนอ, อา แม๊ปู แด๊เฮอหนิ เนอ เหย่ซู่ เด๊อ อาโป่ แหว่เกล เต๊เห่ อาเกล แพ๊. 45เบ๊อะเหย่ซี แม๊ปู เร๊อ อา แม๊เถอะ เป่ ปา โต่ เบ๊อะเนอ, เหย่ซี กาคยา คยาแซ๊ แลแค เด๊อ วีเยรูซาเล็ม. 46อาบาโซเนอเนอ, อา จว๊า แม๊เถอะเนอ เหย่ซู่ จว๊า โอ่ เด๊อ เตหลู่แตโฮกู แพ๊. อา จว๊า โอ่แนโอ่ เต่อเกอ เร๊อ ยูดาห์ อา ซ๊าร๊าดุ ซ๊ามาทู เต๊เห่ เร๊อ อา จว๊าหนิดา เกอ จอแปแหร่ อาลาอาโหง่ เต๊เห่ เร๊อ อา เฮ๊เบ่ แด๊เฮอ เกออู เบ๊อะเนอ. 47เบ๊อะแกแย ล๋อ ปลี หนิโฮ เป๊เจ่พู๊ เออเตเพร อา เตเฮ๊เบ่อี๊โซ เบ๊อะเนอ, เหย่ซี คย๊าอายื๊อ ลอปลี เจ๊อ อา เตแจ่เตลีแม เร๊อ อา เตเฮ๊ฉื่อ กาคยา อู เนอเต๊เห่ เจ๊อ. 48เพโยเซฟ เร๊อโหมะ มารีย์ จว๊าแม๊เถอะ ลู เร๊อ อา คย๊าอายื๊อ แหน่เจ๊อ, เร๊อ อาโหมะ เฮ๊ ลู เน๊อ, “พู๊คู, เน จว๊า เมโต่ ฮู๊เออ เมเต? แว เร๊อ เนเพ เตเนกู่เตเนแก เร๊อ แม๊ปู แหน่กู เน หม่า ตื๊อดื๋อแหน่ เจ๊อ เม.” 49เร๊อ เป๊เจ่ เหย่ซู่ เฮ๊ฉื่อ เน๊อ, “ซี จว๊า แม๊ปู แว เกเต๊ เนอ เมเต? ซี ซิเง แหน่ เร๊อ แว โอ่ เด๊อ แวเพ อาหี่กู โต่ แอ.” 50หม่าแน๊เรอ อาโหมะอาเพ ซิเงโปล ลู เตเฮ๊เบ่ เออ อาโหง่แลช๊า โต่. 51โทเร๊อ เป๊เจ่พู๊เออ อา ครวา กาเกอคยา อาโหมะอาเพ เด๊อ วีนาซาเร็ธ เร๊อ อา จู โหมะลาเพโหง่ ปว๋า โตโพ๊. อาโหมะ เตเนหม่า โอ่ปล๊อลอ ล๋อ เตทวาแถ่ อาเหน่ เออเนอเต๊เห่. 52เหย่ซู่ ดุแถ่ เล๊อบา เร๊อ เตลีแมลีเพ๊ เร๊อ จอแปแหร่ เร๊อ แกแยเห่ขุพู๊ แม๊โมแม๊ดุ เกอ เร๊อ ลู. i
Copyright information for
EkySCThai