Luke 22

แกแยยิวพู๊ ทวาดุทวาเต เต๊เห่ เตเน ปื่อ แลแค เหย่ซู่

(มัทธิว ๒๖:๑-๕, ๑๔, ๑๖, มาระโก ๑๔:๑-๒, ๑๐-๑๑, ยอห์น ๑๑:๔๕-๕๓)

1ป่วยเอ่ค๊อมู โชโด โฮหมื่ออากลุย เด๊อ อู เอ๊ เร๊อ ป่วยเตจว๊า ตา ลว๊า เออเนอ, อาม๊อเนอม๊อเซ แฮผื่อ เฮ๊อ. ^a 2เพรหลู่แต ทวาดุทวาเต เต๊เห่ เร๊อ เพรอิซว๊า เตซว๊าเตแส่ อาซ๊าร๊า เต๊เห่ ซิอิเช แกแย เบ๊หมู่ อาเหล่ อาขว่าอาคยา, อา แม๊ปู แกล๊ โตโบโบ เด๊อ อา เก่ เมเซอโห่แก เหย่ซู่.

คูยูดาส อ๊อแล เด๊อ อา เก่ อิเชแก เหย่ซู่

3โทเรอ คูยูดาส เด๊อ อู เอ๊โป๊ อามุย เร๊อ อิสคาริโอท เออเตเพรเนอ, โลเน๊ กู่กล๊อ แฮโน เด๊อ ลู ซิปล่อกู. อา หม่า อา โอ่เต่อเกอ เด๊อ แบ่เจ่ เหย่ซู่ อา โคเจ่ เช๊อซิเนอ อาเกล เตเพรเฮ๊อ. 4ฮู๊เนอ อาขว่าอาคยา, คูยูดาส จว๊าโอ่โด่แน เร๊อ เพรหลู่แต ทวาดุทวาเต เต๊เห่ เร๊อ แกแย โอ่ป่อ เตหลู่แตโฮ กู่กล๊อ เต๊เห่. เร๊อ อา จว๊าโอ่กู๊ โด่แน เกอ เร๊อ เหย่ซี เร๊อ อา เก่ อิเชตาแก เหย่ซู่ ฮู๊เต ปาเนอ อาหรี่อาแก. 5เหย่ซี ซิครือซิลอ อ๊อแลฉื่อ คูยูดาส เร๊อ อา เก่ เด๊อะ ลู รือ ปา. 6คูยูดาส จูฉื่อ เหย่ซี. โทเรอ แซ่ฮู๊ อู เก่ ซิเง แต่ เตเพร่ว แต่เหม่ เนอ, อา เป๊อแถ่ แม๊ปู อาตาโต ตาเบ่ เด๊อ อา เก่ อิเช ตาแกหนิ เหย่ซู่.

เตตี๊หรี่แตแร เตจว๊าตาลว๊าป่วย เหล่เอ่เหล่โอ

(มัทธิว ๒๖:๑๗-๒๕, มาระโก ๑๔:๑๒-๒๑, ยอห์น ๑๓:๒๑-๓๐)

7ม๊อเนอม๊อเซ เบ่เฮ๊อ เด๊อ ป่วยเอ่ค๊อมู โชโด โฮหมื่ออากลุย แฮโต่เฮ๊อ เร๊อ แกแยยิวพู๊ เต๊เห่ เมเซอ แลแค ซิหมิพู๊ เด๊อ เก่เอ่เก่โอ่ เร๊อ เตจว๊าตาลว๊าป่วย อาเง. 8เหย่ซู่ นอ คูเปโตร เร๊อ คูยอห์น เร๊อ อา หม่าจว๊าหนิ เหย่ซี โหง่ เน๊อ, “จว๊า ตี๊หรี่แตแร หนื่ออื่อ แลแค เป เหล่เอ่เหล่โอ ป่วยเตจว๊า ตา ลว๊า เอ่โอบูโพ๊เหมาะเฮ๊ เออเนอ นี๋.”

9เหย่ซี แด๊เฮอ ลู เน๊อ, “เน ซิหยื่อ นอตี๊หรี่แตแร โต เป เบ๊อะโต๊โผ่เต?”

10เหย่ซู่ เฮ๊ เหย่ซี เน๊อ, “หนิดา แลแค, เบ๊อะซี จว๊าโนโต่เฮ๊อ เด๊อ วีกู อาเบ๊อะเนอปาเนอ, ซี เก่ แม๊เถอะฉื่อ เร๊อ แกแยเพ แฮแด๊ กว่ากาเทอ เร๊อ โซแบ๊ เตเพร ปา. เร๊อ ครวา กา โนเกอ เจ๊อ ลู เด๊อ อา กาโน เกอเร๊อ หี่เตเม อากูเนอ นี๋. 11เร๊อ แด๊เฮอ หี่แบ่เจ่เนอ เน๊อ, ‘ซ๊าร๊า แด๊เฮอ เน เนอ, หี่ด๊อกู เด๊อ ซิเผระ อาเง เด๊อ แว เร๊อ แว โคเจ่ เต๊เห่ เก่ เอ่ ป่วยเตจว๊า ตา ลว๊า อาเง เออเนอหม่า อา โอ่ โตเบ๊อะเต?’ แด๊เฮอ ลู ฮู๊เนอ นี๋. 12โทปาเรอ อา เก่ ยูโล ซี หี่ด๊อกู เหล่โอ่แตแกล เด๊อ อาขุ เนอโต๊โต่ เด๊อ อา โอ่เล๊อโอ่บา เจ๊อ เร๊อ ตาหมื่อตาเต เด๊อ เป โหล่ เนอเต๊เห่ เจ๊อ ปา. เร๊อ โอ่แก แลแค เบ๊อะเนอ เร๊อ ตี๊หรี่แตแร เป่ แลแค เป เหล่เอ่เหล่โอ เบ๊อะเนอ นี๋.”

13เหย่ซี เถ่จว๊า เร๊อ เหย่ซี จว๊าแม๊เถอะ หม่าแหน่ เจ๊อ ฮู๊ เหย่ซู่ เฮ๊หนื่ออื่อ เหย่ซี เนอ เจ๊อ. เร๊อ เหย่ซี จว๊า ตี๊หรี่แตแรหนิ แลแค ป่วยเตจว๊า ตา ลว๊า เอ่โอบูโพ๊ เหมาะเฮ๊ อาเง เบ๊อะเนอ.

แบ่เจ่ อา เตเอ่โอบูโพ๊ เหมาะเฮ๊

(มัทธิว ๒๖:๒๖-๓๐, มาระโก ๑๔:๒๒-๒๖, โครินธ์ อาเหร่อเล๊อ ต๊าบ่า ๑๑:๒๓-๒๕)

14เบ๊อะแฮโต่เฮ๊อ เด๊อ โตเบ่ เอ่โอ เฮ๊อ เตจว๊าตาลว๊าป่วย เบ๊อะเนอ, แบ่เจ่ เหย่ซู่ เร๊อ เพรโด่แนพู๊ เต๊เห่ จว๊า โอ่แนโอ่ ตาวา โหร่ลอ ลู เด๊อ เหล่เอ่ดีอาเหร่ อาช๊า. 15เร๊อ อา เฮ๊ เหย่ซี เน๊อ, “เบ๊อะแว เย๊อเบ๊ แต่ล๋าย เตจาเตจือ ล๋ายโต่ เบ๊อะเนอ, แว ซิหยื่อ เอ่เต่อโอเต่อเกอ แหน่เจ๊อ ป่วยเตจว๊า ตา ลว๊า เอ่โอบูโพ๊เหมาะเฮ๊ เออโตโพ๊เนอ เร๊อ ซี โกโน๋ โต่. 16เมเตเฮ๊เรอ, แว เฮ๊ ซี, จอแปแหร่ อา อี๊ถ่ากา ปลื๊อโทลอ แต่ล๋าย อาแกแย โต่ เร๊อ อา แฮ ทวาคุ๊ย เร๊อ เป๊อหนิแล เหย่ซี โต่เนอ, แว เอ่น๊อเกอ ปา เตจว๊าตาลว๊าป่วย เหล่เอ่เหล่โอ เออเนอ เร๊อ ซี โต่ เฮ๊อ.”

17เหย่ซู่ พย๊าแถ่ เบ เร๊อ อา เฮ๊บุ๊ยเฮ๊เตอเรอแถ่ จอแปแหร่ โทเรอ อา เฮ๊ เน๊อ, “พย๊ามอ เบเออ เร๊อเด๊อะตาโอ เป่ ลู. 18เมเตเฮ๊เรอ แว เฮ๊ ซี, เป๊อแถ่ กู๊แหน่เออ ตาเป่แฮ โต่เด๊อ จอแปแหร่ อา แฮ เป๊อเทอเป๊อเก่ ปา โตโพ๊เนอ, แว โอน๊อ เกอปา แท๊ทือเทอเออ โต่เฮ๊อ.”

19โทเร๊อ เหย่ซู่ พย๊า ค๊อมู เร๊อ อา เฮ๊บุ๊ยเฮ๊เตอเรอแถ่ จอแปแหร่ โทเรอ อา บิกยา ค๊อมู เร๊อ อา เด๊อะตา เร๊อ เหย่ซี. เร๊อ อา เฮ๊ เหย่ซี เน๊อ, “เออ หม่า แว เหน่กล่อ เด๊อ แว เด๊อะแลแก เด๊อ ซีเง เนอเฮ๊อ. เอ่ แลแค เออ เร๊อ เตเนแถ่ โต่แว นี๋.”

20เบ๊อะอา เอ่โทเฮ๊อ ค๊อมู เบ๊อะเนอ, อา พย๊าแถ่ เบเออ เร๊อ อา เม แซ่เกอดื่อ ฮู๊ อา เม ค๊อมูเนอ เร๊อ อา เฮ๊ เน๊อ, “เออ หม่า แวสุ่ย เด๊อ อา เมหม่าเมกลอ เตอ๊อแล อาเซ เร๊อ อา ทุ๊ยตา เด๊อ ซีเง เออเนอ เฮ๊อ. ^b 21หม่าแน๊เรอ แม๊ แลแค! แกแย เด๊อ อา เก่ อิเชตาแก แว เออเตเพรเนอ, อา โอ่เต่อเกอ เร๊อ แว เบ๊อะเหล่เอ่ดีอาเหร่ อาช๊า เออเนอ แพ๊. ^c 22แกแยพู๊คู หม่าดื่อ แวเออ อา เก่ เซอ ฮู๊ จอแปแหร่ อา เตเนหนื่ออื่อ น๊อปา ตื๊อดื่อเรอ แกแย เด๊อ อา เก่ อิเชตาแก แว เออเตเพรเนอ, อา เก่ ข่าเบ่ แหน่เจ๊อ เตจาเตจือ ปา!” 23เร๊อ เหย่ซี แด๊เฮอ เกอเร๊อ ลู เตเพร เร๊อ เตเพร เร๊อ อา เฮ๊ แลแค เนอ, เบ๊อะเตเพร เก่ อิเชตาแก อา ปา แห?

เตเคร๊เตแขระ ลู เร๊อ เตทวาดุเล๊อ อาหรี่อาแก

24อา โคเจ่ เต๊เห่ เคร๊แขะ เกอเร๊อลู เนอ, เด๊อ เปเกล เออเนอ หม่า อูเป เก่ ทวาดุเล๊อ อู ปา เป แห? ^d ฮู๊เนอ, 25เร๊อ เหย่ซู่ เฮ๊ เหย่ซี เน๊อ, “แกแยยิวพู๊ หม่าโต่ เต๊เห่ อาคุ๊ยจ๊อแผ่ ซี เต๊เห่เนอ, อา นอจ่อ เกอเร๊อ แลแค อา เตอเรอฉว่าชอ เออเนอ เด๊อ เทอพู๊เก่พู๊ เต๊เห่ อาขุ, เร๊อ เพรเป๊อตี๊หรี่เต เต๊เห่เนอ, อา ซิหยื่อ เด๊อ อู เก่ เอ๊ เหย่ซี เน๊อ, ‘เพร เมบุ๊ยเมเตอเรอ เทอพู๊เก่พู๊’ เต๊เห่ ฮู๊เนอ. 26หม่าแน๊เรอ ซี เออเต๊เห่หม่า ซี เบ่เม หนิ เกออู ฮู๊เนอโต่. แกแย เด๊อ อา ทวาดุเล๊อ อู เด๊อ ซีเกล เตเพร เพรเนอ, อา โตเบ่ ทวา ฮู๊ แกแย เด๊อ อา ปีตี๊เล๊อ เตเพรเนอ, โทเรอ แกแย เด๊อ อา ทวา กู่กล๊อ เตเพร เพรเนอ, อา โตเบ่ ทวา ฮู๊ หลู่เล๊ เตเพรเนอ. ^e 27แกแย เห่ขุพู๊ เต๊เห่ เตเน เร๊อ แกแย โอ่แนโอ่ อาเอ่อาโอ เด๊อ ดีเหร่ช๊า เนอหม่า อา ทวา ดุเล๊ออู เฮ๊อ. เร๊อ เพร เมเตพู๊ เด๊อ อา โบ่เอ่ แกแย เด๊อ อา โอ่แน เอ่เฉ่ เนอเต๊เห่ หม่า อา ทวา แกแย เด๊อ อา ปีตี๊เล๊ออู เฮ๊อ อา เตเน แลแค ฮู๊เนอ. หม่าแน๊เรอ, แวเร๊อ แว โอ่ เด๊อ ซีเกล ฮู๊ หลู่เล๊ เด๊อ อา เล๊เอ่เล๊โอ อู เตเพร เนอแพ๊. ^f 28เบ๊อะแว ข่าเบ่ เตแป่เตเช เบ๊อะเนอ, ซี โอ่เกอเฮ๊อ เร๊อ แว ปว๋า โตโพ๊ เฮ๊อ. 29ฮู๊ แวเพ นอเป๊อ แว เนอ, แว นอเป๊อ เกอ ซี ปา. 30เมเตเฮ๊เรอ แซ่ฮู๊ ซี เก่ เอ่โอ เต่อเกอ เร๊อ แว เด๊อ แว ดีเหร่ขุ ช๊า เด๊อ แวเทอแวเก่กู ปา. โท๊โต่ แซ่ฮู๊ ซี เก่ โอ่แนโอ่ เต่อน๊อ เกอดื่อ เร๊อ แว เด๊อกู่แกล๊เท แถ่โล อาขุ ปา. เร๊อ ซี เก่ เจแม๊ เมโต เร๊อดื่อ อิสราเอล เช๊อเนอโหมะ เออเนอ ปา. ^g

เหย่ซู่ เฮ๊โลหนื่ออื่อ เร๊อ คูเปโตร อา โชโม๊บิแก ลู ปา อาหรี่อาแก

(มัทธิว ๒๖:๓๑-๓๕, มาระโก ๑๔:๒๗-๓๑, ยอห์น ๑๓:๓๖-๓๘)

31“คูซีโมน, คูซีโมน, หนิดา! โลเน๊ กู่กล๊อ จว๊ากูยตื๊อดื่อ เจ๊อ เร๊อ จอแปแหร่ เร๊อ อา เก่ ปลวาเฮ๊อ โลเน๊ กู่กล๊อ อา เมแม๊ ลอ ซี ปว๋า เพร เฮ๊อ. เร๊อ อา เก่ เมแม๊ ซี ฮู๊ เพรเมเอ่เพร๊พู๊ เตเล๊เช๊ เกอเร๊อ อาโบ๊ เนอ ปา. 32หม่าแน๊เรอ, คูซีโมน, แซ่ฮู๊ เน เตหยื่อเตแหน่ อา ปย๊าแก แต่เหม่ เนอ, แว กุยจ๊อเบ เป่ เด๊อ เนเง. โทเรอ เบ๊อะเน ซิเหน่แลคยาแซ๊ กาคยา คยาแซ๊ เฮ๊อ เนเหน่ ปาเนอ, เน โตเบ่ เด๊อะอ๊าเด๊อะเหร่หนิ เน โป่แหว่ เต๊เห่ ปา นี๋.”

33คูซีโมน เปโตร เฮ๊ฉื่อ ลู เน๊อ, “แบ่เจ่, แว โตเบ่ จว๊า เต่อเกอ เร๊อ เน เด๊อ อู เหล่ด๊อตา แกแย อา ทอกูเนอ เจ๊อ เบ่เบ่, หม่าโต่เรอ แว โตเบ่ เซอ เต่อเกอ เจ๊อ เร๊อ เน เบ่เบ่, แว โอ่เซเร หนื่ออื่อ เฮ๊อ แวเหน่ เฮ๊อ.”

34เร๊อ เหย่ซู่ เฮ๊ฉื่อ ลู เน๊อ, “คูเปโตร, แว เฮ๊ เน, เออเตเซ ปา, เบ๊อะชาเพ อี๊อู่ แต่ล๋ายโต่ เบ๊อะเนอ, เน โชโม๊บิแกแว โซโพ๊ ปา.”

รือทอ, ปยา เร๊อ เน๊

35โทเรอ เหย่ซู่ แด๊เฮอ อา โคเจ่ เต๊เห่ เน๊อ, “เด๊อ อาเหร่อเค เนอ, แว นอจว๊า ซี เร๊อ แว เฮ๊ ซี เนอ, รือทอ เบ่เบ่, ปยา เบ่เบ่, หม่าโต่เรอ แข่แด๊พ๊า เบ่เบ่ พย๊าจว๊าหนิ แต่ แลแค แต่เหม่ นี๋, แว เฮ๊ ซี ฮู๊เนอ. เบ๊อะเนอเค ซี โหล่น๊อ ปาน๊อ เต๊อเจ่อเจ่อ แอ?” ^h

เร๊อ เหย่ซี เฮ๊ฉื่อ เน๊อ, “เป โหล่น๊อ เตอเจ๋อ โต่.”

36เร๊อ เหย่ซู่ เฮ๊ฉื่อ เหย่ซี เน๊อ, “หม่าแน๊เรอ กู๊แหน่เออ, อูเป๊ เบ่เบ่ เด๊อ อารือทอ หม่าโต่เรอ, อาปยา โอ่เต๊เห่เนอ โต พย๊าจว๊าหนิ แลแค, เร๊อ แกแย เด๊อ อาเน๊ โอ่โต่ เต๊เห่เนอ โต่ อิเชแก อา จาอากลอดุ เร๊อ เพรพรีจว๊าหนิ แลแค. 37แว เฮ๊ ฮู๊เออ เมเตเฮ๊เนอหม่า ลีเทส่อพ๊า ราม๊าหนื่ออื่อแก แวหรี่แวแก เออเนอ, อา เบ่ เล๊อแถ่บาแถ่ ปา. ลีเทส่อพ๊า เฮ๊ เน๊อ, ‘อู แด่โน เต่อเกอ แว เร๊อ แกแยจา แกแยมู๊แหม่รีแจ่ เต๊เห่ อาเกล,’ แว เฮ๊ ซี เออเนอ, อา เตเร แฮ เล๊อแถ่บาแถ่ เฮ๊อ.” ⁱ

38อา โคเจ่ เต๊เห่ เฮ๊ เน๊อ, “แบ่เจ่, เน แม๊มอ! เน๊ โอ่ เบ๊อะเออ เนอเบ่.”

“บ๋าเนอ หม่า อาหนิ เฮ๊อ,” อา เฮ๊ฉื่อ ฮู๊เนอ.

เหย่ซู่ กุยจ๊อเบ เด๊อ โต๊โฉ่โฉ่ขุ

(มัทธิว ๒๖:๓๖-๔๖, มาระโก ๑๔:๓๒-๔๒)

39เหย่ซู่ โอ่ เด๊อ วีกู เร๊อ เถ่จว๊า เด๊อ โต๊โฉ่โฉ่ขุ ฮู๊ อาเหล่โกล จว๊า เกอเร๊อ เนอ, เร๊อ อา โคเจ่ เต๊เห่ ครวาจว๊า เต่อเกอ เร๊อ ลู. 40เบ๊อะอา จว๊าโต่เฮ๊อ เด๊อ โฉ่ขุ เบ๊อะเนอ, อา เฮ๊ เหย่ซี เน๊อ, “แซ่ฮู๊ ซี เก่ จว๊าโน เต่อเกอ แต่ เด๊อ เตอิลออี๊โหล่ อากู แต่เหม่เนอ, กุยจ๊อเบ แลแค นี๋.” 41โทเรอ อา เถ่จว๊า ตาพายา เร๊อ เหย่ซี เบ๊อะอู วีจว๊ายา หล่อ เตเม เนอ, เร๊อ อา จว๊าแด๊งือ กุยจ๊อเบ เบ๊อะเนอ. 42อา กุยจ๊อเบ เร๊อ อา เฮ๊ เน๊อ, “เก๋อ เพ จอแปแหร่, เน เก๊ ซิปล่อ โต เฮ๊เรอ, พย๊า ตาพาแก เป่ แว เตจาเตจือ อาเบหล่อ เออเต๊เบ่, หม่าแน๊เรอ จู๋ ดื่อ แว ซิปล่อ อา เตซิหยื่อ หม่าโต่, จู๋ ดื่อ แพ๊ เน ซิปล่อ นี๋.” 43เตเน่ว ม๊อขุพู๊ เตเพร แฮ โอ่โลแม๊เถอะ เนอ, อา แฮ เด๊อะอ๊าเด๊อะเหร่ ลู. 44อา ซิปล่อกู่ ซิปล่อแก แฮฉว่า เนอ, อา ลื๋อ กุยจ๊อเบ ฉว่าเล๊อ โป่โป่. เร๊อ อากู่ซาเทอ แลตา เด๊อ เห่ขุ เร๊อ อา แซ่ เจ๊อ เร๊อ สุ่ยตาเม๊ เนอ เจ๊อ.

45อา กุยจ๊อเบ โทเรอ อา กาคยาโต คยาแซ๊ เด๊อ อา โคเจ่ เต๊เห่ อา โอ่. อา โคเจ่ เต๊เห่ ซิปล่อกู่แก ตาลว๊าซิลือ อาขว่าอาคยา, เหย่ซู่ กาแม๊เถอะ เร๊อ เหย่ซี โอ่เมอตาปา ลอปลี เจ๊อ ปว๋า เตเพร. 46เหย่ซู่ เฮ๊ เหย่ซี เน๊อ, “ซี โอ่เมอ ตาปา ลอ แลแค ฮู๊เต? แซ่ฮู๊ ซี เก่ จว๊า ตาโน แต่ เด๊อ เตอิลออี๊โหล่ อากู แต่เหม่ เร๊อ ก๊อถ่อกุยจ๊อเบ ลอ มอ แลแค.”

อู ปื่อ เหย่ซู่

(มัทธิว ๒๖:๔๗-๕๖, มาระโก ๑๔:๔๓-๕๐, ยอห์น ๑๘:๓-๑๑)

47เบ๊อะแบ่เจ่ เหย่ซู่ เฮ๊เบ่ ปาแพ๊ เบ๊อะเนอ, แกแย เบ๊หมู่ ตู๊หมู่ แฮโต่. คูยูดาส เด๊อ อา โคเจ่ เช๊อซิเนอ อาเกล เออเตเพรเนอ, อา ซูแฮ เหย่ซี เด๊อ เหย่ซู่ อา โอ่, โทเรอ อา แฮโต เหย่ซู่ เร๊อ อา แฮโนมื๊อ ลู. 48หม่าแน๊เรอ เหย่ซู่ เฮ๊ ลู เน๊อ, “คูยูด๋าส, เออ หม่า เน อิเชตาแก เฮ๊อ แกแยเห่ขุ อาพู๊คู หม่าเฮ๊อ แว เออเนอ เร๊อ เน เตโนมื๊อ เออเนอ เฮ๊อ แอ?”

49อา โคเจ่ เด๊อ อา โอ่เกอ เร๊อ ลู เต๊เห่เนอ, อา ซิเงเฮ๊อ เร๊อ อู เตเร ปื่อ เฮ๊อ เหย่ซู่ เฮ๊อ อาขว่าอาคยา, เหย่ซี แด๊เฮอ ลู เน๊อ, “แบ่เจ่, เป โตเบ่ ปาฉื่อ เร๊อ เป เน๊เออ แอ?” 50เร๊อ เด๊อ เหย่ซี อาเกล เตเพรเนอ, อา ปาตือแก เพรหลู่แต กู่กล๊อดุเล๊อ อาหลู่เล๊ เตเพร อากู๊หลิโกะ โตโค๊.

51หม่าแน๊เรอ เหย่ซู่ เฮ๊ เหย่ซี เน๊อ, “โอ่โก๊ แลแค, เมปา แต่เหม่ เฮ๊อ” โทเรอ เหย่ซู่ แบ๊จิจือ กาคยา เป่ คยาแซ๊ แกแย เออเตเพร อา กู๊เหล่โก่ เร๊อ อา แหย่รี เป่ คยาแซ๊ ลู.

52โทเรอ เพรหลู่แต กู่กล๊อ เนอเต๊เห่ เร๊อ แกแย โอ่ป่อเตหลู่แตโฮ กู่กล๊อ เนอเต๊เห่ เร๊อ แกแยยิวพู๊ โหมะพรูโหมะเผร่ ทวาดุทวาเต เด๊อ อา แฮปื่อ ลู เออเต๊เห่เนอ, เหย่ซู่ เฮ๊ เหย่ซี เน๊อ, “ซี แฮปื่อ แลแค แว เต่อเกอเรอ ซี แฮ เจ๊อ เร๊อ เน๊ เร๊อ อิมือ ซีเต๊เห่ เจ๊อ, เร๊อ แว หม่า แกแย จามู๊แหม่ เด๊อ อา จว๊าแหย่ เอ่ อู เตเพร แหน่ แอ? 53แว โอ่เกอ เร๊อ ซี เด๊อเตหลู่แตโฮกู เนอ ปว๊า เตอเนอ เจ๊อ เร๊อ ซี ปื่อ แว โต่โต่, หม่าแน๊เรอ เบ๊อะโลเน๊ กู่กล๊อ อา เตอเรอฉว่าชอ เป๊อเต อาเคเออ, เบ๊อะเบ่เฮ๊อ เด๊อ ซี เบ่ เมแหน่ เฮ๊อ ฮู๊เออ เฮ๊อ.” ^j

คูเปโตร โชโม๊บิแก เหย่ซู่

(มัทธิว ๒๖:๕๗-๕๘, ๒๖:๖๗-๗๕, มาระโก ๑๔:๕๓-๕๔, ๑๔:๖๖-๗๒, ยอห์น ๑๘:๑๒-๑๘, ๑๘:๒๕-๒๗)

54เหย่ซี ปื่อ เหย่ซู่ เร๊อ เอ๊จว๊าแก ลู เด๊อ เพรหลู่แต กู่กล๊อดุเล๊อ เตเพร อาหี่, เร๊อ คูเปโตร ครวาจว๊า โล เกอ ลู เด๊อคยา. 55เด๊อ เพรหลู่แตดุเล๊อ เออเตเพร อาหี่ เกเร๊ กล่าเมกูเนอ, อู ชื๊อแก โอ่ หมิ เบ๊อะเนอ เต๊เผ่, เร๊อ คูเปโตร แฮโอ่แนตา เต่อเกอ เร๊อ แกแย โอ่แน อิชุ๊ยหมิ เบ๊อะเนอ เต๊เห่. 56เพรแรเต เพรเหมาะพู๊ เตเพร แม๊ตู่เต้า คูเปโตร โอ่แนโอ่ เบ๊อะหมิเผ่ช๊า เนอเรอ อา เฮ๊ ลู เน๊อ, “เออเตเพร หม่า หม่าเฮ๊อ อา โครครวา เหย่ซู่ อาคยา เนอเตเพร ว๋า!”

57หม่าแน๊เรอ คูเปโตร เฮ๊ฉื่อ ลู เน๊อ, “เพรเหมาะ! แว ซิเงน๊อ ลู โต่.”

58โอ่โป่ เตอเปลอฮู๊เนอ, เพรคู เด๊อ อาโรเตเพร แม๊เถอะ อา เร๊อ อา เฮ๊ ลู เน๊อ, “เน หม่า ตู๊หมู่จือ แพ๊ เร๊อ เหย่ซี แกแย เนอเต๊เห่ แพ๊ ว๋า!”

หม่าแน๊เรอ คูเปโตร เฮ๊ฉื่อ ลู เน๊อ, “คูเพ, แว หม่าน๊อโต่.”

59โทเรอ เด๊อคยา เบ๊อะผื่องยาเฮ๊อ ตือมือ เบ๊อะเนอ, แกแย เด๊อ อาโรเตเพร, เฮ๊ชอเกอเด๊อะ เจ๊อ เน๊อ, “แกแย เออเตเพร หม่า อา โอ่เต่อเกอ เร๊อ เหย่ซู่ เนอเตเพร เฮ๊อ, แว เฮ๊เออ อาซื๊อ เน๊อ ตีกี๋ โต่, เมเตเฮ๊เรอ อา หม่า แกแยกาลิลีพู๊ เตเพร แพ๊.”

60หม่าแน๊เรอ คูเปโตร เฮ๊ฉื่อ ลู เน๊อ, “คูเพ๋, เน เฮ๊แคร๋ อิเต เนอ, แว ซิเง โต่!” เบ๊อะอา เฮ๊เบ่ ปาแพ๊ ฮู๊เออ เบ๊อะเนอเนอ เร๊อ ชาเพ อี๊อู่แถ่. 61แบ่เจ่ ตีรี๊ แม๊จว๊า จ๊อ ลู เบ๊อะเนอ, อา เตเนแถ่ โต่เบ่ แบ่เจ่ เหย่ซู่ เฮ๊หนื่ออื่อแก ลู โหง่ เน๊อ, “เออเตเซ ปา, เบ๊อะชาเพ อี๊อู่ แต่ล๋ายโต่ เนอ, เน โชโม๊บิแก แว โซโพ๊ ปา,” อา เฮ๊ ลู ฮู๊เนอ. 62ฮู๊เนอเร๊อ อา เถ่จว๊าแก เด๊อ อากลอ เร๊อ อา จว๊า โหง่เซอโหง่โอ่ เจ๊อ.

อู เป๊อเจ่ออิแช๊ เหย่ซู่ เร๊อ อูมืออูปอ ลู

63แกแย เด๊อ อา โอ่ป่อแม๊ เหย่ซู่ เต๊เห่เนอ, อา เฮ๊ย๊อเฮ๊เล ลู เร๊อ อามืออาปอ ลอ ลู. 64เหย่ซี จอบี๊ เหย่ซู่ เป๊เส่ เร๊อ แด๊เฮอ ลู เน๊อ, “หม่าอูเป มือ เน เป? เฮ๊โพร แม๊แม๊!” 65โทเรอ เหย่ซี เป๊อเจ่ออิแช๊ เฮ๊มู๊แหม่รีแจ่ ลู เร๊อ โหง่ เด๊อ อาโร เต๊เห่ เนอ อา โอ่ เอ๊ลูปา.

อู เอ๊จว๊า เหย่ซู่ เด๊อ แกแยยิวพู๊ ทวาดุ เต๊เห่ อา เหล่โอ่ปล๊อ เบ๊อะเนอ เป๊เส่เง

(มัทธิว ๒๖:๕๘-๖๖, มาระโก ๑๔:๕๕-๖๔, ยอห์น ๑๘:๑๙-๒๔)

66เบ๊อะเหมาะลีบูเฮ๊อ เบ๊อะเนอ, แกแย ทวา แกแยยิวพู๊ อาตู๊หมู่ตอกล๊อ อา ทวาดุทวาเต เต๊เห่, เร๊อ เพรหลู่แต ทวาดุทวาเต, เร๊อ เพรอิซว๊า เตซว๊าเตแส่ อาซ๊าร๊า เต๊เห่ แฮ โอ่ปล๊อลอ ลู โตโพ๊โต, เร๊อ เหย่ซี เอ๊แฮ เหย่ซู่ เด๊อ แกแย ทวาดุ เต๊เห่ อาเป๊เส่เง. 67เร๊อ เหย่ซี เฮ๊ เน๊อ, “แด๊โฉ่ เป่แม๊ เป, เน หม่า ครี๊ เด๊อ จอแปแหร่ นว๊าแถ่ อา เด๊อ อา เก่ เมแลเปล๊กา แกแย เนอเตเพร เฮ๊อแอ?”

เร๊อ อา เฮ๊ฉื่อ เหย่ซี เน๊อ, “แว เก๊ เฮ๊ เป่ ซี๋ หม่า ซี หยื่อเอ่ แหน่ เร๊อ แว โต่โต่. 68แว เก่ แด๊เฮอ ซี๋ หม่า ซี เฮ๊ฉื่อ แน๊ แว โต่โต่. 69หม่าแน๊เรอ เป๊อแถ่ กู๊แหน่เออ ตาเป่แฮ ปาเนอ, แกแย อาพู๊ หม่าเฮ๊อ แวเออ อู เก่ เด๊อะโอ่แนโอ่ อา เด๊อ เตเตอเรอดุ เตอเรอทู อา จอแปแหร่ กู๊ขุ จ๊อทว๊า เนอตากยา ปา.” ^k

70เหย่ซี ปว๋า เตเพร เฮ๊ เน๊อ, “เก่ เฮ๊ฮู๊เนอ เรอ เน หม่า จอแปแหร่ อาพู๊ เตเพร เฮ๊อ เนอ?”

เร๊อ อา เฮ๊ฉื่อ เหย่ซี เน๊อ, “อ่อ, อา หม่าแหน่ ฮู๊ ซี เฮ๊ เนอ เฮ๊อ.”

71เร๊อ เหย่ซี เฮ๊ แลแค เน๊อ, “เป จว๊า โหล่ ปา เพรข่าเฮ๊โล ฮู๊เต? อา เฮ๊ เป่ เป เออเนอ, เป หนิโฮ ลอดื่อเฮ๊อ ปว๋า เตเพร เฮ๊อ.”