Luke 23

อู เอ๊จว๊า เหย่ซู่ เด๊อ คุ๊ยปีลาต อาเป๊เส่เง

(มัทธิว ๒๗:๑-๒, ๑๑-๑๔, มาระโก ๑๕:๑-๕, ยอห์น ๑๘:๒๘-๓๘)

1โทเรอ ล๋อ แกแย ทวาดุ เออเต๊เห่เนอ, อา ก๊อถ่อ เร๊อ อา เอ๊จว๊า เหย่ซู่ เด๊อ คุ๊ยปีลาต อาเป๊เส่เง. 2เหย่ซี แด่ แลแค เตซื๊อ เด๊อ เหย่ซู่ อาลู เร๊อ อา เฮ๊ เน๊อ, “เป ปื่อหนิ แกแย เออเตเพร, เมเตเฮ๊เรอ อา อี๊หล่าเมซื๊อ เอ๊ลา เป แกแย เต๊เห่ อาแกล๊, เร๊อ อา เฮ๊ เร๊อ โหล่เด๊อะ เร๊อ โรมัน คุ๊ยซีซาร์ อาหมู่อาร๊า โต่, โท๊โต่ อา เฮ๊แลหนิ โป่ อาเหน่ เน๊อ แว หม่า ครี๊ เด๊อ อา หม่าดื่อ คุ๊ย เตเพร, อา เฮ๊ ฮู๊เนอ.”

3คุ๊ยปีลาต แด๊ฮ๊อ ลู เน๊อ, “เน หม่า แกแยยิวพู๊ อาคุ๊ย เตเพร หม่าแหน่ แอ?”

เร๊อ อา เฮ๊ฉื่อ คุ๊ย เน๊อ, “อ่อ, อา หม่าแหน่ ฮู๊ เน เฮ๊เนอ เฮ๊อ.”

4โทเรอ คุ๊ยปีลาต เฮ๊ เพรหลู่แต ทวาดุทวาเต เต๊เห่ เร๊อ แกแย เบ๊หมู่ เต๊เห่ เน๊อ, “แว แด๊เฮอ เจแม๊ แกแย เออเตเพรเนอ, แว แม๊เถอะ อาเตซื๊อ เตอเจ๋อโต่.”

5หม่าแน๊เรอ, เหย่ซี ลื๋อ เอ๊โทแถ่ ฉว่าฉว่าเล๊อ โป่ เน๊อ, “อา จว๊าเล เมตอปล่อตือซือจว๊า ลอ แกแยยิวพู๊ เต๊เก่เล เร๊อ อา เตอิซว๊าอี๊แส่ เออเนอ. อา เป๊อแถ่ เม เด๊อ กาลิลีเก่ เร๊อ อา แฮโต่เฮ๊อ เบ๊อะเออ เฮ๊อ.”

อู ซูจว๊า เหย่ซู่ เด๊อ คุ๊ยเฮโรด อาเป๊เส่เง

6เบ๊อะคุ๊ยปีลาต หนิโฮ เหย่ซี เฮ๊ เด๊อ กาลิลีเก่, เร๊อ อา แด๊เฮอ เหย่ซี เน๊อ, “แกแย เออเตเพร หม่า แกแยกาลิลีพู๊ แอ?” 7เบ๊อะอา ซิเง เร๊อ เหย่ซู่ หม่า แกแยกาลิลีพู๊ เด๊อ อา โอ่ เด๊อ คุ๊ยเฮโรด อาเตเป๊อ อาเหล่โอ่ เบ๊อะเนอ, อา นอซูกาคยา ลู เด๊อ คุ๊ยเฮโรด อา โอ่. เบ๊อะเนอเค หม่า คุ๊ยเฮโรด โอ่ เด๊อ วีเยรูซาเล็ม.

8เบ๊อะคุ๊ยเฮโรด แม๊เถอะ เหย่ซู่ เบ๊อะเนอ, อา ซิครือซิลอ แหน่เจ๊อ, เมเตเฮ๊เรอ อา หนิโฮ โทเฮ๊อ เหย่ซู่ อาหรี่อาแก เร๊อ อา ซิหยื่อ แม๊เถอะ ลู เนอ อางย๋าลาเฮ๊อ. อา ซิหยื่อ แม๊เถอะ อา เก่ เม โคตีกลี๊ เต๊อเจ่อเจ่อ. 9ฮู๊เนอ อาขว่าอาคยา คุ๊ยเฮโรด แด๊เฮอ เอ๊ลา เหย่ซู่ ตื๊อดื่อเรอ เหย่ซู่ เฮ๊ฉื่อ ลู ตือมื๋อ โต่. 10เพรหลู่แต ทวาดุทวาเต เต๊เห่ เร๊อ เพรอิซว๊า เตซว๊าเตแส่ อาซ๊าร๊า เด๊อ อา ก๊อถ่อโอ่ แลแค เบ๊อะเนอ เต๊เห่, แม๊ปูแม๊แหว่ แด่ ตื๊อดื่อ เจ๊อ เหย่ซู่ เตซื๊อ เจ๊อ. 11คุ๊ยเฮโรด เร๊อ อาเกลอฮู๊ เต๊เห่ งยาโคร เหย่ซู่, เฮ๊โตโมเต๊เก่ ลอปลี เหย่ซู่, เร๊อ อา แซ๊แถ่ เป่ ลู จาจวาตว่า จาจวาแร๊ ตือปือ, เร๊อ คุ๊ยเฮโรด นอซู กาคยา เหย่ซี เด๊อ คุ๊ยปีลาต อาโอ่. 12เบ๊อะเนอเตอเนอเนอ, คุ๊ยเฮโรด เร๊อ คุ๊ยปีลาต ทวาแถ่ คยาแซ๊ลู โคแบ๊ซว๊า. เด๊อ อาเหร่อเค เนอหม่า เหย่ซี ซิเถ่ซิฮา เกอเร๊อ ลู.

อู เมจากาคยา เหย่ซู่ เร๊อ อา โตเบ่เซอ

(มัทธิว ๒๗:๑๕-๒๖, มาระโก ๑๕:๖-๑๕, ยอห์น ๑๘:๓๙, ๑๙:๑๖)

13คุ๊ยปีลาต เอ๊ปล๊อหนิ เพรหลู่แต ทวาดุทวาเต เต๊เห่ เร๊อ แกแย ทวา เพรเป๊อเต ทวาดุทวาเต เต๊เห่ เร๊อ แกแย โอ่โร๊ลู เจ๊อ. 14เร๊อ อา เฮ๊ เหย่ซี เน๊อ, “ซี แฮซู แกแย เออเตเพร เด๊อ แว โอ่, เร๊อ ซี เฮ๊ เร๊อ อา อี๊หล่าเมซื๊อ แกแย เบ๊หมู่ เต๊เห่ อาแกล๊, ซี เฮ๊ ฮู๊เนอ. กู๊แหน่เออ แว แด๊เฮอเจแม๊ เฮ๊อ อา เด๊อ ซี เป๊เส่เง เฮ๊อ ตื๊อดื่อเรอ ฮู๊ ซี แก่เช ลู เนอ, แว แม๊เถอะ อาเตซื๊อ เตอเจ๋อ โต่. 15คุ๊ยเฮโรด นอซูกาคยา คยาแซ๊ ลู เด๊อ เป โอ่ เมเตเฮ๊เรอ อา แม๊เถอะ ลูเตซื๊อ เตอเจ๋อ โต่โต่. แกแย เออเตเพรเนอ, อาเตซื๊อ โอ่ เด๊อ อา โตเบ่ เซอเนอ อา โอ่ เตอเจ๋อ โต่. 16ฮู๊เนอ อาขว่าอาคยา, แว เก่ นอปลี๊ อู เร๊อ อา, โทเรอ แว เก่ ปลวาเถ่กาแก อา.”

17– 18แกแย เบ๊หมู่ เอ๊โทแถ่ ลอ เน๊อ, “เมเซอแก อา, ปลวาเถ่ เป่ เป เด๊อ คูบารับบัส เนอ.” ดา จว๊าตาลว๊าป่วย เบ๊อะแฮโต่เฮ๊อ เฮ๊เนอ, ป่วยเออ อาเหล่โกล โอ่ เร๊อ คุ๊ยปีลาต เบ่ ปลวาเถ่ เป่ เหย่ซี แกแย เด๊อ อู ด๊อตา ลู เด๊อ ทอกู เต๊เห่ อาเกล เตเพร. ▼

▼อู รา โอ่ ลีเทส่อพ๊า มู๋ หนู่เค เต๊เห่เห่เนอ อาเฮฮู๊ อามาพู๊ ๑๘ เออ อา โอ่ป่า เกอ โต่

19(อู เมซู๊ซ๊า เด๊อ วีกู เบ๊อะเนอ, คูบารับบัส ล๋อ จว๊าเมซู๊ซ๊า โอ่เต่อเกออู อาขว่าอาคยา, อู ด๊อตา ลู เด๊อ ทอกู, โท๊โต่ อาเนอ อา เมเซอน๊อ แกแย เตเพรเพร.)

20คุ๊ยปีลาต ซิหยื่อ ปลวาเถ่แก เหย่ซู่ เร๊อ อา เฮ๊ คยาแซ๊โป่ เร๊อ แกแย เบ๊หมู่ เต๊เห่, 21หม่าแน๊เรอ เหย่ซี เอ๊โทแถ่ฉื่อ ตื๊อดื่อ เน๊อ, “มือเซอแถ่แก อา เด๊อ อี๊ถื่อดีเต่ลู เนอ! มือเซอแถ่แก อา เด๊อ อี๊ถื่อดีเต่ลู เนอ!”

22เร๊อ คุ๊ยปีลาต เฮ๊โป่ เหย่ซี โซโพ๊โตโพ๊ เน๊อ, “หม่าเมเตเรอ เบ่ มือเซอแถ่แก ลู? อา เมซื๊อ หม่าอิเต? อา เมเตซื๊อ เด๊อ อา โตเบ่ เซอ เจ๊อ เนอ, แว แม๊เถอะ เตอเจ๋อ โต่. แว เก่ นอมือ อู เร๊อ อา เร๊อ แว เก่ ปลวากาแก อา ปา.”

23อา เฮ๊ ฮู๊เนอ ตื๊อดื่อเรอ เหย่ซี ลื๋อ เอ๊โทแถ่ฉว่าฉว่า เล๊อ โป่ เร๊อ เก่ มือเซอแถ่แก เหย่ซู่ เด๊อ อี๊ถื่อดีเต่ลู. เร๊อ เด๊อคยาตื๊อดื่อเนอ, เหย่ซี เป่ แก. 24ฮู๊เนอ อาขว่าอาคยา, คุ๊ยปีลาต เด๊อะตาแก เหย่ซู่ เด๊อ เหย่ซี กู๊ยากู ฮู๊ เหย่ซี กุย ลู เนอ. 25คุ๊ยปีลาต ปลวาเถ่ เป่ เหย่ซี แกแยเพ เด๊อ เหย่ซี ซิหยื่อ นอปลวาเถ่ ลู เนอเตเพร. แกแยเพ เออเตเพร หม่า อา เมตอปลอตือซือ เต, อา เมเซอ อู เร๊อ อู ด๊อโอ่ ลู เด๊อ ทอกู. โทเร๊อ แซ่ฮู๊ เหย่ซี เก่ เม ลู จู๋ ดื่อ เหย่ซี ซิหยื่อ เมเนอ เร๊อ อา เด๊อะตาแก เหย่ซู่ เด๊อ เหย่ซี อากู๊ยากู.

อู มือเซอแถ่ เหย่ซู่ เด๊อ อี๊ถื่อดีเต่ โล

(มัทธิว ๒๗:๓๑-๔๔, มาระโก ๑๕:๒๑-๓๒, ยอห์น ๑๙:๑๗-๒๗)

26เบ๊อะเกลอฮู๊ เอ๊จว๊าเฮ๊อ เหย่ซู่ เบ๊อะเนอ, เหย่ซี จว๊าตาฉื่อ เร๊อ แกแย เตเพร เด๊อ อามุย เร๊อ คูซีโมน. อา หม่า วีอันทิโอก เตเพร, เร๊อ อา โอ่ เด๊อ ดอ แฮ แพ๊ เร๊อ อา แฮโน เด๊อ วีกู. เบ๊อะอา แฮโน เบ๊อะเนอ, เกลอฮู๊ ปื่อฉื่อ ลู เร๊อ เหย่ซี นอแย๊ ลู เร๊อ เหย่ซู่ อี๊ถื่อดีเต่, เร๊อ อา นอครวา จว๊า เกอ ลู เด๊อ เหย่ซู่ แบ๊คยา. 27แกแย ครวาจว๊าปลู ครวาจว๊าเผ่ เอ๊แหน่เกอ เหย่ซู่ อาคยา, เร๊อ เด๊อ แกแย เออเต๊เห่ อาเกลเนอ, เพรเหมาะ เด๊อ อา ซิเปล ซิหย่อ แหน่เจ๊อ เต๊เห่เนอ, อา โอ่ป่า จว๊าเต่อเกอ เบ๊อะเนอ, เร๊อ อา โหง่เซอโหง่โอ่ แลแค เจ๊อ. 28เหย่ซู่ ตีรี๊จว๊า โต เหย่ซี เร๊อ อา เฮ๊จว๊า เหย่ซี เน๊อ, “วีเยรูซาเล็ม เพรเหมาะ ซี๋, โหง่ แต่ เด๊อ แวเง แต่เหม่, โหง่ เกอเร๊อดื่อ แลแค เด๊อ ซีเง เร๊อ ซีพู๊ซีเลอ เต๊เห่ อาเงเนอ. 29เมเตเฮ๊เรอ, เตจาเตจือ อาม๊อเนอม๊อเซ เต๊เห่ เก่ แฮโต่ ปา เร๊อ อู เก่ เฮ๊ แลแค เน๊อ, ‘เพรเหมาะโชพู๊ เร๊อ เพรเหมาะ เด๊อ อาพู๊ โอ่น๊อ เกอ แลแค โตโพ๋ โต่, เร๊อ เพรเหมาะ เด๊อ อา เด๊อะอินู๊น๊อ เร๊อ เกอ เป๊เจ่ โตโพ๋ โต่ เต๊เห่ เก่ พย๊าหนิ แหน่เจ๊อ เตเด๊อะบุ๊ยเด๊อะเตอเรอ!’ อู เก่ เฮ๊ แลแค ฮู๊เออ ปา. 30เบ๊อะเนอเคปา
‘อู เก่ เฮ๊ แลแค หล่าโฉ่ เต๊เห่ ปา เน๊อ, “แลตาพรอ เด๊อ เปขุเออ!” โท๊โต่ อา เก่ เฮ๊ แลแค โฉ่ เต๊เห่ เน๊อ, “โอ่ ตาดวาบี๊ เร๊อ เป นี๋!”’ ^b

31แว เด๊อ อาแซ่เน๊อ ส่อซิโซ เออเนอ, เหย่ซี เก่ เมจาเมจือ เจ๊อ แว บ๋าเออ เก่เฮ๊เรอ, แกแย เด๊อ อาโร เร๊อ อา แซ๊ แลแค แพ๊ เด๊อ ส่อครา เต๊เห่เนอ, เหย่ซี เก่ เมจาเมจือเล๋อ เจ๊อ ปาปา.”

32เหย่ซี จุ่ยจว๊าหนิ เกอ แกแย เด๊อ อา เมซื๊อ เทอเก่ อา เตซว๊าเตแส่ ซิเนอเนอ เด๊อ อา เก่ มือเซอแถ่ เต่อเกอ เร๊อ เหย่ซู่. 33เหย่ซี จว๊าโต่ เด๊อ เหล่โอ่ โต๊โผ่ เด๊อ อู เอ๊ เน๊อ, “กู่กล๊อครุ๊ย.” โทเรอ เหย่ซี มือเซอแถ่ เต่อเกอ แกแย เมซื๊อ เทอเก่ อา เตซว๊าเตแส่ เออซิเนอ เร๊อ เหย่ซู่ เด๊อ อี๊ถื่อดีเต่ลู. เตเพร เร๊อ อา มือเซอแถ่ ลู เด๊อ เหย่ซู่ จ๊อทว๊า ตากยา, เตเพร เร๊อ อา มือเซอแถ่ ลู เด๊อ จ๊อจิ ตากยา. 34เหย่ซู่ เฮ๊ เน๊อ, “เพ๋, ปลวาแก เหย่ซี เตเหล่ซื๊อ นี๋, เมเตเฮ๊เรอ เหย่ซี เม เตฮู๊เออเนอ, อา ซิเง เกอเร๊อโต่.” เร๊อ เกลอฮู๊ เต๊เห่ เก่ เบพย๊า หนิโหร่ลู เหย่ซู่ เห่อจ่า เออเนอเร๊อ เหย่ซี บ๊อ เต แบบุ๊ย เต๊อเจ่อ เด๊อ จู๊ ดื่อ อา ตาโตเบ่ เบ๊อะเตเพร โต พย๊า เบ๊อะตากยา เต ฮู๊เนอแพ๊. ^c

35แกแย เต๊เห่ ก๊อถ่อโอ่แม๊ แลแค ปาแพ๊ เบ๊อะเนอ อาเค, แกแย เด๊อ อา ทวา ทวาดุทวาเต เต๊เห่ เป๊อเจ่ออิแช๊ งยาโคร แลแค เหย่ซู่, เร๊อ อา เฮ๊ แลแค เน๊อ, “อา หม่า อา เมแลเปล๊กา แจ๋ แหน่ อู หนิ. อา เก่ หม่าแหน่ ครี๊ เด๊อ จอแปแหร่ นว๊าแถ่ อา เนอเตเพร เก่เฮ๊เรอ, นอเมแลเปล๊แก เกอเร๊อ เกอมอ อาเหน่เนอ แต๋.” ^d

36เกลอฮู๊ เนอเต๊เห่ เบ่เบ่, อา งยาโคร เกอ ลอ ลู. เหย่ซี จว๊า เด๊อ เหย่ซู่ อา โอ่ เร๊อ อา จว๊าเด๊อะโอ ลู เทอแยเต๊เผระ. ^e 37เร๊อ เหย่ซี เฮ๊ ลู เน๊อ, “เน เก่ หม่าแหน่ แกแยยิวพู๊ เต๊เห่ อาคุ๊ย เก่เฮ๊เรอ เมแลเปล๊แก เกอเร๊อ เกอมอ เนเหน่ เนอแต่.”

38เด๊อ อา กู่กล๊อเท๊ เนอ, อู ราแถ่ โอ่ เร๊อ, “อา หม่า แกแยยิวพู๊ เต๊เห่ อาคุ๊ย.”

39แกแย เด๊อ อา เมซื๊อ เทอเก่ อา เตซว๊าเตแส่ เร๊อ อู มือเซอแถ่ เต่อ ลู เร๊อ เหย่ซู่ เออซิเนอ อาเกล เตเพร เนอ อา เป๊อเจ่ออิแช๊ เหย่ซู่ เน๊อ, “เน หม่า ครี๊ หม่าโต่ แอ? เมแลเปล๊กา เกอเร๊อ เกอมอ เนเหน่เนอ, เร๊อ เมแลเปล๊กา เกอมอ เป แต๋!”

40หม่าแน๊เรอ แกแย เมซื๊อ เทอเก่ อา เตซว๊าเตแส่ เด๊อ อาโรเตเพร ซิพรวา ลู เร๊อ อา เฮ๊ ลู เน๊อ, “เน ซิอิเช เกออู จอแปแหร่ โต่ แอ? เน หม่า เน พย๊าหนิ แซ๊เกอดื่อ เตเมจากาคยา แซ่เน๊อ อา เออเนอ แพ๊. 41เป เออซิเนอ พย๊าหนิ เตแม๊เมจากาคยา ฮู๊ เป เมซื๊อโทเฮ๊อ เนอเต๊เห่ อาขว่าอาคยา, อาโตอาเบ่ แพ๊. หม่าแน๊เรอ อาเนอ, อา เมซื๊อ เกออู เตอเจ๋อ โต่.”

42โทเรอ อา เฮ๊ เหย่ซู่ เน๊อ, “เก๋อ เหย่ซู๋, เบ๊อะเน แฮเป๊อเฮ๊อ ฮู๊ คุ๊ย เตเพร เฮ๊อ อาเบ๊อะเนอปาเนอ, เตเนแถ่เบ่ โต่เกอ แว ปา นี๋.”

43เร๊อ เหย่ซู่ เฮ๊ฉื่อ อา เน๊อ, “แว เฮ๊จ๊อจ๋อ เจ๊อ เน, เออเตอเนอ ปาเนอ, เน อา กาโอ่ เต่อเกอดื่อ เร๊อ แว เด๊อ บรมสุขเกษม กู ปา.”

เหย่ซู่เซอ อาหรี่อาแก

(มัทธิว ๒๗:๔๕-๕๖, มาระโก ๑๕:๓๓-๔๑, ยอห์น ๑๙:๒๘-๓๐)

44เบ๊อะเหมาะโถ่ เช๊อเนอมือ ผื่อเบ่เฮ๊อ เบ๊อะเนอ, ต๊อเหมาะ คี๊ตือรือตา เต๊เก่เล โต่ เจ๊อ เด๊อ เหมาะเฮ๊แล โซมือ เบ่ เนอ เจ๊อ. ^f 45เร๊อ อิเกบ่าดุ เด๊อ อู จ่อตาตือบี๊ ลู เด๊อ เตหลู่แตโฮกู เออต๊าบ่าเนอ, อา แลยา แก๊แถ่แกแล ปลื๊อแก เนอกยา. 46เหย่ซู่ จ่าเพรอ เอ๊โทแถ่ฉว่าฉว่า เร๊อ อา เฮ๊ เน๊อ, “เก๋อ เพ๋, แว เด๊อะแลแกเฮ๊อ แว ซิปล่อเซอเพร เด๊อ เน กู๊ยากู เฮ๊อ,” ^gอา เฮ๊ ฮู๊เนอ โทเรอ อา เซ๊ปลื๊อแก.

47โรมัน เกลอฮู๊เตเย กู่กล๊อ เออเตเพร แม๊เถอะ เตเมอาเหน่ เออเต๊เห่ เร๊อ อา ถู่เซ๊แถ่ จอแปแหร่ เร๊อ อา เฮ๊ เน๊อ, “แกแย เออเตเพร หม่า แกแยจ๊อ แกแยเต หม่าแหน่ เจ๊อ แหน่ เฮ๊อ!” 48แกแย เด๊อ อา แฮ โอ่โหร่โอเอ๊ โอ่ป่อแม๊ เร๊อ อา แม๊เถอะ เตเมทวาแถ่ อาเหน่ เออเต๊เห่เนอ, อา ซิเปล ลอปลี เจ๊อ อาขว่าอาคยา, เหย่ซี แปล่แล เกอเร๊อ แลแค อาโตโอ่ เร๊อ อา กา แลแค เด๊อ อาหี่. 49ล๋อ แกแย เด๊อ อา ซิเง เหย่ซู่ เต๊เห่ เร๊อ เพรเหมาะ เด๊อ อา โอ่ เด๊อกาลิลี เก่กู เร๊อ อา ครวา แฮเกอ ลู เต๊เห่เนอ, อา จว๊า ก๊อถ่อโอ่ โลตาพายา เร๊อ อา แม๊ แลแค ล๋อ อา ทวาแถ่ เออเต๊เห่. ^h

อู โล๊ เหย่ซู่

(มัทธิว ๒๗:๕๗-๖๑, มาระโก ๑๕:๔๒-๔๗, ยอห์น ๑๙:๓๘-๔๒)

50– 51แกแย เด๊อ อามุย เร๊อ คูโยเซฟ โอ่ เตเพร. อา โอ่ เด๊อ วีอาริมาเธีย, ยูดาห์เก่กู. อา หม่า แกแยแร๊, แกแยจ๊อจื้อ เด๊อ อา โอ่ป่อแม๊ชือ จอแปแหร่ อาเทออาเก่ เก่ แฮ ปา เตเพร. อา หม่า อา โอ่ป่าเต่อเกอ เร๊อ แกแย ทวาดุ อาตู๊หมู่ตอกล๊อกู เตเพร ตื๊อดื่อเรอ เบ๊อะอู อ๊อแล ลอ เร๊อ อู เก่ เมจากาคยา เหย่ซู่ เบ๊อะเนอ, อา อ๊อแล ป่าเต่อ เกออู โต่. 52อา จว๊า เด๊อ คู๊ยปีลาตอา โอ่ เร๊อ อา จว๊ากูย เหย่ซู่ อาโล. 53โทเรอ อา จว๊า พย๊าตา เหย่ซู่ อา โลเออ เด๊อ อี๊ถื่อดีเต่ โล เร๊อ อา โบ่บี๊ ลู เร๊อ อิเกแบ๊ปลี งูดุ ต๊าบ่า. โทเรอ อา จว๊าแด่โน ลู เด๊อ โลกู เด๊อ อู ขื่อกูโน โอ่ ลู เด๊อ หล่าลู เด๊อ อู โล๊น๊อ ลาย เร๊อ โล โตโพ๊ โต่ เออเนอ ตูกู. 54ม๊อเนอ เนอเตอเนอ หม่า ม๊อแงเนอ เด๊อ อู ตี๊หรี่แตแร หนื่ออื่อ แลแค แกแยยิวพู๊ อา ม๊อเนอโด่ ช๋าป๊าโร อาเง. แกแยยิวพู๊ อา ม๊อเนอโด่ ผื่อแฮโตเฮ๊อ.

55เพรเหมาะ โอ่ เด๊อ กาลิลีเก่ เหร่อ อา อาแฮเกอ เหย่ซู่ อาคยา เออ เต๊เห่เนอ, อา ครวาแฮเกอ เร๊อ คูโยเซฟ เร๊อ อา แม๊โตหม่า หนิแก อู เหล่แด่โน เหย่ซู่ อาเหล่โอ่ เออโต๊โผ่. 56โทเรอ เหย่ซี กาคยา เด๊อ หี่ เร๊อ อา กา ตี๊หรี่แตแร หนื่ออื่อ แลแค เทอโนมื๊อ เร๊อ มู๊หร่า เด๊อ อา เก่ แฮโปล่ เป่ แลแค เร๊อ โลเออ. อาเง หม่าแน๊เรอ เบ๊อะแกแยยิวพู๊ อา ม๊อเนอโด่ เนอเตอเนอเนอ, แกแยยิวพู๊ เต๊เห่ อา เตซว๊าเตแส่ โอ่ เร๊อ เหย่ซี เบ่ โอ่โก๊ อาขว่าอาคยา, เหย่ซี โอ่โก๊ ลอ แลแค. ⁱ