Luke 4

โลเน๊ กู่กล๊อ อิลออี๊โหล่ เหย่ซู่

(มัทธิว ๔:๑-๑๑, มาระโก ๑:๑๒-๑๓)

1เบ๊อะแบ่เจ่ เหย่ซู่ โอ่ เด๊อ เทอแลโหมะจอร์แดน เร๊อ อา กา เบ๊อะเนอ, อา เล๊อบา เร๊อ แหย่โยบูโพ๊แบ่เจ่. เร๊อ แหย่โยบูโพ๊แบ่เจ่ โอ่เกอ เร๊อ ลู เร๊อ อา ซูจว๊า ลู เด๊อ เก่เชเทอแก หล่อตาม๊าขุ. 2โลเน๊ กู่กล๊อ แฮ อิลออี๊โหล่ ลู เซลุยเชอ เนอลุยเชอ. เร๊อ เนอลุยเชอ เซลุยเชออากูเออเนอ อา อาเอ่อาโอ เตอเจ๋อ โต่ อาขว่าอาคยา, เนอลุยเชอ โทเฮ๊อ เร๊อ อาซิเอ่ซิโอ แฮ.

3เบ๊อะเนออาเค โลเน๊ กู่กล๊อ เฮ๊ ลู เน๊อ, “เน เก่ หม่า จอแปแหร่ อาพู๊คู เฮ๊เร๊อ เฮ๊เบ่ หล่อ เออเนอเตเม เร๊อ นอทวาแถ่ อา เร๊อ ค๊อมู เนอ.”

4เร๊อ เหย่ซู่ เฮ๊ฉื่อ อา เน๊อ, “จอแปแหร่ อาลาอาโหง่ เฮ๊ เน๊อ, ‘แกแย เซอเพร ตื๊อแพ๊ เร๊อ เหล่เอ่เหล่โอ เนอ หม่าโต่.’” ^a

5โทเร๊อ โลเน๊ กู่กล๊อ เอ๊จว๊า เหย่ซู่ เด๊อ เหล่โอ่แถ่โล โต๊โผ่ เร๊อ อา เด๊อะโล ลอ ลู เด๊อ อูเทอเก่ เด๊อ อา โอ่ เด๊อ เห่ขุ เออเนอ ปว๊าโต๊โผ่. 6โลเน๊ กู่กล๊อ เฮ๊ อา เน๊อ, “เตอเรอฉว่าชอ ล๋อปลี เออเต๊เห่ เร๊อ เตดุแหย่แถ่เซ เออเต๊เห่เนอ, แว เก่ เด๊อ เร๊อ เน ปา. ล๋อ เออเต๊เห่ เนอหม่า อา โอ่ ลอเฮ๊อ เด๊อ แว กู๊ยากู เฮ๊อ, แว เก่ เด๊อะเป่ แกแย เด๊อ แว ซิหยื่อ เด๊อ ลู เนอเต๊เห่ ปา. 7ฮู๊เนอเรอ เน เก่ จ๊อเบแถ่ แว เฮ๊เนอ, ล๋อ เออเต๊เห่เนอ แว เก่ เด๊อ ลอ เร๊อ เน ปา.”

8แบ่เจ่เหย่ซู่ เฮ๊ฉื่อ ลู เน๊อ, “จอแปแหร่ อาลาอาโหง่ เฮ๊ ฮู๊เออ, ‘จ๊อเบแถ่ แพ๊ดื่อ ตื๊อ เน แบ่เจ่ จอแปแหร่ เร๊อ แรแพ๊ตื๊อ อาเตแร แพ๊ นี๋,’” ^b อา เฮ๊ ฮู๊เนอ.

9โทเร๊อ โลเน๊ กู่กล๊อ เอ๊จว๊า ลู เด๊อ วีเยรูซาเล็ม เร๊อ อา นอแก๊แถ่โอ่ ลู เด๊อ เตหลู่แตโฮกู อาหี่ กู่กล๊อขุ เด๊อ อา แถ่โลเล๊อ โต๊โต่ เร๊อ อา เฮ๊ ลู เน๊อ, “เน เก่ หม่า จอแปแหร่ อาพู๊คู เตเพร เฮ๊เรอ อี๊ฉ่าตา มอ! 10เมเตเฮ๊เรอ, จอแปแหร่ อาลาอาโหง่ เฮ๊ เนอ,
‘จอแปแหร่ นอ แม๊ตู่ โตโกเตเกหนิเกอเร๊อ เน เร๊อ อา เตเน่วม๊อขุ เต๊เห่ ปา.’ ^c

11โท๊โต่ อา เฮ๊ โป่ เนอ,
‘แซ่ฮู๊ เน กู๊โด่ อา ต่าเบ่ เร๊อ หล่อ เตเม เนอ เหย่ซี อา แพ๊แถ่ฉื่อดื่อ เน ปา.’” ^d

12หม่าแน๊เรอ เหย่ซู่ เฮ๊ฉื่อ ลู เน๊อ, “จอแปแหร่ อาลาอาโหง่ เฮ๊ เน๊อ, ‘เน เบ่ ทื๊อแม๊ เน แบ่เจ่ จอแปแหร่ โต่.’” ^e

13เบ๊อะโลเน๊ กู่กล๊อ อิลออี๊โหล่ ปวา โทลอ เฮ๊อ แบ่เจ่ แบ่เจ่เหย่ซู่ อาเบ๊อะเนอ, โลเน๊ กู่กล๊อ เถ่จว๊า ตาพาแก เฮ๊อ เหย่ซู่ เตอเปลอฮู๊ เร๊อ อา โอ่ป่อแม๊ โป่ โต่เด๊อ เบ๊อะแร๊ เด๊อ อา เก่ อิหล่า คยาแซ๊ ลู โตโพ๊.

เหย่ซู่ เป๊อแถ่ อาเตเม เด๊อกาลิลีเก่

(มัทธิว ๔:๑๒-๑๗, มาระโก ๑:๑๔-๑๕)

14โทเร๊อ แบ่เจ่ แบ่เจ่เหย่ซู่ กาคยา คยาแซ๊ เด๊อ กาลิลีเก่ เร๊อ อา เล๊อบา เร๊อ แหย่โยบูโพ๊แบ่เจ่ อา เตโพรเตเตอเรอ. อา อาหรี่อาแก เออเนอ อู แด๊โฉ่ เป่ชี โลจว๊าโต ลอปลี เด๊อ กาลิลีเก่ เร๊อ ดอโฉ่ โอ่ผื่อ ตีวี๊ตาวา เบ๊อะเนอ เต๊เห่. 15อา อิซว๊า เป่ อู เด๊อ เตจ๊อเบโฮกูกู, เร๊อ อู ถู่เซ๊เร๊อ ลู ปว๋า เตเพร เจ๊อ.

วีนาซาเร็ธพู๊ หยื่อเอ่ เหย่ซู่ โต่

(มัทธิว ๑๓:๕๓-๕๘, มาระโก ๖:๑-๖)

16แบ่เจ่ เหย่ซู่ กาคยา เด๊อ วีนาซาเร็ธ เบ๊อะอา อาหน่าดุแถ่เฮ๊อ เกอเร๊อ เนอตีวี. เบ๊อะแกแยยิวพู๊ ม๊อเนอโด่ ▼

▼แกแยยิวพู๊ อา ม๊อเนอโด่ หม่า ม๊อก่อต่อ

เบ๊อะเนอ, ฮู๊ อาเหล่โกล โอ่เนอ, อา จว๊าโน เด๊อ เตจ๊อเบโฮกู. เบ๊อะอา เตเร ก๊อถ่อแด๊ จอแปแหร่ อาลาอาโหง่ เบ๊อะเนอ, 17อู เด๊อ ลู ลี เด๊อ เพรโพร อิสยาห์ ราโอ่แก เด๊อ เด๋อ งย๊าเค เนอต๊าบ่า. อา ฉิย๊าโม ลีตูลู เออตูกลู๊ เร๊อ อา แม๊เถอะ อู ราโอ่ ลี ตามา เด๊อ อา เฮ๊ เนอ,
18“จอแปแหร่ แหย่โยบูโพ๊แบ่เจ่ โอ่ เด๊อ แวกู, เมเตเฮ๊เรอ อา นว๊าแถ่ เฮ๊อ แว เร๊อ แว เก่ แด๊โฉ่ เป่ แกแย โซพ๊าโซแรฮู๊เต๊เห่ เร๊อ เตซิครือมีลา เออเนอ เฮ๊อ. แกแย เด๊อ อู ปื่อ ด๊อโอ ลู เด๊อ ทอกู เต๊เห่ อา พย๊าหนิ เตเมแลเปล๊กา อาเง, แกแย เด๊อ อา เป๊เส่คี๊ เต๊เห่ อา เป๊เส่ลี กาคยา อาเง, เร๊อ แกแย เด๊อ อู เมจาเมจือ ลู เต๊เห่ เก่ พย๊าหนิ เตเมแลเปล๊ กา อาเงเนอ, อา นอแฮ เฮ๊อ แว เด๊อ แว เก่ แด๊โฉ่ เป่ เหย่ซี เฮ๊อ. ^g 19โท๊โต่ จอแปแหร่ นอแฮ แว เด๊อ แว เก่ เฮ๊โฉ่ซิเง เป่ อู เร๊อ แบ่เจ่ เก่ เตเมแลเปล๊ กา เกอเร๊อ อาแกแย เนอ เบ๊อะแฮโต่เฮ๊อ.” ^h

20เร๊อ แบ่เจ่ เหย่ซู่ ถู่ลูด๊วา คยาแซ๊ ลีตูลู เนอตูกลู๊ เร๊อ อา เด๊อะ กาคยาดว้า คยาแซ๊ เด๊อ เพรแม๊ตู่ เตจ๊อเบโฮ เนอเตเพร อา กู๊ยากู เร๊อ อา โอ่แนตา. ล๋อ แกแย โอ่ เด๊อ เตจ๊อเบโฮกูเนอ เต๊เห่ แม๊จว๊าโต ลอปลี เจ๊อ ลู. 21เร๊อ เหย่ซู่ เฮ๊ แลแค เหย่ซี เน๊อ, “จอแปแหร่ อาลาอาโหง่ เด๊อ ซี หนิโฮ แว แด๊ เป่ ซี เออตามา เนอหม่า อา เล๊อแถ่บาแถ่ เจ๊อ เฮ๊อ เออเตอเนอ เฮ๊อ.”

22ล๋อ อู หนิโฮ เต๊เห่เนอ, อู ถู่เซ๊หนิ ลอปลี เจ๊อ ลู ปว๋า เตเพร เจ๋อ, เร๊อ อา เตเฮ๊เบ่โม เฮ๊แบ่หนิ เออเนอ, อู คย๊าอายื๊อ ลอปลี เจ๊อ เร๊อ เหย่ซี เฮ๊ แลแค เน๊อ, “อา หม่า เพโยเซฟ อาพู๊เพรคู แพ๊ แวเฮ๊?”

23เร๊อ อา เฮ๊ฉื่อ เหย่ซี เน๊อ, “แว หยื่อเอ่ ตาเต เจ๊อ เร๊อ ซี เก่ เฮ๊ค๊าเฮ๊โข่ แว เร๊อ โหง่โด่แน โอ่ตือมือ เด๊อ อา เฮ๊ เน๊อ, ‘เตขุซ๊าร๋า แหย่โอ่เหม่ หนิเร๊อดื่อ เนเหน่ เนอ.’ โทเร๊อ ซี เก่ เฮ๊โป่ แว เน๊อ, ‘เตเหม่โคตีกลี๊แหน่เจ๊อ เด๊อ เป หนิโฮ เน เม เด๊อ วีคาเปอรนาอูม อากู เนอเต๊เห่เนอ, อาโอ่โล เป่เกอ แม๊ เป เบ๊อะเน ดุแถ่ เกอเร๊อ เมอเออ ตีวี อากูเออ เน๋อ’” ซี เฮ๊ แวฮู๊เนอ ปา.

24เร๊อ เหย่ซู่ เฮ๊ โป่ เน๊อ, “แว เฮ๊จ๊อจ๊อ ซี๋, จอแปแหร่ อาเพรโพร เบ๊อะเต๋ เตเพร๊ เบ่เบ่, อาดอกูพู๊ เร๊อดื่อ เอ๊ฉื่อ หนิเกอเร๊อ ลู เตเพร่ว โต่. ⁱ 25แว เฮ๊จ๊อจ๊อ ซี๋ เด๊อ เพรโพร เอลียาห์ อาทือเค เนอ, เก่กล่า โซหน่า เร๊อ ต๊ากว่า เร๊อ โอ่วีโอ่กอ จาจือ โอ่แถ่ เด๊อ อิสราเอลเก่ เต๊เก่เลเจ๊อ. เบ๊อะเนอ ทือเค, เด๊อ อิสราเอล เก่กู เนอ, เพรเหมาะโอ่แคร๊ โอ่เอ๊ กู๋ ลา เจ๊อ. ^j 26หม่าแน๊เรอ จอแปแหร่ นอจว๊า โต เพรโพร เอลียาห์ เด๊อ เพร่เหมาะโอ่แคร๊ เนอเต๊เห่ อา โอ่ เตเพร่ว โต่. จอแปแหร่ นอจว๊า โต แพ๊ ลู เด๊อ เพรเหมาะโอ่แคร๊ เด๊อ อา โอ่ เด๊อ วีศาเรฟัท, ไซดอนเก่กู เนอเตเพร อา โอ่ แพ๊. ^k 27โทเนอ, เด๊อ อิสราเอล เก่กู, เบ๊อะเพรโพร เอลีชา ทือเคเนอ แกแย พย๊าหนิ จุ มู๊แหม่ เต๊เห่เนอ อา โอ่ โหร่แหน่ เจ๊อ เต๊อดื่อเรอ จอแปแหร่ แหย่โอ่เหม่ เป่ เหย่ซี เตเพร่ว โต่, อา แหย่โอ่เหม่ เป่ ตื๊อแพ๊ ซีเรียพู๊ คูเนามาน เตเพร แพ๊.” ^l

28เร๊อ ล๋อ แกแย โอ่ เบ๊อะเตจ๊อเบโฮกู เนอเต๊เห่ หนิโฮ เหย่ซู่ เฮ๊เบ่ เออเต๊เห่ เบ๊อะเนอ, เหย่ซี ซิปล่อดุ ลู โกโน๋ โต่. 29เหย่ซี ก๊อถ่อ เร๊อ จุ่ยเถ่จว๊าแก เหย่ซู่ เด๊อ วีกลอ, เร๊อ เหย่ซี จุ่ยแถ่ ลู เด๊อ เหย่ซี เลโอ่หนิเร๊อ วี โฉ่โหล่ หล่าแตแน๊ โต๊โผ่. เร๊อ เหย่ซี เตเนเกเร แฉ่ตาแก ลู เด๊อ หล่าเล, 30หม่าแน๊เรอ อา เถ่จว๊าแก เบ๊อะแกแย ตู๊หมู่ตอ กล๊อ เนอเต๊เห่ อากล๊าเมกู แพ๊.

แกแย เด๊อ โลเน๊ เมเบ่ ลู เตเพร

(มาระโก ๑:๒๑-๒๘)

31เหย่ซู่ จว๊า เด๊อ วีคาเปอรนาอูม เด๊อ อา โอ่ เบ๊อะกาลิลี เก่กู เออเนอ เร๊อ เบ๊อะแกแยยิวพู๊ ม๊อเนอโด่ เบ๊อะเนอ, อา อิซว๊าอี๊แส่ เป่ อู เบ๊อะเนอ. 32อา เตอิซว๊าอี๊แส่ เออเนอ อา โอ่ เร๊อ อา เตอเรอฉว่าชอ อาขว่าอาคยา, แกแย คย๊าอายื๊อ เอ๊แหน่เจ๊อ. ^m

33เด๊อ เตจ๊อเบโฮกูเนอ, โลเน๊ มู๊แหม่รีแจ่ โตโด เมเบ่ แกแยเพ โอ่เตเพร เร๊อ อา จ่าเพรอ เอ๊โทเอ๊โมแถ่ เนอ, 34“เก๋อวีนาซาเร็ธ อาพู๊ เหย่ซู๋, เน ซิหยื่อ เม เป ฮู๊เต? เน เซเร แฮ เมปย๊าเมหลู่แก เมเซอเมเหม่ แกลอเฮ๊อ เป ปาแอ? เน หม่า อูเป เนอหม่า แว ซิเง แพ๊, เน หม่า จอแปแหร่ อาพู๊คู โพ๊แปละบูโพ๊ เตเพร.”

35เหย่ซู่ ซิพรวา ฉื่อ โลเน๊ เน๊อ, “โซ๊โซ๋ โอ่ แลแค, เถ่จว๊าแกเมอ เด๊อ แกแยเพ เออเตเพร อาเหน่ลูเนอ” เร๊อ โลเน๊ เมแลคื๊อ ตาแก แกแยเพ เออเตเพร เด๊อ เหย่ซี เป๊เส่เง เร๊อ อา เถ่จว๊าแก เด๊อ ลูเหน่ ตื๊อดื่อเรอ อา เม เบ่เช เกอเร๊อ ลู เตอเจ๋อ โต่.

36เหย่ซี คย๊าอายื๊อ ลอปลี เจ๊อ เร๊อ เหย่ซี เฮ๊ เกอเร๊อ เป่ลู เน๊อ, “อา เตอิซว๊าอี๊แส่ เออโต๊โก่เรอ เตอิซว๊าอี๊แส่ เจ๊อ ฮู๊เต เต๊อเจ่อเตเต? อา เฮ๊เบ่ แพ๊ อาโหง่ เร๊อ อา นอเถ่จว๊าแก แพ๊ โลเน๊ เร๊อ โลเน๊ มู๊แหม่รีแจ่ เออเต๊เห่ เถ่จว๊าแก เจ๊อเจ๊อ.” 37เออโตโพ๊เรอ เหย่ซู่ มีลา เออเนอ อู แด๊โฉ่โล จว๊าปีชี ลอ เด๊อ วีคาเปอรนาอูม เร๊อ ดอโอ่ ตีวี๊ตาวา เบ๊อะเนอ โต๊โผ่.

เหย่ซู่ แหย่โอ่เหม่ โหร่เอ๊ลาแกแย

(มัทธิว ๘:๑๔-๑๗, มาระโก ๑:๒๙-๓๔)

38เหย่ซู่ เถ่จว๊าแก เด๊อเตจ๊อเบโฮกูเร๊อ อา จว๊า เด๊อ คูซีโมน อาหี่. คูซีโมน อา เผร่เพรเหมาะ ซิชุ๊ยเหน่กู่ แถ่ฉว่า แหน่ เจ๊อ เร๊อ เหย่ซี กุยซิยอ เหย่ซู่ เร๊อ อา เก่ แหย่โอ่เหม่ เป่ ลู เตชุ๊ย. 39เร๊อ เหย่ซู่ จว๊า โอ่ก๊อถ่อ เบ๊อะแกแยชุ๊ย เออเตเพร อาเหล่เมอ อาช๊า เร๊อ อา เฮ๊ ลู เน๊อ, “เน โอ่โม กาคยา แร๊คยาแซ๊ ดื่อนี๋” อา เฮ๊ เร๊อ โตโพ๊โต อาเหน่กู่ ตา เร๊อ อา ก๊อถ่อ เมเอ่เมโอฉื่อ เป่ เหย่ซี.

40เบ๊อะเหมาะตา เบ๊อะเนอ, แกแย เต๊เห่ เอ๊แฮ ลอปลี อา โคแบ๊ซว๊า เด๊อ อาชุ๊ยอาเช อาเมวเมว อาเจ่อเจ่อ เต๊เห่ เด๊อ เหย่ซู่ อา โอ่ เร๊อ เหย่ซู่ แด่แถ่ อากู๊ขุ เด๊อ เหย่ซี อาเหน่ลู เตเพร โท เตเพร เร๊อ อา แหย่โอ่เหม่แก เป่ ลอปลี เหย่ซี เตชุ๊ยเตเช ปว๋า เตเพร. 41เบ๊อะเหย่ซี เอ๊แฮ แกแย เออเต๊เห่ อาเกลเนอ, โลเน๊ เมเบ่ ลู เต๊เห่เนอ อา โอ่ป่าเต่อเกอ โร๊ลู. เร๊อ อา เถ่จว๊าแก เด๊อ แกแย เนอเต๊เห่ อากู เร๊อ อา เอ๊โทแถ่ เน๊อ, “เน หม่า จอแปแหร่ อาพู๊เพรคู” ฮู๊เนอ. เหย่ซี ย๋อ ซิเง แลแค เร๊อ เหย่ซู่ หม่า ครี๊ เด๊อ จอแปแหร่ นว๊าเถ่ ลู เร๊อ อา เก่ เตเมแลเปล๊กา แกแยเห่ขุพู๊ เนอเตเพร อาขว่าอาคยา, เหย่ซู่ ซิพรวา เหย่ซี เร๊อ อา นอเฮ๊เบ่ เหย่ซี ตือมื๋อโต่.

โด่แน เต เด๊อ เตจ๊อเบโฮเต๊เห่อากู

42เบ๊อะเหมาะลีบู เฮ๊อ เบ๊อะเนอ, เหย่ซู่ โอ่ เด๊อ วีกู เร๊อ อา เถ่จว๊า เด๊อ เหล่โอ่ เด๊อ อู โอ่ เตเพร่ว โต โต๊โผ่. แกแย ลือแม๊ปู โหร่แหน่เจ๊อ ลู, เร๊อ เบ๊อะเหย่ซี แม๊เถอะ เฮ๊อ ลู อาเบ๊อะเนอ, อา กุยซิยอ ลู เร๊ออาเฮ๊น๊อ, เถ่จว๊า ตาพา โค๊แก แต่ เร๊อ เป แต่เหม่ นี๋, อา เฮ๊ ลู ฮู๊เนอ. 43หม่าแน๊เรอ, เหย่ซู่ เฮ๊ฉื่อ เหย่ซี เน๊อ, “แว โตเบ่ จว๊า แด๊โฉ่โด่แน โล เป่เกอ แกแย โอ่ เด๊อ เมอ อาโร เต๊เห่ เร๊อ จอแปแหร่ อาเทออาเก่ อา เตซิครือมีลา อาหรี่อาแก, เมเตเฮ๊เรอ แบ่เจ่ จอแปแหร่ นอจว๊า แว เร๊อ แว เบ่ เม เตเม เออเต๊อเจ่อ อาเง เฮ๊อ.” 44ฮู๊เนอ อาขว่าอาคยา, อา เลจว๊า แด๊โฉ่โด่แน เป่ อู เร๊อ จอแปแหร่ อาลาอาโหง่ เด๊อ ยูดาห์เก่ เตจ๊อเบโฮ เนอเต๊เห่ อากู.