Luke 9

เหย่ซู่ ปลวาจว๊าแก เพรโด่แนพู๊ เต๊เห่ เช๊อซิเนอ

(มัทธิว ๑๐:๕-๑๕, มาระโก ๖:๗-๑๓)

1เหย่ซู่ เอ๊แฮ ปล๊อลอ อา โคเจ่ เช๊อซิเนอ เร๊อ แซ่ฮู๊ เพรโด่แนพู๊ เต๊เห่ เออเต๊เห่ อา เหว่เถ่แกเบ๊ ลอ โลเน๊เต๊เห่ เร๊อ อา เก่ แหย่โอ่เหม่เบ๊ ลอ เตชุ๊ยเตเช เต๊เห่ อาเงเนอเนอ, อา เด๊อ เป่ เหย่ซี เตโพรเตเตอเรอ เร๊อ เตเตอเรอฉว่าชอ เต๊เห่. 2โทเร๊อ อา ปลวาจว๊าแก เหย่ซี เด๊อ อา เก่ จว๊า แด๊โฉ่โด่แน เป่ อู เร๊อ จอแปแหร่ อาเทออาเก่, เร๊อ อา เก่ แหย่โอ่เหม่ เป่ แกแยชุ๊ยแกแยเช เต๊เห่. 3เหย่ซู่ เฮ๊ เหย่ซี เน๊อ, “ซี จว๊าแกล๊ เร๊อ พย๊าจว๊าหนิ แต่ เตอเจ๋อ แต่เหม่ นี๋, อิแท๊ เบ่เบ่, ปยา เบ่เบ่, เหล่เอ่ เบ่เบ่, รือเท เบ่เบ่ พย๊าหนิ แต่เหม่. พย๊าจว๊าเล๊อพย๊าจว๊าบา แต่ จา ตือปื๋อ แต่เหม่. 4ตูรู๊โอ่ตื๊อดื่อเกอ เบ๊อะหี่ เด๊อ อา เอ๊โมฉื่อ ซี เนอเตเม อากู โต่เด๊อ ซี เถ่จว๊าแก เบ๊อะวีกูเนอ ปานี๋. 5อู เก่ เอ๊โมฉื่อ ซี โตโพ๋ โต่ เฮ๊เนอ, โซตาแก เห่หมื่อ เด๊อ ซี กู๊โด่ลู เนอเต๊เห่ เร๊อ เถ่จว๊าแก เด๊อ เมอเนอ ตีวี อากู นี๋. ซี เก่ เมฮู๊เนอ เฮ๊หม่า อาแซ่เน๊อ ซี เฮ๊โฉ่โทเฮ๊อ เตม๊าเตแด เต๊อเจ่อ เด๊อ จอแปแหร่ เก่ เด๊อะจาเหย่ซี ปา เนอเฮ๊อ.” ^a 6เพรโด่แนพู๊ เต๊เห่ เถ่จว๊า เร๊อ อา จว๊าโน ตอดอ โท ตอดอ เร๊อ อา จว๊า แด๊โฉ่โด่แน เป่ อู เตซิครือซิลอมีลา, เร๊อ อา จว๊า แหย่โอ่เหม่ เป่ อู เตชุ๊ยเตเช เด๊อ เหล่โอ่ ปว๊า โต๊โผ่.

เหย่ซู่ หม่า อูเป เร๊อ คุ๊ยเฮโรด เตเนโปล โต่

(มัทธิว ๑๔:๑-๑๒, มาระโก ๖:๑๔-๒๙)

7เบ๊อะเนออาเค กาลิลีเก่ อา คุ๊ยเฮโรด หนิโฮ เร๊อ เหย่ซู่ แรเต เออเต๊เห่, เร๊อ อา ซู๊ซ๊า ลอ ลู ซิปล่อ, เมเตเฮ๊เรอ, แกแย เต๊เห่เห่ เฮ๊ เร๊อ เพรเจเทอ คูยอห์น เซอเพรกาคยา เฮ๊อ. ^b 8เต๊เห่ เกอลาติ เร๊อ อา เฮ๊ เร๊อ เอลียาห์แฮปย๊าโอ่โล แถ่คยาแซ๊เฮ๊อ, เต๊เห่เห่ เร๊อ อา เฮ๊ เกอลาติ เร๊อ เพรโพร เด๋อ งย๊า อาเกล เตเพรเพร เซอเพร กาคยา คยาแซ๊ เฮ๊อ. 9เร๊อ คุ๊ยเฮโรด เฮ๊ เน๊อ, “แว นอปาตือแก โทเฮ๊อ คูยอห์น อากู่กล๊อ เฮ๊อ เร๊อ แกแย เด๊อ แว หนิโฮ อาหรี่อาแก เออเตเพร เนอหม่า อูเปเป เออ?” เน๊อ, “แว เก่ แม๊เถอะ แจ่ เหย่ซู่ ฮู๊เตเต,” อา เตเน ฮู๊เนอ.

เหย่ซู่ เด๊อะเอ่เด๊อะโอ แกแย แงรี๊

(มัทธิว ๑๔:๑๓-๒๑, มาระโก ๖:๓๐-๔๔, ยอห์น ๖:๑-๑๔)

10เพรโด่แนพู๊ เต๊เห่ กาคยา เร๊อ กาแด๊โฉ่ ลอ เหย่ซู่ เร๊อ ล๋อ เหย่ซี เมโทเฮ๊อ เตเนอเต๊เห่ อาหรี่อาแก. เหย่ซู่ เอ๊หนิ เหย่ซี เร๊อ อา เถ่จว๊า ตื๊อดื่อ แลแค เด๊อ วีตีวี เด๊อ อู เอ๊ เร๊อ เบธไซดา เนอตีวี. 11เบ๊อะแกแย เบ๊หมู่ หนิโฮ เร๊อ แบ่เจ่ เหย่ซู่ เร๊อ อา โคเจ่ เต๊เห่ จว๊าเฮ๊อ เด๊อ เมอ เนอตีวี เบ๊อะเนอ, เหย่ซี ครวาจว๊าเกอ แลแค เบ๊อะเนอ เหย่ซู่ เอ๊โมฉื่อ เหย่ซี เร๊อ แด๊โฉ่โด่แน เป่ เหย่ซี เร๊อ จอแปแหร่ อาเทออาเก่ อาหรี่อาแก เร๊อ อา แหย่โอ่เหม่ เป่ แกแย เต๊เห่ อา เตชุ๊ยเตเช.

12เบ๊อะเหมาะ เตเร ตา เฮ๊อ เบ๊อะเนอ, อา โคเจ่ เช๊อซิเนอเออ แฮ เด๊อ ลูโอ่ เร๊อ อา แฮเฮ๊ ลู เน๊อ, “แซ่ ฮู๊ เหย่ซี เก่ จว๊า แม๊ปูเอ่ แม๊ปูโอ, เก่ จว๊าแม๊ปู เกอเร๊อ แลแค ดื่อ เหย่ซี เหล่โอ่เมอ เหล่โอ่เหล่แบ่ อาเงเนอเนอ, นอกาแก เมอ เหย่ซี เด๊อ อาดออาโฉ่ เด๊อ อา โอ่ ตีวี๊ตาวา เบ๊อะเออ โต๊โผ่ เนอ, เมเตเฮ๊เรอ เหล่โอ่ เบ๊อะเออโต๊โผ่ หม่า ดอ โอ่ผื่อ ตอด๋อ โต่.”

13หม่าแน๊เรอ เหย่ซู่ เฮ๊ เหย่ซี เน๊อ, “แม๊ เด๊อะเอ่เด๊อะโอ เป่ เหย่ซี เต๊อเจ่อเจ่อ เนอ.”

เร๊อ เหย่ซี เฮ๊ฉื่อ เน๊อ, “เปเต่ โอ่ แพ๊ตื่อ ค๊อมู แงกล่อ เร๊อ เต๊วพู๊ เนอเบ่ แพ๊. หม่า เน ซิหยื่อ นอ จว๊าพรีเอ่ เป เหล่เอ่เหล่โอ เด๊อ แกแย เบ๊หมู่ เออเต๊เห่ อาเง แอ?” 14แด๊โชชื่อแพ๊ เพรคู แจ๊อาดุ เออเต๊เห่เนอ อา พื๋อ โอ่ดื่อ แงรี๊ เจ๊อ.

เร๊อ เหย่ซู่ เฮ๊เบ่ อา โคเจ่ เต๊เห่ เน๊อ, “แกแย เบ๊หมู่ เออเต๊เห่เนอ, นอโอ่แน โอ่ปล๊อ เหย่ซี ตู๊หมู่, หมู่ เร๊อ เพรแงเชอ เนอ.” 15อา โคเจ่ เต๊เห่ นอโอ่แนโอ่ แกแย เบ๊หมู่ฮู๊ อาเฮ๊ตา เหย่ซี เนอ. 16เร๊อ เหย่ซู่ พย๊า ค๊อมูเนอ แงกล่อ เร๊อ เต๊วฮู๊เนอ เนอเบ่ เร๊อ อา โด่แดแถ่ เด๊อ ม๊อเล เร๊อ อา เฮ๊บุ๊ยเฮ๊เตอเรอแถ่ จอแปแหร่ โทเร๊อ อา บิกยา ค๊อมู เร๊อ เต๊วฮู๊เออ เร๊อ อา เด๊อะตา เร๊อ อา โคเจ่ เนอเต๊เห่. เร๊อ อา โคเจ่ เต๊เห่ เด๊อะจว๊าเอ่ เป่ เร๊อ แกแย เบ๊หมู่ เออเต๊เห่. 17เหย่ซี เอ่ โป่เอ่โป่โอ เอ่ก๊อโอบา ลอปลี เจ๊อ ปว๋า เตเพร เจ๊อ เร๊อ อา โคเจ่ เต๊เห่ พย๊าดว้าปล๊อ คยาแซ๊ ค๊อมู เร๊อ เต๊วฮู๊ เด๊อ อา บิกยา เร๊อ อา โอ่แกเล๊อ เต๊เห่เนอ อา โอ่บา ปา เจ๊อ เร๊อ ขริเนอ เช๊อเนอเม เจ๊อ.

คูเปโตร เฮ๊เถ่ เร๊อ เหย่ซู่ หม่า ครี๊

(มัทธิว ๑๖:๑๓-๑๙, มาระโก ๘:๒๗-๒๙)

18เตอเนอเค เบ๊อะเหย่ซู่ กุยจ๊อเบ ตื๊อดื่อ เตเพร เบ๊อะเนอ, อา โคเจ่ เต๊เห่ โอ่ผื่อ เร๊อ ลู เร๊อ แบ่เจ่ แด๊เฮอ เหย่ซี เน๊อ, “แกแย เบ๊หมู่ เต๊เห่ เฮ๊แคร๊ แลแค แว เร๊อ แว หม่าอูเป?”

19เร๊อ เหย่ซี เฮ๊ฉื่อ เน๊อ, “เต๊เห่เห่เร๊อ อา เฮ๊ เน เน๊อ เพรเจเทอ คูยอห์น, เต๊เห่เห่ เกอ ลาติเรอ อา เฮ๊ เร๊อ เพรโพร เอลียาห์, เต๊เห่เห่เร๊อ อา เฮ๊ เร๊อ เพรโพร เด๋อ งย๊า เค เต๊เห่ อาเกล เตเพร๊เตเพร ก๊อถ่อเซอเพร กาคยา แพ๊,” อา เฮ๊ แลแค ฮู๊เนอ. ^c

20เร๊อ เหย่ซู่ แด๊เฮอ เหย่ซี, เร๊อ อา เฮ๊ เหย่ซี เน๊อ, “ซี เกอเล๊, ซี เฮ๊ แว เร๊อ อูเป?” ^d

เร๊อ คูเปโตร เฮ๊ฉื่อ ลู เน๊อ, “เน หม่า ครี๊ เด๊อ จอแปแหร่ นว๊าแถ่ อา เร๊อ อา เก่ เตเมแลเปล๊กา แกแยเห่ขุพู๊ เออเต๊เห่ เนอเตเพร เฮ๊อ.”

21เร๊อ เหย่ซู่ เฮ๊แก ตาเตแก อาโหง่ เร๊อ อา เฮ๊ เหย่ซี เน๊อ ซี เบ่ จว๊า เฮ๊โฉ่โลหนิ เป่ อู เตเพร่ว โต นี๋.

เหย่ซู่ แด๊โฉ่โล อา เตข่าจาข่าจือ อาหรี่อาแก เร๊อ อาเตเซอ อาหรี่อาแก

(มัทธิว ๑๖:๒๐-๒๘, มาระโก ๘:๓๐, ๙:๑)

22โทเร๊อ อา เฮ๊ เป่ โป่ เหย่ซี เน๊อ, “แกแยพู๊คู หม่า แวเออ, อา เบ่ ข่าเบ่ แหน่ เตจาเตจือ ปว๊าเต๊อเจ่อ ปา, เร๊อ ยิวตู๊หมู่ตอกล๊อ อากู่กล๊อ เต๊เห่ เร๊อ เพรหลู่แต ทวาดุทวาเต เต๊เห่ เร๊อ เพรอิซว๊า เตซว๊าเตแส่ อาซ๊าร๊า เต๊เห่ อา จู แว โต่, อา เก่ ซ๊อต๊าหน่า แก แว ปา. อู เมเซอแก แว ปา เร๊อ โซเนอ เตอเนอ ปาเนอ จอแปแหร่ เก่ เมเซอเพร กาคยา คยาแซ๊ แว ปา.”

23โทเร๊อ เหย่ซู่ แด๊โฉ่ เป่ เหย่ซี ปว๋า เตเพร เน๊อ, “แกแย เตเพรเพร อา ซิหยื่อ ครวาเกอแว เฮ๊เนอ, อา โตเบ่ เม ฮู๊ แว ซิหยื่อนอเม ลู เนอเต๊เห่, อา เม จู๋ ดื่อ อาซิปล่อ หม่า อาหนิ โต่. อา เบ่ แย๊แถ่ หนิเร๊อดื่อ อา อี๊ถื่อดีเต่ ปว๋า เตอเนอ เร๊อ อา เบ่ กอครวา เกอแวคยา. ^e 24เมเตเฮ๊เรอ แกแย เด๊อ อา ซิหยื่อ เตเมแลเปล๊แก เกอ เร๊อ อา ซิปล่อเซอเพร เตเพร เพร เนอ, อา ซิปล่อเซอเพร เก่ โอ่เหม่แก ปา, หม่าแน๊เรอ เด๊อ แวขว่าแวคยา เร๊อ แกแย เตเพร เพร เก่ เด๊อะแลแก อา ซิปล่อเซอ เพร เร๊อดื่อ เฮ๊เนอ, อา เก่ พย๊าหนิ ซิปล่อเซอเพร ตูจูเพร ปา. ^f 25แกแย เตเพร เพร เก่ พย๊าหนิ ลอ เจ๊อ เห่ขุต๊าบ่า อา เตดุแหย่แถ่เซ เต๊เห่ เจ๊อ ตื๊อดื่อเรอ อา เก่ แลจู่แก อา ซิปล่อเซอ เพร ตูจูเพร เออ เฮ๊เนอ อาบุ๊ยโอ่ เด๊อ ลูเง อิเต? 26แกแย เตเพร เพร เด๊อ อา ซิเตเร แว เร๊อ แวลาแวโหง่ เออเต๊เห่ เตเพร เพร เนอ, ช๋า แกแยพู๊คู หม่าเฮ๊อ แวเออ เก่ แฮเฮ๊อ เร๊อ อา เตอเรอดุเตอเรอทู เร๊อ อาเพ อา เตอเรอดุเตอเรอทู เร๊อ เตเน่วม๊อขุโพ๊แปละบูโพ๊แบ่เจ่ เต๊เห่ อา เตอเรอดุเตอเรอทู เฮ๊อปา เบ๊อะเนอ, แว เก่ ซิเตเร เกอลาติ ลู ปา. 27แว เฮ๊ หม่าแหน่ เจ๊อ ซี, แกแย เด๊อ อา ก๊อถ่อโอ่ เบ๊อะซีเกลเออ เต๊เห่เห่เนอ, เบ๊อะเหย่ซี อาเซอ แต่ล๋าย โต่เนอ, เหย่ซี เก่ แม๊เถอะน๊อ แลแค จอแปแหร่ แฮ เป๊อเทอเป๊อเก่ ปา.”

เหย่ซู่ เหน่กล่อ ถู่แหล่ โค๊แก อาหรี่อาแก

(มัทธิว ๑๗:๑-๘, มาระโก ๙:๒-๘)

28เบ๊อะเหย่ซู่ เฮ๊เบ่โท ฮู๊เออ เด๊อคยา อา ผื่อ บาเฮ๊อ เนอลุยซว๊า เบ๊อะเนอ, อา เอ๊หนิ คูเปโตร, คูยอห์น เร๊อ คูยากอบ เร๊อ อา จว๊าแถ่ เด๊อ โฉ่ เตเม ลู เร๊อ แบ่เจ่ เหย่ซู่ เตเร จว๊ากูยจ๊อเบ เบ๊อะเนอ. 29เบ๊อะอา กุยจ๊อเบ เบ๊อะเนอ, อาเป๊เส่ ถู่แหล่โค๊ลอ เร๊อ อา เห่อจ่า เต๊เห่เนอ อาบูแปล๊เตเคแถ่ ลอปลี เจ๊อ. 30แกแย แฮ โอ่โลแถ่คย๊า เบ๊อะเนอ ซิเนอ เร๊อ อา เฮ๊เบ่ เร๊อ เหย่ซู่. เหย่ซี หม่า คูโมเสส เร๊อ เพรโพร เอลียาห์. 31เร๊อ อา โอโลแม๊เถอะ เต่อ เร๊อ ม๊อขุ อา เตลีเตเตเค เต๊เห่ เร๊อ อา เฮ๊เบ่ เกอ เหย่ซู่. เหย่ซี เฮ๊เบ่ เกอเร๊อลู เน๊อ งยาแต๋โต่ ปาเนอ, เหย่ซู่ เก่ เมเล๊อเมบาแถ่ จอแปแหร่ อา เตเซเรหนื่ออื่อ เออเนอ ปา, เร๊อ อา เก่ เซอ แก เบ๊อะวีเยรูซาเล็ม อากูเนอ ปา อาหรี่อาแก. 32คูเปโตร เร๊อ อา โคแบ๊ซว๊า เต๊เห่ โอ่เมอหนิเชหม่าแน๊เรอ เบ๊อะเหย่ซี ซิเหน่แถ่ เบ๊อะเนอ, อา แม๊เถอะ เหย่ซู่ อา เตอเรอดุเตอเรอทู เต๊เห่ โทเร๊อ แกแย ซิเนอ ก๊อถ่อ โอ่เต่อเกอ เร๊อ ลู. 33เบ๊อะคูโมเสส เร๊อ เพรโพร เอลียาห์ เถ่จว๊าแก เฮ๊อ เบ๊อะเนอ, คูเปโตร เฮ๊ เหย่ซู่ เน๊อ, “แบ่เจ๋, เหล่โอ่ เบ๊อะเออ โต๊โผ่ เด๊อ อาตว่า โมแร๊ ลา. เป เก่ ช๊อแถ่เป่ ซี เหล่สื่อ โซเม, เตเมเรอ เนเง, เตเมเรอ คูโมเสส อาเง, เตเมเรอ เพรโพร เอลียาห์ อาเง.” (อา เฮ๊ ฮู๊เออ ตื๊อดื่อเรอ อา เฮ๊แคร๋ อิเตเนอ อา ซิเง หนิเกอ เร๊อ โต่.)

34เบ๊อะคูเปโตร เฮ๊เบ่ ปาแพ๊ เบ๊อะเนอ, อ๊อโหล่ ตื๊อบื่อ แล โอ่โลแถ่ เร๊อ อา แลอู ตาบี๊แก เหย่ซี. เบ๊อะอ๊อโหล่ แลอูบี๊แก เหย่ซี เบ๊อะเนอ, อา โคเจ่ เต๊เห่ ซิอิเช ลอปลี เจ๊อ. 35เร๊อ โหง่พราเถ่ เด๊อ อ๊อโหล่ อากู เร๊อ อา เฮ๊ เน๊อ, “อา หม่า แวพู๊คู เด๊อ แว นว๊าแถ่ โทเฮ๊อ อา เตเพร. หนิดา แลแค อาโหง่ นี๋.” ^g 36เบ๊อะโหง่พรา โอ่เกอ เฮ๊อ เบ๊อะเนอ, อา โคเจ่ เออซิโซ แม๊เถอะ เร๊อ เหย่ซู่ โอ่แก ตื๊อดื่อแพ๊ เตเพร แพ๊. ล๋อ เตหรี่เตแก เด๊อ เหย่ซี แม๊เถอะ อา ทวาแถ่ เออเต๊เห่เนอ อา แด๊โฉ่โล เป่ อู เตเพร่ว โต่, เบ๊อะเนอเค เหย่ ซี โอ่โส่ตือครื๊อ เกอเร๊อ ลอปลี แพ๊.

เหย่ซู่ แหย่โอ่เหม่ เป๊เจ่ เพรคูพู๊ เด๊อ โลเน๊ เมเบ่ ลู เตเพร

(มัทธิว ๑๗:๑๔-๑๘, มาระโก ๙:๑๔-๒๗)

37เด๊อคยาเตอเนอ, เบ๊อะเหย่ซี โอ่ เด๊อ โฉ่ขุ กี๊ตา เบ๊อะเนอ, แกแย เบ๊หมู่ดุ แฮแม๊ฉื่อ เจ๊อ เหย่ซี ตูปลูเต๊เผ่. 38เด๊อ แกแย เบ๊หมู่ อาเกล เตเพรเนอ อา เอ๊โท เน๊อ, “ซ๊าร๋า! แว กุยซิยอ เน, เน แม๊มอ แวพู๊คู เออเล๊. แวพู๊คู โอ่แพ๊ เตเพรเพร่ว แพ๊. 39โลเน๊ เมเบ่ ลู เร๊อ อา เอ๊โทแถ่คย๊า. โทเร๊อ อา โต๊โปล่ เร๊อ อาแกกู บ๊อเบ๊เถ่ โลเน๊ เออเนอโตโดเนอ, ปวาโพ๊โพ๋ อา เมเบ่ ลู เร๊อ อา เถ่จว๊า ยู งย๊า โต่, อา เมจาเมจือ เม ซิพร๊าแลแด๊ ลอ ลู. 40แว กุยซิยอ เน โคเจ่ เต๊เห่ เก่ เหว่เถ่แก เป่ ลู โลเน๊โลเออ, ตื๊อดื่อเรอ เหย่ซี เหว่เถ่แก เบ๊โต่.”

41แบ่เจ่ เหย่ซู่ เฮ๊ เหย่ซี เน๊อ, “ซี เตหยื่อเตแหน่ โอ่โต่, ซี กู๊หลิโกะโด แหน่เจ๊อ! แว เบ่ โอ่งยา โตเกอป่า เร๊อ ซี บ๋า เต ปา? แว โตเบ่ แด่ทูซิปล่องยา เป่ เกอ ปา ซี บ๋า เต?” อา เฮ๊โท ฮู๊เนอเรอ อา เฮ๊เกอลาติ แกแยเพ เนอเตเพร เน๊อ, “เอ๊แฮ เน พู๊คู เบ๊อะเออ.”

42เบ๊อะเป๊เจ่เพ เออเตเพร แฮ เบ๊อะเนอ, โลเน๊ เมแลคื๊อตา ลู เด๊อ เห่ขุ เร๊อ อา เมตูมุยชา ลู เร๊อ เหย่ซู่ ซิพรวา โลเน๊เออ, เร๊อ อา แหย่โอ่เหม่แก่ เป่ ลู, เร๊อ อา เด๊อะกาคยา คยาแซ๊ เร๊อ อาเพ. 43แกแย โอ่ เบ๊อะเนอ ปว๋า เตเพร คย๊าอายื๊อ ลอปลี เจ๊อ จอแปแหร่ อา เตโพรเตเตอเรอ ฉว่าชอ เออเนอ เจ๊อ.

เหย่ซู่ เฮ๊เบ่โป่ เตเซอ อาหรี่อาแก

(มัทธิว ๑๗:๒๒-๒๓, มาระโก ๙:๓๐-๓๒)

เบ๊อะอู ปว๋า เตเพร คย๊าอายื๊อ ลอปาแพ๊ ล๋อ เหย่ซู่ เม เตโค๊ตีกลี๊เจ๊อ เออเต๊เห่ เบ๊อะเนอ, เหย่ซู่ แด๊โฉ่โล เป่ อา โคเจ่ เต๊เห่ เนอ, 44“หนิดา ตาเต แลแค โหง่ เด๊อ แว เก่ แด๊โฉ่โล เป่ ซี กู๊แหน่ เออเต๊เห่ นี๋. แกแยพู๊คู หม่าเฮ๊อ แวเออ, อู เก่ อิเช ตาแก อา เด๊อ แกแย อา กู๊ยากู ปา.” 45หม่าแน๊เรอ อา โคเจ่ เต๊เห่ ซิเงโปล ลู เตเฮ๊เบ่ เออตือมือ อาโหง่แลช๊า โต่. แซ่ฮู๊ เหย่ซี เก่ ซิเง เตเม เนอ, อู เบ่โอ๊เบ่บี๊แก อาโหง่แลช๊า แพ๊. เหย่ซี แด๊เฮอบื่อ แบ่เจ่ เหย่ซู่ เตเพร่ว โต่.

อูเป ทวาดุเล๊อ อู ปาเป?

(มัทธิว ๑๘:๑-๕, มาระโก ๙:๓๓-๓๗)

46แบ่เจ่ อา โคเจ่ เต๊เห่ เคร๊แขระ เกอเร๊อลู เน๊อ เด๊อ เหย่ซี อาเกลเนอ, อูเป เก่ ทวาดุเล๊อ อู ปาเป? ฮู๊เนอ. ^h 47เหย่ซู่ ซิเง เหย่ซี อาเหล่เตเน เด๊อ อา ซิปล่อกู เต๊เห่ อาขว่าอาคยา อา เอ๊แฮ เป๊เจ่ เตเพร เร๊อ อา นอแฮ ก๊อถ่อโอ่ ลู เด๊อ อาช๊า. 48เร๊อ อา เฮ๊ เหย่ซี เน๊อ, “แกแย เด๊อ อา แม๊ แวเป๊เส่ เร๊อ อา เก่ เอ๊โมฉื่อ เป๊เจ่พู๊ แซ่เน๊อ เออเตเพร เตเพร เพรเนอ, อา เอ๊โมฉื่อ เฮ๊อ แว เฮ๊อ. เร๊อ แกแย เตเพร เพร เด๊อ อา เอ๊ฉื่อ แว เนอหม่า, อา เอ๊ฉื่อ เพร เด๊อ อา นอแฮแล แว เออเตเพรเนอ เฮ๊อ. เมเตเฮ๊เรอ, แกแย เด๊อ อา เตเนปีตี๊ แลปีเล๊อ อาเหน่ เด๊อ ซีเกล เตเพร เพร เนอหม่า, แกแย เด๊อ อา ทวาดุเล๊อ อู เฮ๊อ.” ⁱ

แกแย เด๊อ อา เท๊ฉื่อ ซี โต่ เนอหม่า, หม่าเฮ๊อ แกแย เด๊อ อา โป่ เกอเร๊อ ซี เฮ๊อ

(มาระโก ๙:๒๘-๔๐)

49คูยอห์น เฮ๊เถ่ เน๊อ, “แบ่เจ่ เป แม๊เถอะ แกแย เตเพร เด๊อ อา จว๊า เหว่เถ่แก โลเน๊ เต๊เห่ เร๊อ เนมุย. อา ย๋อ โอ่เต่อเกอ เด๊อ เปตู๊หมู่กู หม่าโต่ เร๊อ เป เฮ๊ ตาตือแก ลู.”

50หม่าแน๊เรอ เหย่ซู่ เฮ๊ฉื่อ คูยอห์น เน๊อ, “จว๊าแม๊ปู เมตาตือ แต่ อา แต่เหม่. เมเตเฮ๊เรอ แกแย เด๊อ อา เท๊ฉื่อ ซี โต่ เต๊เห่ เนอหม่า แกแย เด๊อ อา โป่ เกอเร๊อ ซี เฮ๊อ.”

สะมาเรียดอ ตอดอ เด๊อ อา เอ๊โมฉื่อ เหย่ซู่ โต่

51เบ๊อะม๊อเนอม๊อเซ ผื่อแฮเฮ๊อ เด๊อ อู เก่ เอ๊แถ่เฮ๊อ เหย่ซู่ เด๊อ ม๊อขุ เบ๊อะเนอ, อา แด่แล อาซิปล่อ เร๊อ อา เก่ จว๊า เด๊อ วีเยรูซาเล็ม. 52เหย่ซู่ นอจว๊าหนื่ออื่อ เหร่อ เพรซู เตหรี่เตแก เต๊เห่ เด๊อ เง, เร๊อ แซ่ฮู๊ เหย่ซี เก่ ตี๊หรี่แตแร หนื่ออื่อ เป่ แบ่เจ่ อาเง ล๊อ ปลี เนอเรอ, เหย่ซี เถ่จว๊า โน โอ่โก๊ล๊า เด๊อ สะมาเรีย ดอตอดอ อากู. 53หม่าแน๊เรอ ดอพู๊โฉ่พู๊ เต๊เห่ เอ๊โมฉื่อ เหย่ซู่ โต่, เมเตเฮ๊เรอ เหย่ซี ซิเง ตาเตเฮ๊อ เร๊อ อา เก่ จว๊า เฮ๊อ เด๊อ วีเยรูซาเล็ม เฮ๊อ. 54เบ๊อะอา โคเจ่ คูยากอบ เร๊อ คูยอห์น แม๊เถอะ เหย่ซี เมฮู๊เออ เนอ, เหย่ซี เฮ๊ แบ่เจ่ เน๊อ, “แบ่เจ่, เป เอ๊ตา หมิ เด๊อ ม๊อขุ เร๊อ นอตาแล อือแก ลอ เหย่ซี ปา เนอหม่า เน ซิปล่อ โอ่ โต่ แอ?” ^j 55เหย่ซู่ ตีรี๊ กาคยา เร๊อ อา ซิพรวา เหย่ซี. 56เร๊อ เหย่ซี เถ่จว๊า แฮเง โค๊แก เด๊อ อาโร ตอดอ.

(มัทธิว ๘:๑๙-๒๒)

57เบ๊อะเหย่ซี จว๊า เด๊อ แกล๊ลู เบ๊อะเนอ, แกแย เตเพร เฮ๊ เหย่ซู่ เน๊อ, “เน จว๊า เบ๊อะเต๋ โต๊โผ่ เบ่เบ่, แว ครวาจว๊า เกอ เร๊อ เน เร๊อ แว ทวาเกอ เน โคเจ่.”

58เร๊อ เหย่ซู่ เฮ๊ฉื่อ อา เน๊อ, “ถุ่ยมี เต๊เห่ โอ่ เด๊อ อากู, ถู่พู๊ เต๊เห่ โอ่ เด๊อ อาปุย, ตื๊อดื่อเรอ แกแยพู๊คู หม่าเฮ๊อ แวเออ, เบ๊อะแว เหล่โอ่เมอ โก๊ เตเบ๊ซิพร๊า เหล่โอ่ อาเง แพ๊เนอ, อา โอ่ โตโพ๋ โต่.”

59อา เฮ๊ เกอลาติ แกแย เด๊อ อาโรเตเพร เน๊อ, “ครวา เกอแวคยา เร๊อ ทวาเกอ แว โคเจ่.”

หม่าแน๊เรอ เออเตเพร เฮ๊ฉื่อ ลู เน๊อ, “แบ่เจ่, เด๊อะเหร่อ แว เบ๊อะแว เก่ กา โล๊เหร่อ โก๊ดื่อ แวเพ นี๋.”

60เหย่ซู่ เฮ๊ฉื่อ ลู เน๊อ, “แกแยเซอ เออเต๊เห่เนอ, นอโล๊ เกอเร๊อดื่อ เร๊อ แกแย เด๊อ อา หนิดา เกอจอแปแหร่อาโหง่โต่ เด๊ออาแซ่ เร๊อ แกแยเซอ เด๊อ แหย่โยตาคยา เนอเต๊เห่. หม่าแน๊เรอ เนเออ, จว๊า แด๊โฉ่โด่แน เป่เหร่อ อู เร๊อ จอแปแหร่ อาเทอ เก่ อาหรี่อาแก.”

61เด๊อ อาโร โป่เกอลาติ เตเพร เร๊อ อา เฮ๊ เน๊อ, “แบ่เจ๋ แว ทวาเกอ เน โคเจ่, หม่าแน๊เรอ ปลวากา เฮ๊โมเฮ๊แร๊ เกอ เหร่อ แว เร๊อ แวหี่แวแพ เต๊เห่.” ^k

62เหย่ซู่ เฮ๊ฉื่อ อา เน๊อ, “แกแย เตเพร เพร เด๊อ อา ปื่อ ท๊าเท เร๊อ อา ตีรี๊แม๊ กาคยา เนอ, อาบุ๊ยเตอเรอ โอ่ เด๊อ จอแปแหร่ อาเทออาเก่ อาเง เตอเจ๋อ โต่.”