Luk 12:22-31 | EkySCThai | STEP | โทเรอ เหย่ซู่ เฮ๊ อา โคเจ่ เต๊เห่ เน๊อ, “ฮู๊เนอ อาขว่าอาคยา แว เฮ๊ ซี, เบ่กู่เบ่แก เต เด๊อ ซี เตโอ่เซอเพร อาเงเนอ แต่เหม่. ซี โหล่เอ่โหล่โอ อาเง เบ่เบ่, ซี โหล่กือโหล่แซ๊ บี๊เร๊อ ซี เหน่กล่อ อาเง เบ่เบ่, เบ่กู่เบ่แก แต่ แลแค แต่เหม่ นี๋.

a คุ๊ย อาเหร่อเล๊อ ต๊าบ่า ๑๐:๔-๗, ราม๊าราแด เนอบ่า ต๊าบ่า ๙:๓-๖

Luke 12:22-31

เตหยื่อเอ่ จอแปแหร่

(มัทธิว ๖:๒๕-๓๔)

22 โทเรอ เหย่ซู่ เฮ๊ อา โคเจ่ เต๊เห่ เน๊อ, “ฮู๊เนอ อาขว่าอาคยา แว เฮ๊ ซี, เบ่กู่เบ่แก เต เด๊อ ซี เตโอ่เซอเพร อาเงเนอ แต่เหม่. ซี โหล่เอ่โหล่โอ อาเง เบ่เบ่, ซี โหล่กือโหล่แซ๊ บี๊เร๊อ ซี เหน่กล่อ อาเง เบ่เบ่, เบ่กู่เบ่แก แต่ แลแค แต่เหม่ นี๋. 23 เมเตเฮ๊เรอ ซี เตโอ่เซอเพร เนอ อา โหล่ดุเล๊อเล๊อ ปา เจ๊อ เร๊อ ซี เหล่เอ่เหล่โอ เจ๊อ, เร๊อ ซี เหน่กล่อ เออเนอ อา โหล่ดุเล๊อเล๊อ ปา เจ๊อ เร๊อ ซี เหล่กือเหล่แซ๊ เต๊เห่ เจ๊อ. 24 เตเนแม๊ แลแค จ๊อเหว่ เต๊เห่เนอ, เหย่ซี อาโหล่อาช๊อ เกออู เตกลุยเตลุ๊ย โต่, อา เก๊ปล๊อแด่ดว๊า เกออู เตเส่เตโพ โต่โต่. อา เหล่แด่ปล๊อ เหล่เอ่เหล่โอ เหล่โอ่ โอ่ เกออู โต่โต่, อา เหล่แด่ปล๊อ โบ๊แจ โอ่ เกออู โต่โต่. ตื๊อดื่อเรอ จอแปแหร่ โบ่เอ่โบ่โอ่ เหย่ซี. ฮู๊เนอเรอ, ซี เออเต๊เห่เนอ, ซี งูดุงูชอ เล๊อเล๊อ เจ๊อ. เร๊อ ถู เออเต๊เห่ เจ๊อ. 25 เด๊อ ซีเตเนกู่แก อาขว่าอาคยาเร๊อ, ซี จุ่ยทูแฮ เอ๊แถ่ แจ่ เล๊อเล๊อ โป่ ซี ม๊อเนอม๊อเซ ตี๊กิ แพ๊ เนอ อา โอ่ เตเพร่ว โต่. 26 จุ่ยทูแฮ โป่ ม๊อเนอ ฮู๊เออ ตี๊กิ แพ๊ เนอ, ซี เก่ เมแจ่โต่ เฮ๊เนอ ซี จ๊าเตเนกู่แก โต่ เต เด๊อ อาโร เต๊เห่ เมเต?

27 “เตโพเตกี เนอเต๊เห่ อา เพ๊แถ่โพแถ่ แลแค ฮู๊เตเนอ, เตเน แม๊มอ แลแค. เหย่ซี เอ่แร เกออู เตอเจ๋อ โต่, อา อิฮี๊ เกออู แตแพ๊ โต่ ตื๊อดื่อเรอ แว เฮ๊ ซี๋, คุ๊ยซาโลมอน เด๊อ อา โอ่ เจ๊อ เร๊อ อา เตดุแหย่แถ่เซ ล๋อ ปลี เจ๊อ เออเตเพรเนอ, อา เห่อจ่า เด๊อ อาตว่า ครือแนเล๊ เร๊อ เตโพ เนอโตโพ แพ๊เนอ อา โอ่ ตือปื๋อ โต่. ^a 28 เก๋อ แกแย เตหยื่อปีตี๊ ซี๋, มี ออ เหมาะ เต๊เห่เนอ, เออเตอเนอ อา โอ่ แลแค เด๊อ ตอกูเนอ, ช๊าป่าโรปา อู ชื๊อโน๊แก อา เด๊อ หมิกู แพ๊ ตื๊อดื่อเรอ จอแปแหร่ เด๊อะกือเด๊อะแซ๊ อา เก่เฮ๊เรอ อา เก่ เด๊อะกือเด๊อะแซ๊ แร๊ เล๊อเล๊อ ปา เจ๊อ ซี เร๊อ เนอ ปา. 29 ฮู๊เนอ อาขว่าอาคยา, ซีเตเนเบ่กู่เบ่แก เบ่ยอเบ่สี่ แต่ แลแค แต่เหม่. โต เอ่แคร๊ ปา อิเต, โต โอแคร๊ ปา อิเตเนอ, เตเน แต่ แลแค แต่เหม่ นี๋. 30 เมเตเฮ๊เรอ, แกแย เด๊อ อา หยื่อเอ่แหน่ เกออู จอแปแหร่ โต่ เต๊เห่เนอ, อากู่อาแก, อา แม๊ปูแม๊แหว่ แลแค ฮู๊เนอเฮ๊อ. เต เด๊อ ซี โหล่ เต๊เห่เนอ ซี เพ ซิเงดื่อ เฮ๊อ. 31 เบ่ยอเบ่สี่ แต่ แลแค ฮู๊เนอ แต่เหม่! แม๊ปู แลแค เต เด๊อ อา โหล่ดุ เด๊อ จอแปแหร่ อาเทออาเก่กู เนอเต๊เห่ เร๊อ ล๋อ เตเด๊อ ซี โหล่ เออเต๊เห่เนอ, จอแปแหร่ อา เด๊อ เกอโป่ดื่อ ซี ปา.