Luke 12:35-48
หลู่เล๊ เด๊อ อา ส่าเซ เต๊เห่
(มัทธิว ๒๔:๔๕-๕๑)
35“โอ่ตี๊หรี่แตเร หนื่ออื่อ แลแค ซีเหน่ เด๊อ ซี เก่แรเต อาเง, เร๊อ แรแถ่ หนื่ออื่อ แลแค ซีฮ๊อท๊อ, ส่าเซ เร๊อ ชีลี หนื่ออื่อ แลแค ซีหมิ เต๊เห่. a 36เม แลแค ฮู๊ หี่แบ่เจ่ โอ่ เด๊อ ป่วย พย๊าพู๊พย๊าเม กา เร๊อ อาหลู่เล๊ เต๊เห่ โอ่ป่อฉื่อเกอเร๊อ ลูเนอ. เบ๊อะอา กา ด่อโน กู่ดา เบ๊อะเนอ, อาหลู่เล๊ เต๊เห่ บ๊าโม เป่ ลู กู่ดา โตโพ๊โต. b 37หลู่ เด๊อ อาแบ่เจ่ กาแม๊เถอะ เหย่ซี เร๊อ อา โอ่ส่าเซ, อา โอ่ตี๊หรี่แตเร หนื่ออื่อ แลแค อาเหน่ เต๊เห่เนอ, อา พย๊าหนิ แลแค เตบุ๊ยเตเตอเรอ. แว เฮ๊ หม่าแหน่ เจ๊อ ซี, แบ่เจ่ เออเตเพรเนอ อา เก่ กือแถ่แซ๊แถ่ เพรเมเออเนอ อาเห่อจา เร๊อ อา เก่ นอโอ่แนโอ่ เหย่ซี แซ่เร๊อ ซิเผระ เต๊เห่เนอ ปา, เร๊อ อา เก่ โบ่เอ่โบ่โอ่ เหย่ซี ปา. 38อา เก่ กา เด๊อ เหมาะเนเค เบ่เบ่, หม่าโต่เรอ เด๊อ เหมาะลีโรมื่อ อู โอ่เมอปา เบ๊อะเนอ เบ่เบ่, อา เก่ กาแม๊เถอะ เร๊อ เหย่ซี โอ่เซเร หนื่ออื่อ อาเหน่ เฮ๊เนอหม่า, เหย่ซี เก่ พย๊าหนิ แหน่ เจ๊อ เตบุ๊ย เต เตอเรอปา. 39หม่าแน๊เรอ ซิเงแถ่เบ่ แลแค แว เก่ เฮ๊ เป่ ซี เออเนอ นี๋. หี่แบ่เจ่ เก่ ซิเง เร๊อ เพรเอ่โห่ เตเร แฮ เบ๊อะเฮ๊เนอหม่า อา เก่ โอ่ป่อฉื่อ เร๊อ เพรเอ่โห่ แฮโนบื่อ โต่. c 40เร๊อ ซี เออเต๊เห่เนอ เบ่เบ่, โอ่เซเร หนื่ออื่อ เกอ แลแค ซีเหน่ นี๋, เมเตเฮ๊เรอ เบ๊อะซี เตเนเต่อ โต่ ปาเนอ, แกแย อาพู๊ หม่าเฮ๊อ แวเออ เก่ แฮ ปา.”หลู่เล๊ เด๊อ อา ซิปล่อจ๊อ เร๊อ หลู่เล๊ เด๊อ อาซิปล่อ ตากา
41คูเปโตร เฮ๊ เน๊อ, “แบ่เจ๋ เน เฮ๊ โหง่ค๊าโข่ เออเนอหมา เด๊อ เปเง แอ? หม่าโต่หม่า, แกแย ปว๋า เตเพร อาเง แอ?” 42แบ่เจ่ เหย่ซู่ เฮ๊ฉื่อ ลู เน๊อ, “ฮู๊เนอเรอ, อา ทวา หลู่เล๊กู่กล๊อ เด๊อ อาจ๊อ เร๊อ อา โอ่ เร๊อ เตลีแม เตเพรหม่า อูเป? หลู่เล๊กู่กล๊อ เด๊อ อาจ๊อ เออเตเพร เนอหม่า หม่าเฮ๊อ อาแบ่เจ่ เด๊อะตา ลอ อาหลู่เล๊ เด๊อ อาโรเต๊เห่ เด๊อ ลู กู๊ยากู เนอเตเพร เฮ๊อ. เร๊อ อา เก่ นอแม๊นอตู่หนิ ลู เร๊อ เหย่ซี, เร๊อ อา เก่ เด๊อะเอ่โตเด๊อะโอเบ่ เป่ อู เบ๊อะโตโพ๊ เร๊อ โตโพ๊ เนอเตเพร ปา หม่าโต่ แอ? 43อาแบ่เจ่ เก่ กาแม๊เถอะ เร๊อ อา หลู่กู่กล๊อ เออเตเพร อา แรเต เก่เฮ๊เรอ อา เก่ เด๊อ ลู แรเตหนิคว๊าเก่ ปา. 44แว เฮ๊จ๊อจ๋อ เจ๊อ ซี, แบ่เจ่ เออเตเพร อา ตาหมื่อตาเต ล๋อ ปลีเนอ อา เก่ เด๊อะตาลอ เด๊อ ลู กู๊ยากู ปา เร๊อ อา เก่ นอแม๊นอตู่ หนิ เร๊อ ลู ปา. 45หม่าแน๊เรอ หลู่กู่กล๊อ เออเตเพร เก่ เฮ๊ เกอเร๊อ อาเหน่ เน๊อ, ‘พื๋อ เร๊อ แวแบ่เจ่ กาคยาหม่า อา งย๋า ลา ปา เกอเหล่,’ อา เฮ๊ เร๊อ อามืออาปอหนิ หลู่ เพรเหมาะเพรคู เต๊เห่, โทเร๊อ อา เอ่มือโอแพร๊. 46เร๊อ ม๊อเนอม๊อเซ โตเบ๊อะอา เตเน เต่อโต่ เร๊อ อาเอ่โอ โชตาปา เบ๊อะเนอ, อา แบ่เจ่ เก่ กาคยาโต เบ๊อะเนอ เตอเนอ ปา. อาแบ่เจ่ เก่ เมจากาคยา ลู ปา เร๊อ อา เก่ แด่โน เต่อแก ลู เร๊อ แกแย เด๊อ อา หยื่อเอ่ เกออู จอแปแหร่ โต่ เนอเต๊เห่ ปา. 47“หลู่ กู่กล๊อ เด๊อ อา ซิเงเฮ๊อ อาแบ่เจ่ อา เตซิหยื่อ ตื๊อดื่อเรอ อา เก่ โอ่ เซเร หนื่ออื่อ อาเหน่ โต่, โท๊โต่ อา เก่ เมฮู๊ อาแบ่เจ่ อา เตซิหยื่อเนอ โต่ เฮ๊เนอ, อาแบ่เจ่ เก่ เมจากาคยา แหน่เจ๊อ ลู ปา. 48หม่าแน๊เรอ หลู่ กู่กล๊อ เด๊อ อา ซิเง อาแบ่เจ่ อา เตซิหยื่อ โต่ เตเพร เนอ, อา เก่ เมซื๊อ เต๊อเจ่อเจ่อ เด๊อ อา โตเบ่ ปลี๊ ลู เฮ๊เนอ, อาแบ่เจ่ เก่ เมจากาคยา ปลี๊เช หย่าเข่เล๊อ ลู ปา. แกแย เด๊อ อา พย๊าหนิ เอ๊ เตลีแมลีเพ๊ เตเพรเพรเนอ, จอแปแหร่ แม๊ชือหนิ ลู เด๊อ อา เก่ เบ่เม เอ๊เล๊อ เร๊อ อู. แกแย เด๊อ จอแปแหร่ หยื่อเอ่หนิ ลู เร๊อ อา เด๊อ เอ๊เล๊อ ลู เตเพรเนอ, จอแปแหร่ กุย เอ๊เล๊อ ลู ปา.
Copyright information for
EkySCThai