Luke 9:28-35
เหย่ซู่ เหน่กล่อ ถู่แหล่ โค๊แก อาหรี่อาแก
(มัทธิว ๑๗:๑-๘, มาระโก ๙:๒-๘)
28เบ๊อะเหย่ซู่ เฮ๊เบ่โท ฮู๊เออ เด๊อคยา อา ผื่อ บาเฮ๊อ เนอลุยซว๊า เบ๊อะเนอ, อา เอ๊หนิ คูเปโตร, คูยอห์น เร๊อ คูยากอบ เร๊อ อา จว๊าแถ่ เด๊อ โฉ่ เตเม ลู เร๊อ แบ่เจ่ เหย่ซู่ เตเร จว๊ากูยจ๊อเบ เบ๊อะเนอ. 29เบ๊อะอา กุยจ๊อเบ เบ๊อะเนอ, อาเป๊เส่ ถู่แหล่โค๊ลอ เร๊อ อา เห่อจ่า เต๊เห่เนอ อาบูแปล๊เตเคแถ่ ลอปลี เจ๊อ. 30แกแย แฮ โอ่โลแถ่คย๊า เบ๊อะเนอ ซิเนอ เร๊อ อา เฮ๊เบ่ เร๊อ เหย่ซู่. เหย่ซี หม่า คูโมเสส เร๊อ เพรโพร เอลียาห์. 31เร๊อ อา โอโลแม๊เถอะ เต่อ เร๊อ ม๊อขุ อา เตลีเตเตเค เต๊เห่ เร๊อ อา เฮ๊เบ่ เกอ เหย่ซู่. เหย่ซี เฮ๊เบ่ เกอเร๊อลู เน๊อ งยาแต๋โต่ ปาเนอ, เหย่ซู่ เก่ เมเล๊อเมบาแถ่ จอแปแหร่ อา เตเซเรหนื่ออื่อ เออเนอ ปา, เร๊อ อา เก่ เซอ แก เบ๊อะวีเยรูซาเล็ม อากูเนอ ปา อาหรี่อาแก. 32คูเปโตร เร๊อ อา โคแบ๊ซว๊า เต๊เห่ โอ่เมอหนิเชหม่าแน๊เรอ เบ๊อะเหย่ซี ซิเหน่แถ่ เบ๊อะเนอ, อา แม๊เถอะ เหย่ซู่ อา เตอเรอดุเตอเรอทู เต๊เห่ โทเร๊อ แกแย ซิเนอ ก๊อถ่อ โอ่เต่อเกอ เร๊อ ลู. 33เบ๊อะคูโมเสส เร๊อ เพรโพร เอลียาห์ เถ่จว๊าแก เฮ๊อ เบ๊อะเนอ, คูเปโตร เฮ๊ เหย่ซู่ เน๊อ, “แบ่เจ๋, เหล่โอ่ เบ๊อะเออ โต๊โผ่ เด๊อ อาตว่า โมแร๊ ลา. เป เก่ ช๊อแถ่เป่ ซี เหล่สื่อ โซเม, เตเมเรอ เนเง, เตเมเรอ คูโมเสส อาเง, เตเมเรอ เพรโพร เอลียาห์ อาเง.” (อา เฮ๊ ฮู๊เออ ตื๊อดื่อเรอ อา เฮ๊แคร๋ อิเตเนอ อา ซิเง หนิเกอ เร๊อ โต่.) 34เบ๊อะคูเปโตร เฮ๊เบ่ ปาแพ๊ เบ๊อะเนอ, อ๊อโหล่ ตื๊อบื่อ แล โอ่โลแถ่ เร๊อ อา แลอู ตาบี๊แก เหย่ซี. เบ๊อะอ๊อโหล่ แลอูบี๊แก เหย่ซี เบ๊อะเนอ, อา โคเจ่ เต๊เห่ ซิอิเช ลอปลี เจ๊อ. 35เร๊อ โหง่พราเถ่ เด๊อ อ๊อโหล่ อากู เร๊อ อา เฮ๊ เน๊อ, “อา หม่า แวพู๊คู เด๊อ แว นว๊าแถ่ โทเฮ๊อ อา เตเพร. หนิดา แลแค อาโหง่ นี๋.” a
Copyright information for
EkySCThai