Mark 11
เหย่ซู่ จว๊าโน เด๊อ วีเยรูซาเล็ม
(มัทธิว ๒๑:๑-๑๑, ลูกา ๑๙:๒๘-๔๐, ยอห์น ๑๒:๑๒-๑๙)
1เบ๊อะเหย่ซี แฮโต่ผื่อ เฮ๊อ เด๊อ วีเยรูซาเล็ม เบ๊อะดอเบธฟายี เร๊อ ดอเบธานี ดอทือ โต๊โฉ่เหมาะ โฉ่ อาช๊าเบ๊อะเนอ, เหย่ซู่ นอแฮ เหร่อ อา โคเจ่ ซิเนอ. 2เร๊อ อา เฮ๊ เหย่ซี เน๊อ, “แฮโน เหร่อ แลแค ดอ เด๊อ เงเนอ ตอดอ, ซี แฮ โนโน เร๊อ ซี เก่ แม๊เถอะ แมอ๊อแลพู๊ อาแปล โตโด เด๊อ อู แถ่แด๊น๊อ แต่ล๋าย ลู โตโพ๋ โต่ โตโด ปา, ซี เก่ แม๊เถอะ อูชอกล่อ แด่โอเอ่ อาเฉ่ เบ๊อะเนอ ปา เร๊อ ฉิโล๊ อา เร๊อ จุ่ยกา อา เบ๊อะเออ นี๋. 3แกแย เตเพรเพร เก่ แด๊เฮอ ซี เน๊อ, ‘ซี จว๊า ฉิโล๊ โต่ แมอ๊อแลพู๊เออ เมเต?’ เฮ๊เรอ, ‘แบ่เจ่ โหล่ นอ ลู เนอ, อา นอโท ลู ปา เร๊อ อา ซูกา คยาแซ๊ ดื่อ ปา,’ เฮ๊ฉื่อ ลู ฮู๊เนอ นี๋,” เหย่ซู่ เฮ๊ เหย่ซี ฮู๊เนอ. 4เบ๊อะเนอ เหย่ซี จว๊าแม๊เถอะ แมอ๊อแลพู๊ โตโด, เร๊อ อู จอกลอ โอ่ผื่อ อา เด๊อ หี่กู่ดา ทือช๊า เร๊อ อา ก๊อถ่อโอ่ เด๊อ แกล๊ทือ. เร๊อ เหย่ซี จว๊าฉิโล๊ ลูเปลอ. 5แกแย ก๊อถ่อโอ่ เบ๊อะอาช๊า เนอเต๊เห่ แด๊เฮอ เหย่ซี เน๊อ, “ซี จว๊าฉิโล๊ โต่ แมอ๊อแลพู๊ เออ เมเต?” 6เร๊อ เหย่ซี เฮ๊ฉื่อ ฮู๊ เหย่ซู่ นอเฮ๊ เหย่ซี เนอ เร๊อ แกแย เนอเต๊เห่ปลวาจุ่ยกา เหย่ซี. 7เหย่ซี จุ่ยกาหนิ แมอ๊อแลพู๊ เออเนอ เด๊อ เหย่ซู่ อา โอ่ เร๊อ เหย่ซี เด๊แถ่ แลแค อาจากลอ เด๊อ แมอ๊อแล อาแหง่ขุ เร๊อ เหย่ซู่ แถ่แด๊ อา. 8แกแย ตู๊หมู่ดุ เด๊ตา แลแค อาจากลอ เต๊เห่ เด๊อ แกล๊เดกู โทเรอ เด๊อ อาโร เต๊เห่ เกอลาติ เรอ อา ปากาหนิ ส่อแพ เด๊อ อาเหล่โอ่ เต๊เห่ เด๊อตอกู เร๊อกา เด๊ตา เด๊อ แกล๊เดกู. 9เร๊อ แกแย จว๊า เหร่อ แลแค เด๊อ เง เต๊เห่, เต๊เห่เห่ เร๊อ อา ครวาจว๊าเกอ แลแค เด๊อคยา เร๊อ อา เอ๊โท แลแค เนอ, a“ถู่เซ๊แถ่ แลแค จอแปแหร่!”
“แกแย เด๊อ อา แฮ เร๊อ แบ่เจ่ อามุย เออเตเพรเนอ, จอแปแหร่ เก่ เด๊อะบุ๊ยเด๊อะเตอเรอ ดื่ออา นี๋!” b
10“แกแย เด๊อ อา เตเร แฮ เป๊อ เป แซ่เน๊อ เปเพ คุ๊ยคูดาวิด เด๋อ งย๊าเค เออเนอเตเพรเนอ, จอแปแหร่ เก่เด๊อะบุ๊ยเด๊อะเตอเรอ ดื่อ อา นี๋!”
“ถู่เซ๊แถ่ แลแค จอแปแหร่ เด๊อ อา โอ่ เด๊อ ม๊อขุ อาเหล่โอ่ แถ่โลเล๊อ เออเตเพร!” เหย่ซี เอ๊โมฉื่อ แลแค เหย่ซู่ ฮู๊เนอ. 11เหย่ซู่ จว๊าโต่ เด๊อ วีเยรูซาเล็ม อากู เบ๊อะเนอ, อา จว๊าโน เด๊อ เตหลู่แตโฮเตเร๊กู เร๊อ อา จว๊าเลแม๊ ตาวาลอ เตปว๊าเต๊อเจ่อ. ต๊อเหมาะ เตเร ตาเฮ๊อ อาคยา อา เร๊อ อา โคเจ่ เช๊อซิเนอ เถ่จว๊าแก เด๊อ ดอเบธานี.
เหย่ซู่ อิชอฮามู๊แหม่แก ก่อดุ๊ยเหมาะ เออต๊อเหมาะ
(มัทธิว ๒๑:๑๘-๑๙)
12เด๊อคยา เตอเนอเนอ เบ๊อะเหย่ซี โอ่ เด๊อ ดอเบธานี เถ่กา เด๊อ แกล๊โหล่ เบ๊อะเนอ, เหย่ซู่ ซิเอ่ ดี. 13เร๊อ อา แม๊เถอะจว๊าจู ก่อดุ๊ยเหมาะ เด๊อ อาเหล่ โตโฮ๊ เออต๊อเหมาะ. หม่า อาเส่ โอ่ แอ? อาเตเน เร๊อ อา จว๊าโต เด๊อ ก่อดุ๊ยเหมาะ โอ่, หม่าแน๊เรอ เบ๊อะอา จว๊าโต่ เด๊อ ก่อดุ๊ยเหมาะ โอ่ เบ๊อะเนอ, อา แม๊เถอะ อาเส่ ตอปล๋อ โต่, เบ๊อะโตเส่ ล๋ายโต่ อาคยา อา โอ่ โชชื่อแพ๊ อาเหล่ แพ๊. 14เหย่ซู่ เฮ๊ ก่อดุ๊ยเหมาะ เนอต๊อเหมาะ เน๊อ, “เตเพร่ว เก่ เอ่น๊อ เกอปา แต่ เนเส่ แต่เหม่ นี๋” อา เฮ๊ ฮู๊เออเนอ อา โคเจ่ เต๊เห่ หนิโฮ แลแค.เหย่ซู่ จว๊า เด๊อเตจ๊อเบโฮกู
(มัทธิว ๒๑:๑๒-๑๗, ลูกา ๑๙:๔๕-๔๘, ยอห์น ๒:๑๓-๒๒)
15เบ๊อะเหย่ซี จว๊าโต่ เด๊อ วีเยรูซาเล็ม เบ๊อะเนอ, เหย่ซู่ จว๊าโน เด๊อเตหลู่โฮกู เร๊อ อา จว๊าโน เหว่เถ่แก แกแย อิแก่อิเชตาเต เบ๊อะเนอ เต๊เห่ เร๊อ อา โนถู่ กลอแก อูเหล่ถู่แหล่ รือ อา เหร่ขุ เนอเต๊เห่ เร๊อ ขุแกล๊แถ่โลเล๊อ เด๊อ อู เหล่โอ่แน อิเช เร๊อ ถู่หลุ่ย เนอเต๊เห่. 16อู โอ่ เบ๊อะเตหลู่โฮกู เนอเรอ อู เตเร จอจว๊าโค๊ อูตาเต เด๊อะ อาโร โต๊โผ่ เนอ เหย่ซู่ เด๊อะจอ จว๊าโค๊อู เตเพร่ว โต่. 17โทเรอ อา อิซว๊าอี๊แส่ เหย่ซี เน๊อ, “เด๊อ ลีเทส่อพ๊ากูเนอ, จอแปแหร่ เฮ๊ เนอ, ‘แวหี่ หม่า อู เก่ เฮ๊ เร๊อ เมวเจอะโหร่ ปว๋า เต๊อเจ่อ เหล่จ๊อบู่จ๊อเบ อาหี่.’ c หม่าแน๊เรอ ซี จว๊านอ ทวาแถ่ ลอเฮ๊อ อา เร๊อ ‘เพรเอ่โห่เอ่ฮี๊ เหล่โอ่ว๊าโอ่ อาเหล่โอ่ เฮ๊อ.’” d 18เพรหลู่แต ทวาดุทวาเต เต๊เห่ เร๊อ เพรอิซว๊า เตซว๊าเตแส่ อาซ๊าร๊า เต๊เห่ หนิโฮ เหย่ซู่ เฮ๊ ฮู๊เออ เร๊อ เหย่ซี แม๊ปู แกล๊ เด๊อ อา เก่ แม๊ปูเมเซอ เหย่ซู่. แกแย ตู๊หมู่ดุ เต๊เห่ ย๋อ อาคย๊าอายื๊อ ลอปลี เหย่ซู่ อา เตอิซว๊าอี๊แส่ อาคยา, เหย่ซี ทวา ทวาดุทวาเต เนอเต๊เห่ ซิอิเช แลแค เหย่ซู่ อาเหล่. 19เบ๊อะเหมาะเฮ๊ตา เฮ๊อ เบ๊อะเนอ, เหย่ซู่ เร๊อ อา โคเจ่ เต๊เห่ เถ่กาแก เด๊อเมอกลอ.พย๊าหนิ เตอิซว๊า เต๊อเจ่อ เด๊อ ก่อดุ๊ยเหมาะ เออเต๊อเหมาะ อา โอ่
(มัทธิว ๒๑:๒๐-๒๒)
20ช๊าป๊าโร เหมาะลีโรมื่อ เบ๊อะเนอ, เหย่ซี เถ่จว๊า รว๊าคยา แกล๊ เนอโตโบ เร๊อ ก่อดุ๊ยเหมาะ เด๊อ เหย่ซู่ อิชอแก ลู เนอ ต๊อเหมาะเนอ เหย่ซี แม๊เถอะ เร๊อ อาคราลอ ซีเหมาะ โต่ เจ๊อ เด๊อ อาหรุ่ย เจ๊อ. 21เร๊อ คูเปโตร ซิเงแถ่เบ่ โต่ เหย่ซู่ อิชอแก ส่อเหมาะ เออเนอ เร๊อ อา เฮ๊ ลู เน๊อ, “ซ๊าร๋า แม๊มอ เด๊อเนอ เล๊, ก่อดุ๊ยเหมาะ เด๊อ เน อิชอแก ลู เนอต๊อเสาะ อา เซอคราแก เฮ๊อ.” 22เร๊อ เหย่ซู่ เฮ๊ฉื่อ ลู เน๊อ, “หยื่อเอ่ จอแปแหร่ เนอ. 23แว เฮ๊จ๊อ จ๊อ เน, แกแย เตเพรเพร อา เก่ เฮ๊ โฉ่ เออเตเม เน๊อ, ‘ซ๊อซื๊อจว๊าตาพาแก เด๊อ เทอดุซาวา อากูเนอ,’ เร๊อ อา เก่ ซิปล่อหร่าเหร่ โต่ เร๊อ อา เก่ หยื่อเอ่ หม่าแหน่แหน่ เฮ๊เนอ, อา เก่ ทวาแถ่ เป ลู ฮู๊ อา เฮ๊ เนอ ปา. e 24ฮู๊เนอ อาคยา แว เฮ๊ ซี, ซี กุยเต เด๊อ เพ จอแปแหร่ อา โอ่ อิเตเต๋ เบ่เบ่เนอ หยื่อเอ่ เร๊อ ซี พย๊าหนิเฮ๊อ เนอ, เร๊อ ซี เก่ พย๊าหนิ หม่าแหน่แหน่ปา. 25เบ๊อะซี ก๊อถ่อ กุยจ๊อเบ เบ๊อะเนอ, ซี เก่ ปื่อโอ่ แกแย เตเพรเพร อาเตซื๊อ เก่เฮ๊เรอ ปลวาแก อาเตซื๊อเนอ, ซี เก่ ปลวาแก ตื๊อหม่า, ซีเพ โอ่ เด๊อ ม๊อขุ เออเตเพร อา ปลวาแกเกอ ซี เตซื๊อ ฮู๊เนอ ปา.” f 26(“หม่าแน๊เรอ ซี เก่ ปลวาแก อูเตซื๊อ โต่ เก่เฮ๊เรอ, ซีเพ โอ่ เด๊อ ม๊อขุ เออเตเพร ปลวาแกเกอ ซี เตซื๊อ โต่โต่.”) ▼▼ลี เออเตอมา เนอ อา โอ่ โนเต่อเกอ เด๊อ ลี เด๊อ อู รา เร๊อ กู๊ขุ เด๊อ กูลู๊เล๊อ เคเนอ ต๊าบ่า อากู โต่
อู แด๊เฮอ เหย่ซู่ เตอเรอฉว่าชอ อาหรี่อาแก คยา
(มัทธิว ๒๑:๒๓-๒๗, ลูกา ๒๐:๑-๘)
27เหย่ซู่ เร๊อ อา โคเจ่ เต๊เห่ จว๊าโต่ คยาแซ๊ เด๊อ วีเยรูซาเล็ม เร๊อ เบ๊อะเหย่ซู่ เลจว๊า เด๊อเตหลู่แตโฮกู เบ๊อะเนอ, เพรหลู่แต ทวาดุทวาเต เต๊เห่ เร๊อ เพรอิซว๊า เตซว๊าเตแส่ อาซ๊าร๊า เต๊เห่, เร๊อ แกแยยิวพู๊ ทวาดุทวาเต เต๊เห่ จว๊า เด๊อ ลูโอ่, 28เร๊อ เหย่ซี แด๊เฮอ เหย่ซู่ เน๊อ, “เน จว๊าเมโต่ เตพู๊เออ เต๊เห่ เร๊อหม่า เน จว๊าเม เร๊อ อูเป อา เตอเรอฉว่าชอ เป? เน เก่ เมเต ฮู๊เออเต๊เห่ อาเงเนอ อูเป นอเม เน เป?” 29เหย่ซู่ เฮ๊ฉื่อ เหย่ซี เน๊อ, “แว แด๊เฮอ เกอ ซี โหง่ ตือมือ, เร๊อ เฮ๊ฉื่อ เป่ เกอ แว, เร๊อ แว เม เตเออเต๊เห่ เนอ อูเป อา เตอเรอฉว่าชอ เปเนอ แว เก่ เฮ๊โล เป่ ซี ปา. 30เพรเจเทอ คูยอห์น เจ เป อู เทอ เออเนอหมา จอแปแหร่ เด๊อ ลู เตอเรอฉว่าชอ แอ? หม่าโต่เรอ แกแย เด๊อ ลู แอ? แด๊โฉ่ เป แม๊ แว.” 31เร๊อ เหย่ซี เคร๊แขระ เร๊อลู เน๊อ, “เป เก่ เฮ๊ เน๊อ, ‘จอแปแหร่ เด๊อ ลู’ เฮ๊เรอ, อา เกล๊ แด๊เฮอ เร๊อ เฮ๊อ เป เนอ, เก่เฮ๊ฮู๊เนอเรอ ‘ซี หยื่อเอ่ อา โต่ เมเต?’ ฮู๊เนอ เฮ๊อ. 32เรอ เป เก่ เฮ๊ อา เน๊อ, ‘แกแย เด๊อ ลู’ เก่เฮ๊เนอ, เป ซิอิเช แกแย ตู๊หมู่ดุ เออเต๊เห่ อาเหล่เหล่.” (เมเตเฮ๊เรอ แกแย ปว๋า เตเพร ลอ หยื่อเอ่ ลอ เร๊อ คูยอห์น หม่า เพรโพร หม่าแหน่ แหน่ เตเพร.) 33ฮู๊เนอ อาคยา เหย่ซี เฮ๊ฉื่อ เหย่ซู่ เน๊อ, “เป ซิเงโต่.” เร๊อ เหย่ซู่ เฮ๊ฉื่อ เหย่ซี เน๊อ, “เก่เฮ๊ฮู๊เนอเรอ แว เมเต เออเต๊เห่ เร๊อ อูเป เตอเรอฉว่าชอ เป เนอ แว แด๊โฉ่โล เป ซี โต่โต่.”
Copyright information for
EkySCThai