Mar 16 | EkySCThai | STEP | เบ๊อะแกแยยิวพู๊ อา ม๊อเนอโด่ ตาลว๊าแก โท เนอโตโรเนอ, ดอ มักดาลา เหมาะมารีย์, คูยากอบ อาโหมะ โหมะมารีย์ เร๊อ เหมาะสะโลเม พรีหนิ เทอ โนมื๊อ เร๊อ อา เตเร จว๊าโปล่ แลแค เร๊อ แบ่เจ่ เหย่ซู่โล.

Mark 16

เหย่ซู่ เซอเพร กาคยา

(มัทธิว ๒๘:๑-๘, ลูกา ๒๔:๑-๑๒, ยอห์น ๒๐:๑-๑๐)

1 เบ๊อะแกแยยิวพู๊ อา ม๊อเนอโด่ ตาลว๊าแก โท เนอโตโรเนอ, ดอ มักดาลา เหมาะมารีย์, คูยากอบ อาโหมะ โหมะมารีย์ เร๊อ เหมาะสะโลเม พรีหนิ เทอ โนมื๊อ เร๊อ อา เตเร จว๊าโปล่ แลแค เร๊อ แบ่เจ่ เหย่ซู่โล. 2 เตเกล๊อากู กูลู่เล๊อ เตอเนอ, ^{▼▼เตเกล๊อากู กูลู่เล๊อ เตอเนอ อาเฮ๊เนอหม่า, หม่าเฮ๊อ กู๊แหน่ ครี๊พู๊ เต๊เห่ เฮ๊ เร๊อ ม๊อเนอโด่ เนอเตอเนอ เฮ๊อ}เบ๊อะเหมาะลีโรมื่อ เหมาะคี๊โป๊โหล่ปา เบ๊อะเนอ, เหย่ซี แฮ แลแค เด๊อ โลขุ. 3 เบ๊อะเหย่ซี แฮ เด๊อ แกล๊โหล่ เบ๊อะเนอ, เหย่ซี เฮ๊ เกอเร๊อ เป่ลู เน๊อ, “หม่าอูเป เก่ ถู่ลอ ตาพาแก เป เป หล่อ เด๊อ อู ถู่ลอบี๊ เร๊อ โลกู เนอเตเม เป?” เมเตเฮ๊เรอ หล่อเนอ เตเม หม่า อาดุ แหน่เจ๊อ.

4 หม่าแน๊เรอ เบ๊อะเหย่ซี แม๊จว๊า เบ๊อะเนอ, อา แม๊เถอะ เร๊อ อู ถู่ลอ จว๊าตาพา หนื่ออื่อแก โทเฮ๊อ หล่อดุ เนอเตเม เฮ๊อ. 5 เบ๊อะเหย่ซี โน เด๊อ โลกู เบ๊อะเนอ, อา แม๊เถอะ เพรคูพู๊เส่ แซ๊หนิ จาแจจวาบู ชูตู๊ตือปือ เตเพร โอ่แนโอ่ เด๊อ โลกู เด๊อ จ๊อทว๊า เนอตากยา เร๊อ เหย่ซี คย๊า ลอปลีเจ๊อ.

6 เร๊อ อา เฮ๊ เหย่ซี เน๊อ, “คย๊าอายื๊อ แลแค เตเม๋, ซี แม๊ปู นาซาเร็ธพู๊ เหย่ซู่ เด๊อ อู มือเซอแถ่ ลู เด๊อ อี๊ถื่อดีเต่ลู เนอเตเพร แพ๊ เนอหมา แว ซิเง. อา ก๊อถ่อเซอเพร กาคยา โทเฮ๊อ. อา โอ่ปา เบ๊อะเออ โต่. แฮแม๊มอ แลแค, เออ หม่า อาเหล่โอ่ เด๊อ อู ฉู่โน ลู เนอเฮ๊อ. 7 กาแด๊โฉ่ เป คูเปโตร เร๊อ เหย่ซู่ อา โคเจ่ เด๊อ อาโร เนอเต๊เห่ เร๊อ เหย่ซู่ จว๊า โอ่ป่อ เหร่อ เฮ๊อ ซี เด๊อ กาลิลี เก่กู เนอ เฮ๊อ. ฮู๊ อา เฮ๊หนื่ออื่อ โทเฮ๊อ ซีเนอ ซี เก่ แม๊เถอะ ดื่อ อา เบ๊อะเนอ ปา.” ^b

8 เหย่ซี คย๊า เร๊อ อาเหน่ แต่แนตากยา ลอปลี เจ๊อ อาขว่าอาคยา, เหย่ซี แกล่เถ่แก เด๊อ โลกู. เหย่ซี ซิอิเช ตาลว๊าซิลือ เร๊อ เบ๊อะอา เถ่จว๊า เบ๊อะเนอ, อา เฮ๊เบ่ ปา เจ๊อ อู เตเพร่ว โต่.

เหย่ซู่ เด๊อะโลแม๊เถอะ เป อาเหน่ เร๊อ มักดาลา ดอกูโหมะ เหมาะมารีย์

(มัทธิว ๒๘:๙-๑๐, ยอห์น ๒๐:๑๑-๑๘)

9 เหย่ซู่ เซอก๊อถ่อ เซอ เพร กาคยา เบ๊อะม๊อเนอ โซซว๊าเตอเนอ อากู อากูลู่เล๊อ เนอเตอเนอ ^{▼▼ม๊อเนอโซซว๊า เตอเนออากู อากูลู่เล๊อเนอเตอเนอ หม่า หม่าเฮ๊อ ครี๊พู๊ เต๊เห่ เฮ๊เร๊อ ม๊อเนอโด่ เนอ เตอเนอเฮ๊อ}เหมาะลีโรมื่อ เนอโตโร. โทเรอ เบ๊อะเนอปา อา จว๊าเด๊อะโล เหร่อเล๊อ เป่ อาเหน่ เร๊อ มักดาลา ดอกูโหมะ เหมาะมารีย์. เร๊อ เหมาะมารีย์. เออเตเพร เนอหมา อา หม่า เฮ๊อ เพรเหมาะ เด๊อ เหย่ซู่ เหว่เถ่แก เป่ ลู โลเน๊ โซซว๊าโตโด เด๊อ อาเหน่ลู เนอเตเพร เฮ๊อ. 10 ฮู๊เนอเรอ, เหมาะมารีย์ จว๊าเฮ๊โฉ่โล เป่ แกแย เด๊อ อา จว๊าเต่อเคเต่อน๊อ เร๊อ เหย่ซู่ เนอเต๊เห่ เร๊อ เหย่ซู่ เด๊อะโล แม๊เถอะ เป่ ลู อาหรี่อาแก. เบ๊อะเนออาเค เหย่ซี ซิเปล เร๊อ อาโหง่อาเห่ ปาแพ๊ แลแค แพ๊. 11 เหย่ซี หนิโฮ เหมาะมารีย์ แด๊โฉ่ เป เหย่ซี เน๊อ, “เหย่ซู่ เซอเพร แพ๊, แว แม๊เถอะ เจ๊อ อา เร๊อ แวเหน่ เจ๊อ,” อา เฮ๊ เป เหย่ซี ฮู๊เนอ หม่าแน๊เรอ เหย่ซี หยื่อเอ่โต่.

เหย่ซู่ เด๊อะโลแม๊เถอะ เป่ อา โคเจ่ ซิเนอ

(ลูกา ๒๔:๑๓-๓๕)

12 เด๊อคยาเนอ อา โคเจ่ ซิเนอ เถ่จว๊า เด๊อดอเด๊อโฉ่ เนอ เหย่ซี แม๊เถอะ เหย่ซู่ อากลว่าโค๊ เป ลู อาเหน่ เร๊อ อา เด๊อะโล เป เหย่ซี. 13 อา โคเจ่ เออซิเนอ กาคยา แด๊โฉ่ เป อา โคเจ่ เด๊อ อาโรเต๊เห่ หม่าแน๊เรอ เหย่ซี หยื่อเอ่ แลแค โคเจ่ เออซิเนอ อาโหง่ โต่.

เหย่ซู่ เด๊อะโล แม๊เถอะ เป อา โคเจ่ เช๊อเตเพร

(มัทธิว ๒๘:๑๖-๒๐, ลูกา ๒๔:๓๖-๔๙, ยอห์น ๒๐:๑๙-๒๓, เพรโด่แนพู๊ เต๊เห่ ๑:๖-๘)

14 เด๊อ คยาโป่ โตโพ๊ เรอ เบ๊อะอา โคเจ่ เช๊อเตเพร เอ่ดี เบ๊อะเนอ, อา เด๊อะโล เป คยาแซ๊ เหย่ซี เร๊อ อาเหน่. แกแย เด๊อ อา แม๊เถอะ เหย่ซู่ เซอก๊อถ่อ เซอ เพร กาคยา เออเต๊เห่ แด๊โฉ่ เป่ เหย่ซี หม่าแน๊เรอ เหย่ซี หยื่อเอ่ แลแค อูโหง่ โต่ อาขว่าอาคยา, เหย่ซู่ ซิพรวา เหย่ซี.

15 เร๊อ อา เฮ๊ เหย่ซี เน๊อ, “จว๊าปีชีลอ เด๊อเห่ขุต๊าบ่าลอ เร๊อ จว๊าเล แด๊โฉ่โด่แน เป่ ลอ อู ปว๋า เตเพร เร๊อ เตซิครือซิลอมีลา เออเนอ นี๋. ^d 16 แกแย เด๊อ อา หยื่อเอ่ เตซิครือซิลอมีลา เออ เร๊อ อา เจอาเหน่ เร๊อ เทอ เตเพรเพร เนอ, อา เก่ พย๊าหนิ เตเมแลเปล๊กา ปา. หม่าแน๊เรอ แกแย เด๊อ อา หยื่อเอ่ โต่ เต๊เห่เนอ อา เก่ ข่าเบ่ เตเมจากาคยา ป๋า. 17 แกแย เด๊อ อา หยื่อเอ่ เต๊เห่เนอ แว เก่ เด๊อะ เหย่ซี เตอเรอฉว่าชอ เด๊อ อา เก่ เมแจ่ แลแค อาโค๊ตีกลี๊ เต๊เห่ ปา. เหย่ซี เก่ เหว่เถ่เบ๊ แลแค โลเน๊ เต๊เห่ เร๊อ แวมุย เนอปา, เหย่ซี เก่ เฮ๊เบ่ แจ่ โหง่อาโร เนอเต๊เห่ ปา. 18 เหย่ซี เก่ ปื่อ เจ๊อ หรู่อาแร เต๊เห่ เบ่เบ่, อา เก่ จว๊าเอ่เบ่โอเบ่ เจ๊อ เตขุมือ เต๊เห่ เบ่เบ่, อา เมแป่เมเช เร๊อ เหย่ซี เตอเจ๋อ โต่. เหย่ซี เก่ แด่แถ่ อากู๊ขุ เด๊อ แกแยชุ๊ยแกแยเช เต๊เห่ อาเหน่ลู เฮ๊เนอ, เหย่ซี เตชุ๊ยเตเช เก่ อาโอ่เหม่แก ลอ ปา.”

จอแปแหร่ เอ๊กา แก๊แถ่แก เหย่ซู่ เด๊อ ม๊อขุ

(ลูกา ๒๔:๕๐-๕๓, เพรโด่แนพู๊ เต๊เห่ ๑:๙-๑๑)

19 แบ่เจ่ เหย่ซู่ เฮ๊เบ่โท เร๊อ อา โคเจ่ เต๊เห่ เร๊อ จอแปแหร่ เอ๊กา กาแถ่แก ลู เด๊อ ม๊อขุ เร๊อ อา แถ่โอ่แนโอ่ เด๊อ จอแปแหร่ อากู๊ขุ จ๊อทว๊า ตากยา. ^e 20 เหย่ซู่ อา โคเจ่ เต๊เห่ จว๊าเล แด๊โฉ่โด่แน เป อู เร๊อ จอแปแหร่ อาลาอาโหง่ เด๊อ เหล่โอ่ ปว๋า โต๊โผ่. แซ่ฮู๊ แกแย เก่ หยื่อเอ่แลแค เกอ แลแค เร๊อ เตซิครือซิลอมีลา เด๊อ เหย่ซี โด่แน เป่ อู เออเนอหม่า อา หม่าแหน่เจ๊อ อาเงเนอ, แบ่เจ่ เด๊อ เป่ เหย่ซี เด๊อ อา เก่ เมแจ่ แลแค เตเม อาโค๊ตีกลี๊ เต๊เห่ อาเอ๊แหน่เจ๊อ. ^{▼▼อู รา ลีพ๊า มู๋ หนู่เค เด๊อ อู ซิเลหนิ แร๊ อา เต๊เห่ เร๊อ ลีพ๊า เด๊อ อาโร เต๊เห่เนอ, มาระโก ๑๖:๙-๒๐ เออ อู แม๊เถอะ อา โอ่ป่าเต่อ เกอโต่}