Mark 2

เหย่ซู่ เมโอ่เหม่ แกแยเหน่ เซอชิกยา

(มัทธิว ๙:๑-๘, ลูกา ๕:๑๗-๒๖)

1อาโหน่ โซลุยเนอเนอ เหย่ซู่ กาคยา เด๊อ วีคาเปอรนาอูม อากู เร๊อ แกแย เต๊เห่ หนิโฮ แลแค เร๊อ อา โอ่ เด๊อ หี่. 2ฮู๊เนอเรอ แกแย ดุ๊ยแฮยาแฮ โหร่เอ๊ ตาลว๊าซิลือ เร๊อ เบ๊อะกู่ดากลอ แพ๊เนอ. เร๊อ เหล่โอ่ โอ่ดา ปา เจ๊อ โตโพ๋ โต่. เหย่ซู่ แด๊โฉ่โด่แน อิซว๊าอี๊แส่ตา เป่ เหย่ซี เร๊อ จอแปแหร่ อาลาอาโหง่ เต๊เห่. 3เบ๊อะเนอ เพรคู ซิลุย แย๊แฮหนิ แกแยเหน่ เซอชิกยา เด๊อ เหย่ซู่ อา โอ่ เตเพร. 4หม่าแน๊เรอ แกแย ย๋อ โอ่โหร่ ตาลว๊าซิลือ อาคยา, เหย่ซี แฮโนผื่อแจ่ ปา เด๊อ เหย่ซู่ อา โอ่ โต่. เร๊อ อา แถ่ เมโปล ย๊าโม โตตื้อ หี่ขุกู๊โก่ เบ๊อะเหย่ซู่ โอ่แน อาขุเนอ, เร๊อ อา แจตา แกแย เซอชิกยา เออเตเพร เร๊อ อิจอ. 5เบ๊อะเหย่ซู่ แม๊เถอะ เหย่ซี อาเตหยื่อโอ่ ฮู๊เนอ เนอ, อา เฮ๊ แกแย ชุ๊ย เซอชิกยา เนอเตเพร เน๊อ, “แวพู๋, แว ปลวาแกเฮ๊อ เน เตซื๊อ เฮ๊อ,” อา เฮ๊ ลู ฮู๊เนอ.

6เบ๊อะเนอเค เพรอิซว๊า เตซว๊าเตแส่ อาซ๊าร๊า เต๊เห่ โอ่แนโอ่ แลแค เบ๊อะเนอ เร๊อ อา เตเน แลแค เด๊อ อา ซิปล่อกู เนอ, 7“แกแย เออเตเพร อา จว๊า เฮ๊โต่ ฮู๊เออ เมเต? อา เฮ๊เบ่ซื๊อ เฮ๊อ จอแปแหร่ เฮ๊อ หม่า อูเป เตเพร จว๊า ปลวาแก แจ่ เตซื๊อ ฮู๊เต? เพร ปลวาแก แจ่ เตซื๊อ หม่า ตื๊อแพ๊ จอแปแหร่ เตเพร แพ๊.”

8โตโพ๊โต เหย่ซู่ ซิเง เหย่ซี เหล่เตเน เด๊อ ซิปล่อกู เร๊อ อา เฮ๊ เหย่ซี เน๊อ, “ซี จว๊าเตเนโต่ แลแค เด๊อ ซี ซิปล่อกู ฮู๊เนอ เมเต? 9แว เก่ เฮ๊ แกแย เซอชิกยา เออเตเพร เน๊อ, ‘แว ปลวาแกเฮ๊อ เน เตซื๊อ เฮ๊อ’ หม่าโต่เรอ ‘ก๊อถ่อ พย๊าหนิ เน เหล่เมอเนอ เร๊อ จว๊า มอ’ เก่เฮ๊หม่า อายูเล๊อ เบ๊อะเต๊อเจ่อเต? 10โทเรอ แว หม่า แกแยพู๊คู เตเพร. แซ่ฮู๊ ซี เก่ ซิเง แลแค เนอ เบ๊อะเห่ขุ เออเนอ แวโอ่ เร๊อ เตอเรอ ฉว่าชอ เร๊อ แวปลวาแก อูเตซื๊อ เต๊เห่ อาหนิเนอ แว เก่ เด๊อะโล เป่ ซี.” เร๊อ อา เฮ๊ เพรเซอชิกยา เออเตเพร เนอ, 11“แว เฮ๊ เน, ก๊อถ่อ ถู่ลูหนิ เน เหล่เมอเด๊เนอ เนอเรอ กามอ เด๊อ เน หี่เนอ.” 12เร๊อ โตโพ๊โต อา ก๊อถ่อ ถู่ลูหนิ อา เหล่เมอเด๊เนอ เร๊อ อา เถ่จว๊า เด๊อ แกแย ล๋อ ปลี อา เป๊เส่เง แกแย ปว๋า เตเพร อาคย๊าอายื๊อ ลอปลี เร๊อ ถู่เซ๊แถ่ แลแค จอแปแหร่. เร๊อ เหย่ซี เฮ๊ แลแค เน๊อ, “เตเมอาเหน่ ฮู๊เออเนอ, เป แม๊เถอะน๊อ แตแค๋ โต่,” อา เฮ๊ แลแค ฮู๊เนอ.

เหย่ซู่ อาเอ๊ คูเลวี

(มัทธิว ๙:๙-๑๓, ลูกา ๕:๒๗-๓๒)

13เหย่ซู่ เถ่จว๊า คยาแซ๊ เด๊อ กาลิลี เทออ่อ ทือ เร๊อ แกแย ตู๊หมู่ดุ จว๊า โอ่ตาวา ลอ แค ลู. เร๊อ อา เป๊อแถ่ อิซว๊าอี๊แส่ เป่ คยาแซ๊ เหย่ซี เบ๊อะเนอ. 14เบ๊อะอา จว๊า เบ๊อะเนอ, อา แม๊เถอะ เพอัลเฟอัส อาพู๊ คูเลวี. อา หม่า เพรกวา อาหมู่อาร๊า เตเพร. อา แม๊เถอะ อา โอ่แนโอ่ เด๊อ เหล่กวา อาหมู่อาร๊า อาหี่กู เร๊อ แบ่เจ่ เหย่ซู่ เฮ๊ ลู เน๊อ, “ครอครวา เกอแว,” เร๊อ คูเลวี ก๊อถ่อ ครวาจว๊าเกอ ลูคยา.

15เบ๊อะเหย่ซู่ เร๊อ อา โคเจ่ เอ่ดี เหมาะเฮ๊ เด๊อ คูเลวี หี่ เบ๊อะเนอ, เพรกวา อาหมู่อาร๊า เต๊เห่ เร๊อ เพรเมซื๊อ เต๊เห่ เอ่ โอ เต่อเกอ เร๊อ เหย่ซี. เมเตเฮ๊เรอ แกแย เด๊อ อา ครวา เหย่ซู่ อาคยา เต๊เห่เนอ, อา แซ่แพ๊ เร๊อ เหย่ ซีเนอ อา โอ่เต่อโหร่ เอ๊ลา. 16เบ๊อะฟาริสี เด๊อ อา อิซว๊า จอแปแหร่ เตซว๊าเตแส่ เนอเต๊เห่ แม๊เถอะ เหย่ซู่ เอ่เต่อโอเต่อ เร๊อ เพรเมซื๊อ เต๊เห่ เร๊อ เพรกวา อาหมู่อาร๊า เต๊เห่ เบ๊อะเนอ, อา แด๊เฮอ เหย่ซู่ อา โคเจ่ เต๊เห่ เน๊อ, “หม่าเมเตเรอ อา จว๊า เอ่เต่อโอเต่อ เกอ เร๊อ แกแย กวา อาหมู่อาร๊า เนอเต๊เห่ เร๊อ เพรเมซื๊อ เนอเต๊เห่ เมเต?” อา แด๊เฮอ แลแค ฮู๊เนอ.

17เบ๊อะเหย่ซู่ หนิโฮ เหย่ซี แด๊เฮอ ฮู๊เออ เบ๊อะเนอ, อา เฮ๊กาคยาฉื่อ เหย่ซี เน๊อ, “แกแย เด๊อ อา โอ่โมโอ่รี เต๊เห่เนอ, อา โหล่ เร๊อ เตขุ ซ๊าร๊าดุ โต่. แกแย เด๊อ อาชุ๊ยอาเช เต๊เห่เนอ ตื๊อหม่า อา โหล่ แพ๊ เตขุ ซ๊าร๊าดุเนอ แพ๊. แว จว๊า เอ๊กา แกแย เด๊อ อาจ๊ออาเต เนอเต๊เห่ หม่าโต่ แว จว๊า เอ๊กาแพ๊ แกแย เด๊อ อา เตซื๊อเต่ปล๊า อาโอ่ เนอเต๊เห่ แพ๊.”

อู แด๊เฮอ เหย่ซู่ โด่เอ่ ดี เร๊อ เหล่เอ่เหล่โอ อาคยา

(มัทธิว ๙:๑๔-๑๗, ลูกา ๕:๓๓-๓๙)

18เบ๊อะเนอ ตื๊อหื่อ คูยอห์น อา โคเจ่ เร๊อ ฟาริสี เต๊เห่ อา โด่เอ่โด่โอ แลแค เร๊อ แกแย เบ๊อะเนอ จว๊า แด๊เฮอ เหย่ซู่ เน๊อ, “คูยอห์น อา โคเจ่ เร๊อ ฟาริสี อา โคเจ่ เต๊เห่ โด่เอ่ เหล่เอ่เหล่โอ, หม่าแน๊เรอ เน โคเจ่ เต๊เห่เนอ อา โด่เอ่ เกออู ดี เร๊อ เหล่เอ่เหล่โอ โต่ เมเต?” อา จว๊า แด๊เฮอ ลู ฮู๊ เนอ.

19แบ่เจ่ เหย่ซู่ เฮ๊ฉื่อ เหย่ซี เร๊อ โหง่ค๊าโข่ ตือมือ เร๊อ อา เฮ๊ เน๊อ, “เบ๊อะกาฉู่แด่เพรคู โอ่เต่อเกอปา เร๊อ อาโค ซิเผระ ซิแม เบ๊อะเนอ, อา โคซิเผระ เออเต๊เห่ จว๊าโด่เอ่โด่โอ แจ่ ฮู๊เต? เบ๊อะกาฉู่แด่เพรคู จว๊าแก ล๋ายโต่, อา เก่ โอ่เต่อเกอปา เร๊อ อาซว๊าอาโค เต๊เห่ เฮ๊เนอ, เหย่ซี โด่เอ่ แจ่ ดี เร๊อ เหล่เอ่เหล่โอ โต่. 20ช๋า, อู เอ๊จว๊า ตาพาแกเฮ๊อ กาฉู่แด่เพรคู เฮ๊อ ปา เบ๊อะเนอ, เหย่ซี เก่ โด่เอ่โด่โอ แลแค ปา.

21“อู เช๊เผ่ เห่อจาเลอ เร๊อ อิเกเซ เด๊อ อา ตียุ๊ย ล๋ายโต่เออ เนอ อา โอ่ เตเพร่ว โต่. อา เก่ เช๊เผ่ ฮู๊เนอ เฮ๊เนอหม่า อิเกเซเออ อา เก่ ท๊อตียุ๊ยกา เร๊อ อา เหล่ ท๊อตียุ๊ย แลยา จว๊าแหล่เล๊อ โป่ เห่อจาเลอเนอ ปา. 22อู ยือโน เทอแยเซ เด๊อ เทอโอพ๊าเลอกู เนอ อา โอ่ เตเพร่ว โต่. ▼

▼เทอโอ เออเนอ อู เม ลู เร๊อ เตมีเตดอ อาพ๊า.

อู เก่ ยือโน ฮู๊เนอ เฮ๊เรอ เทอแย เออเนอ อา เก่ เซเพ๊แก เทอโอพ๊าเลอ เออเตเม ปา. เร๊อ เทอแย เก่ แลโก่แก ลอ ปา. เร๊อ เทอแย อาเซ เออเนอ อู เบ่ ยือโน แพ๊ ลู เด๊อ เทอโอ อาเซกู แพ๊.”

เหย่ซู่ หม่า แกแยยิวพู๊ อา ม๊อเนอโด่ อา แบ่เจ่

(มัทธิว ๑๒:๑-๘, ลูกา ๖:๑-๕)

23เบ๊อะแกแยยิวพู๊ ม๊อเนอโด่ เนอเตอเนอ เบ๊อะเนอ, เหย่ซู่ เร๊อ อา โคเจ่ เต๊เห่ จว๊าโนจว๊าเบ๊ เด๊ออู โบ๊กุลา เพร๊ขุ เต๊เห่. เร๊อ อา โคเจ่ เต๊เห่ อาพร๊าเอ่ จว๊า อู โบ๊กุลาเส่. ^b 24เร๊อ ฟาริสี เต๊เห่ เฮ๊ เหย่ซู่ เน๊อ, “แม๊มอ, เตเม เด๊อ เหย่ซี โตเบ่ เมหนิ โต่ เบ๊อะแกแยยิวพู๊ ม๊อเนอโด่ เออเนอเต๊เห่, เหย่ซี จว๊าเมดื่อ แลแค อาเง ฮู๊เนอ เมเต?”

25เร๊อ อา เฮ๊ฉื่อ เหย่ซี เน๊อ, “เด๊อ เหร่อเค เบ๊อะดาวิด เร๊อ อา โคแบ๊ซว๊า เต๊เห่ แลแด๊เอ่แลแด๊โอ เร๊อ อา โหล่เหล่เอ่เหล่โอ เบ๊อะเนอ, อา เมแคร๋ อิเต เนอ หม่า ซี แด๊น๊อ เกอแหน่ อู โต่ แอ? 26เหย่ซี จว๊าโน แลแค เด๊อ จอแปแหร่ อาหี่กู เร๊อ ค๊อมู เด๊อ อู หลู่แถ่ เร๊อ จอแปแหร่ เต๊เห่ เนอหม่า อา โอ่ เบ๊อะเนอ, เร๊อ เอ่หนิ แพ๊ตื๊อ เพรหลู่แตเนอ เต๊เห่ แพ๊ หม่าแน๊เรอ คูดาวิด เร๊อ อา โคเจ่ เต๊เห่ จว๊าโนพย๊าเอ่ แวเฮ๊โต่? เบ๊อะเนอเค เนอหม่า อาโต เร๊อ อาบีอาธาร์ ทวา เพรหลู่แต กู่กล๊อดุเล๊อ.” ^c

27แบ่เจ่ เหย่ซู่ เฮ๊โป่ เหย่ซี เน๊อ, “แกแย เนอหม่า ม๊อเนอโด่อาเงหม่าโต่, ม๊อเนอโด่ เนอหม่า แกแย ล๋อปลี อาเง. 28แกแยพู๊คู หม่าดื่อ แว เออเนอหม่า ม๊อเนอโด่ อา แบ่เจ่ เจ๊อ เตเพรเฮ๊อ,” อา เฮ๊ฉื่อ เหย่ซี ฮู๊เนอ.