Mark 6

วีนาซาเร็ธ ฮู๊เต๊เห่ หยื่อเอ่ เหย่ซู่ โต่

(มัทธิว ๑๓:๕๓-๕๘, ลูกา ๔:๑๖-๓๐)

1เหย่ซู่ เถ่จว๊าแก อาเหล่โอ่ เบ๊อะเนอ โต๊โผ่, เร๊อ อา โคเจ่ เต๊เห่ กาคยา คยาแซ๊ แลแค เด๊อ อาดอ อาโฉ่ เร๊อดื่อ วีนาซาเร็ธ เนอตีวี. 2เบ๊อะแกแยยิวพู๊ อา ม๊อเนอโด่ เบ๊อะเนอ, เหย่ซู่ เป๊อแถ่ อิซว๊าอี๊แส่ เด๊อ เตจ๊อเบโฮกู. แกแย โอ่โร๊ลู หนิโฮ อา เตอิซว๊าอี๊แส่. เร๊อ อา คย๊าอายื๊อ ลอ เจ๊อ เร๊อ อา เฮ๊ แลแค เนอ.

“อา เตลีแมลีเพ๊ เออเนอ เร๊อ อาเตเม อาโค๊ตีกลี๊ ล๋อ ปลี เออเต๊เห่ เนอหม่า อา จว๊าพย๊าหนิ โต เบ๊อะเตเต? อา เตลีแมลีเพ๊ เด๊อ อา พย๊าหนิ เออเต๊เห่ เนอหม่า เตลีแมลีเพ๊ ฮู๊เต เต๊อเจ่อ เตเต? โทเรอ อา จว๊าเม แจ่ โต อาโค๊ตีกลี๊ เออเต๊เห่ เนอหม่า ฮู๊เตเต? 3อา หม่า เพรเมแจ่หี่ เนอเตเพร แวเฮ๊? เร๊อ อา หม่าโหมะ มารีย์ อาพู๊เพรคู แวเฮ๊? อาโป่ เต๊เห่ เนอหมา คูยากอบ, คูโยเสส, คูยูดาห์, เร๊อ คูซีโมน เออเต๊เห่ หม่า แวเฮ๊? เร๊อ อาโป่เพรเหมาะ เต๊เห่ เนอหมา อา โอ่ แพ๊ เบ๊อะดอกูเออ แพ๊ แวเฮ๊?” เหย่ซี เฮ๊ แลแค ฮู๊เนอเรอ, เหย่ซี ซิเถ่ เหย่ซู่ เร๊อ อาเอ๊โมฉื่อ ลู โต่.

4เร๊อ เหย่ซู่ เฮ๊ เหย่ซี เน๊อ, “แกแย เด๊อ อา เบ่หยื่อเบ่แหน่ เกอเร๊อ เพรโพร โต่ เต๊เห่ เนอหม่า ดื่อแพ๊ อาดอกูพู๊ เร๊อดื่อ, อากลุยอาแล เร๊อดื่อ เร๊อ อา หี่พู๊แพพู๊ เร๊อดื่อ เต๊เห่ แพ๊.” ^a 5เหย่ซี หยื่อเอ่ โต่ อาคยา เหย่ซู่ เมแจ่ ปา อาเตเม อาโค๊ตีกลี๊ เนอเต๊เห่ เตอเจ๋อ โต่, อา เมแจ่ แพ๊ตื๊อ อา แด่แถ่ อากู๊ขุ เด๊อ แกแย ชุ๊ยเช เนอเต๊เห่ อาโอ่ แพ๊, เร๊อ อา เม โอ่เหม่ แกแยชุ๊ยแกแยเช เต๊เห่ งย๊า เตเพร แพ๊. 6ดอพู๊โฉ่พู๊ เต๊เห่ อาหยื่อเอ่ ลู โต่ อาคยา, เหย่ซู่ อาคย๊าอายื๊อ แหน่เจ๊อโต่.

เออโตโพ๊เรอ เหย่ซู่ เถ่จว๊าเล ดอ เด๊อ อา โอ่ ตีวี๊ตาวา เบ๊อะเนอ ตอดอโทตอดอ เร๊อ อิซว๊าอี๊แส่ เป่ อู.

เหย่ซู่ นอเถ่จว๊า อา โคเจ่ เช๊อซิเนอ

(มัทธิว ๑๐:๕-๑๕, ลูกา ๙:๑-๖)

7โทเรอ อา เอ๊แฮ ปล๊อลอ อา โคเจ่ เช๊อซิเนอ เร๊อ อา นอเถ่จว๊า ลู ตู๊หมู่ เร๊อ ซิเนอ ฮู๊เนอ. โทเร๊อ แซ่ฮู๊ เหย่ซี เก่ เหว่เถ่แกเบ๊ โลเน๊ เนอ, อา เด๊อ เป่ เหย่ซี เตอเรอฉว่าชอ.

8เหย่ซู่ แด๊โฉ่จว่าหนิ อา โคเจ่ เต๊เห่ อาโหง่ เน๊อ, “ซี เถ่จว๊าแก เร๊อ พย๊าจว๊าหนิ แต่ เตอเจ๋อ เหม่ นี๋, พย๊าจว๊าหนิ แต่ ค๊อมู, ปยา, เร๊อ พ๊ากอ เออเนอเต๊เห่ แต่เหม่ นี๋ พย๊าหนิ แพ๊ตื๊อ อิแท๊ เนอ แพ๊ นี๋. 9แด๊จว๊าหนิ แลแค แข่แด๊พ๊า เนอ หม่าแน๊เรอ พย๊าจว๊า แต่ จา เนอปือ แต่เหม่ นี๋. 10ซี เก่ จว๊าโน โอ่ เด๊อ หี่ เตเมเม อากู เฮ๊เรอ, ซี เก่ เถ่จว๊า แล เด๊อ ดอ เนอตอดอ อากู ล๋ายโต่ เนอ, ตูรู๊ โอ่ ตื๊อดื่อดื่อ แลแค เบ๊อะเนอ นี๋. 11ดอ ตอดอดอ เด๊อ อา เก่ ซิหยื่อ เอ๊ฉื่อ ซี โต่, โทเรอ อา เก่ หนิดา ซีโหง่ โต่ เฮ๊เรอ เบ๊อะซี เถ่จว๊าแก เบ๊อะเนอ, โซตาแก เห่หมื่อ เด๊อ ซี กู๊โด่ลู เนอเต๊เห่. ซี เก่ เมฮู๊เนอ เฮ๊หม่า อาแซ่เน๊อ ซี ข่าเด๊อะโล แกเออ เร๊อ เตม๊าเตแด เต๊อเจ่อ จอแปแหร่ อา เก่ เมจากาคยา เหย่ซี ปา.” ^b

12อา โคเจ่ เต๊เห่ เถ่จว๊าเล แด๊โฉ่โด่แน เป่ แกแย เต๊เห่ เร๊อ อา โตเบ่ เมเต๊เปล่ แลแค อาซิปล่อ, อา เหล่ แด๊โฉ่ เป่ อู ฮู๊เนอ. 13เหย่ซี เหว่เถ่แกหนิ เอ๊โล โลเน๊ เร๊อ อาโปล่หนิโร๊ลู เร๊อ เป่ แกแยชุ๊ยแกแยเช เต๊เห่ เด๊อ กู่กล๊อ เร๊อ ออลิปหว่า ▼

▼ออลิปหว่า หม่า อาเส่ อาเข่ ตาคย๊า แซ่เน๊อโต๊โฉ่เส่ อาปล่อปีตี๊เล๊อ ตี๊กิ

เทอ เร๊อ อา เมโอ่เหม่ เอ๊ เป ลอ เหย่ซี. ^d

เพรเจเทอ คูยอห์น อาเตเซอ อาคยา

(มัทธิว ๑๔:๑-๑๒, ลูกา ๙:๗-๙)

14เหย่ซู่ อามุย โลเทอโลเก่ อาขว่าอาคยา, คุ๊ยเฮโรด ▼

▼คุ๊ยเฮโรด เออเตเพร เนอหม่า คุ๊ยเฮโรด อาติปา

หนิโฮปา ลอ ล๋อ อา เม เต เนอเต๊เห่ อาขว่าอาคยา, โท๊โต่ แกแย เบ๊อะเนอ เฮ๊ แลแค เน๊อ, “เหย่ซู่ หม่า เพรเจเทอ คูยอห์น อาเซอกาคยาแซ๊ แพ๊, ตื๊อเรอ อา เมแจ่ อาโค๊ตีกลี๊เจ๊อ เนอเต๊เห่ เจ๊อเนอ.” ^f

15เต๊เห่เห่เรอ อา เฮ๊ เน๊อ, “อา หม่า เพรโพร เอลียาห์ แพ๊.”

โท๊โต่ เต๊เห่เห่ อา เฮ๊ เน๊อ, “อา หม่า เพรโพร อาข่อดื่อ เตเพร เด๊อ อาแซ่เน๊อ เพรโพร เด๋อ งย๊าเค อาเกล เตเพร แพ๊.” อา เฮ๊ แลแค ฮู๊เนอ.

16เบ๊อะคุ๊ยเฮโรด หนิโฮ เหย่ซู่ เม อาโค๊ตีกลี๊เจ๊อ เบ๊อะเนอ, อา เฮ๊ เน๊อ, “คูยอห์น เด๊อ แว นอปาตือแก อาแกโบ เร๊อ แว เกลอฮู๊ เนอเตเพร เซอเพร กาคยา คยาแซ๊ เฮ๊อ,” อา เฮ๊ ฮู๊เนอ.

17เด๊อ อาเหร่อเคเนอ หม่า คุ๊ยเฮโรด นอจว๊าปื่อ จอกลอหม่า อาเกลอฮู๊ เต๊เห่ เร๊อ คูยอห์น เร๊อ อา นอด๊อตาแก ลู เด๊อ ทอกู เนอหมา โหมะเฮโรเดียส อาขุคยา เฮ๊อ โหมะเฮโรเดียส หม่า จ๊อแผ่ เฮโรด อาคี, อาโป่คูฟีลิป อาเม เร๊อ คูยอห์น เฮ๊ตาตือ โตโมโม คุ๊ยเฮโรด เนอ อา โต พย๊าหนิ อาโป่ เร๊อคูฟีลิป อาเม โต่. ^g 18คูยอห์น เฮ๊ คุ๊ยเฮโรด เน๊อ, “เน พย๊า คยาแซ๊ เน คีเนอ อาโต เกอปา เร๊อ จอแปแหร่ เตซว๊าเตแส่ โต่ เฮ๊อ.” 19ฮู๊เนอ อาคยาเร๊อ คุ๊ย อาเม โหมะเฮโรเดียส เออเนอ อา ปื่อหม่า ตื๊อดื่อ คูยอห์น เตซื๊อ เร๊อ อา ซิหยื่อ เมเซอแก ลู หม่าแน๊เรอ อา เมแจ่ เตอเจ๋อ โต่. 20เมเตเฮ๊เรอ คุ๊ยเฮโรด เออเนอ อา แม๊ดุ เกอเร๊อ คูยอห์น. เมเตเฮ๊เรอ อา ซิเง เร๊อ อา หม่า แกแย เด๊อ อาจ๊ออาเต อาบูโพ๊ เตเพร อาคยา, อา เตเกบี๊ เมจว่า เกอเร๊อ ลู. เบ๊อะเฮโรด หนิโฮ คูยอห์น เฮ๊เบ่ เบ๊อะเนอ, อา เบ่ยอ แหน่เจ๊อ หม่าแน๊เรอ อา ซิหยื่อ หนิโฮ แหน่ แพ๊ ลู เฮ๊เบ่ แพ๊.

21เบ๊อะคุ๊ยเฮโรด อาม๊อเนอกาโอ่ อาม๊อเนอ แฮโต่เฮ๊อ เบ๊อะเนอ, เบ๊อะแร๊แหน่เจ๊อ เด๊อ โหมะเฮโรเดียส อา เมเซอแก คูยอห์น. คุ๊ย เมป่วย เกอเร๊อ อา อาม๊อเนอกาโอ่ เร๊อ อา เล๊เอ่เล๊โอ เกลอฮู๊ทวาดุ ทวาเต เต๊เห่, เด๊อ เก่ กู่กล๊อ เต๊เห่, เร๊อ แกแย ทวาดุทวาเต เด๊อ กาลิลี เก่กู เนอเต๊เห่. 22เบ๊อะคุ๊ยเฮโรด อาเม โหมะเฮโรเดียส อาพู๊เพรเหมาะ แฮโน ลีเผร่ เบ๊อะเนอ, อา เม ซิปล่อโม ซิปล่อแร๊ เจ๊อ คุ๊ยเฮโรด เร๊อ อาซิเผระ ล๋อ ปลี อาคยา คุ๊ยเฮโรด เฮ๊ เป๊เจ่ เพรเหมาะ เออเนอ เตเพร เน๊อ, “เน ซิหยื่อซิลอ อิเตเนอ แด๊โฉ่ แว, แว เก่ เด๊อ เน.” 23โทเรอ อา อ๊อแล เร๊อ อา เฮ๊เบ่หนิ อาโหง่ เร๊อ อา เตเฮ๊เบ่ ฮู๊เนอ เร๊อ “เน กุย เจ๊อ แว อิเต๋ เบ่เบ่ แว เก่ เด๊อ เน ปา, เน กุย เจ๊อ แวเทอแวเก่ ตากลาเม เจ๊อ เบ่เบ่, แว เด๊อะเบ๊ เน ปา,” อาเฮ๊ลู ฮู๊เนอ.

24เร๊อ เป๊เจ่เพรเหมาะ เนอเตเพร แกล่เถ่ เด๊อ อากลอ เร๊อ แด๊เฮอ อาโหมะ เน๊อ, “โม๋, แว โตเบ่ กุย คุ๊ย อิเตเต?”

“กุย เพรเจเทอ คูยอห์น อา กู่กล๊อเนอ” อาโหมะ เฮ๊ฉื่อ ลู ฮู๊เนอ.

25เร๊อ อา โต๊โปล่ตา ปยา แกล่กาโน คยาแซ๊ เด๊อ คุ๊ย โอ่ เร๊อ “แว ซิหยื่อ นอแด่ โน เน เพรเจเทอ คูยอห์น อากู่กล๊อ เด๊อ ดีเบ กูเนอ เร๊อ แฮเด๊อ เจ๊อ แว กู๊แหน่เออเนอ” อา เฮ๊ ลู ฮู๊เนอ.

26คุ๊ยเนอ อา ซิปล่อโมปาตีกี๋ โต่ หม่าแน๊ เรอ อา อ๊อแลโทเฮ๊อ เด๊อ ซิเผระ ตอกล๊อตูปลู อา เป๊เส่เง เฮ๊อ อาคยา, โหง่ เด๊อ อา อ๊อแล โทเฮ๊อ เนอ พู๊เจ่เพร เหมาะ เออเนอ, อา ซิหยื่อ เมปย๊าแกโต่. 27ฮู๊เนอเรอ โตโพ๊โต อา นอจว๊าพย๊า อาเกลอฮู๊ เพรโอ่ป่อเต เนอเตเพร เร๊อ คูยอห์น อากู่กล๊อ. เร๊อ อาเกลอฮู๊ เออเตเพร จว๊า เด๊อ ด๊อทอกู เร๊อ อา จว๊าปาตือ กา คูยอห์น อาแก่โบ. 28โทเรอ อา แด่โน คูยอห์น อา กู่กล๊อเออ เด๊อ ดีเบ อากู. เร๊อ อา แฮเด๊อ เร๊อ เป๊เจ่เพร เหมาะ เนอเตเพร เร๊อ เป๊เจ่เพร เหมาะ อา เด๊อ เร๊อ อาโหมะ. 29เจเทอ คูยอห์น อา โคเจ่ หนิโฮ เร๊อ เหย่ซี แฮพย๊ากา ลู เหน่กล่อ โอ่แกเออ เร๊อ กา โล๊แก ลู เด๊อ โลขุ.

เหย่ซู่ เล๊เอ่เล๊โอ แกแย เพร แงรี๊

(มัทธิว ๑๔:๑๓-๒๑, ลูกา ๙:๑๐-๑๗, ยอห์น ๖:๑-๑๔)

30เพรเมเตพู๊ กาโอ่ปล๊อ ตาวาลอ เหย่ซู่ เร๊อ เหย่ซี แด๊โฉ่ ลอ ลู เร๊อ ล๋อ เหย่ซี เมโทเฮ๊อ เตเนอเตเห่ อาคยา เร๊อ เหย่ซี อิซว๊าอี๊แส่ เป่ อู เนอเต๊เห่ อาคยา. 31เพร แฮ เด๊อ ลูโอ่ เร๊อ แฮ, เพรกา เร๊อ กา โอ่โหร่โอ่เอ๊ ตาลว๊าซิลือ อาคยา เหย่ซู่ เร๊อ อา โคเจ่ เต๊เห่ เหล่โอ่โก๊ เอ่เล๊โอเล๊ ปา เจ๊อโต่, เร๊อ เหย่ซู่ เฮ๊ อา โคเจ่ เต๊เห่ เน๊อ, “เป จว๊า โหร่ลู เด๊อ เหล่โอ่โส่เคร โต๊โผ่ เด๊อ แกแย โอ่ เตเพร่ว โต่ เนอ เร๊อ เป เก่ โอ่โก๊ เตเบ๊ซิพร๊า เตอ เปลอฮู๊ โป๋.”

32เร๊อ เหย่ซู่ เร๊อ อา โคเจ่ เต๊เห่ จว๊าโน แถ่แด๊หนิ ส่อเกลอ เร๊อ เถ่จว๊าแก แลแค ตื๊อดื่อ เด๊อ เหล่โอ่โส่เคร โต๊โผ่. 33หม่าแน๊เรอ แกแย โอ่โร๊ลู เด๊อ อา แม๊เถอะ เหย่ซี จว๊า เออเนอเต๊เห่, อา ซิเง ตาเต แลแค เฮ๊อ เนอ เหย่ซู่ เร๊อ อา โคเจ่ เต๊เห่ หม่าแหน่เฮ๊อ อาคยา, เด๊อวีกูเนอ ปว๊าวี แกล่จว๊า กู๊โด่ เด๊อ โคขุ เร๊อ แกล่จว๊าโต่ เหร่อ เด๊อ เหย่ซู่ เร๊อ อา โคเจ่ เต๊เห่ อาเบ๊เง. 34เบ๊อะแบ่เจ่ เหย่ซู่ โอ่ เด๊อ ส่อเกลอกู เถ่ เบ๊อะเนอ, อา แม๊เถอะ แกแย ตู๊หมู่ดุ จว๊า โอ่ป่อ หนื่ออื่อ เหร่อ ลอเฮ๊อ เด๊อ เงเฮ๊อ. เร๊อ อา ซิยอ เกอเร๊อ แหน่ เจ๊อ เหย่ซี เจ๊อ, เมเตเฮ๊เรอ แกแย เออเนอเต๊เห่ อาแซ่เน๊อ ซิหมิ. เต๊เห่ เด๊อ เพรเก โอ่ ลู โต่ เนอ อาคยา อา เป๊อแถ่ อิซว๊า เอ๊เป่ แหน่เจ๊อ เหย่ซี. ^h

35เบ๊อะเนอ โตโพ๊ เหมาะเฮ๊ลา เฮ๊อ เร๊อ เหย่ซู่ อา โคเจ่ เต๊เห่ กาโน เด๊อ ลูโอ่ เร๊อ อา แฮเฮ๊ ลู เน๊อ, “เหล่โอ่ เบ๊อะเออโต๊โผ่ หม่า ดอ โอ่ผื่อ ตอด๋อ โต่, โท๊โต่ เหมาะเฮ๊ลา เฮ๊อ. 36แซ่ฮู๊ เหย่ซี เก่ จว๊าเล พรีเอ่พรีโอ เกอเร๊อ แลแค ดื่อ อาเหล่เอ่เหล่โอ อาเงเนอ, เร๊อ นอจว๊าแก มอ เหย่ซี เด๊อ อาดออาโฉ่ เด๊อ อา โอ่ ตีวี๊ตาวา เบ๊อะเออ โต๊โผ่ เนอ.”

37หม่าแน๊เรอ เหย่ซู่ เฮ๊ฉื่อ เหย่ซี เน๊อ, “แม๊ เด๊อะเอ่เด๊อะโอ เป เหย่ซี เต๊อเจ่อเจ่อ เนอ.”

เร๊อ เหย่ซี แด๊เฮอ ลู เน๊อ, “เป เก่ จว๊าพรีเอ่ เป่ เหย่ซี ค๊อมู เร๊อ อาลอ ครือแน เจ๊อ เพรแรเต เตเพร อาเลเก่ เลลุยซว๊า ▼

▼รือหย่า เดนาริอัน เต๊เบ่ หม่า อา ครือแน เร๊อ เตอเนอ อาแรเต คว๊าเก่

เจ๊อ กอกอ. รือหย่า เดนาริอัน โอ่ แพ๊ เนอโจ่ย โต แพ๊ เร๊อ อา จว๊า โป่เอ่โป่โอ เหย่ซี ฮู๊เต?”

38เหย่ซู่ แด๊เฮอ อา โคเจ่ เต๊เห่ เน๊อ, “เด๊อ ซีเกลเนอ ค๊อมู โอ่ บ๊ากลู๊เต? จว๊าแม๊แม๊,” อา เฮ๊ เหย่ซี ฮู๊เนอ ตื๊อหื่อ, เหย่ซี จว๊าแม๊ เร๊อ เหย่ซี แม๊เถอะ แพ๊, “ค๊อมู แงกลู๊ เร๊อ เต๊วฮู๊ เนอเบ่ แพ๊,” เหย่ซี เฮ๊ ลู ฮู๊เนอ.

39โทเรอ เหย่ซู่ นอโอ่แน โอ่ปล๊อ เหย่ซี ตู๊หมู่ เร๊อ ตู๊หมู่ เด๊อ หมิออโซเลขุ. 40เร๊อ เหย่ซี โอ่แนโอ่ปล๊อ ลู ตู๊หมู่ เร๊อ อาเพร แงเชอ เต๊เห่ อาเพร เตเย เต๊เห่. 41เหย่ซู่ พย๊า ค๊อมู แงกลู๊ เร๊อ เตวฮู๊ เนอเบ่เออ เร๊อ อา แม๊แถ่ เด๊อ ม๊อเล เร๊อ อา เฮ๊บุ๊ยเฮ๊เตอเรอ ถู่เซ๊แถ่ จอแปแหร่ เร๊อ บิกยา ค๊อมู. โทเรอ อา เด๊อะตา เด๊อ อา โคเจ่ เต๊เห่ อาโอ่. เร๊อ อา โคเจ่ เต๊เห่ เด๊อะเอ่ แฮเง เป เด๊อ แกแย เนอเต๊เห่. โทเรอ อา ย๊อเก่แก๊กว่า เกอ เต๊วพู๊ เนอเนอเบ่ ฮู๊เนอเนอ. 42เหย่ซี เอ่ โป่เอ่โป่โอ เอ่ก๊อโอบา ลอปลี เจ๊อ ปว๋า เตเพร เจ๊อ. 43อา โคเจ่ เต๊เห่ พย๊าดว้าปล๊อ คยาแซ๊ ค๊อมู เร๊อ เต๊วพู๊ เด๊อ อา บิกยา เร๊อ อา โอ่แกเล๊อ เต๊เห่เนอ อา โอ่บา ปา เจ๊อ เร๊อ ขริเนอ เช๊อเนอเม เจ๊อ. 44เพรคู เด๊ออาดุ เด๊อ อา เอ่ ค๊อมู ล๋อ ปลี เนอหม่า อา โอ่ แกแย เพร แงรี๊.

เหย่ซู่ จว๊า เด๊อ เทอขุ

(มัทธิว ๑๔:๒๒-๓๓, ยอห์น ๖:๑๕-๒๑)

45เหย่ซู่โคเจ่ โถ่ปล๊อ โทโท เน๊อ เหย่ซู่ นอจว๊าโน แถ่แด๊ ลอ อา โคเจ่ เต๊เห่ เด๊อ ส่อเกลอ. เร๊อ อา นอเถ่จว๊า เหร่อแก เหย่ซี เด๊อ วีเบธไซดา เด๊อ อา โอ่ เด๊อ เทออ่อเบ๊เร เนอตีวี. เร๊อ เบ๊อะอา โคเจ่ แถ่แด๊ ส่อเกลอ เบ๊อะเนอ, อา เร๊อ อา ปลวากาแก ลอปลี แกแย ตู๊หมู่ดุ. 46โทเรอ เหย่ซู่ เถ่จว๊าแก เร๊อ อา จว๊าแถ่ จ๊อเบ เด๊อ โฉ่ขุ.

47เบ๊อะเหมาะคี๊โป๊โหล่ แฮ เฮ๊อ เบ๊อะเนอ, อา โคเจ่ เด๊อส่อเกลอ จว๊าโต่ เฮ๊อ เด๊อ เทอ กล๊าเมกู เฮ๊อ หม่าแน๊เรอ เหย่ซู่ โอ่แก ตื๊อดื่อ แพ๊ เด๊อ โคขุ เตเพร แพ๊. 48เหย่ซู่ แม๊เถอะ เร๊อ เก่แลเซ๊ ย๋อ พอแฮดุ ฉื่อ อา โคเจ่ เต๊เห่ อาคยา, เหย่ซี แคฉื่อ เก่แลเซ๊ เร๊อ อา ซิพร๊าแลแด๊ ลอปลี เบ๊อะชาอี๊อู่เตเว เหมาะ เตเร ลีบูเฮ๊อ เบ๊อะเนอ, แบ่เจ่ เหย่ซู่ จว๊า เด๊อ เทอขุ เร๊อ แฮโต เด๊อ อา โคเจ่ เต๊เห่ อา โอ่ อา เตเร จว๊าตาลว๊า เร๊อ อา โคเจ่ เต๊เห่. 49หม่าแน๊เรอ เบ๊อะอา โคเจ่ เต๊เห่ แม๊เถอะ ลู จว๊า เด๊อ เทอขุ เบ๊อะเนอ, เหย่ซี เตเน ลู เร๊อ โลเน๊ เร๊อ อา เอ๊โทเอ๊โม ลอปลี. 50เมเตเฮ๊เรอ เหย่ซี ปว๋า เตเพร แม๊เถอะ ลอปลี ลู เร๊อ ชี๊เช ลอปลี เจ๊อ.

โตโพ๊โต เหย่ซู่ เฮ๊ เหย่ซี เน๊อ, “แด่คือแด่ฮา แลแค ซี ซิปล่อ ชี๊เช แลแค เหม่, เออ หม่า แว แพ๊.” 51โทเรอ อา แถ่โนเกอ เด๊อ อา โคเจ่ เต๊เห่ อา ส่อเกลอกู เร๊อ เก่แลเซ๊ โอ่โก๊แก เร๊อ อา โคเจ่ เต๊เห่ อาคย๊าอายื๊อ ลอปลี เจ๊อ. 52เมเตเฮ๊เรอ เหย่ซี ย๋อ ซิปล่อชอ อาคยา. เหย่ซู่ แด๊โล เป เจ๊อ เหย่ซี เนอ เด๊อะเอ่ อู ค๊อมู อาเตเม อาโค๊ตีกลี๊ เออ เนอ เจ๊อ หม่าแน๊เรอ เหย่ซี ซิเงโปล แลแค โต่.

เหย่ซู่ เมโอ่เหม่ เป แกแยชุ๊ยแกแยเช เด๊อ เยนเนซาเรท เก่

(มัทธิว ๑๔:๓๔-๓๖)

53เหย่ซี จว๊าเบ๊ เฮ๊อ เทออ่อดุเออ เร๊อ อา จว๊าโต่ แลแค เด๊อ วีเยนเนซาเรท เก่ เร๊อ อา จว๊า จุ่ยแถ่โอ่โก๊ แลแค อาส่อเกลอ เบ๊อะเนอ. 54เหย่ซี เถ่ เฮ๊อ เด๊อ ส่อเกลอกู เนอ แกแย เต๊เห่ ซิเงตาเตเนอ แลแค เร๊อ เหย่ซู่ แพ๊. 55เหย่ซี แกล่โทแกล่แล ลอ แลแค เร๊อ อา เป๊อแถ่ แย๊แฮ แลแค แกแยชุ๊ยแกแยเช เต๊เห่ เร๊อ อิจอ เร๊อ แย๊แฮโต แลแค เบ๊อะเหย่ซี หนิโฮ เร๊อ เหย่ซู่ โอ่ เกอเร๊อ เหล่โอ่ เนอโต๊โผะ. 56แบ่เจ่ เหย่ซู่ จว๊าโต เบ๊อะเต๋ โต๊โผ่ เบ่เบ่, อา จว๊า เด๊อ ดอกู เบ่เบ่, อา จว๊า เด๊อ วีกู เบ่เบ่, อา จว๊า เด๊อ วีกลอ เบ่เบ่, เหย่ซี แด่ตา แลแค แกแยชุ๊ยแกแยเช เต๊เห่ เด๊อ เกล๊กู เร๊อ เหย่ซี กุยซิยอ แบ่เจ่ เนอ นอโต่เบ่ แพ๊ เนจาจวาแก เออเนอ เร๊อ เพรชุ๊ย เพรเช เออเนอเต๊เห่ ตี๊กิแพ๊ เร๊อ แกแย เด๊อ อา โต่เบ่ ลู จาจวาแก เต๊เห่เนอ, อา เตชุ๊ยเตเช โอ่เหม่ ลอปลีเจ๊อ.