Mark 13:3-13
เตแป่เตเช เร๊อ เตเมจาเมจือ
(มัทธิว ๒๔:๓-๑๔, ลูกา ๒๑:๗-๑๙)
3เบ๊อะเหย่ซู่ โอ่แนโอ่ เด๊อ โต๊โฉ่โฉ่ขุ เร๊อ อา แม๊จว๊า ช๊าเน๊ เด๊อ เตหลู่แตโฮ โอ่ เบ๊อะเนอ, คูเปโตร, คูยากอบ, คูยอห์น, คูอันดรูว์, แฮ เด๊อ ลูโอ่ เร๊อ แด๊เฮอ ลู เนอ, 4“เน เฮ๊ เออเนอเต๊เห่เนอ อา เก่ ทวาแถ่ เบ๊อะเกเตปา? เบ๊อะล๋อ เตเออเต๊เห่ เตเร ทวาแถ่ โทปลื๊อลอเฮ๊อ ปาเนอ อาทวาแถ่โค๊ตีกลี๊ อาม๊าอาแด เต๊อเจ่อเจ่อ เก่ โอ่โลแถ่ เหร่อ ปา แอ?” 5เหย่ซู่ เฮ๊ เหย่ซี เน๊อ, “รอหนิ แลแค ซีเหน่ เร๊อ แกแย เด๊อ อา เก่ แฮ อี๊ลอแลโฮ ซี ปา เนอเต๊เห่ นี๋. 6แกแย โอ่โร๊ลู เก่ อากลว่าแฮ อาเหน่ แซ่เน๊อ แว เนอ ปา. เร๊อ อา เก่ แด๊กว๊า แลโฮ ลอ เกอเร๊อ แลแค อาเหน่ เน๊อ, ‘แว หม่า ครี๊ เด๊อ อา เมแลเปล๊กา อู เนอเตเพร’ โทเรอ อา เก่ อิลอแลโฮหนิ อาเอ๊แหน่แหน่เจ๊อ อู ปา. 7เบ๊อะซี หนิโฮ อู ช๊าปายเอ่ ลู เด๊อ อาผื่อ เบ่เบ่, ซี หนิโฮ อู แด๊ เป ซี เตช๊าเตปาลู อาหรี่อาแก เด๊อ อายา เต๊เห่เนอ เบ่เบ่, ซิอิเช แลแค แต่เหม่ นี๋. เมเตเฮ๊เรอ ฮู๊เออ เต๊เห่ เนอหมา อา เบ่ ทวาแถ่ แหน่ ปา, หม่าแน๊เรอ เออเนอหม่า เห่ขุ เตเร ตื๊อดื่อ เฮ๊อเนอ หม่าล๋ายโต่. 8เมเตเฮ๊เรอ แกแยเมวเจอะ เร๊อ เมวเจอะ, เทอเก่ เต๊เก่ เร๊อ เต๊เก่ช่ายปายเอ่ ลู ปา. เตเน่วท๊อดี เต๊เห่ อา โอ่แถ่โท โอ่แถ่แล ลอปลี เด๊อ เห่ขุเออ โต๊โผ่ โท โต๊โผ่ ปา. โอ่วีโอ่กอ อา โอ่แถ่ ปา. เตทวาแถ่ เออเต๊เห่ เนอหมา หม่าปาแพ๊ เตจาเตจือ อา แกช๊าแกแร เด๊อ อาแซ่เน๊อ เพรเหมาะ เตเร พู๊โอ่ อาเชฮ๊อเนอ อาตื๊อเช ปาแพ๊. 9“ซี เบ่ รอหนิ แลแค ซีเหน่. เด๊อ แวขว่าแวคยา เร๊อ อู อา ปื่อ ซี ปา, เร๊อ อู เก่ ซูแถ่ ซี เด๊อ เพรเฮ๊เบ่เมโตเต เด๊อ ทวาดุทวาเต เต๊เห่ อา เป๊เส่เง ปา. อู เก่ มือปอ ซี เด๊อ เตจ๊อเบโฮกู ปา. ซี เบ่ ก๊อถ่อโอ่ เด๊อ เพรเป๊อเต เต๊เห่ เร๊อ จ๊อแผ่ เต๊เห่ อาเป๊เส่เง ปา. เร๊อ อา เก่ แด๊เฮอ เจแม๊ ซี ปา เร๊อ ซี เก่ ข่าเฮ๊โล หนิเป่ เหย่ซี เร๊อ เตซิครือมีลา อาหรี่อาแก ปา. a 10หม่าแน๊เรอ เบ๊อะเห่ขุ ตื๊อดื่อ แต่ล๋ายโต่ เออ เบ๊อะเนอ, ซี โตเบ่ จว๊า แด๊โฉ่โล เป แกแยปว๊าเมว ปว๋า เต๊อเจ่อ เร๊อ เตซิครือมีลา อาหรี่อาแก. 11อู ปื่อซูแถ่ ซี เด๊อ คุ๊ยหี่ บ๊อเกเต๋ เบ่เบ่, ซี โตเบ่ เฮ๊เบ่ ฮู๊เต ฮู๊เตเนอ เบ่ยอหนื่ออื่อ เหร่อ แต่ แลแค เหม่ นี๋. เมเตเฮ๊เรอ เบ๊อะแฮโต่ ปา เร๊อ ซี เก่ เฮ๊เบ่ ตื๊อดื่อ หม่าโต่, แหย่โยบูโพ๊ แบ่เจ่ อา แด๊โฉ่ เมจว่า ดื่อ ซี ปา. 12– 13“เบ๊อะเบอ ปาเนอ, โป่ เก่ นอเมเซอ หนิเร๊อดื่อ อาแหม่ เร๊อ อูโร ปา, เร๊อ แหม่ เก่ นอเมเซอ หนิเร๊อดื่อ อาโป่ เร๊อ อูโร ปา, เพ เก่ นอเมเซอ เร๊อดื่อ อาพู๊ เร๊อ อูโร ปา, พู๊ เต๊เห่ อา วื๊อ กาคยาฉื่อ เกอเร๊อดื่อ อาโหมะอาเพ เต๊เห่ ปา, เร๊อ อา เก่ นอเมเซอ เกอเร๊อดื่อ อู เร๊อ อาโหมะอาเพ เต๊เห่ปา. เด๊อ แวขว่าแวคยา เร๊อ แกแย ปว๋า เตเพร เก่ ซิเถ่ ลอ ซี ปา. หม่าแน๊เรอ แกแย เด๊อ อา ก๊อถ่อโอ่หม่า โอ่แตแนแร๊ เด๊อ อา เตหยื่อเตแหน่ อากู โต่เด๊อ อาตื๊อดื่อ เต๊เห่เนอ จอแปแหร่ เก่ เมแลเปล๊กา เหย่ซี ปา.” b
Copyright information for
EkySCThai