Mar 15:33-41 | EkySCThai | STEP | เป๊อแถ่ เบ๊อะเหมาะโถ่ จ๊อราเน๊ เนอ เร๊อ อา โต่แฮ เด๊อ เหมาะกุ่ยตาแล โซมือ อากูเนอ เก่ คี๊ตื๊อรื๊อ ตาลอ เจ๊อ เต๊เก่เล เจ๊อ.

Mark 15:33-41

เหย่ซู่ เซอ

(มัทธิว ๒๗:๔๕-๕๖, ลูกา ๒๓:๔๔-๔๙, ยอห์น ๑๙:๒๘-๓๐)

33 เป๊อแถ่ เบ๊อะเหมาะโถ่ จ๊อราเน๊ เนอ เร๊อ อา โต่แฮ เด๊อ เหมาะกุ่ยตาแล โซมือ อากูเนอ เก่ คี๊ตื๊อรื๊อ ตาลอ เจ๊อ เต๊เก่เล เจ๊อ. 34 เบ๊อะเหมาะกุ่ยตาแล โซมือ เบ่เฮ๊อ เบ๊อะเนอ, เหย่ซู่ จ่าเพรอ เอ๊โทแถ่ เน๊อ, “เอโลอี, เอโลอี, ลามา สะบัก ธานี,” อาโหง่แลช๊า หม่า “แว จอแปแหร่, แว จอแปแหร่, เน วีแก แว เมเต?” ^a

35 แกแย ก๊อถ่อโอ่ เบ๊อะเนอ เต๊เห่ หนิโฮ แลแค เหย่ซู่ เอ๊โทแถ่ ฮู๊เออ เร๊อ เหย่ซี เฮ๊ แลแค เน๊อ, “หนิดา แลแค, อา เอ๊โทแถ่เฮ๊อ เพรโพร เอลียาห์เฮ๊อ.”

36 เร๊อ เด๊อ เหย่ซีเกลเนอ แกแย โอ่ เตเพร เร๊อ อา แกล่จว๊าพย๊า เตเต๊อเจ่อ เด๊อ อาแซ่เน๊อ แตแพ๊ปย๊า เร๊อ อา จว๊าเจโน เด๊อ เทอแยฉ่า โซกู เร๊อ อา จอกลอ หม่า เด๊อ เหว่เคอ เร๊อ อา โต๊โหล่แถ่ นอจุ๊ยโอ เร๊อ แบ่เจ่ เหย่ซู่ เร๊อ อา เฮ๊ แลแค เน๊อ, “เป โอ่ป่อแม๊แม๊ โก๊หลื่อ เตอเปลอฮู๊ โป๊, หม่า เป แม๊เถอะ ช๊าเหล่ เพรโพร เอลียาห์ เก่ แฮพย๊าตาแก อา เด๊อ อี๊ถื่อดีเต่ลู เนอปา แอ.” ^b

37 เร๊อ เหย่ซู่ เอ๊โท พราฉว่า โทเรอ อาเซ๊ปลื๊อ ซิปล่อ เซอ เพร เถ่จว๊าแก.

38 เร๊อ อิเกบ่าดุ เด๊อ อู จ่อตาตือบี๊ เด๊อ เตหลู่แตโฮกู เนอต๊าบ่า แลยา เด๊ออาขุตาแล ปลื๊อแก เนอกยา. ^c 39 เบ๊อะโรมัน เกลอฮู๊เตเย กู่กล๊อ เออเตเพร ก๊อถ่อโอ่ เบ๊อะอี๊ถื่อดีเต่ลู เบ๊เง เบ๊อะเนอ, อา แม๊เถอะ เหย่ซู่ อาเซอ เมฮู๊เนอ เร๊อ อา เฮ๊ เน๊อ, “แกแย เออเตเพร หม่า จอแปแหร่ อาพู๊คู หม่าแหน่ แหน่เฮ๊อ!” อา เฮ๊ ฮู๊เนอ.

40 เพรเหมาะ เด๊อ อา ก๊อถ่อโอ่ แม๊จว๊าจู เด๊อ อายา เออเต๊เห่ อาเกลเนอ, มักดาลา ดอกูโหมะ เหมาะมารีย์, เร๊อ คูยากอบ เด๊อ อา พู๊เจ่เล๊อ เร๊อ คูโยเสส อาโหมะ โหมะมารีย์, เร๊อ เหมาะสะโลเม โอ่เตอเกอ เบ๊อะเนอ. ^d 41 เพรเหมาะ เออเต๊เห่ หม่า เบ๊อะเหย่ซู่ โอ่ เด๊อ กาลิลีเก่ เบ๊อะเนอ, อา กอครวา เหย่ซู่ เด๊อคยา เร๊อ อา เมจว่าเกอ เป เตเด๊อ เหย่ซู่ โหล่ เต๊เห่. เพรเหมาะ อาโร เต๊เห่ เด๊อ อา โอ่ แลแค เด๊อ วีเยรูซาเล็ม เร๊อ อา ครวาแฮ เต่อเกอ เร๊อ แบ่เจ่ เต๊เห่เนอ อา โอ่เต่อ เกอโร๊ลู เบ๊อะเนอ.