Mark 15:6-20
(มัทธิว ๒๗:๑๕-๒๖, ลูกา ๒๓:๑๓-๒๕, ยอห์น ๑๘:๓๙-๑๙:๑๖)
6คุ๊ยปีลาต อาเหล่โกล โอ่ เร๊อ ปว๊าหน่าหน๋า ป่วยเตจว๊าตาลว๊า ดา เบ่ เฮ๊อเฮ๊เนอ, อู เก่ กุย ลู เร๊อ อา เก่ ปลวาเถ่ เป แกแยมู๊แหม่ เด๊อ อู ด๊อตา เหย่ซี เด๊อ ทอกู เบ๊อะเต๋ เตเพร เบ่เบ่เนอ, อา ปลวาเถ่ เป อู แพ๊. 7เบ๊อะเบอ แกแย เด๊อ อาช๊าฉื่อ เมตอปล่อตือซือ แลแค เร๊อ อา เมเซอ แกแย เต๊เห่เนอ, อู ด๊อตาโอ่ แลแค เหย่ซี เด๊อ ทอกู. แกแย ตา เด๊อ ทอกู เออเต๊เห่ อาเกลเนอ เตเพรเนอ มุย เร๊อ คูบารับบัส เฮ๊เออเตเพรเนอ อา โอ่ป่าเต่อเกอ เบ๊อะเหย่ ซีเกล เนอ. 8เร๊อ แกแย โอ่โร๊ลู แฮ แลแค เด๊อ คุ๊ยปีลาต อา โอ่ เร๊อ แฮกุย ลู ฮู๊ อาเหล่โกล เม เป่ โทเฮ๊อ เหย่ซี เนอ. 9เร๊อ คุ๊ยปีลาต แด๊เฮอฉื่อ เหย่ซี เน๊อ, “แว ปลวาเถ่ เป ซี แกแยยิวพู๊ อาคุ๊ยดุ เออเตเพร หม่า ซี ซิปล่อ โอ่ แอ?” 10เมเตเฮ๊เรอ คุ๊ยปีลาต ซิเง เร๊อ เพรหลู่แต ทวาดุทวาเต เต๊เห่เนอ, อา ซิเคว๊ หนิเกอ เหย่ซู่ เร๊อ เหย่ซี แฮ เด๊อะตาแก เหย่ซู่ เด๊อ ลูโอ่ แพ๊. 11หม่าแน๊เรอ เพรหลู่แต ทวาดุทวาเต เต๊เห่เนอ อา จว๊านอฉว่า แกแย ตู๊หมู่ดุ อา กุยแถ่ คุ๊ย เร๊อ อา เก่ ปลวาเถ่ เป เหย่ซี เด๊อ คูบารับบัส, ปลวาเถ่ เป่ เป เหย่ซู่ แต่หม่, อา จว๊าเฮ๊ ลออู ฮู๊เนอ. 12คุ๊ยปีลาต แด๊เฮอโป่ แกแย ตู๊หมู่ดุ เออเต๊เห่ เน๊อ, “เก่ เมฮู๊เนอเรอ แกแย เด๊อ ซี เอ๊ อา เร๊อ แกแยยิวพู๊ เต๊เห่ อาคุ๊ย เออเตเพร เนอเล๊ แว โตเบ่ เม เกอ เร๊อ ลู ฮู๊เต?” 13เร๊อ เหย่ซี เอ๊โทแถ่ โป่ แลแค เน๊อ, “มือเซอแถ่แก อา เด๊อ อี๊ถื่อดีเต่ลู เนอ!” 14เร๊อ คุ๊ยปีลาต แด๊เฮอ เหย่ซี เน๊อ, “จว๊า มือเซอแถ่แก อา เมเต? อา จว๊า เมซื๊อเมปล๊า แคร๋ อิเต?” อา แด๊เฮอ เหย่ ซี ฮู๊เนอ หม่าแน๊เรอ เหย่ซี ลื๋อ เอ๊โทแถ่ฉว่า เล๊อ โป่ เน๊อ, “มือเซอแถ่แก อา เด๊อ อี๊ถื่อดีเต่ลู เนอ!” 15เร๊อ คุ๊ยปีลาต ซิหยื่อ ครวาเมเกอ ฮู๊ แกแย ตู๊หมู่ดุ อา เตซิหยื่อ เนอ เร๊อ อา ปลวาเถ่แก เป เหย่ซี คูบารับบัส, เร๊อ คุ๊ยปีลาต นอ เกลอฮู๊ เต๊เห่ จ่าเพรอปลี๊ แลแค เหย่ซู่ เร๊อ สู่เปล่ออิปลี๊, โทเรอ อา เด๊อะตาแก เหย่ซู่ เด๊อ เกลอฮู๊ เต๊เห่ อา กู่ยากู เด๊อ เหย่ซี เก่ จว๊า มือเซอแถ่แก ลู เด๊อ อี๊ถื่อลู.เกลอฮู๊ เต๊เห่ เมล๊าเมเล งยาโคร เหย่ซู่
(มัทธิว ๒๗:๒๗-๓๐, ยอห์น ๑๙:๒-๓)
16เกลอฮู๊ เต๊เห่ เอ๊จว๊า เหย่ซู่ เด๊อ คุ๊ยปีลาต โฮกู เหล่โอ่ โต๊โผะ. (เหล่โอ่ เนอโต๊โผะ หม่า อู เอ๊ เร๊อ ปรีโทเรียม) โทเรอ เหย่ซี เอ๊แฮปล๊อ ลอ โป่ เกลอฮู๊ เด๊อ อาโร เต๊เห่. 17เหย่ซี เมล๊าเมเล งยาโคร แลแค เหย่ซู่ เร๊อ แซ๊แถ่ เป ลู จาแจจวา เต๊เผ่ล๊อซอ ตือปื่อ. โทเรอ เหย่ซี อี๊ขุ ตาวา ส่อแช๊เหมาะ แซ่เน๊อ กู๊โก่ เนอเรอ อา โก่แถ่ เป ลู. 18โทเรอ เหย่ซี เม ลู ฮู๊ อา เบ่หยื่อเบ่แหน่ค๊าโข่บย่าแพ๊ ลู เนอ เร๊ออา เฮ๊โตโมจู๊แก่ ลู เน๊อ, “เก๋อ, ยูดาห์ อาคุ๊ยดุ, โอ่เซอ เพร ม๊อเนอ ทูดื่อ นี๋!” 19เหย่ซี มือ ลูกู่กล๊อ เร๊อ อิแท๊, ถู่ปล๊า ลู, แฮ แด๊งือแล เด๊อ ลูเป๊เส่เง เตเพร โท เตเพร, เร๊อ อา เมโตโมจูแก่ ลู ฮู๊ อา เบ่หยื่อเบ่แหน่ ลู เนอ เร๊อ อา แฮจ๊อเบ โก๊นีโก๊โหนะ ลู เตเพร โท เตเพร. 20เบ๊อะเหย่ซี เมล๊าเมเล งยาโครโทเฮ๊อ ลู เนอ เหย่ซี โปล๊ตาแก คยาแซ๊ จาแจจวา เต๊เผ่ล๊อซอ เนอตือปือ เร๊อ อา แซ๊แถ่ เต๊เปล่ เป คยาแซ๊ ลู เร๊อ อาจา เร๊อดื่อ เนอตือปือ. เหย่ซี เอ๊เถ่จว๊าแก ลู เร๊อ อา เก่ จว๊า มือเซอ แถ่แก ลู เด๊อ อี๊ถื่อดีเต่ลู.
Copyright information for
EkySCThai