‏ Mark 4

โหง่ค๊าโข่ เด๊อ เพร เว๊อตา เตกลุย คยา

(มัทธิว ๑๓:๑-๙, ลูกา ๘:๔-๘)

1เหย่ซู่ เป๊อแถ่ อิซว๊า โป่ เป่ อู เด๊อ เทออ่อดุทือ เร๊อ แกแย แฮโอ่ ตาวาปลูตาวาเผ่ ลอ อา อาขว่าอาคยา, อา โน โอ่แน โอ่ เด๊อ ส่อเกลอกู เร๊อ ล๋อ แกแย เนอเต๊เห่ อา โอ่ แลแค เด๊อ เทอทือ. ^a 2เหย่ซู่ อิซว๊าอี๊แส่ เหย่ซี เร๊อ โหง่ค๊าโข่ เอ๊แหน่เจ๊อ. เบ๊อะอา อิซว๊า เหย่ซี เบ๊อะเนอ, อา เฮ๊ เน๊อ, 3“หนิดา ตาเต แลแค! เบ๊อะเนอโตโพ๊, แกแย โอ่ เตเพร, อา แฮเว๊อตา เตกลุยเตลุ๊ย. 4เบ๊อะอา เว๊อตา เบ๊อะเนอ, เตกลุย เต๊เห่เห่เนอ, อาแล ตาโต เด๊อ แกล๊เดกู เร๊อ ถู แฮ อิโพเอ่ แก ลอ แพ๊, 5เตกลุย เต๊เห่เห่เนอ อา แล ตาโต เด๊อ หล่อเกล เห่พ๊าบือขุ, เร๊อ เห่ ย๋อ พ๊าบือ อาคยา, อา แด๊แถ่ แพรลิ่วแพ๊. 6เร๊ออาหรุ่ย ย๋อ ตาแย โต่ อาคยา, เบ๊อะต๊อเหมาะแถ่ เร๊อ อา ช๊ากู่โน๊ อาเหมาะ เด๊อ อาแด๊ ต๊าหม่าแถ่ เบ๊อะเนอ, อา เซอคราแก แพ๊. 7เตกลุย เต๊เห่เห่เนอ อาแล ตาโต เด๊อ ส่อแช๊ส่อกิเกล เร๊อ ส่อแช๊เหมาะ เออเต๊เห่ ดุแถ่ แค๊บี๊ ลอปลี ลู เร๊อ อาเส่เถ่เบ๊ ตอปล๋อโต่. 8เตกลุย เต๊เห่เห่เนอ อา แล ตาโต เด๊อ เห่หย่ารีหย่าแร๊ขุ เร๊อ อา เพ๊แถ่ดุแถ่เบ๊ เร๊อ อาเส่เถ่ หนิเอ๊ แหน่ เจ๊อ ปุ๊ยโซเชอ เต๊เห่, ปุ๊ย เชอโซซว๊า เต๊เห่, ปุ๊ย เตเย เต๊เห่ เจ๊อ.”

9โทเรอ อา เฮ๊ เน๊อ, “แกแย เด๊อ อากู๊หลิโก่ โอ่ เต๊เห่เนอ, นอ หนิดา แลแค เหย่ซี.”

(มัทธิว ๑๓:๑๐-๑๗, ลูกา ๘:๙-๑๐)

10เบ๊อะเหย่ซู่ โอ่ ตื๊อดื่อ เร๊อ อา โคเจ่ เช๊อซิเนอ เนอ เร๊อ แกแย เด๊อ อา ครอครวา ลูคยา เต๊เห่ เบ๊อะเนอ, เหย่ซี แด๊เฮอ เหย่ซู่ เร๊อ โหง่ค๊าโข่ โหง่แลช๊า เออเนอ. 11เร๊อ เหย่ซู่ เฮ๊ฉื่อ เหย่ซี เน๊อ, “จอแปแหร่ เด๊อะซิเงโปล เป่เฮ๊อ ซี เร๊อ อา เทอเก่กู อา เตซิคว๊าซิเง เด๊อ อา ด๊อโอ๊ด๊อบี๊ เกอเร๊อ เออเต๊เห่ เฮ๊อ หม่าแน๊เรอ แกแย เด๊อ อาโร เต๊เห่ อาเงเน๊อ, 12‘เหย่ซี แม๊ โท แม๊ แซ๊แซ๊ เจ๊อ หม่าแน๊เรอ แซ่ฮู๊ เหย่ซี แม๊เถอะ เกออู โต่, เหย่ซี หนิดา โท หนิดา แซ๊แซ๊ เจ๊อ หม่าแน๊เรอ แซ่ฮู๊ เหย่ซี ซิเงโปล เกออู โต่,’ อาเงเนอ, แว เฮ๊ เป่ เหย่ ซี เร๊อ โหง่ค๊าโข่ แพ๊ แว เก่ เฮ๊เบ่ เป่ เหย่ซี เร๊อ โหง่ค๊าโข่ โต่ เฮ๊เนอ,

‘ปาหม่า เหย่ซี เม เต๊เปล่ แลแค อา ซิปล่อ เร๊อ จอแปแหร่ ปลวาแก เหย่ซี เตซื๊อ เห่.’” ^b

(มัทธิว ๑๓:๑๘-๒๓, ลูกา ๘:๑๑-๑๕)

13เร๊อ เหย่ซู่ ซิพรวา เหย่ซี เน๊อ, “โหง่ค๊าโข่เออ, ซี เก่ ซิเงโปล โต่ เฮ๊เรอ, ซี จว๊า ซิเงโปล แจ่ ล๋อ โหง่ค๊าโข่ เด๊อ แว เฮ๊ เออเนอ เต๊เห่ ฮู๊เต? 14แกแย เด๊อ อา เว๊อตา เตกลุย อาโหง่แลช๊า หม่าเฮ๊อ แกแย เด๊อ อา เว๊อตา จอแปแหร่ อาลาอาโหง่ เนอ เฮ๊อ. 15แกแย เต๊เห่เห่เนอ, อาแซ่เร๊อ เตกลุย ตาโต เด๊อ แกล๊เดกู เนอเต๊เห่. เหย่ซี หนิโฮ จอแปแหร่ อาลาอาโหง่ เร๊อ โตโพ๊โต โลเน๊ กู่กล๊อ แฮพย๊า ตาพาเผ่แก จอแปแหร่ อาลาอาโหง่ เด๊อ เหย่ซี ซิปล่อกู เนอเต๊เห่. 16เด๊อ อาโร เต๊เห่เห่ เกอลาติ เร๊อ อาแซ่เน๊อ อู เว๊อตา เตกลุย เด๊อ หล่อเกล เห่พ๊าบือขุ เนอเต๊เห่เฮ๊อ. เหย่ซี หนิโฮ โตโพ๊โต อา ซิครือซิลอ พย๊าฉื่อ เจ๊อ. 17หม่าแน๊เรออาหรุ่ย ย๋อ ตาแย โต่ อาขว่าอาคยา, อา เซอเพร เตอเปลอฮู๊ แพ๊. อา หยื่อเอ่ จอแปแหร่ อาลาอาโหง่ หม่าแน๊เรอ เบ๊อะเตจาเตจือ เตมู๊แหม่รีแจ่ กา เบ่ เหย่ซี เบ๊อะเนอ, โตโพ๊โต อาซิปล่อ ลูจว๊าโค๊แก เร๊อ อา แลคื๊อ แก คยาแซ๊ แพ๊. 18เต๊เห่เห่เนอ อาแซ่เน๊อ เตกลุย ตาโต เด๊อ ส่อแช๊ส่อกิเกล เนอเต๊เห่ เฮ๊อ. เหย่ซี หนิโฮ จอแปแหร่ อาลาโหง่ เต๊อเด่อ เรอ, 19เหย่ซี ย๋อ เบ่กู่เบ่แก เกอเร๊อ เนอ อา เตโอ่เซอเพร. โทเรอ อา ย๋อ ซิหยื่อ ดุแหย่แถ่เซ แลแค อาคยา, เหย่ซี อาเตซิหยื่อ เออเนอ อา แลโฮ หนิเร๊อเฮ๊อ เหย่ซี เฮ๊อ. เหย่ซี ซิหยื่อ เตเต๊อเจ่อ โท เต๊อเจ่อ. เร๊อ อา เตซิหยื่อ เออเนอเต๊เห่ อา แค๊ปลื่อแถ่บี๊แก ลอเฮ๊อ ลู. เร๊อ อาเส่อาโพ เถ่เบ๊ ปาโต่เฮ๊อ. 20แกแย เต๊เห่เห่เนอ อาแซ่เน๊อ เตกลุย ตาโต เด๊อ เห่หย่ารีหย่าแร๊ขุ เนอเต๊เห่เฮ๊อ. เหย่ซี หนิโฮ จอแปแหร่ อาลาอาโหง่ เร๊อ อา หยื่อเอ่ เร๊อ อาเส่เถ่เบ๊ โอเอ๊ เล๊อลอ เจ๊อ ปุ๊ย โซเชอ เต๊เห่ ปุ๊ย เชอโซซว๊า เต๊เห่, ปุ๊ย เตเย เต๊เห่ ฮู๊เนอ เจ๊อ.”

เฮ๊ค๊าโข่โหง่ เร๊อ หมิเค๊วกอ อาคยา

(ลูกา ๘:๑๖-๑๘)

21โทเรอ เหย่ซู่ เฮ๊ เหย่ซี เน๊อ, “ซี พย๊าโน หมิเค๊วกอ เด๊อ หี่ด๊อกู เร๊อ ซี โนแด่ อา เด๊อ โจเล แอ? หม่าโต่เรอ หม่า ซี โนแด่ อา เด๊อ เหล่โต่ เล แอ? ซี แด่แถ่ อา เด๊อ หมิเคว๊กอ เหร่ ขุเฮ๊? ^c 22ล๋อ เต เมโอ๊เมบี๊ เต๊เห่เนอ, อู เก่ พย๊าเถ่โล ลอ อา ปา. ล๋อ เต เด๊อ อู ซิเงโปล โต่ กู๊แหน่เออ เต๊เห่เนอ, อู เก่ ซิเงโปล ลอ อา ช๋า เนอปา. ^d 23เต เด๊อ ซี หนิโฮ อา กู๊แหน่เออ เต๊เห่เนอ ซี โต หนิดา ตา เต เกอ อา.”

24โทเรอ อา เฮ๊ โป่ เหย่ซี เน๊อ, “หนิดา ตาเต แลแค แว เตเฮ๊เบ่เออ. เน เก่ หนิดา ตาเต เฮ๊อเนอหม่า, จอแปแหร่ อา เด๊อ เน เตซิเงโปล ปา, โท๊โต่ อา เก่ นอซิเง เอ๊แถ่ เล๊อลอ โป่ เจ๊อ เน ปา. ^e 25แกแย เด๊อ อาเตโอ่เลอ เจ๊อเฮ๊อ บ๋า เต เบ่เบ่, อู ลื๊อเด๊อะ เอ๊แถ่ โป่ เจ๊อ ลู ปา. หม่าแน๊เรอ แกแย เด๊อ อาเต โอ่ โต่ เตเพรเนอ, อาเต โอ่แพ๊ ตี๊กิแพ๊ เบ่เบ่, อู เก่ พย๊าเผ่แกเผ่ ลอ โป่ ลูเต่ ปา.” ^f

เฮ๊ค๊าโข่โหง่ เร๊อ เตกลุย แด๊แถ่ อา คยา

26เหย่ซู่ เฮ๊ โป่ เน๊อ, “จอแปแหร่ อาเทออาเก่กู อาแซ่เน๊อ แกแย เตเพร เว๊อตา เตกลุยเตลุ๊ย เด๊อ เห่ขุ เนอ. 27เหมาะคี๊ เร๊อ โอ่เมอ, เหมาะลี เร๊อ ก๊อถ่อ, เหมาะคี๊ เร๊อ โอ่เมอ, เหมาะลี เร๊อ ก๊อถ่อ, อา เม แพ๊ ฮู๊เนอ เร๊อ เตกลุยเออ อา เพ๊แถ่ ดุแถ่ ฮู๊เตเนอ อา ซิเงแหน่ เตอเจ๋อ โต่. 28เห่ขุ อาเด๊อะดุแถ่ หนิเร๊อดื่อ อาเต แพ๊. อาเหมาะ ต๊าหม่าแถ่ เหร่อเล๊อ โทเรอ อาแปล เถ่เนอ, เร๊อ อาเส่ บากอเนอ เด๊อ คยาเล๊อ แพ๊. 29อาเส่ มี แฮ เฮ๊อเฮ๊อเนอ อา จว๊า เก๊ หนิเร๊อ อาเตเส่เตโพ เออ เร๊อ เตเจ, เมเตเฮ๊เรอ เก๊โบ๊ เบ๊อะแฮโต่เฮ๊อ.” ^g

เฮ๊ค๊าโข่โหง่ เร๊อ เต๊เปล่ปล่อ อาหรี่อาแก คยา

(มัทธิว ๑๓:๓๑-๓๒, ลูกา ๑๓:๑๘-๑๙)

30เหย่ซู่ เฮ๊ เน๊อ, “จอแปแหร่ อาเทออาเก่ เออเนอ เป เก่ ดี๊เจ แบ๊บือ แจ่ เป่ อู ฮู๊เต? หม่าโต่เรอ เป เก่ ดี๊เจ แด๊โล แจ่ เป อู เร๊อ โหง่ค๊าโข่ ฮู๊เต? 31จอแปแหร่ อาเทออาเก่ เนอหมา อาแซ่เน๊อ เต๊เปล่ ปล่อ เนอ. เบ๊อะอู เว๊อตา เต๊เปล่ ปล่อ เด๊อ เห่ขุ เบ๊อะเนอ, เด๊อ เต กลุยเตลุ๊ย ล๋อ ปลี อาเกลเนอ เต๊เปล่ปล่อ หม่า อา เปตี๊เล๊อ อู เจ๊อ. 32หม่าแน๊เรอ อู เว๊อตา โทเรอ อา แด๊แถ่ เฮ๊อ เบ๊อะเนอ, เด๊อ ส่อตอเหมาะ, อิซุ๊ยดอแบ๊เหล่เหมาะ อาเกลเนอ อาดุเล๊อ อาโค, อา เหมาะอาแพดุแถ่ โตโฮ๊แถ่ เล๊ออาโคเนอ เร๊อ ถูฮู๊ โหย่ฮู๊ เต๊เห่ แฮเม แลแค อาปุย เด๊อ อาแพ เต๊เห่ ลู เจ๊อ.”

(มัทธิว ๑๓:๓๔-๓๕)

33เบ๊อะเหย่ซู่ แด๊โฉ่โด่แน เป่ อู เร๊อ จอแปแหร่ อาลาอาโหง่ เบ๊อะเนอ, อา โด่แน โนเต่อ เป่ อู เร๊อ โหง่ค๊าโข่ เต๊เห่ แซ่ฮู๊ อู เก่ ซิเงโปลเบ๊ แร๊ เนอเรอ เอ๊ตี๊กิ อา โด่แน เป่ อู ฮู๊เนอ. 34เบ๊อะอา อิซว๊า เร๊อ แกแย โอ่โหร่ เบ๊อะเนอ, อา เฮ๊ เบ่ เป่ เหย่ซี เร๊อ โหง่ค๊าโข่ ปว๋า โตโพ๊เจ๊อ. หม่าแน๊เรอ เบ๊อะอา โอ่ ตื๊อดื่อ เร๊อ อา โคเจ่ เต๊เห่ เบ๊อะเนอ, อา แด๊โฉ่โล ปวา เป่ ลอ เหย่ซี ล๋อ โหง่ค๊าโข่ อาโหง่แลช๊า เนอ เต๊เห่.

เหย่ซู่ นอโอ่โก๊ เก่แลเซ๊ดุ

(มัทธิว ๘:๒๓-๒๗, ลูกา ๘:๒๒-๒๕)

35เบ๊อะเนอเตอเนอ เฮ๊อ, เบ๊อะเหมาะเฮ๊เหมาะตา เฮ๊อ เบ๊อะเนอ, เหย่ซู่ เฮ๊ เหย่ซี เน๊อ, “เป เก่ จว๊า เด๊อ เทออ่อ เบ๊เร ตากยา โป๋.” 36เร๊อ เหย่ซี เถ่จว๊า โค๊แก เร๊อ แกแย ตู๊หมู่ดุ. เร๊อ เหย่ซู่ อา โคเจ่ เต๊เห่ จว๊าโน เด๊อ เหย่ซู่ โอ่แนโอ่ เด๊อ ส่อเกลอ เนอเต๊เบ่ อากู เร๊อ เหย่ซี เถ่จว๊าโหร่ ลอ ลู. ส่อเกลอ เด๊อ อาโร ครวาจว๊าเกอ เต๊เห่. 37เก่แลเซ๊ พอกาฉว่า เร๊อ เทอฮ๊าโฮ๊ โน เด๊อ ส่อเกลอกู เร๊อ เทอ เตเร แถ่บา เด๊อ ส่อเกลอกู เจ๊อ. 38หม่าแน๊เรอ เหย่ซู่ โอ่เมอโก่ เร๊อ มว๊า เตเม เด๊อ ส่อเกลอแลแม ตากยา. เร๊อ เหย่ซี จว๊า ถู่แร ก๊อถ่อ ลู เร๊อ อา เฮ๊ ลู เน๊อ, “เก๋อ ซ๊าร๊า, เป่ เตเร แลจื๊อเซอ ลอ เจ๊อเฮ๊อ เร๊อ หม่าเมเต เน แด่ เกอเจ๊อ ปา อาเส่ เกอ เป เตอเจ๋อ โต่โต่?”

39อา ก๊อถ่อ ซิพรวาเฮ๊ เก่แลเซ๊ เร๊อ อา เฮ๊ เทอฮ๊าโฮ๊เออ เน๊อ, “โอ่โก๊!” อา เฮ๊ เร๊อ เก่แลเซ๊ โอ่โก๊โตโพ๊ โอ่โก๊ เจ๊อ เร๊อ เทอฮ๊าโฮ๊ ปา แหน่ เตอเจ๋อ โต่.

40อา เฮ๊ เหย่ซี เน๊อ, “ซี ชิเช เมเต? ซี เหล่หยื่อเหล่แหน่ โอ่โต่ แอ?”

41เร๊อ เหย่ซี ชิเช ตาลว๊า ซิลือ เร๊อ เหย่ซี เฮ๊ เกอเร๊อ เป่ลู เน๊อ, “อา หม่า แกแย ฮู๊เต เตเพร เต? เก่แลเซ๊ เร๊อ เทอฮ๊าโฮ๊ เต๊เห่ เร๊อ อา หนิดา เจ๊อ ลูโหง่โหง่.”