Mark 8:31-38
เหย่ซู่ เฮ๊โฉ่โอ่เหน่ เหร่อ อา เบ่ ข่าจาข่าจือ เร๊อ อา เบ่ อาเซอ ปา อา คยา
(มัทธิว ๑๖:๒๑-๒๘, ลูกา ๙:๒๒-๒๗)
31เร๊อ เหย่ซู่ เป๊อแถ่ อิซว๊า อา โคเจ่ เต๊เห่ เน๊อ, “แว หม่า แกแยพู๊คู เร๊อ แว โตเบ่ ข่าเบ่ เอ๊แหน่เจ๊อ เตจาเตจือ ปา. เร๊อ แกแยยิวพู๊ ทวาดุทวาเตเนอ เต๊เห่, เพรหลู่แต ทวาดุทวาเต เต๊เห่. เร๊อ เพรอิซว๊า เตซว๊าเตแส่ อาซ๊าร๊า เต๊เห่ อาซ๊อต๊าหน่า ซ๊อตาพาแก แว ปา. เร๊อ เหย่ซี เก่ เมเซอแก แว ปา. เร๊อ แว เซอโทปา เร๊อ โซเนอ ปาเนอ, แว เก่ เซอ เพร กาคยา คยาแซ๊ เด๊อ เตเซอ ปา.” 32อา เฮ๊ ลอลี โปล ลอ เจ๊อ เหย่ซี เร๊อ ล๋อ เตเออเต๊เห่ อาคยา คูเปโตร เอ๊ อาจว๊า ตาพาจ่าเจแก แบ่เจ่ ตี๊กิแพ๊ เร๊อ อา ซิพรวา เหย่ซู่. 33หม่าแน๊เรอ เหย่ซู่ ตีรี๊โทตีรี๊แล เร๊อ อา แม๊เร เร๊อ อา โคเจ่ เต๊เห่ เร๊อ อา ซิพรวา กาคยาฉื่อ คูเปโตร เน๊อ, “เก๋อ โลเน๊มู๊แหม่ กู่กล๊อ, เถ่จว๊า ตาพาแก เร๊อ แว, เมเตเฮ๊เรอ เน เหล่เตเน เต๊เห่เนอ อาแซ่เน๊อ แกแย อา เหล่เตเน เนอ แพ๊, อา แซ่เกอ เร๊อ จอแปแหร่ อา เหล่เตเน เต๊เห่เนอ หม่าโต่.” 34โทเรอ เหย่ซู่ เอ๊แฮปล๊อเต่อ ลอ แกแย ตู๊หมู่ดุ เต๊เห่ เร๊อ อา โคเจ่ เต๊เห่ เด๊อ อา โอ่ เร๊อ อา เฮ๊ เหย่ซี เน๊อ, “แกแย เตเพรเพร เก่ ซิหยื่อ ครวา เกอแวคยา เฮ๊เรอ, อา โตเบ่ เม ฮู๊ แว ซิหยื่อนอเม ลู เนอเต๊เห่. อา เม จู๋ ดื่อ อาซิปล่อ หม่า อาหนิ โต่. อา เบ่ แย๊แถ่ หนิเร๊อดื่อ อา อี๊ถื่อดีเต่ เร๊อ อา เบ่ ครวา เกอแว คยา. a 35เมเตเฮ๊เรอ แกแย เด๊อ อา ซิหยื่อ เมแลเปล๊กา เกอเร๊อ อา ซิปล่อเซอเพร เตเพรเพร เนอ, อา เก่ แลจู่ แก อาซิปล่อ เซอเพร ปา. หม่าแน๊เรอ เด๊อ แวคยา เร๊อ แกแย เตเพรเพร เก่ เด๊อะแลแก อา ซิปล่อเซอเพร เร๊อ เตซิครือมีลา เออเนอ เด๊อ แวเง เฮ๊เนอ, อา เก่ พย๊าหนิ ซิ ปล่อเซอเพร ตูจูเพรเง ปา. b 36แกแย เต๊เห่ เก่ พย๊า หนิ ลอ เจ๊อ เห่ขุต๊าบ่า อา เตดุแหย่แถ่เซ เต๊เห่ เจ๊อ, เร๊อ อา เก่ แลจู่แก อา ซิปล่อเซอเพร ตูจูเพร เออ เฮ๊เนอ อาบุ๊ยโอ่ เด๊อ ลูเง อิเต? 37แกแย เด๊อ อา ซิหยื่อ พย๊าหนิ กาคยา คยาแซ๊ อา ซิปล่อเซอเพร ตูจูเพร เออ เตเพรเพรเนอ. เตดุแหย่แถ่เซ เด๊อ อา เก่ พรีเบ๊ เร๊อ อา ซิปล่อเซอเพร เออเนอ อา โอ่ เตอเจ๋อ โต่. 38กู๊แหน่ทือเค เด๊อ อา โอ่ โชชื่อแพ๊ เร๊อ แกแย เด๊อ อา เมซื๊อเมปล๊าเต, แกแย เด๊อ อา ครวาลือเม โต จอแปแหร่ อาซิปล่อ โอ่ ปา โต่ เออเตอทือเนอ, แกแย เตเพรเพร เด๊อ อา ซิเตเร แว, โท๊โต่ อา ซิเตเร แวลาแวโหง่ เออเต๊เห่ เตเพรเพร เนอ, ช๊า แกแยพู๊คู หม่าเฮ๊อ แวเออ เก่ แฮเฮ๊อ เร๊อ แวเพ อา เตอเรอดุเตอเรอทู ปา, เร๊อ แว แฮเต่อเกอ เร๊อ เตเน่วม๊อขุพู๊ บูโพ๊ เต๊เห่ เฮ๊อปา เบ๊อะเนอ, แว เก่ ซิเตเร เกอลาติ อา ปา.”Mark 9:1
1เหย่ซู่ เฮ๊ เหย่ซี เน๊อ, “แว เฮ๊ หม่าแหน่แหน่ เจ๊อ ซี, แกแย เด๊อ อา ก๊อถ่อโอ่ เบ๊อะซีเกล เออ เต๊เห่เห่เนอ, เบ๊อะเหย่ซี อาเซอ แต่ล๋ายโต่ เนอ, เหย่ซี เก่ แม๊เถอะน๊อ แลแค จอแปแหร่ แฮ เป๊อเทอเป๊อเก่ เร๊อ อา เตอเรอฉว่าชอ ปา.”
Copyright information for
EkySCThai